Azərbaycan Respublikasının İqtisadiyyat Nazirliyi ilə Fransa
Respublikasının Xarici İşlər və Beynəlxalq İnkişaf Nazirliyi arasında
regionlararası əməkdaşlıq sahəsində Anlaşma Memorandumunun təsdiq
edilməsi haqqında
AZƏRBAYCAN RESPUBLİKASI PREZİDENTİNİN FƏRMANI
Azərbaycan Respublikası Konstitusiyasının 109-cu maddəsinin 17-ci
bəndini rəhbər tutaraq qərara alıram:
1. Azərbaycan Respublikasının İqtisadiyyat Nazirliyi ilə Fransa
Respublikasının Xarici İşlər və Beynəlxalq İnkişaf Nazirliyi arasında
regionlararası əməkdaşlıq sahəsində 2016-cı il dekabrın 19-da Bakı
şəhərində imzalanmış Anlaşma Memorandumu təsdiq edilsin.
2. Azərbaycan Respublikasının Nazirlər Kabineti bu Fərmanın 1-ci
hissəsində göstərilən Anlaşma Memorandumunun müddəalarının həyata
keçirilməsi üçün tədbirlər görsün.
3. Azərbaycan Respublikasının Xarici İşlər Nazirliyi Anlaşma
Memorandumunun qüvvəyə minməsi üçün zəruri olan dövlətdaxili
prosedurların yerinə yetirildiyi barədə Fransa Respublikası Hökumətinə
bildiriş göndərsin.
İlham ƏLİYEV,
Azərbaycan Respublikasının Prezidenti
Bakı şəhəri, 23 fevral 2017-ci il
№ 1265
Azərbaycan Respublikasının İqtisadiyyat Nazirliyi ilə
Fransa Respublikasının Xarici İşlər və Beynəlxalq İnkişaf Nazirliyi
arasında regionlararası əməkdaşlıq sahəsində
ANLAŞMA MEMORANDUMU
Bundan sonra “Tərəflər” adlandırılacaq Azərbaycan Respublikasının İqtisadiyyat
Nazirliyi ilə Fransa Respublikasının Xarici İşlər və Beynəlxalq İnkişaf Nazirliyi,
Azərbaycan Respublikası ilə Fransa Respublikası arasında mövcud olan ikitərəfli
dostluq münasibətlərini və qarşılıqlı iqtisadi əməkdaşlığı nəzərə alaraq və iki ölkə arasında
regionlararası və desentralizasiya üzrə əməkdaşlığı inkişaf etdirmək arzusu ilə,
hər iki ölkənin Avropa Şurasının üzvü olduqlarını, regional və yerli hakimiyyətlər
konqresində iştirak etdiklərini və bu kontekstdə qəbul edilmiş “Yerli özünüidarə haqqında”
Avropa Xartiyasını imzaladıqlarını nəzərə alaraq,
qlobal məsələlərin, xüsusilə də BMT-nin İqlim Dəyişmələri üzrə Çərçivə
Konvensiyasının tərəf dövlətlərinin Paris konfransından (COP 21) sonrakı dövrdə iqlim və
davamlı inkişaf məsələlərinin regional və yerli səviyyələrdə baxılmasının vacibliyini nəzərə
alaraq,
hər iki ölkənin konstitusiya və qanunvericilik tələblərinə uyğun olaraq yerli
idarəetmənin təşkil edilməsi qaydalarına, hər iki ölkədə mövcud olan idarəetmə
prinsiplərinə və inzibati idarəetmə strukturlarına riayət edərək,
aşağıdakılar barədə razılığa gəldilər:
Maddə 1
Tərəflər hazırkı Anlaşma Memorandumu ilə razılığa gəldilər ki, regional və yerli
idarəetmə orqanlarına verilmiş səlahiyyətlər çərçivəsində regionlararası və desentralizasiya
üzrə əməkdaşlığın inkişaf etdirilməsi sahəsində birgə çalışacaqlar.
Tərəflər
regional
və
yerli
idarəetmə
orqanlarının
potensiallarının
möhkəmləndirilməsini bu əməkdaşlıq vasitəsilə həyata keçirəcəklər.
Maddə 2
Tərəflər Azərbaycan Respublikası ilə Fransa Respublikası arasında regionlararası və
desentralizasiya üzrə əməkdaşlığı inkişaf etdirmək və qarşıya qoyulan məqsədlərə nail
olmaq üçün İdarəetmə Komitəsi təsis edirlər.
İdarəetmə
Komitəsinə
həmsədrlik
Azərbaycan
Respublikasının
İqtisadiyyat
Nazirliyinin və Fransa Respublikasının Xarici İşlər və Beynəlxalq İnkişaf Nazirliyinin
səlahiyyətli nümayəndələri tərəfindən həyata keçirilir.
İdarəetmə Komitəsinin iclaslarında gündəliyə uyğun olaraq, hər iki ölkənin müvafiq
nazirlik və təşkilatlarının rəsmiləri, habelə işgüzar dairələrin nümayəndələri iştirak edirlər.
İdarəetmə Komitəsinin iclasları növbə ilə Azərbaycanda və Fransada keçirilir. Hər bir
iclasın tarixi diplomatik kanallar vasitəsilə razılaşdırılır.
Maddə 3
Bu Anlaşma Memorandumunun 2-ci maddəsinə uyğun olaraq təsis edilmiş İdarəetmə
Komitəsi regionlararası və desentralizasiya üzrə əməkdaşlığın, xüsusilə də aşağıdakı
sahələrdə əməkdaşlığın həyata keçirilməsinə nəzarət edir:
- şəhər idarəetməsi və şəhərsalma;
- bələdiyyə idarəetməsi (mülki vəziyyət, büdcə idarəetməsi, rəqəmsal fəaliyyət,
sənədləşmənin elektronlaşması və s.);
- sahibkarlığa dəstək;
- kənd ərazilərinin, kənd təsərrüfatı və qida sənayesinin inkişafı sahələrində təcrübə
mübadiləsi;
- turizm;
- nəqliyyat;
- səhiyyə;
- mədəniyyət;
- idman sahəsində əməkdaşlıq və gənclərlə bağlı fəaliyyət;
- təhsil, linqvistika, elmi əməkdaşlıq, müştərək elmi layihələr və frankofoniya;
- desentralizasiya və regionlararası əməkdaşlığa dair görüşlər və ya tematik
seminarlar;
- yerli idarəetmə orqanlarının səlahiyyətləri çərçivəsində universitetlərarası, elmi və
texnoloji mübadilələrin asanlaşdırılması;
- əmək bazarının inkişafı, əhalinin sosial müdafiəsi, əlillərin reabilitasiyası, aztəminatlı
ailələrin sosial mənzillə təmin olunması sahəsində təcrübə mübadiləsi;
- vətəndaşlara xidmət, sosial-iqtisadi və müasir innovativ texnologiyaların tətbiqi
sahələrində təcrübə mübadiləsi;
- şəhərlərin davamlı ekoloji inkişafı sahəsində təcrübə mübadiləsi;
- tullantıların, o cümlədən sənaye tullantılarının iqlimə təsiri;
- su, kanalizasiya və tullantılar;
- yerli idarəetmə orqanlarının rəsmilərinin və ehtiyac olduğu təqdirdə, yerli seçkili
vəzifələrdə və maliyyə sahəsində çalışan mütəxəssislərin təliminin təşkili;
- müəllim və tələbə mübadiləsi.
Anlaşma Memorandumunun 2-ci maddəsinə uyğun olaraq təsis edilmiş İdarəetmə
Komitəsi əməkdaşlıq üçün digər sahələr də təklif edə bilər.
Bu prioritet sahələrin müəyyən edilməsi, qardaşlaşmış şəhərlər arasında əlaqələrin,
eləcə də digər sahələrdə əməkdaşlığın yaradılmasına və ya davam etdirilməsinə maneə
yaratmır.
Maddə 4
Ehtiyac olduğu təqdirdə, sonrakı mərhələdə regionlararası və desentralizasiya üzrə
əməkdaşlığı dəstəkləmək məqsədilə paritet əsasda hər iki Tərəfin dotasiyası və layihələr
üzrə tenderi əsasında fəaliyyət göstərəcək və Anlaşma Memorandumunun 2-ci maddəsi ilə
təsis edilmiş İdarəetmə Komitəsi tərəfindən monitorinqi təmin ediləcək Dəstək Fondu
yaradıla bilər.
Maddə 5
Tərəflər nəzərə alırlar ki, yerli idarəetmə orqanları və ya onların adından həyata
keçirilən layihələrə Fransa İnkişaf Agentliyi (A.F.D) öz mandatı çərçivəsində dəstək göstərə
bilər.
Həmçinin, üçüncü ölkənin təsisatları ilə tərəfdaşlıqda bəzi birgə layihələr üçün Avropa
və ya inkişaf banklarının proqramları da istifadə edilə bilər.
Maddə 6
Hazırkı Anlaşma Memorandumunun təfsiri və icrası ilə bağlı hər hansı fikir ayrılıqları
Tərəflər arasında dostluq şəraitində həll ediləcək.
Maddə 7
Tərəflərin qarşılıqlı yazılı razılığı ilə bu Anlaşma Memorandumuna əlavə və
dəyişikliklər edilə bilər. Belə əlavə və dəyişikliklər bu Anlaşma Memorandumunun ayrılmaz
tərkib hissəsi olan ayrıca protokollarla rəsmiləşdirilir və 8-ci maddənin müddəalarına uyğun
olaraq qüvvəyə minir.
Maddə 8
Bu Anlaşma Memorandumu qeyri-müəyyən müddətə bağlanılır və onun qüvvəyə
minməsi üçün zəruri olan dövlətdaxili prosedurların yerinə yetirilməsi barədə Azərbaycan
tərəfinin yazılı bildirişinin diplomatik kanallar vasitəsilə alındığı tarixdən qüvvəyə minir.
Hər hansı Tərəf bu Anlaşma Memorandumunu bildirişlə ləğv edə bilər. Ləğvetmə belə
bildirişin alındığı tarixdən 3 (üç) ay sonra qüvvəyə minir.
Bakı şəhərində 2016-cı il 19 dekabr tarixində, hər biri Azərbaycan və fransız dillərində
olmaqla, iki əsl nüsxədə imzalanmışdır, hər iki mətn eyni qüvvəyə malikdir.
Azərbaycan Respublikasının
Fransa Respublikasının
İqtisadiyyat Nazirliyi
Xarici İşlər və Beynəlxalq İnkişaf Nazirliyi
adından
adından
(imza)
(imza)
Dostları ilə paylaş: |