54
salın. Əzab-əziyyət içində olanları da elə xatırlayın ki, sanki
özünüz onlarla birgə əzab-əziyyət çəkirsiniz”.
3. Menis Əbdünnur
1930-cu ilin oktyabr ayında Misirin Assyut şəhərində bir pastorun
ailəsində anadan olmuş Menis on beş yaşından iman yoluna gəldi və
indiyədək bu yolla gedir. Menisin həyatında çox-çox gözəl əhvalatlar
baş verib, Rəbb İsaya sadiq qalan bu xidmətçi Rəbbin sədaqətini
dəfələrlə görmüşdür. Onun həyatından bir neçə maraqlı əhvalat
haqqında qısaca yazmaq istəyirəm.
1945-ci ilin dekabrın 14-də Menis bir məsihçi toplantısında vəzə
qulaq asdıqdan sonra özünü Rəbb İsaya həsr etdi. İki gün sonra
dekabrın 16-da o, sakit bir yerdə dua etmək və Allahı düşünmək
istəyib bir futbol meydançasına getdi. Orada gəzişərkən birdən
“Sən pastor olacaqsan” deyən bir səs eşitdi. Menis o sözləri öz
qulaqları ilə eşitdi və elə bildi ki, arxasında kimsə var. Danışanı
görmək üçün üzünü çevirib baxdı, amma heç kimi görmədi. Bir az
gəzdikdən sonra Menis yenə bu sözləri deyən həmin səsi eşitdi. Bir
neçə dəqiqə sonra bu, üçüncü dəfə də təkrarlandı. O zaman Menis
Allahın ona danışdığını başa düşdü.
Menis kimyaçı olmağı arzulamışdı. O, pastor olmaq istəmirdi.
Allahla ünsiyyətdə ola-ola öz həyatı üçün Allahın iradəsini öyrəndi.
Həmin gün Menis Allahın çağırışı ilə razılaşaraq özünü pastor
xidmətinə həsr etməyi qərara aldı. Diz çöküb belə dua etdi: “Ya Rəbb,
mən pastor olmaq istəmirəm, amma əgər Sən bunu istəyirsənsə,
mən Sənin istədiyini etməyə hazıram, ancaq Sən mənə bu xidmətdə
sevinc ver!”
Bir neçə ay sonra Menis valideynlərinin xeyir-duası ilə Qahirə
müjdəçi ilahiyyat seminariyasına daxil oldu. 1946-cı ilin oktyabr
ayında Menis Əbdünnur həyatında ilk dəfə Misirin paytaxtı
Qahirəyə getdi. 1947-ci ildə yay tətili zamanı Menis Qahirədən 70
km şimalda yerləşən Tanta şəhərində təşkil olunmuş bir konfransda
iştirak etdi və orada Markos Əbdülməsih adında bir pastorla söhbət
edərək Müqəddəs Ruhla necə dola biləcəyini ondan soruşdu. Pastor
55
Əbdülməsih ona dedi ki, bunun iki şərti var: 1) bütün ürəyi ilə
Rəbbə itaət etməyi arzulamaq (Həv. 5:32 — “Allahın Özünə
itaət edənlərə verdiyi Müqəddəs Ruh”); və 2) Ruhla dolduğuna
inanmaqdır. O həmçinin dedi ki, səmərəli xidmətin sirri, Müqəddəs
Ruhun qüvvəsidir (Həv. 1:8 — “Müqəddəs Ruh üzərinizə enəndə
siz qüvvət alacaq... hər yerdə Mənim şahidlərim olacaqsınız”).
Bundan sonra Menis Müqəddəs Ruhla doldu, onun xidməti
qüvvətləndi və səmərəli oldu.
Bir gün gənc Menis bir cəmiyyətə köməkçi kimi göndərildi. Orada
olarkən maraqlı bir əhvalat oldu. Menis o cəmiyyətin bir rəhbəri
ilə üzvlərinin siyahısına baxanda, onların hələ baş çəkmədikləri bir
qadının adını gördü. Menis gedib ona baş çəkməyi təklif edəndə
rəhbər ona dedi:
— Yox, bu qadına baş çəkmək olmaz.
— Niyə olmaz?
— Çünki onun əri dəhşətli adamdır!
Doğrudan da, o qadının əri içki içən, zina edən və adam öldürən
dəhşətli bir kişi idi. Adı Həbib idi. Bütün şəhər ondan çəkinirdi.
Lakin Menisin fikri başqa idi:
— İsa məhz belə adama birinci baş çəkərdi.
