1-Ma’ruza. Minerallar to‘g‘risida umumiy ma’lumot

Minerallar va mineralogik tadqiqotlarning sanoatdagi ahamiyati
Sanoatning bironta ham sohasi yo‘qki, unda biror foydali qazilma bevosita xom holicha yoki qaytadan ishlangan mahsulot sifatida qo‘llanilmasin. Inson uchun temir ma’danini qazib, undan metallurgiya yo‘li bilan tayyorlangan turli navli cho‘yan va po‘latning muhim ahamiyatga ega ekanligi hammaga ma’lum. Temir – sanoatning asosiy asbob tomiridir. U metallurgiya, mashinasozlik, kemasozlik, temir yo‘l, ko‘priklar, temir-beton inshootlari, kon asbob-uskunalari, keng iste’mol mollari va hokazo uchun asosdir. O‘z navbatida, faqat birgina temir metallurgiyasining o‘zi qazib chiqarilayotgan qattiq mineral yoqilg‘ining – koksga aylantiriladigan toshko‘mirning 40 %ga yaqinini talab qiladi. Sanoat taraqqiyotida suyuq mineral yoqilg‘i-neft va uning ishlangan mahsulotlari ham nihoyatda katta rol o‘ynaydi. Yonuvchi gazlarning ahamiyati ham kundan-kunga ortib bormoqda.

Rangli metallurgiya, elektr sanoati, kemasozlik, samolyotsozlik, mashinasozlik va boshqa sanoat tarmoqlarining rivojlanishida «rangli metallar» deb ataluvchi – mis, ruh, qo‘rg‘oshin, aluminiy, nikel, kobalt rudalaridan ajratib olinadigan metallar muhim rol o‘ynaydi. Nodir metallar: volfram, molibden, shuningdek, titan, kobalt va boshqalar juda katta mudofaa ahamiyatiga egadir.

