Azərbaycan məktəbi.-2010.-№5.-S.83-90
İstedadlı alim, şair, pedaqoq, bacarıqlı elm təşkilatçısı
Tərlan Novruzov
ADPU-nun kafedra müdiri,
filologiya elmləri doktoru, professor
Cəfər Xəndan - 100
Cəfər Xəndan Zeynal oğlu Hacıyev (1910-1961) sovet dövrü Azərbaycan ədəbiyyatşünaslığının ən
görkəmli nümayəndələrindəndir. O, 1910-cu il mayın 8-də İrəvan şəhərində müəllim ailəsində anadan olmuşdur.
Müəyyən səbəblər üzündən 1918-ci ildə ailəvi şəkildə Gəncəyə köçmüşlər. Bir müddətdən sonra ata və anası
Gəncədə vəfat etmiş Cəfər özündən kiçik qardaşı Rəşid və bacısı Leyla ilə birlikdə uşaq evində yaşamışdır.
O,
Gəncə Pedaqoji Texnikumunu (1925), V. İ. Lenin adına Azərbaycan Dövlət Pedaqoji İnstitutunu (1929) bitirmiş,
Müəllimlər İnstitutunda və ADU-da dekan, Azərbaycan EA Nizami adına Ədəbiyyat İnstitutunda şöbə müdiri
işləmiş, "Ədəbiyyat qəzeti", "Gənc işçi", "Kommunist", "Vətən uğrunda" qəzetlərində çalışmış, 1939-cu ildə
ədəbiyyatşünaslıq üzrə namizədlik, 1948-ci ildə doktorluq dissertasiyası müdafiə etmişdir. Cəfər Xəndan Böyük
Vətən müharibəsində siyasi rəhbər və jurnalist kimi iştirak etmiş, 1944-cü ildə İrana ezam edilmiş, Təbrizdə çıxan
"Vətən yolunda" qəzetinin baş redaktor müavini, Təbriz şairləri ədəbi məclisinin təşkilatçılarından biri olmuşdur.
Cəfər Xəndan 1947-1950-ci illərdə ADPU-da (keçmiş APİ) əvvəl Azərbaycan ədəbiyyatı tarixi kafedrasının
müdiri, filologiya fakültəsinin dekanı, sonra isə institutun rektoru (1947-1950) vəzifələrində çalışmışdır. O,
1950-1954-cü illərdə Azərbaycan Dövlət Universitetinin (indiki BDU) rektoru olmuşdur. 1952-1961-ci illərdə eyni
zamanda ADU-nun Azərbaycan ədəbiyyatı tarixi kafedrasına rəhbərlik etmişdir.
Cəfər Xəndan ədəbi yaradıcılığa şeir və məqalələrlə başlamış, ilk əsərlərini 30-cu illərdə çap etdirmişdir.
Onun "Bəyaz gecələr" (1936) kitabı müəllifın lirik həyəcanları ilə yanaşı, yeni gerçəkliyə münasibətini, sosial
təlatümlü bir epoxanın nəbzini əks etdirirdi. M.Müşfıqin redaktə etdiyi bu kitab onun poetik yaradıcılığında ilk
qaranquş oldu.
"Mübarizə yollarında" poeması (1940) keçən əsrin 20-ci illərində baş verən hadisələrdən bəhs edir.
O, Böyük Vətən müharibəsində qələmini süngüyə çevirir, cəbhə qəzetlərində çalışır, Cənub-Qərb, Şimali
Qafqaz, Zaqafqaziya cəbhə qoşunlarında xidmət edir, müharibə mövzusunda alovlu şeirlər yazırdı. Onun cəbhə
şeirlərinin əksəriyyəti dövri mətbuatda çap edilmiş, 1942-ci ildə "Cəbhə şeirləri" adı ilə kitabı nəşr olunmuşdur.
"Komissar", "Atam haçan gələcək?", "Döyüşə gedirəm", "Cəbhədən məktub", "Ölən düşmənə", "Gələcəyəm, gözlə
məni", "Sevgilim", "Dava haçan bitəcək?", "Ey Bakı!" və s. şeirlərində müəllif özünün qələbəyə inamını, vətənə
məhəbbətini, düşmənə nifrətini, el-obaya, xalqa və doğmalarına bəslədiyi hisləri ifadə etmişdir. "Cəbhədən məktub"
şeiri isə şairin həyat yoldaşı Məhbubə xanıma həsr olunmuşdur. Burada da eyni poetik ictimai məqsəd hökm sürür.
