“Azərkosmos” Açıq Səhmdar Cəmiyyətinin Nizamnaməsinin və strukturunun təsdiq
edilməsi haqqında
AZƏRBAYCAN RESPUBLİKASI NAZİRLƏR KABİNETİNİN QƏRARI
"Azərkosmos" Açıq Səhmdar Cəmiyyətinin təsis edilməsi haqqında" Azərbaycan
Respublikası Prezidentinin 2010-cu il 3 may tarixli 885 nömrəli Sərəncamının 4.1-ci
bəndinin icrasını təmin etmək məqsədi ilə Azərbaycan Respublikasının Nazirlər
Kabineti qərara alır:
1. "Azərkosmos" Açıq Səhmdar Cəmiyyətinin Nizamnaməsi" təsdiq edilsin (əlavə
olunur).
2. "Azərkosmos" Açıq Səhmdar Cəmiyyətinin strukturu" təsdiq edilsin (əlavə
olunur).
3. Bu qərar imzalandığı gündən qüvvəyə minir.
Azərbaycan Respublikasının Baş naziri A.RASİZADƏ
Bakı şəhəri, 23 dekabr 2010-cu il
№ 240
Azərbaycan Respublikası Nazirlər Kabinetinin
2010-cu il 23 dekabr tarixli 240 nömrəli qərarı ilə
TƏSDİQ EDİLMİŞDİR
"Azərkosmos" Açıq Səhmdar Cəmiyyətinin
N İ Z A M N A M Ə S İ
1. Ümumi müddəalar
1.1. "Azərkosmos" Açıq Səhmdar Cəmiyyəti (bundan sonra - Cəmiyyət)
"Azərkosmos" Açıq Səhmdar Cəmiyyətinin təsis edilməsi haqqında" Azərbaycan
Respublikası Prezidentinin 2010-cu il 3 may tarixli 885 nömrəli Sərəncamına əsasən
yaradılmışdır.
1.2. Cəmiyyətin bütün səhmləri dövlətə məxsusdur.
1.3. Cəmiyyətin fəaliyyəti ilə əlaqədar olan, lakin bu Nizamnamə ilə
tənzimlənməyən məsələlər Azərbaycan Respublikasının qanunvericiliyi ilə tənzimlənir.
1.4. Cəmiyyət Azərbaycan Respublikası Rabitə və Yüksək Texnologiyalar
Nazirliyinin (bundan sonra - Nazirlik) tabeliyində fəaliyyət göstərir.
1
1.5. Cəmiyyətin rəsmi adı aşağıdakı kimidir:
- tam halda - "Azərkosmos" Açıq Səhmdar Cəmiyyəti;
- qısaldılmış halda - "Azərkosmos" ASC.
Cəmiyyətin ingilis dilində tam adı - "Azercosmos" Open Joint Stock Company;
Cəmiyyətin ingilis dilində qısaldılmış adı - "Azercosmos" OJSCo.
1.6. Cəmiyyətin hüquqi ünvanı: Azərbaycan Respublikası, Bakı şəhəri,
A.Abbaszadə küçəsi, 2.
2. Cəmiyyətin hüquqi statusu
2.1. Cəmiyyət hüquqi şəxsdir, müstəqil balansa, banklarda hesablaşma hesabına və
digər hesablara malikdir.
2.2. Cəmiyyətin ayrıca əmlakı vardır, öz öhdəlikləri üçün bu əmlakla cavabdehdir,
qanunvericiliyə uyğun olaraq öz səlahiyyətləri daxilində əqdlər, sazişlər, müqavilələr
bağlamaq, öz adından əmlak və qeyri-əmlak hüquqları əldə etmək və həyata keçirmək,
vəzifələr daşımaq, məhkəmədə iddiaçı və ya cavabdeh olmaq hüququna malikdir.
2.3. Cəmiyyət, üzərində Azərbaycan Respublikasının Dövlət gerbi təsvir olunmuş,
Nazirliyin və Cəmiyyətin adı göstərilmiş möhürə, müvafiq ştamplara və blanklara
malikdir.
2.4. Cəmiyyətin nümayəndəlik və filiallarının yaradılması və ya ləğv edilməsi,
tabeliyində olan hüquqi şəxs statuslu qurumların yaradılması, yenidən təşkili və ya
ləğv edilməsi qanunvericiliklə müəyyən edilmiş qaydada Azərbaycan Respublikasının
Əmlak Məsələləri Dövlət Komitəsindən razılıq alınmaqla həyata keçirilir.
2.5. Cəmiyyət xüsusi razılıq (lisenziya) tələb olunan fəaliyyət növlərini
qanunvericiliklə müəyyən edilmiş qaydada xüsusi razılıq (lisenziya) aldıqdan sonra
həyata keçirə bilər.
2.6. Cəmiyyət dövlətin üzərinə götürdüyü hər hansı öhdəliklərə cavabdeh
deyildir.
