Əcnəbilərin və vətəndaşlığı olmayan şəxslərin hüquqi
vəziyyəti haqqında
Azərbaycan Respublikasının Qanunu
I fəsil. Ümumi müddəalar
Maddə 1. Qanunun məqsədi
Bu Qanun Azərbaycan Respublikasında əcnəbilərin və vətəndaşlığı olmayan şəxslərin
hüquqi vəziyyəti ilə bağlı ictimai münasibətləri tənzimləyir.
Maddə 2. Əsas anlayışlar
Əcnəbilər — Azərbaycan Respublikasının vətəndaşı olmayan və başqa dövlətin
vətəndaşlığına mənsub olan şəxslərdir.
Vətəndaşlığı olmayan şəxslər — Azərbaycan Respublikasının vətəndaşı olmayan və
başqa dövlətin vətəndaşlığına mənsub olmayan şəxslərdir.
İmmiqrasiya — «İmmiqrasiya haqqında» Azərbaycan Respublikasının Qanunu ilə
müəyyən edilmiş qaydada əcnəbilərin və ya vətəndaşlığı olmayan şəxslərin Azərbaycan
Respublikasına müvəqqəti və ya daimi yaşamağa gəlməsi.
İmmiqrant — «İmmiqrasiya haqqında» Azərbaycan Respublikasının Qanunu ilə müəyyən
edilmiş qaydada Azərbaycan Respublikasına gələn əcnəbilər və ya vətəndaşlığı olmayan
şəxslər.
Azərbaycan Respublikasına digər qanuni əsaslarla (turizm, şəxsi işi ilə bağlı, xidməti
ezamiyyətə gəlmiş və sair bu kimi müvəqqəti xarakter daşıyan hallarla əlaqədar gəlmiş,
immiqrant statusu olmayan) gələn əcnəbilər və vətəndaşlığı olmayan şəxslər Azərbaycan
Respublikasında müvəqqəti olan hesab edilirlər.
Maddə 3. Əcnəbilərin və vətəndaşlığı olmayan şəxslərin hüquqi vəziyyəti haqqında
qanunvericilik
Əcnəbilərin və vətəndaşlığı olmayan şəxslərin hüquqi vəziyyəti Azərbaycan
Respublikasının Konstitusiyası, bu Qanun, «Ölkədən getmək, ölkəyə gəlmək və
pasportlar haqqında» Azərbaycan Respublikasının Qanunu, «İmmiqrasiya haqqında»
Azərbaycan Respublikasının Qanunu və bu Qanunlara müvafiq qəbul edilən Azərbaycan
Respublikasının digər qanunvericilik aktları, habelə Azərbaycan Respublikasının iştirakçı
olduğu beynəlxalq müqavilələri ilə müəyyən edilir.
Maddə 4. Əcnəbilərin və vətəndaşlığı olmayan şəxslərin hüquqi vəziyyətinin
əsasları
Azərbaycan Respublikasının Konstitusiyası, bu Qanun, Azərbaycan Respublikasının
digər qanunları və Azərbaycan Respublikasının iştirakçısı olduğu beynəlxalq
müqavilələri ilə digər qaydalar müəyyən edilməyibsə, əcnəbilər və vətəndaşlığı olmayan
şəxslər Azərbaycan Respublikası vətəndaşları ilə bərabər bütün hüquqlardan və
azadlıqlardan istifadə edirlər və bütün vəzifələri yerinə yetirirlər.
Əcnəbilərin və vətəndaşlığı olmayan şəxslərin hüquq və azadlıqlarının həyata keçirilməsi
Azərbaycan Respublikasının milli mənafeyinə zidd olmamalıdır. Əcnəbilər və
vətəndaşlığı olmayan şəxslər Azərbaycan Respublikasının, Konstitusiyasının,
Azərbaycan Respublikasının qanunlarının və digər qanunvericilik aktlarının tələblərinə
riayət etməli, Azərbaycan xalqının adət və ənənələrinə hörmət etməlidirlər.
Xarici dövlət onun ərazisində Azərbaycan Respublikası vətəndaşlarının hüquq və
azadlıqlarının həyata keçirilməsinə məhdudiyyət qoyduqda Azərbaycan Respublikasının
qanunu ilə Azərbaycan Respublikasının ərazisində eyni məhdudiyyətlər həmin dövlətin
vətəndaşları üçün müəyyən edilə bilər. Belə qanun onun qəbul edilməsinə əsas olan hallar
aradan qaldırıldıqda ləğv olunur.