Cəmiyyətin rəhbəri Menisə dedi:
— Yaxşı, mən sənə onun evini göstərərəm. Sən girərsən, mən isə
səni bayırda gözləyərəm.
Onlar oraya çatanda Menis qapını döydü. Həbib pəncərədən baxıb
“Kimdir?” — deyə soruşdu.
— Müjdəçidir! — deyə Menis cavab verdi.
Həbib cəld qapıya yaxınlaşıb açdı və Menisə:
— Mənim qapıma heç vaxt nə müjdəçi, nə də keşiş gəlib, — dedi.
56
Menis Həbibə İsanın günahkarları çox sevdiyini anlatdı, samariyalı
qadının, Zakkayın hekayələrini danışdı. Axırda Həbib ağlaya-ağlaya
Məsihi qəbul etdi və onun həyatı o qədər dəyişdi ki, bütün şəhər
ancaq ondan danışırdı.
Üstündən illər keçdi, cavan Menisin 45 yaşı oldu. O vaxta qədər
onun həyatında nələr baş verməmişdi! Bunu nəql etmək üçün ayrı
bir kitab yazmaq lazım olardı. Mən isə burada ancaq qısaca iki-üç
maraqlı əhvalat barədə yazacağam. Menisin 45 yaşı olanda onu
Qahirədəki “Qəsr Əl Dobara” adında imanlılar cəmiyyətinin baş
pastoru seçdilər. Menis oraya gələndən sonra cəmiyyətin üzvlərinin
sayı iki dəfə ikiqat artdı. Bu gün Qəsr Əl Dobara Yaxın Şərqdə ən
böyük müjdəçi məsihçi imanlılar cəmiyyətidir — min beş yüzdən
çox rəsmi üzvü var və yeddi minə yaxın adam hər həftə müxtəlif
toplantılarda iştirak edir. Cəmiyyət çoxlu kiçik qruplardan ibarətdir
və hər bir qrup kiçik imanlı ailəsi kimidir.
2003-cü ildən bəri Qəsr Əl Dobara Sat-7 adında bir peyk televiziya
xidmətində fəal iştirak etmişdir. Pastor Menis Misirdə ancaq xristian
əhalisinə deyil, bütün insanlara Müjdəni yaymağa can atmışdır. Bu
səbəbdən onun həyatı ən azı iki dəfə təhlükəli vəziyyətdə qalmışdır.
Hələ 1981-ci ildə Misirin prezidenti Ənvər Sadat Misirin 1500
radikal adamının həbs edilməsi üçün fərman imzalamışdı. Pastor
Menis Əbdünnur müsəlmanlara Müjdəni yaydığından onun adı
da o siyahıya düşmüşdü. Bu xəbər çıxanda pastor bütün gecəni
yatmayıb tutulmasını gözlədi. O, bütün gecəni Müqəddəs Kitabdan
Yeremya peyğəmbərin 18-ci fəslini oxuyub dua etdi. Rəbb
Yeremyaya dulusçunun evinə enməyi buyurub “orada sözlərimi
sənə bildirəcəyəm”
[135]
— dedi. Yeremya gedib dulusçunun çarx
üzərində işlədiyini gördü. Menis özünü dulusçunun çarxda palçıqdan
düzlətdiyi bir qab kimi hiss edirdi. Çarx fırlandıqca qabın başı
gicəllənir. Dulusçunun barmaqları palçığı sıxıb ondan bir forma
düzlədir. Menis də o gecə çox sıxıldığını hiss edərək belə dua edirdi:
[135]
Yeremya 18:2
57
— Ya Rəbb, qoy Sənin istədiyin kimi olsun. Məni Öz istədiyin
şəklə sal!
Bu vəziyyətdə Menis bir mənada Rəbbin qucağında olduğundan
təsəlli tapırdı. O, Rəbbə tam etibar edərək, “Rəbb bilir. Yəqin ki, bu
mənim üçün faydalıdır” — deyə düşünürdü.
O gecə Menisin adı naməlum bir səbəbə görə polisin siyahısından
çıxarıldı. Böyük Dulusçu onu həbs edilməkdən qorudu.