Milyonlarla döyüşçünün həyat yoldaşı arxa cəbhədə intizar çəkir. Məhbubə xanım da onlardan biridir və əslində
şair elə o milyonlara müraciət edir. Qadının narahatlığını sakitləşdirən müəllif sırasında döyüşdüyü ordunun daim
qələbələr qazandığını, düşməni qovan bu ordunun günəş ordusu olduğunu bəyan edir, əsgərləri qələbəyə inandırır.
Düşmənə nifrət və qəzəb hissi Cəfər Xəndanın "Düşmənə qarşı" şeirində də çox qabarıq hiss olunur. "Qarı
düşmənə" xitabən hər yeni müraciət, hər yeni bənd şairin düşmənə qarşı barışmazlıq hislərini coşdurur, ordunu yeni
döyüşlərə, yeni mübarizələrə səsləyir.
C.Xəndanın "Cəbhə şeirləri"nə ön söz yazan M.Hüseyn Vətən anlayışını şeirin döyüş poeziyasının əsas
qəhrəmanı sayır və yazırdı: "Vətən sözü şeirimizin ən əziz, ən həyəcanlı sözlərindən biridir. Şairin ilhamını
coşduran, ona qüvvət və mətanət verən, onun həyata, mübarizəyə şövqünü artıran da bu vətəndir...Vətən uğrunda
mübarizə bu şeirin başlıca mənbəyidir. Şairə ilham verən də budur".
Cəfər Xəndan gözəl lirik şeirlərin də müəllifi olmuşdur. Bunların sırasında məhəbbət, ailə-məişət, təbiət və
s. mövzularda şeirlər də vardır. "Dustaq", "Sənin gözlərin", "Mənsiz", "Rəna", "Mənim eşqim", "Yalnız sən",
"Bilirmisən?", "Ey pəri", "Röya", "Aya baxdım" və s. şeirlər oynaq ritmlərilə lirik təəssüratlar üzərində
köklənmişdir. Məsələn, "Aya baxdım" şeirində biz həm məhəbbət lirikasının, həm də təbiət lirikasının orijinal
vəhdətinə rast gəlirik. Şairin lirik qəhrəmanı Aya müraciətlə deyir:
6
Səmada Aya baxdım, düşündüm səni, ey yar!
Səmada Aya baxdım,
Səma çıxdı yadımdan.
Xəyalım ləpələndi, fikrim oldu tarimar,
Səbəb hicran deyilmi?
Hicran, bəlalı hicran!..
Cəfər Xəndan təkcə lirik şeirlər deyil, həm də epik şeirin maraqlı nümunələrini yaratmış şairdir. Yuxarıda
onun "Mübarizə yollarında" poemasını xatırlatmışdıq. Şairin "Lalə", "Sabir", "Qərənfil" kimi poemaları da vardır.
C.Xəndanın ən dəyərli epik əsərlərindən biri "Sabir" poemasıdır. Bu poema böyük M.Ə.Sabirə həsr edilmiş
ilk iri həcmli poetik əsərlərdəndir. Burada şairin həyatının ayrı-ayrı epizodlarının təsviri ilə böyük şairin obrazı
yaradılır. Onun Sultan Məcid Qənizadəyə məktub göndərməsi, müəllimlik imtahanı verməsi, şairin dostları, ona
ümumxalq məhəbbəti, mövhumata qapılmış mollaların ona nifrəti, şairin xəstələnməsi, onun Bakıdan getməsi əsərin
süjetini təşkil edən ayrı-ayrı epizodlardır. Poemada müəllif proloq və epiloq da vermişdir ki, bunlar müəyyən
məqsədlə edilmiş, şairin böyük xidmətləri xatırlanmış, onun xatirəsi yad edilmişdir.