Əcnəbilər və vətəndaşlığı olmayan şəxslər onların sosial və əmlak vəziyyəti, irqi və milli
mənsubiyyəti, cinsi, dili, dinə münasibəti, fəaliyyətinin növü və xarakterindən və digər
hallardan asılı olmayaraq Azərbaycan Respublikasında qanun və məhkəmə qarşısında
bərabərdirlər.
Azərbaycan Respublikası ərazisindəki əcnəbilərin və vətəndaşlığı olmayan şəxslərin
hüquq və azadlıqları yalnız Azərbaycan Respublikası Konstitusiyasının 69-cu maddəsinin
2-ci hissəsində müəyyən edilmiş qaydada məhdudlaşdırıla bilər.
Maddə 5. Əcnəbilər və vətəndaşlığı olmayan şəxslərin Azərbaycan Respublikası
ərazisində müvəqqəti və ya daimi yaşamaları və müvəqqəti olmaları
Əcnəbilər və vətəndaşlığı olmayan şəxslər immiqrasiya kvotalarına riayət olunmaqla
«İmmiqrasiya haqqında» Azərbaycan Respublikasının Qanunu ilə müəyyən edilmiş
qaydada immiqrasiyaya icazə aldıqda Azərbaycan Respublikasına daimi və ya müvəqqəti
yaşamağa gələ bilərlər və bu halda immiqrant statusu alırlar.
Kvotadan kənar immiqrant statusu aşağıdakı şəxslərə verilə bilər:
Azərbaycan Respublikasının vətəndaşları ilə yaxın qohumluğu olduqda;
Azərbaycan Respublikasında daimi yaşayan şəxslə nigahda olduqda;
Azərbaycan Respublikasının qanunları ilə nəzərdə tutulmuş digər hallarda.
İmmiqranta müvafiq icra hakimiyyəti orqanı tərəfindən onun statusunu təsdiq edən sənəd
verilir.
Azərbaycan Respublikasına yaşamağa gələn immiqrant (onun ailə üzvləri) Azərbaycan
Respublikasının qanunvericiliyi ilə müəyyən olunmuş qaydada qeydiyyata alınır.
Digər qanuni əsaslarla Azərbaycan Respublikasının ərazisində olan əcnəbilər və
vətəndaşlığı olmayan şəxslər Azərbaycan Respublikasında müvəqqəti olan hesab
edilirlər.
Azərbaycan Respublikası ərazisində müvəqqəti olan əcnəblər və vətəndaşlığı olmayan
şəxslər qanunvericiliklə müəyyən edilmiş qaydada qeydiyyata alınmalıdır və onlar üçün
müəyyən olunmuş müddətlər qurtardıqdan sonra Azərbaycan Respublikasını tərk
etməlidirlər.
Şəxsiyyətini müəyyən etmək mümkün olmayan əcnəbi və ya vətəndaşlığı olmayan insan
alveri qurbanlarına Azərbaycan Respublikasında yaşamaq hüququ verilə bilməz. Belə
şəxslərin Azərbaycan Respublikasının hüdudlarından kənara inzibati qaydada
çıxarılması üçün tədbirlər görülür.
Maddə 6. Siyasi sığınacaq verilməsi
Azərbaycan Respublikasının Konstitusiyasına və qanunvericiliyinə müvafiq olaraq
Azərbaycan Respublikası əcnəbilərə və vətəndaşlığı olmayan şəxslərə siyasi sığınacaq
verir.
Maddə 7. Qaçqın statusu verilməsi
Əcnəbilərə və vətəndaşlığı olmayan şəxslərə «Qaçqınların və məcburi köçkünlərin ölkə
daxilində köçürülmüş şəxslərin statusu haqqında» Azərbaycan Respublikası Qanunu və
Azərbaycan Respublikasının iştirakçısı olduğu beynəlxalq müqavilələri ilə müəyyən
olunmuş qaydada qaçqın statusu verilə bilər.
Maddə 8. Azərbaycan Respublikası vətəndaşlığının əldə edilməsi
Azərbaycan Respublikasının Konstitusiyası və «Azərbaycan Respublikasının vətəndaşlığı
haqqında» Azərbaycan Respublikasının Qanunu ilə müəyyən edilmiş qaydada əcnəbilər
və vətəndaşlığı olmayan şəxslər Azərbaycan Respublikası vətəndaşlığı əldə edə bilərlər.
