Bolalar sporti asoslari

Yosh sportchilarning axloqiy tarbiyasining asosiy uslublari quyidagilardir:

1) axloqiy ongni shakllantirish uslublari (ishontirish uslublari);

2) ijtimoiy xulqni shakllantirish uslublari;

3) ijobiy misolni qo`llash;

4) ijobiy harakatlarni rag’batlantirish;

5) salbiy harakatlarni oldini olish va muhokama qilish (jazo).

Yosh sportchilarning axloqiy tarbiyasida ongli intizomni, o`rtoqchilik, jamoaviylik, vatanparvarlik, mehnatsevarlik va boshqa ijobiy hislatlarni tarbiyalash uchun katta imkoniyatlarni beruvchi sport faoliyati bevosita muhim rolni o`ynaydi. Bolalar va o`smirlar yosh yigit va qizlarni axloqiy tarbiyasida murabbiyni rag’batlantiruvchi va yo`naltiruvchi roli ostida sport jamoa ayniqsa, muhim ahamiyatga ega.

Pedagogning yuqori nufuzi va hurmati tarbiyaviy ishda ishontirish uslubi kabi axloqiy ongni shakllantirishning samarali uslubini muvaffaqiyatli qo`llash imkoniyatini beradi. O`z o`quvchilarining hurmatini qozongan murabbiy, o`zining barcha ko`rsatmalarini osonlikcha bajarilishiga erishadi.

Yosh sportchilarning ijtimoiy xulqini shakllantirishda sport ijtimoiy tajribaga ega bo`lishda muhim rolni o`ynaydi.

Sport jamoasi maktab o`quvchilarni ma’lum ijtimoiy yuklamaga ega bo`lishiga majburlaydi. Yosh sportchini jamoadagi o`rni, uning sport natijalari, xulqi murabbiy va tengdoshlari tomonidan baholanadi. Maktab o`quvchilarining yoshi va manfaatlariga ko`ra, kichik guruhlarga birlashtirishga bo`lgan intilishi mavjud. O`spirinlarning bunday guruhlarga birlashishining istiqbollik shakllaridan biri bu sport mashg’ulotlari edi. Bolalar va o`smirlarning sport jamoasi kichik guruhlarni shakli sifatida o`smirni o`ziga jalb etadi. Shu sababli yosh sportchilar to`garak a’zosi, jamoa yo`riqchi sifatida jamoada yosh sportchilar tomonidan bajarilayotgan ijtimoiy ish katta ahamiyatga ega. Yosh sportchilarning ijtimoiy tashabbusini rag’batlantirish, ularda jamoa, guruh manfaatlari o`zlarining manfaatlari ekanligiga va ularga rioya qilish lozimligini anglashni tarbiyalashi lozim.

Tarbiyaviy ishda ijobiy misolni qo`llash ham muhim ahamiyatga ega. Ijobiy misol sifatida avvalambor, murabbiy-pedagogning faoliyati bo`lishi lozim, chunki murabbiy bu yosh sportchilarni tarbiyalashdagi markaziy figura bo`lib, o`quvchilarga o`zining shaxsiy harakatlari bilan xulqi, tashqi qiyofasi bilan ulkan tarbiyaviy ta’sirni o`tkazadi.

Aynan shu sababli zamonaviy pedagog avvalambor, o`ziga, o`zining ish va hayotdagi xulqiga talabchang bo`lishi lozim. Sport maktabi jamoasi oldida turgan xilma-xil va murakkab vazifalarni muvaffaqiyatli bajarish uchun u o`zining pedagogika sohasidagi, sport mashg’ulotlari nazariya va uslubiyati sohasidagi va boshqa fanlardagi o`z bilimlarini tizimli tarzda chuqurlashtirishi va kengaytirishi lozim.

Bilimlarning yuqori darajasi va pedagogik mahorat sohibi bo`lish murabbiyga yosh sportchilarni muvaffaqiyatli tarbiyalash, sport mashg’ulotlarini samarali boshqarish, zamonaviy sport texnikasiga o`qitish, o`qitish uslubiyatidagi barcha ilg’or g’oyalardan xabardor bo`lish, ilmiy tadqiqotlarning yangi natijalarini amaliyotga operativ joriy etish va bularning natijasida barkamol rivojlangan yosh sportchilarni yaxshiroq tayyorlash imkoniyatini beradi.