Sabirin həyatı və mübarizəsi Cəfər Xəndan şeirinin mərkəzinə gətirildiyi kimi, onun satiraları və digər
şeirləri də ədibin alim qələmi ilə ətraflı təhlil olunmuş, dəyərli məqalə və monoqrafiyaların yaranmasına səbəb
olmuşdur.
Ümumiyyətlə, M.Ə.Sabirin böyük və əvəzsiz şəxsiyyəti, qeyri-adi, orijinal yaradıcılığı Cəfər Xəndanı ömrü
boyu düşündürmüş, məşğul etmişdir. O həm elmi, həm də bədii yaradıcılığında M.Ə.Sabirin nəhəng obrazını
məhəbbətlə yaratmışdır. Bu cəhətdən onun Sabir haqqında yazdığı "Şairin həyatı" adlı dəyərli kitabı diqqəti cəlb
edir. Xatirələr və tarixi sənədlər əsasında yazılmış bu kitab geniş oxucu kütləsi üçün nəzərdə tutulmuş və bir neçə
dəfə (1961, 1977) böyük tirajla nəşr olunmuşdur. Kitabda müəllifın əsas məqsədi oxucuları böyük Azərbaycan
şairi, misilsiz satira ustadı Mirzə Ələkbər Sabirin həyatı ilə tanış etmək olmuşdur. C.Xəndan şairin həyatına dair
fakt-materiallara sərbəst yanaşmış, bəzi mətnlərin dilində sadələşdirmələr aparmışdır.
Kitabda şairin mollaxana və S.Ə.Şirvaninin dərs dediyi məktəbdə oxuması, gənclik illəri, ilk şeirlərini
yazması, Şərqə səyahəti, Şamaxıda müəllimlik fəaliyyəti, "Molla Nəsrəddin"ə gəlişi, həyat və fəaliyyətinin Bakı
dövrü, müalicə üçün Tiflisə getməsi, nəhayət, ömrünün son anları və s. haqqında lazımi məlumatlar özünə yer
tapmışdır. Bunların şairin tərcümeyi-halını yaratmaqda mühüm dəyər kəsb etdiyini xatırlamaqla yanaşı, deməliyik
ki, son araşdırmalar kitabda verilmiş bəzi məlumatların dəqiqliyinə bir az ehtiyatla yanaşmağı tələb edir.
Cəfər Xəndan həm də istedadlı tərcüməçi idi. O, Nizami Gəncəvinin iyirmi bir, Heyran xanımın iki
qəzəlini, M.F.Axundovun "Şərq poeması"nı fars dilindən Azərbaycan dilinə tərcümə etmiş, bu tərcümələr ədəbi
ictimaiyyət tərəfındən böyük maraqla qarşılanmışdır. Üzeyir bəyi Nizami şeirlərinə musiqi yazmağa ruhlandıran
cəhətlərdən biri, bəlkə də, birincisi, Cəfər Xəndanın səlis və musiqili dillə etdiyi tərcümələr olmuşdur.
M.F.Axundovun A.S.Puşkinin ölümünə həsr etdiyi matəm qəsidəsi 1936-cı ildə aşkara çıxarıldı və tərcümə
məqsədilə müsabiqə elan olundu. Müsabiqədə M.Müşfıq, B.Qasımzadə, C.Xəndan və b. iştirak etmiş, C.Xəndanın
tərcüməsi ən yaxşı tərcümələrdən biri kimi təqdir edilmişdi.
Bu poetik tərcümədə M.F.Axundov əsərinin ruhu saxlanmış, müəllifın yaratdığı Puşkin obrazının və onun
itkisi ilə yaranan bədbin ovqatın təsvirinə geniş yer verilmişdir.
Cəfər Xəndanın bədii yaradıcılığı təkcə şeir və tərcümə ilə məhdudlaşmır. O, ədəbiyyatşünaslığın bütün
sahələrində səmərəli fəaliyyət göstərirdi. Həm də təcrübəli ədəbiyyat nəzəriyyəçisi, mahir ədəbiyyat tarixçisi və
istedadlı tənqidçi idi. O, elmi-pedaqoji işlə ictimai fəaliyyəti, alimliklə şairliyi məharətlə uzlaşdırırdı. 1925-ci ildən
müəllimliklə məşğul olan C.Xəndan əvvəlcə fəhlə fakültəsində, sonra ali məktəblərdə filologiya elmini tədris etmiş,
dərsliklər, monoqrafıyalar yazmış, antologiya və müntəxəbatlar tərtib etmişdir.
