9
yə gəlməyə həvəsləndirirdi. Sovet Ermənistanının bu illərdə qazanmış olduğu sosial-iqtisadi və
mədəni nailiyyətlər bu komitənin xətti ilə təbliğ edilirdi (9, s.132).
Lakin, köçürülməsi nəzərdə tutulan bu qədər ermənini qəbul edib yerləşdirmək həmin tarixi
şəraitdə və iqtisadi şərtlər altında olduqca çətin bir məsələ idi. Belə ki, göstərilən vaxtlarda
müharibədən sonrakı bərpa dövrünün ciddi çətinliklərini yaşayan Ermənistanda bu qədər köçürülən
erməninin yerləşdirilməsi və lazımi yaşayış vasitələri ilə təmin edilməsi imkanları məhdud idi.
Buna görə də, 1945-ci ilin iyununda Sovet rəhbərliyi “Birinci Dünya Müharibəsi dövründə
Türkiyədən 1.500.000 civarında erməninin sürgün edildiyi və onların təkrar Ana Vətənlərinə
qayıtmaları üçün əvvəllər ermənilərə aid olduğu iddia edilən Qars və Ərdahanın Sovet
Ermənistanına qaytarılması” tələbi ilə çıxış etdi. Doğrudur Qərbin fəal dəstək verdiyi Türkiyənin
qəti müqaviməti nəticəsində bu siyasət iflasa uğradı. Lakin müharibədən siyasi-hərbi və diplomatik
cəhətdən xeyli güclənmiş çıxan Sovet İttifaqının öz ekspansiyasını Yaxın və Orta Şərqə yaymaq
məqsədilə erməni amilindən istifadə etməsi göz qabağında idi.
Türkiyəyə qarşı ərazi iddialarının baş tutmadığını görən erməni liderləri “Ana Vətənə
dönüş” layihəsinin tarixi Azərbaycan torpaqlarında həyata keçirməyə qərar verdilər. Ali dövlət
rəhbərinin yuxarıda göstərilən addımlarından cəsarətlənən erməni liderləri az sonra, noyabrın 28-də
DQMV-nin Ermənistana birləşdirilməsi məsələsini qaldırdılar (7, s.203). Ermənistan K(b)P MK nın
birinci katibi Q.Harutyunov 1945-ci ilin noyabrında heç bir əsaslı səbəb göstərmədən İ.Stalinə
məktubla müraciət edərək, Dağlıq Qarabağı Ermənistan SSR-ə birləşdirməyi xahiş etdi.
Həmin
məktub cavab üçün Azərbaycan rəhbərliyinə göndərildi. Lakin Azərbaycan rəhbərliyinin ciddi və
əsaslı arqumentlərinin nəticəsində məsələyə son qoyuldu və ermənilərin xahişi nəticəsiz qaldı.
Bununla belə, ermənilər ələ düşmüş fürsətdən istifadə etməyə çalışır, Azərbaycana qarşı
ərazi iddialarını sürdürürdülər. Q.Hartyunov xaricdən ermənilərin ölkəyə qayıtması ilə əlaqədar DQ
və Naxçıvanın Ermənistana birləşdirilməsini ÜİK(b)P MK katibi E.Malenkovla dəfələrlə müzakirə
etmişdi (5).
Həmin vaxtlarda erməni liderləri mərkəzdən gözlədikləri dəstəyi ala bilməsələr də belə
köçün başlanmasına və yeni təxribatlara hazırlaşırdılar. Artıq 1946-cı ilin əvvəlində 130 min erməni
Ermənistana köçmək arzusunda olduğunu bildirmişdi. “Hnçak” və “Ramkavar” partiyaları,
Ümumerməni Xeyriyyə İttifaqı köçürülmənin təşkili üçün 1 milyon dollar xərcləmişdi (6, s.364).
Prosesi sürətləndirmək məqsədilə SSRİ Ali Soveti özünün 19 oktyabr 1946-cı il tarixli fərmanı ilə
erməni repatriasiyasını artıq qanuniləşdirdi. Köç başladıqda isə Sovet Xüsusi Xidmət orqanları
mühacirətdən qayıdanları ən ciddi bir surətdə və davamlı yoxlamalardan keçirdikləri halda, erməni
mühacirlərinin kimliyinə çox vaxt göz yumurdular. Nəticədə çoxsaylı daşnaklar məqsədli surətdə
ölkəyə ayaq açdılar. Maraqlıdır ki, digər millətlərdən olan mühacirlərə rəsmi sənədlərdə
“reemiqrant” (“Mühacirətdən qayıdan adam”) deyildiyi halda, yalnız ermənilər “repatriant”
(“vətənə qaytarılan”) adlanırdı. Bu isə onlara əlahiddə yanaşmanı ifadə edirdi.
Ölkə daxilində və xaricindəki erməni ideoloqlarının birləşmiş səyləri nəticəsində “1946-cı il
ərzində Suriya, Yunanıstan, Livan, İran, Bolqarıstan və Rumıniyadan 50,9 min erməni Sovet
Ermənistanına qaytarıldı. 1947-ci ildə repartasiya olunanların yeni karvanları ilə Fələstin, Suriya,
Fransa, ABŞ, Yunanıstan, Misir, İraq, Livandan cəmi - 35,4 min erməni gəldi. 1948-ci ildə Suriya,
Livan, Fransa, ABŞ, Misir, Bolqarıstan və Rumıniyadan daha 10.000 nəfər qayıtdı. Beləliklə, 1946-
1948-ci illərdə 100.000 nəfərə yaxın erməni müxtəlif ölkələrdən vətənə qayıtdılar” (6, s.366).
Erməni liderlərinin səylərinə və xaricdəki erməni diaspor qurumlarının çox-saylı
yardımlarına baxmayaraq, bu 100 minlik kütlənin qəbul edilib yerləşdirilməsi olduqca çətin idi.
Digər tərəfdən xarici ölkələrdə rahat şəraitə alışmış ermənilər, yeni köçdükləri yerlərdə çətinliklərə
dözmür, narazılıqlarını bildirirdilər. Türkiyə və Azərbaycana qarşı ərazi iddialarının boşa çıxması
vəziyyəti daha da çətinləşdirirdi. Nəticədə layihənin davamı meydana çıxdı. İçində erməni kilsə
xadimlərinin də yer aldığı Ermənistan Respublikası
rəhbərliyi, habelə həmin
dövrlərdə ali partiya və
sovet orqanlarında yüksək vəzifələr tutan, A.Mikoyan və digərlərinin təşəbbüsü və təşkilatçılığı ilə
azərbaycanlıların Qərbi Azərbaycan ərazilərindəki tarixi torpaqlarından deportasiyası gündəmə
gəldi.