Əsmərin Leylaya olan sevgisi sənət yanğısından gələn istək idi. Telekanalların
ciy-ciy səsli
boşboğaz aparıcılarının hay-küylü açıqlamalarından xatirimdə qalanları Əsmərlə bölüşüb
Leylanın çıxardığı hoqqalara başımı yelləyəndə, o, Leylanın səsindəki yanğının təkrarsızlığından
ağız dolusu danışır, istedadının əvəzedilməzliyini dönə-dönə boğazıma təpmək istəyirdi. Keçmə
Əsmərin bu hikkəsindən! Əsəblərimi korlayan bu səfeh vərdişi ona tərgitdirmək niyyətim bir işə
yaramırdı. Mənim, “Başını eşq havasından itirən yeniyetməliyimin nəğmələr qoşan əfsanəsi
olmusunuz” deməyim nə qədər bayağı və ucuz etiraf olsa da, əslində, ürəyimin dərinliyində kök
salan qərib nostaljili səmimiyyət idi. Zəhlənizi tökmürəmsə, məktəb illərimin utancaq, uzun
hörüklü və əllərini ağ göyərçin qanadına bənzətdiyim sevgilimdən danışım, aranızda başı pul
qazanmağa qarışan, ürəyi sevgiyə yadırğayan varsa, içi saflaşsın, ruhu aydınlığa çıxsın. Mən
özüm də bir siqaret yandırıb xatırlayıram ki, Leylanın o vaxtlar əl-əl gəzən kasetini yastığımın
altında gizlədib uzun hörüklü Humayı yuxuma çağırardım. Eh, Humay, Humay!!! Həkim olmaq
arzusuyla sinfimizdə fizikanı, biologiyanı hamıdan yaxşı bilən, sevgi romanları oxumaqdan
başqa bir işə yaramayan havalı gözaltısına görə riyaziyyat dərslərində yanağı
allanan istəkli
qız!!! Təzə-təzə eşqə düşəndə saçımı suyla darayıb gödəkçəmin yaxasını qaldırardım, sinifə
girəndə anamın ütüləyib cibimə qoyduğu yaylıqla ayaqqabımı parıldadardım ki, səliqəli olduğum
xoşuna gəlsin. Mən nə edim ki, bütün dərslərdə dil-dil ötən bu mələk təbiətli qızın üzünə bəxti
gülmədi. Tündməcaz atası elə həmin yay - imtahanlardan on beşcə gün sonra onun tələbəlik
arzusunu bakirəliyinə qatıb bacısı oğlunun yatağına saldı. O gün mənim boğazımdan bir tikə
çörək keçməmişdi. Leylanın kasetini həyətimizin beton döşəməsinə çırpıb çilik-çilik etmək
istəyimi birtəhər boğub, başı pəncəsi üstə lal-dinməz mənə baxan itimizi yanıma salaraq, evdən
qaçmışdım. Biçilmiş zəmi yerlərində axşamacan havalı-havalı dolaşıb ağrımı itlə bölüşmüşdüm:
it ulamışdı, mən tələbə olmağımın sevincinə tüpürüb, tapdanan qüruruma, alçalan kişiliyimə
qahmar çıxa bilməyib, yumruğum gözümdə xısın-xısın ağlamışdım.
Amma nə gözəl ki,
Humayın sonrakı taleyi yaxşı gəldi: Həyət-baca becərdi, ərini sevib mənim adımı, xatirələrimi
boyat çörək kimi toyuq-cücəyə yedirtdi. Əkiz uşaq doğdu, gəlin gəldiyi evdən xeyli aralıda bir
daxma qaralayıb içinə girdilər. Hərdən qulağıma çatırdı ki, deyingən bibisinin tənələrindən uzaq
olduğuna yaman sevinirmiş. İndi mənim yaralarım sağalıb. Amma Humayın uzun hörüklərindən
sarı yaman nigaranam. Əvvəllər, Əsmərə saçını hördürməyə çalışsam da, elə bil hansısa qızı
mənə xatırladacağından duyuq düşüb (onunla Humaydan kəlmə kəsməmişdim) eyham vurmuşdu
ki,
istəmirəm, əl çək!