Hələ 30-cu illərdən ədəbiyyat nəzəriyyəsinin üslub, ədəbi növlər, mövzu, süjet və kompozisiya kimi
sahələrinə diqqəti yönəldən C.Xəndan 1940-cı ildə natamam və orta məktəblər üçün ədəbiyyat nəzəriyyəsi dərsliyi
yazıb hazırlamışdır. Onun təkrarən üzərində işlədiyi bu dərslik 1948 və 1958-ci illərdə nəşr olunmuşdur. Əsasən
orta məktəbin 8-10-cu sinifləri üçün yazümış dərs vəsaitinin sonuncu nəşri uzun müddət şagird, tələbə və
müəllimlərin stolüstü kitabına çevrilmiş, M.Rəfılinin "Ədəbiyyat nəzəriyyəsi" ilə yanaşı, dəyərli nəzəri
qaynaqlardan olmuşdur.
Giriş və yeddi fəsildən ibarət bu kitab ədəbiyyat nəzəriyyəsinin demək olar ki, bütün sahə və problemlərini
əhatə edir.
Ayrı-ayrı fəsil və bölmələrdən görünür ki, Cəfər Xəndan sovet ədəbiyyatşünaslığında gedən prosesləri
diqqətlə izləmiş, ədəbi-nəzəri problemlərə o dövrün elmi-nəzəri, tarixi-ideoloji səviyyəsindən qiymət verməyə
çalışmışdır. Dərslikdə bədii ədəbiyyatın əsas xüsusiyyətlərindən, estetik-tərbiyəvi əhəmiyyətindən, əsərin
quruluşundan, süjet və kompozisiya, məzmun və forma məsələsindən, yaradıcılıq prosesindən, üslub və poetika
məsələlərindən, ədəbi cərəyan və bədii əsərlərin növlərindən, bədii əsərlərin dili, şeir və nəsr kimi mövzulardan
ayrıca söz açılması diqqətəlayiqdir. Diqqəti çəkən başqa bir maraqlı cəhət folklorun, daha doğrusu, şifahi xalq
yaradıcılığının burada ayrıca fəsil kimi verilməsidir.
Cəfər Xəndanın ədəbi cərəyanlara, xüsusən klassisizmə, sentimentalizmə, romantizm və tənqidi realizmə
verdiyi təhlil və şərhlər öz dövründə, elə indinin özündə də aktuallığını, nəzəri səviyyəsini saxlayır. Alim ilk dəfə
olaraq klassisizm ədəbi cərəyanının Azərbaycan, eləcə də Şərq ədəbiyyatında mövcudluğunu irəli sürür, onun
janrlarını müəyyənləşdirir. Qəzəl, qəsidə, mədhiyyə və s. janrlarda sənətkarlarımızın klassisizmin estetik tələblərinə
uyğun əsərlər yaratdığına dair nümunələr gətirir.
"Ədəbiyyat nəzəriyyəsi" dərsliyinin diqqəti cəlb edən məqamlarından biri də ilk dəfə olaraq burada
Azərbaycan şeir növlərinə xüsusi diqqət yetirilməsidir. Müəllif hecanın bölgü xüsusiyyətləri, əruzun bəhrləri
haqqında çox ətraflı poetik təhlillər aparmışdır. Bununla belə, o doğru olaraq qeyd etmişdir ki, "Sərbəst şeir bizim
ədəbiyyatımızda tam yüksək səviyyəyə qaldırılmışdır".
