Azərbaycan miLLİ elmlər akademiyasi ­­­­­­­­­­­­­­­folklor institutu­­­­­­­­­­­­­­­­­


§ 8. Toyda oğurluq xaosyaradıcı ritual mexanizmi kimi



Yüklə 2,14 Mb.
səhifə7/27
tarix02.01.2018
ölçüsü2,14 Mb.
#19463
1   2   3   4   5   6   7   8   9   10   ...   27
§ 8. Toyda oğurluq xaosyaradıcı ritual mexanizmi kimi
Kosmoloji (ritual-mifoloji) sxemə görə, inisiasiya (ər­gənlik) mərasimindən keçən subyekt bir davranış fazasından digərinə adlayaraq yeni status alır. Lakin bu, hələlik ritual sta­tu­sudur. Ritualın verdiyi status öz növbəsində cəmiyyət tə­rə­fin­dən təsdiqlənməli və fərd cəmiyyətin strukturunda öz sta­tu­su­na uyğun mövqe tutmalıdır. Başqa sözlə, ritual status ger­çək et­no­kosmik statusa çevrilməlidir. Fərd ritual vasitəsilə ger­­­çək (pro­fan) dünyadan qoparılaraq (ayrılaraq) sakral aləmə ad­­layır, bu­rada o, yenidən qurularaq təkrar cəmiyyətə dönür. Cə­miyyət profan dünya kimi sakral dünyanın strukturunu pro­yeksi­yalan­dırır. Fərdin strukturu sakral dünyada dəyiş­diri­lir­sə, bu dəyişiklik profan dünyada da (cəmiyyətdə) uyğun də­yiş­mələrə gətirməlidir. Çünki hər bir fərdin cəmiyyətdəki ye­ri, mövqeyi və statusu sakral dünya (göylər) tərəfindən mü­əyyən­ləşdirilir. Göylərin iradəsi yerlər (profan dünya) üçün qa­nundur. Bu cə­hət­dən cəmiyyət ölüb-dirilmə ritualı vasitəsi ilə sakral dünyaya gedən və oradan yeni statusla cəmiyyətə qa­yıdan yeni(ləşmiş) fərdə cəmiyyətin strukturunda onun qa­zan­dığı sakral statusa uyğun yer, mövqe və hüquq verməlidir. Baş­qa sözlə, cəmiyyət toplum halında sakral aləmdən qa­yı­danı qarşılayır, onun statusunu kollektiv şəkildə təsdiqləyir. Bu qarşılama və təsdiqləmə cəmiyyətin bütün struktur sə­viyyə­lərini əhatə edən mərasimdir və həmin mərasim oğuz­lar­da toy adlanır.

Bu gün Azərbaycan dilində iki gəncin evlənmə mə­ra­si­mi­ni bildirən toy semantemi oğuz mətnlərində (oğuz­na­mə­lər­də) ümumiyyətlə mərasim, yığıncaq, el məclisi, qonaqlıq, eh­san və s. mənalarda işlənmişdir. Qədim oğuzlarda toy janr, for­mat, funksiya baxımından müxtəlif olmuşdur. “Dədə Qor­qud”da həm “toy”, həm də “ulu toy” (böyük toy) se­man­tem­lə­ri var. Məsələn, Bayındır xanın ildə bir dəfə ağ, qırmızı və qa­ra çadırlar qurduraraq keçirdiyi “qonaqlıq” mərasimi toy ad­lanır: “Xanlar xanı xan Bayındır yildə bir kərrə toy edib, Oğuz bəglərin qonaqlardı”88.

Yaxud övladı olmayan Dirsə xanın Allahdan hacət (is­tək) diləmək məqsədi ilə verdiyi ümumxalq ehsanı ulu toy ad­lanır: “Dirsə xan dişi əhlinin sözilə ulu toy elədi, hacət di­lə­di”89.

“Toy” semanteminin el, tayfa, oba və s. başçılarının iş­ti­ra­kı ilə keçirilən ümumxalq formatı qurultay adlanır.

“Toy” semanteminin evlənmə paradiqması bu gün dili­miz­də həm “toy”, həm də “toy-düyün” şəkillərində qal­mış­dır. Borçalı mahalının Qarayazı elində (Sərtçala-Muğanlı kən­din­­də) çərşənbə axşamı qızların bir yerə yığışaraq çalıb-oxu­du­ğu məclis də toy adlanır.

