Çünki F.Engelsin
düzgün olaraq qeyd etdiyi kimi, «İnduksiya ilə deduksiya sintez və
analiz kimi bir-birilə zəruri surətdə əlaqədardır. Bunlardan birini o birinin hesabına
birtərəfli olaraq tərifləyib göylərə qaldırmaq əvəzinə, hər birini öz yerində tətbiq
etməyə çalışmaq lazımdır; buna isə yalnız o halda nail olmaq mümkündür ki, onların
bir-birilə əlaqəsi, onların bir-birini tamamladığı nəzərdən qaçırılmasın» (8, 199).
Bekondan sonra naturfəlsəfənin inkişafında yeni dövr filosoflarından xüsusilə
riyaziyyatın inkişafında mühüm rol oynayan, analitik həndəsənin yaradıcısı, elm
tarixinə öz adı ilə daxil olan üç ölçülü (OX, OU, OZ) Koordinat sistemini irəli sürən,
riyaziyyata dəyişən kəmiyyətləri daxil edən, Günəş sisteminin təbii yolla yaranması
və inkişafı haqqında kosmoqonik hipotezanı irəli sürən R.Dekartın (1596-1650) da
müəyyən rolu olmuşdur.
Yeni dövrdə F.Bekonun müasiri Tomas Hobbsun (1558-1679) da naturfəlsəfə-
nin inkişafında müəyyən xidməti olmuşdur. Riyaziyyat və mexanikanın naturfəl-
səfədən ayrılaraq müstəqil elmlər kimi inkişafa başladığı XVII əsrdə T.Hobbs təbiət
elmlərinin nailiyyətlərini fəlsəfi cəhətdən ümumiləşdirməyə girişdi. Mexanikanın
daha artıq inkişaf edərək geniş tətbiq tapdığı şəraitdə bütün təbiət hadisələrini onunla
izah etməyə çalışan Hobbs mexaniki təsəvvürlərin təsiri altında cəmiyyəti də
hissələrinin qarşılıqlı təsirdə olduğu mexaniki aqreqat kimi başa düşmüş, metafizikanı
təbiətşünaslıqdan fəlsəfəyə keçirənlərdən biri olmuşdur. Həmin mexanisizm mövqe-
yindən çıxış edən Dekart heyvanı maşın saydığı kimi, XVIII əsr fransız
materialistlərindən olan Lametri (1709-1751) «İnsan maşındır» əsərində insanı maşın
saymış, heyvanla insan arasındakı fərqi yalnız onların beyinlərinin həcmində və
strukturunda görmüşdü.
Naturfəlsəfənin inkişafında XVIII əsrin ikinci – XIX əsrin birinci yarısında
fəaliyyət göstərmiş klassik alman fəlsəfəsinin nümayəndələrinin də xüsusi rolu ol-
muşdu. O dövrdə təbiət elmlərinin inkişafı metafizik metodun məhdudluğunu aşkara
çıxarmaqla onların məzmununa və inkişaf məntiqinə uyğun gələn dialektik baxışların
işlənməsinə, təbiətşünaslığın dialektləşməsinə başlanğıc vermişdi. Təbiət elmlərinin
kortəbii surətdə dialektikləşməsi prosesinin başlanması təbiətşünaslığın inkişafında
üçüncü inqilabın məğzini təşkil edirdi ki, onun da əsasını klassik alman fəlsəfəsinin
banisi İmmanuil Kant (1724-1804) qoymuşdu. O, özünün 1755-ci ildə çap olunmuş
«Ümumi təbii tarix və göy nəzəriyyəsi» əsərində Günəş sisteminin təbii yolla ilkin
qaz – toz dumanlıqlarından əmələ gəlməsi fərziyyəsini irəli sürməklə hərəkət, dəyiş-
mə və inkişafın səbəbi və mənbəyini kənardan verilən «təkanda» görən metafizikaya
ilk sarsıdıcı zərbə vurdu. Kantın elm tarixində ən böyük xidməti olan Günəş
sisteminin təkamülü haqqındakı bu fərziyyəsi sonralar fransız astronomu, fizik və
riyaziyyatçısı P.Laplas (1749-1827) tərəfindən də yenidən işlənilərək riyazi cəhətdən
əsaslandırılmış və elm tarixinə Kant-Laplas fərziyyəsi adı ilə daxil olmuşdur.
Yeni dövr naturfəlsəfəsinin inkişafında klassik alman fəlsəfəsinin digər
nümayəndəsi Şellinqin (1775-1854) də müəyyən rolu olmuşdur. Obyektiv idealizmin
görkəmli nümayəndələrindən olan Şellinq təbiət elmlərinin nisbətən yüksək inkişaf
səviyyəsində təbiət hadisələrinə dialektikcəsinə yanaşılmasının zəruriliyini bildirmiş,
insanın təkamülün məhsulu olub təbiətin inkişafının ən yüksək pilləsində yarandığını
söyləmiş, qütbilik prinsipi əsasında elektrik və maqnit hadisələrinin əlaqəsini onu
müəyyənləşdirən Ersted və Faradey kimi fiziklərdən xeyli əvvəl qeyd etmiş, təbiətin
öyrənilməsində fəlsəfə və təbiət elmlərinin əlaqəsinin zəruriliyini açıb göstərmişdi. O,
həmçinin M.P.Lankdan xeyli əvvəl işığın ikili – korpuskulyar dalğa təbiətini duymuş
111
və onların hər ikisini vahid bir nəzəriyyədə birləşdirməyi təklif etmişdi.