2000-ci ilin may ayında bir kişi, pastor Menisin ofisinə girdi. O,
pastorun qarşısında durub üç tapança çıxartdı, onun başına tərəf
uzatdı və birinin gülləsiz, ikisinin də güllə ilə dolu olduğunu ona
göstərdi. Birinci tapança Menisin başına yönələndə o, fikrində belə
dua etdi: “Mən hazıram, ya Rəbb”. İkinci tapança yönələndə “Qoy
yaxşı vursun, ya Rəbb. Mən iflic olub həyat yoldaşıma yük olmaq
istəmirəm” — dedi. Axır ki, üçüncü tapançanın qarşısında pastor
Menis o kişiyə:
— Əyləş. Mən sənə necə qulluq edə bilərəm?” — deyə ondan
soruşdu.
— Mənə Məsihdən danış.
— İnan, sənə Məsihdən danışmağım üçün mənə üç tapança ilə
gəlməli deyil idin. Birinci sən özün Məsih barədə bildiklərini mənə
danış, sonra mən sənə qalanını danışaram.
O adam bir neçə gün Menis Əbdünnurun yanına gəlib Xilaskar
barədə öyrəndi. 2000-ci ilin oktyabr ayında onu axırıncı dəfə məbəddə
gördülər. O, Rəbbin süfrəsini qəbul etdi, sonra pastor Menisə belə
dedi: “Siz mənim həyatımda öz barmaq izinizi qoymusunuz!” Pastor
Menis iman vasitəsilə bir gün o adamı cənnətdə görəcəyinə ümid
edir.
50-dən artıq kitabın müəllifi, 45-dən çox kitabın tərcüməçisi,
1000-dən çox ərəb məsihçi məqaləsinin müəllifi Menis Əbdünnur
radiodan, peyk televiziyasından və internetdən minlərlə ərəbə
səslənmişdir. Onun “Məhəbbət əsla tükənməz” adında çox gözəl bir
kitabı Azərbaycan dilinə də tərcümə edilmişdir.
58
Bir gün pastor Menis Riçard Vurmbrand ilə görüşəndə Vurmbrand
ona dedi:
— Əgər sən qorxmasan, onlar səndən qorxacaqlar.
— Bəli, mən çoxdan belə yaşayıram və heç nədən qorxmuram —
deyə misirli iman adamı rumıniyalı iman adamına cavab verdi.
İman elə bu deməkdir. Qorxuda nə məhəbbət var, nə də iman.
Məhəbbətlə fəal olan imanda isə qorxu yoxdur. Ancaq bu kimi
imanla Rəbbə sadiq qalmaq və Rəbbi razı salmaq olar.
59
Mənim şəhadətim
“Biri varmış, biri yoxmuş, bir ədalətsiz padşah, bir də zəhmətsevən
Murad varmış. Padşah sarayda hökm edərmiş. Murad da pinəçiliklə
gün keçirib həyat sürərmiş...”
Bu şəhadətimi Azərbaycan xalq nağılı ilə başlamağım təsadüfi
deyildir. Allah “dəfələrlə və müxtəlif yollarla”
[136]
insanlara danışıb
və hələ danışmaqdadır. Mən tələbə olanda Allah mənə “Pinəçi
Murad və şah” adlı nağıl vasitəsilə danışdı.
İyun ayı idi. Mən iş axtarıb tapa bilmirdim. Bir ay sonra Türkiyədə
bir tədbir keçiriləcək idi və mən hiss edirdim ki, Allah mənim də o
tədbirdə iştirak etməyimi istəyir. Ancaq oraya getmək üçün mənə
yol pulu, mehmanxana pulu və yemək pulu lazım idi. Mən sadə bir
tələbə idim və 500 dollar pul tapmaq mənə çox çətin görünürdü. Bir
ay vaxt qalmışdı və heç bir iş rastıma gəlməmişdi. Bir ay içərisində
o qədər pul heç vaxt qazanmamışdım, amma Allahın bir möcüzə
ilə mənə bu pulu yetirəcəyinə inanırdım. Hər gün dua edir və
gözləyirdim.
Bir gün mən Azərbaycan dili dərsliyi
[137]
götürüb oxumağa
başladım. Oxuduğum əsər “Pinəçi Murad və şah” nağılı idi. Bu
nağılın məzmunu qısaca belədir:
Ədalətsiz padşah istədi bilsin ki, onun ədalətsizliyi haqqında xalq
nə deyib, nə danışır. O, vəziri ilə məsləhətləşib paltarını dəyişdi,
saraydan çıxdı. Şəhəri gəzib dolandı, bir həyətin yanından keçərkən
evdən gülmək səsi eşidib dayandı.
— Kim ola bilər ki, mənim dövrümdə ucadan gülsün? — deyə
qapını döydü.