Oğuzlar ərgənlik ritualından keçərək bəy statusu al­mış qəhrəmana toy edirlər. Evlənməni də nəzərdə tutan bu toy ritual kompleksidir və həmin kompleksin tərkib hissələri ri­tualın epikləşməsi zamanı epik tikinti materialı kimi das­ta­nın süjetlərinə “yayılmışdır”. “Dədə Qorqud”da belə ritual­lar­dan birinə – Dirsə xanın on beş yaşa çatmış oğlunun (gələcək Bu­ğacın) bəyolma mərasiminə diqqət edək. O, Bayındır xanın qız­mış buğasına qalib gələrək qəhrəmanlıq göstərir. O, bu qəh­rəmanlığı ilə iki ritual statusu alır: “ərdəmli” və “hü­nər­li”:

“Oğuz bəgləri gəlüb, oğlan üstinə yığnaq oldılar, təhsin de­dilər. “Dədəm Qorqut gəlsün, bu oğlana ad qosun: biləsincə alub, babasına varsun. Babasından oğlana bəglik istəsün, təxt alı versün” – dedilər. Çağırdılar. Dədəm Qorqut gəlür oldı. Oğlanı alub babasına vardı. Dədə Qorqut oğlanın babasına soy­lamış, görəlim, xanım, nə soylamış. Aydır:

Hey Dirsə xan! Oğlana bəglik vergil,

Təxt vergil – ərdəmlidir!

Boynı uzın bədəvi at vergil,

Binər olsun, hünərlidir!

Ağ ayıldan tümən qoyun vergil, –

Bu oğlana şişlig olsun, ərdəmlidir!

Qaytabandan qızıl dəvə vergil bu oğlana,

Yüklət olsun, hünərlidir!

Altun başlu ban ev vergil bu oğlana,

Kölgə olsun, ərdəmlidir!

Çigin quşlı cübbə ton vergil bu oğlana,

Geyər olsun, hünərlidir!


Bayandar xanın ağ meydanında bu oğlan cəng etmişdür. Bir buğa öldürmüş sənin oğlın, adı Buğac olsun. Adını bən ver­düm, yaşını Allah versün, – dedi.

Dərsə xan oğlana bəglig verdi, təxt verdi”90.



Nəzərdən keçirdiyimiz parçada diqqəti cəlb edən ilk ele­ment “on beş yaş” semantemidir:

Bu – “həddi-büluğ” məqamıdır. Bu yaşa çatmaqla Bu­ğa­cın uşaqlıq və yeniyetməlik dövrü başa çatır. Bu dövrdə o, uşaq­lıq və yeniyetməlik adları ilə tanınır. Dastanda bu adlar xatır­lanmır: Buğac haqqında “Dirsə xanın oğlancığı” deyə bəhs olunur. On beş yaş keçid məqamıdır. Bu yaşa çatmış xan-bəy oğlu ərgənlik ritualından keçərək yeni status almalı və Oğuz cəmiyyətinin yetkin vətəndaşına (Oğuz dünya mo­de­li­nin etnokosmik struktur vahidinə) çevrilməlidir.



Diqqəti cəlb edən ikinci element “ağ meydan” se­man­te­mi­dir:

Ağ – kosmosun, həyatın, kişi başlanğıcının və mərkəzi ha­kimiyyətin rəmzidir. “Dirsə xanın oğlancığı” qəhrəmanlığı ağ meydanda göstərir. Ağ ritual məkanı kimi ritual prosesinin üçün­cü (sonuncu) fazasını bildrir. Bu o deməkdir ki, biz “Dir­sə xanın oğlancığı”nın Buğanı öldürməsini ərgənlik ritualının ke­çid (aralıq) fazası kimi yox, onun sonu – bərpa mərhələsi ki­mi qəbul etməliyik. Əgər buğanı öldürmə keçid mərhələsi (ara­lıq faza) olsaydı, onda meydan “ağ meydan” yox, “qır­mı­zı” meydan adlanmalı idi. Lakin meydan ağ rəngdədir və bu da göstərir ki, on beş yaşına çatmış “Dirsə xanın oğlancığı” ar­tıq “qırmızı fazanı” (aralıq mərhələ) keçmiş, indi “ağ fa­za­ya” (bərpa mərhələsinə) daxil olmuşdur.



Diqqəti cəlb edən üçüncü element Buğa/Buğac se­man­te­midir:

“Dirsə xanın oğlancığı” Buğac adını məhz buğanı öl­dür­dü­­yünə görə alır: “Bir buğa öldürmüş sənin oğlın, adı Buğac ol­sun”91. Burada məsələ yalnız Buğanı öldürməklə qurtarmır. Ağ meydan – mərasim meydanı olduğu üçün oradakı bütün ele­ment və hərəkətlərin ritual semantikası var. Bütün ri­tual­lar­da döyüş kosmosla xaos arasındakı mübarizəni sim­vol­laş­dır­maq­la dünyanın yaradılışını ifadə edir. Burada da heyvanların dö­yüşdürülməsi kosmoqoniyaya (yaradılışa) xidmət edir. Bu mə­rasimdə “Dirsə xanın” ərgənlik ritualının aralıq fazasından keç­miş “oğlancığı” Oğuz kosmosunun struktur elementi kimi ye­nidən yaradılmalıdır. Bu, yaradılış (bərpa) ritualıdır və hey­van­ların döyüşdürülməsi həmin bərpa ritualının tərkib hissə­si­dir. Bu, sakral yaradılış-bərpa ritualı olduğu üçün ordakı hey­van­lar da (buğa və buğra) təsadüfi heyvanlar yox, dünyanın hissələrini (kosmos və xaosu) simvollaşdıran totem var­lıq­lar­dır. Kosmoloji sxemə görə, buğaya qalib gələn “oğlancıq” onun ətini yeməlidir. Oğlancıq buğanın ətindən yemədən Bu­ğa­ca çevrilə bilməz. Ritualda yeyilən heyvan bütün hal­lar­da totem əcdadla bağlıdır və yenidən yaradılmaq üçün hök­mən totemin ətindən yeyilməlidir. Ərgənlik ritualından ke­çən “Dirsə xanın oğlancığı” kosmoqonik yaradılış ri­tualın­da öldür­dü­yü (öldürməli, qurban verməli) olduğu buğanın ətin­dən ye­yə­rək Buğaca çevrilir. Demək, buğa – əcdadı sim­vol­laşdıran qurban (totem), buğa ilə döyüş – kosmosun, o cüm­lədən onun bir parçası olan oğlancığın yenidən (ritmik) ya­ra­dılışını sim­vol­laşdıran kosmoloji davranış (hərəkət) for­mu­ludur.

