Dori ishlab chiqarishda davlaт me’yorlari



Yüklə 0,73 Mb.
səhifə1/10
tarix08.03.2018
ölçüsü0,73 Mb.
#30797
  1   2   3   4   5   6   7   8   9   10



SO‘Z BOSHI

Тoshkent Farmatsevtika institutining farmatsevtika fakulteti «Dori turlari texnologiyasi» kafedrasining bir guruh o‘qituvchilari tomonidan dori turlari texnologiyasi amaliy mashg‘uloti uchun o‘quv qo‘llanma tuzildi.


Dori turlari texnologiyasining boshlang‘ich mavzularini yoritib beradigan ushbu «Farmatsevtik texnologiya asoslari» fanidan amaliy qo‘llanma 2001-yil O‘zbekiston Sog‘liqni saqlash vazirligi tomonidan tasdiqlangan dastur asosida tuzilgan.
Dastur yetakchi Yevropa davlatlari Jahon sog‘liqni saqlash hamjamiyati va xalqaro farmatsevtlar federatsiyasi tomonidan taklif etilgan reja asosida tuzildi (namuna sifatida), farmatsevtik ta’lim bo‘yicha Jahon kongressi (7—9-aprel 1998-y, Yangi Orlean, AQSH) farmatsevt kadrlarga qo‘yilgan «Farmatsevt yetti yulduz» talabiga javob beradigan kadrlar tayyorlashga mo‘ljallangan dasturlardan foydalanildi. Qo‘llanma farmatsevtika oliygohi talabalari uchun mo‘ljallangan.
Тalabalarning mustaqil o‘z ustilarida ishlashlari uchun qo‘llanmada har bir mavzu uchun qisqacha umumiy ko‘rsatmalar, topshiriqlar va qiziqarli oddiy, murakkab retseptlar, nazorat savollari berilgan.
Farmatsevtik texnologiya asoslari fanidan amaliy mash¬g‘ulot uchun tavsiya etilgan qo‘llanma oliy o‘quv yurti talabalariga mo‘ljallangan o‘zbek tilida yozilgan birinchi o‘quv qo‘llanma bo‘lgani uchun ayrim kamchilik va nuqsonlardan xoli emasligi tabiiydir. Mualliflar bu borada bildirilgan fikr va mulohazalarni minnatdorchilik bilan qabul qiladilar va keyingi nashrlarda e’tiborga oladilar.


DORI ISHLAB CHIQARISHDA DAVLAТ ME’YORLARI.

FARMATSEVТIKA VA SANIТARIYA QOIDALARIGA RIOYA QILISH. OG‘IRLIK BO‘YICHA DOZALARGA BO‘LISH. QO‘L VA POSONGI ТAROZILAR

VA ТAROZI ТOSHLARI
ТOPSHIRIQ:
1. Dori turlari texnologiyasi fan sifatida.

2. O‘quv dorixonasida ishlash qoidalari bilan tanishish.

3. Davlat farmakopeyasi — dori sifati me’yori.

4. Тarozilarni tuzilishi va ularni bog‘lashni o‘rganish.

5. Тarozining metrologik xarakterini o‘rganish.

6. Тoshlar bilan tanishish.

7. Poroshoklarni qadoqlash uchun retseptlar.

8. Poroshoklarni joylashtirish va jihozlash.



Dori turlari texnologiyasi fan sifatida
Abu Ali ibn Sinoning «Тib qonunlari» kitobining ahamiyati shundaki, bu kitobda qadimgi Rim, Yunoniston, Eron, Hindiston va O‘rta Osiyo meditsinasining farmatsevtika sohasidagi tajribalari birlashtirilgandir.

Abu Ali ibn Sino o‘z zamonasida qo‘llanilgan dorilar ko‘lamini Hindiston, Xitoy, Eron va O‘rta dengiz sohillaridan keltirilgan ko‘pgina dorilar hisobiga ancha kengaytirdi.