2.7. Dövlət Cəmiyyətin öhdəlikləri üçün cavabdeh deyildir və Cəmiyyətin
fəaliyyəti ilə bağlı zərər üçün dövlətə məxsus səhmlərin dəyəri həddində risk daşıyır.
3. Cəmiyyətin əsas məqsədi və fəaliyyət istiqamətləri
3.1. Cəmiyyətin əsas məqsədi telekommunikasiya peykinin orbitə çıxarılması,
idarə edilməsi və istismarı işlərinin həyata keçirilməsindən ibarətdir.
3.2. Cəmiyyət bu məqsədlərə uyğun olaraq, sərəncamında (istifadəsində) olan
peyk, peyk sistemləri və yerüstü qurğuların istismarı ilə bağlı aşağıdakı istiqamətlərdə
fəaliyyət göstərir:
3.2.1. qlobal informasiya məkanına inteqrasiyanın genişləndirilməsi, milli və
informasiya təhlükəsizliyinin təmin olunması və gücləndirilməsi məqsədi ilə dövlət
orqanlarının, hüquqi və fiziki şəxslərin peyk şəbəkələrinə qoşulma imkanlarının təmin
edilməsi;
3.2.2. peyk və peyk sistemləri vasitəsilə peyk rabitəsi, telekommunikasiya
xidmətləri, yüksəksürətli peyk internet xidməti, radio və televiziya yayımı, habelə
məsafədən qəbuletmə, şəkil çəkmə üzrə xidmətlərin təşkil edilməsi və göstərilməsi;
3.2.3. telekommunikasiya peyklərinin orbitə çıxarılması məqsədi ilə peykin
istehsalçısının, buraxılma vasitəsinin və sığorta şirkətlərinin seçilməsi işlərinin təşkil
edilməsi;
3.2.4. Azərbaycan Respublikasına Beynəlxalq Telekommunikasiya İttifaqı
tərəfindən ayrılmış orbital mövqelərin imkanlarının artırılması üçün təkliflərin
hazırlanması, orbital mövqelər üzərində hüquqların qorunması və beynəlxalq peyk
rabitəsi təşkilatlarında iştirak və əməkdaşlıqla bağlı səlahiyyətləri daxilində müvafiq
tədbirlərin görülməsi;
3.2.5. peyk sistemlərinin, telekommunikasiya peyklərinin idarə edilməsi və
istismarı, peyk xidmətlərindən istifadə üzrə yerüstü sistemlərin, o cümlədən yerüstü
kosmik peyk rabitə vasitələrinin quraşdırılmasının, təchizatının təşkili və istismar
edilməsi;
3.2.6. peykdən səmərəli istifadə edilməsi, kommersiya fəaliyyətinin təşkil edilməsi
və digər məsələlər üzrə əməkdaşlıq edilməsi məqsədi ilə kosmik (peyk) operatorlarla
əlaqələrin yaradılması;
3.2.7. peyk xidmətlərinin inkişaf etdirilməsi baxımından kosmik fəaliyyət, o
cümlədən peyk, raket daşıyıcı texnologiyaları sahələrində əlaqədar qurumlarla, digər
hüquqi şəxslərlə faydalı kommersiya və elmi-texniki əməkdaşlığın həyata keçirilməsi,
peyk xidmətlərinin, informasiya texnologiyalarının inkişafı məqsədi ilə elmi
araşdırmaların təşviq edilməsi və dəstəklənməsi;
3.2.8. fiksasiya olunmuş rabitə sistemlərinin kosmik kompleksinin yaradılması və
çoxfunksiyalı kosmik retranslyasiya sistemlərinin, nəqliyyatın hərəkəti ilə bağlı
informasiya xidmətlərinin təşkili üzrə tədbirlərin görülməsi;
3.2.9. peyk xidmətlərinin göstərilməsi ilə əlaqədar olaraq, elektromaqnit
siqnallarına çevrilə bilən informasiya növlərinin peyk telekommunikasiya sistemləri
vasitəsilə ötürülməsinin və qəbulunun təşkili;
3.2.10. telekommunikasiya peyk şəbəkəsinin inkişafı üçün çoxfunksiyalı fərdi
kosmik rabitə və verilənlərin ötürülməsi, peyk rabitəsinin yayım texnologiyası üzrə
yeni texniki komplekslərin yaradılması, habelə peyk naviqasiyası sisteminin təşkili və
peyk naviqasiya xidmətlərinin göstərilməsi;
3.2.11. məsləhət və layihələndirmə xidmətləri daxil olmaqla, ölkə daxilində və
xaricdə peyk xidmətlərinin və peyk avadanlıqlarının, proqram təminatlarının satışı, o
cümlədən müvafiq satış şəbəkəsinin yaradılması;