II fəsil. Əcnəbilərin və vətəndaşlığı olmayan şəxslərin
hüquqları, azadlıqları və vəzifələri
Maddə 9. Toxunulmazlıq hüququ
Azərbaycan Respublikası ərazisində olan əcnəbilərin və vətəndaşlığı olmayan şəxslərin
Azərbaycan Respublikasının Konstitusiyası və Azərbaycan Respublikasının digər
qanunvericilik aktlarına müvafiq olaraq şəxsi toxunulmazlıq və mənzil toxunulmazlığı
hüquqları vardır.
Azərbaycan Respublikasının qanunları ilə müəyyən edilmiş qaydada tutulmuş, yaxud
həbs olunmuş əcnəbilərə və vətəndaşlığı olmayan şəxslərə bu hərəkətlərə səbəb olan
hallar və onların hüquqları haqqında dərhal məlumat verilməlidir.
Əcnəbini və Azərbaycan Respublikasında müvəqqəti olan vətəndaşlığı olmayan şəxsi
tutmuş, yaxud həbs etmiş orqan və vəzifəli şəxs bu haqda dərhal Azərbaycan
Respublikasının Xarici İşlər Nazirliyinə məlumat verməlidir.
Maddə 10. Əcnəbilərin və vətəndaşlığı olmayan şəxslərin Azərbaycan Respublikası
ərazisində hərəkət etmək və yaşayış yeri seçmək hüququ
Əcnəbilər və vətəndaşlığı olmayan şəxslər Azərbaycan Respublikasının qanunvericiliyi
ilə müəyyən edilmiş qaydada Azərbaycan Respublikasının ərazisində hərəkət edə və
yaşayış yeri seçə bilərlər.
Hərəkət etməyə və yaşayış yeri seçməyə məhdudiyyətlərə ancaq Azərbaycan
Respublikasının qanunları ilə müəyyən olunmuş qaydada yol verilir.
Maddə 11. Əmək hüququ
Azərbaycan Respublikasının qanunvericiliyi və Azərbaycan Respublikasının iştirakçısı
olduğu beynəlxalq müqavilələri ilə digər qaydalar müəyyən olunmayıbsa, əcnəbilər və
vətəndaşlığı olmayan şəxslər əmək münasibətlərində Azərbaycan Respublikasının
vətəndaşları ilə eyni hüquqlardan istifadə edir və eyni vəzifələri daşıyırlar.
Azərbaycan Respublikasına müəyyən müddət əmək fəaliyyəti ilə məşğul olmaq üçün
gəlmiş əcnəbilər və vətəndaşlığı olmayan şəxslər əmək fəaliyyəti ilə müəyyən olunmuş
qaydada məşğul ola bilərlər.
Müəyyən vəzifələr tutmaq, yaxud müəyyən fəaliyyət növləri ilə məşğul olmaq
Azərbaycan Respublikası vətəndaşlığı ilə şərtləndirildiyi hallarda əcnəbilər və
vətəndaşlığı olmayan şəxslər belə vəzifələr tuta və belə fəaliyyətlə məşğul ola bilməzlər.
Maddə 12. İnvestisiya və sahibkarlıq fəaliyyəti hüququ
Əcnəbilər və vətəndaşlığı olmayan şəxslər Azərbaycan Respublikasının qanunvericiliyi
ilə nəzərdə tutulmuş qaydada investisiya və sahibkarlıq fəaliyyəti ilə məşğul ola bilərlər.
Bu halda onlar, Azərbaycan Respublikası qanunları ilə digər qaydalar nəzərdə
tutulmayıbsa, Azərbaycan Respublikasının vətəndaşları üçün müəyyən olunmuş
hüquqlardan istifadə edirlər və vəzifələri daşıyırlar.
Maddə13. Nigah hüququ və ailə münasibətləri
Əcnəbilər və vətəndaşlığı olmayan şəxslər Azərbaycan Respublikası vətəndaşları və digər
şəxslərlə nigah bağlaya və bağladıqları nigahı ləğv edə bilərlər.
Əcnəbilər və vətəndaşlığı olmayan şəxslər nigah və ailə münasibətlərində Azərbaycan
Respublikası vətəndaşları ilə eyni hüquqlara malikdirlər və eyni vəzifələri daşıyırlar.