Prof. C.Xəndanın "Ədəbiyyat nəzəriyyəsi" kitabı çox ağır zəhmətin, zəngin müşahidələrin, yüksək nəzəri
hazırlığın nəticəsi olaraq meydana gəlmişdir. Müəllif Azərbaycan və dünya bədii irsinin zəngin nümunələri
əsasında nəzəri məsələləri şərh və təhlil etmişdir. Sonrakı dövrlərdə yazılıb nəşr olunan dərsliklərdə bu kitabdan
kifayət qədər istifadə olunsa da, təəssüf ki, çox yerdə onun müəllifınin adı belə çəkilməmişdir. Bizə belə gəlir ki,
C.Xəndanın bu dərsliyini köhnə stereotiplərdən təmizləyib, bəzi əlavələrlə yenidən nəşr etdirmək həm müasir
nəzəriyyəşünaslığa bir töhfə olardı, həm də görkəmli nəzəriyyəçi alimin ruhu bu qədirşünaslıqdan razı qalardı.
Alim-pedaqoqun ədəbiyyat nəzəriyyəsi sahəsində məqalə və dərslikləri təkcə tədris-metodiki xarakter
daşımır, dərin elmiliyi ilə diqqəti cəlb edirdi. Buna görə də o çap olunan dərsliklərin və tədris vəsaitlərinin elmi
səviyyəsinə xüsusi fikir verir, öz məqalə və çıxışlarında da elmi-pedaqoji fıkrin diqqətini bu istiqamətlərə
yönəldirdi.
Ədəbiyyat tarixindən bəhs edən əsərləri də C.Xəndanı görkəmli bir tədqiqatçı, zəhmətkeş bir ədəbiyyat
tarixçisi kimi tanıdır. O, ilk növbədə sovet dövrü Azərbaycan ədəbiyyatının sistemli tədqiqatçılarındandır.
"Azərbaycan ədəbiyyatı (sovet dövrü)" dərsliyini hələ 1939-cu ildə çap etdirmiş alim bu sahədə səylərini sonralar
da davam etdirmiş, "Müasir ədəbiyyat" (1948, M.Ariflə birlikdə), "Azərbaycan sovet ədəbiyyatı" (1951), "XX əsr
Azərbaycan ədəbiyyatı" (1951), "Sovet ədəbiyyatı" (I və II hissələr, 1952), "Sovet ədəbiyyatı" (1959), "Sovet
ədəbiyyatı" (X sinif üçün) (1967, 1968, 1970 Məhəmməd Ariflə müştərək) kimi çoxlu ədəbiyyat dərsliyi çap
etdirmişdi. Ümumilikdə alimin "Sovet ədəbiyyatı" kitabı dalbadal 17 dəfə nəşr olunmuşdur. Bunların da bir çoxu
alimin ölümündən sonrakı illərə təsadüf edir.
Cəfər Xəndan XIX və XX əsrlər Azərbaycan ədəbiyyatının əsaslı tədqiqatçılarından biri olmuş, bu sahədə
məhsuldar və müntəzəm iş aparmışdır. Yeri gəldikcə M.P.Vaqif, Heyran xanım, Xurşudbanu Natəvan, Qasım bəy
Zakir, Mirzə Fətəli Axundov, Seyid Əzim Şirvani və b. haqqında məqalələr çap etdirmiş, ədəbi ənənələrin inkişafını
ön plana çəkmiş, orta əsrlərin klassik ədəbiyyatı ilə bu ədəbi şəxsiyyətlər arasında varisliyə xüsusi diqqət
yetirmişdir. Məsələn, Heyran xanımı Füzuli davamçısı kimi qiymətləndirən ədəbiyyatşünas 1951-ci ildə qələmə
aldığı məqalələrdən birində yazırdı: "Heyran xanım Füzuli romantik məktəbini Cənubi Azərbaycanda davam
etdirən söz ustalarındandır. Öz şeirlərini yüksək təşbeh, istiarə və mübaliğələr əsasında yazan Heyran xanım
mümkün qədər orijinallığa fıkir vermiş, deyilmiş söz və ifadələrdən qaçmağa çalışmışdır. Doğrudur, o bir çox
hallarda Füzulini izləmiş və ona nəzirələr yazmışdır, lakin bu nəzirələr epiqon şairlərin yaratdığı sönük nəzirələrdən
fərqlənir.
