Təbriz, Lənkəran, Şuşa, Səmərqənd şəhərlərindən din xadimləri, şair və ədiblər
gəlmişdilər. Bütün yas məclislərində “Quran”ı şairin yaxın dostu, Əliağa Vahidin də
ustadı olmuş Məşədi Azər oxumuşdur.
Haşım bəyin qızı Nəcibə xanım da Azərbaycanın teatr və kino sənətində
özünəməxsus iz qoyub. Bu gün də Nəcibə Məlikovanın adı teatr-kino xadimləri
sırasında hörmətlə çəkilir. Yaxşı xatirimdədir, onlar bizim bağa tez-tez gələr, keçmişin
şirin xatirələrindən, ata-babalarımızın sənətə məhəbbətindən, sənətkara hörmətindən
ürək dolusu danışardılar.
Etiraf etmək istərdim ki, dövrünün qüdrətli söz ustadı, müqtədir şair, “Məcməüş-
şüəra” ədəbi məclisinin üzvü, xeyriyyəçi Haşım bəy Saqibin əsərləri sovet dövründə
demək olar ki, nəşr olunmamışdı. Bu biganəliyi ilk dəfə Rəhimağa İmaməliyev aradan
qaldırdı. O, 1996-cı ildə “Boz oğuz” nəşriyyatında Haşım bəy Saqibin şeirlərindən
ibarət “Kİm-kimədir” adlı kitabı nəşr etdirdi. Lakin bu kitab Haşım bəy Saqibin
yaradıcılığının çox az bir hissəsini əhatə edirdi.
Nəhayət, Haşım bəy Saqibin əsərlərini Azərbaycan Milli Elmlər Akademiyası
Məhəmməd Füzuli adına Əlyazmalar İnstitutunun elmi işçisi Hacı Mustafa Əliyev bir
yerə toplayaraq klassik “Divan” üslubunda tərtib etdi. Ümumiyyətlə, AMEA
Məhəmməd Füzuli adına Əlyazmalar İnstitutunun mədəni irsimizin qorunmasında
rolu müstəsnadır.
Qeyd edim ki, Hacı Mustafa Əliyev şair-qəzəlxan, füzulişünas-alim, klassik
ədəbiyyatımızın və muğamlarımızın gözəl bilicisi, unudulmaz dostum Hacı Mail
Əliyevin oğludur. Atalar misalı var: ”Ot kökü üstündə bitər”.
Mən belə bir gözəl əsərin araya-ərsəyə gəlməsinə görə kitaba əmək sərf edən hər
bir kəsi təbrik edir və öz dərin təşəkkürümü bildirirəm. Milli mədəniyyətlərə
qloballaşma, xarici amillərin təsirinin gücləndiyi bir şəraitdə milli-mənəvi dəyərlərimizi
qoruyan insanlara hər zaman minnətdar olmalıyıq.
Sanki şair “Qalmaz” rədifli qəzəlinin son beytini bu günü görərək yazmışdır:
Təng olsa cəhan mülki sana, səbr elə, Saqib,
Dut fəqrü fənani, kişi təşvişdə qalmaz.
Ziyad Səmədzadə
akademik
5
ÖN SÖZ
Qədim və zəngin tarixə malik Azərbaycan ədəbiyyatının inkişafında və xalqımızın
mədəni həyatında ədəbi məclislərin çox böyük rolu olmuşdur. XII yüzillikdə
Eldəgizlərin, Şirvanşahların, XVI yüzillikdə Şah İsmayıl Xətainin sarayında dövrün
görkəmli sənətkarlarının toplandığı ədəbi məclislər mədəniyyət tarixinə düşmüşdür.
XIX yüzillik ədəbi məclislər tarixində, belə demək mümkünsə, intibah dövrü
sayıla bilər. Həmin yüzillikdə Tiflisdə Mirzə Şəfi Vazehin və Gəncədə Mirzə Mehdi
Nacinin başçılıq etdikləri “Divani-hikmət”, əsrin 30-cu illərində Qubada A.A.