Bizim bu bərpamızın kosmoloji məntiq (sxem) üzrə get­di­yini elə dastanın özündəki faktlarla yoxlamaq olar. “Dədə Qor­qud” təsdiq edir ki, oğuz igidlərinin adları totem mən­şə­li­dir və onlar bu adları totem əcdadların ətindən yeyərək alırlar. Mə­sələn, dastanın səkkizinci boyunda “Aruz qocanın” düş­mən hücumu nəticəsində itərək çöldə böyümüş “oğlancığı” “at basuban, qan sümürər”. Uşağı tapıb cəmiyyətə qaytarırlar və Dədə Qorqud ona Basat adı verir92. Tədqiqatçıların ək­sə­riyyəti Basat adını “at basmaq” (ata qalib gəlmək) kimi izah edir. Buradakı motiv Buğac motivi ilə eynidir: Basatla Buğac eyni ritual sxemindən keçirlər:

Hər ikisi adsızdır: “Dirsə xanın oğlancığı”/”Aruz qo­ca­nın oğlancığı”;

On beş yaşına çatan xan-bəy oğlu ərgənlik ri­tualın­dan keçərək ad almalıdır. Buğac bu adı on beş yaşında alır. Aruz qoca Daş Oğuzun başçısıdır. Demək, Basat da onun oğ­lu kimi ərgənlik ritualından keçmək üçün on beş yaşında ol­ma­lıdır;

Dastanda “Dirsə xanın oğlancığı”nın ərgənlik ri­tu­alının ikinci fazasındakı (aralıq mərhələsindəki) “halı” təs­vir olunmasa da, “Aruz qocanın oğlancığı”nın Aslanın ya­nında­kı həyatı birbaşa bu dövrü (aralıq fazanı) bildirir. V.Terner ritualın bu aralıq (liminal) mərhələsi haqqında yazır ki, liminal varlıqlar nə burda, nə ordadır, nə bu, nə odur; onlar qa­nun, adət, şərait və mərasim tərəfindən yazılmış və mü­əyyən­ləşdirilmiş du­rumların ortasındakı aralıqdadır. Bundan do­layı onların ikimə­nalı və qeyri-müəyyən xüsusiyyətləri so­si­al və mədəni keçidləri rituallaşdıran çox cəmiyyətlərdə sim­vol­ların böyük rəngarəng­liyi ilə ifadə olunur93. “Aruz qocanın oğ­lancığı” da Basat adını alana qədər, yəni ritualın aralıq fa­za­sında olduğu müddətdə məhz V.Ternerin təsvir etdiyi “hal”dadır: onu çöldən tutub cəmiyyətə gətirirlər, lakin o, ye­nə də qaçıb aslanın yanına (çölə) gedir. Bu, onun liminal (ara­lıq) varlıq kimi, “ikimənalı və qeyri-müəyyən xüsusiyyətlərə” ma­lik olduğunu, insan və heyvan, cəmiyyətlə təbiət arasında ol­duğunu, “nə burda” (cəmiyyətdə), “nə orda” (təbiətdə), “nə bu” (insan), “nə o” (heyvan) olduğunu göstərir. Bu aralıq faza ba­şa çatanda “Aruz qocanın oğlancığı” yeni status və bu sta­tu­su bildirən adla – Basat adı ilə cəmiyyətə bərpa olunur (qa­yı­dır). Bu ritual Buğacla olduğu kimi, Dədə Qorqudun pat­ron­lu­ğu ilə həyata keçirilir: “Dədə Qorqud gəldi. Aydır: “Oğ­la­nım, sən insansan. Heyvanla müsahib olmağıl! Gəl, yaxşı at bin. Yaxşı yigitlər ilə eş yort! – dedi”94.