3.2.12. peykin idarə olunması və istismarı, peyk xidmətləri və onların marketinqi,
orbital mövqenin koordinasiyasının aparılması və digər kosmik operatorlarla əlaqələrin
tənzimlənməsi üzrə kadrların hazırlanmasının təşkil edilməsi;
3.2.13. Cəmiyyətin nümayəndəlik və filiallarının, tabeliyində olan hüquqi şəxs
statuslu qurumlarının iqtisadi və maliyyə vəziyyətinin təhlil edilməsi və onların
fəaliyyətinin səmərəliliyinin yüksəldilməsi məqsədi ilə tədbirlər görülməsi;
3.2.14. səlahiyyətləri çərçivəsində Cəmiyyətin işçilərinin sosial müdafiəsinin və
əmək şəraitinin yaxşılaşdırılması, əməyin mühafizəsi tədbirlərinin həyata keçirilməsi;
3.2.15. Cəmiyyətin əqli mülkiyyətinin qanunvericiliyə uyğun olaraq idarə
olunması və onun barəsində sərəncam verilməsi;
3.2.16. fəaliyyət dairəsinə aid olan islahatların aparılmasına dair təkliflərin
hazırlanması və Nazirliyə təqdim edilməsi;
3.2.17. müvafiq dövlət proqramlarında nəzərdə tutulmuş vəzifələrin yerinə
yetirilməsi ilə bağlı tədbirlərin öz səlahiyyətləri daxilində həyata keçirilməsi;
3.2.18. sərəncamında olan əmlakından qanunvericiliyə uyğun səmərəli istifadə
edilməsi;
3.2.19. təsərrüfat fəaliyyətinin həyata keçirilməsi ilə əlaqədar qanunvericiliyə
uyğun olaraq malların (işlərin və xidmətlərin) satın alınması, o cümlədən
qanunvericilikdə nəzərdə tutulmuş qaydada müsabiqələrin (tenderlərin) keçirilməsi;
3.2.20. Cəmiyyətin əsas məqsədinə uyğun olaraq, qanunvericiliklə qadağan
edilməyən digər fəaliyyət növlərinin yerinə yetirilməsi.
4. Cəmiyyətin nizamnamə kapitalı və əmlakı
4.1. Cəmiyyətin gəlirləri texniki yardım və qrantlardan, kreditlərdən, xidmət və
istehsalatdan daxil olan və eləcə də qanunvericiliklə qadağan olunmayan mənbələrdən
və fəaliyyət növlərindən daxil olan vəsaitlərdən ibarətdir.
4.2. Cəmiyyətin əmlakı əsas fondlardan, dövriyyə vəsaitlərindən və digər
əmlakdan ibarətdir.
4.3. Cəmiyyətin əmlakının dəyəri onun balansında göstərilir.
4.4. Cəmiyyətin nizamnamə kapitalı 63610600 (altmış üç milyon altı yüz on min
altı yüz ) manatdır və onun səhmlərinin nominal dəyərindən təşkil olunur. Nizamnamə
kapitalı nominal dəyəri 20 (iyirmi) manat olan 3180530 (üç milyon yüz səksən min beş
yüz otuz) ədəd sənədsiz, adlı, adi səhmlərdən ibarətdir.
2
4.5. Cəmiyyətin əmlakı aşağıda göstərilən mənbələr hesabına təşkil olunur:
4.5.1. nizamnamə kapitalına daxil olan əmlak;
4.5.2. təsərrüfat fəaliyyətinin həyata keçirilməsindən daxil olan gəlirlər;
4.5.3. qanunvericiliklə qadağan olunmayan digər mənbələr.
4.6. Cəmiyyətin nizamnamə kapitalının artırılması və ya azaldılması Azərbaycan
Respublikasının Mülki Məcəlləsində nəzərdə tutulmuş qaydada həyata keçirilir.
4.7. Cəmiyyətin nizamnamə kapitalına qoyulan maya puldan, qiymətli
kağızlardan, başqa əmlakdan, əmlak hüquqlarından və pul dəyəri olan digər
hüquqlardan ibarət ola bilər.
4.8. Cəmiyyət qanunvericiliklə müəyyən edilmiş qaydada ehtiyat, sığorta və digər
fondlar yaratmaq hüququna malikdir.
5. Cəmiyyətdə uçot, hesabat və nəzarət
3
5.1. Cəmiyyət mühasibat və statistik uçotu Azərbaycan Respublikasının müvafiq
qanunvericiliyinə uyğun olaraq aparır. Cəmiyyət maliyyə hesabatlarını Maliyyə
Hesabatlarının Beynəlxalq Standartlarına uyğun olaraq tərtib edir.
5.2. Cəmiyyətin birinci maliyyə ili dövlət qeydiyyatına alındığı vaxtdan başlayır və
həmin ilin dekabrın 31-də başa çatır. Növbəti maliyyə ili isə yanvarın 1-dən başlayır və
dekabrın 31-də başa çatır.