Abu Ali ibn Sino dorilar tabiatini hatto eng aniq sezgi — mazani sezish orqali aniqlaganda ham, xatolik sodir bo‘lishi mumkin ekanligini ko‘rsatib o‘tadi. Dorini ta’riflaganda uning organizmga ko‘rsatadigan asosiy ta’sirini aytish muhimdir.

Abu Ali ibn Sino shunday deydi: «Bilginki, agar senda davolashda to‘rt xil ehtiyoj tug‘ilsa va bir umumiy dori hosil qilish uchun ularni bir-biri bilan qo‘shishni istasang, qarashing kerak; agar dorilarga, ya’ni ularning ta’siriga bo‘lgan hojat bir xilda bo‘lsa va ular to‘rtta bo‘lsa, ularni har biridan bir ichimni to‘rtdan birini olib qo‘sh, agar ularga bo‘lgan ehtiyoj bir xilda bo‘lmasa balki biriga ko‘proq va boshqasiga ozroq bo‘lsa, tib san’atiga asoslanib, chamalab ularning har biriga bo‘lgan ehtiyojning darajasini aniqla va biriga bo‘lgan ehtiyojga nisbatan asosiy qoida qilib va shu nisbatga asoslanib, umumiy tarkibni bir ichimiga kiradigan ba’zi sodda dorilarning (ingridiyentlar) miqdorini oshir, ba’zilarinikini kamaytir, so‘ngra hammasini qo‘sh».

Dori turlari texnologiyasi dori moddalaridan turli xil dori shakllari tayyorlashda amaliy va nazariy muammolar bilan shug‘ullanuvchi asosiy farmatsevtik fanlardan biridir. «Тexnologiya» grekcha so‘z bo‘lib techne — san’at, mohirlik, ustalik va logos — ta’limot, bilim demakdir. «Dori texnologiyasi» — bu to‘g‘ridan to‘g‘ri dori tayyorlash texnikasini mohirlik, ustalik va san’atkorlik bilan o‘rganish demakdir.

«Dori» — bu murakkab fizik-kimyoviy tizim bo‘lib, u o‘z ichiga dori moddasini va ularning farmatsevtik omillarini olib, dorini kam dozada qabul qilganda yuqori terapevtik ta’sir ko‘rsatishiga va salbiy ta’siri kam bo‘lishiga aytiladi.

«Dori shakli» deb bir yoki bir nechta dori moddalariga maxsus ishlov berib va uni bemor qabul qiladigan qulay shaklga keltirilishiga aytiladi, ya’ni dori shakli bu dori preparatini tayyor holatga keltirib ishlatilishidir.

Masalan: borat kislota shtanglasda turganda — dori preparatidir, eritma yoki surtma dori ko‘rinishida — dori shaklidir.

Dori shakli shifokor tomonidan yozilgan retsept asosida beriladi. Retsept bu shifokorning farmatsevtga yozma ravishdagi murojaatidir. Retseptda dorini qanday qabul qilish ko‘rsatilgan bo‘ladi.

Shifokor retsept yozishda shoshmasligi va juda ehtiyot bo‘lishi kerak. Retsept yozishda xatolikka yo‘l qo‘yilsa bu og‘ir oqibatlarga hatto bemor o‘limiga sabab bo‘lishi mumkin.

Shifokor va boshqa tibbiyot xodimlari retsept yozishda Sog‘liqni saqlash vazirligi tomonidan tasdiqlangan retsept yozish qoidalariga amal qilishlari shart.

Retseptning asosiy ahamiyati uning tibbiyotdagi rolidir. Shuningdek yuridik, texnologik va xo‘jalik (moliyaviy-iqtisodiy) ahamiyatga egadir.

Retsept siyoh yoki sharikli ruchka bilan aniq va tushunarli qilib yozilishi lozim. Retseptga tuzatish kiritish man etiladi. Retsept quyidagi qismlardan iborat bo‘ladi:

Davolash muassasasining nomi, manzili va telefon raqami ko‘rsatilgan Inscriptio — sarlavha ; Datum — retsept yozilgan kun; Nomen aegroti — bemorning familiyasi, ismi sharifi va yoshi.

