TƏHSİLİN İNFORMATLAŞMASININ NƏZƏRİ VƏ METODOLOJİ ƏSASLARI
9
ancaq məqsədə və məzmuna görə müəyyənləşdirilməsi istənilən nəticəni verməzdi. Odur ki,
təsirə məruz qalacaq obyektin səciyyəsini, fərdi xüsusiyyətlərini dərindən bilmək və
əməliyyatlar sistemini müəyyənləşdirərkən bunları nəzərə almaq lazımdır.
Təlim metodunu seçərkən təlim prosesində dəyişdiriləcək obyektin xüsusiyyətlərini
yaxşı bilmək lazımdır. Təlimdə bu obyekt tələbədir (öyrənəndir). Tələbənin xüsusiyyətləri isə
onun təlim prosesinə göstərdiyi münasibətdə, informasiyaları necə qavramasında,
mənimsənilmiş məzmunun təsiri altında necə dəyişməsində özünü göstərir.
Deməli, hər bir tədris fənninin məzmunun mənimsənilməsi yollarını və mənimsəmənin
necə cərəyan etdiyini müəyyənləşdirmək zərurəti meydana gəlir.
Təhsilin məqsəd və məzmununu, onların mənimsənilməsi yollarını, öyrədən və
öyrənənlərin fəaliyyətlərinin məqsədyönlü istiqamətlərini müəyyənləşdirməklə hər bir
metodun spesifik xüsusiyyətlərini aşkarlamaq mümkündür.
Artıq çoxdan sübut olunmuşdur ki, hər bir tədris fənninin mənimsənilməsinin spesifik
yolları mövcuddur.
Fikrimizi misalla əsaslandıraq. İstər idrak, istərsə də təlim prosesində gerçəklik
haqqında müəyyən biliklərin əldə edilməsi, hər şeydən əvvəl, müşahidələrin nəticəsi olaraq
qavramadan başlayır.
Qavrama ilk əvvəl – görmə, eşitmə, toxunma, dad və digər duyğu üzvləri vasitəsilə baş
verir. İnsan bu yolla cisim və hadisələri duyur. Duyulan və qavranılan insan şüurunda
müəyyən iz buraxır. Duyğu və qavrayış sayəsində toplanmış təcrübə ilə yeniləri arasında
assosiativ əlaqələr yaranır, müqayisələr aparılır. Bu yolla əldə edilən bilik tədriclə yadda qalır.
İnsan təkcə obyektiv gerçəkliyi deyil, həm də onu bu və ya digər dərəcədə
ümumiləşdirən anlayışları, mülahizələri, formulları, sxemləri və s. qavrayır, bu simvolik
ümumiləşdirmələri real obyektlərlə müqayisə edərək yeni biliklər qazanır və onları hifz edir.
Hafizə prosesləri olmadan insan obyektiv gerçəkliyin cisim və hadisələri arasında
mövcud olan əlaqə və asılılıqları dərk edə bilməz. Bunsuz istənilən məqsədəuyğun fəaliyyət,
biliklərin reallaşdırılması da mümkün olmaz.
Təlim prosesində biliklərin belə bir ardıcıllıqla mənimsənilməsi müəllim tərəfindən
müxtəlif fəaliyyət növləri ilə müşayiət olunur və nəticədə təhsil alanlar ətraf aləmin real cisim
və hadisələri, yaxud onların simvolik olaraq tanış olur və qavrayaraq yadda saxlayırlar.
Qazanılmış biliklərdən istifadə etmək yollarını öyrətmək məqsədilə onları tətbiq etdirməklə
müvafiq bacarıqların formalaşmasını təmin etmək və bacarıqların vərdişlərə çevrilməsi üçün
işi dönə-dönə icra etdirmək lazımdır. Möhkəmlənmiş bacarıqlar işi daha tez və keyfiyyətlə
icra etməyə imkan verir. Beləliklə, elmə, bəşəriyyətə çoxdan məlum olan fəaliyyət qaydaları
təhsil alanın bacarıq və vərdişlərinə çevrilir, təhsil alan təhsilin məzmununun ikinci
komponentini – biliklərin tətbiqi yollarını öyrənir.
Ancaq nə hazır informasiyaların qavranılması, nə də bacarıq və vərdişlərin aşılanması
yaradıcılıq qabiliyyətinin inkişafını təmin edə bilməz.
Tələbədə (öyrənəndə) yaradıcılıq qabiliyyətini inkişaf etdirmək məqsədilə onu müvafiq
situasiyalara salıb qarşısında yeni problemlər qoymaq lazımdır. Tələbənin qarşısına qoyulan
yeni problemlər ondan yaradıcılıq səyi göstərmək, məlum biliklərdən yeni şəraitdə istifadə
etmək, yeni mülahizələr söyləmək, problemin həllinin yeni yollarını tapmaq bacarığının
inkişafına təkan verir.
TƏHSİLİN İNFORMATLAŞMASININ NƏZƏRİ VƏ METODOLOJİ ƏSASLARI
10
Aydındır ki, yaradıcı fəaliyyətin əvvəlcədən dəqiq müəyyənləşdirilmiş əməliyyatlar
sistemini yaratmaq mümkün deyil. Yaradıcı fəaliyyət və onun məhsuldarlığını təmin edə
biləcək şərait və amillər haqqında məlumatlar, yaradıcılıq təcrübəsinin mənimsənilməsini
yalnız asanlaşdıra bilər. Yaradıcılıq təcrübəsinin qazanılmasının ən etibarlı və sınanmış yolu
tələbənin qarşısında qoyulan problemləri müstəqil həll etmək üçün göstərdiyi fəaliyyətdir.
Məhz müstəqil fəaliyyət prosesində tələbədə yaradıcılıqla bağlı psixoloji durum formalaşır.
Bilik, bacarıq və vərdişlər öyrənmə prosesində əldə edildiyi halda, yaradıcılıq təcrübəsi yalnız
və yalnız yeni problemləri həll etdikcə qazanılır. Müəllim tələbəni fəaliyyətin bu növünə
tədriclə – yeni problemləri aşkar etmək və öyrənilən biliklərin kontekstinə daxil etmək,
problemin həllini istiqamətləndirməklə cəlb edə bilər.
Bütün bunlarla yanaşı, təhsil alanların emosional sferasını da inkişaf etdirmək, onlarda
ətraf aləmə, müxtəlif fəaliyyət sahələrinə, təhsil prosesinə, o cümlədən, özünə və başqa insan-
lara münasibət formalaşdırmaq lazımdır.
Qarşıda duran bütün bu vəzifələrin effektiv həlli təlim metodunun düzgün seçilməsindən
və səmərəli tətbiqindən asılıdır.
Təlim metodu elə seçilməli və elə tətbiq olunmalıdır ki, təhsil alan hər kəs özünün
elmlərə yiyələnmək sahəsində müvəffəqiyyət qazandığını, daim irəlilədiyini, hər gün cüzi də
olsa müəyyən nailiyyətlər əldə etdiyini psixoloji cəhətdən hiss etsin.
Yüksək təlim göstəricilərinə nail olmaq üçün əsil peşəkar müəllim öz fənnini yaxşı
bilməklə yanaşı, kifayət qədər pedaqoji təcrübəyə malik olmalıdır. Eyni zamanda, həm də
təlim metodlarına, müxtəlif priyomlarla yaxşı silahlanmalı, onlardan məqamında və
yaradıcılıqla istifadə etməyi bacarmalıdır. Bunun üçün hər bir müəllim metodlar sistemini
aydın təsəvvür etməli, onlara məxsus xüsusiyyətlərin oxşar və fərqli cəhətlərindən birinin
digərindən üstünlüklərini və nöqsanlarını yaxşı bilməlidir.
Təlim metodlarının təsnifatı.Ənənəvi təlim metodları ilə yanaşı, müasir dövrdə təlimin
bir sıra daha effektiv metodları müəyyənləşdirilmişdir. Söz yox ki, metodların çoxluğu
onların qruplaşdırılması və təsnifatı tələbini irəli sürür. Lakin qeyd etmək lazımdır ki,
metodların təsnifatında bu günə qədər fikir eyniliyi müşahidə olunmur. Bu da istər-istəməz
olduqca müxtəlif konsepsiyaların mövcudluğuna səbəb olmuşdur.
Artıq qeyd edildiyi kimi təlim metodu çoxcəhətli, çoxtərəfli bir törəmədir və metodların
təsnifatı verilərkən bu və ya digər cəhət əsas götürülür. Bu səbəbdən də təlim metodların
çoxlu sayda təsnifatları yaranır.
Təlim metodlarının təsnifatı dedikdə, onların bu və ya digər əlamətinə, yaxud bir neçə
xüsusiyyət eyniliyinə görə müəyyən ardıcıllıqla düzülüşünü nəzərdə tutur. Pedaqoji
ədəbiyyatda bu günə qədər onlarla təsnifat verilmişdir. Ümumiyyətlə, təlim prosesini daha
səmərəli, intensiv, effekkiv və məhsuldar qurmağa imkan verən, müasir inkişafının tələblərinə
uyğun olan, təlim praktikası və ictimai həyatla daha sıx bağlı, təhsilin qarşısında duran
məqsəd və vəzifələri yüksək optimallıqla həll etməyə imkan verən təsnifatları uğurlu hesab
etmək olar.
Təlim prosesinə yaradıcı yanaşma prinsipinə istinadən müasir didaktika sübut edir ki,
təlim metodlarının vahid və dəyişməz təsnifatını vermək mümkün deyil.
Dostları ilə paylaş: |