7
ticarət və sənaye cəmiyyəti" vasitəsilə aparırdı, "Mazut" cəmiyyəti isə onun ən iri neft ixracı və neft ticarəti
şirkəti idi. Belə ki, misal üçün o, "Xəzər-Qara dəniz ticarət və sənaye cəmiyyəti" vasitəsilə bir çox neft emalı
zavodlarının sahiblərinə kreditlər verərək, müqaviləyə əsasən onlar üzərinə elə bir öhdəlik qoymuşdu ki, öz
istehsal etdikləri ağ nefti xarici bazarlarda satış üçün irəlicədən müəyyən edilmiş qiymətlərlə Rotşildə təhvil
versinlər. Beləliklə, Rotşild kredit verməklə onlarca zavod sahibini özündən tam asılı vəziyyətə salmışdı. Onlar
öz kreditorlarının bütün tələblərini itaətlə yerinə yetirirdilər. Bir sözlə, Rotşild yerli sahibkarları son dərəcədə
müflisləşdirir, onlara qarşı çox ciddi maliyyə sanksiyaları tətbiq edirdi. Nəticədə yerli mədən sahibləri
məcburiyyət qarşısında qalıb, öz mədənlərini dəyər-dəyməzə satıb canlarını qurtarırdılar. Elə bu amansızlıqlar
nəticəsində Rotşildin şirkəti qısa müddət ərzində 135 kiçik və orta müəssisəni öz təsiri altına almağa nail oldu.
Bakı neft sənayesi hələ XIX əsrin sonu — XX əsrin əvvəllərində Amerika neft kralı Rokfellerin və onun
başçılıq etdiyi "Standart oyl" şirkətinin diqqətini cəlb etmişdi. Lakin Amerika kapitalının Azərbaycan neft
sənayesində iştirakı son dərəcədə zəif idi.
Amerika kapitalı burada yağ istehsalı ilə məşğul olan "Vakuum oyl və K" şirkəti vasitəsilə təmsil edilirdi.
Bu cəmiyyətin əsas kapitalı 2,4 mln. rubl idi ki, bunun da 1,2 milyonu Amerikanın payına düşürdü. Lakin XX
yüzilliyin əvvəllərində Amerika kapitalının Bakı neft mədənlərinə axını nəzərə çarpacaq dərəcədə gücləndi.
Amerika inhisarları özlərinin Azərbaycan neft sənayesinə münasibətlərində heç də onun uğurla inkişafına
kömək etmək arzusunda deyildilər. Əksinə, onlar beynəlxalq bazarlarda "Standart oyl"un təhlükəli rəqibi olan
Azərbaycan neftinin ixracını ləngitmək məqsədi güdürdülər. Amerika neft krallarının Bakı məsləhətçisinin
fikrincə, "Standart oyl" şirkəti Amerika neft inhisarının səviyyəsini saxlamaq naminə Bakıdan neft ixracını
qəsdən azaltmaqda günahlandırılmamaq, eləcə də Rusiyada daxili bazarları ələ keçirmək məqsədilə, Nobel və
Rotşildlə saziş bağlayıb, onlarla birgə işləməli idi.
İngiltərə ilə Rusiyanın müharibədən əvvəl siyasi və iqtisadi yaxınlaşması, eləcə də Antanta blokunun
yaranması ingilis kapitalının Rusiya neft sənayesində nüfuz qazanması üçün əlverişli şərait yaratdı.
Azərbaycan neft sənayesinə xarici kapitalın cəlb edilməsinin qatı tərəfdarından biri də çar hökumətində
Maliyyə naziri S.Vitqe olmuşdu.
Amerika neft krallarının Azərbaycan neftinə marağı Birinci dünya müharibəsi illərində xüsusilə yüksəldi.