“Sənin mahnıların, mənim uşaqlıq sevgimin himniydi” - deyə Leylanın “Toyota”sının yanında
var-gəl edib düşünürdüm. Nə edim, hardan başlayım? Siqaret alışdırıb içimi zəhərlədim. Bu işdə
mənə ancaq tale yar ola bilərdi. Qarşımda qəfil bir yol açılar və qeybdən gələn səs qulağıma
pıçıldayar ki, bir az ağıllı və diribaş olsan, Leylanı ölümün cəngindən qurtarmaq nədir, onun
bütün həyatını bitdə-bitdə öyrənərsən.
Özünü öldürmək fikrindən daşınmasaydı, məsuliyyətdən yaxa qurtara bilməyəcəkdim. Cinayət
işi, müstəntiqlə günaşırı çənə-boğaz olmaq, polis xofu... Düzdür, onun intihar etmək niyyətini bir
mən bilirdim, bir ürəyim. Amma bu nəyi dəyişirdi? Ortada həm də vicdan məsələsi vardı (Nə
qədər sadəlövhəm). Onun ardınca düşüb blokun sakit bir yerində qolundan tutmalıydım ki,
Leyla, mən İsmayıl dayı deyiləm, cibindəki silahdan xəbərim var, hardasa konyakla
zəhərlənmisən, ağlın başından çıxıb, özünə yazığın gəlsin! Onsuz da canı xofluydu. Üz bozardıb
hədə-qorxu gəlsəydim, əl-ayağımdan öpərdi. Sonra hər şey qaydasınca davam edəcəkdi.
Bir az
ağıllı tərpənib yumşaq, kövrək sözlərlə ürəyinə yol tapmalıydım. Şəkil söhbətini təzələyib boyun
olardım ki, cəhənnəmin uzaq küncündə olsa da tapıb gətirəcəm, nigaran qalma! (Cəhənnəmdə
eşələnmək lazım deyildi, zənnim məni aldatmırsa, şəkillər Əsmərin kompüterinin ən hörmətli
qovluğuna saxlanılırdı). Hələ üstündə hüznlü yeniyetməlik sevgimin yadigarı olan kasetini də
ona hədiyyə edə bilərdim. Şəxsi əşyalarım, sənədlərim olan diplomatın içində illərdən bəri
qoruyurdum.
Əsmərə zəng vurdum. Bəxtimin üzümə gülmədiyi vaxtda ağlım kəsmirdi ki, ondan savayı kimsə
dadıma yetsin.
- Leylanın şəkilləri lazımdır, - Soyuq başla, həyəcansız danışırdım ki, artıq sualları vaxt almasın.
- Onları kompüterində saxlayırsan?
-Nəsə olub? Birtəhərsən? - Alınmadı. Bu adamın əlindən cibimdə qarışqa gizlədə bilmirdim.
Hərdən zarafatla deyirdim ki, sənin hissiyyatın mənim başımdan dəqiq işləyir.
-Yorğunam, çox işləmişəm. Keçən həftədən diktafonda iki müsahibəm qalıb, onları köçürürəm.
- Şəkillər nəyinə lazımdır?
Əsmər, bu sənin nəyinə gərəkdir? Adam bu qədər uzunçu olmaz axı... !!!
- Redaksiyada lazımdı. Özünü tapa bilmirik. Yadıma düşdü ki, o vaxt sənə vermişdim. - Səsimi
qaldırdım.
- Evdə sıxılıram. Sən hardasan? - Telefondan Sezen Aksunun “Beni unutma” mahnısı səslənirdi.
Deməli o, mənim üçün darıxır və doğum günündə hədiyyə etdiyim sevimli ayı balasını
qucaqlayıb, evliliyimiz haqqında şirin xəyallara dalmışdı.
- İşim çoxdur, sabah mütləq görüşərik.
- Darıxıram. - Aciz-aciz dilləndi. Onun səsi anası üçün darıxan qızcığazın
səsi qədər şirin, təmiz
idi - İşlərini sabaha saxla, yanımda olmağını istəyirəm.
Bildiyim ən dəyərli sözlərlə oxşadım onu. Dilimdən çıxan hər kəlmənin təsirinə inanırdım, bu
bacarığa Humayı sevdiyim vaxtlarda oxuduğum sevgi romanlarından yiyələnmişdim. Dedim, nə
yaxşı həyatımda sən varsan, mənə inanırsan, güvənirsən; sənsiz günüm-gündüzüm boz və
mənasız olardı. Bilirəm, indiyədək mənim üçün hər əzaba qatlaşmısan, səbrini basıb dözmüsən,
gözünün içinə baxa-baxa yalan danışanda boğazında düyünlənən qəhəri udub, dərdini ürəyinə
axıtmısan. Mən səni dünyanın ən xoşbəxt qadını edəcəm, darıxma, Allah səbr edənləri sevir.