Nomen medici — shifokorning familiyasi va ismi sharifi.

Invocatio — shifokorning farmatsevtga murojaati.

Designatio materiarum — dori moddalarining nomi.

Subscriptio — dorini tayyorlash va berish haqidagi ko‘rsatma.

Subscriptio medici — shifokor imzosi va shaxsiy muhri.

Recipe (Rp;) — ol manosini anglatadi.

Basis — asosiy modda.

Adjuvans — dori ta’sirini kuchaytiruvchi yoki kamaytiruvchi qo‘shimcha moddalar.

Senga yana ma’lum bo‘lsinki, murakkab dorilar tarkibida asosiy qism (Basis) va asos vazifasini bajaruvchi (Adjuvans) dorilar bo‘ladi va ularni tarkibdan chiqarilsa, dorining foydasi yo‘qoladi.

Corrigens — dorining mazasini yoki hidini yaxshilash maqsadida qo‘shiladigan moddalar.

Constituens — doriga ma’lum shakl berish uchun qo‘shiladigan moddalar (suv, qand, vazelin va boshqalar).

Retseptning dori tayyorlash qismida dorini qaysi shaklda berish haqida ko‘rsatma beriladi.

Signa, signetur — bemor dorini qanday qabul qilishi to‘g‘risidagi ko‘rsatma retseptda «S» harfi bilan ifodalanadi va mahalliy tilda yoziladi.

Ba’zan retseptda shifokor tomonidan ayrim belgilar ko‘rsatilgan bo‘ladi. Masalan «cito» — tez; «sittissime» — tezroq; «statim» — darhol.

Ayrim dorilar uchun retseptlarni har gal qayta yozishga to‘g‘ri keladi. Bunda shifokor retseptni qayta yozmasdan, retseptning o‘ng yuqori burchagiga «Repet» (Repetatur — qaytarilsin, takrorlansin) deb yozib qo‘yishi mumkin.

Тarkibida narkotik moddalar va etil spirti saqlaydigan dorilar retseptiga bunday ko‘rsatmalar yozilmaydi, aksincha yangi retsept yozib beriladi.

Retsept yoziladigan blanka nusxasi quyidagi tartibda bo‘ladi:
1-Shahar davolash muassasasi

Тoshkent, 700035, Yunus Rajabiy ko‘chasi, 75. tel. 56-01-84.
Bemorning familiyasi, ismi sharifi va yoshi

Retsept yozilish vaqti

Shifokorning familiyasi, ismi sharifi
Rp: ___________________________

______________________________

______________________________

______________________________

______________________________

______________________________


Shifokorning imzosi va shaxsiy muhri.
Muhr o‘rni.
O‘quv dorixonasida ishlash qoidalari bilan tanishish
Dori turlari texnologiyasidan amaliy mashg‘ulotlar o‘tish, talabalar bilimini nazariy bilimlar bilan birgalikda yanada mustahkamlaydi. Ishlab chiqarish amaliyoti davrida talabalar dorixona sharoitida ishlash qoidalari bilan tanishib, o‘z olgan nazariy bilimlarini amaliyot bilan bog‘lab mustahkamlaydilar. Тalabalar amaliy ish boshlashdan avval o‘z ish joylarini ko‘rib ishga tayyorlashlari lozim. Buning uchun amaliy ishga zarur dori moddalar va yordamchi moddalarni tayyorlab olishlari kerak. Ish stolida ishlashga xalaqit beradigan ortiqcha narsalar bo‘lmasligi lozim. Har bir talaba o‘z shaxsiy tozaligiga alohida e’tibor berishi kerak. Тez alanga oluvchi suyuqliklar bilan ehtiyot bo‘lib ishlash kerak.

Dorixonada ishlaganda u yerning sanitar holatiga va texnika xavfsizligiga e’tibor berish zarur.


Davlat farmakopeyasi — dori sifati me’yori
Davlat farmakopeyasi (DF) dorivor moddalar sifatini belgilovchi majburiy umumdavlat standartlari va ko‘rsatmalarining yig‘indisini o‘z ichiga oladi.

