“Qoy desinlər ki, filankəs şairdir” havasıyla
yazırdım. Orta məktəbdə oxuyurdum bu
qəfil qəza başıma gələndə.
Yazdım, oxudular.
Redaksiyalara göndərdim, çap etdilər...
Sonra yazıya sığındım.
Darıxdım, yazdım.
Təkləndim, yazdım.
Tərk edildim, yazdım.
Uğursuzluq yaşadım, yenə yazdım.
Yazıya, sözə sığındım.
Necə və nə yazmağımdan asılı olmayaraq,
allahdan da, valideynlərimdən də küsəndə,
sözlə, yazıyla təskinlik tapdım.
...Tələbəlik illərində çox cəhd elədim ki,
yazmayım, başqa bir işlə məşğul olum,
alınmadı.
Fəhləliyi bacarmadım, müəllim kimi uğur
qazana bilmədim, kiçik bir biznes qurdum,
batırdım.
Hər dəfəsində də qınaq, danlaq, giley-güzar
və uğursuzluğun gətirdiyi depressiya...
Kitab təqdimatlarında, imza günlərində, şeir
gecələrində, içki məclislərində eşitdiyim xoş
sözlər məni ovsunladı. Hər yazıdan sonra
aldığım mesajlar, oxucu zəngləri, elektron
mediada yazılarıma yazılan şərhlərdən,
103
haqqımda yazılan yazılardan qanadlandım,
özümü xoşbəxt hiss elədim. Əsl xoşbəxtlik-
dən isə, addım-addım uzaqlaşdım.
...Çıxdığım bu yolda əlimdən tutub yol
göstərənlər də oldu, badalaq vurub yıxmağa
çalışanlar da. Hər şeyə rəğmən yazmaqdan
vaz keçmədim. Dost qazandım, dost itirdim.
Bu günə qədər qazandığım və itirdiyim hər
şeyin baiskarı söz oldu, yazı oldu, yazmaq
oldu.
...Əvvəl kiçik bir çevrəm vardı. Ailəm,
qohumlarım, uşaqlıq və tələbəlik dostlarım.
İndi ölkənin ən ciddi fikir adamlarıyla, ən
maraqlı yazıçıları ilə, ən sevilən şairləri yol-
daşlıq edirəm. Hər yazımdan sonra görüş-
məyi, fikir mübadiləsi aparmağı təklif edən
oxucularım, bir balaca kefim pozulanda saat-
larla dərdləşə biləcəyim qələm dostlarım var.
Bütün bunları mənə qələmim, yazdıqlarım
qazandırıb.
...Bir də ailəm var. Normal yaşamağı, sakit
həyatı, qayğıkeş ailə başçısını arzulayan
ailəm...Və nə yazıq ki, günümün cəmi 1-2
saatını da aid olduğum insanlara həsr edə
bilmirəm. Onlar başqa dünyanın adamları
deyil, mənə, mənim dünyama aiddirlər.
Amma mən onların dünyasına yadam. Bir
damın altında aramızda getdikcə dərinləşən
uçurumu sezməyə başlamışam. Ayıldım ki,
virtual aləmdəki “dostların”, “doğmaların”
104
qayğıkeşliyi başımı yaman qatıb. Ailəmdən
başqa hamının doğması, sevimlisi, əzizi ol-
duqca yadlaşdım. Bu günlərdə birdən-birə
hiss elədim ki, onlardan uzaqlaşıram. Beş
yaşlı oğlum mənə ata demək əvəzinə, rəsmi
müraciət etməyə başlayıb.
“Gecən xeyrə qalsın, Cəlil Cavanşir!”, “Cəlil
Cavanşir, mənə süd almaq yadından çıxma-
sın!”
Həyat yoldaşımla evimizin qayğılarından
danışmaq əvəzinə kitablardan, yazdıqlarım-
dan danışmağa cəhd elədim. Məişət qayğıları
aşıb daşanda qadınına şeir oxuyacaq qədər
səfehləşdim.
...Hər axşam kresloya çöküb yarımçıq
qoyduğum kitabı əlimə alanda televizorun
səsini qısan oğlumun üzündəki narazılıqda
zərrə-zərrə ona yadlaşdığımı hiss eləmədim.