Naturfəlsəfənin metafizik təsəvvürlərdən təmizlənməsi və dialektikləşməsində
idealist mövqedən də olsa dialektikanı qanunların, kateqoriyalar və prinsiplərin
sistemi kimi ilk dəfə mükəmməl işləyən klassik alman fəlsəfəsinin ən görkəmli
nümayəndəsi Hegelin çox böyük rolu olmuşdur. Geniş dünyagörüşünə malik olan
Hegel (1770-1831) naturfəlsəfə mövqeyindən «elmlər elmi» saydığı öz fəlsəfəsini
insan idrakının bütün sahələrini əhatə edən bitkin, mütləq həqiqətin dərk olunub başa
çatdığı sistem kimi qələmə verərək digər bilik sahələri kimi təbiət elmlərini də fəlsəfi
baxışlar içərisində əritməklə onları müstəqil inkişafdan məhrum etməyə çalışır,
bununla da öz dialektikasında sonsuz saydığı inkişaf prosesinə metafizik fəlsəfə
sistemində son qoyurdu.
Bütün bilik sahələrini əhatə edəcək fəlsəfə sistemi yaratmaq niyyətini reallaş-
dırmaq məqsədilə yazdığı üç cildlik «Fəlsəfi biliklərin ensiklopediyası» əsərinin 2-ci
cildini « Təbiət fəlsəfəsi»nə (4) həsr etmişdir. Burada müasiri olduğu təbii-elmi
biliklərə əsaslanmaqla təbiəti inkişafda olan bütöv tam halında təsvir etmək və
metafizik təfəkkür üsulunun hakim olduğu təbiətşünaslığa ona adekvat olan dialektika
ideyalarını gətirmək vəzifəsini öz qarşısına qoyur. Həmin cilddə bir-birilə bağlı olan
təbii-elmi biliyin əlaqələndirilməsinin zəruriliyini göstərən Hegel təbiət elmlərinin
sistemli təhlilini vermiş, mövcud fundamental təbii-elmi ideyaları təhlil edib
ümumiləşdirmiş, ümumi inkişaf ideyasını «ideyanın başqa varlıq forması» saydığı
təbiətə də tətbiq etmişdir. O, təbiətin sadədən mürəkkəbə, ibtidaidən aliyə doğru
yüksələn inkişaf səviyyələrini müəyyənləşdirmiş və onların hər birinə aid olan təbii-
elmi bilikləri səciyyələndirib təhlil etmişdir. Buna uyğun olaraq Hegel «Təbiət
fəlsəfəsi»ni «Mexanika», «Fizika» və «Üzvi fizika» bölmələri üzrə qruplaşdırıb hər
birini ayrıca nəzərdən keçirib təhlil etmişdir.
Ümumən olduğu kimi təbiət hadisələrinə də dialektikcəsinə yanaşan Hegel
təbiətşünaslıqda da dialektik təfəkkür üsuluna keçilməsinin, təbii-elmi idrakda
dialektikaya istinad etmək, onun prinsip və kateqoriyalarını bacarıqla tətbiq etmək
lüzumunu əsaslandırmışdır.
Naturfəlsəfənin mexaniki təbiətşünaslıqla bağlı olduğu və nəzərdən keçirdiyi-
miz birinci mərhələdə mexanika, fizika və astronomiya sahəsində böyük nailiyyətlər
əldə edilmişdi. XIX əsrin əvvəllərindən dialektik inkişaf ideyası təbiətşünaslığın
müxtəlif sahələrinə, birinci növbədə geologiya və biologiyaya geniş yayılmışdı.
Həmin dövrdə geologiya və biologiyada Yer üzərində baş verən inkişafı müxtəlif cür
izah edən fəlakətlər və təkamülçülük konsepsiyaları arasında kəskin mübarizə gedirdi.
Yerin geoloji qatlarını öyrənən geologiyanın ayrı-ayrı bitki və heyvan qalıq-
larının aşkara çıxarılmasına əsaslanan Jorj Küvye (1769-1832) kataklizmlər (fəlakət-
lər) konsepsiyasını irəli sürərək bildirirdi ki, Yerin ayrı-ayrı geoloji dövrlərində
naməlum səbəblərdən baş verən kataklizmlər nəticəsində tamamilə məhv olmuş bitki
və heyvan növləri hətta, ali canlılar da daxil olmaqla heç bir təkamül keçirmədən
birdən-birə yaranmışdır.
Küvye və tərəfdarlarının irəli sürdükləri fəlakətlər konsepsiyasına qarşı özünün
təkamül təlimini irəli sürən Jan Batist Lamark (1744-1829) 1809-cu ildə çapdan çıxan
«Zoologiyanın fəlsəfəsi» əsərində üzvi aləmin dəyişilən ətraf aləmin təsiri altında
təkamülə uğradığını və bu prosesdə yeni-yeni növlərin əmələ gəldiyini bildirmişdi.
Təkamül təliminin təşəkkülündə və təsdiq olunmasında əhəmiyyətli rolu ingilis
təbiətşünası Çarlz Lyayelin (1797-1875) üç cildlik «Geologiyanın əsasları» əsəri
112