Qishloq xo‘jaligining rivojlanishi mineral o‘g‘itlar-kaliy minerallari (kaliy tuzlari), fosforli minerallar (apatit, fosforit), azotli minerallar (selitra) va boshqalardan keng foydalanishga bog‘liqdir. Kimyo, sanoati ko‘p jihatdan mineral ashyolarga asoslanib ishlaydi. Masalan, sulfat kislota oltingugurtga boy kolchedandan (pirit) olinadi. Juda ko‘p minerallar: sof tug‘ma oltingugurt, selitra, plavik shpatlari, bor, kaliy, natriy, magniy, simob va boshqa elementlarning minerallari kimyoviy preparatlar tayyorlashda ishlatiladi. Rezina sanoatida- oltingugurt, talk, barit, kislotalar bilan o‘tga chidamli mahsulotlari ishlab chiqarishda – asbest, kvars, grafit va boshqalar; bo‘yoqchilik bilan emal va glazurlar (sir) tayyorlashda-galenit, sfalerit, barit va titan, mis, temir, margimush, simob, kobalt, bor minerallari, kriolit, ortoklaz, sirkon; yozuv qog‘ozi ishlab chiqarishda – talk, kaolin, oltingugurt, achchiqtosh, magnezit va hokazo ishlatiladi.
Toshtuz bilan osh tuzi inson ovqatining zarur tarkibiy qismidir. Bir qancha minerallar va ulardan qayta ishlab olingan mahsulotlar
(mirabilit – glauber tuzi; mineral suvlar – narzan, borjom va boshqa- lar, vismut, bariy, bor, yod tuzlari) dori-darmon sifatida ishlatiladi. Mineral buloqlar (vodorod sulfidli, karbon kislotali, temirli, sho‘r va boshqa buloqlar) va tabiiy balchiqlardan ham davolash maqsadlarida foydalaniladi. Meditsina va sanoatning ayrim tarmoqlarida, radioaktiv minerallardan olinadigan radioaktiv moddalar yoki kimyoviy elementlarning sun’iy yo‘l bilan olingan bir qancha izotoplari qo‘llaniladi.
Inson hayotida bezak toshlar ham katta rol o‘ynaydi. Ko‘pincha bezak va badiiy buyumlar ishlanadigan qimmatbaho toshlardan tashqari juda ko‘p rangdor toshlar ham bor. Ular devorlarni bezash uchun ishlatiladi. Mamlakatimizdagi eng yaxshi inshootlar pushti rangli rodonit, rang-barang yashma, marmar, kvarsit bilan bezatiladi. Kvars, island shpati, slyuda, turmalin, flyuoritlardan optik asboblar ishlanadi. Agat, korund, sirkon va boshqa qattiq minerallardan soatlar va boshqa aniq mexanizmlar uchun podshipniklar tayyorlanadi. Olmos (karbonado), korund, granat, kvarslar abraziv material sifatida buyumlarni edirish va ularga berishda ishlatiladi. Yumshoq va yog‘langandek unnaydigan minerallar (talk, grafit) to‘ldiruvchilar sifatida mexanizmlarning ediriluvchi qismlarini moylash uchun ishlatiladigan moylarga aralashtirib ishlatiladi.
Keyingi vaqtlarda urandan reaktor-qozonlarda olinadigan juda katta yadro ichki energiyasini ajratib olish masalasining hal etilishi bi- lan bog‘liq ravishda undan sanoatda tinchlik maqsadlarida foydalanish uchun juda qulay sharoit yaratildi. Nihoyat, hozirgi paytda shu jarayonlar davomida gigant energiya hosil qiluvchi og‘ir vodorod (deyteriy bilan tritiy) hisobiga geliy hosil bo‘lishiga olib keladigan, termoyadro reaksiyalaridan (shu maqsadda litiydan ham foydalanib) juda katta energiya olish kutilmoqda.
Minerallarning va ulardan qayta ishlash yo‘li bilan olinadigan mahsulotlarning ishlatilishi haqida yuqorida keltirilgan qisqacha ma’lumotlarga mineral xomashyolarning xalq xo‘jaligida qanchalik muhim ahamiyatga ega ekanligi ko‘rinib turibdi.
Mineralogiyani bilish razvedka ishlarini, ayniqsa qidiruv ishlarini olib borishda muhim ahamiyatga ega. Shu vazifalarni muvaffaqiyatli bajarish uchun, avvalo, minerallarni batafsil aniqlay olish, ularning tabiatda topilish sharoitlarini, bir-biri bilan birga bo‘lish qonuniyatlarini va hokazoni bilish zarur. Shunday voqealar ham bo‘lganki,
qidiruvchilar u yoki bu minerallarni to‘g‘ri aniqlay olmaganliklari tufayli sanoat uchun muhim ahamiyatga ega bo‘lgan konlarni topa olmasdan o‘tib ketganlar. Yer yuziga chiqib turgan konlarni qidirishda ruda konlarining oksidlanish zonasining mineralogiyasi xossalarini bilish va shu’larga qarab yerosti suvlari sathidan pastda yotgan birlamchi rudalar tarkibini aniqlashni o‘rganish ham muhim.
Bundan tashqari, minerallarning bir qator xususiyatlari (magnit tortuvchanligi, elektr o‘tkazuvchanligi, solishtirma og‘irligi va boshqalar) foydali qazilma konlarini qidirish va razvedka qilishning geofizika usullarini (magnitometrik, elektrorazvedka, gravimetrik va boshqalar) ishlab chiqish uchun katta ahamiyatga ega.
Qazib olinayotgan rudalarning sifat-xususiyatlarini o‘rganish kon geologlarining asosiy vazifalaridan biridir. Mineralogiyani bilmasdan turib, bu vazifani hal etib bo‘lmaydi. Kon geologi har kuni yangidan- yangi qazilgan joy devorlari bo‘ylab ma’dan mavjud bo‘lgan jinslar holatini kuzatar ekan, ma’dan mineralogik tarkibining o‘zgarishlari qonuniyatlarini boshqa birovdan ko‘ra yaxshiroq biladi. Bu esa qazib chiqarish ishlarini boshqarishda juda muhim ahamiyatga ega.
Qazib olingan ma’dan ko‘p hollarda eritishdan avval mexanik yo‘l bilan boyitiladi, ya’ni har xil tarkibli konsentratlarga bo‘linadi.
Ma’danlarni tashkil etuvchi mineral donalarining katta-kichikligi, hamda ularning bir-biri bilan yopishib o‘sish xossalari ham katta ahamiyatga ega. Mana shu masalalarni hal qilishda ilmiy tekshirish institutlarining foydali qazilmalarni boyitish laboratoriyalarida mine- ragrafiya olib borilayotgan maxsus mineralogik tekshirishlar katta rol o‘ynaydi. Mineralogik tekshirish usullari jarayonida geolog ma’danlarning mineralogik tarkibi va tuzilishini maqsadga muvofiq ravishda tekshirib borar ekan, boyitish paytida qaysi ma’danlarning qanday ho- latda va qayerda bo‘lishi haqida to‘g‘ri xulosalar chiqara olishi va bo- yitishning qaysi usulida qanday komponentlar qancha miqdorda yo‘- qolishini va uning nima sababdan ekanligini oldindan aytishi mumkin. Shunday qilib, foydali qazilma konlarini mineralogik tekshirish ularni qidirish va razvedka qilish ishlaridagina emas, balki sanoat tipidagi konlarni qazib olish va ma’danlarni ishlash tarmoqlarida ham
juda muhim ahamiyatga egadir.
http://hozir.org