4
¹ 55 29 sentyabr 2013-íÿ ñîð
Òîëûøîí Ñÿäî
Sıftənə şeer (bə tolışi, ya bə tırki) kəynə nıvıştə? Əmə-
son ya ıştı ıştəni mınsibət çe cur be bəy?
Az çominnə sinifədə handeədə bə həvəs oməym. Kırtə
hikoyon ənıvıştim. Bə tırki. Şəşminnə sinifiku şeiron
nıvıştem bino kardəme. 1977-nə sorədə, az haftminnə
sinifədə handeədə mınıjon çı miyonə məktəbi “Komso-
mol projektoru” divoə rujnomə redaktor vıjnijone. Vəyo
ıştə kali şeiron ədəym. Çəvonədə:
Əliyev Eldar,
Məktəb gələr ona dar.
Dərsdən yayınmağa o,
Çoxdan olubdur vadar.
--misroon çımı yodədə mandə.
Ta tosbin 1981-nə sori nıvıştəyonım ısə mandəni.
Həminnə sorədə bə əsqər şim, oməbəpeş bənem çımı şeirə
dəftəron qin kardə bə. Həlbəttə, əçəvon kali qılə de ısəti
nəzəri hiç şeir hisob karde nəbiy.
Sərboz bə devrədən şeir ənıvıştim. İminə tolışə şeirımən
1982-nə sorədə əsqər beədə bo əğılonro nıvıştəme. Əy
bəşmə nəzə bırosnom:
ZIMISTON
Va voyedə, şəxtə veye,
Yaman sarde, dastmon keye.
Lınqon siydə çıkmonədə *
Quşnə kılo çəmə sədə.
Kılo quşon okardəme,
Dastəquəve tankardəme.
Tanım ğalin kardə, həni
Tarsdənim çı zımıstoni.
-Ha İsmayil, Vasif, Qulşən,
Haydi rərə bə so eşən!
Ki roziye, ki səhmone?
Hənəkkəmon vabuccone.
*-Çıkmə-lınqi tosbin zonıği bə vırə.
Çıkmonə--çəkmə.
Bı devrədə çımı nıvıştə şeiron əncəx çımı nezə odəmon
handedəbin. Bə dərc doydənıbim.
Iştı sıftənə mətbu şeer (bə tolışi ya bə tırki) komonin?
Bahandon çe cur mınosibət nişo doşone bəy? Bətı çe cur
təsirin bin?
Çımı “HA REÇİN” nomədə bə şeir iminnə kərə
Lankonədə beşə “Leninçi” rujnomədə, 1990-nə sorədə bə
əhandon odoştə bə. Həlbəttə, ım bomı ve xoş be. Həmən
boəçəyro ki, çımı iminnə kərə dərc bə şeir moəm zıvonədə
nıvıştə şeir be.
Tədbiron, məclison, mısobiqonədə çe cur şirkət
əkəyş?
1993-nə sorədə “Tolışi ərməğon” nomədə bə al-
manaxədə (Tərtibəkə, f.e. namızəd Novruzəli Məmmədov)
şeironım dərc bə. 1994-nə sorədə “Tolışi dınya” (Tərt-
ibəkon: Etibar Əhədov, Ağəddin Babayev) nomədə bə folk-
lorə dastədə çımı qırdə kardə xalqi ədəbiyyotə nımunon,
iyən çımı muəllifinə nəğıl, şeiron bənəy folklor nıminon
doə bə. 1998-nə sorədə, çımı həmunnə, nəğıli formadə
nıvıştəy (Dolçə sırr) de ABŞ-i Azərboycanədə bə səforəti,
OSİ—Ojə Cəmiyyətə İnstituti—Azərboycan, NRC-Norveç
Pehuyon (Qaçqınlar) Şura, USAR-Azərboycan-USAİD-
i təşəbbusi “Tutu” nəşriyyati tərəfo bənəy kitobçə dərc bə,
de bə tırki tərcumə bə ivrə (tərcumə bəmı məxsus ni). Əncəx
təəssuf ki, ijənən muəllifi—çımı nom vəyo nışon doə bəni.
Tolışə şeironım Tolışi məholi ibtidoi məktəbonədə tə-
dris bə dərsə kitobonədə doə bə, bə tolışə hırdənon omutə
bedə. Tolışə muğənniyon (İsrail Məmmədov, İsmayıl
Səfərov i.c.) çımı şeiron vəyonədə, co mədəni ədəbiyə mə-
clisonədə bənəy mahne—muğami handedən. Ve səğ
bıbun!
