- Hə, - xatırladı, - bu böyüklər üçün nağıldı. Biri var idi, biri yox idi, bir döyüşçü var
idi. Yox, mən bu nağılı sənə sona qədər danışa bilmədim. Vaxtım çatmadı. Bir insan
ömrü bir nağılı sona çatdırmağa bəs eləmədi. Kiçik Zamin gəldi, böyük Zamin gedir.
Faiq deyən kimi oldu, ancaq cüzi fərqlə, alnından yox, kürəyindən vurdular. Anasını
düşünürdü, necə olacaqdı, oğlunun ölüm xəbərini eşidəndə nələr çəkəcəkdi.
Leninqrad universtitetini bitirən həmən uşaqlar da bundan sonra ad günlərində 21
yox, 20 açıqlama alacaqlar. Son dəfə öz doğma dilində anasını səslədi.
- Ana!
Hər şey bitdi.
Səs-küyə adamlar gəlirdilər, ona yaxınlaşmağa cürət eləyən yox idi. Bir rus qarısı
keçmiş bakılılardan idi, döyüşçünün son nəfəsdə kimi çağırdığını anlamışdı.
Bunların hamısının anası var idi, hamısını ana doğmuşdu, bəs niyə bir-birlərini
qırırdılar. Qarı səssizcə xaç çəkdi və ağladı.
Atəş səslərini eşidən qadın gəlib çatanda gördüyü mənzərədən sarsıldı.
Ona bu qədər yaxşılıqlar eləmiş oğlan dükanın qabağında, səkinin kənarındakı
yaşıllıqda cansız halda uzanmışdı.
Uzanmışdı payız ab-havası dolaşan uzaq, yad rus şəhərində, gözlərində bomboz
payız səması əks olunmuşdu.
Oğlan üçün dua eləyir, Tanrıya yalvarırdı, duaları oğlanı qoruya bilmədi.
Gözlərini qapamaq üçün oğlana yaxınlaşmaq istədi, ancaq qıçları əsdi, heysiz halda
səkinin üstündə oturdu. Əllərini dizlərinə döyüb qəlb didən səslə:
- Vay nənə…ə!!! – dedi.
MÜSTƏNTİQİN ƏRİ
Nazlı ərini yarımçəkmə ilə döyür, qışqırırdı, haçana kimi yava gəzəcəksən, haçana
kimi gözün şortuların arxasınca olacaq?
Onları ayırmaq istəyəndə onun da başına bir-iki çəkmə dəydi. Özünü lənətləyirdi,
adam, nə işinə, çıx yolunla get də, bunların günü dalaşmaqla keçir.
Bu gün ayıracaqsan, sabah yenə başlayacaqlar, sən bunları ayırmaq haqda
öhdəçilikmi götürübsən?
Arvadı onu aşkar heyrətlə qarşıladı.
- Göz-başın niyə qızarıb?
- Qızarıb?
- Hə də!
- Nazlı vurdu, - mızıldandı.
- Bilmək olarmı niyə? Əslində niyəsini bilirəm, amma səndən eşitmək pis olmazdı.
- Əri yava gəzir. Gözü yava gəzənlərin arxasıycandı.
- Bunun sənə nə dəxli? Əri yava gəzirsə, qoy ərini vursun. Səni niyə vurur?
- Bunu məndən yox, Nazlıdan soruşmaq lazımdır.
- Əzizim, canım-gözüm, - arvadı əzizim deyirdisə, demək, əsəbləri tüğyan
eləmişdi, canım-gözümü də əlavə eləyirdisə, artıq işlər şuluqdu, - Nazlı xanım burda
yoxdu, o səbəbdən də səndən soruşmalı olacağıq. Amma mənə qalarsa, soruşmağa
ehtiyac yoxdu, onsuz da hər şey məlumdur.
Lənətə gəlmiş çuqun qulplucanın vıyıltısını eşitdi, amma keri çəkilməyə fürsət
tapmadı, otaq gözlərində qaraldı, huşunu itirib ləsəlmiş halda divana çökdü.
Səhər onu işə yola salan qadın həmişəki tapşırığını verirdi, bax, yenə sənə deyirəm,
bu şortudan uzaq dur, yoxsa vayını verərəm. Hər dəfə də qulplucanı vuracağıma
umid eləyə bilməzsən, günlərin birində əlimə balta da keçə bilər.