Maddə 14. İstirahət hüququ
Əcnəbilər və vətəndaşlığı olmayan şəxslər Azərbaycan Respublikası vətəndaşları ilə eyni
əsaslarla istirahət hüququndan istifadə edirlər.
Maddə 15. Sağlamlığın qorunması hüququ
Əcnəbilərin və vətəndaşlığı olmayan şəxslərin Azərbaycan Respublikasının
qanunvericiliyi və Azərbaycan Respublikasının iştirakçısı olduğu beynəlxalq
müqavilələri ilə nəzərdə tutulmuş qaydada sağlamlığın qorunması hüququ vardır.
Maddə 16. Sosial təminat hüququ
Əcnəbilər və vətəndaşlığı olmayan şəxslər Azərbaycan Respublikasının qanunvericiliyi
və Azərbaycan Respublikasının iştirakçısı olduğu beynəlxalq müqavilələri ilə nəzərdə
tutulmuş qaydada sosial təminat hüququndan istifadə edirlər.
Pensiya təyin edilməsi üçün müəyyən iş stajı tələb olunduqda əcnəbilərin və vətəndaşlığı
olmayan şəxslərin Azərbaycan Respublikasının qanunvericiliyi və Azərbaycan
Respublikasının iştirakçısı olduğu beynəlxalq müqavilələri ilə nəzərdə tutulmuş qaydada
xaricdəki fəaliyyətləri iş stajına hesab edilə bilər.
Maddə 17. Mənzil hüququ
Azərbaycan Respublikasında daimi yaşayan əcnəbilərin və vətəndaşlığı olmayan
şəxslərin Azərbaycan Respublikasının qanunları ilə digər qaydada müəyyən edilməyibsə,
Azərbaycan Respublikasının vətəndaşları üçün müəyyən edilmiş əsaslarla və qaydada
dövlət, idarə və ictimai fondlarından mənzil almaq hüququ vardır.
Maddə 18. Vicdan azadlığı
Əcnəbilərin və vətəndaşlığı olmayan şəxslərin Azərbaycan Respublikasının vətəndaşları
ilə eyni əsaslarla vicdan azadlığı təmin edilir.
Əcnəbilər və vətəndaşlığı olmayan şəxslər tərəfindən dini təbliğat aparılması qadağandır.
Maddə 19. Təhsil hüququ
Azərbaycan Respublikasında daimi yaşayan əcnəbilər və vətəndaşlığı olmayan şəxslər
Azərbaycan Respublikasının vətəndaşları ilə eyni əsaslarla təhsil hüququna malikdirlər.
Başqa əcnəbilər və vətəndaşlığı olmayan şəxslər üçün, Azərbaycan Respublikasının
qanunları ilə və Azərbaycan Respublikasının iştirakçısı olduğu beynəlxalq müqavilələri
ilə başqa qaydalar nəzərdə tutulmayıbsa, təhsil (icbari ümumi orta təhsil istisna olmaqla)
pulludur.
Maddə 20. İctimai birliklərdə iştirak etmək hüququ
Azərbaycan Respublikasında daimi yaşayan əcnəbilərin və vətəndaşlığı olmayan
şəxslərin, Azərbaycan Respublikasının qanunları ilə və müvafiq birliklərin nizamnaməsi
ilə digər qaydalar nəzərdə tutulmayıbsa, ictimai birliklərə Azərbaycan Respublikasının
vətəndaşları ilə eyni əsaslarla daxil olmaq hüququ vardır.
Əcnəbilər və vətəndaşlığı olmayan şəxslər Azərbaycan Respublikasının siyasi
partiyalarının üzvü ola bilməzlər.
Maddə 21. Seçkilərə və ümumxalq səsvermələrinə (referendumlara) münasibət
Əcnəbilər və vətəndaşlığı olmayan şəxslər Azərbaycan Respublikasının
qanunvericiliyində nəzərdə tutulmuş hallar istisna olmaqla, aktiv və passiv seçki
hüququna malik deyillər.
Maddə 22. Hərbi mükəlləfiyyətə münasibət
Əcnəbilər və vətəndaşlığı olmayan şəxslər hərbi mükəlləfiyyət daşımırlar.
