təkmilləşdirilməsi, yeni-yeni texniki avadanlıqlarla təmin
olunması, ümumiyyətlə, respublikanın düşdüyü ağır vəziyyətdən
çıxarması üçün dünyanın bir çox ölkələrinin müxtəlif şirkət və
iri sənaye müəssisələri ilə sazişlər, müqavilələr bağlanmasında
yaxından iştirak etmişdir.
F.Quliyev baş nazir olduğu dövrdə dünyanın bir sıra
ölkələrinin baş nazirləri və diplomatik nümayəndələri ilə
görüşlər keçirmişdir. O, bu görüş və danışıqlar zamanı
Azərbaycanın iqtisadi və siyasi vəziyyəti haqqında söhbət
açmış, Ermənistan silahlı qüvvələrinin Azərbaycan torpaqlarını
işğal etməsi haqqında ətraflı məlumat vermişdir.
1995-ci il noyabrın 12-də Azərbaycan tarixində ilk dəfə
olaraq müstəqil Azərbaycan Respublikasının Milli Məclisinə
çoxpartiyalı əsasda seçkilər keçirildi. Milli Məclisə
seçilənlərdən biri də F.Quliyev olmuşdur.
1980-1990-cı illərdə F.Quliyev xalq təsərrüfatında əldə
etdiyi müvəffəqiyyətlərə görə SSRİ-nin orden və medalları ilə
təltif olunmuş, elm və texnika sahəsində Azərbaycan SSR
Dövlət mükafatı laureatı, Azərbaycan SSR-in əməkdar
mühəndisi adına layiq görülmüşdür.
* * *
- Azərbaycan Respublikası Siyasi Partiyalar və İctimai
Hərəkatlar Dövlət Arxivi, f.1, siy.70, iş 152; siy.32, iş 154,
siy.158.
- «Azərbaycan» qəz., 1995, 3 may, №81; 1996, 19 iyul,
№197.
136
ARTUR TAHİR oğlu RƏSİZADƏ
noyabr 1996 – avqust, 2003
və noyabrdan…
Azərbaycanın müasir dövr dövlət
xadimlərindən biri A.Rəsizadədir.
Artur Tahir oğlu Rəsizadə 1935-ci il
fevralın 26-da Azərbaycanın qədim və
böyük şəhərlərindən biri olan Gəncə
şəhərində ziyalı ailədə anadan olmuşdur.
A.Rəsizadənin atası Tahir kənd
təsərrüfatı mütəxəssisi kimi Lənkəranda yeni
yaradılmaqda olan subtropik işlərinə
rəhbərlik etmək məqsədilə Lənkərana göndərilir. Rəsizadələr
ailəsi 30-cu illərdə Lənkərana gəlir. Artur Lənkəran şəhər 4 saylı
orta məktəbdə təhsil almışdır.
A.Rəsizadə 1952-ci ildə Lənkəranda orta məktəbi, 1957-ci
ildə isə M.Əzizbəyov adına Azərbaycan Sənaye İnstitutunu
bitirmiş, neft və qaz mədən maşınları və avadanlıqları
mühəndis-mexanik mütəxəssisi peşəsinə yiyələnmişdir.
Gənc mühəndis A.Rəsizadə 1957-1973-cü illərdə
Azərbaycan Elmi-Tədqiqat Neft Maşınqayırma İnstitutunda
mühəndis, böyük mühəndis, baş layihə mühəndisi, laboratoriya
müdiri, şöbə müdiri olmuşdur. 1973-1977-ci illərdə həmin
institutun elmi işlər üzrə direktor müavini, İttifaqneftmaş
Ümumittifaq Sənaye Birliyinin baş mühəndisi, 1977-1978-ci
illərdə isə Neft Maşınqayırma İnstitutunun direktoru
vəzifələrində çalışmışdır. O bu vəzifələrdə Azərbaycan neft
sənayesinin müxtəlif sahələri üçün dəzgah və avadanlıqlar
hazırlanması işində bilik və bacarığını əsirgəməmişdir. Məhz bu
gərgin fəaliyyəti nəticəsində A.Rəsizadənin irəli sürdüyü layihə
1971-ci ildə SSRİ Dövlət mükafatına layiq görülmüşdür.
137
Azərbaycanın rəhbəri H.Ə.Əliyevin tövsiyəsi ilə A.Rəsiza-
də 1978-1981-ci illərdə Azərbaycan Dövlət Plan Komitəsi
sədrinin birinci müavini, 1981-1986-cı illərdə Azərbaycan KP
MK-nın maşınqayırma şöbəsinin müdiri, 1986-1992-ci illərdə
isə Azərbaycan SSR Nazirlər Soveti sədrinin müavini olmuşdur.