Tolışi rostbemonə hərəkotədə ıştə vırə çe cur vind-
edəş? Bı lıvemonədə ıştı fəoliyət tıni qane kardedə?
Az XX əsri həştominnə soronku bo tolışi xalqi maar-
ifi, rostbemoniro bino bə həmə məclis, cəmiyyət i.c. təd-
bironədəm şirkət kardəme. 1987-nə sorədə az de ıştə i qrup
həmroon Likədə “Toponomik mərkəz” nomədə mərən-
qomon soxte. Mərənqo məqsəd çı Liki, həmən umumən
çı Tolışi məholi toponimon tədqiq be. Bi roədə xəyli koon
kardımone. 1990-nə sori sıftəku Lankoni Şağlase diyədə
ofəyə bə “Avesta” cəmiyyəti koonədə fəol şirkətım kardə.
Çı cəmiyyəti idorə heyəti uzv bəm. “Ruşnə” tolışə şairon
ədəbiyə məclisi uzv bəm. Peşı AXBP binobeku MK, peşı
partiya İH uzv bəm. Tolışə Mədəniyyət Mərkəzi, Tolışi
Siprişon Şura uzvim. Mılxəs...
Tolışi rostbemoni roədə azən ıştə zuy vışqə koonım
kardə, ijən kardedəm. Az jıqo zınedəm ki, bı koədə çımınən
mıəyyən xidmət bə, heste. Bı barədə çımı qəp jəy çok
benibəşe. Bımi şoyd bə xonəxon bı həxədə qəp jəy,
ğıymət doe tikən sərost bəbe. Mande, mıni qane karde...
Az hiç vaxt ıştə kardə koon, ıştə bo karde potensialım bəysə
kamım zınə karde. Bomi, şərait, imkonən bəpe bıbu... 10-
15 sor çımı bə nav 2 qılə, bə tolışi etnoqrafiya dair mono-
qrafiyam nıvıştə, oroxniyəme, dərc karde zınedənim.
Çımı bımi maddi imkonım ni. Sponsiri isə çıkono pəydo
bıkəm? Elmi ko mudafiə kardənin bim. Bo dissertant bero
AR Arxeoloqiya İnstitutədən, LDU-ədən Devlətə odəcıjon
piyəy. De mıəllimə maaşi ə puli çoknə ədəym? Elmiyə
mıdafiən mande bə kəno. Çımıku bəşıkrə nıbə səbəbon-
ro bıbuən ıştə kardəninbə koonku hələ ki, tam rozi
nim.(kursiv-A.B.)
Liki tolışə şairon arəo ıştı movqe çe cure? Bə tolışi
poeziyə çe tojətion vardə?
Qəvə ədəbiyyoti bə nəzə nırosnomon, Likədə iminnə
kərə az bə tolışi poeziya nımunonım ofayə, bə xalqi nəzəm
rosniyə. Peşı Şamirzə Tolışəxun, Nəcəf Məmmədov,
Nəzir Şaban i.c. ənıvışton de tolışi ədəbiyyati məşğul bən.
Isə de fəxri vote bəznem ki, tolışi ədəbiyyati ofaye roədə
ıştə dast-xəttıj bə Baladdin Veşoən çımı perosnə şaironədəy.
Bə tırki ve səviyyəynə poeziya nımunon bə məydon vardə
istedadinə şair Balayar Sadiqən de çımı təsiri bə tolışi çokə
şeirıj nıvıştə.
Tolışi ədəbiyyoti tarıxədə iminnə təcnis, cığəynə təc-
nis, sonet, soneton çələnq, yaponi şeirə formon—hokku,
tanka az nıvıştəme. Peş mı şair Vəlişah təcnis, Baladdin
Veşo, Əli Nasiri soneton çələnq nıvıştəje. Əmandə for-
monədə ve həyf, hələ ki, ıştə ğələmi ovojqınəkəs bə ni.
Yaən, hələ bəmı rast oməni.
Zəhmət nıbo, ıştə çapbıə kitobon barədə qəp bıjən.
Kitobxıvandbey bəşmə çe təsiron kardışe?
Dı qılə şeirə kitobım bə əhandon odoştə bə. İminnə ki-
tobım “Bı Tolışə bandonədə”, 1999-minnə sorədə dərc
bə. Vəyo çımı tolışə, tırkə şeiron vırə səydə. 2007-minnə
sorədə “İnsan axtarıram” nomədə bə, tırkə şeiron vırə sə
kitobım bə əhandon odoştə bə.