5.3. Şəffaflığın təmin edilməsi üçün Cəmiyyət illik maliyyə hesabatını hər il
maliyyə ili bitdikdən sonra aprelin 30-dan gec olmayan müddətdə auditor rəyi ilə
birlikdə, həmçinin, Cəmiyyətin xalis aktivlərinin dəyərinin 25 faizindən artıq məbləğdə
olan əqdin (xüsusi əhəmiyyətli əqdin) bağlanması barədə məlumatı mətbu orqanda
dərc etdirməyə borcludur.
5.4. Cəmiyyət mühasibat uçotunu təşkil edir, nümayəndəlik və filiallarının,
həmçinin, tabeliyində olan hüquqi şəxs statuslu qurumların rüblük və illik maliyyə
hesabatına baxır, icmallaşdırır, maliyyə-təsərrüfat fəaliyyəti barədə ümumi hesabatı,
maliyyə hesabatlarını (mühasibat balansı, mənfəət və zərər hesabat, kapitalda
dəyişikliklər haqqında hesabat, pul vəsaitlərinin hərəkəti haqqında hesabat, uçot
siyasəti və izahlı qeydlər) tərtib edir və təsdiq edilməsi üçün müəyyən olunmuş
qaydada Nazirliyə təqdim edir.
5.5. Cəmiyyət illik maliyyə hesabatlarını hər il maliyyə ili bitdikdən sonra auditor
rəyi ilə birlikdə mühasibat uçotu sahəsində dövlət tənzimlənməsini həyata keçirən
Azərbaycan Respublikasının Maliyyə Nazirliyinə onun sorğusu əsasında təqdim edir.
4
5.5-1. İdarə Heyətinin sədri və ya üzvləri, habelə Cəmiyyətin struktur bölmələrinin (filial,
nümayəndəlik və s.) rəhbərləri özlərinin, Azərbaycan Respublikasının Mülki Məcəlləsinin 49-
1.1.3-cü və 49-1.1.5-ci maddələrində göstərilən şəxslərin bağlanılan əqdə münasibətdə aidiyyəti
şəxs qismində çıxış etmələri, həmçinin həmin əqdlə əlaqədar öz maraqlarının xüsusiyyətləri
(onun yaranması, həcmi və s.) barədə məlumatı Azərbaycan Respublikasının Mülki Məcəlləsinin
49-1.6-cı və 49-1.7-ci maddələri ilə müəyyən edilmiş qaydada təqdim etməlidirlər.
5
5.6. Cəmiyyət nümayəndəlik və filiallarının, həmçinin, tabeliyində olan hüquqi
şəxs statuslu qurumların maliyyə-təsərrüfat fəaliyyətinin yoxlanılmasının qüvvədə olan
qanunvericiliyə uyğun olaraq aparılmasını təmin edir.
6. Cəmiyyətin ali idarəetmə orqanı
6.1. Cəmiyyətin ali idarəetmə orqanı onun səhmdarlarının ümumi yığıncağıdır.
6.2. Cəmiyyətin ümumi yığıncağının müstəsna səlahiyyətlərinə aid edilmiş
məsələlər "Azərkosmos" Açıq Səhmdar Cəmiyyətinin təsis edilməsi haqqında"
Azərbaycan Respublikası Prezidentinin 2010-cu il 3 may tarixli 885 nömrəli
Sərəncamına uyğun olaraq həll edilir.
7. Cəmiyyətin icra orqanı
7.1. İdarə Heyəti Cəmiyyətin kollegial icra orqanıdır.
7.2. İdarə Heyəti qanunvericiliklə və bu Nizamnamə ilə müəyyən olunmuş
səlahiyyətləri daxilində Cəmiyyətin idarə edilməsi ilə bağlı bütün məsələləri həll edir.
7.3. İdarə Heyətinin tərkibi 3 nəfərdən - Azərbaycan Respublikasının Prezidenti
tərəfindən vəzifəyə təyin olunan və vəzifədən azad edilən Cəmiyyətin sədri və Nazirlik
tərəfindən vəzifəyə təyin olunan və vəzifədən azad edilən sədrin iki müavinindən
ibarətdir.
7.4. İdarə Heyətinin işinə Cəmiyyətin sədri rəhbərlik edir.