Bu münasibətlə 1986-cı il yanvarın 15-də Azərbaycan SSR Ali
Soveti rəyasət heyətinin qərarında oxuyuruq: «Artur Tahir oğlu
Rəsizadə yoldaş Azərbaycan SSR Nazirlər Soveti sədrinin
birinci müavini təyin edilsin». O bu vəzifələrdə də Azərbaycan
neft maşınqayırma məsələləri ilə məşğul olmuş, bu sahənin daha
da inkişaf edərək müasir tələbata cavab verməsinə çalışmışdır.
A.Rəsizadə 1992-1996-cı illərdə İqtisadi İslahatlar
Fondunda məsləhətçi, 1996-cı ilin əvvəllərindən Azərbaycan
Respublikası Prezidenti H.Ə.Əliyevin köməkçisi, iyul ayından
(2003-cü ilin avqust-noyabr ayları daxil olmamaqla)
Azərbaycan Respublikası baş nazirinin birinci müavini, baş
nazirin səlahiyyətlərini icra edən, 1996-cı ilin noyabrından
Azərbaycan Respublikasının baş naziridir.
A.Rəsizadə baş nazir kimi Azərbaycan Respublikasının
yeni şəraitdə – bazar iqtisadiyyatına keçid dövründə
sənayesinin, kənd təsərrüfatının, mədəniyyətinin hərtərəfli
inkişaf etməsi sahəsində, xarici şirkətlərin Azərbaycan
sənayesinə və kənd təsərrüfatına cəlb olunması və onlarla bir
sıra kontraktlar bağlanmasında yaxından iştirak etmişdir.
Bir sıra xarici ölkələrə etdiyi işgüzar səfərləri zamanı
Azərbaycan torpaqlarının 20%-nin Ermənistan tərəfindən işğal
olunduğu, «məzlum» pərdəsi altına girmiş Ermənistanın əsl
işğalçı olduğu, Azərbaycanın minlərlə mədəni-tarixi abidələrini,
kənd və şəhərlərini xarabalığa çevirdikləri haqqında görüşdüyü
dövlət xadimlərinə məlumat vermişdir.
A.Rəsizadə Azərbaycan KP qurultaylarının, MK
plenumlarının nümayəndəsi, Azərbaycan Ali Sovetinin deputatı
olmuşdur.
138
* * *
- Azərbaycan Respublikası Siyasi Partiyalar və İctimai
Hərəkatlar Dövlət arxivi, f.1, siy.65, iş 70, v.147, 149; siy.75, iş
43, v.149, 150.
- Azərbaycan SSR Ali Sovetinin deputatları. On birinci
çağırış. Bakı, 1985.
- Azərbaycanda kim kimdir. Ensiklopedik sorğu kitabı.
Bakı, 2001.
- «Kommunist» qəz., 1986, 15 yanvar.
139
İLHAM HEYDƏR OĞLU ƏLİYEV
avqust – noyabr 2003
Azərbaycanın müasir dövr görkəmli
siyasi, ictimai və dövlət xadimləri pleyadası
içərisində İlham Əliyev xüsusi yer tutur. O,
dünya miqyasında görkəmli və nüfuzlu
siyasətçi, tanınmış dövlət xadimi,
Azərbaycan Respublikasının 3-cü prezidenti
olmuş, Azərbaycanı beynəlxalq aləmdə tanıt-
mış və mövqelərini möhkəmləndirmiş Hey-
dər Əlirza oğlu Əliyevin oğludur. İlham
Əliyev onun zəngin siyasi, dövlətçilik məktəbindən dərs və
tərbiyə almış bir şəxsiyyətdir.
İlham Heydər oğlu Əliyev 1961-ci il dekabrın 24-də Bakı
şəhərində anadan olmuşdur. 1977-ci ildə Bakı şəhəri 6 saylı orta
məktəbi müvəffəqiyyətlə bitirən İ.Əliyev sovet dövründə ən
nüfuzlu ali təhsil ocaqlarından biri hesab edilən Moskva Dövlət
Beynəlxalq Münasibətlər İnstitutuna daxil olmuşdur. O,
tələbəlik illərində tez bir zamanda biliyi, dünyagörüşü, bacarıq
və qabiliyyəti ilə müəllim və tələbələr arasında böyük nüfuz
qazanmışdır. İ.Əliyev 1982-ci ildə İnstitutu bitirmiş, diplomat
ixtisası almış və aspiranturada saxlanılmışdır. Bir neçə xarici dili
mükəmməl öyrənmişdir.
