[]



Yüklə 2,02 Mb.
səhifə4/12
tarix29.05.2018
ölçüsü2,02 Mb.
#46523
1   2   3   4   5   6   7   8   9   ...   12

QULAQ VER, QULAQ VER

O BÜLBÜLƏ SƏN...
Gəlmədin, həsrətdən sinəm qabardı,

İndi ürəyimdə arzu qətlidir.

Məni görüşünə ümüd apardı,

Ümüdüm yanımda xəcalətlidir.


Bir güldən soruşdum, gülüm, yerini;

Didildi ləçəyi tez didim-didim.

O axşam qəlbimin açıb sirrini

Bülbülə danışdım, bülbülə dedim.


Əgər dediyimi bilmək istəsən,

Baxçadan ötəndə sübhün nəsimi.

Qulaq ver, qulq ver o bülbülə sən,

Deyəcək hər şeyi olduğu kimi.

1981

ÇİMƏRLİKDƏ
Xəzər--sonsuz su çəməni,

İnsanlar da--dəniz gülü.

Ülfət görüb qucağında

Fərəhindən dəniz gülür.

Qum üstünə düşən ləpir--

İnamdan iz, ümüddən iz.

Qocalara

Şəra dəniz, ümüd dəniz.

Ləpə gəlir, əl atıram

Qaçıb gedir əyilincə,

Cavanların nəzərində

Nəhəng dəniz--

Bir əyləncə.

Qız--gəlinlər çiçək kimi

Səpələnib dörd bir yana,

Gözəlliyə vurğun dəniz

Demirlər ki, birdən yanar.

Bu fürsəti vermir əldən,

Heç eləmir çimir dəniz,

Gözəlliyin qucağında

Xumarlanıb çimir dəniz.

Qızlar bu gün--su zanbağı,

Xəzər--sonsuz su çəməni.

Xəzər bu gün batıracaq

Min günaha, suça məni.

Baş vururam dalğalara

Qağayıtək,

Sağım, solum cilvələnir

Çiçək-çiçək.

Mən gedirəm, dinir bir qız:

“Batarsınız,

Baş vurmayın çox dərinə”.

Görən o qız bilirmi ki,

Qərq olmuşam, batmışam mən

Onun dəniz gözlərində.

1978


OD SÖNDÜRƏN
Uşaq kibrit çəkdi, alışdı yorğan.

Ölümün əlinə girəvə düşdü.

Bağlı pəncərədən, bağlı qapıdan

Alov paltarında bir evə düşdü.


Bir anlıq tövşüdü cürət, cəsarət--

Yaxının içində, yadın içində.

Qızışıb həddini aşdı fəlakət,

Bir həyat sönürdü odun içində.


Hava dalğalandı: “Nərdivanı tut!”

Bilmədim hayandan çıxdı bu şimşək.

Bilmədim kim idi bu çılğın bulud,

Alovun üstünə yağdı yağıştək.


...Alov can tapşırdı, oğlansa hələ

Aşmaq istəmirdi hisli barını.

Gördüm ki, qarsımış bir təbəssümlə

Qurudur uşağın göz yaşlarını.


Odsöndürən oğlan sevinc əndərib

Dünyanı fərəhlə doldurdu getdi.

Odsöndürən oğlan odu söndürüb.

Bir qızın qəlbinə od vurdu getdi.

1986


OLDUM ABBAS TUFARQANLI
Belə baxış görməmişəm,

Bu nə gözdür, Allah,Allah!

Qar əllərin hərarəti

Oddur, közdür, Allah, Allah!


Qaş altında sökülür dan,

Düşüb mələk qanadından.

Bu gözəli inadından

Özün bezdir, Allah, Allah!


Getdi, qaldım baxa-baxa,

Əğyar qoyar mani lağa.

Daş ürəyim ayrılığa

Necə dözdü? Allah, Allah!


Bu xəbəri apar, qanlı!

Müjdə qanlı, çapar qanlı.

Oldum abbas Tufarqanlı,

O, Gülgəzdi, Allah, Allah!