Bəşəriyyətin ən gözəl şirmayı dilli fortepianosu bizim evdə səslənəcək, dünyanın ən güclü
kişisinin qolları arasında uyuyanda ağlın başından çıxacaq. Birnəfəsə dediyim
sözlər gec olsa da,
təsirsiz qalmadı. Onun çarəsiz mızıltılarını uzun-uzadı susmaq və sözlərimin həqiqət olduğunu
dönə-dönə təsdiq edən “inanıram”lar əvəz edirdi. Mən də Əsmərdən ürəyimə güvəndiyim kimi
arxayın idim.
- Müsahibə üçün Leyla ilə görüşsən, məni də özünlə apar.
-Apararam...
-Redaksiyadan göndərmək istəyirlər?!
-İstəyirlər...
-Necə tapacaqsız?
-Bilmirəm, bu çox çətindir. Telefonlarını söndürüb, ən yaxın adamları da xəbər tuta bilmirlər.
-Sizin qonşuluğunuzdan çıxıb?
Offf, Əsmər, Əsmər, məcbur edirsən, səni acılayam. Bu çərənçiliyi nə vaxt öyrəndin?!
-Çoxdandır gəlmir, xəbərim yoxdur.
-İstəyirsən, mən də maraqlanım.
-Lazım deyil! - Dözməyib, səsim çatan qədər üstünə çımxırdım - Şəkilləri poçtuma göndər!
Binanın tinindəki internet klubun dəmir pilləni tappıldada-tappıldada zirzəmiyə düşdüm.
“Youtube”da türk teleserialına baxan güdəboy administrator qaşlarını qaldırıb acıqlı-acıqlı məni
süzməzmi? Yəqin, darısqal zirzəmini başına götürən ayaq səslərimdən diksinmişdi; elə bilib,
pillələri qəsdən döyəcləyirəm.
Əsmər vaxt itirmədən şəkilləri yollamışdı. Şəkilləri yaddaş kartına köçürüb, yolun o üzündəki
“Kodak”a tez çatmaq niyyətiylə, pillələri iki-iki qalxdım. Növbə olsaydı
şəkilçi oğlana göz
basıb, artıq pul boyun olmaqla işimi aşıra bilərdim. Siqaret yandırıb boyun-boğazımı soyuqdan
qorumaq üçün gödəkcəmin yaxasını qaldırdım. Yolu keçib “Kodak”a tələsmək əvəzinə,
bilmədim ayaqlarım məni Leylanın maşınının yanına haçan gətirdi. Nigaran-nigaran yuxarı
boylandım.
Leylanın tör-töküntülü balkonundan gözümü birtəhər çəkib yolu keçmək istəyəndə tale üzümə
güldü, bəxtimə sevindi. Onun artırmada görünər-görünməz uzun-uzadı mənə baxıb
yaxınlaşmağımı işarə etməyi o deməkdi ki, Allah məni sıxıntı və intizarla sınağa çəksə də, ağrı-
acı içində vurnuxmağıma razı olmaz. Belə sevinmək həmişə nəsibim olmur: ürəyim sinəmi
parçalayıb ayağımın altına düşə bilərdi; bacarsaydım qanad açıb uçardım, ya da uşaq kimi qol
götürüb əldən düşənəcən oynamaq istəyirdim. Ayaqlarım özümdən qabaq Leylanın pəncərəsinə
yaxınlaşdı. Yalnız indi ağlıma batdı ki, qız “Toyota”nı artırmanın tuşunda saxlayıb. Niyə?!
Ürəyimə heç nə gəlmədi, buna görə baş sındırmaq halında deyildim. Qarğa ağzı aldadan tülkü
kimi altdan yuxarı boylananda, orda-burda beş-altı pəncərə cırıltıyla açıldı, xosunlaşan adamların
başı qaraldı. Leyla hürkdümü, yoxsa nədənsə
bilmirəm, tələsik özünü evə atdı. “Ürəyi xofludur,