7.5. İdarə Heyəti:
7.5.1. qanunvericiliklə müəyyən edilmiş hallarda və qaydada hesabat verir;
7.5.2. Cəmiyyətin işçilərinin vəzifə maaşlarının, vəzifə maaşlarına əlavələrin,
mükafatların və digər ödənişlərin verilməsini Azərbaycan Respublikasının müvafiq
qanunvericiliyinə uyğun olaraq əməkhaqqı fondu dairəsində təmin edir;
7.5.3. yeni texnologiyaların tətbiqi ilə bağlı qərarlar qəbul edir;
7.5.4. Cəmiyyətin daxili intizam qaydalarını müəyyən edir;
7.5.5. Cəmiyyətin struktur bölmələrinin rəhbərlərinin səlahiyyətlərini müəyyən
edir;
7.5.6. bütövlükdə Cəmiyyətin və ya onun struktur bölmələrinin, nümayəndəlik və
filiallarının, tabeliyində olan hüquqi şəxs statuslu qurumların maliyyə-təsərrüfat
fəaliyyətinin auditinin keçirilməsi ilə bağlı qərar qəbul edir;
7.5.7. Cəmiyyətin perspektiv inkişaf planı, digər hüquqi şəxslərə kapital qoyuluşu,
bu Nizamnaməyə əlavə və dəyişikliklər edilməsi barədə Nazirliyə təkliflər verir;
7.5.8. Cəmiyyətin fəaliyyəti ilə bağlı, habelə, Cəmiyyətin illik hesabatlarının,
mühasibat balanslarının, mənfəət və zərər hesablarının təsdiq edilməsi, mənfəətinin və
zərərinin bölüşdürülməsi üçün müvafiq təklifləri Nazirliyə təqdim edir;
7.5.9. Cəmiyyətin saxlanması və ona həvalə olunmuş vəzifələrin yerinə yetirilməsi
üçün qanunvericilikdə nəzərdə tutulmuş mənbələrdən (kreditlər, qrantlar, texniki
yardımlar, işlərin görülməsindən, xidmətlərin göstərilməsindən daxilolmalar və sairə)
Cəmiyyətin sərəncamına daxil olan məqsədli vəsaitlərin təyinatı üzrə xərclənməsini
təmin edir və bununla əlaqədar olaraq Nazirliyə mütəmadi olaraq hesabatlar təqdim
edir;
7.5.10. Cəmiyyətin xalis aktivlərinin dəyərinin 25 faizindən artıq məbləğdə olan əqdin
(xüsusi əhəmiyyətli əqdin) və aidiyyəti şəxslə dəyəri Cəmiyyətin aktivlərinin 5 faizini və daha
çox hissəsini təşkil edən əqdin (müstəqil auditorun rəyi əlavə olunmaqla) bağlanılması haqqında
qərarın qəbul edilməsi üçün nazirliyə müraciət edir;
7.5.11. aidiyyəti şəxslə dəyəri Cəmiyyətin aktivlərinin 5 faizədək hissəsini təşkil edən əqdin
bağlanılması haqqında qərar qəbul edir.
6
7.6. İdarə Heyətinin iclasları müvafiq qaydada protokollaşdırılır və müzakirə
edilmiş məsələlər üzrə qərarlar qəbul edilir. Həmin qərarlar Cəmiyyətin sədri
tərəfindən imzalandıqdan sonra qüvvəyə minir.
7.7. Cəmiyyətin İdarə Heyətinin qərarları sadə səs çoxluğu ilə qəbul edilir. Səslər
bərabər bölündükdə, Cəmiyyətin sədrinin səsi həlledicidir.
8. Cəmiyyətin sədri
8.1. Cəmiyyətin sədri:
8.1.1. Cəmiyyətin fəaliyyətinə cari rəhbərliyi həyata keçirir;
8.1.2. sədrin müavinləri arasında vəzifə bölgüsünü müəyyənləşdirir;
8.1.3. Azərbaycan Respublikasının qanunvericiliyinə və bu Nizamnaməyə uyğun
olaraq, Cəmiyyətin üzərinə düşən vəzifələrin yerinə yetirilməsi və onun hüquqlarının
həyata keçirilməsi üçün zəruri tədbirlər görür;
8.1.4. Cəmiyyətin adından etibarnaməsiz fəaliyyət göstərir, habelə Cəmiyyəti
bütün dövlət orqanlarında, müəssisələrdə, idarələrdə və təşkilatlarda (o cümlədən
beynəlxalq təşkilatlarda) təmsil edir;
8.1.5. Cəmiyyətin strukturu, işçilərinin say həddi və xərclər smetası barədə
təkliflərini hazırlayır və müəyyən edilmiş qaydada təsdiq olunması məqsədi ilə
Nazirliyə təqdim edir;
8.1.6. telekommunikasiya peyklərinin orbitə çıxarılması, idarə edilməsi və istismarı
işlərinin həyata keçirilməsinə dair qərarlar qəbul edir və müvafiq göstərişlər verir;
8.1.7. Cəmiyyətin struktur bölmələrinin, filial və nümayəndəliklə-rinin
əsasnamələrini, tabeliyində olan hüquqi şəxs statuslu qurumların nizamnamələrini
qanunvericiliyə uyğun olaraq təsdiq edir;
8.1.8. Cəmiyyətin tabeliyində olan qurumların strukturunu və ştat cədvəlini təsdiq
edir;
8.1.9. Cəmiyyətin əmlakı barədə qanunvericiliklə müəyyən edilmiş qaydada