[136]
İbranilərə 1:1
[137]
Azərbaycan dili (rus məktəbinin 9-cu sinfi üçün). M.S. Aslanov, Ə.M.
Abbasov. Maarif nəşriyyatı, Bakı — 1985.
60
— Kimdir? — deyə həyətdən bir səs gəldi.
Padşah cavab verdi:
— Qərib bir qonağam, şəhərə təzə gəlmişəm. Qalmağa məkanım,
yatmağa yerim yoxdur. Bir gecəliyə məni qonaq saxlayın.
— Mənim qapım da, kasıb süfrəm də həmişə qonaq üzünə açıqdır.
Bir qonağım var, qoy olsun iki, — deyib ev yiyəsi qapını açdı.
Beləliklə pinəçi Murad padşahı qonaq qəbul etdi. Yer salıb yatmaq
istəyəndə padşah dedi:
— Bir söz soruşmaq istəyirəm.
— İkisini soruş, qonaq qardaş, — deyə ev yiyəsi dilləndi.
— Sənin günün-güzəranın mənim çox xoşuma gəldi. Bilmək
istəyirəm ki, sən nə işin sahibisən. Nə yolla çörək qazanıb gün
keçirirsən?
— Nə iş sahibi olacağam? Pinəçiyəm, adım da Murad. Səhərdən
axşama kimi küçə başında oturub çörək qazanıram. Gündəlik
qazancımla bir-iki qonaq çağırıb bu daxmada gün keçirirəm.
Padşah bir söz deməyib fikrə getdi. Günəşin işığı gecənin qaranlıq
pərdəsini açarkən pinəçi Murad padşahı yola salıb dedi:
— Qonaq qardaş, əgər axşama kimi yatmağa yer tapmasan,
utanma, bizə gəl, gözüm üstə yerin var.
Padşah razılıq edib Muraddan ayrıldı. O gün şəhərdə car çəkib
belə bir xəbər verdilər:
— Ey camaat, bilin və padşahın hökmündən xəbərdar olun. Bu
gündən sonra heç kimə icazə verilmir ki, küçədə oturub pinəçilik
etsin. Hər kəs bu əmrə əməl etməsə, padşahın qəzəbinə gələcəkdir.
Axşam vaxtı padşah yenə də paltarını dəyişib, çomağını götürdü
və saraydan çıxıb bir baş pinəçinin evinə tərəf yönəldi. O, qapıya
çatar-çatmaz tar-qaval səsi eşitdi. Bu səs Muradın evindən gəlirdi.
Padşah təəccüb edib qapını döydü. Murad qapını açıb padşaha dedi:
61
— Qərib qonaq, xoş gəlmisən, özü də vaxtında gəlmisən.
Padşah içəri daxil olub gördü ki, otaqda başqa qonaqlar da vardır.
Süfrə açılmış, yeməklər düzülmüşdür. Qonaqların başı yeməyə
qarışmışdır. Padşah Muraddan soruşdu:
— Görünür, bu gün pinəçilikdən çox qazanmısan?..
— Xeyr, padşah mənim halal sənətimi qadağan etdi.
— Bəs bu qonaqlığın xərci hardandır?
— Ey qonaq qardaş, elə ki car çəkib padşah əmrini xəbər verdilər,
mən özümü itirmədim. Hökmün ağırlığı məni qorxutmadı. Bir
süpürgə götürüb evlərin və dükanların qabağını süpürdüm. Azdan-
az, çoxdan-çox nə verdilərsə, qane olub aldım. Zəhmətim artdısa
da, qazancım da az olmadı. “İmkanım varsa, qoy süfrəmin başında
oturanların sayı da çox olsun” — deyib qonşularımı da qonaq
çağırdım.
Bundan sonra padşah süpürgəçiliyi də qadağan etdi. Hər gün
padşah əmr verir, Muradın əl atdığı hər sənəti qadağan edirdi. Lakin
Murad hər axşam süfrə açıb qonaqları qəbul edirdi, padşah da bu
pinəçi ilə bacara bilmirdi.
Axır ki, bir gün padşahın adamları Muradı tələyə salıb saraya
gətirdilər və padşah onu özünə saray məmuru təyin etdi. Murad
padşahın bu mərhəmətinin mənasını başa düşmədi. Onu geyindirdilər,
belinə bəzəkli, naxışlı qılınc bağladılar. Axşam gün batanadək
sarayda saxlayıb padşahın gözü qabağında dayandırdılar. Şəhərin
üzərinə qaranlıq çöküb çıraqlar yananda padşah Murada dedi:
— İndi get sabah səhər tezdən gəlib əmrimi gözlərsən.