1985

GÖZLƏRİNƏ GÖZ DƏYƏR
(Mahnı)

Səni görüb dayanmışam nitdi lal,

Süzgün baxma, kirpiyini yavaş çal.

Gözlərinin qarşısında, ay maral,

Təkcə mən yox, hər kim olsa, baş əyər,

Elə baxma, gözlərinə göz dəyər.


Dikilibdir təkcə sənə gözlərim,

Sanki baxır aya, günə gözlərim,

Vurulubdur gözlərinə gözlərim.

Məhəbbətin ilk sözünü göz deyər,

Elə baxma, gözlərinə göz dəyər.
Qoşa gəzək bu çəməni, bu dağı,

Çiçəklənsin eşqimizin növrağı,

Gözlərindir məhəbbətin çırağı

Şölələnib ömrümə nur çiləyər.

Elə baxma, gözlərinə göz dəyər.

1981


NEÇƏ Kİ FÜRSƏTDİR...
Yenə göz dəyməsin, geyinmisiniz

Təzənin üstündən təzəni, qızlar.

Kaş ki, urcahına siz şıxasınız

Özünə bəxt, iqbal, gəzənin,qızlar!


Eşqimin göyləri sissiz olmayıb,

Ürəyim çağlayıb, hissiz olmayıb.

Xəyalım bircə an sizsiz olmayıb,

Vəsvəli,sürməli, nazənin qızlar!


Ömrün zirvəsindən qar aşan deyil,

Ağ saçla, birçəklə kar aşan deyil,

Sonra bəzənsəniz, yaraşan deyil,

Neçə ki fürsətdir bəzənin, qızlar.


1987

VAXTINDA ƏVVƏL
Səni min il qabaq doğsaydı anan,

Əsirlər arada olsaydı əngəl.

Mən də bu dünyaya gələrdim inan

Vaxtından əvvəl.


Sevdan ürəyimdə bahar yağışı.

Onun ilqarıdır eşqimə təməl.

Bizim xətrimizə yaz qovub qışı

Vaxtından əvvəl.


Üzünü bircə gün görməsəm əgər,

Qocalıq üstümü alıb əlbəhəl,

Saçımda sevdiyin ağ çiçək açar

Vaxtından əvvəl.


Çiçəyim, axşam görüş vəd etsən,

Qəlbimi çıxarıb edərəm məşəl.

Günəşi qüruba göndərərəm mən,

Gündüzü axşama döndərərəm mən

Vaxtından əvvəl.

1982

QORXURAM Kİ, DİLƏ-DİŞƏ DÜŞƏSƏN
Birçəklərin dəstə çiçək, dəstə gül,

Dost bağından sovqat gedər dosta gül.

Asta tərpən, asta danış, asta gül--

Zəriflikdə, incəlikdə şüşəsən,

“Qorxuram ki dilə-dişə düşəsən”.
Əyri qaşlar ümüdümün yoludur,

Ala gözlər məhəbbətlə doludur.

Göy üzündən dağıdaram buludu

Bu yaylaqda, bu çəməndə üşüsən,

“Qorxuram ki dilə-dişə düşəsən”.
Meydan sinən təbiyətin sehrimi?!

Dağda can yox, çəkə bilməz qəhrimi.

“Getdim” deyib, yenə yarma zəhrimi

Ürəyimi belə çəkmə şişə sən,

“Qorxuram ki dilə-dişə düşəsən”.
Bu dünyaya tək gəlmişəm dözümdə,

Ocaq bişər, od qaynayar közümdə.

Yanar dağsan, a ceyran qız, gözümdə

Demirəm ki, sərin susan, meşəsən.

“Qorxuram ki dilə-dişə düşəsən”.

1981


MƏN DEDİYİM BAHAR SƏNSƏN
Vurulmuşam uşaqlıqdan

Xoş nəfəsli ilk bahara.

Söküləndə üfüqdə Dan

Mən dalmışam xəyallara.


Qış vaxtı da ilk baharı

Üfüqlərdə axtarmışam.

Dağda çiçək bilib qarı,

Çox baxmışam səhər, axşam.