1982-1985-ci illərdə Moskva Dövlət Beynəlxalq Münasi-
bətlər İnstitutunun aspiranturasında oxumuş İ.Əliyev öz biliyi və
təcrübəsini artırmaqla yanaşı, bir diplomat kimi də yetişmişdir. O,
1985-ci ildə İnstitutun aspiranturasını bitirmiş və müvəffəqiyyətlə
namizədlik dissertasiyasını müdafiə etmişdir. SSRİ Nazirlər
Soveti yanında Ali Attestasiya Komissiyası həmin ildə ona tarix
elmləri namizədi alimlik dərəcəsi vermişdir.
İ.Əliyev 1985-1990-cı illərdə Moskva Dövlət Beynəlxalq
Münasibətlər İnstitutunda müəllimlik etmiş, gənc müəllim, alim və
diplomat kimi öz bilik və bacarığını tələbələrinə öyrətmişdir.
140
Atası H.Əliyevi təqib edən sovet rəhbərliyinin göstərişi ilə
o, müəllimlik fəaliyyətindən uzaqlaşdırılmışdır. SSRİ
dağıldıqdan sonra 1991-1994-cü illərdə İ.Əlyev yeni yaranmış
biznes fəaliyyətinə keçmiş və Moskvada fəaliyyət göstərən
«Orient» şirkətinin baş direktoru işləmişdir. Lakin Moskvada
işləməyin çətinləşdiyini, H.Əliyevə qarşı ölkə rəhbərliyi
tərəfindən təzyiqlərin artdığını görən İ.Əliyev atası ilə birlikdə
doğma vətəni Azərbaycana qayıdır.
İ.Əliyev 1994-1996-cı illərdə Azərbaycan Respublikası
Dövlət Neft Şirkətinin xarici iqtisadi əlaqələr üzrə vitse-prezi-
denti, 1996-2003-cü illərdə isə həmin şirkətin birinci vitse-prezi-
denti vəzifələrində çalışmışdır. O, bu vəzifələrdə Azərbaycan
neft sənayesinin inkişafında mühüm rol oynayan 1994-cü il
sentyabrın 20-də dünyanın ABŞ, Fransa, Böyük Britaniya,
Almaniya, Türkiyə, Yaponiya, Norveç və s. kimi dövlətlərinin
neft şirkətləri ilə «Əsrin müqaviləsi»nin bağlanmasına səylə
çalışmış, fəal danışıqlar aparmışdır. O, eyni zamanda
Azərbaycanın quru və dəniz akvatoriyasında yeni-yeni neft-qaz
yataqlarının kəşf edilərək istismara verilməsi, neft sənayesinin
hərtərəfli inkişafı və bu sahələrə xarici şirkətlərin və
sərmayədarların cəlb olunmasına xeyli əmək sərf etmişdir.
İ.Əliyev Azərbaycan Respublikası Dövlət Neft Şirkətinin
birinci vitse-prezidenti olmaqla yanaşı, bir sıra ictimai və siyasi
vəzifələr də aparmışdır. O, 1995-2000-ci illərdə Azərbaycan Res-
publikası Milli Məclisinin deputatı olmuşdur. Bir deputat kimi öz
seçiciləri ilə daima görüşmüş, onların arzu və diləklərinin həyata
keçirilməsində, seçildiyi Bakının Qaradağ rayonunun sosial-iqti-
sadi, mədəni inkişafında, yeni-yeni mənzillərin tikilib seçicilərə
və qaçqınlara verilməsi sahəsində əzmlə çalışmışdır. Deputat kimi
seçicilərinin xüsusi hörmətini qazanmışdır.
1997-ci ildən İ.Əliyev Azərbaycan Milli Olimpiya
Komitəsinin prezidenti seçilmişdir. O, bu vəzifəyə başladığı ilk
gündən idmançılara, onların məşqçilərinə qayğı və diqqəti
141
artırmışdır, Bakı, Gəncə, Lənkəran, Bərdə, Şəki və
Azərbaycanın digər bölgələrində olimpiya kompleksləri tikilib
istifadəyə verilmişdir. Hazırda Azərbaycanda idmanın elə bir
sahəsi yoxdur ki, inkişaf etməmiş və müasir avadanlıqla təmin
edilməmiş olsun. Məhz bu qayğının nəticəsidir ki, Azərbaycan
idmançıları dünyanın müxtəlif ölkələrində keçirilən yarışlarda
qalib gəlir, dövlət bayrağını ucaldır və himnini səsləndirirlər.