Maddə 23. Əcnəbilərdən və vətəndaşlığı olmayan şəxslərdən vergi və rüsum
tutulması
Əcnəbilər və vətəndaşlığı olmayan şəxslərdən vergi və rüsumlar tutulması Azərbaycan
Respublikasının qanunları və Azərbaycan Respublikasının iştirakçısı olduğu beynəlxalq
müqavilələri əsasında həyata keçirilir.
III fəsil. Əcnəbilərin və vətəndaşlığı olmayan şəxslərin
məsuliyyəti
Maddə 24. Əcnəbilərin və vətəndaşlığı olmayan şəxslərin məsuliyyətinin əsasları
Azərbaycan Respublikası ərazisində cinayət, ictimai və digər hüquqpozma törətmiş
əcnəbilər və vətəndaşlığı olmayan şəxslər Azərbaycan Respublikasının qanunvericiliyi ilə
nəzərdə tutulmuş qaydada məsuliyyət daşıyırlar.
Maddə 25. Azərbaycan Respublikasında olma və tranzit keçidi qaydalarının
pozulmasına görə məsuliyyət
Əcnəbilər və vətəndaşlığı olmayan şəxslər Azərbaycan Respublikasında olma qaydalarını
pozduqları hallarda:
Azərbaycan Respublikasında yaşama hüququ verən sənədlər olmadan yaşadıqda ;
Azərbaycan Respublikasında etibarsız sənədlər əsasında yaşadıqda;
qanunvericiliklə müəyyən edilmiş bir yerdən başqa yerə getmə, yaşayış yeri
seçmə və qeydiyyat və ya yazılma qaydalarına riayət etmədikdə;
işə düzələrkən müəyyən edilmiş qaydaları pozduqda;
olma müddəti qurtardıqdan sonra Azərbaycan Respublikası ərazisini vaxtında tərk
etmədikdə;
Azərbaycan Respublikası ərazisindən tranzit keçidi qaydalarına əməl etmədikdə
— Azərbaycan Respublikasının qanunvericiliyi ilə nəzərdə tutulmuş qaydada
məsuliyyət daşıyırlar.
Maddə 26. Azərbaycan Respublikasında əcnəbilərin vətəndaşlığı olmayan şəxslərin
olma müddətlərinin qısaldılması
Azərbaycan Respublikası qanunvericiliyinin tələblərini pozan əcnəbilərin və vətəndaşlığı
olmayan şəxslərin Azərbaycan Respublikasında olma müddətləri qısaldıla bilər.
Əcnəbilərin və vətəndaşlığı olmayan şəxslərin Azərbaycan Respublikasında daimi olma
müddətlərinin qısaldılması haqqında qərarı müvafiq dövlət orqanları qəbul edir.
Maddə 27. İmmiqrant statusu olmayan əcnəbilərin və vətəndaşlığı olmayan
şəxslərin Azərbaycan Respublikasının hüdudlarından kənara çıxarılması
Milli təhlükəsizliyin təmin olunması, ictimai asayişin mühafizəsi, əhalinin səhhəti,
hüquqları və mənafelərinin qorunması zəruriliyi olduqda və həmçinin Azərbaycan
Respublikasının immiqrant statusu olmayan əcnəbilərin və vətəndaşlığı olmayan
şəxslərin hüquqi vəziyyəti haqqında qanunvericiliyinin tələbləri kobud surətdə
pozulduqda əcnəbilər və vətəndaşlığı olmayan şəxslər qanunvericilikdə müəyyən edilmiş
qaydada müvafiq məhkəmənin (hakimin) qərarına əsasən Azərbaycan Respublikası
hüdudlarından kənara çıxarıla bilər.
İmmiqrant statusu olmayan əcnəbilərin və vətəndaşlığı olmayan şəxslərin Azərbaycan
Respublikasının hüdudlarından kənara çıxarılması Azərbaycan Respublikasının
qanunvericiliyində müəyyən edilmiş qaydada həyata keçirilir.
İmmiqrant statusu olmayan əcnəbilər və vətəndaşlığı olmayan şəxslər Azərbaycan
Respublikasının hüdudlarından kənara çıxarılması haqqında qərarda müəyyən olunmuş
müddətdə Azərbaycan Respublikasının ərazisini tərk etməlidirlər. Azərbaycan
Respublikası ərazisini tərk etməkdən boyun qaçıran immiqrant statusu olmayan əcnəbi və
vətəndaşlığı olmayan şəxs, müvafiq məhkəmənin (hakimin) qərarı əsasında tutulur və
məcburi qaydada Azərbaycan Respublikası hüdudlarından kənara çıxarılır. İmmiqrant
statusu olmayan əcnəbilərin və vətəndaşlığı olmayan şəxslərin Azərbaycan
Respublikasının hüdudlarından kənara çıxarılması haqqında qərardan məhkəməyə
şikayət verilə bilər. Şikayət verilməsi qərarın icrasını dayandırmır.