Bahar qədər qəlbim incə,

Mehribandır təbiətim.

Ay ötdükcə, il ötdükcə

Artdı sənə məhəbbətim.


O sevdiyim bahar kimi

Sevdim səni mən ürəkdən.

Agül qədəm, al qəlbimi,

Gözlədiyim bahar sənsən.



BARIŞIQ
--Göygölü görməmişəm.

--Yayda gedək, mən hazır!

--Göyçə düşüb yadıma.

--O da dünəndən hazır!

--Deyirlər ki dağlarda

Nağıldır Löh qalası.

--Burda çətin nə var ki!

Yayda gedək, qadası.

--Altayda baldızım var...

--Altayada gedərik.

--Qayıdanda Soçiyə,

Yaltaya da gedərik.

Düz deyirsən--bir evdən

Baxmaq olmaz dünyaya.

Tələsmə, sağlıq olsun,

Hər şeyi saxla yaya...

Ömür-gün yoldaşımla

Beləcə söhbət etdik,

Özümüzü danladıq,

Xeyli məzəmmət etdik.

Yay gəldi, getdik kəndə.

Günlərimin yarısı

Tənha keçdi çəməndə.

Əlimdən tutub məni

İlan cığır apardı.

Köhnə yaylaq yaramın

Qaysağını qopardı.

Başımıza toplaşdı

Qonum-qonşu axşamlar

Gecə keçdi yarıdan,

Söhbət etdik o ki var.

Neçə-neçə xoş xəbər,

Xoş arzular eşitdim.

Hərdən də söz arası

Giley-güzar eşitdim:

Bir ata öz oğlundan,

Qonşu qonşudan küsüb.

Bir ağsaqqal ərkindən

Küsüb bir nadan, küsüb.

Bir gəlin qaçıb evdən,

Ərindən incik düşüb.

Qayıtmağa utanır,

Boynunaca yük düşüb.

Gəzməyə tələsmədim--

Hər işdə təmkin, səbir

Küsənləri danladım,

Barışdırdım birbəbir.

Vaxt gəlib çatdı sona,

Nə Göygölə, Göyçəyə,

Nə də Altaya getdik.

Nə Soçiyə, nə Löhə,

Nə də Yaltaya getdik.

Hamını barışdırdım,

Özcə ömür yoldaşım

Məndən küsdü bu dəfə,

Yay qurtardı, biz isə

Küsülü döndük evə.


GÖZƏLLİK ÇEMPİONU
Gözəl-gözəl kəndlərdən,

Şəhərlərdən bezmişəm,

Sizsiz ötən günlərə

Ölə-ölə dözmüşəm,

Azərbaycan qızları!
Saçlar--cənnət çiçəyi,

Tər də ismət təridir,

Gözəlliyin yazdığı

Məhəbbət əsəridir

Azərbaycan qızları.
Deməyin ki, yetənə

Gündə yazığım gəlir.

Siz olmayan şəhərə,

Kəndə yazığım gəlir,

Azərbaycan qızları!
Gözəlliyin zirvəsi,

Son hüdudu, sonudur,

Gözəllik yarışının

Mütüləq çempionudur

Azərbaycan qızları.

1979


GƏLDİM Kİ...
Vurulduğum gül baxçalar, gül bağlar

Xəzəl olub saralıbdır gəldim ki.

Mən gəzdiyim cığırları, yolları

Başdan-başa qar alıbdır gəldim ki.


Nələ çəkər Tərtər məndən uzaqda,

Qıjıltısı yuva salıb qulaqda.

Axşam-səhər yuyunduğum bulaq da

Ağlamaqdan kor olubdur gəldim ki.


Qismətimə düşən heyva, nar acı.

Çal ağlasın bu halıma “Qaraçı”.

Qovub-qovub o yorduğum turacı

Bir hünərsiz sar alıbdır gəldim ki,


Ötən çağlar, yenə səfə düzülün,

Bir an imiş sanki ömrü yüz ilin.

On beş yaşda gözüm tutan gözəlin

Qara teli qar olubdur gəldim ki.