İ.Əliyevin prinsipial mövqeyi Azərbaycanda idmanın, olimpiya
hərəkatının beynəlxalq miqyasda nüfuz qazanmasına şərait
yaratmışdır. Heç əbəs deyil ki, Beynəlxalq Olimpiya
Komitəsinin prezidenti Xuan Antonio Samaranç Azərbaycan
Milli Olimpiya Komitəsinin fəaliyyətini yüksək
qiymətləndirərək başqa ölkələr üçün nümunə olduğunu qeyd
etmişdir.
İ.Əliyev Yeni Azərbaycan Partiyasının 1999-cu ildə keçiril-
miş I qurultayında partiya sədrinin müavinlərindən biri, 2001-ci
ildə olmuş II qurultayında isə sədrin birinci müavini seçilmişdir.
O, Yeni Azərbaycan Partiyasının birinci müavini kimi partiyanın
proqram və nizamnaməsində bir sıra dəyişikliklər edilməsində,
tərkibinin gəncləşdirilməsində, partiyaya Azərbaycan gənclərinin
böyük bir dəstəsinin qəbul olunmasında xeyli iş görmüşdür.
İ.Əliyev Yeni Azərbaycan Partiyasının sədridir.
2001-ci ildə Azərbaycan Respublikası Avropa Şurası
Parlament Assambleyasına üzv seçildi. Avropanın bu ali
məclisində 2001-2003-cü illərdə Azərbaycan Respublikası Milli
Məclisinin nümayəndə heyətinə İ.Əliyev başçılıq etmişdir.
Parlament Assambleyasında İ.Əliyevin bilavasitə rəhbərliyi
altında Azərbaycan nümayəndə heyəti uğurlar əldə etmişdir:
əsirlərin və girovların qaytarılması, Dağlıq Qarabağ ərazisində
olan Azərbaycanın tarixi və mədəni abidələrinin ermənilər
tərəfindən dağıdılması, narkotik maddələr əkilməsi və onlardan
əldə edilən gəlirlərin terrorizm məqsədi ilə istifadə olunması və
s. sənədləri yaymışdır. İ.Əliyevin təşəbbüsü ilə AŞPA
142
Ermənistanı işğalçı dövlət kimi tanımış və Dağlıq Qarabağın
Azərbaycan torpağı olduğunu bəyan etmişdir. İ.Əliyevin AŞPA-
da apardığı gərgin işi, yüksək intellektual səviyyəsi, siyasi
çevikliyi və uzaqgörənliyi, qəti prinsipial mövqeyi qısa bir vaxt
ərzində ona böyük hörmət qazandırmış, Avropa Şurası
Parlament Assambleyası sədrinin müavini və büro üzvü
seçilməsinə əsas vermişdir. O, qısa müddət ərzində Avropa
siyasətçiləri içərisində böyük nüfuz qazanmışdır.
İ.Əliyev 2003-cü ilin avqust-noyabr aylarında Azərbaycan
Respublikasının baş naziri vəzifəsində çalışmışdır. Ozünü bu
qısa vaxt ərzində ölkənin ancaq siyasi-diplomatiya məsələlərini
deyil, iqtisadiyyatını və onun səmərəli inkişaf yollarını da
dərindən bilən bir xadim kimi göstərmişdir. O, baş nazir təyin
edildikdən sonra jurnalistlərə verdiyi müsahibədə respublikada
qazanılmış nailiyyətlərdən və qarşıda duran problemlərdən
danışaraq demişdir: «… Prezident Heydər Əliyevin siyasi xəttini
davam etdirəcəyəm. Bilirsiniz ki, Azərbaycanın iqtisadiyyatında
böyük uğurlar əldə edilib, ciddi nailiyyətlər var. Azərbaycanda
iqtisadi islahatlar həyata keçirilir və bunun nəticəsində ölkəmiz
əsaslı şəkildə inkişaf edir. Hesab edirəm ki, qazandığımız
təcrübəni və mövcud potensialı daha da genişləndirmək
lazımdır. Hamımızın məqsədi istifadə edib Azərbaycanı
qüdrətli, güclü dövlətə çevirməkdir. Biz buna nail oluruq və mən
də gələcək fəaliyyətimdə bu amala xidmət edəcəyəm».
Azərbaycan Respublikası Dövlət Neft Şirkətinin birinci
vitse-prezidenti, Azərbaycan Milli Olimpiya Komitəsinin prezi-
denti, Avropa Şurası Parlament Assambleyası sədrinin müavini
və Azərbaycan Respublikasının baş naziri kimi fəaliyyəti İlham
Əliyevə Azərbaycan xalqı içərisində böyük hörmət və nüfuz
qazandırmışdır.
