24 iyul 2016-cı il, bazar
7
Mənsub olduğu xalqın, müxtəlif nəsildən olan
insanların intellektual səviyyəsinin daha da yüksəlməsi naminə
yorulmadan, səylə çalışanlar əbədiyaşarlıq hüququ qazanırlar.
Fəlsəfə üzrə elmlər doktoru, professor, akademik, nəğməkar
şair kimi sayılıb-seçilən Aslan Məhəmməd oğlu Aslanov da belə
ziyalılardandır.
Aslan Aslanov 1926-cı il avqus-
tun 20-də Ağstafa şəhərində anadan
olmuşdur. Hələ uşaqlıq, yeniyetməlik
illərindən daha çox oxuyub-öyrənmək
səyi ilə çalışaraq şəhərdəki dəmir yolu
orta məktəbini yüksək təhsil göstəriciləri
ilə başa vurur. Bax elə bu qabiliyyətinə
görə də onun məzunu olduğu məktəbdə
müəllim kimi fəaliyyət göstərməsini
məqsədəmüvafiq sayırlar. Bu böyük
etimad öz yerində, lakin gənc Aslanın
qəlbi ali təhsil almaq, həyatda fəal ictimai
mövqe tutmaq arzusu ilə döyünürdü.
1942-ci ildə Azərbaycan Dövlət Uni-
versitetinin fizika-riyaziyyat fakültəsinə
qəbul olunanda və 1945-ci ildən tarix
fakültəsinin fəlsəfə şöbəsində təhsilini
uğurla davam etdirəndə də müqəddəs bir
arzu-amalla yaşayır, oxuyub-öyrənməyi,
insanlara daha çox gərək olan elm-sənət
sahəsində çalışmağı həyatının əsas
mənasını sayırdı. Ölkənin ən möhtəşəm
ali təhsil ocağı olan universitetin fəlsəfə
kafedrasında müəllim kimi pedaqoji
fəaliyyətə başlayanda belə bir ideya
inamını əsas götürdü: gənclərdə, habelə
müxtəlif nəsildən olan insanlarda etik-
estetik mədəniyyətin inkişafı problemi
xüsusi tədqiqat obyektinə çevrilməlidir.
Sosial inkişafa, tərəqqiyə zəmin
yaradan doğma universitetin fəlsəfə ix-
tisası üzrə aspiranturasında təhsil alanda
da, sonralar namizədlik və doktorluq
dissertasiyalarını uğurla müdafiə edəndə
də tam əminliklə belə qənaətə gəldi
ki, respublikamızda fəlsəfə elminin
əsas sahələrindən sayılan etika-esteti-
ka üzrə maarifçilik işlərinə daha çox
diqqət yetirmək lazımdır. 1961-ci ildə
Azərbaycan Dövlət Universitetində
estetika və etika kafedrasının yaradıl-
ması da onun müntəzəm, məqsədyönlü
fəaliyyətinin səmərəli nəticəsi kimi
dəyərləndirilməlidir. Təsadüfi deyildir
ki, o, 1961-ci ildən 1980-ci ilədək bu
kafedraya milli təəssübkeşlik hissi ilə
rəhbərlik etmiş, gənc elmi kadrların
hazırlanması işinə əhəmiyyətli təsir
göstərmişdir.
Aslan müəllimin yaradıcılıq bioqra-
fiyası ilə tanış olarkən onun mahir elm-
təhsil təşkilatçısı kimi fəaliyyəti daha
çox nəzərə çarpır. O, 1944-1950-ci illərdə
Azərbaycan Dövlət Universitetində
komsomol komitəsinin katibi, iki dəfə
universitetin partiya komitəsinin katibi
(1963-1966; 1975-1977), estetika və
etika kafedrasının müdiri (1961-1980)
Azərbaycan Dövlət İncəsənət İnsti-
tutunun rektoru (1977-1987), habelə
Azərbaycan Elmlər Akademiyası tarix,
fəlsəfə və hüquq bölməsinin akademik
katibi (1987-1989), Fəlsəfə və Hüquq
İnstitutunun direktoru vəzifələrində
çalışarkən pedaqoji fəaliyyətini, estetika
uzrə tədqiqatlarını bir an belə dayandır-
mamış, diqqətəlayiq uğurlar qazanmışdır.