Orta əsrlər ədəbiyyatı və XIX əsr ədəbi prosesi dövrünə aid axtarışlar aparmasına baxmayaraq, Cəfər
Xəndan daha artıq dərəcədə XX əsr Azərbaycan ədəbiyyatının tədqiqatçısıdır. XX əsr ədəbiyyatınm elə bir
görkəmli siması yoxdur ki, alim onun haqqında söz açmasın. Onun 1951-ci ildə çap olunmuş "XX əsr ədəbiyyatı",
1955-ci ildə nəşr edilmiş "XX əsr ədəbiyyatı tarixi" oçerkləri monoqrafıyası bu gün də öz əhəmiyyətini
itirməmişdir.
Alim XIX-XX əsrlər Azərbaycan ədəbiyyatında Nizami mövzularını, XX əsr ədəbiyyatında Füzuli
təsirlərini arayıb araşdırmış, ədəbiyyatımızda və onun inkişafında ənənə və novatorluq xətlərini aşkara çıxarmağa
nail olmuşdur. Füzulinin XX əsr ədəbiyyatına təsirindən söz açan ədəbiyyatşünas bu məqamda iki cür təsir faktını
aşkarlayırdı. "XX əsr Azərbaycan ədəbiyyatında Füzuli ədəbi məktəbindən istifadə məsələsinə gəlincə qeyd etmək
lazımdır ki, böyük sənətkardan sonrakı şairlərimiz ondan iki yolla istifadə etmişlər: Füzulini təqlid və yamsılama,
digəri isə yaradıcı istifadədir" (2).
İkincilərə o, M.Ə.Sabir, M.Hadi, A.Səhhət kimi sənətkarları misal göstərir, onların Füzulidən istifadəsində
orijinal, özünəməxsus forma və məzmun ünsürləri axtarıb tapırdı. Hələ 1939-cu ildə nəşr edilmiş kitabı ilə ("XX əsr
Azərbaycan ədəbiyyatına giriş", "Molla Nəsrəddin ədəbi cərəyanı"), eləcə də C.Məmmədquluzadə, Ə.Haqverdiyev,
M.Ə.Sabir, S.S.Axundov, M.Hadi, A.Səhhət, A.Şaiq haqqında məqalə və oçerklərlə ədəbi əsr haqqında geniş
təsəvvür yaradan C.Xəndan ədəbiyyatımızın az tədqiq olunmuş Ə.Cənnəti, M.S.Ordubadi, Simurq, H.Cavid və b.
nümayəndələri haqqında dəyərli fikirlər söyləmişdir.
Cəfər Xəndan XX əsr Cənubi Azərbaycan ədəbiyyatının ən məşhur tədqiqatçılarından olmuş, bu ədəbiyyat
haqqında 1948-ci ildə doktorluq dissertasiyası müdafıə etmişdir. Onun 1944-1946-cı ildə Təbrizdə "Vətən yolunda"
qəzetində çalışması, bu qəzetdə Cənubi Azərbaycan ədəbiyyatının müxtəlif dövrlərinin nümayəndələri haqqında
əhəmiyyətli yazı və məqalələr çap etdirməsi onun ədəbi tərcümeyi-halının vacib səhifələrindən biridir.
Bu məqamda o, XV-XVI əsrin Təbriz şairləri ilə yanaşı, XIX-XX əsrlərin Zeynalabdin Marağayi, Səid
Səlmasi, Ləli, Mirzəli Möcüz, Mirzə Mehdi Şükuhi, Yəhya Şeyda, Fəxrəddin Məhzun, Mir Tağı Milani və b. ədəbi
simaları haqqında məqalə və oçerklər yazmışdır. C.Xəndan 1944-1946-cı illərdə Təbriz şairlər məclisinin işində
fəal iştirak etmiş, "Vətən yolunda", "Şəfəq", "Qızıl siniflər" və s. qəzet və jurnallarda o taylı - bu taylı
Azərbaycanımızın ədəbiyyatı haqqında yazılar dərc etdirmişdir. Ədib sonralar da Cənubi Azərbaycan ədəbiyyatında
gedən prosesləri diqqətlə izləmiş, Cənubun vətənpərvər şairlərinin yaradıcılığına yüksək qiymət vermişdir. O,
"Cənubi Azərbaycanın müasir yazıçıları" adlı məqaləsində yazırdı: "Ana dilində yazdığına görə keçmişdə təqib
olunan sənətkarlar indi bütün əsərlərini Azərbaycan dilində yazır, ömründə ana dillində yazmayan liberal şairləri də
öz sıralarına alırddar".