sərəncam verir, bu Nizamnamənin 7.5.10-cu və 7.5.11-ci yarımbəndlərinin tələbləri nəzərə
alınmaqla
müqavilələr bağlayır, etibarnamələr verir, banklarda hesablaşma hesabı və
digər hesablar açır;
7
8.1.10. Cəmiyyətə həvalə olunmuş vəzifələrin yerinə yetirilməsi üçün
qanunvericilikdə nəzərdə tutulmuş mənbələrdən (kreditlər, qrantlar, texniki yardımlar,
işlərin görülməsinə, xidmətlərin göstərilməsinə görə daxilolmalar və sair) Cəmiyyətin
sərəncamına daxil olan məqsədli vəsaitlərin təyinatı üzrə istifadəsini təmin edir;
8.1.11. Cəmiyyətin nümayəndəlik və filiallarının, tabeliyində olan hüquqi şəxs
statuslu qurumların rəhbərlərini Nazirliklə razılaşdırmaqla, vəzifəyə təyin edir və
vəzifədən azad edir;
8.1.12. Cəmiyyətin struktur bölmələrinə, filial və nümayəndəlik-lərinə, tabeliyində
olan hüquqi şəxs statuslu qurumlara göstərişlər verir;
8.1.13. Cəmiyyətin aparatının işçilərini (sədrin müavinləri istisna olunmaqla)
vəzifəyə təyin edir və vəzifədən azad edir, onlar barəsində, habelə Cəmiyyətin
nümayəndəlik və filiallarının, həmçinin tabeliyində olan hüquqi şəxs statuslu
qurumların rəhbərləri barədə həvəsləndirmə və intizam tənbehi tədbirləri görür;
8.1.14. öz səlahiyyətləri daxilində Azərbaycan Respublikası qanunlarının,
Azərbaycan Respublikası Prezidentinin fərman və sərəncamlarının, Azərbaycan
Respublikası Nazirlər Kabinetinin qərar və sərəncamlarının, digər normativ hüquqi
aktların və Nazirliyin əmr və sərəncamlarının icrasını təmin edir;
8.1.15. Cəmiyyətin idarə edilməsi, cari fəaliyyətin tənzimlənməsi məqsədi ilə öz
səlahiyyətləri daxilində icrası məcburi olan əmr və sərəncamlar verir;
8.1.16. malların alınması, işlərin görülməsi və xidmətlərin göstərilməsi üçün
müsabiqələrin keçirilməsi üzrə komissiyalar yaradır;
8.1.17. qanunvericiliyə uyğun olaraq digər səlahiyyətləri həyata keçirir.
8.2. Cəmiyyətin sədri öz vəzifəsini yerinə yetirə bilmədikdə, onun səlahiyyətlərini
müvəqqəti olaraq Azərbaycan Respublikasının rabitə və yüksək texnologiyalar naziri
tərəfindən müəyyən edilən sədr müavini həyata keçirir.
9. Daxili audit və maliyyə nəzarəti mexanizmi
9.1. Cəmiyyət sədrə tabe olan daxili audit xidmətini təsis edir. Daxili audit
xidmətinin əməkdaşları öz funksiyalarını icra edərkən müstəqil qiymət vermək, nəticə
çıxarmaq hüququna malikdirlər.
9.2. Daxili auditor ali iqtisadi və ya hüquqi təhsilə və ya digər ixtisas üzrə ali
təhsilə və audit, yaxud əlaqədar sahələrdə dördillik iş stajına malik olmalıdır;
9.3. Daxili audit xidmətinin əsas funksiyaları aşağıdakılardan ibarətdir:
9.3.1. Cəmiyyətin, onun struktur bölmələrinin, filial və nümayən-dəliklərinin,
tabeliyində olan hüquqi şəxs statuslu qurumlarının fəaliyyətinin Azərbaycan
Respublikasının qanunvericiliyinə və Cəmiyyətin daxili qaydalarına uyğunluğunu
yoxlamaq;
9.3.2. Cəmiyyətin təsərrüfat fəaliyyətinin, habelə maliyyə vəziyyə-tinin dəqiq
qiymətləndirilməsi məqsədi ilə bütün sahələrdə aparılan əməliyyatların mütəmadi
auditini aparmaq;
9.3.3. daxili audit yoxlamalarının nəticələri haqqında, habelə ortaya çıxmış
çatışmazlıqların aradan qaldırılması üçün təkliflər barədə Cəmiyyətin sədrinə məlumat
vermək;
9.3.4.
Azərbaycan
Respublikasının
müvafiq
qanunvericiliyində
və
bu
Nizamnamədə nəzərdə tutulmuş digər səlahiyyətləri həyata keçirmək.
9.4. Cəmiyyətin bütün əməkdaşları daxili auditi həyata keçirən əməkdaşların
tələbi ilə zəruri olan sənədləri təqdim etməyə, onlara öz vəzifələrinin icrası üçün lazımi
şərait yaratmağa borcludurlar.
10. Cəmiyyətin müstəqil (kənar) auditi
Cəmiyyətin maliyyə - təsərrüfat fəaliyyətinin müstəqil (kənar) auditi Azərbaycan
Respublikasının müvafiq qanunvericiliyinə uyğun olaraq həyata keçirilir.