Ötən əsrin 70-80-ci illərində res-
publikamızda, keçmiş SSRİ- də, habelə
dünyanın bir sıra ölkələrində görkəmli
estetik alim kimi tanınması onun gərgin
yaradıcılıq axtarışlarının, fundamental
tədqiqatlarının nəticəsi idi.
İsveçrədə, İngiltərədə Almaniya-
da, Rumıniyada, Çexoslovakiyada və
s. ölkələrdə estetika problemləri üzrə
keçirilən Beynəlxalq elmi konqreslərdə,
simpoziumlarda etdiyi məruzə və çıxışlar
akademik A.Aslanovun şöhrətini daha
da artırmışdı. O, SSRİ-də və dünyanın
bir sıra ölkələrindəki həmkarları arasında
böyük nüfuza malik idi.
Şərq və Qərb estetikasını, xüsusilə
Qədim yunan, Qədim Roma, Orta əsr
Avropa, Orta əsr Şərq estetikasının əsl
mahiyyətini, başlıca xüsusiyyətlərini
məharətlə tədqiq etmişdir. O, eyni zaman-
da, Qədim yunan estetikasının korifeyləri
Demokrit, Heraklit, Sokrat, Aristotelin
estetik görüşlərini məharətlə araşdırmış,
təhlil etmiş, həmişə öz dəyərini saxlayan
fikir və mülahizələri nəzərə çatdırmışdır.
Görkəmli alman filosofu və estetiki
Hegelin başlıca konsepsiyalarının əsl
mahiyyətini Azərbaycan oxucularına,
gənc tədqiqatçılara çatdırmaq sahəsində
də Aslan müəllimin böyük əməyi olmuş-
dur.
İntibah dövrünün estetikası da
görkəmli alimin tədqiqat obyektində
xüsusi yer tutmaqla, bu elm üçün çox ma-
raqlı olan məsələləri aşkara çıxarmışdır.
Akademik A.Aslanov milli və
bəşəri dəyərləri bir-birilə çox məharətlə
əlaqələndirir, bunların ümumtərbiyə-
tərəqqi prosesində mühüm rol oynadığını
ağılabatan, inandırıcı müddəalarla sübuta
yetirirdi. O, keçmiş SSRİ-də və dün-
yanın bir sıra inkişaf etmiş ölkələrində
keçirilən beynəlxalq elmi məclislərdə
əsas diqqəti dönə-dönə ona yönəldirdi
ki, hər bir xalqın estetik mədəniyyəti,
estetik fikirləri artırılıb-əskildilmədən
daha konkret şəkildə göstərilməli, şərh
olunmalıdır. O, Azərbaycan estetika-
sını-estetik fikirlərini çox zaman Şərq
xalqlarının estetik fikirləri adı ilə nəzərə
çatdırmağı ziyanlı sayırdı. Eyni zamanda,
Azərbaycanda estetik fikrin yalnız bədii
əsərlərdə öz əksini, təcəssümünü tap-
ması haqqındakı mülahizələrin birtərəfli
olmasını göstərirdi. Faktlara, əldə olan
mənbələrə istinad edərək deyirdi ki,
estetik fikir Nizami, Xaqani, Füzuli,
Nəsimi kimi dahi şairlərin bədii əsərləri
ilə yanaşı, müxtəlif fəlsəfi, poetik trak-
tatlarda, risalələrdə öz əksini tapmışdır.
Tədqiqatlar Azərbaycanda estetik fikrin
xronoloji cəhətdən XII əsrdən başlanması
haqqında mülahizələrin də yanlış olduğu-
nu göstərir. Aşkar edilən yeni mənbələr
Azərbaycanda estetik, ədəbi-tənqidi fikir
tarixinin hələlik VII əsrə qədər qabaqlara
çəkməyə imkan verir.
Aslan müəllim bu konsepsiyanı ömrü-
nün son illərində rəhbərlik etdiyi Fəlsəfə
və Hüquq İnstitutunun elmi məclislərində
də dönə- dönə gənc alimlərin nəzərinə
çatdırır, bu istiqamətdə tədqiqatları
dərinləşdirməyi zəruri sayırdı.