Tarbiyaviy ishda yosh sportchining ijobiy harakatlarini rag’batlantirish nihoyatda muhimdir. Rag’batlantirish shakllari turli va xilma-xildir: qo`llab-quvvatlash va maqtash, shaxsiy kundalikda xulq-atvorda yaxshi bahoni yozish, rasmiy tarzda minnatdorchilik bildirish, mukofotlash. Rag’batlantirishning manbasi sportchini o`z vaqtida qo`llab-quvvatlash, dastak bo`lish, uni o`z kuchiga ishonchini va qilayotgan xatti-harakatlari to`g’riligiga ishonchini mustahkamlashdir.

Tarbiyalashning samarali uslubi shug’ullanayotganlarning salbiy harakatlarini oldini olish va muhokama qilishdir (jazolash). Axloqsiz harakat uchun jazoni qolgan barcha pedagogik choralar etarli darajada ta’sirli bo`lmagandagina qo`llash lozim. Jazo so`z bilan jazolash, mashg’ulotdan chiqarib yuborish, sportchini bir yoki bir necha mashg’ulotlarga kelish huquqidan mahrum qilish, musobaqalarda ishtirok etish huquqidan mahrum qilish, sport sektsiyasi tarkibidan chiqarib tashlash kabilar bilan qo`llaniladi. Jazo adolatli va o`z vaqtida berilishi lozim. Jazo darajasi sportchinining xatti-harakatiga muvofiq bo`lishi lozim.

Axloqiy tarbiya uslublarining to`g’ri tanlanishi, ularning o`z vaqtida tizimli va kompleks tarzda qo`llanilishi tarbiyaviy ishning muvaffaqiyatini katta darajada belgilab beradi.

Jismoniy tarbiya bo`yicha ishning xilma-xil shakllarining mazmuni va tashkil qilinish shart-sharoitlaridan kelib chiqqan holda, o`quvchilarni madaniy axloqning me’yor va qoidalari haqidagi dastlabki sodda tasavvurlaridan ularni sport mashg’ulotlari va kundalik hayotda to`liq, chuqur anglanishi va ularga rioya qilishga olib borish lozim.

Ba’zi murabbiylar ish faoliyati amaliyotida axloqiy tarbiyaning etarli darajada baholanmaslik holatlari mavjudligini qayd etish joiz. Bu esa o`quv-mashg’ulot jarayoniga bir tomonlama yondashuvda o`z ifodasini topadi, bunda murabbiy asosiy e’tiborni yosh sportchilar bilan tarbiyaviy ishga zarar yetkazgan holda, texnika va sport mashg’ulotlari masalalariga ajratadilar.

Hozirgi paytda sport mashg’ulotlari jarayonida intellektual tarbiya ham tobora katta ahamiyatga ega bo`lmoqda. Bu intellektual tarbiyaning asosiy vazifalari quyidagilardir:

1. 
   o`quvchilar tomonidan sport mashg’uloti nazariyasi va uslubiyatida, gigiena va boshqa fanlar sohasida maxsus bilimlarga ega bo`lish;
   
2. 
   mashg’ulot va musobaqalarda chiqishlarni ob’ekti tarzda tahlil qilish mahoratini tarbiyalash;
   
3. 
   sport faoliyatida ijodiy yondashuvni, idrok etish faolligini rivolantirish.
   

Yosh sportchilarning mashg’ulotlarida o`quvchilarni maxsus bilimlar, nazariy tayyorgarlik bilan qurollantirish tobora katta ahamiyatga ega. Bularning vazifasi sport nazariyasi va uslubiyati sohasida bilimlarga ega bo`lish, sportchi gigienasi masalalarini o`rganish, shifokor nazorati va o`zini-o`zi nazorat qilish muammolarini tushunishdir. Nazariy tayyorgarlik o`z ichiga mashg’ulot va musobaqalar jarayonida murabbiylarning ma’ruza, suhbat va tushuntirishlari hamda sportchi tomonidan maxsus adabiyotni o`rganishlarni kiritadi.

O’quvchilarni aqliy tarbiyalash jarayoni murabbiyning kundalik nazorati ostida bo`lishi lozim. Bu maqsadda u maktab o`quvchilari, sinf rahbarlari bilan uzviy aloqani qo`llab-quvvatlaydi, yosh sportchilarning joriy baholarini nazorat qiladi. Jamoani tarbiyaviy ta’sirini doimiy tarzda his etgan ota-onalar o`z farzandlarining o`qishdagi faoliyati pasayganligi, intizomiy qoida buzarliklari haqida murabbiyga xabar beradi. Murabbiy va sport jamoasi yosh sportchilar xarakterining shakllanishi, ular tomonidan bo`lg’usi kasbni tanlashiga katta ta’sirni o`tkazadilar.