Ədəbiyyatşünas alim Azərbaycan ədəbiyyatı tarixinin yazılması üçün aparılan monoqrafık işlərin və
fundamental tədqiqatların tərəfdarı idi. Belə tədqiqatların sırasında biz Mirzə Ələkbər Sabir, Cəfər Cabbarlı,
Mikayıl Müşfiq, Mir Cəlal və başqalarının adlarını görürük. Onun ilk elmi işi Sabir yaradıcılığına həsr olunmuş və
1939-cu ildə o, bu mövzuda namizədlik dissertasiyası müdafıə etmişdir. C.Xəndanın Sabir irsinə həsr olunmuş iki
monoqrafıyası, həyatına dair "Şairin həyatı" kitabı, çoxsaylı məqalələri, çıxış və məruzələri vardır.
Bunların arasında "Sabir yaradıcılığının sənətkarlıq xüsusiyyətləri" monoqrafıyası (1962) xüsusi əhəmiyyət
kəsb edir. Kitab alimin ölümündən sonra nəşr edilmişdir. Həmin monoqrafiyada Sabirin poetikası, onun
yaradıcılığında tendensiya və ifşa üsulları, şeir və şair haqqında fikirləri, Sabirin romantikası, Sabir yardıcılığında
folklordan və canlı xalq ifadələrindən istifadə yolları kimi fəsillər var idi. Bu monoqrafıya XX əsr Azərbaycan
ədəbiyyatşünaslığında tarixi poetikaya həsr olunmuş ən əhatəli tədqiqatlardandır.
Sabir qüdrətli sənətkar olduğundan onun sənətkarlıq xüsusiyyətləri də geniş tədqiqatların predmeti
olmalıdır. C.Xəndan böyük uzaqgörənliklə Sabir sənətkarlığını araşdırmış, böyük elmi nəticələr əldə etmişdir.
Təsadüfı deyildi ki, monoqrafiya müəllifi əsərə yazdığı girişdə göstərirdi: "Sabir kimi böyük söz ustasının
poetikasını məhdud və mücərrəd halda təsəvvür etmək olmaz. O, ədəbiyyatımızın dünəni, bugünü və sabahı ilə
bağlı olduğundan məhz bu mənada da təhlil edilməlidir. Sabirin sənətkarlıq xüsusiyyətlərini klassik ədəbiyyatımızla
müqayisə edərkən, bu müqayisədə şairin ədəbiyyatımıza nə kimi yeniliklər gətirdiyini, öz müasirləri arasında nə
kimi təsir oyandırdığını, bir şair kimi əzəmətini müəyyənləşdirə bilərik" (4).
Təkcə Sabirin poetikası deyil, onun "inqilabi-satirik şeirin banisi" olması, vətənpərvərliyi və humanizmi,
böyük satirasının mündəricə və məzmunu, təbliğ etdiyi həyat həqiqətləri və dünya hadisələrini işıqlandırmaq
bacarığı C.Xəndanın məqalələrində də öz əksini tapmışdır. "Fəxrimiz", "Sabir və Şərq", "Hophopnamə" və s.
məqalələr bu baxımdan böyük əhəmiyyətə malikdir. Sabirin yaradıcılıq metodundan söz açan ədəbiyyatşünas
"Fəxrimiz" məqaləsində (1946) yazırdı: "Sabir realizmi XX əsrin siyasi, ictimai və inqilabi hadisələri ilə bağlı
olduğundan, daha aktiv, daha mübariz bir realizm idi" (5).
Cəfər Xəndan öz müasirləri olan şair və yazıçılar haqqında da dəyərli ədəbi-tənqidi məqalələr yazmışdır.
Onun bu qəbildən yazdığı məqalələr içərisində Səməd Vurğun, Süleyman Rüstəm, Məmməd Rahim, Mikayıl
Müşfiq, Rəsul Rza, Sabit Rəhman, Ənvər Məmmədxanlı, Süleyman Rəhimov, Mirzə İbrahimov və başqaları
haqqında məqalələr vardır.