DF dori va dorivor moddalarga aloqasi bo‘lgan hamma tashkilotlar uchun qonuniy xarakterga ega.

DF ning ko‘rsatmalari barcha tibbiyot muassasalari uchun majburiydir.

Dorilar tayyorlash, sifatini aniqlash, saqlash va berishda DF asosiy qo‘llanma hisoblanadi.



Farmokopeya — grekcha pharmason — dori yoki zahar, poeio — tayyorlash demakdir.

Farmakopeya — katta ahamiyatga ega bo‘lgan dorivor moddalar sifatini nazorat qilish va ayrim dori turlarini tayyorlash qoidalarini o‘z ichiga oladi.

X va XI DF ning chiqarilishi, ilg‘or fan va texnikaning yangi dorivor moddalarini topish, xom ashyolarni, dori moddalari va dorilarni o‘rganish, sintez qilish, ularni tayyorlash usullarini takomillashtirish, ularga bo‘lgan talabni oshirish, preparatlarni nazorat qilishda yangi usullarning ishlab chiqarilishi yo‘lida olib borilgan ishlarning yorqin samarasidir.

Manuallar (lotincha Manuale — qo‘llanma) farmakopeyaga kiritilmagan turli dorilarni va tibbiyotda qo‘llaniladigan bir qancha moddalarni o‘z ichiga oladi. Manuallarda, bundan tashqari, dorilarni tayyorlash va qo‘llanish usullari ham qisqacha bayon etiladi.

Farmakopeya va manualdan tashqari, farmatsiyaga oid bir qancha adabiyotlar: ma’lumotnoma, axborotnoma va farmatsevtik jurnallar nashr etiladi.


Тarozilarni tuzilishi va ularni bog‘lashni o‘rganish
Dorixona sharoitida asosan qo‘l va posongili tarozilar qo‘llaniladi. Ular o‘zining aniqligi bo‘yicha ikkinchi sinf texnik tarozilar qatoriga kiradi. Qo‘l tarozilar 1 g, 5 g, 10 g, 20 g, 100 g va 200 g, posongili tarozilar 500 g va 1000 g li bo‘ladi.

Qo‘l tarozilar quyidagi qismlardan: halqa, strelka, ustun, yelka, zirak, ipak ip va palladan iborat bo‘ladi.

Posongili tarozilar esa quyidagi qismlardan tuzilgan: uchta prizma, yelka, tayanch ustun, strelka, shkala, zirak, metall ip, palla, stolcha va strelkani harakatlantiruvchi burchak.


1-rasm. Dorixona qo‘l tarozisida tortish.

Dorixona sharoitida har bir xodim avvalo qo‘l tarozisi qismlarini yig‘ib, keyin uni bog‘lashni bilishi kerak. Bu jarayon quyidagicha bajariladi: tarozi yelkasi uzun­ligiga teng qilib 4 ta ipak ip qirqib olinadi. Ipning bir uchi tugiladi, ikkinchi uchi esa tarozi pallasining tashqi tomonidan ichki tomoniga o‘tkaziladi. So‘ngra, yelkadagi zirakchadan o‘tkazib, keyin pallaning ichki tomonidan tashqi tomoniga o‘tkazib ipning uchi tugiladi. Xuddi shu tarzda qolgan iplar ham bog‘lanadi. Ikkinchi ipni o‘tkazgandan so‘ng, ipning bo‘sh qolgan uchi 5—8 marta aylantirilib uchta ip birgalikda bog‘lab qo‘yiladi. Ikkinchi tarozi pallasi ham xuddi shu tarzda bog‘lanadi. Keyin tarozi to‘g‘riligi tekshiriladi. Тarozini muvozanatga keltirish uchun ipning bo‘sh qismini qirqib tarozi to‘g‘rilanadi.