11. Cəmiyyətin filial və nümayəndəlikləri, habelə tabeliyində olan hüquqi şəxs
statuslu qurumları ilə qarşılıqlı münasibətləri
11.1. Cəmiyyətin filial və nümayəndəlikləri, habelə, tabeliyində olan hüquqi şəxs
statuslu qurumları ilə qarşılıqlı münasibətləri Azərbaycan Respublikasının normativ
hüquqi aktlarına, bu Nizamnaməyə, habelə onların nizamnamə və əsasnamələrinə,
Cəmiyyətin idarəetmə orqanlarının qərarlarına uyğun olaraq tənzimlənir.
11.2. Cəmiyyət filial və nümayəndəlikləri, habelə, tabeliyində olan hüquqi şəxs
statuslu qurumları ilə qarşılıqlı münasibətlərdə aşağıdakı səlahiyyətlərə malikdir:
11.2.1.
mövcud
normativ
hüquqi
aktlara
uyğun
olaraq,
filial
və
nümayəndəliklərinin, habelə, tabeliyində olan hüquqi şəxs statuslu qurumların
balansında olan əmlakın hüquqi və fiziki şəxslərə icarəyə verilməsi, balansında olan
əsas vəsaitlərin silinməsi barədə müəyyən edilmiş qaydada Nazirliyə təkliflər vermək;
11.2.2. filial və nümayəndəliklərinin, habelə, tabeliyində olan hüquqi şəxs statuslu
qurumların idarəetmə orqanlarını qanunvericiliyə uyğun olaraq formalaşdırmaq;
11.2.3. filial və nümayəndəliklərinin, habelə, tabeliyində olan hüquqi şəxs statuslu
qurumların təsərrüfat fəaliyyəti üzrə proqnoz göstəricilərinin formalaşmasına və
hesabatlara nəzarət etmək, bu məsələlərə aid tövsiyələr və təkliflər vermək, onların
müzakirəsində iştirak etmək;
11.2.4. filial və nümayəndəliklərinin, habelə, tabeliyində olan hüquqi şəxs statuslu
qurumların maliyyə-təsərrüfat fəaliyyətlərini təhlil və təftiş etmək;
11.2.5. filial və nümayəndəliklərinin, habelə, tabeliyində olan hüquqi şəxs statuslu
qurumların fəaliyyətlərinin yekunlarına baxılmasını təmin etmək;
11.2.6. qanunvericilikdə və bu Nizamnamədə nəzərdə tutulmuş digər
səlahiyyətləri həyata keçirmək.
12. Cəmiyyətin yenidən təşkili və ləğvi
Cəmiyyətin yenidən təşkili və ləğvi məsələlərinin həll edilməsi Azərbaycan
Respublikasının Prezidenti tərəfindən həyata keçirilir.
Qeyd. Bu Nizamnamədə dəyişikliklər Azərbaycan Respublikası Prezidentinin 2002-ci il 24 avqust tarixli 772
nömrəli Fərmanı ilə təsdiq edilmiş “İcra hakimiyyəti orqanlarının normativ hüquqi aktlarının hazırlanması və qəbul
edilməsi qaydası haqqında Əsasnamə”nin 2.6-1-ci bəndinə uyğun edilə bilər.
8
Azərbaycan Respublikası Nazirlər Kabinetinin
2010-cu il 23 dekabr tarixli 240 nömrəli qərarı ilə
TƏSDİQ EDİLMİŞDİR
"Azərkosmos" Açıq Səhmdar Cəmiyyətinin strukturu
"Azərkosmos" Açıq Səhmdar Cəmiyyətinin Aparatı.
İSTİFADƏ OLUNMUŞ MƏNBƏ SƏNƏDLƏRİNİN SİYAHISI
1.
6 sentyabr 2012-ci il tarixli 192 nömrəli Azərbaycan Respublikası Nazirlər Kabinetinin Qərarı
(“Azərbaycan” qəzeti, 8 sentyabr 2012-ci il, № 200, Azərbaycan Respublikasının Qanunvericilik
Toplusu, 2012-ci il, № 09, maddə 918)
2.
13 iyun 2014-cü il tarixli 194 nömrəli
Azərbaycan Respublikası Nazirlər Kabinetinin Qərarı
(“Azərbaycan” qəzeti, 22 iyun 2014-cü il, № 131, Azərbaycan Respublikasının Qanunvericilik
Toplusu, 2012-ci il, № 09, maddə 747)
3.
9 sentyabr 2014-cü il tarixli 301 nömrəli
Azərbaycan Respublikası Nazirlər Kabinetinin Qərarı
(“Azərbaycan” qəzeti, 20 sentyabr 2014-cü il, № 205; Azərbaycan Respublikasının Qanunvericilik
Toplusu, 2014-cü il, № 09, maddə 1125)
4.