Bütün yaradıcılığı boyu maraqlı
fikirləri, orijinal deyimləri ilə esteti-
ka aləmini zənginləşdirməyə çalışan
alimin "İncəsənət və tərbiyə" adlı ilk
fundamental əsəri (elmi redaktoru,
akademik, fəlsəfə elmləri doktoru,
professor Fuad Qasımzadədir) 1967-
ci ildə "Gənclik" nəşriyyatı tərəfindən
çap olunmuşdur. "İncəsənət və tərbiyə
probleminin tarixinə dair", "Gözəllik və
incəsənətin idraki-tərbiyəvi əhəmiyyəti",
"İncəsənətdə mənəvi gözəlliyin
təcəssümü və onun ictimai tərbiyədə
rolu", "İncəsənət və onun xalq həyatına
təsiri" bölmələrinin hər birində çox böyük
elmi-nəzəri mahiyyət kəsb edən fikirlər,
başlıca müddəalar heyrət və heyranlıq
yaradan bir tərzdə irəli sürülmüşdür.
A.Aslanov uzun illər müxtəlif janrlı
sənət əsərlərinin--faktiki materialların
təhlili əsasında başa gətirdiyi həmin
monoqrafiyanın "İncəsənət və tərbiyə
probleminin tarixinə dair" bölməsində ya-
zır: "...Sənət yenə də... qəlbləri fəth edir,
insanları öz əzəmətli səsi ilə xeyirxahlığa,
xoşbəxtliyə, mənəvi amallar uğrunda
mübarizəyə, rəşadətə səsləyir.
Sənət bahadırının qüvvət, güc və
müzzəmliyi ilə yanaşı xüsusi bir şövqü,
başqa mühüm bir üstünlüyü də vardır.
Bu da onun gözəlliklə, insan qəlbi ilə
gözəllik qanunları əsasında rəftarıdır.
Özünün ahəngi, məlahətli səsi və sözü,
plastik qaməti, mütərəqqi ideya məzmunu
ilə sənət insanının hisslərini bir anda ələ
almaq, insan ruhunun ən dərin guşələrinə
nüfuz etmək, onu ehtizaza gətirmək,
insana öz qüvvəsini anlatmaq, insanı
ucaltmaq, yüksəltmək kimi bir qüdrətə
malikdir".
Respublikamızın ali təhsil ocaqları
üçün zəruri sayılan, Azərbaycan SSR
Ali və Orta İxtisas Təhsili Nazirliyi
tərəfindən 1979-cu ildə təsdiq edilərək
"Maarif" nəşriyyatında çap olunan
"Marksist-leninçi estetikanın əsasları"
dərs vəsaiti də akademik A. Aslanovun
təşəbbüsü, rəhbərliyi sahəsində araya-
ərsəyə gəlmişdir. Onu da qeyd edək ki, o
dövr üçün çox zəruri olan, ali və orta ix-
tisas məktəblərində çalışan müəllimlərin,
təhsil alan tələbələrin ehtiyacını ödəmək
baxımından mühüm əhəmiyyət kəsb edən
bu dəyərli vəsait də Aslan müəllimin
rəhbərlik etdiyi estetika və etika kafed-
rası əməkdaşlarının yaradıcılıq axtarış-
ları sayəsində mümkün olmuşdur.
Estetik fikrin tarixi inkişaf qanu-
nauyğunluqlarının Şərq estetikası isə
Qərb estetikasının qarşılıqlı əlaqədar
kontekstində işıqlandırılmasına həsr
olunan "Estetika aləmində" əsəri aka-
demik Aslan Aslanovun fundamental
tədqiqatlarının çox dəyərli nəticəsi kimi
qiymətləndirilir.
Əlbəttə, estetik aləmin, sənətin
sehrinə düşən bu nəcib qəlb, həssas zövq
sahibi onun bilavasitə yaradıcılarından
birinə çevrilməyə bilməzdi. Əlinə qələm
aldığı vaxtdan şeir də yazırdı. O ən
ülvi, ən vacib mətləbləri, Azərbaycan
təbiətinin əsrarəngiz gözəlliyini şeirlə,
nəğmələrlə tərənnüm etməyi, müxtəlif
qəbildən olan insanlara çatdırmağı vacib
sayırdı:
Aslan Aslanov təbiətən lirik şair idi.
