Azərbaycan Respublikası Hökuməti və Çin Xalq Respublikası Hökuməti arasında qrup turist
səfərləri zamanı vizaların alınmaması haqqında
Saziş
Azərbaycan Respublikası Hökuməti və Çin Xalq Respublikası Hökuməti:
- iki dövlət arasında turizmin inkişafına kömək etmək arzusunu rəhbər tutaraq,
- iki dövlətin vətəndaşaları arasında dostluq əlaqələrini genişləndirmək məqsədilə,
- qrup turist səfərləri zamanı vizaların alınmaması məsələləri haqqında hazırki Sazişi
bağlamağı qərara almış və aşağıdakılar barədə razılığa gəlmişlər:
Maddə 1
Razılığa gələn Tərəflərin müəyyənləşdirdiyi turist təşkilatları tərəfindən təşkil olunmuş
turist qrupları Razılığa gələn digər Tərəfin sərhədini beynəlxalq sərnişin daşıma məqsədi ilə
açılmış və ya Tərəflərin hər ikisinin təyin etdiyi sərhəd məntəqələrindən qrup halında vizasız keçə
bilərlər.
Turist qruplarının üzvləri etibarlı adi xarici pasportlara və ya onları əvəz edən beynəlxalq
gediş-gəliş sənədlərinə malik olmalıdırlar. Turist qruplarının rəhbərləri Razılığa gələn digər
Tərəfin müəyyənləşdirdiyi turist təşkilatlarından yazılı dəvətnaməyə və həmçinin turist
qruplarının siyahısına malik olmalıdırlar.
Maddə 2
Turistin adı, familiyası, cinsi, peşəsi, doğulduğu yer və tarix, pasportunun və ya onu əvəz
edən sənədin nömrəsi, giriş-çıxış tarixləri, digər Tərəfin qəbul edən turist təşkilatlarının adı
göstərilməklə, 2 nüsxədə turist qrupları üzvlərinin siyahısı tərtib edilməli və bu siyahı göndərən
Tərəfin turist təşkilatının möhürü ilə təsdiqlənməlidir. Bu siyahı giriş və çıxış zamanı yoxalanmaq
üçün Razılığa gələn digər Tərəfin sərhəd nəzarət orqanlarına təqdim olunmalıdır.
Maddə 3
Turist qruplarının üzvləri kollektiv şəkildə hərəkət etməlidirlər. Əgər turist qruplarının
üzvlərindən hər hansı bir şəxs fors-major vəziyyəti ilə əlaqədar qrupu tərk etmək məcburiyyətində
qalarsa, bu halda həmin şəxs Razılığa gələn digər Tərəfin ərazisində yerləşən öz dövlətinin
Səfirliyi, Baş Konsulluğu və ya qəbul edən turist təşkilatı tərəfindən verilmiş rəsmi arayış təqdim
etməklə, yerli səlahiyyətli orqanlardan viza almalı və bütün xərcləri öz üzərinə götürməlidir.
Maddə 4
Azərbaycan Tərəfindən Azərbaycan Respublikası Hökumətinin müəyyənləşdirdiyi 11 turist
təşkilatı təyin olunur.
Çin tərəfinin müəyyənləşdirdiyi turist təşkilatları bunlardır: «Çin Xalq Respublikasının
Dövlət turizm bürosu», Xarici turizm üzrə Ümumçin cəmiyyətinin baş agentliyi, Gənclər turizmi
üzrə Ümumçin cəmiyyətinin Baş agentliyi, Turizm üzrə «Komfort» Ümumçin cəmiyyətinin Baş
agentliyi, Fəhlə və qulluqçular üçün turizm üzrə Ümumçin cəmiyyətinin Baş agentliyi, Beynəlxalq
turizm üzrə «Çjaoşan» Çin şirkəti, Xeylunçzyan əyalətinin turizm bürosu, Üzilin əyalətinin turizm
bürosu, Sinçzyan-Uyqur muxtar rayonunun turizm bürosu və Daxili Monqolustan Muxtar
rayonunun turizm bürosu.
Maddə 5
Hazırki Saziş səbəblərini izah etmədən, hər iki tərəfin öz ərazisinə Razılığa gələn digər
Tərəfin «persona non grata» və ya arzuolunmaz sayılan şəxslərinin daxil olmasından imtina etmək
və ya burada qalma müddətini dayandırmaq hüquqlarını məhdudlaşdırmır.
Maddə 6
Razılığa gələn Tərəflər hazırki Saziş qüvvəyə minməzdən 30 gün əvvəl bu Sazişin 4-cü
maddəsində göstərilən turist təşkilatlarının möhür nümunələrini bir-birinə göndərməlidirlər.
Möhürlərin nümunələri dəyişdirilərsə, Razılığa gələn Tərəflər bir-birinə xəbər verməli və bunu
notalar mübadiləsi yolu ilə təsdiq etməlidirlər.
Maddə 7
Milli pasportlar tətbiq olunanadək, Azərbaycan tərəfinin vətəndaşları hazırki Sazişin 1-ci
maddəsində qeyd olunan Azərbaycan Respublikası pasportları əvəzinə, həmin şəxsin Azərbaycan
vətəndaşlığına aidiyyətini təsdiq edən ştamp olmaq şərti ilə, keçmiş Sovet İttifaqının adi xarici
pasportlarından istifadə edə bilərlər.
Maddə 8
Hazırki Saziş qeyri-müəyyən müddətə bağlanmışdır.
Razılığa gələn Tərəflərdən biri hazırki Sazişin fəaliyyətini dayandırmaq istədikdə, həmin
Tərəf diplomatik kanallar vasitəsilə Razılığa gələn digər Tərəfə yazılı surətdə bu barədə məlumat
verməlidir.
Belə olduğu halda, hazırki Sazişin qüvvəsi Razılığa gələn digər Tərəfin qeyd olunan
məlumatını aldığı tarixdən etibarən 90-cı gün dayandırılır.
Maddə 9
Hazırki Saziş 1994-cü il may ayının 1-dən qüvvəyə minir.
Hazırki Saziş 1994-cü il yanvar ayının 4-də Pekin şəhərində Azərbaycan, Çin və rus
dillərində, iki nüsxədə bağlanmışdır. Hər üç mətn eyni qüvvəyə malikdir. Mətnlər arasında
anlaşılmazlıq olduğu təqdirdə, Tərəflər rus dilindəki mətnə müraciət edirlər.