Bakıxanovun rəhbərliyi ilə “Gülüstan”, yüzilliyin ortalarından etibarən Ordubadda
Hacağa Fəqirin, onun vəfatından sonra isə M. Sidqinin başçılığı ilə “Əncümənüş-
şüəra”, 1850-1900-cu illərdə Lənkəranda Mirzə İsmayıl Qasirin rəhbərlik etdiyi “Fövcül-
füsəha”, 1867-ci ildən Şamaxıda əvvəlcə Seyid Əzimin, sonra isə Molla Ağa Bixudun
başçılığı ilə “Beytüs-səfa”, 1864-cü ildən Şuşada əvvəlcə Hacı Abbas Agəhin, daha sonra
X.B. Natəvanın rəhbərlik etdikləri “Məclisi-üns”, 1872-ci ildə Mir Möhsün Nəvvabın
təşəbbüsü ilə yaradılmış “Məclisi-fəramuşan” və nəhayət, əsrin 60-cı illərində Bakıda
Məhəmmədağa Cürminin rəhbərliyi ilə “Məcməüş-şüəra” kimi ədəbi məclislər fəaliyyət
göstərmişdir. Qeyd edək ki, klassik irsin öyrənilməsində, söz sənətinin xalq arasında
təbliğ olunmasında, həmçinin yeni-yeni istedadların üzə çıxmasında ədəbi məclislərin
böyük əhəmiyyəti olmuşdur. Bu ədəbi məclislərin iştirakçılarının əksəriyyəti əsasən
Füzuli ədəbi məktəbinə mənsub olmuşlar. Onlardan bir çoxu öz yaradıcılığında
nəzirələrə daha çox yer ayırsalar da, hər biri özünəməxsus bədii ifadə tərzi, sözü və
dəst-xətti ilə seçilmişdir. Məclis şairlərinin çoxu klassik ədəbiyyatın görkəmli
nümayəndələri səviyyəsinə yüksəlməsələr də, onlar klassik ədəbi janrların
əksəriyyətində qələmlərini sınamış, ədəbi prosesin gedişində bu və ya digər dərəcədə
iştirak etmişlər.
XIX əsrin ikinci yarısından XX yüzilliyin 20-ci illərinə kimi mövcud olmuş
“Məcməüş-şüəra” ədəbi məclisi təqribən yarım əsrdən çox fəaliyyəti dövründə bir çox
nüfuzlu, qüdrətli şairlər yetirmişdir. Məhəmmədağa Cürmidən sonra Məşədi Azərin
sədr olduğu bu ədəbi məclis eyni zamanda muğam, musiqi ocağı kimi təkcə Bakı və
Abşeronda deyil, Şamaxı, Şuşa, Dərbənd, Lənkəran, Təbriz şəhərlərində də tanınmış,
onun ayrı-ayrı üzvləri həmin şəhərlərdəki ədəbi məclislərlə əlaqə saxlamışlar. Təsadüfi
deyil ki, “Məcməüş-şüəra” üzvü Haşım bəy Saqib “Məclisi-üns”ü təşkil edənlərdən biri
Mirzə Rəhim Fəna ilə yaxından dostluq etmiş, onun vəfatından çox kədərlənmiş, bu
münasibətlə şeir yazmışdır:
Bivəfadür bu cəhan əhli, bütün mafiha,
Ey könül, eyləmə bir zərrəcə meyli-dünya.
Qəmə aludə ikən, gəldi genə qəm xəbəri,
Qapumi açdı xəbər verdi mana badi-səba.
Səfəri-axirətün dutdı yolın, fəryad et,
Ney kimi şamü səhər Mirzə Rəhim, yə`ni Fəna...
6
Həmin illərdə Ağakərim Salik, Əbdülxalıq Yusif, Əbdülxalıq Cənnəti, Məşədi Azər
Buzovnalı, Ruhulla Qafil, Əbdülhəmid Mina, Məhəmmədağa Cürmi, Mikayıl Seydi,
Qüdrətəli Qüdrət, Ağadadaş Müniri, Ağadadaş Sürəyya, Hacı Dadaş Qaib, Məhəmməd
İsmayıl Asi, Mirzağa Dilxun və digər şairlərin əsərləri geniş oxucu kütləsi içərisində
dərin rəğbət qazanmış, sevilə-sevilə oxunmuşdur. Məhz o dövrdə məşhurlaşanlardan
biri də Haşım bəy Saqib olmuşdur.