Bunu hələ keçən əsrin 50-60-cı illərində
nəşr olunan şeir kitablarından da görmək
olur. "Səni düşünürəm" (şeirlər və mah-
nılar, Bakı, 1958), "Qızlar və bənövşələr"
(şeirlər və poemalar, Bakı, 1961) hələ
o zaman sənətsevərlərin diqqətini cəlb
etmişdi.
Aslan müəllim şairliklə estetikliyi
qoşa qanad kimi xüsusi bir ahəngdə,
vəhdətdə davam etdirirdi. Nəğməkar
şair kimi ad çıxarması ilə fərəhlənirdi.
Təsadüfi deyildir ki, "Yazıçı"
nəşriyyatının 1985-ci ildə çap etdiyi
şeirlər kitabını da "Nəğməli günlərim"
adlandırmışdı.
A.Aslanovun poeziyasında
Azərbaycan təbiətinin gözəllikləri,
ülvilikləri xüsusi bir ahəngdarlıqla
tərənnüm olunur. Təbiət mənzərələri,
insanın təbiətə estetik münasibəti ən incə,
kövrək hisslərlə nəzərə çatdırılır.
Doğma Azərbaycanın zəngin
təbiəti ilə yanaşı, ictimai-siyasi həyatı
da Aslan müəllimin poeziyasından
yan keçməmişdir. Erməni faşistlərinin
1988-ci ildən başladığı elanolunmamış
müharibə şair qəlbini dilə gətirmiş, dərin
vətənpərvərlik ruhu ilə aşılanan mübariz
misralarını yaratmışdır:
Qarabağım uca dağdır əyilməz!
Dost köynəyi yad əyninə geyilməz!
Köhnə yurda təzə adlar qoyulmaz!
Bu gün biz hamımız qarabağlıyıq,
Bu torpağa, bu diyara bağlıyıq!..
Əsirlikdə qalan torpaqlarımızın,
şəhid kəndlərimizin, şəhərlərimizin taleyi
Aslan müəllimi ciddi narahat edirdi. O da
xalqımızın digər mütərəqqi ziyalıları kimi
Şuşa həsrətinə dözə bilmirdi. Bu hisslər,
bu həyəcanlar "Hardasan, igid oğlan"
nəğmə mətninin yazılmasına səbəb ol-
muşdu. O, sənət dostu, bəstəkar Süley-
man Ələsgərovla bu nəğmənin üzərində
işləmiş igid əsgərlərimizi qələbəyə
ruhlandıran bir sənət incisi yaratmışdır:
Hardasan, ey igid, şanlı qəhrəman?
Sədləri uçurub yıxacaq oğlan!
Şuşa qalasına cumub ilk dəfə,
Üçrəngli bayrağı taxacaq oğlan!
İnanırıq ki, Aslan müəllimin arzuları
çin olacaq, elmi-bədii əsərlərində irəli
sürdüyü mənəvi-estetik ideallar müstəqil
Azərbaycanımızın tərəqqisi naminə
fəaliyyət göstərən nəsillərin tərbiyəsində
mühüm rol oynayacaq.
İyirmi ildən çoxdur ki, Aslan
müəllimin bu gözəl, istəkli Vətən oğlu-
nun, Azərbaycan təbiətinin gözəlliklərini,
ülviliklərini tərənnüm edən nəğməkar
şairin, görkəmli estetik alimin səsini eşit-
mir, mehriban nurani çöhrəsini görmürük.
Ancaq hər an xatırlayırıq Aslan müəllimi.
Elə dünyaya gəldiyi Ağstafada, Qazax
elində, həyatının, yaradıcılığının böyük
bir dövrü ilə bağlı olan Bakı Dövlət
Universitetində, Azərbaycan Dövlət
Mədəniyyət və İncəsənət Universitetində,
Respublika Elmlər Akademiyasında da
dərin hörmət və ehtiramla xatırlayırlar
Aslan müəllimi.
Elinə-obasına, xalqına can-başla,
təmənnasız xidməti həyat – yaşamaq
idealına çevirənlər, bax beləcə ürəklərdə,
xoş, ülvi xatirələrdə yaşayırlar. Elə yaşa-
yırlar ki, öləndən sonra unudulmurlar.
