Cek london oyun
Yüklə 1,46 Mb. Pdf görüntüsü
|
www.vivo-book.com 77 Bütün güləşmə vaxtı Cenevyeva bir dəfə də olsun Coyun üzündə, mebel mağazasında səhər ertə qıza boksdan danışanda olan ifadəni sezmədi. Bəzi raundlarda onun sifəti lap cavan, uşaq üzünə bənzəyirdi. Ponta ona ən ağır zərbələrini endirəndə Coyun sifəti boz, qaşqabaqlı olurdu, sonralar isə vaxt ötsün deyə, rəqibindən bərk yapışanda oğlanın sifəti kədərli ifadə alırdı. Ancaq indi o, rəqibindən qorxmurdu, təşəbbüsü o əlinə almışdı. Bu vaxt Cenevyeva onun boksçu sifətini gördü. Görüb diksindi, Co ondan gör nə qədər uzaqda idi! Qız elə bilirdi ki, ona yaxşıca bələddir, oğlanın ixtiyarı ondadır, ancaq sanki bu poladdan tökülmüş sifət, polad kimi möhkəm dodaqlar, bu polad kimi soyuq şəfəq saçan gözlər tamamilə yad idi. Cenevyevanın fikrindən keçdi: “Elə bil Allahdan buyruq almış əzraildir durub, sir-sifəti daşa dönüb”. Ponta çalışdı ki, ilk raundlarda hücumunu təzələsin, ancaq Co onun çənəsinə bir zərbə ilişdirdi! Co rəqibinə nəfəsini dərməyə bir an belə macal verməyib, rəqibini inadla izləyirdi. On üçüncü raundun axırında Co Pontanı küncə sıxışdırdı. Ponta özünü müdafiə edirdi, ancaq Co qüvvətli www.vivo-book.com 78 bir zərbə ilə Pontanı diz çökməyə məcbur etdi. Onuncu saniyədə o ayağa qalxdı, istədi ki, klinç eləsin, ancaq Co onu kürəyinin altına dörd zərbə vurmaqla qarşıladı, qonq səslənəndə Ponta boğula-boğula sekundantlarının qolları üstünə yıxıldı. Co bütün rinq boyu qaça-qaça öz küncünə çəkildi. O, sekundantına dedi: – İndi bəxtim gətirər. Sekundant cavab verdi: – Hə, sən indicə onu yaxşıca üzdün. İndi ancaq təsadüf onun köməyinə çata bilər. Ancaq hər halda ehtiyatı əldən vermə. Co dizlərini qatlayıb özünü irəli verdi, starta hazır olan, işarə gözləyən, bərk qaçan idmançı kimi dayandı. Qonqun səsi gələn kimi o, iki sıçrayışla sekundantların dövrəyə aldığı kətildən duran Pontanın başının üstünü aldı. Burdaca, o sekundantların arasındaca Co ona sağ yumruğu ilə zərbə endirib yıxdı. Ponta vedrələrin, kətillərin, sekundantların, qarmaqarışıqlığın arasından çıxan kimi Co onu ikinci dəfə yıxdı. Ponta öz küncündən çıxmağa macal tapmayıb üçüncü www.vivo-book.com 79 dəfə yıxıldı. Elə bu vaxt Co, nəhayət, coşmuş burulğana döndü. Cenevyeva onun “Yaxşıca göz qoy, mənim nə vaxt hücuma keçdiyimi başa düşərsən”, – sözlərini yaxşı xatırlayırdı. Tamaşaçılar da onu yaxşıca başa düşdülər. Bütün salon ayağa qalxmışdı, yorulmaq bilmədən bağırırdı. Cenevyeva izdihamın bu qana həris qışqırığını eşidəndə fikrindən keçirtdi ki, ac qurdlar da yəqin, bu cür ulaşırlar. İndi qız sevgilisinin qələbəsinə şübhə etməyəndə, ürəyində Pontaya yazığı gəldi. Ponta özünü zərbələrdən uzaqlaşdırmaq, onları dəf etmək, zərbələrdən can qurtarmaq, klinç olmaq istəyirdi. Co ona aman