— Baş üstə! — deyib Murad saraydan çıxdı və evinə tərəf yollandı.
Murad gedəndən sonra padşah da paltarını dəyişib sarayı tərk
etdi. O gəlib Muradın evinə çatanda qapıya vurulmuş fanarı görüb
heyrətdə qaldı. Qonaqların biri gəlib biri gedirdi. Murad qapıda
durub qonaqları qəbul edirdi. Arvadı da xörək hazırlayırdı. Qonaqlar
62
yeyib içincə padşahın ürəyi döyünür və bugünkü qonaqların xərcini
onun haradan tapdığını bilmək istəyirdi. Söhbət arasında macal
tapıb Muraddan soruşdu:
— Bu xərc haradandır?
— Padşah hesabına.
— Açıq danış, məni başa sal.
— Bu gün padşahın adamları məni tutub saraya apardılar.
Geyindirib sarayda saxladılar. Padşah məni axşama kimi buraxmadı.
Qaranlıq düşəndən sonra evimə getməyə icazə verdi. Mən də pulsuz
evə gəlsəydim, süfrəm bağlı qalacaqdı. Odur ki, fikirləşib çarə
tapdım. Padşahın verdiyi qılıncın tiyəsini girov qoyub pul götürdüm.
Qonaqlıq üçün nə lazımdırsa, alıb evə gətirdim. Süfrəni bəzəyib
qonaqlarımı dəvət etdim.
— Bəs tiyəsiz qılıncla padşahın yanına necə gedəcəksən?
— Əvəzinə taxta tiyə düzəltdirib yerinə salmışam.
O gecə padşahın gözünə yuxu girmədi. Sabah Murada necə divan
tutacağını düşünürdü. O düşünürdü ki, sabah Murad onun suallarına
nə cavab verəcək və çətin vəziyyətdən necə çıxacaq.
...Səhər açılan kimi Murad öz yolu, “qonaq” da öz yolu ilə saraya
getdilər. Murad gəlib saraya çatanda bir neçə zəncirli dustağın
həyətdə saxlandığını gördü.
— Bu gün padşah qatillərə divan tutacaqdır, — deyə Muradı
xəbərdar elədilər. Padşahın taxtı eyvanda quruldu, padşah gəlib
oturdu. O, acıqlı nəzərlə vəzirə baxıb dedi:
— Qatillər hazırdırmı?
— Bəli, şah sağ olsun.
— Mənim saray məmurum buradadırmı?
— Mən əmrə hazıram, — deyib Murad irəli gəldi. Padşah Murada
əmr etdi:
63
— Bu saat qabaqda dayanmış dustağın boynunu vur!
Murad padşahın əmrini eşidən kimi düşündü, özünü itirmədi.
Sürətlə dustağın yanına gəldi və dedi:
— Ey dustaq! Sənin günahın varmı, qatilsənmi, ya yox, bu mənə
məlum deyildir. Padşah əmr edir, mən də onun əmrinə tabe olub
sənin boynunu vururam. Əgər, doğrudan da, qatilsənsə, qoy mənim
qılıncım ülgücdən də iti olub, sənin başını bədənindən ayırsın. Yox,
əgər günahın yoxdursa, mənim qılıncım taxtaya dönüb parça-parça
olsun.
Bunu deyib sürətlə qılıncını çəkdi və dustağın boynuna vurdu.
Qılınc sınıb iki parça oldu. O, üzünü padşaha tutub dedi:
— Ey padşah... Bu adam qatil deyilmiş. O, müqəssir olsaydı,
mənim qılıncım taxtaya dönməzdi.
Padşah Muradın bu hazırcavablığına, ağlına və tədbirinə etiraz
etməyə söz tapmayıb dedi:
— Ay pinəçi Murad, mən səninlə bacara bilmədim.
Mən nağılı oxuyub qurtardıqdan sonra ürəyimdə öz-özümə dedim:
— Bax, bu adam Allaha iman etmədən, ancaq özünə güvənərək
o qədər bacarıqlı oldu, hər gün süfrə açıb yoxsullara çörək verməyi
bacardı. Mən isə Rəbbi tanıyıram, Rəbbə iman edirəm, amma beşcə
yüz dollar qazana bilmirəm ki, gedim Türkiyədə Müqəddəs Kəlamın
çörəyini insanlara paylayım.
