1870-ci il şəhər islahatı təhkimçilik hüququnun ləğvindən sonra Rusiya
kapitalist münasibətlərinin inkişafı, şəhərlərin sürətli artımı, xüsusən də sənaye və
ticarət mərkəzlərində şəhər həyatının mürəkkəbləşməsi ilə bağlı idi. Şəhər
islahatının hazırlanması 8 ildən çox çəkdi. Onun 1864-cü ildə tərtib olunmuş,
burjuaziyanın tələblərini müəyyən dərəcədə nəzərə alan ilkin lahiyəsi çar dövlət
aparatının müxtəlif bürokratik məhkəmələrindəki çoxsaylı müzakirələrin
nəticəsində mühüm dəyişikliklərə məruz qaldı. Bunların nəticəsində şəhər islahatı
əvvəlki lahiyəyə nisbətən xeyli məhdud xarakter aldı. Şəhər əsasnaməsi 1872-ci il
iyunun 16-da təsdiq olundu. Əvvəlcə o ancaq Rusiyanın daxili quberniyalarında
tətbiq olundu. Cənubi Qafqazın digər rayonlarında olduğu kimi, Azərbaycanda da
bir çox şəhərlər xeyli böyüməsinə, əhalinin sayının artmasına baxmayaraq, polis
idarələrinin ixtiyarında qalmaqda davam edirdi.
Bakı qubernatoru Kolyubyakin ―yerli əhalinin kifayət qədər inkişaf
etmədiyini‖ [62] bəhanə gətirərək, şəhərlərin idarəsini polisin əlində saxlamağı,
şəhər dumalarını isə polisin yanında məşvərətçi orqan kimi yaratmağı təklif
edirdi. O, 1870-ci ildə şəhər əsasnaməsini təcrübə kimi ancaq bu şəkildə və özü də
təkcə Bakıdan tətbiq etməyi mümkün hesab edirdi.
Yelizavetpol qubernatoru da eyni bəhanə ilə şəhər təsərrüfatı işlərinin
polis idarələri vasitəsilə idarə olunmasında, Nuxa və Şuşada o zaman fəaliyyət
göstərən qaydanın saxlanılmasında təkid edirdi [63].
Qubernatorun mövqeyi canişin tərəfindən bəyənildi. 1874-cü il 28 oktyabr
tarixli fərman canişinin təkliflərini nəzərə alaraq, diyarın müxtəlif şəhərlərində
özünüidarə orqanların tətbiq etməyin ardıcıllığlını təyin etməyi Qafqaz hakimiyyət
orqanlarının ixtiyarına verdi.
1870-ci il şəhər əsasnaməsi ancaq 1878-ci ildə, yəni təsdiq edildikdən 8 il
sonra Azərbaycan şəhərlərinin təkcə birində - Bakıda tətbiq olundu.
Şəhər ―özünüidarə‖ orqanları həddən artıq məhdud səlahiyyətə malik idi.
Bu səlahiyyət şəhər vergi və rüsumlarını qoymaq, bazarları açmaq, şəhərin
sanitariya vəziyyətini təmin etmək, yanğınlarla mübarizə və s. hüquqlardan kənara
çıxmırdı.
Şəhər islahatını keçirmək zərurəti qarşısında qalan çar hökumət şəhər
―özünüidarə‖ orqanlarını real hakimiyyətdən məhrum etmək və onları mütləqiyyət
siyasətinə qarşı müqavimət göstərməsi üçün hər cür imkanı aradan qaldırmaq üçün
əlindən gələn hər şeyi etdi. Bu məqsəd təkcə şəhər ―özünüidarə‖ orqanlarının
səlahiyyətlərini məhdudlaşdırmaq və onların üzərində inzibati nəzarət qoymaqla
deyil, həm də elə seçkilər sistemi tətbiq etməklə əldə olunurdu ki, həmin sistem
―əlverişli‖ tərkibi təmin edir və fəhlələri seçki hüququndan məhrum edirdi.
Seçkilərdə iştirak etmək hüququ ancaq müəyyən əmlak senzinə malik
olanlara və şəhər vergilərinin ödəyənlərə, yəni ev sahiblərinə, tacirlərinə, fabrik və
zavod sahiblərinə verilirdi. Xüsusi şəxslərdən başqa vergiləri ödəyən idarələr,
müəssisələr, cəmiyyətlər, şirkətlər, monastırlar və kilsələrdə seçki hüququndan
istifadə edirdilər.