S.A.Kaderin yazdığına görə, Rotşild və Nobelin ümumi tabeliyi altında olan və məxsusən Amerika neft
sənayeçilərinə qarşı mübarizə üçün yaradılmış "Consolibated Petroleum C°", xüsusi müqaviləyə əsasən 1916-cı
ildə "Standart oyl"un London bölməsi ilə birləşdi. "Xəzər-Qara dəniz ticarət və sənaye cəmiyyəti", "Mazut" və
"Russkie novıe standart" cəmiyyətlərinin direktorları Rusiya neft sənayesini təmsil edir və eyni zamanda
Amerikanın "Standart oyl" şirkətinin London bölməsinin direktorları sayılırdılar.
Kitabda Bakı neft sənayesinə müxtəlif ölkələrin xarici kapitalının nüfuz etməsindən danışarkən, qısaca
olaraq bütövlükdə xarici kapital və Rusiya hökumətinin ona münasibəti haqqında oxucu üçün maraqlı
məlumatlar verilir.
Bakı neft sənayesinə xarici kapitalın güclü axını yerli sahibkarlar və neft işində marağı olan dairələr
arasında kəskin narazılıq doğurdu. Belə ki, hələ 1885-ci ildə — Bakıda neft sənayesinin kapitalist inkişafının
ilkin mərhələsində Həsən bəy Zərdabi Nobelin işğalçılıq fəaliyyətini nəzərdə tutaraq, ürək ağrısı ilə yazırdı:
"Savadsız (təhsilsiz) yaşamaq qeyri-mümkündür, xüsusilə də bizim diyarda. Onun sərhədləri xaricindəki sivil
qonşular gündən-günə irəliləyərək bizim əmlak və varidatımıza sahib olur. Bir az da keçsə, biz onların
rəncbərləri və mallarını daşımaları üçün arabaçılara çevriləcəyik".
Xarici sahibkarların işğalçılıq siyasətinə qarşı etiraz bu məsələyə dair dərc olunmuş bir sıra əsərlərin
səhifələrində öz parlaq əksini tapmışdır. Hökumət, Bakı neft sənayesində xarici kapitalın zorla möhkəmlənməsi
əleyhinə etirazını bildirən yerli sakinlərdən yüzlərcə müraciət alırdı. Bütün bunları nəzərə alaraq, çar hökuməti
əcnəbilər haqqında bir sıra xüsusi qanunlar qəbul etməyə və neft işi ilə məşğul olmaq sahəsində onların
hüquqlarını məhdudlaşdırmağa məcbur oldu.
Çar Rusiyasının və onun Qafqazdakı canişinlərinin təzyiqinə baxmayaraq Bakı neft sənayesində yerli
sahibkarlıq tədricən inkişaf etməyə başladı. Bakının ayrı-ayrı rayonlarında çətinliklə də olsa, neftli torpaqlar,
kiçik nəqliyyat vasitələri, balaca neftayırma sexləri yerli sakinlərin əlinə keçdi.
Beləliklə, XIX əsrin sonunda nəhayət milli burjuaziya yetişdi və gələcəkdə Azərbaycanın siyasi, iqtisadi,
elmi və mədəni inkişafında böyük rol oynadı. Hacı Zeynalabdin Tağıyev, Ağamusa Nağıyev, Şəmsi Əsədul-
layev, Murtuza Muxtarov, Ağabala Quliyev və bir çox başqalarının Azərbaycanın, xüsusilə də Bakının sürətli
inkişafı üçün gördükləri işdən kitabda bəhs edilir.
Doğrudur, H.Z.Tağıyevin sahibkarlıq fəaliyyəti çox parlaq olduğundan, onun haqqında məlumatlara
müasir ədəbi və elmi qaynaqlarda tez-tez rast gəlmək olur. Ona baxmayaraq milli burjuaziyanın görkəmli
nümayəndələrinin sahibkarlıq fəaliyyətinin tarixinin öyrənilməsinin zəruriliyi və onların fəaliyyətinin işıq-
landırılması, Azərbaycan milli burjuaziyasının təşəkkül tapma və inkişaf etmə şəraitini yaxşı təsəvvür etmək
imkanı hamımıza lazımdır.
...Avropada nüfuzlu sayılan "Brokhauz və Yefron" ensiklopediyalarında böyük kimyaçı alim
D.İ.Mendeleyev tərəfindən yazılmış məqalədə deyilirdi: