2
Tərtibçidən:
Əziz uşaqlar! Bu il sizlər üçün “Şəkərim, duzum”, “Torağayın nəğmələri”,
”Toğrul babanın nağıl ağacı”, “Qar qız”, “Qızulduz, Yaşar və Nur nənə”, “Din,
dan”, “Bahar, adlar, uşaqlar”, “Şeirlər, sözlər, nəğmələr”, “Laylalar”, “Balaca
Aytən” kitablarında maraqlı şeirlər, nağıllar, nəğmələr qoyub getmiş sevimli şairimiz
Teymur Elçinin 90 illik yubileyidir. O, sevə-sevə dinlədiyiniz “Bip-Bip nəğməsi”,
“Sərçə”, “Bizim həyət” və bir çox uşaq nəğmələrin də müəllifidir. Uşaq yazıçısı
olaraq şairin bu il 90 illik yubileyi münasibətilə keçirilən tədbirlərə kitabxanamız da
qoşulacaq.
Ədəbi fəaliyyətə erkən yaşlarından başlayan Teymur Elçin şeirlərinin dili sadə,
qafiyələri musiqili olduğundan bu şeirlər yaddaşlarda əbədi həkk olunub. Şeirlərinə
yazılmış mahnılarının isə bu gün də uşaqlar tərəfindən sevilərək oxunması şairin
unudulmamasından xəbər verir. Şair öz yaradıcılığında arxaik sözlərə belə yeni
nəfəs, yeni can vermişdir. Müxtəlif xalqların uşaq yazıçıların əsərlərini böyük
ustalıqla dilimizə tərcümə etmişdir.
Yubiley münasibətilə hazırladığımız bu vəsaitdə məqsədimiz şairimizi sizə
daha yaxından tanıtmaqdır. Onun yaradıcılığında yer alan təmsillər, tapmacaları
yenidən uşaqlara sevdirməkdir.Vəsait iki hissədən ibarətdir: “Giriş hissə”, və
”Keçiriləcək tədbirlər”.
Girişdə şairin həyat və yaradıcılığı haqqında məlumat verilir, II hissədə isə
kitabxanada şairin yubileyi ilə bağlı keçirilməsi nəzərdə tutulan tədbirlər haqqında
danışılır, həmçinin şairin yubilyar kitablarından 2 kitabı, onun təbliği formaları
haqqında danışılır. Şairin xatirəsinə hazırlanan ədəbi-bədii gecədə isə şair haqqında
sitatlar, şeirlərinə hazırlanmış səhnəciklər, bədii kompozisiyalar verilmişdir.
3
Həyat və yaradıcılığı:
Əliyev Teymur Süleyman oğlu 1924-cü il martın 28-də Şuşa şəhərində anadan
olmuşdur. 1931-ci ildə ailəliklə Bakıya köçmüşlər. Burada 132 saylı şəhər orta
məktəbini bitirdikdən sonra ADU-nun filologiya fakültəsində təhsil almışdır (1941-
1948). Həmin ildən eyni zamanda "Gənc işçi" qəzeti redaksiyasında ədəbi işçi kimi
fəaliyyətə başlamışdır. Azərbaycan Radio Komitəsində ictimai-siyasi verilişlər baş
redaksiyasında ştatdankənar müxbir (1941-1942), diktor, redaktor, məsul redaktor
(1942-1943), vəzifələrində işləmişdir.
Yaradıcılığa erkən yaşlarında başlayan Teymur Elçinin “Azərbaycan” adlı ilk
şeiri 1938 – ci ildə Bakı Pionerlər evinin dərc etdiyi şeirlər məcmuəsində çap
edilmişdir. “Qar qız”, “Bip-Bip”, “Qulaq asın, danışım”, “Qizulduz, Yaşar və Nur
nənə”, “Toğrul babanın nağıl ağacı” adlı kitablarında Azərbaycan uşaq ədəbiyyatının
ən gözəl nümunələrini yaratmış şair, Rus və digər xarici ölkə ədəbiyyatı
nümayəndələrinin əsərlərini də dilimizə böyük ustalıqla tərcümə etmişdir. Bu
tərcümələrin əksəriyyəti orijinal nümunədən də qüvvətli alınmışdır. Həmçinin
elimizin, dilimizin qəhrəmanlıq eposu sayılan “Kitabi Dədə Qorqud” un motivləri
əsasında yazdığı “Oğul Buğac” poeması şairin yaradıcılığında uşaqlar üçün yazdığı
ən gözəl nümunələrdəndir. Əsərdə o “Kitabi Dədə Qorqud” un, bədii quruluşunu
saxlamaqla eposu uşaq dili ilə sadə dildə uşaq təfəkkürünə çatdırmışdır.
Şairin kitablarının hər biri kiçikyaşlı oxucular üçün xeyirxahlıq, ülvi hislər və
səmimiyyət tərbiyə edir. Son dövrlərdə bu kitablar latın qrafikası ilə çap edilməsə
də, kitabdakı şeirlər, nəğmələr məktəb kitablarında sevə-sevə çap edilir.
Şairin kitablarındakı şeir və poemaların əksəriyyəti kiçikyaşlı oxucular üçün
nəzərdə tutulmuşdur. Bu isə şairin istedadı ilə yanaşı, uşaq aləmini daha dərindən
bilməsindən xəbər verir. Onun qələmə aldığı şeirlər və poemaların sözlərindəki məna
çaları bir növ uşaqlara müxtəlif tərbiyəvi fikirlər aşılamaq, ibrətamiz həyat
hadisələrini dərk etmək üçün gözəl vasitədir desək yanılmarıq.
O həmçinin respublikamızda uşaqlar üçün yazılmış ən gözəl mahnıların
sözlərinin də müəllifi olmuşdur. F. Əmirov, O. Zülfüqarov, A. Rzayeva və başqa
bəstəkarların şairin sözlərinə yazdığı mahnıları dillər əzbəridir.
Onun uşaqlar üşün yazdığı “Qar Qız” pyesi 1983-cü ildə M. Qorki adına Gənc
tamaşaçılar teatrında tamaşaya qoyulmuşdur.
Şair 20 mart, 1992-ci ildə vəfat etmişdir. Hazırda Bakının küçələrindən biri
şairin adını daşıyır.