Arxadan onu səsləyirdilər, Nazlı idi, lənət şeytana, yenə buna nə lazımdı, ərinə gücü
çatmır, acığını ondan çıxır. Mən də dayanacağa gedirəm, addımlarını yeyinlədib ona
çatan qadın dedi. Baxanda arvadı qısqanmaqda haqlıydı, gözəl qadındı, döşləri
deyirdin indicə koftasını deşəcək, mütənasib, adamı maqnit kimi cəzb eləyən bədəni
var idi.
- Gedirsən, get də. Mənsiz gedə bilməzsən?
- Minnətin olsun! – Nazlı dedi.
- Nəyə minnətim olmalıymış? Sayəndə dlincliyim yoxdur, hər gün müstəntiqə
hesabat verirəm.
- Hansı müstəntiqə?
- Arvadıma! Guya arvadımın müstəntiq olduğunu bilmirsən?
İkisi də eyni istiqamətə gedirdilər, amma qadınla eyni avtobusa minmək istəmirdi,
arvadı bunu haralara yozardı, məlum deyildi, niyə boş yerə risq eləsin? Qadın çıxıb
getsin, sonrakı avtobusa minərdi, hər on-on beş dəqiqədən bir avtobus gəlirdi.
Qadınsa sanki onu gözləyirmiş, onun minmədiyini görəndə, o da minmədi.
- Niyə minmədin? - heyrətlə soruşdu:
- Bəs sən niyə minmədin?
- Sən mənim başıma bəlamı oldun? Avtobusun gəlib, min, çıx get də! Olmaya mən
səni avtobusda müşaiyyət eləyəcəyimə boyun olmuşam?! Minim səninlə eyni
avtobusa, sonra da arvad çəksin məşhər ayağına. Niyə o qadınla bir avtobusa
minirdin? Görürsən qadının baş-gözü qaynaşır, rəddə ver, başqa avtobusa min!
Onda nə deyərəm?
- Sən də özünə kişi deyirsən! Bir arvadın əlində aciz qalıbsan. Mənimkini yığıb-
yığışdırmaq mümkün deyil, neyləyirsən elə, gözü orda-burdadır!
Növbəti avtobus gəldi, adam çox idi, qadın onu tələsdirdi.
- Min də!
- Yox, - boyun qaçırtdı, - sən min get. Mən gələrəm.
- Ay qoyun, min!
- Birdən arvad…
- Hardan biləcək?
Etiraz eləyə bilmədi, həm də işə gecikirdi, qadına dedi, sən qabaq qapıdan min, mən
də arxadan minəcəyəm. Qoy heç olmaya ikimizi bir yerdə avtobusa minən görməsin.
Elə də elədilər, adam həddən artıq çox idi, arxadan gələnlər onu qabaqlarına qatıb
aparırdılar. Birdən qabağında boş oturacaq gördü, özünü birtəhər oturacağa saldı və
başını qaldırıb Nazlının da qabaqdan minənlər tərəfindən ona doğru sıxışdırıldığını
gördü. Qadın özünü saxlaya bilməyib birbaşa onun qucağına yıxıldı və bir təhər
yerini rahatlayıb qucağında oturdu. Heyrətdən dili söz tutmurdu, qadınla bir
avtobusa minmək istəmirdi, indisə qadını qucağında oturtmuşdu.
- Neyləyirsən? – qorxmuş halda pıçıldadı.
- Səncə neyləyə bilərəm?
- Dur ayağa görüm!
- Arvadın elə yerində sənin vayını verir. Yerimdən tərpənə bilirəm, duram da.
- Mən batdım! Arvad bilsə…
- Ay qoyun, hardan biləcək?
Üç-dörd dayanacaq beləcə qadın onun qucağında getdi, yalnız qadın düşəndən sonra
dərindən nəfəs aldı, artıq bir qədər adam düşmüşdü, avtobusdakıları görmək olurdu.
Boylanıb baxdı, tanış adam yox idi, lap yəqin qadını qucağında oturtduğunu görən
olmamışdı.
Axşam arvadı onu yenidən sorğu suala tutdu:
- Sənə deyilmişdimi o şortudan uzaq dur?
- Deyilmişdi, - qorxa-qorxa təsdiq elədi.
- Sən necə, durdunmu?
- Harda durdum?
- Şortudan uzaqda…a!
- Hə, durdum. Xeyli uzaqda…
- Avtobusa onunla birlikdə minmədin?
- Avtobusa?
- Mindin, minmədin? Hə, yox?
- Mindim.
- Bəs bunun harası uzaq durmaq olurmuş?