Hər içki məclisindən qayıdandan sonra
pəncərəni taybatay açıb gözünü boşluğa
zilləyən qadınımla aramızdakı milyonlarla
kilometrlik məsafəni ciddiyə almadım. Bir
şəhərdə yaşasaq da, aylarla üzünü görmədi-
yim doğmalarımın gileylərində onlar üçün
vecsiz birinə çevrildiyimi dərk eləmədim.
Bir gün növbəti yazını bitirib, mətbəxdə
siqaret sümürəndə başa düşdüm ki, bütün
normal adamlar bu saatda ya yatır, ya da
uşaqlarına nağıl oxuyur...
105
...Və bütün bunları düşündükcə doğmaları-
mın içərisində təkliyimi hiss elədim...
...Həəə, onu deyirdim axı, bu ölkədə yazı-
pozu ilə məşğul olmaq yaxşı heç nə vəd
eləmir. Uzaqbaşı qohumlarından, doğmala-
rından uzaqlaşıb lazımsız bir adama çevri-
lirsən...
106
səkkiz
Serroz
- Sağ qabırğamın altında və mədəüstü nahi-
yədə, bəzən bütün qarınıma yayılan, küt və
göynərtili ağrılarım var.
Yağlı yeməklərdən sonra özümü çox pis hiss
edirəm. İştahsızlıqdan əziyyət çəkirəm. Tez-
tez köpürəm. Bəzən üşüdürəm.
- Dayan, dayan. Nəfəs al. Telefonda diaqnoz
qoymayacam ki, sənə. Ən yaxşısı gəl bizim
klinikaya, səni əməlli-başlı yoxlayaq.
- Məndə vaxt hardadı? Sən elə yüngülvari bir
şey de, dərman, sirop. İçim, bir az rahat-
laşım.
- Bura bax, sən yenə içirsən?
- İçirəm.
- Gəl mənə qulaq as, gəl səni yoxlayaq,
müalicə yazaq. Bu əlamətlər yüngül bir
xəstəliyin əlamətləri deyil.
- Mən uşaq deyiləm ki, de görüm nə baş
verir?
- Bilirəm uşaq deyilsən, ona görə düzünü
deyim ki, bu əlamətlər serroza çox bənzəyir.
Sən belə elə, bizim klinikaya gəlməsən də
olar, özünü yaxşıca müayinə etdir. Arağı isə
at biryolluq!
- Axı arağı...
107
- Mən ölüm, cığallıq eləmə. Arağı atmaq
çətin məsələ deyil. Yaşamaq, oğlunu atasız
qoymaq istəmirsənsə at o zəhirmarı.
Sağollaşıb telefonu söndürəndən sonra bir
siqaret yandırdım. Yenə köpmüşdüm. “Yə-
qin axşam içdiyim arağın zibilidir” deyə
fikirləşdim. Həə... Deməli, bu qədər ciddi
imiş məsələ. Bir anda gözümün qabağına bu
xəstəlikdən dünyasını dəyişən insanlar gəldi.
Otağın isti olmasına baxmayaraq üşüdüm.
Əslində ölüm qorxusu mənə yaddır. Amma
arxamca “özünü içkiylə məhv elədi” deyil-
məsini qətiyyən arzulamıram. Həm də axı
mən istəsəm içməyə bilərəm. Sadəcə bir az
iradəli, səbirli olmaq lazımdır. “Deməli,
içkini atmasam tezliklə yataq xəstəsi olacam
və.. dünyaya əlvida!” Düşündüklərim gül-
məli göründü özümə. Yox, mən ən azından
bu ilkin fəsadları aradan qaldırmaq üçün
çalışmalıyam. Bacararam!!!
Sözün düzü dəfələrlə intihara cəhd eləmiş
adam kimi, bu xəstəlik mənim gözümü o
qədər də qorxutmur. Nə vaxt və ya necə
ölməyin nə fərqi var ki? Zatən "hər ölüm
erkən ölümdür". Nə mənası var uzun-uzun
yaşamağın?
***
108
“Ölümdən betərdi,
əkdiyin ağacdan,
yazdığın şeirdən uzun yaşamaq...”