O zaman diz çöküb belə dua etdim:
— Ya Rəbb, mən də yuxusuz qalmaqdan, səhərdən axşama
qədər zəhmət çəkməkdən, hər cür işi görməkdən qorxmuram.
Yalvarıram, mənə iş ver! Mən işləməyə hazıram. Mən əlimi ağdan-
qaraya vurmadan Səndən yardım gözləmək istəmirəm. Səndən iş
istəyirəm və mənə iş verəcəyinə inanıram. Bir ay ərzində 500 dollar
qazanacağıma inanıram, çünki Sən mənə o işi verməyə qadirsən.
64
Belə dua etdim və özümü rahat hiss etdim. Ertəsi gün telefon zəng
çaldı. Anamın dəstəyi götürüb “Yox, mən indi çox məşğulam, bu
günlərdə alınmayacaq” dediyini eşitdim. Ürəyim döyündü. Anama
arada ingilis dilindən tərcümə işləri təklif edərdilər. Mən o anda
hiss etdim ki, ona iş təklif edirlər. Qışqırdım ki, mən işləyə bilərəm.
Beləcə işim düzəldi. Beynəlxalq bir sərgidə dörd gün işləyib 200
dollar qazandım. Amma hələ də 300 dollar çatmırdı. Bundan sonra
Rəbb mənə başqa bir iş verdi. Mən üç həftə səhərdən axşama kimi
işlədim və axırda mənə tam 300 dollar pul verdilər. Bu yolla mən
Türkiyədəki tədbir üçün lazım olan 500 dollar pulu əldə etdim.
Türkiyədə bir neçə həftə qaldıq. Qrupumuz başqa-başqa xalqlardan
olan məsihçilərdən ibarət idi. Biz türklərlə söhbət etdik. Bir gün
onlar İncili və Quranı oxuyub araşdırmış, bu Kitabları yaxşı bilən bir
adamla görüşmək istədilər. Bizim aramızda Quranı və hətta şəriəti
də yaxşı öyrənmiş məsihçi bir adam var idi. Çox gözəl söhbətlər
oldu. İsa Məsihdən danışdıq, çoxlu İncil kitabları paylandı. Daha
nələr-nələr oldu ki, hır şeyi danışmaq mümkün deyildir. Ancaq onu
deyim ki, mən bunun vasitəsilə Allahın gözəlliyini daddım. Allahın
kimisi yoxdur! Allahın övladlarının iman macəraları da saysız-
hesabsızdır! Mən fikirləşirəm ki, biz əbədiyyətdə Allahla birlikdə
olacağımız zaman bu qürbət dünyasında şahidi olduğumuz bütün
bu gözəl əhvalatları da yada salaraq Rəbbin gözəl işlərindən ləzzət
almağa davam edəcəyik.
“Sülh qaynağı olan Allah — qoyunların böyük Çobanı olan
Rəbbimiz İsanı əbədi Əhdin qanı ilə ölülər arasından dirildən
Allah sizi hər cür yaxşı şeylə təmin etsin ki, İsa Məsih vasitəsilə
Özünə xoş olanı bizdə icra etsin və siz Onun iradəsini həyata
keçirəsiniz. İsa Məsihə əbədi izzət olsun! Amin!” (İbranilərə
Məktub 13:20–21)
65
Mündəricat
Giriş ............................................................................ 4
İman nədir? ................................................................. 5
İmanın mahiyyəti ........................................................ 9
İman, imansızlıq və qorxu ......................................... 13
İman yolunda şübhələr .............................................. 17
İmanda ilk addımlar .................................................. 20
İmanları üçün müsbət şəhadət alanlar ....................... 22
İman yolunda kamil Nümunə İsa Məsih .................... 33
İmanın sınaqdan keçirilməsi ...................................... 36
İmanla Allaha yaxınlaşmaq ........................................ 39
İmanla yeni həyata doğru .......................................... 43
Müasir iman qəhrəmanları ........................................ 45
Mənim şəhadətim ..................................................... 59
Document Outline - Giriş
- İman nədir?
- İmanın mahiyyəti
- İman, imansızlıq və qorxu
- İman yolunda şübhələr
- İmanda ilk addımlar
- İmanları üçün müsbət şəhadət alanlar
- İman yolunda kamil Nümunə İsa Məsih
- İmanın sınaqdan keçirilməsi
- İmanla Allaha yaxınlaşmaq
- İmanla yeni həyata doğru
- Müasir iman qəhrəmanları
- Mənim şəhadətim
Dostları ilə paylaş: |