Azərbaycan Respublikası Elmlər
Akademiyasının həqiqi üzvü, ictimai
elmlər üzrə akademik katibi, fəlsəfə
elmləri doktoru, professor, Əməkdar elm
xadimi, SSRİ-nin ali təhsil əlaçısı, SSRİ
və Azərbaycan Yazıçıları ittifaqlarının
üzvu və s. elmi və fəxri adlara alın təri,
çəkdiyi zəhmətin sayəsində nail olan
Aslan müəllimin özünəməxsus təbiəti var
idi. Sadəliyi, istiqanlılığı, elsevərliyi ilə
diqqəti cəlb edirdi. Zəruri hallarda, lazım
gələn məqamda təsirli, orijinal söz demək
bacarığı ilə seçilirdi Aslan müəllim.
Bu gözəl insani keyfiyyətləri özünün
parlaq şəxsi nümunəsi ilə rəhbəri olduğu
aspirant, dissertant və doktorantlara da
aşılayırdı akademik Aslan Aslanov.
Bu il avqust ayının 20-də elinə-
obasına qəlbən bağlı olan fədakar alim,
ən başlıcası mahir estetik, nəğməkar şair
kimi elm-təhsil, mədəniyyət aləmində
fəxri yer tutan akademik Aslan Aslano-
vun 90 yaşı tamam olur. Bu günlərdə
yubiley ərəfəsində 69 il ömür yaşayan,
dərin vətənpərvərlik hissi ilə yazıb-yara-
dan və elm-təhsil quruculuğu sahəsində
fədakarlıqla çalışan alimin ömür yoluna
işıq tutmaq hər birimizin vətəndaşlıq
borcu kimi dəyərləndirilməlidir. İnanırıq
ki, ustadın yetirmələri, habelə vaxtilə
möhtəşəm elm-təhsil ocaqlarında çiyin-
çiyinə çalışdığı həmkarları müxtəlif xa-
rakterli anım, yubiley təbbirlərində Aslan
müəllimin adına layiq çıxışları, habelə
mətbuatda dərc etdirdikləri yazıları ilə
onun ruhunu şad edəcəklər.
VİDADİ XƏLİLOV,
pedaqogika üzrə elmlər doktoru,
professor, Rusiya Pedaqoji və
Sosial Elmlər Akademiyasının həqiqi
üzvü, Azərbaycan Respublikasının
Əməkdar müəllimi
Hərdən mənə elə gəlir ki,
“Böyük dayaq” filmində hadisələrin
cərəyan etdiyi kənddə böyümüşəm. Bu
kəndin adamlarında da, təbiətində
də bir doğmalıq var. Mən də kənddə
doğulmuşam, kolxozun, təsərrüfatın,
torpağın nə demək olduğunu yaxşı
bilirəm. Sevirdim bu filmi. Dəfələrlə ona
tamaşa etmişəm və hər dəfə qəlbimə,
ruhuma yaxın epizodlarla rastlaşmışam.
Elə indi də bu filmə tamaşa edəndə
ruhum təzələnir, uşaqlığımın və
gəncliyimin xoş anları gözlərim
qarşısında canlanır. Demək istəyirəm ki,
haqqında söz açdığım kinorejissor Həbib
İsmayılov filmindəki hadisələri o qədər
ustalıqla ümumiləşdirə bilib ki, bu kənd
hamımız üçün, kəndi sevən, onun havası ilə yaşayan
bütün insanlar üçün doğmalaşıb.
Mən Həbib İsmayılovu
görməmişdim, onun adı ilə
ancaq, filmlərin titrlərində
rastlaşmışdım. Deyilənə
görə, Həbib İsmayılovu təkcə
sənətinə görə yox, yüksək
insani keyfiyyətlərinə görə də
sevir və hörmət bəsləyirdilər.
Həbib Ələkbər oğlu İsma-
yılov Naxçıvanda doğulmuş-
du. Burada orta təhsil almış,
sonra isə təhsilini Azərbaycan
Dövlət Teatr İnstitutunda (İn-
diki Mədəniyyət və İncəsənət
Universiteti) davam etdir-
mişdi. Moskva Dövlət Teatr
Sənəti İnstitutunda isə aktyor-
luq və rejissorluq sənətinə
yiyələnmişdi. 1936-cı ildə
Gəncə Teatrında əmək
fəaliyyətinə başlayan rejissor
bu teatrın bədii rəhbəri olmuş-
du. Burada onun quruluşunda
Azərbaycan klassiklərindən
M.F. Axundovun “Lənkəran
xanının vəziri”, C.