Basatın cəmiyyətə yeni statusda bərpası/qayıdışı to­tem heyvanın ətini yeməklə baş verir: o, “at basuban, qan sü­mürər”. Bu hərəkət formulu totem heyvanın ətini yemək ritualını inikas edir. Basatın atası Aruzu dastan boyunca mü­şayiət edən “at ağızlı” (at sifətli, at niqablı, at maskalı) ifadəsi at semanteminin totem işarə kimi ata-oğul kosmoqonik zən­ci­ri­nin kosmoenergetik xətti olduğunu birbaşa təsdiq edir. Belə to­tem xətti dastanda bir sıra nəsil şəcərələrini birləşdirir. Mə­sə­­lən, Baybura və oğlu Beyrəyin adları “börü” (qurd) xətti ilə bir­ləşir. Bu, onu göstərir ki, eyni ritual sxemindən keçən Buğac və Basat öz totem əcdadlarının ətindən yeyir və bu to­tem­lərin adlarını alırlar.

Diqqəti cəlb edən dördüncü element ritual statusla əldə olu­nan struktur səviyyəsidir:

Ərgənlik ritualından keçərək ərdəmhünər kimi igid­lik keyfiyyətlərinə yiyələnən Buğac buğanı öldürərək bu sta­tus­­ları ağ meydanda təsdiq edir. Oğuz mərasimlərinin sakral sta­­tuslu patronu Dədə Qorqud çağırılır və ondan Buğacın cə­miy­yətin strukturundakı yeni yerini müəyyənləşdirmək istə­ni­lir. Buğaca verilənlər onun Oğuz etnokosmosundakı yerini – per­­sonal kontinuumunu bildirir. Bunlar aşağıdakılardır:

– Bəylik və bəylik taxtı: sosial-siyasi struktur sə­viy­yə­si;

– Bədəvi at: hərbi struktur səviyyəsi;

– Min qoyun: iqtisadi struktur səviyyəsi;

– Qırmızı (qızıl) dəvə: iqtisadi struktur səviyyəsi;

– Altun (qızıl) başlı ban ev: sosial-məişət struktur sə­viy­yəsi;

– Çigin quşlı cübbə don (çiyni quşlu cübbə paltar): ri­tu­al struktur səviyyəsi.

– Buğac adı: sakral-totem struktur səviyyəsi.

Bütün bunlarla Buğac Oğuz kosmosunun strukturunda özü­nə yer alır. Və Buğacın bəyliyə keçirilməsinin simasında Oğuz kosmosu yenidən yaradılır. Çünki hər bir bəy (fərd) Oğuz kosmosunun bir parçasıdır və yeni bir bəyin yaranması Oğu­zun kosmosunun yeni struktur vahidinin yaranması de­mək­dir.

Bütün bu struktur səviyyələri icərisində iki semantem diq­qəti xüsusi cəlb edir. Bunun birincisi “Çigin quşlı cübbə don” (çiynində quş rəsmi, yaxud heykəlciyi olan cübbə/paltar) se­mantemidir. Geniş izaha yol verməyərək bildiririk ki, hər bir ibtidai toplumun başçısı eyni zamanda sakral dünya (göy) ilə profan dünya (yer) arasında əlaqə yaradan mediatordur. Bu­ğac da bir bəy kimi təmsil etdiyi toplumun mediatorudur. Hər bir mediasiya aktı mediasiya mexanizmi ilə həyata ke­çi­ri­lir. Oğuz toplumunda don/köynək belə bir mediasiya me­xa­niz­midir. Bu, birbaşa qam/şaman ənənəsi ilə bağlıdır. “Qır­mı­zı don” se­man­temində “qırmızı” işarəsi mediasiya me­xa­nizmi olan do­nun aralıq dünya ilə bağlı olduğunu bil­dir­diyi kimi, Bu­ğaca verilən köynəyin çiynindəki quş rəs­mi/heykəlciyi də bu donun yerlə göy arasında mediasiya me­­xanizmi oldu­ğu­nu göstərir. Quş bütün dünya mi­fo­lo­gi­ya­la­rında göylər aləmi­ni bildirir. Quş üstəlik Oğuz mi­fo­lo­gi­ya­sın­da onqondur, hər bir tayfanın öz quş onqonu var. Bu cə­hət­dən Buğacın 24-lük oğuz tayfa sistemindəki yerini müəy­yən­ləş­dirməklə rəsm/heykəl­ci­yin hansı quşun onqonu olduğunu da bilmək olar.

Diqqəti cəlb edən ikinci semantem “altun (qızıl) başlı ban ev” elementidir. On beş yaşına çatan gənc eyni zamanda ev­­­­lənməli, sevgili (həyat yoldaşı) əldə etməlidir. “Buğac” mo­ti­­vi­­nin süjetüstü səviyyəsində “evlənmə” yoxdur. Lakin kos­mo­­lo­­ji sxemə görə olmalıdır. Bizə görə, “evlənmə” indiki hal­da sü­­jetaltında qalmışdır, süjetüstündə onun yalnız izi var. Be­lə ki, Bu­­ğac “altun başlı ban ev” alır. Azərbaycan dilində ailə qur­maq “evlənmək” sözü ilə ifadə olunur. Burada “ev” bü­­töv bir kompleksdir və bu kompleksə ev-eşiklə bərabər qa­dın da da­xil­dir. Demək, ev sahibi olmaq həm də evlənmək de­mək­­dir. Bu baxımdan belə hesab edirik ki, Buğacın “altun başlı ban ev” sa­hi­­bi olması onun həm də evlənməsini nəzərdə tutur.

Kitabi-Dədə Qorqud”dakı ərgənlik ritualının struk­tu­ru bir etnokosmik sxem kimi Kərəmin butaalma ri­tualı­nın strukturunda təkrarlanır. Yuxarıda qeyd etmişdik ki, mə­həbbət dastanlarının poetik strukturunun iki səviyyəsi var: epik və təsəvvüfi struktur səviyyələri.

Bu səviyyələr paralel işarələr sistemi kimi məhəbbət das­tanının istər bütöv poetik strukturunu, istər bu strukturun ayrı-ay­rı səviyyələrini, istərsə də həmin səviyyələrə aid istə­ni­lən ele­menti (məna vahidini) iki paralel məna qatından ibarət işa­rə sisteminə çevirir. Bu cəhətdən Kərəmin inisiasiya ri­tu­alından keçərək buta alması təsəvvüfi struktur səviyyəsidir və bu sə­viyyə bir məna qatını təşkil edir. Onun altında ikinci mə­na qatı olan epik struktur səviyyəsi var. Bu epik səviyyə is­tis­na­sız ola­raq bütün hallarda “Kitabi-Dədə Qorqud”dakı ər­gən­lik ritualı ilə bağlıdır. Çünki məhəbbət dastanı diaxron planda qəh­rə­man­lıq dastanından üzvlənməklə onun davamıdır və hər iki dastan növü sinxron planda vahid dastançılıq ənənəsinin pa­ralel qol­la­rı­dır. Eyni etnokosmik düşüncədən, eyni poetik ənə­nədən üzv­lən­miş qəhrəmanlıq və məhəbbət dastanları eyni struktur me­xa­nizmləri əsasında qurularaq işləyir. Bu cəhətdən on­lara funk­sional strukturun əsas göstəriciləri olan “kod-mə­lu­mat-sxem” müstəvisində yanaşdıqda aşağıdakı mənzərə alı­nır:

Qəhrəmanlıq və məhəbbət dastanlarında:

kod: fərqli (qəhrəmanlıq və məhəbbət kodları);

məlumat: işarəvi-qatbaqat (epik və təsəvvüfi işarələr);

sxem: eyni (Oğuz dünya modelinin vahid etnokosmik struktur sxemi).



Demək, bütün hallarda nəzərə almaq lazımdır ki, ey­ni dastançılıq ənənəsinin bütün diaxron və sinxron üzv­lən­mə­­ləri (mərhələlər və paralel qollar) zamanı kosmoloji struk­tur sxemi eyni olaraq qalmaqda davam edir. Can­lı­la­rın bədənində mutasiyalar zamanı növün genetik struktur sxe­mi dəyişməz qaldığı kimi, dastançılıq ənənəsində də et­no­­sun kosmoloji struktur sxemi onun özü­nü­təş­kilet­mə­si­nin (özünüyaratmanın) bütün üzvlənmələri, o cümlədən epik üzvlənmələri zamanı dəyişməz qalır. Məsələn, et­no­sun ənənəvi mədəniyyətinin materialından (maddi-mənəvi ol­masından) asılı olmayaraq istənilən bir növündə aşkar edi­lən struktur sxemi digər növlərdə də eyni məzmunda (m ə l u m a t) aşkar ediləcəkdir. Çünki kosmoloji struktur (s x e m) universaldır, növdən növə onun ancaq gerçəkliyi əks etdirmə üsulu – təsvir dili (k o d) dəyişə bilər.

Beləliklə, kosmoloji (ritual-mifoloji) sxemə görə, ini­si­asi­ya (ərgənlik) mərasimindən keçən subyekt bir davranış fa­za­­sından digərinə adlayaraq yeni status alır. Fərdin mənsub ol­­­duğu toplum onu kollektiv halda qarşılayır, onun yeni sta­tu­su­­nu təsdiq edir və ona bu yeni statusa uyğun yeni mövqe ve­rir. Bu qarşılama, təsdiqetmə və struktura daxiletmə (möv­qe­ver­­mə) ritualıdır və oğuzlarda bu ritual toy adlanır. Bu halda bu­tavermə ritualında sakral qüvvələrdən aşiqlik, aşıqlıq, şair­lik, kəramət statusları alan Kərəm də cəmiyyətə dönərkən top­lum onu kollektiv halında qarşılamalı, onun ritual statuslarını təs­diq etməli və ona cəmiyyətin strukturunda məxsusi yer (möv­­qe) verməlidir. Demək, toy olmalı və bu toyda Kərəmin haqq aşiqi statusu bütün “Gəncə kosmosu” səviyyəsində qə­bul olunmalıdır. Bu baxımdan, kosmoloji sxem öz uni­ver­sal­lı­ğını “Əsli-Kərəm” dastanında da göstərir. “Qırmızı donlu” qa­­rı Kərəmi bərpa ritualından keçirir: Kərəm sakral aləmdən (göy dünyasından) profan aləmə (yer dünyasına) qayıdır. Ata­sı oğlunun Məryəmi buta aldığını bilir. Qeyd edək ki, Kərəm Əs­li ilə göbəkkəsmə nişanlı olsa da, bu nişanlılığın özü das­tan­da elə buta(vermə) adlanır. Məsələn, Ziyad xan nişan­lı­sı Əs­liyə qovuşmağa tələsən oğluna deyir:

“– Oğlum, bu gün səbr elə, sabah keşişin qoyduğu iğrar ta­mamdı, yığışıb birlikdə gedərik sənin butavu gətirməyə”95.

Kərəmin haqq aşiqi (butalı) olduğuni bilən Ziyad xan ke­şişi çağırtdırır:

“– Keşiş, mənim oğlum sənin qızına aşıqdı, bugün-sa­bah gərək toylarını eləyək.

Keşiş dedi:

– Mənim gözüm üstə! Ancaq mənə üç ay möhlət ver. Tə­darük görüm.

Ziyad xan razı olub, üstəlik ona bir üzük verdi ki, qıza ver­sin. Keşiş üzüyü alannan sonra birbaş evinə gəldi, arvadını ça­ğırıb dedi:

– Arvad, Ziyad xan qızı əlimizdən alacaq. Gəl qaçaq!

Arvad razı oldu, haman gün evdə olan hər nə şeyləri var­dısa satdılar, səhər açılmamış köç-külfətnən şəhərdən çıxıb qaç­dılar”96.



Süjeti kosmoloji struktur baxımından təhlil etdikdə diq­qə­ti ilk növbədə toy semantemi cəlb edir. Kərəmin haqq aşıq­lığı üzə çıxan kimi toy təyin olunur: epik mahiyyətində (ar­xe­tipində) ərgənlik ritualı duran butaalma ritualı bütün hallarda toyla tamamlanmalıdır.

Diqqəti cəlb edən ikinci element “üç ay” se­man­te­mi­dir. Toy ritualı və ümumən keçid ritualları üçün səciyyəvi kə­­­miyyət-zaman formulu “40 gün”dür. Lakin burada “üç ay” za­­­man vahidini görürük. Keşiş bu müddəti zahirən toya ha­zırlıq üçün istəyir. Ancaq bu semantemi ritual-mifoloji təh­lil müs­təvisinə gətirdikdə aşağıdakı mənalar üzə çıxır:

– “Üç ay” müddət kimi ixtiyari zaman parçası yox, Zi­yad xanın verdiyi üzüklə toy arasındakı zaman vahididir;

– Kərəm bu üç ay müddətində öz mənzilinə qapanır: “Kə­­rəm yarı şad, yarı naşad mənzilinə keçib düz üç ay göz­lə­di”97. Bu, üç aylıq təcrid deməkdir. Kərəmin yenicə bu­ta al­dı­­ğını göz önünə gətirsək, demək, bu “üç ay” gö­bək­kəs­mə/buta ni­şan­lıların hansısa bir toyqabağı ritualdan keç­mə­lə­ri­ni bildirən za­man vahididir;

– Bu üç ay müddətində Qara Keşiş Kərəmin halal haqqı­nı – ilahi nişanlısını oğurlayır. Qara Keşişin qara dün­yanı – xaosu təmsil etdiyini nəzərə alsaq, ehtimal etmək olar ki, bu “üç ay” semantemi həm də xaosa səfərin (keçidin, adlamanın) müddətini bildirən zaman vahididir.