16 fevral 2016-cı il tarixli 54 nömrəli
Azərbaycan Respublikası Nazirlər Kabinetinin Qərarı
(“Azərbaycan” qəzeti, 6 mart 2016-cı il, № 52)
QƏRARA EDİLMİŞ DƏYİŞİKLİK VƏ ƏLAVƏLƏRİN SİYAHISI
1
13 iyun 2014-cü il tarixli 194 nömrəli
Azərbaycan Respublikası Nazirlər Kabinetinin Qərarı
(“Azərbaycan” qəzeti, 22 iyun 2014-cü il, № 131, Azərbaycan Respublikasının Qanunvericilik
Toplusu, 2012-ci il, № 09, maddə 747) ilə “Azərkosmos” Açıq Səhmdar Cəmiyyətinin Nizamnaməsi”nin
1.4-cü bəndində “İnformasiya Texnologiyaları” sözləri “Yüksək Texnologiyalar” sözləri ilə, 8.2-ci
bəndində “informasiya texnologiyaları” sözləri “yüksək texnologiyalar” sözləri ilə əvəz edilmişdir.
2
9 sentyabr 2014-cü il tarixli 301 nömrəli
Azərbaycan Respublikası Nazirlər Kabinetinin Qərarı
(“Azərbaycan” qəzeti, 20 sentyabr 2014-cü il, № 205; Azərbaycan Respublikasının Qanunvericilik
Toplusu, 2014-cü il, № 09, maddə 1125) ilə “Azərkosmos” Açıq Səhmdar Cəmiyyətinin
Nizamnaməsi”nin 4.4-cü bəndində “40000000 (qırx milyon)” və “2000000 (iki milyon)” sözləri müvafiq
olaraq “63610600 (altmış üç milyon altı yüz on min altı yüz )” və “3180530 (üç milyon yüz səksən min
beş yüz otuz)” sözləri ilə əvəz edilmişdir.
3
16 fevral 2016-cı il tarixli 54 nömrəli
Azərbaycan Respublikası Nazirlər Kabinetinin Qərarı
(“Azərbaycan” qəzeti, 6 mart 2016-cı il, № 52) ilə “Azərkosmos” Açıq Səhmdar Cəmiyyətinin
Nizamnaməsi”nin 5-ci hissənin adı yeni redaksiyada verilmişdir.
əvvəlki redaksiyada deyilirdi:
Cəmiyyətdə mühasibat uçotu və maliyyə hesabatının aparılması
4
6 sentyabr 2012-ci il tarixli 192 nömrəli Azərbaycan Respublikası Nazirlər Kabinetinin Qərarı
(“Azərbaycan” qəzeti, 8 sentyabr 2012-ci il, № 200, Azərbaycan Respublikasının Qanunvericilik
Toplusu, 2012-ci il, № 09, maddə 918) ilə təsdiq edilmiş “Azərkosmos” Açıq Səhmdar Cəmiyyətinin
Nizamnaməsi”nin 5.5-ci bəndindən “onun sorğusu əsasında” sözləri çıxarılmışdır.
5
16 fevral 2016-cı il tarixli 54 nömrəli
Azərbaycan Respublikası Nazirlər Kabinetinin Qərarı
(“Azərbaycan” qəzeti, 6 mart 2016-cı il, № 52) ilə “Azərkosmos” Açıq Səhmdar Cəmiyyətinin
Nizamnaməsi”nə yeni məzmunda 5.5-1-ci bənd əlavə edilmişdir.
6
16 fevral 2016-cı il tarixli 54 nömrəli
Azərbaycan Respublikası Nazirlər Kabinetinin Qərarı
(“Azərbaycan” qəzeti, 6 mart 2016-cı il, № 52) ilə “Azərkosmos” Açıq Səhmdar Cəmiyyətinin
Nizamnaməsi”nin 7.5.9-cu yarımbəndin sonunda nöqtə işarəsi nöqtəli vergül işarəsi ilə əvəz edilmişdir
və yeni məzmunda 7.5.10-cu və 7.5.11-ci yarımbəndlər əlavə edilmişdir.
7
16 fevral 2016-cı il tarixli 54 nömrəli
Azərbaycan Respublikası Nazirlər Kabinetinin Qərarı
(“Azərbaycan” qəzeti, 6 mart 2016-cı il, № 52) ilə “Azərkosmos” Açıq Səhmdar Cəmiyyətinin
Nizamnaməsi”nin 8.1.9-cu yarımbəndə “müqavilələr” sözündən əvvəl “bu Nizamnamənin 7.5.10-cu və
7.5.11-ci yarımbəndlərinin tələbləri nəzərə alınmaqla” sözləri əlavə edilmişdir.
8
16 fevral 2016-cı il tarixli 54 nömrəli
Azərbaycan Respublikası Nazirlər Kabinetinin Qərarı
(“Azərbaycan” qəzeti, 6 mart 2016-cı il, № 52) ilə “Azərkosmos” Açıq Səhmdar Cəmiyyətinin
Nizamnaməsi”nin 12-ci hissənin mətnindən sonra yeni məzmunda “Qeyd” əlavə edilmişdir.
Dostları ilə paylaş: |