Gərdən çəkib göyü sökən dağların,

Ətəyinə duman çökən dağların,

“Ənvər!” deyib haray çəkən dağların

Qanı mənsiz qaralıbdır gəldim ki.

1981


GƏNCLİYİM
Yurddan-yurda köçmək mənim peşəmdir,

Belə qəfil hara köçdü gəncliyim?

Ötən günün ötən çağın boyuna

Həsrətimdən paltar biçdi gəncliyim.


Gah tutuldum, gəa açıldım göy kimi,

Səyyah xəyal o dağların peykimi?

Gözəllərin gözlərindən mey kimi

Təşnələnib sevgi içdi gəncliyim.


Ürəyimə məlhəm anlar, dost anlar...

Dost sözünü dost eşidər, dost anlar.

Ay nağillar, bayatılar, dastanlar,

Pir deyibən sizi seçdi gəncliyim.


Yorğunluğu tanımayan, danan mən,

Zirvələrə qartal kimi qonan mən.

Uşaq idim bu dağlarda dünən mən,

Hçan gəldi, haçan keçdi gəncliyim?!


Dik yoxuşlar sərt inadım, təkidim,

Mən o zaman yalqöz idim, tək idim.

Üç oğlum var--üç tərlanım, igidim.

Könül, sevin--indi üçdü gəncliyim.

1979


QAR YAĞIR
Qar yağır, dünyanın bənizi bəyaz,

Səhrası meşəsi, dənizi bəyaz.

Bəyaz bir aləmə qapılmışıq biz,

İtib bəyazlıqda tapılmışıq biz.

Dünya bir gəlindir bəyaz duvaxda,

Bəyazlıq bəxş edib tale bu vaxta.

Bütün boyaları udubdur bu qış,

Aləmi bəyaza tutubdur bu qış.


Bəyaz qar üstündə bəyaz izimiz,

Qar da tərtəmizdir, iz də tərtəmiz.

Quzeydə bəyazdır, güneydə bəyaz.

Qəşəng qız, etdiyin gileydə bəyaz.

Bəyazlıq kükrəyib, aşıb-daşıbdır,

Ətrafda hər nə var bəyazlaşıbdır.

Qış yerə paltarı bəyazdan biçib,

Qara paltomuza bəyaz don biçib.

Cökələr, vələslər, palıdlar bəyaz,

Bizə nağıl tökən buludlar bəyaz.

Bu bəyaz aləmə üsyan edərək

Qaralır gözlərin qaraşanı tək.

Qıçın inadını qırıb o gözlər,

Qışın qanadını qırıb o gözlər,

Bu qış niyyətimi bilib bəlkə də,

Qünyaya yazığı gəlir bəlkə də.

Dəli məhəbbətlə bacarmaz qar ki!

Yəqin eşidibdir, xəbəri var ki,

Bircə an görməsəm o gözləri mən,

Yeri çıxardaram öz məhvərindən.

1983

YARI BULAQ, YARI LİLPAR

ANAM QOCALIB
Anam elə qocalıb ki,

Yaddaşında düyün düşüb

Olub keçən.

Qocalıbdır dırnağacan,

Kirpiyəcən.

Anam üçün naz-nemətin

Dadı qaçıb,

Anam elə qocalıb ki,

Yaddaşından adı qaçıb.

Yumru daşla, təsbeh ilə

O əylənir.

Söz düşəndə dağdan-daşdan

Gileylənir.

Yazıq anam elə bilir

Sular daha şırıldamır.

Elə bilir

Göylər daha əvvəlkitək

Guruldamır,

Elə bilir

Tilsimlənib yaylaq yolu,

Dağlar qaçıb uzaqlaşıb,

Elə bilir

Təbiətin ağlı çaşıb.

Yayın günü

Oda verir əllərini.

Deyir: Axı od-ocağın

O əvəlki karı yoxdur,

Ayın, Günün, uldzun da

O mən görən nuru yoxdur.

Anam ki var—kövrək şüşə

Qorxuram ki, yox deyərəm

Bu zəriflik yerə düşə,

Cilik-cilik parçalana,

Sonra qalam yana-yana.