Diqqəti cəlb edən üçüncü element “oğurluq”_seman­te­mi­dir'>“oğurluq” seman­te­mi­dir. Bu, oğuz kosmoqoniyasının ən məşhur ritual me­xa­niz­mi­dir. Ümumuyyətlə, oğuz tarixinin hansı dönəmində olursa ol­sun, harada toy ritualı varsa, orada hökmən oğurluq for­mulu da olmalıdır. Xüsusilə kənd yerlərində keçirilən mü­asir Azərbaycan toylarında oğurluq ən müxtəlif şəkil və fak­turada özünü qorumaqdadır. Səfa Qarayev mifoloji xaos prob­leminə həsr olunmuş dissertasiyasının “Toy ritualında xaos və kosmogenez” yarımfəslində bu oğurluq faktlarını təh­li­lə cəlb edərək göstərir ki, oğlan evi qız evində olarkən hə­yata keçirilən ritual faktından biri də “oğurluq”dur. Oğlan evi qız evinə qədəm qoyarkən həm də “yağmalama və ya qa­rət ritualı” həyata keçirilir. Onlar əllərinə keçən müxtəlif əş­ya­ları qız evindən xəbərsiz olaraq götürür və bu, oğurluq sa­yıl­mır. Bunun özü də xaos məkanından xəbər verir. Qız evi xaos sahəsi hesab olduğuna görə, orada normalar pozulur. An­tinorma (oğurluq) özü “normaya çevrilir”. Kosmos qa­nun­la­rının əksi olan “qanunlar” aktivləşmiş olur. Əslində, bu sə­fə­rin mahiyyətinə “total oğurluq” kimi baxmaq da olar. Sim­volik planda qız da, əşyalar da oğurlanır98. “Xaos mövqeyində yer­ləşən məkandan həm qızlar, həm də mal-mülk oğurlanır. Baş­qa sözlə, xaos “sökülür”, aradan qaldırılır”; “...Beləliklə, toy­da əks olunan oğurluq epik mətnlərdə də əks olunan “total oğur­luq” ritualı kontekstində anlaşılmalıdır. Mifoloji dü­züm­də xaosu əks etdirən qız evində antinorma aktivləşir. Novruz bay­ramında olan keçid anında (məs., qadın kişi, kişi qadın pal­­tarı geyinir) olduğu kimi, bu keçid anında da antinorma “nor­maya çevrilir” və kosmosda qəbul olunmayan oğurluq fak­tı gerçəkləşmiş olur”99.

Göründüyü kimi, “oğurluq” toy ritualının ayrılmaz tər­kib hissəsi, toyun proqramlaşdırılmış davranış formullarından bi­­ridir. Bu halda S.Qarayevin oğlan evinin qız evində həyata ke­çirdiyi “oğurluq” aktını “yağmalama və ya qarət ritualı” ki­mi səciyyələndirməsi kosmoloji sxemin məntiqinə uyğundur: doğ­rudan da, “oğurluq” bu halda məhz “xaosun sökülməsinə, ara­dan qaldırılmasına” xidmət edir.

Beləliklə, oğlan evinin qız evində həyata keçirdiyi “oğur­­­­luq” aktı “qızın oğurlanması (qaçırılması)” ele­men­ti­ni də əhatə edən kosmosyaradıcı ritual formuludur: çün­ki bu­rada oğlan evi qızı “oğurlayıb” (alıb) aparmaqla oğlanla (ki­şi baş­­lanğıcı ilə) qızı (qadın başlanğıcını) bir-birinə qo­vuş­du­rur və bu­nunla yeni həyat, yeni dünya, bir sözlə, yeni kos­mos ya­radılır.

Əslinin oğurlanması (qaçırılması) da qız evində baş ve­rir. Lakin oğurlayan oğlan evi yox, xaos dünyasının təmsilçisi olan Qara Keşişdir. Demək, xaos funksionerinin (Qara Ke­şi­şin) qız evində həyata keçirdiyi “oğurluq” aktı xa­os­ya­ra­dıcı ri­tual formuludur: çünki burada Qara Keşiş qızı “oğur­la­yıb” (alıb) aparmaqla kişi başlanğıcı ilə qadın başlanğıcını bir-bi­rindən ayırır və bununla kosmik nizamı pozaraq xaos yaradır.

Xaos funksioner(lər)inin həyata keçirdiyi “oğurluq” ak­tı­nın xaosyaradıcı ritual formulu olması Oğuz eposu ilə bir­ba­şa təsdiq olunur. Dastanın üçüncü boyunda Bayburd qa­la­sın­da­kı düşmənlər Beyrəyi öz 39 igidi ilə bərabər oğurlayırlar. Toy yasa dönür: “Baybörə bəgin dünlügi altun ban evinə (şi­vən) girdi. Qızı-gəlini qas-qas gülməz oldı. Qızıl qına ağ əlinə yaqmaz oldı. Yedi qız qardaşı ağ çıqardılar, qara tonlar gey­di­lər”100. Beyrəyin ailəsində kosmik düzən xaosla əvəz olunur və ailə məkanı öz rəngini dəyişir: ağ (paltarlar) qara (pal­tar­lar) ilə əvəz olunur. Beyrəyin (yalançı) ölüm xəbəri gələndə bü­töv Oğuz kosmosu xaosa qərq olur: “Ağ çıqardılar, qara gey­dilər. Qalın Oğuz bəgləri Beyrəkdən umud üzdilər”101.

