23
11.Azərbaycanın Əhəmənilər imperiyasından asılı vəziyyətə
düşməsi və nəticələri
II Kir Midiyanı ələ keçirdikdən sonra Əhəməni fars dövlətinin əsasını
qoymuşdur. Əhəməni sülaləsinin banisi Əhəmən olmuşdur. Onun ilk vətəni İranın
cənub-şərqində yerləşən Fars əyaləti hesab olunur. Buradan farslar tədricən
yayılmış və Elamın Anşan vilayətinə yiyələnmişlər. Bəzi mülahizələrə görə farslar
buraya e.ə. VIII əsrdə Parsua vilayətindən, Diyala çayının yuxarı axarından
gəlmişlər. Parsua ölkə adı onların etnik (pars, fars) adına çevrilmişdir. E.ə. VI əsrin
əvvəllərində Anşan və Parsa Midiyanın hakimiyyəti altına keçir. II Kir (e.ə. 558-
530) fars tayfalarını birləşdirib Midiyaya qarşı müharibəyə başlayır. E.ə. 550-ci
ildə fars qoşunları Midiyanın paytaxtı Ekbatana şəhərini tuturlar. II Kir özünü
Midiya şahı elan edir. II Kir Midiyada öz hakimiyyətini qanuniləşdirmək üçün
Astiaqın qızı ilə evlənir. Farslar Midiya mədəniyyətinin bir çox sahələrini, eləcə də
dövlət idarə quruluşunu mənimsəyirlər. Qədim yunanlar, misirlilər və başqa xalqlar
Midiya taxt-tacının Kirin əlinə keçməsini miras kimi başa düşür, çox hallarda isə
əhəməni sülaləsinin şahlarını və farsları “midiyalı” adlandırırdılar. Bir neçə il
ərzində II Kir Midiya dövlətinin tərkibinə daxil olan ölkələri özünə tabe etdi.
E.ə. 530-cü ildə II Kir massaget tayfalarına qarşı yürüş təçkil etdi.
Herodotun məlumatından belə nəticəyə gəlmək olur ki, II Kir Araz çayından
şimalda yaşayan massaget tayfalarına qarşı çıxış etmişdi. Məlumdur ki, hələ e.ə.
VII əsrin birinci rübündə Azərbaycan ərazisində skit və sak tayfaları məsgən
salmışdılar. Massagetlər də skit tayfa birliyinə daxil idilər. Dion Kassi Arazdan
şimalda yaşayan albanları massaget mənşəli hesab edirdi. Erkən orta əsrlərdə
Şimali Azərbaycan əhalisinin bir hissəsi massaget adlandırılırdı. Strabon qeyd
etmişdi ki, skitlərin böyük bir hissəsi massaget və sak adını daşıyırdılar. Ehtimala
görə, II Kir Şimali Azərbaycanın ərazisində yaşayan və massaget adlanan etnoslara
24
qarşı yürüş təşkil etmişdi. Bu tayfaların hökmdarı Tomris tərəfindən məğlubiyyətə
uğradılaraq həlak olmuşdu. Beləliklə, əhəmənilərin Araz çayından şimalda
yerləşən torpaqları tutmaq cəhdi boşa çıxmışdı.
II Kirin oğlu Kambiz (e.ə. 530-522) Misir səfərində olarkən e.ə. 522-ci ildə
İranda dövlət çevrilişi olur və hakimiyyətə onun qardaşı Bardi gəlir. Əhəməni
nəslinin digər qoluna mənsub olan Dara Qaumatanı yalançı Bardi kimi qələmə
verərək sui-qəsd təşkil edir və Bardi öldürülür. I Dara (e.ə. 522-486) sui-qəsd
nəticəsində hakimiyyətə gəlir. Əslində, I Dara II Kirin oğlu Bardini hakimiyyətdən
salmış, Bisütun yazılarında onu yalançı Bardi kimi qələm vermiş və onu Qaumata
adlandırmışdı. Məhz buna görə əhəməni dövlətinin tərkibində olan bir çox ölkələr
üsyan qaldırmışdılar. Üsyan qaldıran ölkələr arasında Azərbaycanda yaşayan
tayfaların və əhalinin adı çəkilməmişdir. Yəqin ki, Cənubi Azərbaycan müstəqil
daxili idarə üsulunu saxlamış və buna görə də üsyan qaldırmamışdı. Herodotun
məlumatına görə, Araz çayından şimalda yaşayan xalqlar könüllü olaraq əhəməni
dövlətini tanımış və ona xərac verməyə razılaşmışdılar.