Məmmədquluzadənin
“Ölülər”, C.Cabbarlının
“1905-ci ildə” pyesləri tama-
şaya qoyulmuşdu. Sonralar
Mahaçqala və Bakı teatrla-
rında bədii rəhbər, rejissor
və baş rejissor vəzifələrində
çalışmışdı.
Həbib İsmayılov Musi-
qili Komediya Teatrının ilk
bədii rəhbəri olmuş, bura-
da Z.Hacıbəyovun “Aşıq
Qərib” operasına (1939),
B.Aleksandrovun “Molinov-
kada toy”, S.Rüstəmovun
“Beş manatlıq gəlin”(1940)
musiqili komediyasına quru-
luş vermişdir.
Bu görkəmli rejissorun
kinematoqrafda da bir sıra
uğurlu işləri olmuşdur. Onun
lentə aldığı sənədli filmlərdə
ölkəmizin real həyat faktları
öz dolğun əksini tapmışdır.
“Naxçıvan”, “Pambıqçılıqda
qabaqcıl metodların tətbiqi”,
“Cəfər Cabbarlı”, “SSRİ-
nin himni “, “Torpaq və onun
münbitliyi” və digər filmlər
ekran həlli baxımından çox
maraqlıdır. O, Dağıstan
Muxtar Respublikasının 25
illik yubileyi ilə bağlı sənədli
film çəkmişdir.
İllər ötdükcə Həbib
İsmayılov bədii kinoda da
özünü sınamaq qərarına
gəlmişdi. Bu elə bir dövr
idi ki, Azərbaycan kinosu
müharibədən sonra tədricən
dirçəlməyə başlamışdı.
1958-ci ildə o, Anna Yan ilə
birgə yazdığı ssenari əsasında
ilk bədii filmini - “Ögey
ana”nı çəkdi. Ailə-məişət
mövzusunda çəkilmiş bu
film kino tariximizin dəyərli
nümunələrindən biri olmaqla
60 ilə yaxındır ki, ekranları-
mızda sevilə-sevilə baxılır.
Bu filmdə hər şey gözəldir:
aktyor seçimi də, natura
çəkilişləri də, musiqi də. Ba-
laca İsmayıl rolunun ifaçısı
Ceyhun Mirzəyevin oyunu isə
əsl mənada şedevrdir. Həbib
İsmayılovun ən böyük uğur-
larından biri də məhz balaca
Ceyhunu “kəşf” etməsi idi.
Dilarə rolunun ifaçısı Nəcibə
Məlikova öz oyunu ilə filmə
xüsusi bir ovqat gətirmişdir.
Ələsgər Ələkbərov, Nəsibə
Zeynalova, Fateh Fətullayev ,
Həqiqət Rzayeva kimi tanın-
mış aktyorlarla yanaşı Əzizə
Məmmədova, Hacı Murad
kimi gənclərin də filmin
uğurlu alınmasında mühüm
əməkləri olmuşdur.
Rejissor “Böyük dayaq”
filminə 1962-ci ildə ekran
həyatı vermişdir. Əvvəldə
qeyd etdiyimiz kimi, “Bö-
yük dayaq”, hər şeydən
əvvəl, yüksək səmimiyyətlə
çəkilmiş filmdir. Xalq
yazıçısı Mirzə İbrahimovun
eyniadlı romanı əsasında
ekranlaşdırdığı bu filmdə
Həbib İsmayılov sanki
hadisələrin ortasındadır.
O, hər şeyi müşahidə edir,
özü seyriçi kimi qalmır və
müəllif ideyalarından doğan
həqiqətləri qəhrəmanların
dili ilə tamaşaçıya çatdırır.
O, ikinci dəfə idi ki, Ələsgər
Ələkbərovu öz filmində
çəkirdi. Rüstəm kişi böyük
aktyorun ifasında olduq-
ca maraqlı və yaddaqalan
obrazdır. Filmdə Rüstəm kişi
gözəl ailə başçısı, səriştəli
təsərrüfat rəhbəridi. Ancaq
rejissor onu ideallaşdırmır. O,
səhvlər buraxır, ətrafındakı
dələduzlara inanır, nəticədə
isə arxadan zərbə alır.