Afsuski, sport va umumta’lim maktabi faoliyatida aloqa yo`qlik holatlari ham mavjud. Bu esa tarbiyaviy ishlarni kompleks hal etilishi tizimida uzilishga olib keladi.

Axloqiy e’tiqodlarni xulq-atvorning odatiy kundalik me’yorlariga aylantirish, ko’p jihatdan yosh sportchi xarakterining irodali tomonini tarbiyalashiga ko’maklashadi. Sport mashg’ulotlari jarayonida maqsadga yo’naltirilganlik, qat’iyatlilik, mustaqillik va tashabbuskorlik, jasorat, chidamlilik va o’z-o’zini boshqara olish kabi irodali hislatlari hamda hamma tomonlama rivojlanishi nazarda tutilgan.

Sportchining irodasi ob’ekti va sub’ektiv xarakterdagi qiyinchiliklarni ongli tarzda bartaraf etish jarayonida rivojlanadi. Shu sababli irodali hislatlarni tarbiyalashning asosiy uslubi mashg’ulot jarayoni hamda musobaqalarda ishtirok etish jarayonida hal etiladigan vazifalarni asta-sekin murakkablashtirish uslubidir. Tizimli mashg’ulot va musobaqalardagi muntazam chiqishlar ham irodali hislatlarni tarbiyalashning samarali vositalaridir, chunki yosh sportchi o’z kuchlarini eng katta hajmda jalb qilgan holda shart-sharoitlarda o`zining irodali hislatlarini namoyon qilish zaruriyatiga duch keladi.

Maqsadga yo`naltirilganlik eng yaqin va istiqboldagi maqsad va vazifalarni ularga erishish vosita va uslublarni aniq belgilash qobiliyatida o`z ifodasini topadi. O`z oldiga qo`yilgan maqsad va vazifalarni amalga oshirish uchun murabbiy va yosh sportchi ularni sport mashg’ulotlarining istiqbollik, joriy, oylik va haftalik rejalarida rejalashtiradilar. Mazkur rejalarga erishish uchun erishilgan natijalarni baholash, murabbiy nazorati va o`zini-o`zi nazorat qilish ham katta ahamiyatga ega.

Qat’iyatlik va tirishqoqlik qo`yilgan maqsadga erishishga bo`lgan qat’iy intilishni, bu maqsaga erishish yo`lida turli to`siqlarni faol va matonat bilan bartaraf etishni anglatadi. Bu irodali hislatlar mashg’ulot va musobaqa vazifalarini majburiy bajarilishi va qat’iy rejimga rioya qilish bilan uzviy bog’liqdir. Sportchi barcha sport mashg’ulotlariga kelishi, mehnatsevar va intizomli bo`lishga majbur.

Sportchining tirishqoqligi va qat’iyatliligining o`ziga xos namunasi bu “chidash mahorati”dir, ya’ni haddan ziyod toliqishga qarshi kurashish va u bilan bog’liq bo`lgan keskin yuklamalar paytidagi salbiy hissiyotlar bilan kurashish qobiliyatidir. Bunday qobiliyat quyidagi metodik uslublar bilan tarbiyalanadi:

- toliqish bo’lgani sari say’-harakatlarni sun’iy o`stirish;

- guruhdagi mashg’ulotlar, bunda sportchi kuchliroq va tegdoshlaridan ortda qolmaslikka harakat qilgan holda, katta iroda say’-harakatlarini namoyon qilishga majbur;

- musobaqa uslubi;

- o`quv-mashg’ulot mashqlariga hissiyot omillarini kiritish.

Mustaqillik va tashabbuskorlik mustaqil tarzda murabbiysiz o`z holatini, musobaqadagi vaziyatni baholash, to`g’ri taktik qarorni qabul qilish, mustaqil tarzda bajarilgan ishni tahlil qilish mahoratini nazarda tutadi. Bu hislatlarni tarbiyalash yosh sportchilarni sport mashg’ulot rejalarini mustaqil tarzda tuzish, o`zini-o`zi nazorat qilish uslublarini qo`llashga bo`lgan harakatlardan boshlanadi. Mustaqillik va tashabbuskorlik musobaqa shart-sharoitlarida ayniqsa, qadrlidir.