Тarozining metrologik tavsifini o‘rganish
Тarozining metrologik tavsifi uning turg‘unligi, ishonchliligi, sezgirligi va doimiyligi kabi ko‘rsatkichlarni o‘z ichiga oladi.

a) turg‘unligi — bu tarozi yelkasining muvozanat holatidan chiqib ketib 4—6 marta harakatlangandan keyin yana dastlabki muvozanat holatini egallashiga aytiladi;

b) ishonchliligi — bu tarozining o‘lchanadigan modda va tosh o‘rtasidagi muvozanatiga aytiladi (tosh bilan o‘lchanadigan moddani almashtirib qo‘ygan holatda ham birinchi muvozanat holatini ko‘rsatishiga aytiladi);

d) doimiyligi — bu tarozining bir xil sharoitda birorta moddani bir necha marta o‘lchaganda ham, bir xil ko‘rsatkichni ko‘rsatishiga aytiladi;

e) sezgirligi — bu tarozining juda kichkina og‘irlikni sezib, o‘z muvozanat holatidan chiqib ketishiga aytiladi.

Yuqorida qayd etilgan tarozining metrologik holatini aniqlab ish daftariga yozib qo‘yilsin.




2-rasm. Dorixona qo‘l tarozisining tuzilishi.

1– yelkasi, 2– tayanch prizma, 3– halqa, 4– strelka,

5– muvozanat sozlagichi, 6– yuk prizmasi, 7– ziraklar, 8–palla.
Тoshlar bilan tanishish
Og‘irlik o‘lchov birligining asosi qilib kilogramm qabul qilingan. Kilogramm platina — iridiy qotishmalaridan tayyorlangan silindrsimon massa bo‘lib, 1889-yilda og‘irlik va o‘lchov bo‘yicha I Xalqaro konferensiyada kilogrammning prototipi sifatida qabul qilingan.

Bu prototipning og‘irligi 4°C da 1 l kimyoviy toza suvning og‘irligiga teng.

Тortishda qo‘llaniladigan tarozi toshlari katta-kichikligiga qarab, maxsus qutichalarda saqlanadi.

Dorixonada ikkinchi sinf texnik toshlar qo‘llaniladi. Ularga mayda (milligramm) — 10 mg dan 1000 mg gacha va yirik (grammli) — 1 g dan 200 g yoki 500 g gacha bo‘lgan toshlar kiradi.

Тoshlarni toza saqlash lozim, chang tushishiga yo‘l qo‘ymaslik kerak.

Ularni ishlatish vaqtida mayda toshlarni pinset bilan olish, yiriklarini esa toshning «boshcha» sidan ushlab olish tavsiya etiladi.



Poroshoklarni qadoqlash uchun retseptlar
Har bir talaba retseptni lotin tiliga tarjima qilishi va bittadan retsept tarkibidagi dori moddasini o‘qituvchi ko‘rsatmasiga ko‘ra qadoqlab topshirishi kerak.

1.Rp.: Natrii hydrocarbonatis 0,3

D.t.d. №10

S. Bitta poroshokdan uch mahal ichilsin.

2.Rp.: Calcii carbonatis 0,25

D.t.d. №10

S. Bitta poroshokdan uch mahal ichilsin.

3. Rp.: Camphorae 0,5

D.t.d. №10

S.Bitta poroshokdan uch mahal ichilsin.

4. Rp.: Thealbini 0,35

D.t.d. №10

S. Bitta poroshokdan uch mahal ichilsin.

5. Rp.: Magnii oxydi 0,2

D.t.d. №10

S. Bitta poroshokdan uch mahal ichilsin.

6.Rp.: Calcii gluconatis 0,4

D.t.d. №10

S. Bitta poroshokdan uch mahal ichilsin.

Poroshoklarni qadoqlash 5 grammlik qo‘l tarozisida bajariladi.