Müəyyən edilmiş qaydalara əsasən Azərbaycan Respublikası hüdudlarından kənara
çıxarılmalı olan əcnəbilər və vətəndaşlığı olmayan şəxslər məcburi dövlət daktiloskopik
qeydiyyatından keçməlidirlər.
Azərbaycan Respublikasının Cinayət Məcəlləsinin 52-ci maddəsinə müvafiq olaraq
əcnəbi və vətəndaşlığı olmayan şəxs Azərbaycan Respublikasının hüdudlarından kənara
məcburi çıxarıla bilər.
İmmiqrant statusu olmayan əcnəbi və ya vətəndaşlığı olmayan şəxs insan alverindən
zərər çəkmiş şəxs hesab olunduqda, onun barəsində 1 il müddətində Azərbaycan
Respublikasının hüdudlarından kənara inzibati qaydada çıxartma tətbiq edilmir. Bu
müddət başa çatdıqda, lakin əcnəbi və ya vətəndaşlığı olmayan şəxs insan alveri ilə bağlı
cinayət işləri üzrə cinayət təqibi orqanlarına yardım göstərdikdə, həmin şəxs barəsində
Azərbaycan Respublikasının hüdudlarından kənara inzibati qaydada çıxartma cinayət
təqibi başa çatanadək tətbiq olunmur. İnsan alverinin qurbanı olan uşaqlar barəsində
Azərbaycan Respublikasının hüdudlarından kənara inzibati qaydada çıxartma tətbiq
olunmur.
Maddə 27-1. İmmiqrantın Azərbaycan Respublikasının hüdudlarından kənara
çıxarılması
İmmiqrantın Azərbaycan Respublikasının hüdudlarından kənara çıxarılması
«İmmiqrasiya haqqında» Azərbaycan Respublikasının Qanunu ilə müəyyən olunmuş
qaydada həyata keçirilir.
IV fəsil. Yekun müddəaları
Maddə 28. Beynəlxalq müqavilələr
Azərbaycan Respublikasının iştirakçısı olduğu beynəlxalq müqavilələrdə bu Qanunda
müəyyən edilmiş qaydalardan fərqli qaydalar müəyyən edildikdə beynəlxalq
müqavilələrin qaydaları tətbiq edilir.
Maddə 29. Diplomatik immunitetə və imtiyazlara malik olan şəxslər barəsində bu
Qanunun tətbiqi
Bu Qanun Azərbaycan Respublikası qanunları və iştirakçısı olduğu beynəlxalq
müqavilələri əsasında diplomatik immunitetə və imtiyazlara malik olan şəxslərin
hüquqlarına toxunmur.
Azərbaycan Respublikasının Prezidenti
Heydər ƏLİYEV
Bakı şəhəri, 13 mart 1996-cı il
№ 41-IQ
Azərbaycan Respublikasının Qanunvericilik Toplusunda dərc edilmişdir (31 iyul 1997-
ci il, № 1, maddə 19) («VES Consultancy» LLC).
5 oktyabr 2001-ci il tarixli, 183-IIQD nömrəli; 12 oktyabr 2001-ci il tarixli, 203-IIQD
nömrəli; 12 oktyabr 2001-ci il tarixli, 207-IIQD nömrəli; 26 aprel 2002-ci il tarixli,
313-IIQD nömrəli; 4 iyun 2002-ci il tarixli, 339-IIQD nömrəli; 30 dekabr 2003-cü il
tarixli, 568-IIQD nömrəli; 30 dekabr 2003-cü il tarixli, 569-IIQD nömrəli; 30 dekabr
2005-ci il tarixli, 51-IIIQD nömrəli; 27 fevral 2007-ci il tarixli, 251-IIIQD nömrəli
qanunlara əsasən dəyişikliklər və əlavələrlə («VES Consultancy» LLC).
© VES Consultancy LLC
Dostları ilə paylaş: |