Mıəllim ko kardedəş. Çe cur umniyedəş ıştə bədi-
iyə-elmiyə ofəyəvonəti de mıəlliməti? Yəne rosniyey
zınedəş?
Ve çətin. Muəlliməti, peşt dərsonən fərdiyə məşğəlon
çımı həmə vaxti səydən. Qıləy qədə kuməm heste, hiç bo
ədəbi-elmiyə fəaliyyətiro sakitə, aşişə, tamijə cuncımən
ni...(kursiv-A.B.)
Imrujnə tolışi ədəbiyati çe cur vindedəş?
Sıxani rosti, veyən rozi nim. Çəmə ısəti ve tolışə şairon
ve bəsitə şeiron nıvıştedən. Poetikə zu kame çəvon nıvıştəy-
onədə. Isə çı tolışi poeziya, heco-qafiyəj vırədə bə, poet-
ik zuj nıbə şeiron vaxt boəmə, az jıqo zınedəm, bə dumo
mandə. Bı barədə mıni qane kardedə, ustod Vəlişah, Əli
Nasir, Xilqət, Mehmon Ğərəxani, Rza Musa ofayemonon.
Kam bınıvıştonən, Peymon Oğayat, Balayar Sadiqi
poeziya nımunonən deştə qəncinə, orjinalə fikon çımı dığəti
okırnedə. (kursiv-A.B.) Çəmə şairə boliyon mıni bıbaxşon,
az ıştə nəzə-dığəti ifodə kardedəm. Be bəzıne ki, kom şairi
nom isə çımı bı dəqiqə fikom beşe, yaən bə kom şairi
ofayemoni çok bələd nim. Umdəvom ki, çımıku qırəy
əkənin.
Bə tolışi cıvonə şairon kom tovsiyon heste?
Ha, peyo bə çımı votə tələbon cəvob doə şeiron
bınıvışton. Azən vaxt bə, nığılə poeziya nıbə şeiron
nıvıştəme. Bə devronədə vote bəbe ki, ədəbiyə məktəbı-
mon nıbe. Isə ə devr bə dumo mandə. Isə əsl sənətə əsər
bə məydon noe lozime. Bə şeirədə ki, tojə jı-çiy bə məy-
don noydənij, əncəx heco, qafiyə normon çaş kardə bedə,
deə nıvıştəyon əhandon məşğul nıkən. Jı ədəbiyə nımunon
bə məydon bınən ki, deə nımunon bə dınyo ədəbiyə are-
na beşe bıbu. Bımi çəmə sipirişə şair--ənıvıştonən, cohilonən
potensial, zu heste. (kursiv-A.B.)
İmsor 50 sin təmom bedə.(29.09.1963) Həniyən
vey kom yodo mandedə: nimə əsrə umri qulqulon ya
uğuron?...
Çımı umır qon dəvardə. Sivı se sinnədə bə ali məktəb
dəşəm. Maqistraturam de sıə diplomi oroxniyəme. Kamədə-
veyədə imzom bə əhandon məlume. Bəmı vote bəbe ki,
hiç ki dastək bəni, hələ poçə bıjən, manebəkəs ve bə, ısən
hestin. İmoni fik kardeədə, votedəm: az de şəraiti, bı
vəziyyət oməm beşəm, ım koonım kardə, vallah, kam odəm
bımi zuj əvışkiy.( kursiv-A.B.) Çətonoən fik kardəm ki, oxo
çımısə da kərə ve yolə fəoliyyət nışon doy əzınim... Eh...
bımiyən şık bo!
Kom sıvolon əpi ki, az bıdəm bətı?
Maşallah, Allahverdi muəllim, mınon ənə eşande ki,
həmə ıştə həyat, jimonım okarde, votıme. Bomı vote iqlə
orzuyon mandin. Orzuyonım boştə ıştənisə ve, boştə
xalqiye. Çəmə bo tolışi xalqi jiye, zıvoni nımarde, mədəni
rostbemoni kəşə zəhmət bə puç benışu! Har xalqi çı həxıj
hestebu, çəmə xalqən bə həxon bırəso!
-Amin!
Bəştə həmroon, həmtoon, həmkoon ve təşəkkur kard-
edəm. Ve dığətinijon. Çımı 50 sinni beon bə yod dənoə,
dığətədon oqətə, bı ğəyğuro ve mınnətdom. Xıdo Şıməku
rozi bıbu!
-Xəşəcon bıbi!
(Mısohibə səşe A.BAYRAMİ. 20.09.13)
N Ə R İ M A N T O L I Ş İ - 5 0
DE ŞAIR NƏRİMAN TOLIŞİ MISOHİBƏ