Tək anamın xətri üçün

Üzr istəyib təbiətdən

Üzdə gülüş, ürəkdə qəm

Hər kəlməyə

Başım ilə hə deyirəm.

DOYMAMIŞAM
Mən tərəf uşaq kimi

Qaçmağından doymamışam,

Anam mənim!

O ismətli paltarından,

Başmağından doymamışam,

Anam mənim!


Üşüsən, isin istimə,

Saçın qarışsın tüstümə.

Səhvim olanda, üstümə

Coşmağından doymamışam,

Anam mənim!
Səsin həzin bir tütəkdi,

Üz-gözündə vaxt qəm əkdi.

Yaşmaq yaşınmaq deməkdi,

Yaşmağından doymamışam,

Anam mənim!
Qışdakı işin yayadı,

Bu süzgəcdi, bu mayadı...

Hər gələndə bir bayatı,

Qoşmağından doymamışam,

Anam mənim!

1981.



ƏLİM AYRILMASIN KAŞ ƏLLƏRİNDƏN
Mənim qoca anam, ağbirçək anam,

Kövrək baxışların sozaltdı məni.

Döndüm nəzərində fərəh dağına,

Gözlərin qəlbinə boşaltdı məni.


Daddım yavan çörək, aş, əllərindən,

Əlim ayrılmasın kaş əllərindən.

Sənin göy damarlı daş əllərindən

Əyilib öpməyim ucaltdı məni.


O şirin dilində təkcə, bircə mən,

Eşqin, məhəbbətin solmaz bir çəmən.

Anam, qocalmazdım ölən günəcən,

Sənin qocalmağın qocaltdı məni.

` 1979

ÜRƏK, DƏRDƏ GÜC ELƏ
Bağım,bağçam anamsız

Yetimləşər, sozalar,

Çəmən onun çeşnisi,

Yad əl dəysə, pozular.


Səpələdi su pəri,

Sındı qayğı sipəri.

Bu bel bükən xəbəri

Kaş yalana yozalar.


Ürək, dərdə güc elə,

Döy başına, gic elə.

Əcələ bax, əcələ!..

Əcəldə də naz olar?!


Qızıl inək neçə gün

Mələyər için-için.

Onu ovutmaq üçün

Yanağımda duz olar.


Quzeydə qar sulandı,

Ürəyim qarsılandı.

Yaz gəlməyib, yalandı—

Anamsız da yaz olar?!

1986.


BAYATILAR
Arxaca,

Sürüm dönməz arxaca.

Arxımı sel aparıb,

Arxam yoxdu arx aça.


Açarı,

Kirpiyin bəxt açarı.

Dodağın ballı pətək,

Dodaqlarım—ac arı.


Aynabəndə,

Yar çıxıb aynabəndə.

Gözündə gözlərimi,

Salıbdı ayna bəndə.


Yastığında,

Xəncərin yastı qında.

Xəyalıma yer elə,

Uyusun yastığında.


Ağca—maya,

Bənzəyir ağcam Aya,

Bu dağların nəri mən,

Yanımda ağca maya.


Alalar,

Bitməyəydi alalar.

Səni görcək, qızıl gül,

Yanağından al alar.


Elə dəniz,

Eşqimi elə dəniz.

Əğyar girdi araya,

Yar saldı elədən iz.


Az aldana,

Sevən qəlb az aldana.

Düşmənəm eşq odunu,

Əskildib-azaldana.


Gülə bəndəm,

Gül sənsən, gülə bəndəm.

Gir qoynuma, qoy olsun

Qollarım gülə bəndəm.


Ar ata,

Vurulubdu ara ta.

Qəlbim hicran şumudu,

Kədər çıxıb arata.


O yaxdı,

Həsrət coşdu, oy axdı!

Tale yatıb, bəxt yatıb,

Dərdim yatmır, oyaqdır.


Təzə nəmdi,

Şeh düşüb, təzə nəmdi.

Yarın qoynu telli saz,

Əllərim təzənəmdi.


Xar ala,

Gülü çəkir, xar ala.