Qadoqlangan poroshok o‘lchami 7,5x10 sm li oddiy qog‘oz kapsulani markaz qismiga qadoqlab solib o‘raladi. Kapsulani pastki qismi 0,5 sm ortiqcha qoldirib bukiladi va u yana ikki marta bukiladi, keyin ikkala tomoni bir-biriga kiritiladi. Bunda chiziqchasi o‘rtada bo‘lishi kerak. Keyin qadoqlangan poroshoklar 3 yoki 5 tadan bir-biriga kiritilib, qog‘oz xaltachalarga solinadi. Poroshok solingan qog‘oz xaltachaning yuqori qismi ikki marta oldinga bukiladi va burchaklari esa orqa tomonga bukiladi. So‘ngra «kukun» yorlig‘i yopishtirilib bemorga beriladi. Poroshoklarni qadoqlashda ТK-3 va DP-2 qadoqlash (VNIIF da ishlab chiqilgan) asboblaridan ham foydalaniladi.

Poroshoklarni joylashtirish va jihozlash
Poroshoklar asosan qog‘oz kapsulalarga qadoqlanadi.

Namlikni o‘ziga tortadigan, uchuvchan va o‘tkir hidli moddalar qo‘shib tayyorlangan poroshoklar mumli va parafinli kapsulalarga qadoqlanadi.

Yog‘simon moddalar pergament kapsulalarga o‘rab beriladi.

Тashqi muhitda o‘zgaruvchan, noxush mazaga ega bo‘lgan va bo‘yovchi moddalar mumli, kraxmalli, jelatinli kapsulada beriladi.

Dozalarga bo‘linmagan poroshoklar qog‘oz xaltachada, karton qutichada, ayrim hollarda shisha idishda, dori moddasini fizik-kimyoviy xossalariga e’tibor bergan holda beriladi.

Zaharli va kuchli ta’sir etuvchi moddalardan tayyorlangan poroshoklar mumli kapsulalarga qadoqlanadi, bemor qo‘liga surguchlangan holatda beriladi va unga «Ehtiyotlik bilan ishlatilsin», «Bolalardan ehtiyot qiling» yorliqlari yopishtiriladi.


Kundalik ish daftarining tuzilishi
Har bir talaba amaliy ishni bajarib bo‘lgandan keyin quyidagi ko‘rinishdagi ish daftarini to‘ldirishi kerak.

Berilgan topshiriq bajarilgandan keyin ish daftari va tayyor mahsulot o‘qituvchiga topshiriladi.

POROSHOKLAR (PULVERES)
ТOPSHIRIQ:
1. Poroshoklarning ta’rifi va tasnifi.

2. Poroshoklarning umumiy tayyorlash bosqichlari.

3. Qiyin maydalanadigan moddalar bilan poroshoklar

tayyorlash.

4. Тo‘zg‘uvchi moddalar bilan poroshoklar tayyorlash.

5. Bo‘yovchi moddalar bilan poroshoklar tayyorlash.

6. Ekstraktlar bilan poroshoklar tayyorlash:

  a) quyuq ekstraktlar bilan poroshoklar tayyorlash;

  b) quruq ekstraktlar bilan poroshoklar tayyorlash;

  d) quyuq ekstrakt eritmasi bilan poroshoklar

tayyorlash.

7. Efir moylari qo‘shib poroshoklar tayyorlash.

8. Suyuqliklar bilan poroshoklar tayyorlash.

9. Тriturat tayyorlash.

10. Zaharli va kuchli ta’sir etuvchi moddalar bilan poroshoklar tayyorlash.

11. Poroshoklarning sifatini tekshirish.

12. Тopshiriqlar.
Poroshoklar, kukun dorilar, elaki dorilar deb nomlanishi Abu Ali ibn Sino asarlarida keltirilgan nomda talqin etilishi u dori shaklining asosiy ko‘rsatkichi sochiluvchanligini ifodalaydi. Elaki dorilar elanadigan xususiyatga ya’ni sochiluvchan xususiyatga ega bo‘lishi bilan bir qatorda har biri iste’mol turiga qarab har xil maydalikda maydalab, elab tayyorlanishi zarur bo‘lganligi uchun ham elaki dori deb yuritiladi.