Bir tənqidçi olaraq o, şair və yazıçılar haqqında oçerklər, onların yeni əsərləri barədə məqalələr, teatr
tamaşaları haqqında resenziyalar, ədəbiyyatşünaslığın ümumi problemləri haqqında maraqlı fikirlərini və
müşahidələrini yazırdı. Məsələn, o, S.Vurğun haqqında bir neçə məqalə yazmış, onun yaradıcılıq və elmi
təşkilatçılıq fəaliyyətini, poeziyasını, dramaturgiyasını, sənətkarlıq problemini geniş təhlil etmişdir. Şairin
dramlarından söz açarkən onların tarix və müasirliklə səsləşdiyini qeyd edən C.Xəndan yazırdı: "Səməd Vurğunun
bütün dramlarında nəzərə çarpan ümumi xüsusiyyətlərdən biri də dərin realizm ilə birlikdə onlarda qüvvətli
romantikanın olmasıdır. Şair ən adi bir hadisəni belə lazımi romantik vüsətə qaldırmaqla əsərlərinin təsir qüvvəsini
qat-qat artırır, nəticədə epizodik surətlər belə oxucu və tamaşaçıların xəyalında silinməz izlər buraxır" (6).
1956-cı ildə görkəmli şairimiz Mikayıl Müşfiqə bəraət verildi və haqqında çoxlu məqalə və xatirələr
yazıldı. Bu mövzuda ilk kitabçalardan biri də C.Xəndana mənsubdur. O, M. Müşfiqin həyatından söz açmaqla
bərabər onun şeir və poemalarını da geniş təhlil edir, bu əsərlərin bədii estetik xüsusiyyətlərindən də danışır.
Ədəbiyyatşünas alim M. Müşfiqə sonralar da bir neçə məqalə həsr etmiş, onun 1960-cı ildə "Azərnəşr" tərəfındən
buraxılan ikicildliyi haqqında məqalə dərc etdirmişdir. M. Müşfiqi "lirik sözün qüdrətli nümayəndələrindən biri"
adlandıran C.Xəndan onun şeirləri və poemaları haqqında böyük ürək açıqlığı ilə söz açırdı: "Bu şeir inciləri hissə,
duyğuya, qəlbə təsir edir, xəyallarda silinməz iz buraxır" (7).
Cəfər Xəndanın tələbələri indi də onu təkcə görkəmli alim və ədəbiyyatşünas kimi deyil, mahir pedaqoq və
qüdrətli natiq kimi xatırlayırlar.
100 illiyini qeyd etdiyimiz şair, alim, pedaqoq, bacarıqlı təşkilatçı Cəfər Xəndan özü haqqında parlaq
xatirə, dəyərli poetik və elmi irs qoyub getmişdir. Bu irsin qorunması və təbliği hər birimizin unudulmaz
borcumuzdur.
İstifadə edilmiş ədəbiyyat
1.
C.Xəndan, Ədəbi qeydlər, Azərnəşr, Bakı, 1966.
2.
"Azərbaycan jurnalı", 1956, №12.
3.
C.Xəndan. Sabir yaradıcılığının sənətkarlıq xüsusiyyətləri. Azərnəşr, Bakı, 1962.
4.
C.Xəndan. Seçilmiş əsərləri, Azərnəşr, Bakı, 1972.
5.
C.Xəndan. S.Vurğunun dramları, Ədəbiyyatımızın dünəni və bugünü kitabında, Yazıçı Bakı, 1980.
Талантливый ученый, поэт, педагог и способный научный организатор
Резюме
Статья посвящена жизни, твор честву и педагогической деятель ности известного азербайджанского
поэта, маститого литературного теоретика, искусного историка ли тературы, талантливого критика
профессора Джафара Хандана, ко торый успешно сочетал научно-пе дагогическую работу с обществен ной
деятельностью.
Talented scholar, poet, pedagogue, creative scientific organizer
Summary
Jafar Khandan is accented as experienced literature theorist, skilful literature historian, and talented critic in
the article. His scientific-pedago gical work is dedicated to co-or dination of public activity, profession of poet with
erudition. The article covers his pedagogical activity.
Dostları ilə paylaş: |