Mən gül əkdim özümə,

Əkmədim ki, xar ala.


Bu ox qanlı, yay qanlı

Axar bulaq, çay qanlı,

Dağda kəklik ovladım,

Oldum dağla vayqanlı.



YAZIQ ŞAİRLƏR
Anasını oğul atıb,

Mayasına haram qatıb,

Oğlan qıza yalan satıb—

Yazıq şairlər!


Bir baxışdan kədər sızdı,

Haqq yazanı, əyri pozdu.

Məktub gəlib, imzasızdı—

Yazıq şairlər!


Bu nə təlaş, bu nə təşviş?!

Tamah üsdə dolaşıb iş.

Müdir olub bir görməmiş—

Yazıq şairlər!


Namərd dayanıb marıqda,

Piltə kül olub çıraqda,

Ceyran satılıb qoruqda—

Yazıq şairlər!


Əl çəkməzlər bu peşədən?

Giley duydum bənövşədən.

İz qalmayıb bir meşədən—

Yazıq şairlər!


Analar var: batıb yasa,

El var: həsrət qalıb yaza.

İnsan ağlayır hardasa—

Yazıq şairlər!

Yazıq şairlər!

HƏR KƏS ÖZ SÜDÜNƏ GÖRƏ MƏLƏSƏ
Bu məsəl lazımdı, gərəkdir bizə:

“Hər kəs öz südünə görə mələsə...”

Palıda palıd de, gəvən gəvəndi.

Yarama xışmayla gəl basma duzu.

Əmdiyi bir üskük südə güvəndi,

Mələdi, astaca mələdi quzu.

Baxıb aqil babam bığaltı güldü,

Sözləri hikmətdə girişdi bəhsə.

Bir məsəl yaranıb dilimə gəldi:

“Hər kəs öz südünə görə mələsə”.

Bibərdən, soğandan acılıq dilə,

Şirəli meyvədən gəl istə dadı.

Bir nadan yanında müdikə hələ

Düşməndir, əngəldir öz istedadı.

Dargözü, darqəlbi dardan asalar...

Yovşan lağ etməyə boyda vələsə.

Şeytana deyilən lənət azalar

Hər kəs öz südünə görə mələsə.


Könül, xydpəsənddən uzaq ol, uzaq,

Gengəz harınların “mən” nidasından.

Məkri, fəndi yoxdur—şirdən qorxmayaq,

Çəkinək tülkünün şir ədasından.

Xalça qiymətinə satılmaz keçə,

Bir dəllal and içib, aman eləsə

Mənimdə yastığım dincələr gecə

Hər kəs öz südünə görə mələsə.


Bizim amalımız günəşdir sanki,

Bu amal uğrunda ellər cəm olur.

Hələ aramızda müdirlər var ki,

Adam baxışından sətəlcəm olur.

Zalımın tanımır qılıncı qını,

Hədə-qorxu gəlir elə hər kəsə.

Etiraf eyləyər cılızlığını

O da öz südünə görə mələsə.

1982.


QORQUD TƏNƏSİ

-Adın nədir, qəşəng bala?

-Qərib.

-Qərib?


-Bəli, Qərib! Xeyir ola?

-Kim bu adı qoyub sənə?

-Atam, anam.

-Haralısan?

-Bu kənddənəm, obadanam.

-Atan, anan haralıdır?

-İkisi də buralıdır.

-Adın niyə Qərib olsun

Onda quzum?

-Qəribdir də, necə deyim,

Necə yozum?

On yaşım var.

Bir də ki mən tək deyiləm,

Kəndimizdə

Çoxlu-çoxlu qdaşım var.

-Nahaq yerə.

Axı qərib deyilsən sən.

-Yox Qəribəm. Atam canı,

Anam canı...

Danışdıqca aşıb daşır

Bir uşağın həyacanı.

Bu vaxt kimsə haray çəkir.

Qərib! Qərib!—deyə-deyə.

Qərib mənə “Sağ ol!” deyir,

Qərib dönür bir şimşəyə.