Xarici siyasətində yad ölkələrin işğalı başlıca yer tutan I Dara e.ə. 519-cu
ildə ilk növbədə skit və sak tayfalarına qarşı yürüşlər təşkil edir. I Dara qələbədən
sonra sakların ancaq başçısını dəyişmiş və istədiyi adamı hakim qoymuşdu. Yəqin
ki, sak adı altında Azərbaycanın bir sıra etnoslarının adları cəmləşdirilmişdi, çünki
bu zaman bütövlükdə Azərbaycanı ifadə edən məfhum hələ işlədilmirdi.
I Dara işğal olunmuş ölkələri 20 satraplığa (canişinliyə) bölür və hər bir
canişinlik müəyyən vergi dairəsinə salınır. Bu və ya digər vergi dairəsinə
Azərbaycanda yaşayan etnoslardan kaspilər, saklar, utilər, müklər, matienlər və
başqaları daxil edilmişdilər.
I Daranın oğlu Kserksin (e.ə. 486-465-ci illər) ordusunda fars-yunan
müharibələri zamanı Azərbaycanda yaşayan həmin tayfaların iştirakı qeyd
edilmişdir. Azərbaycan ərazisində yaşayan bu tayfalar öz başçıları ilə birlikdə
əhəməni ordusunda vuruşurdular. Onlar Əhəməni sərkərdələrinin tabeliyində idilər.
Herodotun məlumatından belə nəticə çıxarmaq olar ki, Azərbaycan I Daranın
25
dövründən etibarən əhəmənilərdən asılı vəziyyətə düşmüşdür.
12. Makedoniyalı İskəndərin Şərqə hərbi yürüşləri.
E.ə. 336-cı ildə II Filippin ölümündən sonra hakimiyyətə oğlu İskəndər
(e.ə. 336-323-cü illər) gəldi. Iskəndər atasının siyasətini davam etdirərək şərq
ölkələrinə yürüşə hazırlaşdı. Bu zaman şərq ölkələri, o cümlədən qərbi Anadolu
ərazisindəki yunan şəhərləri əhəmnilərin hakimiyyəti altında idi.
E.ə. 334-cü ilin yazında İskəndərin makedoniyalı və yunanlardan ibarət 35
minlik ordusu Şərqə doğru hərəkətə başladı. Əhəməni Şahı III Dara 40 minlik
ordusu ilə Qranik çayı yaxınlığında İskəndərlə qarşılaşdı, lakin məğlub oldu.
E.ə. 333-cü ildə Anadolunun xeyli hissəsi İskəndərin əlinə keçdi. III Dara
böyük qüvvə toplayaraq Suriyaya tərəf irəlilədi və İso şəhəri yaxınlığında
Makedoniya ordusu ilə üz-üzə gəldi. Makedoniyalılar bu döyüşdə qələbə çaldılar.
Əhəməni ordusunun qalığı III Dara başda olmaqla döyüş meydanından qaçdı.
Bu qələbədən sonra İskəndər Misirə yola düşdü. Misir müqavimət
göstərmədi.
Iskəndər Misirdən çıxaraq İkiçayarasına doğru hərəkət etdi. III Dara
döyüşə ciddi hazırlaşmış, 100 mindən artıq hərbi qüvvə toplamışdı. Əhəməni
dövlətinin tərkibinə daxil olan və onu tanıyan ölkələr kömək məqsədi ilə hərbi
dəstələr göndərmişdilər. Əhəməni ordusunun tərkibinə daxil olan midiyalılara
Atropat başçılıq edirdi.
Qavqamela (cancal) döyüşünə Azərbaycanda yaşayan tayfalarda cəlb
olunmuşdu. Kursi Rufun məlumatına görə kaspilər, mardlar, skitlər, kadusilər bu
döyüşdə iştirak edirdilər. Arrianın məlumatına görə, alanlar, sakesinlər, həmçinin
midiyalılar, saklar və b. sağ cinahda, kadusilər sol cinahda düzülmüşdülər.
beləliklə, Cancal döyüşündə Azərbaycanda yaşayan tayfalar alban, sakesin, kaspi,
kadusi, mard, sak və qafqazlı adı altında III Daranın tərəfində iştirak edirdilər.
Dostları ilə paylaş: |