Bu da serrozdan əziyyət çəkən, ölümlə sava-
şan, aylar öncə dünyasını dəyişən Adil
Mirseyidin şeiri. Yox, deyəsən yaşamaq da
bir şey deyil. Bəzən isə əsil əzabdı uzun
yaşmaq.
Nədənsə həkim dostumun söhbətindən
sonra, dünyasını dəyişmiş Adil Mirseyidi,
Elçin Səlcuqu, Adil Qaçayoğlunu, Məmməd
Nazimoğlunu, Ələkbər əmini (Ələkbər Hü-
seynov) xatırladım...
Həə, bir də yadıma Baloğlan Əşrəfov və
Yaşar Nuri düşdü. Serrozu atlada bilənlər.
İkisi də qardaş ölkədə, Türkiyədə müalicə
olunub. Müğənni Baloğlan Əşrəfovu iş
adamlarından biri xüsusi təyyarə ilə Türki-
yəyə aparmışdı. Amma nədənsə Adil Mirse-
yidi heç ümumi təyyarə ilə də Türkiyəyə
aparan olmadı. Heç Elçini də aparmadılar...
Görünür, imkanı olanlar yazı adamlarını
tanımır...
Bu ölkədə ünlü olmaq üçün ya oxumalısan,
ya da güldürməlisən.
Bəlkə də vaxtında hərəkət eləsəydik xilas edə
bilərdik onları...Yox, axı onlar da xilas üçün
çalışmırdılar.
109
Bədənimdən bir ürpərti keçdi. Telefonu əli-
mə alıb həkim dostumun nömrəsini yığdım:
- Doktor, nə desən hazıram. Sabah müayinə
üçün yanındayam.
- Əla. Bir də qorxub eləmə, dediyin əlamət-
lərdən mənə elə gəlir ki, ciddi heç nə yoxdur.
Sadəcə çalışmalıyıq ki, sənin qaraciyərini qo-
ruyaq. İçkini atsan hər şey yaxşı olacaq.
- Oldu. Sabah görüşürük.
Telefonu söndürüb, yaxınlıqdakı ucuz kafe-
lərin birinə girdim. Öz-özümə pıçıldadım:
“Son dəfə” və ofisiantı çağırdım.
-Yüz qram!
110
doqquz
Qisas
O gecə ulduzlar yerə daha yaxın idi...Əlimi
atıb bir-ikisini qoparmaq istədim, əllərimin
ulduzlara çatmadığını bilə-bilə.
...Son görüşümüzdə gedəcəyini bildiyim hal-
da səninlə daha çox vaxt keçirmək istədim.
Əslindən son xəyanətindən sonra qalmağının
mümkünsüz olduğunu bilə-bilə.
“Niyə aldatdın? Axı xəyanət etmədən də
yaşaya bilərdin”-dedim.
“Mən nə etdiyimi bilmirəm, təmiz başımı
itirmişəm”- dedin.
Səni anlamaq istədim, anlamaqla heç nəyi
dəyişdirə bilməyəcəyimi bilə-bilə...
Dəhşətli gecə idi... İlk dəfə hara getdiyimi
bilmədən saatlarla dolaşdım küçələri... Bey-
nimdə yalnız bir sual dolanırdı-niyə? Cava-
bını yenə özündən soruşdum. “Məni nə üçün
aldatdın? Mən sənə nə pislik eləmişdim?”-
deyib uşaq kimi hönkürdüm.
Bərk-bərk qucaqlayıb, başımı köksünə sıx-
dın. Bu sevgi deyildi. Sadəcə gözlərimə baxa
bilmirdin.
Səsindəki arxayınlıq məni dəli edirdi: “Sən-
dən əvvəlki bütün kişilər məni aldatdı, xəya-
nət elədi, yarı yolda buraxdı. Səbəbini bilmi-
rəm, amma onların hamısının qisasını sən-
dən aldım”...
111
Məni buraxıb kənara çəkildin. Susmuşdun.
Ağlamırdım.
On
Anladım ki...
Şahin Amanova məktub.
3-4 ilin söhbətidir, təqvimə qalın, qara hərf-
lərlə yazılan günlərin birində (ya 20 yanvar-
dı, ya da 26 fevral) şəhər kənarındakı hüzur-
suz və narahat hotel nömrəsində bir həyat
qadınına aşiq oldum. Bəzən insan gərəksiz
vaxtlarda, gərəksiz insanlara aşiq olur.