Məhz yuxarıda sadalanan fəaliyyətin nəticəsində İ.Əliyev
2003-cü il oktyabrın 15-də Azərbaycan Respublikasında
keçirilən prezident seçkilərində 8 namizəd arasında böyük səs
143
çoxluğu ilə inamlı
qələbə qazanaraq Azərbaycan
Respublikasının 4-cü prezidenti seçilmişdir. İ.Əliyev atası
H.Əliyevin qoyduğu Azərbaycanı sürətlə inkişaf etdirib qabaqcıl
dövlətlər cərgəsinə çatdırmaq yolunu davam etdirir. O,
Azərbaycan Respublikasının prezidenti kimi 2003-cü il
oktyabrın 31-də keçirilmiş andiçmə mərasimində, Respublika
sarayına toplaşmış xalq nümayəndələri qarşısında çıxış edərkən
H.Əliyevin başçılığı ilə Azərbaycanın son illərdə sənaye və kənd
təsərrüfatı sahəsində əldə etdiyi müvəffəqiyyətlər, siyasi
vəziyyət, qarşıda duran vəzifələr və gələcək inkişaf haqqında
demişdir: «Azərbaycan gələcəkdə çox zəngin və qüdrətli ölkəyə
çevriləcəkdir. Neft strategiyasını davam etdirərək qısa müddət
ərzində ölkəmizi hərtərəfli inkişaf etdirəcəyik.
Xüsusilə qeyri-neft sektoruna böyük diqqət göstəriləcəkdir.
Yeni zavodlar, fabriklər istifadəyə veriləcəkdir. Sahibkarlığın
inkişafı üçün tədbirlər planı, Azərbaycanda iqtisadi inkişaf
proqramı hazırlanır. Bu çoxsahəli inkişaf proqramı Azərbaycanı
qısa müddət ərzində zəngin dövlətə çevirməyə imkan
verəcəkdir».
İ.Əliyev prezident seçilməklə Azərbaycan cəmiyyətinə yeni
nəfəs gətirmişdir. O, Azərbaycan xalqı arasında və xalqla haki-
miyyət arasında təbii birliyi möhkəmləndirmişdir. Prezidentliyi-
nin ilk üç ili göstərdi ki, İ.Əliyevin daxili siyasəti uğurlu olmuş-
dur. O, Azərbaycan regionlarının inkişafına, əhalinin sosial-iqti-
sadi vəziyyətinin yaxşılaşdırılmasına dair mühüm qərarlar qəbul
etmişdir. Yeni fabrik və zavodlar, iş yerləri açılmışdır. Azərbay-
can elminə, təhsilinə və mədəniyyətinə olan diqqət artırılmışdır.
İ.Əliyev sadəliyi və səmimiliyi ilə əsl xalq adamı olmuşdur.
Onun xarici siyasət fəaliyyətinin ilk addımları uğurlu
olmuşdur. Azərbaycanın dövlət və milli maraqlarını qətiyyətlə
qoruyan İ.Əliyev Fransa, Türkiyə, Rusiya və b. ölkələrə rəsmi
səfərlərində, BMT, Avropa Şurası və b. beynəlxalq
təşkilatlardakı nitqlərində Ermənistanın Azərbaycana
144
təcavüzünə son qoyulmasını tələb etmiş, dövlətimizin
beynəlxalq mövqelərini xeyli gücləndirmişdir. Azərbaycan
xalqını uzun illər boyu düşündürən Təbrizdə Azərbaycan
Respublikası konsulluğunun açılması məsələsi məhz İ.Əliyevin
hakimiyyətinin birinci ilində həll edilmiş və bilavasitə onun adı
ilə bağlı olmuşdur. İ.Əliyev Təbrizə rəsmi səfər edən ilk
Azərbaycan dövlət başçısıdır.
* * *
- Azərbaycanda kim kimdir. Ensiklopedik sorğu kitabı.
Bakı, 2001.
- «Azərbaycan» qəz., 2003-2005.
- Azərbaycan Respublikası Milli Olimpiya Komitəsi. 10 il.
Bakı, 2002.
- İlham Əliyev bu günün və gələcəyin uğur faktorudur.
Bakı, 2001.
- İlham Əliyev böyük siyasətdə: reallıqlar və perspektivlər.
I kitab. Bakı, 1999.
- Xudiyev N. Sabaha inamla. Bakı, 2002.
145
Dostları ilə paylaş: |