Mən neyləyim, özünə haqq qazandırırdı, səhərlər orda heç bilirsən nə qədər adam
olur. İnanmazsan, adam qarışqa kim qaynaşır, mən hardan bilim qadının da orda
olduğunu. Mən minmişəm, o da arxadan gəlib minib. Yoxsa mənə nə düşmüşdü,
onunla bir avtobusa minəm. Mən namuslu, evli-başlı birisi kimi nəinki ona, heç başqa
qadına da göz ucu belə baxmadım. «Göz ucu da baxmadın, amma qucağında
oturtdun. Belə şəstlə! Qadın oturub qucağında, sən də namuslu, evli-başlı birisi kimi
qadına gözucu da baxmırsan. Halal olsun!»
Başında tüklərinin vız-vız durduğunu hiss eləyirdi, ax, qadın, qadın, səni görüm
lənətə gələsən! Bəs deyirdin bilməyəcək, nə oldu? Necə bildi? Dili dolaşa-
dolaşa arvadını başa salmağa çalışırdı. Avtobusda basırıq idi, mən birtəhər
oturdum, adamlar da onu itələyə-itələyə gətirib mənim qucağıma yıxdılar. Yoxsa
mən camaatın qızını avtobusda, o qədər adamın içində necə qucağımda oturda
bilərdim? Bu sırf iş qəzasıydı, daha doğrusu yol qəzasıydı, yəni sırf təsadüfdü.
Arvadı isə başını yırğalayırdı. Demək, təsadüfmüş, təsadüfən qadınla bir avtobusa
minirsən, təsadüfən avtobusda adam çox olur, təsadüfən qadını itələyib sənin
qucağına yıxırlar. Bir gündə sənin başına nə qədər təsadüflər gəlib? Uçaskovının
arvadı ordaymış, basırıq da olsa, adam çox olsa da, səndən başqa o avtobusda xeyli
kişi olsa da, o gedib hansısa kişinin qucağında oturmayıbmış, kişi qızı kimi ayaq üstə
durubmuş. Mənə telefonda danışdı, xırdalıqlarına kimi, gözlərinin necə bildir-bildir
vurmağını, necə şax oturmağını! Yanıb yaxılırdı, vay kopoyğlunun
qızı, sənin sahibin yoxmu, minibsən avtobusa, hansı cəhənnəmə istəyirsən, get
də, sənin nəyinə lazım, kim kimin qucağına minib, niyə minib, necə minib! Yaxşı,
deyirdi, mən indicə o uçaskovıya zəng elərəm, görüm bunun arvadı işə gedir, ya
şəkil çəkməyə, təsvir eləməyə? Hələ bir utanmır, götürüb zəng də eləyir!
- Güzgünü sındırmırlar.
- Səncə o güzgüymüş?
- Məncə hə!
- Harasıymış güzgü?
- Gördüyünü güzgü kimi əks elətdirməsi! Hətta güzgüdən də yaxşı!
- Nifrət elədim güzgüyə! – qızğınlıqla dedi. – O alasəfeh uçaskovı arvadının hesabına
daha güzgülərə həyəcansız baxa bilmərəm!
Əzizim, canım-gözüm, həyatım, sən azından mənim qadın, xüsusi ilə də müstəntiq
olduğumu unudursan. Bu cəfəngiyata kim inanar? Basırıq oldu, mindi, düşürt də!
Şortu öz dayanacağına qədər sənin qucağından düşməyib, niyə də düşsün,
yeri rahatmış. Hər şey bir yana, mənim avtobusda bir kişinin qucağında oturub
getdiyimi eşitsən, sənə necə təsir elər? Mənə də eləcə təsir eləyir.
Qadın nəylə vurdu, bilmədi, gözlərinə qaranlıq çökdü, huşunu itirdi, ayılanda isə
divanda uzandığını gördü. Arvadı hətta ona şam yeməyi də təklif eləmədi, özü şam
eləməli, çay dəmləməli oldu.
Səhər tezdən işə gedəndə arvadı heyrətlə soruşdu:
- Üzünü niyə qırxmayıbsan?
- Necə qırxım? Güzgüyə baxa bilmirəm, güzgüyə baxanda mənə elə gəlir uçaskovının
arvadına baxıram. Başqasının arvadına baxıb üzümü necə qırxım?
- Eləmi? – arvadı mənalı tərzdə səsləndi.
- Elə!
- Nə deyim. Yəqin qulplucanın nədən ötrü başına dəydini unutmazsan?
Məlum işdir, unutmamışdı. Evdən çıxanda dörd gözlə ətrafa boylanırdı, bilmək
olmazdı, birdən bu baş bəlası hardansa çıxdı, yenə başına oyun açdı. Baxanda
arvadının nə günahı, o qədər adamın içində birbaşa gəlib onun qucağında oturur.