İlk dəfə o gecə anladım ki, həyatda bəzi
şeylər inadla üst-üstə düşür...
Dəlicəsinə aşiq olduğum o gözlərin içindəki
qəribə soyuqluğu anlayanda səhər açılmış və
sərxoşluğum keçmişdi. Özünə oyun yoldaşı
tapmadığı üçün həyətdəki maşınları mismar-
la cızan 5-6 yaşlı uşağın həyəcanı vardı
içimdə.
İzah olunmaz duyğular içərisində yastığa
söykənib bir siqaret yandırmışdım və onun
gedişini seyr etmişdim. Özüylə bərabər otel
otağındakı qəribə qoxunu da çəkib apar-
mışdı arxasınca.
Və o gün oteli tərk etmədən öncə, yataqdaca
bir ayrılıq şeiri pıçıldamışdım...
112
İşsiz və ümidsiz günlərimin birində məhkə-
mədən çağırış gəlmişdi...
Çağırışdan 2 ay sonra artıq boşanmış, işsiz və
ümidsiz haldaydım. Ümidimi itirmişdim və
intiharın bir addımlığında idim. Məhkəmə-
dən sonra kirayə mənzilə dönəndə cibimdə
bir-iki manat pul, canımda uzun yolun yor-
ğunluğu və heç vaxt bitməyəcəyini sandığım
ümidsizlik vardı. Arxası üstə uzanıb əllərimi
başımın altına daraqlamışdım. Və o səfil,
çarəsiz günlərimdə dürüst, namuslu və anla-
yışlı bir qadına aşiq olmuşdum. Bir tərəfdə
canım qədər sevdiyim övladımdan ayrı qal-
mağın kədəri, bir tərəfdə isə yaşamağa sti-
mul verən tərtəmiz bir sevginin bəxtiyarlığı
vardı.
Çox keçmədən yenidən iş tapıb həyata
sarıldım.
O gün yenidən anladım bəzi hadisələrin
qəsdən üst-üstə düşdüyünü...
Sonra mən tez-tez aşiq olmağa və iş yerlərimi
dəyişməyə, özümü kəşf etmək üçün çabala-
mağa başladım. Yenidən işsizlik və yenidən
narahat günlər başladı həyatımda. Hər şey
yolundaykən nələrinsə nizamsız olduğunu
anlamağa başladım. Və hər dəfəsində get-
dim; ya iş yerimdən, ya da aşiq olduğum
qadının həyatından...
113
Hər dəfə olduğum yeri tərk edərkən gizli bir
əlin məni tutub saxlamasını istədim, amma
olmadı, saxlamadı... Bir gün barmaqlarımın
arasında sönən siqareti külqabına atanda
anladım ki, öz həyatımı başqalarının uydur-
duğu bir əhvalat kimi yaşayıram.
Səhərlər tezdən oyanıb küçə lampalarından
qaranlıq otağa süzülən işığın yaratdığı alato-
ranlıqda əl havasına axtardığım siqareti ta-
panda anladım ki, həyatım alatoranlıqda əl
havasına axtarış aparmaqla keçib.
İşsiz-gücsüz, avara günlərimin birində evli
bir qadına aşiq oldum. Bu sevdanı içimdə
dəfn edib, yas saxlamağa hazırlaşdığım anda
həyatımda ilk dəfə bir qadın mənə eşq elan
elədi.
Sonrası, hər aşiqin yaşaya biləcəyi ümidsiz
macəra...
Həyatımda ilk dəfə bir qadına bu qədər bağ-
landım. Qadağalar, tabular, mental dəyərlər,
günahlar və olmazlar vecimə deyildi. Günlər
su kimi axıb keçərkən həyatımda ilk dəfə
qadın xəyanəti ilə üz-üzə qaldım. Bağışla-
dım... və qısa bir müddət ayrı qaldım...
Onsuz keçirdiyim hər gün özümü yeyib-bi-
tirdim. Təsəllini içkidə tapdım. Sərxoş oldu-
114
ğum gecələr xaricində rahat və bəxtiyar gü-
nüm olmadı.