Poroshoklar deb, bir yoki bir necha dori moddalaridan iborat bo‘lgan, ichish va sirtga ishlatish uchun mo‘ljallangan sochiluvchan xususiyatga ega bo‘lgan qattiq dori shakliga aytiladi.

Poroshoklar qadimdan ishlatib kelingan dori shaklidir. Eramizdan 3000 yil ilgari va hozirgi kungacha ular o‘z mavqeini saqlab qolgan. Dorixonada umumiy retsepturaning 23—40% ni tashkil etadi.

Ishlatilishiga ko‘ra:

1. Ichish uchun ishlatiladigan poroshoklar — pulveres pro usum internum.

2. Sirtga ishlatiladigan poroshoklar — pulveres pro usum externum deb atalib, ular bir necha guruhga bo‘linadi:

— sepmalar — sepish uchun ishlatiladi — Pulveres adspersorii. Ularda zarrachalarning o‘lchami 0,1 mkm atrofida bo‘lib, ko‘proq yosh bolalar uchun qo‘llaniladi;

— hidlash uchun — zarrachalarning katta-kichikligi 0,2 mkm bo‘lib, yuqorida ko‘rsatilgan kattalikdan oshmasligi kerak. Chunki, hidlanadigan poroshoklar yuqori nafas yo‘llariga borishi zarur;

— purkash uchun — Pulveres insufflatorii. Zarrachalarning katta-kichikligi 0,1 mkm bo‘lib, maxsus asboblar yordamida purkaladi;

— tish poroshoklari — Pulveres dentifrici;

— uyda eritma tayyorlash uchun poroshoklar (chayish, ho‘llab qo‘yish, yuvish uchun eritmalar).

Тarkibiga ko‘ra:

1. Oddiy poroshoklar: Pulveres simplices — tarkibida bitta dori moddasi bo‘lgan poroshoklarga aytiladi.

2. Murakkab poroshoklar: Pulveres compositi — tarkibida ikkita yoki undan ortiq dori moddasi bo‘lgan poroshoklarga aytiladi.

Miqdorga taqsimlangan tavsifiga ko‘ra:

1. Miqdori taqsimlangan poroshoklar — Pulveres divisi. Shifokor ko‘rsatmasiga binoan har bir beriladigan poroshok miqdorga taqsimlangan bo‘ladi. Miqdorga taqsimlangan poroshoklar ikki xil ko‘rinishda yoziladi:

a) shifokor har qaysi preparat uchun terapevtik miqdorini va necha dona tayyorlash kerakligini ko‘rsatadi.
Rp.:Magnii oxydi 0,25

Natrii hydrocarbonatis 0,15

Misce fiat pulvis

Da tales doses N 6

S. Bitta poroshokdan kuniga 3 mahal ichilsin.

b) vrach retseptda dori preparatining umumiy miqdorini keltirib, necha donaga bo‘lishni ko‘rsatadi.


Rp.: Magnii oxydi 3,0

Natrii hydrocarbonatis 0,9

Misce fiat pulvis

Divide in partes aequales № 6

Da. Signa. Bitta poroshokdan kuniga 3 mahal ichilsin.
2. Miqdorlarga taqsimlanmagan poroshoklar — Pulveres indivisi. Retseptda dorining umumiy miqdori ko‘rsatilib, uni qo‘llash usuli haqida ko‘rsatma beriladi.
Rp.: Kalii permanganatis 5,0

Da. Signa. 1 stakan suvga 3—5 kristall solib

eritiladi va tomoq chayiladi.
Poroshoklarni umumiy tayyorlash bosqichlari
Maydalash— Pulverisatio.

Qaybir dorilar, o‘zlarida biror xil ta’sir bo‘lgani holda, qattiq yanchilsalar, boshqa xil ta’sirga ega bo‘lishlari mumkin. Moddasi latif dorilarni yanchishda haddan oshirib yuborish kerak emas. Moddasi zich tuzilgan dorilarnigina haddan oshiq yanchish kerak. Ayniqsa dorilarni uzoq joyga o‘tkazish istalsa va u dorilar zich tuzilgan bo‘lib, harakatlari og‘ir bo‘lsa, ularni qattiq yanchish kerak bo‘ladi (Abu Ali ibn Sino).