Adın niyə Qərib olsun

Ay bu elin oğul barı,

Vətəninin, ay sabahkı

Qoruqçusu, xilaskarı?!

Bizdən küsüb, inciməzmi

Bu doğma yurd, ana torpaq?

Ataların, anaların

Qoyduqlarıada bir bax!

Əsrlərin arxasından

Tənələsin Qorqud Dədə

Qoy onları.

Tənələsin öz yurduna

Övladına “Qərib” adı

Qoyanları.

1982.


AXI NƏ AD VERİM
Bülbülüm qəfəsdən uçdu bu səhər,

Ömründə ilk dəfə bir bağa düşdü.

Mənim pərtliyimə sevindi güllər,

Yarpaqlar əl çaldı, otlar gülüşdü.


Gəzdi ağaclarda sarı bir limon,

Budaqlar yellənib durdu çəminə.

Elə bil qovuşdu saz ilə qarmon,

Bir nəğmə yağışı yağdı çəmənə.


Bülbül oxuduqca gəldi həvəsə,

Onu harayladı gül əylənməyə,

Bir bülülə baxdım, bir də qəfəsə--

Başladım özümdən gileylənməyə.


Bir xəta elədim, sevindim həm də,

Saflaşdı bu səhvdən sanki varlığım.

Sıxdı dönə-dönə öz aləmimdə

Səhvimin əlini minətdarlığım.


Dedim azad oldu dərddən, ələmdən,

Qoy dursun güllərlə nəfəs-nəfəsə.

Axşam sevincimi alıb əlimdən

Bülbülüm qayıdıb girdi qəfəsə.


Ağladı yenə də bir nəğmə, bir ün,

Məndəki dözümü gəl indi sına.

Axı nə ad verim sarı bülbülün

Qəfəsə könüllü qayıtmasına.



QALAY
Bəşər oğlu qalay çəkdi

Paxır misə.

Qalayçının əllrindən

Günəş doğdu baydamıza,

Sinimizə.

Qalayçılar qalayladı

Qabımızı.

Bir yandan da

Qalaylanmış sözlər kəsdi

Qapımızı.

Zəhmət təri yaxşıların

Kürəyində qalay oldu.

Yaxşılıq da yamanların

Körüyündə qalay oldu

“Ustalaşdı” yer övladı—

Buza közdən qalay çəkdi.

“Ustalaşdı” yer övladı—

Sözə sözdən qalay çəkdi.

Bir gülüşün qalayında

Neçə ümid baltalandı,

Bal sözlərin qalayında

Yağ talandı, bal talandı.

Qalayşılıq boy göstərdi

Salamlarda, sağollarda.

Qalayşılıq boy göstərdi

Sığallarda.

Qalaylanmış sözlər ilə

Neçə millət tumarlandı,

Xumarlandı.

Neçə ölkə qamarlandı.

“Azadlıqlar” qalayladı

Əsarəti.


Vədlər yedi cəsarəti

Umacaqlar yürüş etdi

Səngərlərə sinə-sinə.

Təmənnalar qalay çəkdi,

Ordenlərə, medallara

Satqınların sinısinə.

Qalaylanıb möminləşdi

Kafirlər də.

Əsil mətləb qalaylandı

Efirlərdə.

“Azadlığı” bayraq edən

Tiran oldu.

Neçə ölkə

“Azadlıqdan” viran oldu.

Sam dayının, polpotlatın

Nitqlərində

Qalaylandı xeyirlə şər.

Nə yaxşı ki baş çıxarır

Siyasətdən indi bəşər.


EYNƏYİMƏ
Aylar talançıymış, illər qılıqbaz.

Bircə çatışmırmış ey, nəyim mənim!

Gələni qapıdan qaytarmaq olmaz,

Salam xoş gəlmisən, eynəyim mənim!


Yüz yana, yüz səmtə qondu göz arım,

Göz açıb dünyanı gzümə gözümə təpdim.

Yoxdur gözlərimdən giley-güzarım—

Onlarn nurunu zülmətə səpdim.


Qoy elə şərtimi şumda kəsim mən,

Axşamım, səhərim, gecəm axtarış.