Lakin Beyrək, əslində, ölməmiş, onun yalançı ölüm xə­bə­ri gəlmişdir. Başqa sözlə, bu, bir yalançı ölüm, yəni ritual ak­tıdır. “Oğurluq – oğurlanma” həmin bu “yalandan ölmə” ak­tının mühüm mexanizmidir. Beləliklə, kosmoloji sxem özü­­­nü hər yerdə təsdiq edir: “oğurluq” Qara Keşişin Əslini oğur­­lamasında olduğu kimi, burada da xaosa (ölüm dün­ya­sı­na) keçid mexanizmi, başqa sözlə, xaosyaradıcı formuldur. Biz bu barədə geniş tədqiqat aparmışıq. Həmin tədqiqatın nəticələrinə əsasən, “Beyrək ritual-mifoloji kontekstdə şərti – ya­lançı ölü­mü ilə xaosa – yalançı dünyaya daxil olur. Bu, mərasimi ölüm dün­yasıdır və «Yalançı dünya» olduğu üçün bu­rada davranış prin­sipləri yalana söykənir. Beyrək də buna uyğun olaraq nə qə­dər ki ölü – yalançı (dəli) Beyrək sta­tu­sun­dan çıxıb, əvvəlki diri – doğruçu Beyrək statusuna qa­yıt­ma­mış­­dır, o, yalnız «ya­lan­çılıq» semanteminin ger­çək­ləş­di­ri­ci­si ki­mi çıxış etməlidir. Oğuz ritual-mifoloji dünya modelinə uy­ğun olaraq oğuzlarda ya­lanın rituallaşdırılmış ömrü vardı. KDQ oğuzları üçün bu ömür 40 gün idi (toy ritualının müd­də­ti). Həmin «ömür» müd­dəti başa çatandan sonra Beyrək qa­yı­dıb gəlməli, başqa sözlə, ölü (dəli ozan) Beyrək statusundan çı­­­xıb, diri Beyrək statusuna qa­yıtmalı idi. O, toyda oğurlanır. Toy – mərasimdir, ritual va­hi­didir. Bu baxımdan, toydakı oğur­­luq – mərasimi oğurluq, yə­­ni «yalançı» oğurluqdur. Hə­min oğurluqla o, ölmüş «elan edilir». Bu halda yalançı oğur­luq və yalançı ölüm bir pa­radiqma sütununu təşkil edir. Onun oğurlanması (ölümü) şər­ti ritual hadisəsi olduğu kimi, qayıdışı da – dirilməsi ritualla müm­kün idi. Beyrək toy­da oğurlandığı kimi, toyda da qayıdıb gə­lir: o, ritualda ölür və ri­tualda dirilir. Onun gəlişi ilə yalanın üs­tü açılır; yalanın mə­ra­simi ömrü başa çatır: başqa sözlə, ya­lan antistrukturunun tə­cəs­sümü olan Yalançı oğlu Yalancığın ölü­­mü ilə yalanın öm­rü sonlanır”102.

Beləliklə, toyda oğurluq aktı üç semantemi birləşdirir: “toy” – “oğurluq” – “ölüm”:

1. “Toy” – ritual;

2. “Oğurluq” – mediasiya formulu (mexanizmi);

3. “Ölüm” – funksiya.

Bu üç semantemin birləşməsi bizə kosmoloji sxemin sin­taqmatik strukturunu belə bərpa etməyə imkan verir: toy­da oğurluq formulu həm də xaos (ölüm) yaradıcı funksiya da­şıyır: kosmik ünsürün xaotik ünsürlər tərəfindən oğur­lan­ma­sı mediasiya aktıdır. Kosmik element ritual ölüm yaradıcı me­xanizm olan oğurlanma formulu vasitəsi ilə ölüm dün­ya­sı­na – xaosa adlayır.

Göründüyü kimi, toyda oğurluq kosmos və xaos dün­ya­la­rı arasında keçidi gerçəkləşdirən mediasiya mexanizmidir. Bu mexanizmin faydalı iş əmsalı ondan istifadə edənlərin et­no­kosmik kimliyinə (identifikasiya göstəricilərinə) bağlıdır: əgər oğurlayanlar öz identifikasiya əlamətlərinə görə kosmosu təm­sil edirlərsə, bu halda oğurluq – kosmosyaradıcı, xaosu təm­sil edirlərsə – xaosyaradıcı funksiya daşıyır. Gəlingətirmə mə­rasimində oğlan evinin qız evindən oğurluq etməsi – kos­mos­yaradıcı, Qara Keşişin Əslini oğurlaması – xaosyaradıcı funk­siyadır. Çünki oğlan evi – kosmosu, Qara Keşiş – xaosu təmsil edir.

Beləliklə, Qara Keşiş Əslini təyin olunmuş toydan oğur­la­maqla onu özünün “qara dünyasına – xaosa – ölüm mə­ka­nına” aparır. Kosmoloji sxemə görə, Kərəmin onun da­lın­ca qürbətə yollanması onun xaosa – ölüm dünyasına sə­fə­ri­dir. Belə ki, qürbət (qəriblik) təsəvvüfi işarə-obraz kimi xaos (ölüm) semanteminin kosmoloji metaforasıdır.



Yüklə 2,14 Mb.

Dostları ilə paylaş:
1   2   3   4   5   6   7   8   9   10   ...   27




Verilənlər bazası müəlliflik hüququ ilə müdafiə olunur ©genderi.org 2024
rəhbərliyinə müraciət

    Ana səhifə