vermirdi. Nokdaun nokdaun dalınca idi. Ponta üzüstə, böyrü üstə brezentin üstünə düşürdü, həm klinçdə olanda, həm klinçdən kənarda qüvvətli, ölümcül zərbələr alırdı. Bu yumruqlardan beyni dumanlanırdı, əzələləri möhkəmliyini itirirdi. Co onu küncə qovub salır, təzədən oradan çıxarır, burazların üstünə yıxır, gözləyirdi ki, o qəddini düzəltsin, yenə yıxırdı. Ponta havanı yumruqlayır, yumruğunu aparıb-gətirir, boşluğu yumruqlayırdı. Onda insanlıqdan əsər-əlamət qalmamışdı – bu, qəzəbli, nərə www.vivo-book.com 80 çəkən, qovulub əldən salınan vəhşi heyvan idi. O, dizləri üstdə düşür, elə buradaca ləngər vura-vura onuncu saniyənin başa çatmasını gözləmədən ayağa qalxır, ancaq Co onu bir zərbə ilə burazların üstünə atırdı. Döyülmüş, əldən düşmüş, ayaq üstə güclə dayanan, boğula-boğula ağzını açıb nəfəs alan, xırıldayan, gözləri şüşəyə dönmüş Ponta rinqdə özünü ora-bura çırpır, hələ də rəqibinə qalib gəlməyə çalışırdı. O gülünc vəziyyətə düşmüşdü, həm də özünü axıradək məğlubedilməz sayaraq, inadla mübarizə aparmaq cəhdinə görə dahi idi. Birdən Coyun ayağı yaş brezentdə sürüşdü. Ponta qan sağılmış gözləri ilə bunu gördü, o başa düşdü ki, hələ də ümid var. O, bir an içində qüvvələrini səfərbər edərək ildırım sürəti ilə düz hədəfə, onun çənəsinə zərbə vurdu. Co dalı üstdə yıxıldı. Cenevyeva yıxılarkən onun bədəninin necə gücdən düşdüyünü, onun peysərinin brezentlə örtülmüş döşəməyə taqqıltı ilə dəyməsini eşitdi. Tamaşa salonundakı səs-küy, qışqırıq yatdı. Hakim yerə sərələnmiş Coyun üstünə əyilərək saniyələri sayırdı. Ponta səndələyərək bir neçə addım kənara atıldı, dizi üstdə www.vivo-book.com 81 çökdü. O, çətinliklə ayağa qalxdı, üzünü salondakılara çevirib tamaşaçıları həddindən artıq nifrət yağan baxışlarla gözdən keçirdi. Onun ayaqları əsirdi, dizləri qatlanırdı, sinəsindən xırıltılı səslər çıxırdı. O, ləngər vurdu, arxaya yırğalandı, kor-koranə burazdan yapışdı ki, yıxılmasın, onun üstündən sallandı, iki qatlandı, lap əldən düşüb başını çox aşağı saldı, öz bədənini idarə edə bilmədi. Hakim həlledici on saniyəni saydı, əlini Pontaya tərəf uzatdı, bu o demək idi ki, o qalib gəlib. Tamaşaçılardan heç biri əl çalmadı, Ponta da sürünənlər kimi burazın altından sürüşüb keçdi, sekundantlar qoluna girdilər, salondan keçirib, yan keçiddən apardılar. Co əvvəlki kimi hərəkətsiz uzanmışdı. Sekundantlar onu ayağa qaldırdılar, küncə aparıb kətilin üstündə oturtdular. Tamaşaçılardan bəziləri meydançaya çıxdılar, ancaq yaxınlıqdakı polislər onları kobudluqla qovaladılar. Cenevyeva bütün bunlara gözcükdən tamaşa edirdi. O çox da bərk həyəcan keçirmirdi. Onun sevgilisi məğlub olub, bu oğlan üçün çox böyük məyusluqdur, qızın da ona yazığı gəldi, iş də bununla qurtardı. Bəlkə də belə yaxşıdır. Yüklə 1,46 Mb. Dostları ilə paylaş:
|