14
1954-cü ildə Avropa Mədəniyyət Konvensiyası qəbul edilmişdir. Bu
konvensiya təhsil, mədəniyyət, irs, idman və gənclər sahəsində Avropa Şurasının
fəaliyyət dairəsini müəyyən edir. Artıq bu konvensiyaya 40-dan artıq
dövlət, o cümlədən Azərbaycan Respublikası da qoşulmuşdur. Avropa Şurasının
mədəniyyət proqramı iki istiqamətə yönəlmişdir:
Avropa qitəsinin mədəni mozaikasını təşkil edən orijinallığının dərk
edilməsi və inkişafına yardım;
Avropa birliyinin qarşılaşdığı problemlərin tam uyğun həllini axtarmaq.
2.3. Avropa İnsan Hüquqları Məhkəməsi
Avropa İnsan hüquqlarının və əsas azadlıqlarının müdafiəsi haqqında
Konvensiya insan hüquqlarının beynəlxalq müdafiəsi sistemində xüsusi yer tutur.
O, 15 dövlət tərəfindən 1950-ci il noyabrın 4-də Roma şəhərində qəbul
olunmuşdur
və 1953-cü il sentyabrın 3-dən qüvvədədir.
Konvensiya İnsan hüquqları Bəyannaməsində təsbit olunan bəzi hüquqların
kollektiv həyata keçirilməsi istiqamətində atılan ilk addım kimi qiymətləndirilir.
Maraq doğuran məqam ondan ibarətdir ki, konvensiya yalnız dövlətlər arasında
mübahisələrlə məhdudlaşan daimi məhkəmə orqanının səlahiyyəti haqqında
ənənəvi təsəvvürlərdən imtina etdi. O, vətəndaşların dövlətlərüstü yürisdiksiyaya
birbaşa müraciətini mümkün etdi. Vətəndaşların hüquqlarının məhkəmə müdafiəsi
müvafiq dövlətlərin müstəsna səlahiyyəti olmaqdan qurtardı. Bununla vətəndaşın
beynəlxalq hüquq subyektliyinin tanınması yolunda mühüm addım atıldı.
Bu novellanın əhəmiyyətindən danışan Strasburq Məhkəməsinin keçmiş
üzvlərindən J.Fitsmoris yazırdı ki, Avropa insan hüquqları Konvensiyası əvvəllər
məlum olmayan tamamilə yeni tipli konvensiyadır. O, iştirakçı-dövlətlər üçün elə
öhdəliklər nəzərdə tuturdu ki, belələrini hökumətlər hələ öz üzərlərinə
götürməmişdilər. Konvensiyanın qəbulundan 20 il əvvəl belə öhdəliklər tamamilə
mümkün olmayan, beynəlxalq hüquqdan kənara çıxan öhdəliklər kimi gorünərdi.
Bu, ilk növbədə inqilabi anlayışa — vətəndaşın öz hökumətindən beynəlxalq
məhkəmə forumuna şikayətlə müraciət etmək hüququna aiddir.
Konvensiya mülki və siyasi hüquq və azadlıqları bəyan etməklə yanaşı, həm
də konvensiyanın üzv-dövlətləri tərəfindən götürülmüş öhdəliklərin yerinə
yetirilməsinin təmin edilməsi mexanizmini də yaratmışdır. Öhdəliklərin yerinə
yetirilməsi üzərində nəzarət üç orqanın — 1954-cü ildə təsis edilmiş İnsan
Hüquqları üzrə Avropa Komissiyasının, 1959-cu ildə təsis edilmiş Avropa İnsan
hüquqları Məhkəməsinin və üzv dövlətlərin xarici işlər nazirlərindən və ya onların
nümayəndələrindən təşkil olunan Avropa Şurası Nazirlər Komitəsinin üzərinə
qoyulmuşdu.
Konvensiyanın ilkin mətninə görə, iştirakçı-dövlətlərə qarşı şikayətlər ya
digər iştirakçı-dövlətlər, ya da fərdi şikayətçilər (adi şəxslər, bir qrup şəxslər və
qeyri-hökumət təşkilatları) tərəfindən verilə bilərdi. Lakin fərdi şikayət verilməsi
qaydası fakültətiv xarakter daşıyırdı və yalnız onu tanıyan dövlətə münasibətdə