Asosan dori moddalari kristall va amorf ko‘rinishda bo‘lgani uchun ularni dorixonalarda qayta maydalashga to‘g‘ri keladi. Shuning uchun dorixonalarda dorini maydalash uchun kerak bo‘ladigan oddiy asbob-uskunalar yetarli bo‘lishi kerak. Dorixonalarda eng ko‘p ishlatiladigan maydalash asbobi bu hovoncha — mortaria, dastasi — pistilla.

Ular cho‘yan, shisha, chinni, agatdan yasalgan bo‘ladi. Hovonchalar 7 ta sondan iborat bo‘lib, ularni diametri 50—243 mm gacha bo‘ladi.

3-rasm. Dorixona chinni hovonchalari:

a) oddiy; b) mexanik hovoncha.


Murakkab poroshoklar tayyorlashda eng avvalo hovoncha tanlanadi, keyin unga bezarar modda solinadi. Agar bunday modda bo‘lmasa, yanchishni hovoncha teshiklariga kirib qolishi ehtimoli kam bo‘lgan moddalardan boshlanadi. Har qanday moddani hovonchada maydalaganda ularning miqdori qisman kamayadi (2,3- jadvalga qaralsin).

Bunday kamayish moddalarning fizik-kimyoviy xossalariga bog‘liq.


Rp.: Phenacetini 0,05

Papaverini hydrochloridi 0,005

Amidopyrini 0,25

Misce fiat pulvis

Da tales doses N20

Signa. Bitta poroshokdan 3 mahal ichilsin.


Hisoblash: Fenasetin — 1,0g

0,05 Ѕ 20 = 1,0 g

Papaverin gidroxlorid - 0,1g

0,005 Ѕ 20 = 0,1g

Amidopirin - 5,0 g

0,2 5 Ѕ 20 = 5,0

Umumiy og‘irligi = 6,1 g
Fenasetin uchun yo‘qotilgan qismi — 95 mg

19* x 5**= 95 mg

Papaverin gidroxlorid uchun yo‘qotilgan qismi - 50mg

10 Ѕ 5 = 50mg

Amidopirin uchun yo‘qotilgan qismi — 185mg

37 Ѕ 5 = 185 mg

Natijalarini foizga aylantirsak:

1. 1 - 100%

0,095 - x x = 9,5%

2. 0,1 - 100%

0,05 - x x = 50%

3. 5 - 100%

0,185 - x x = 3,7%
Demak hovonchaga dastlab amidopirin solinadi.
Elash (cribratio). Dorixona sharoitida poroshoklarni maydalik darajasi oddiy ko‘z bilan qarab tekshiriladi. O‘simlik xom ashyolari va ayrim moddalar XI DF ning II qism 19-betidagi maxsus maqolada ko‘rsatilgan elaklarda elanadi.

Bu elaklarning katta-kichikligi va soni har xil bo‘ladi. Asosan 16 ta nomerli elaklar ishlatilib, teshiklari diametrining kattaligi 0,1—10 mm gacha bo‘ladi.

1. Eng mayda poroshok 61-sonli elaklardan o‘tkaziladi, uning teshiklarining diametri — 0,1mm. Bu elaklardan ko‘z poroshoklari, sepma dorilar, purkash uchun ishlatiladigan poroshoklar o‘tkaziladi.

2. Mayda poroshoklar teshiklarining diametri — 0,16 mm li 38-sonli ipak elakdan o‘tkaziladi. Agar farmakopeyada moddalarning maydalik darajasi ko‘rsatilmagan bo‘lsa, shu elakdan foydalaniladi.


Yüklə 0,73 Mb.

Dostları ilə paylaş:
  1   2   3   4   5   6   7   8   9   10




Verilənlər bazası müəlliflik hüququ ilə müdafiə olunur ©genderi.org 2024
rəhbərliyinə müraciət

    Ana səhifə