Şəhər ―özünüidarəsi‖ndə iştirak etmək səviyyəsi ödənilən şəhər
vergilərinin məbləğinə müvafiq idi. Bütün seçicilər üç dərəcəyə (kateqoriyaya)
bölünürdü. Bu dərəcədən hər birinin payına düşürdü. Birinci dərəcəyə adətən bir
neçə iri, ikinci dərəcəyə yüzlərlə orta, üçüncü dərəcəyə isə minlərlə xırda vergi
verənlər daxil edilirdi. Hər bir dərəcə xüsusi seçki məclisi təşkil edir və bu məclis
qlasnıların (şəhər duması üzvlərinin) üçdə bir hissəsini seçirdi. Nəticədə bu bir
ovuc varlı yüzlərlə, hətta minlərlə xırda tacirlər, prikazçiklər və ev sahiblərinin
seçdiyi qədər qlasnı seçirdi. Beləliklə, seçicilərin dərəcələrə bölünməsi seçkilərdə
iri ev sahibləri, sənayeçilər və tacirlərə üstünlüyü təmin etmək məqsədini güdürdü.
Əgər fəhlələr, xırda qulluqçular və sənətkarlar şəhərin xeyrinə yığılan
vergilər qoyulan binalara malik deyildirlərsə, şəhər əsasnaməsi onlara seçki
hüququ vermirdi. Qadınlar və 25 yaşına çatmamış cavanlar seçici korpusundan
tamamilə kənar edilmişdilər. Bütün bu məhdudiyyətlər ona gətirib çıxarırdı ki,
qlasnıların seçilməsinə şəhər əhalisinin cəmi 2-3 faizi buraxılırdı.
1870-ci il şəhər əsasnaməsi seçicilərin milli qeyri-bərabərliyini də təsdiq
edirdi. Xristian olmayan seçicilərdən seçilən nümayəndələr özgə dindən olanlar
kimi qlasnıların 50 faizdən çoxunu təşkil etməməli idilər. Qlasnıların seçilməsi
üçün səslərin mütləq çoxluğunu almaq tələb olunurdu. Lakin nəzərdə tutulana
nisbətən az sayda qlasnı seçildiyi təqdirdə, qalan qlasnıların nisbi səs çoxluğu ilə
seçilməsinə icazə verilirdi. Belə qəbildən olan seçkilərin nəticəsində ilk Bakı şəhər
dumasına seçkilərdə şəhərin ―ataları‖ sırasına başlıca olaraq, iri neft
sənayeçilərinin, fabrikçilər və tacirlər (V.Lalayev, H.Z.Tağıyev, Krasilnikov,
M.Nağıyev, Lianozov və b.) düşdülər. Şəhər dumasının qlasnıları, hətta formal
olaraq belə, seçicilər qarşısında məhsuliyyət daşımırdılar. Qlasnıların əksəriyyəti
―özünüidarə‖ orqanlarının işində passiv iştirak edirdilər. Əgər müzakirə olunan işin
nəticəsi ilə maraqlı deyildilərsə, onların çoxu dumanın iclasına gəlməyi belə
özlərinə rəva bilmirdilər.
Şəhər dumasının icraedici orqanları şəhər qlavası (bələdiyyə idarəsinin
başçısı) və onun başçılıq etdiyi bələdiyyə idarəsi idi. Onların seçkisi ikiqat
səsvermə yolu ilə keçirilirdi. Birinci səsvermə zamanı namizədlərin irəli sürülməsi,
ikinci səs vermə isə konkret şəxslərin seçilməsi məqsədini güdürdü. Bələdiyyə
idarəsinin tərkibi qubernator tərəfindən təsdiq olunmalı idi. İlk dəfə və təkrarən
seçilmiş şəxslər təsdiq edilmədiyi təqdirdə boş vəzifələri qubernator və ya daxili
işlər nazirinin təyin etdiyi adamlar tuturdular. Şəhər bələdiyyə idarəsinin başçısı
yerli burjuaziyanın nüfuzlu qrupları və hökumət orqanlarının gizli razılaşmasına
əsasən seçilirdi.
Bütün nöqsanlarına baxmayaraq, 1870-ci il şəhər əsasnaməsi hər halda
mütərəqqi addım idi, çünki Rusiyanın kapitalist inkişafının tələbatına cavab
verirdi. Bu əsasnamə Bakı kimi iri şəhərlər üçün daha mühüm əhəmiyyətə malik