Filmdə bir ana obrazı da
var. Səkinə rolu ekranlarda
gördüyümüz ana rollarından
bir sıra xüsusiyyətləri ilə
fərqlənir. O, təkcə övladları-
nı ürəkdən sevən ana deyil,
gözəl həyat yoldaşı, mehriban
qayınanadır. Aktrisa Leyla
Rzayevanın bu rolu o qədər
səmimi, o qədər təbiidir ki,
onun kinoda oynadığını
təsəvvür etmək belə çətindir.
Yenə qayıdıram əvvəlki
fikirlərimin üzərinə. Bu
film kənddə yaşamış,
onun gözəlliklərini dadmış,
problemlərindən xəbərdar
olan hər kəs üçün əziz və
doğmadır.Amma filmdə kənd
həyatı əsas süjet olsa da,
buradakı insan xarakterləri,
münaqişələr, zəngin
konfliktlər onu daha baxımlı
etmişdir.
Həbib İsmayılov
Azərbaycan kinosunda
məhsuldar işləməsə də,
kino tariximiz üçün çox
dəyərli filmlər yaratmış-
dır. Onun əməyi yüksək
qiymətləndirilmş, Əməkdar
incəsənət xadimi fəxri adına
layiq görülmüşdür.
Mənalı yaradıcı həyat
yolu keçmiş rejissor Həbib
İsmayılov 31 dekabr 1966-cı
ildə vəfat edib.Onun xatirəsi
xalqımızın qəlbində filmləri
kimi əbədi yaşayacaq.
M.MÜKƏRRƏMOĞLU,
“Xalq qəzeti”
Neft yataqlarında yeni istehsalat obyektləri tikilir
SOCAR-ın “Azneft” İstehsalat Birliyi
tərəfindən neft və qaz hasilatının sabit şəkildə
davam etdirilməsi istiqamətində mühüm işlər
görülür. Hazırda yeni neft və qaz quyularının
qazılması üçün perspektivli sahələrin
genişləndirilməsi və əlavə istehsalat sahələrinin
tikintisi üzrə işlər planlı şəkildə həyata keçirilir.
Birliyin istismar et-
diyi yataqlar arasında
öz zənginliyi ilə seçilən
“Günəşli” yatağında da bu
istiqamətdə mühüm işlər
görülür. Hazırda 28 May”
adına Neft və Qazçıxarma
İdarəsinin istismar etdiyi
“Günəşli” yatağının dayaz
sulu hissəsində yerləşən 14
saylı dərin dəniz özülündə
növbəti iki quyunun qazıl-
ması üzrə yenidənqurma
işləri davam etdirilir. Yaxın
günlərdə quyu şaxtaları
quraşdırılacaq. Bununla
yanaşı, adıçəkilən yataqda
yenicə istismara verilmiş 7
saylı dərin dəniz özülündə
ikinci qazma qurğusunun
avadanlıqlarının quraşdırıl-
ması işlərinə başlanılmışdır.
Xatırladaq ki, yeni özüldə 20
quyunun qazılması nəzərdə
tutulur. Yeni avadanlığın
quraşdırılması isə bu işləri
daha da sürətləndirəcək.
Dünyada ilk dəfə açıq
dənizdə neftçıxarmanın əsası
qoyulmuş “Neft Daşları” yata-
ğında da bu baxımdan mühüm
tədbirlər həyata keçirilir. Neft
Daşları Neft və Qazçıxarma
İdarəsinin istismar etdiyi
yataqdakı 2585 saylı özüldən
növbəti 8 quyunun qazılma-
sı üçün maneçilik törədən
mövcud texnoloji xətlərin və
avadanlıqların köçürülməsi
və yenidən qurulması işləri
davam etdirilir.
N.Nərimanov adına Neft
və Qazçıxarma İdarəsinin 2
saylı qazma məntəqəsinin
tikintisi işləri çərçivəsində isə
4 ədəd dayaq bloku və digər
metal konstruksiyalar (aralıq
seksiyaları, yanalma meydan-
çaları və s.) tikinti nöqtəsinə
nəql olunmuşdur. Növbəti
mərhələdə isə daha iki ədəd
dayaq blokunun nəqli plan-
laşdırılır. Xatırladaq ki, bütün
bu işlərin sifarişçisi “Azneft”
İstehsalat Birliyidir.