Sonra kürəyimi yerə vuran bir xəstəlik tapdı
məni. Dostlar, tanışlar içkidən olduğunu
dedi. Hərə bacardığı köməyi elədi, hərə bir əl
atdı bu quyudan çıxmağıma. Amma mən
quyunun ən dərin küncünə çəkilib bir daşın
arxasında gizləndim.
Gözümü açıb yumunca daha bir il keçdi
həyatımdan, daha bir il yaşlandım.
Kədərimlə, üzüntülərimlə, cansıxıcı yaşamım
və düşüncələrimlə dostları bezdirdim, düş-
mənləri sevindirdim.
İlk dəfə bir qadının geri dönməsi üçün göz
yaşı töküb yalvardım. Qarşıda məni hansı fa-
ciənin gözləməsindən xəbərsizdim...
Yaxın günlərin söhbətidir. Təqvimə qalın,
qara hərflərlə yazılan günlərin birində (ya 20
yanvardı, ya da 26 fevral) şəhərin hüzursuz
və ümidsiz arxa küçələrindəki o məşum evdə
sevdiyim qadının necə həyat qadınına çevril-
diyini anladım. Kresloya çöküb bir siqaret
yandırdım. Və ilk dəfə bir qadının həyatım-
dan sivişib getməsini yaşlı gözlərlə izlədim.
Getdi və həyatıma dolan qoxusunu, baxış-
larını, bədənini, o dəlicə sevişmələrimizi də
özüylə apardı...
115
İlk dəfə o gecə hara getdiyimi bilmədən saat-
larla dolaşdım küçələri. Heç kəsin səmaya
baxmadığı xəyanət qoxulu şəhərdə, bütün
ümidlərimi şüşə kimi daşa çırpıb çilikləyən o
qadının baxışlarını axtardım səmada.
O gecə başa düşdüm ki, insan iztirablarını
dilə gətirə bilmədiyi üçün şair olur.
O gecə anladım ki, daha məni heç kəs aldada
bilməyəcək. İnandım ki, bədbəxt adamları –
həyatdan heç bir gözləntisi olmayan ümid-
sizləri aldatmaq mümkün deyil.
Və bütün yaşadıqlarıma rəğmən ayaqda qal-
mağımın yeganə səbəbini-içimdəki sonsuz
sevgini bəsləyib böyütməyə qərar verdim.
Anladım ki, yanında ağladığım insanların
heç də hamısı göz yaşımı siləcək qədər sax-
takar deyil.
Anladım ki, həyatımda bəzi şeylər hökmən
üst-üstə düşür...
116
içindəkilər
şeirlər
sən elə bilirsən…............................................... 5
qayıt gəl...............................................................8
şəbnəm karslıya...............................................10
suallar................................................................12
bu səni xatılamaq deyil...................................15
toxun mənə, tanrım!........................................17
aldatmaq.ağlatmaq.ovutmaq.........................20
ayrılığın ildönümü..........................................22
oğurluq..............................................................23
mən əyalət uşağıyam......................................25
darıxıram..........................................................27
dəlilik.................................................................29
bakı....................................................................31
cəmilə................................................................35
insan unudur....................................................38
göyqurşağı........................................................39
məmləkətimi düşünürəm...............................43
sən yoxdun.......................................................44
yad dildə...........................................................45
yorğun, əsəbi, gərgin.......................................49
intihar................................................................50
nigarançılıq.......................................................51
sən getsən..........................................................52
otel otağında intihar düşüncələri..................53
sevgi şeirinin son versiyası.............................55
indi sən olmalıydın yanımda.........................57
“əlvida” yerinə əsəbi söhbətlər......................59
ayılıb görəcəksən….........................................61
antişeir - I..........................................................62
117
antişeir - II.........................................................64
antişeir - III.......................................................66
esselər
Nənə, məni bağışla..........................................71
Anamın əlləri....................................................75
Saat,qadın, darıxmaq......................................79
Evli qadına aşiq olmaq əzabı.........................83
Əlvida, kədər!...................................................89
Hovuz və hamam............................................92
Evimizdəki yad adam.....................................98
Serroz ..............................................................103
Qisas................................................................107
Anladım ki......................................................108
118
Cəlil Cavanşir
göy qurşağı
Requiem aeternam dona eis, Domine
(şeirlər və esselər)
119
firma lent
120
Dostları ilə paylaş: |