Haşım bəy Hacı bəy oğlu Heybətbəyov 1870-ci ildə Bakının Buzovna kəndində
tacir ailəsində dünyaya gəlmişdir. Yeri gəlmişkən, Heybətbəyovlar təkcə Buzovnanın
deyil, eyni zamanda Bakının ən məşhur və qədim nəsillərindən biridir. Haşım bəy bir
şeirində özü barədə belə deyir:
...Kişiyəm, türkdür əslim, nə farsam nə ərəb,
Əgərəm baş nə şəhü xanə, nə də ağayə.
Nokərəm türkə, təmizlikdə onun qanı hələ,
Salmayubdur özini rəngə, çıxub arayə.
Namımız Haşimdür, leyk təxəllüs Saqib,
Bildirübdür özin ədna ilə, həm ə`layə...
Məlum olduğu kimi, klassiklər dərin mənalı təxəllüslər seçməyə böyük əhəmiyyət
vermişlər. Haşım bəyin təxəllüsü də bu baxımdan istisna deyildir. Belə ki, bir mənası
“nüfuz edən, yarıb keçən”, digər mənası isə “çox parlaq, çox nurlu” olan “Saqib”
təxəllüsü Haşım bəy şəxsiyyətinə, Haşım bəy isə öz təxəllüsünə layiq bir şair olmuşdur.
Haşım bəy Saqibin atası Hacı bəy Heybət bəy oğlu Bakıda, Dərbənddə, Petrovsk-
portda (Mahaçqalada) və Səmərqənddə ticarət mərkəzləri ilə əlaqə yaratmışdı. Haşım
bəy gənc yaşlarından, xüsusilə atasının vəfatından sonra həmin şəhərlərdəki ticarət
kontorlarının sahibi olmuş, hətta bir çox xarici ölkələrdə olan ticarət mərkəzləri ilə
sərbəst alış-veriş etmişdir.
Haşım bəy ibtidai təhsilini hərtərəfli savada malik olan atasından, daha sonra
atasının dostu və kəndlisi Kərbəlayi Əziz İmaməliyevin öz şəxsi mülkündə təsis etdiyi
mədrəsədə almışdır. Məhz bu təhsilin sayəsində ərəb, fars, türk dillərini, Şərq
ədəbiyyatını və tarixini, ilahiyyat elmini mükəmməl öyrənmişdir. Deyilənlərə görə,
Haşım bəy Saqib iti hafizəsi və yüksək qavrama qabiliyyəti nəticəsində hətta özbək-
cığatay, rus dillərini və ədəbiyyatını da mükəmməl surətdə öyrənmişdir.
Təhsil aldığı illərdə atasına ticarət işlərində kömək etməyə başlamış, ilk şeirlərini
də həmin dövrdə yazmış, sonralar “Məcməüş-şüəra” mühitində bir şair kimi
püxtələşmiş və “Saqib” təxəllüsü ilə tanınmışdır. Şübhəsiz, onun bir şair kimi
yetişməsində ilk növbədə Buzovna ədəbi mühitinin və Məşədi Azər Buzovnalının,
sonralar isə Əbdülxalıq Cənnəti, Əbdülxalıq Yusif kimi şairlərin böyük təsiri olmuşdur.
Ümumiyyətlə, Bakı kəndlərinin həmişə özünəməxsus ədəbi, mədəni və dini mühiti
olmuşdur. Buzovna kəndi də bu cəhətdən istisna deyil. Bu kənddən Əliağa Şərqi,
Məhəmməd İsmayıl Asi, Hacıdadaş Qaib, Qüdrətəli Qüdrət, Ağasəlim Fədayi, Məşədi
Azər və b. kimi məşhur şairlər, Şeyx Kamiyab, Şeyx Mirzəli, Axund Şeyx Cavad, Şeyx
7
Dostları ilə paylaş: |