Birliyin sifarişi ilə
neft-qaz infrastrukturu-
nun təkmilləşdirilməsi
istiqamətində tikinti-quraşdır-
ma işləri davam etdirilir.
M. YAQUBZADƏ,
“Xalq qəzeti”
Akademik Aslan Aslanov – 90
Həbib İsmayılov-110
Görkəmli alim, pedaqoq, şair
O, həyatda olduğu qədər
sənətdə də səmimi idi
Şamaxıda şəhidlərin medalları
valideynlərinə təqdim edildi
Şamaxıda Azərbaycan Respublikası
Müdafiə Nazirliyi və rayon icra hakimiyyətinin
birgə təşkilatçılığı ilə iyulun 23-də "Milli
ordumuz – milli qürurumuzdur" devizi altında
vətənpərvərlik tədbiri keçirilmişdir. Tədbirdə
Müdafiə Nazirliyinin rəsmiləri, rayon rəhbərləri,
veteranlar, şəhid ailələri, rayon ictimaiyyətinin
nümayəndələri iştirak etmişlər.
İlk öncə Azərbaycanın
müstəqilliyi və ərazi bütövlüyü
uğrunda şəhid olanların xatirəsi
bir dəqiqəlik sükutla yad edil-
mişdir.
Tədbiri giriş sözü ilə açan
rayon icra hakimiyyətinin
başçısı Asif Ağayev çıxı-
şında Azərbaycan Silahlı
Qüvvələrinin yaranması
tarixindən, ulu öndər Heydər
Əliyevin ordu quruculuğunda
müstəsna xidmətlərindən və
bu siyasətin Prezident, Ali
Baş Komandan cənab İlham
Əliyev tərəfindən uğurla davam
etdirilməsindən bəhs etmişdir.
Vurğulanmışdır ki, bu gün
Azərbaycan Silahlı Qüvvələri
qarşısına qoyulan hər hansı dö-
yüş tapşırığını yerinə yetirməyə
tam hazır və qadirdir.
RİH başçısı aprel
döyüşlərində ordumuzun
şanlı qələbəsindən bəhs
edərək bu döyüşlərin bir
daha Azərbaycan dövlətinin
qüdrətini, Azərbaycan ordu-
sunun gücünü, xalqımızın
həmrəyliyini, ölkə rəhbərliyinin
qətiyyətini göstərdiyini vur-
ğulamışdır. Qeyd olunmuşdur
ki, Azərbaycan əsgəri aprel
döyüşləri zamanı qazandığı
uğur və qələbələrlə xalqımı-
za zəfər sevinci yaşatmışdır.
Həmin döyüşlərdə respub-
likanın digər bölgələrinin
gəncləri, oğulları kimi şamaxılı
vətənpərvər igidlər də şəxsi
rəşadət və şücaət göstərmişlər.
Onlardan üç nəfəri şəhidlik
zirvəsinə ucalmışdır.
Tədbirdə çıxış edən Müdafiə
Nazirliyinin zabiti, Prezidentin
təqaüdçüsü, polkovnik Abdul-
la Qurbani şəhidlik zirvəsinə
ucalan gənclərin təltifləri barədə
məlumat verərək bildirmişdir
ki, Şamaxı rayonunun Çuxur-
yurd kəndindən olan manqa
komandiri Kaçayev Samir
Ziyətdin oğlu Azərbaycan
Respublikasının Prezidenti
cənab İlham Əliyevin sərəncamı
ilə "İgidliyə görə" medalı ilə,
rayonun Göylər kəndindən olan
əsgər Səmədov Elşən Səlim
oğlu və Şamaxı şəhərindən olan
Zəkərəyev Nazim Nadir oğlu
"Hərbi xidmətdə fərqlənməyə
görə" 3-cü dərəcəli medalla
təltif olunmuşlar.
Medallar tədbir iştirak-
çılarının alqışları altında
şəhidlərin valideynlərinə
təqdim edilmişdir.
İlqar HƏSƏNOV,
"Xalq qəzeti"nin
bölgə müxbiri