İndi ki, gəlmisən, olduq bir bədən,

Ağlımla hissimlə qaynayıb qarış.


Sən gərək indidən ayıq olasan!

Dəyişib cildini nifrət də, kin də.

Gərək qələmimə dayaq olasan,

Görək dünyamızı özcə rəngində.


Ayağıyalını çəkməli görsən,

Səndən göz olmaz.

Ziqara qətrana bəyaz tül desən,

Səndən gz olmaz.


Zillənib-zillənib güdsən kimsəni,

Doğmalar görünsə özgə, yad kimi,

Geri çağıraram yosa ki səni

Ümid doğrultmayan deputat kimi.

1987.

GÖRÜŞDÜK, KAŞ BİR DƏ GÖRÜŞMƏYƏYDİK

İngilis dili fakültəsini fərqlənmə diplomu

ilə qurtarıb,indi ticarətdəişləyən “N” adlı

tələbəmə
Görüşdük, kaş belə görüşməyəydik—

İldirm şaxıdı ümidlərimə.

Kaş durub hal-əhval soruşmayaydıq.

Bu sel izdihamda axı kim-kimə!

İynətək sancıldı beynimə hər tük,

Görüşdük, kaş belə görüşməyəydik!


Çəkdin, xəyalımı keçmişə çəkdin,

Sənə heyranlığım düşdü yadıma.

Doğrayıb ətimi sən şişə çəkdin,

Bir az gileylənim doğma, yadıma.

Kim dedi qəsri yıx, yerində dam tik?!

Görüşdük, kaş belə görüşməyəydik!


Səni bənzətməzdim yada, özgəyə,

Məndə nəzərində nəhəng, nərdimki!

Mən sənin özünə dərs deyə-deyə

Mən səndən o qədər öyrənərdim ki.

Arzu qanadlıydıq, şimşəkdən yeydik

Görüşdük, kaş belə görüşməyəydik!


Niyəli-niyəli sual verərdin,

Di gəl niyələrdən sükut ilə keç!

Marafon yarışı, startda min-min,

Axırda finişə beşi çatmır heç.

Bir dünya həvəsi əsgiyə düydük?

Görüşdük, kaş belə görüşməyəydik!


Arzun dağ boydaydı, dağ olmamışdın,

Salmısan fikrimi bəd gümanlara.

Sən ki sayğac üçün doğulmamışdın,

Axı dilçi hara, ticarət hara?!

Nizam tərəzinin gözünü əydik?

Görüşdük, kaş belə görüşməyəydik!


Üsullar tapardın, tutarlı, çəmli,

Duyardım, sevərdim ərkini onda.

Arxiv ünvanlıydı, müjdə qədəmli,

Tələbə ömrünün hər günü onda.

Əmlik arzuların xətrinə dəydik,

Görüşdük, kaş belə görüşməyəydik!


Ay ümid qönçəmin qarlı quzeeyi,

Hanı o seçdiyin el yozmaları?

Hanı kitabxana, London muzeyi,

Gözləri yolçəkən əlyazmaları?

Özgə qapısını nahaqmı döydük?

Görüşdük, kaş belə görüşməyəydik!


Xəyanət eylədin öz əmyinə,

O vaxt inanmazdım səndən usanam.

Həyat yollarında büdrəməyinə,

Peşman da deyilsən—buna peşmanam.

Nə üzlə baxırsan üzümə dik-dik!

Görüşdük, kaş belə görüşməyəydik!


Niyəli-niyəli haqq-hesab apar,

Gözümə sancılır nəfsinin burnu.

Kağıza köçməyən şeirlərim var,

Ürəyim yazıqdı, bilməsin bunu.

Kəssin aramızı qarlı bir gədik,

Görüşdük, kaş bir də görüşməyəydik!

1984.


Yüklə 2,02 Mb.

Dostları ilə paylaş:
1   2   3   4   5   6   7   8   9   ...   12




Verilənlər bazası müəlliflik hüququ ilə müdafiə olunur ©genderi.org 2024
rəhbərliyinə müraciət

    Ana səhifə