Hələ bir məzələnir də, yəqin yerin rahatdır, ürəyincə olar, heç yuxuna da girməzdi.
Əlbəttə girməzdi, lap elə ürəyimcədi, bəs sonrası? Müstəntiqə bunun üçün cavabı
mən verirəm, sən yox!
- Hara tələsirsən? – sual o qədər qəfil oldu ki, bütünlüklə özünə qapıldığından
diksindi. Nazlı artıq ona çatmışdı, gözləri gülürdü, onu gözdən qaçırmadığı, vaxtında
ona çata bildiyi üçün elə bil sevinirdi.
- Səncə hara tələsə bilərəm? – hirslə cavab verdi.
- Mən nə bilim? – qadın çiyinlərini çəkdi.
- Ərin səhər evdən çıxanda hara tələsir?
- Şortuların yanına!
- Mənsə işə gedirəm! Yəni tələsirəm. Sən nə veribsən mənə ala bilmirsən? Niyə
məndən əl çəkmirsən? Apvadım mənə sənin yüz metr həndəvərinə fırlanmağı belə
qadağan eləyib, sənsə gəlib giribsən çənəmin altına. Axşam soruşanda nə
deyəcəyəm?
Avtobus dayanacağına kimi beləcə gəldilər, təzəcə çatmışdılar, avtobus gəldi, amma
o minmədi, qadının minib getməsini gözlədi. Qadınsa onsuz avtobusa minmək
istəmirdi. İstəsə də, istəməsə də minməliydi, bu qadını belə görürdü, o minməyincə,
minən deyildi. Nazlını qabağa salmışdı, qadın pillələri qalxıb içəri keçən kimi də,
səssizcə avtobusdan düşdü. Pəncərənin qabağında oturub yerini rahatlayan qadın
onun yoxluğunu hiss elədi, ətrafa boylandı, yerində dikəldi və birdən yerdə dayanmış
onu gördü. Qadın barmağını ona silkələyir, o isə yerdə ləzzətlə atılıb düşür, sevincini
izhar eləyirdi.
Axşam üstü işdən qayıdanda təzəcə pilləkənə ayaq basmışdı ki, Nazlı otaqdan
çıxıb qabağını kəsdi. Deməyinə görə işıqları yanmırdı, onun baxmağını xahiş eləyirdi.
Etiraz eləyirdi, mənim işıqdan-filandan başım çıxmaz, sonrası da birdən arvadım
gördü, bildi, onda necə olar? Hardan biləcək, qız az qala onu zorla dartıb içəriyə
saldı. İçəri keçən kimi də işıqların yandığını gördü. Qadınsa qolundan yapışıb onu
birbaşa yataq otağına aparırdı. «İşıqlar yanır, - deyirdi, - lap heç yanmasalar da,
səni çağırmaram, sən nə bilirsən elə şeyləri. Gördüm özüm hərəkət eləməsəm,
səndən təpər olmayacaq». Artıq o da etiraz eləmir, əl-ayağını dağıtmırdı, olan
olmuşdu, əksinə, yataqda belə gözəl, ehtiraslı qadınla vaxt keçirdikcə, indiyə
kimi qadına məhəl qoymadığına görə özünü məzəmmətləyir, özü təşəbbüs
göstərən qadına qarşı qəlbi minnətdarlıq hissiylə dolurdu.
Geyinib qadınla vidalaşdı, mən həmişə bu vaxtlar evdə oluram, qadın deyirdi,
istədiyin vaxt gəl. Bəs ərin, təşvişlə soruşdu. Qadınsa əlini yelləyirdi, onun bu vaxtlar
evə gəldiyi olmur, lap gəlsə də işıqları düzəltdiyini deyərəm. Sonrası da o səndən heç
vaxt şübhələnməz.
Qapıdan çıxanda az qala pilləkənlə sürətlə qalxan arvadı ilə toqquşacaqdı. Arvadının
heyrətdən gözləri geniş açılmışdı.
- Sənsən? – inamsızlıqla səsləndi.
- Mənə…əm, - dili topuq vururdu.
- Burda neyləyirsən?
- İşığı düzəldirdim. Qonşu xahiş elədi…
- Düzəldə bildinmi?
- Nəyi? – gözlərini döyürdü.
- Sən burda nəyi düzəltməliydin?
- Nəyi düzəltməliydim?
- Məndən niyə soruşursan? İşıqları!
- Hə, hə. Düzəltdim, əməllli-başlı! İndi par-par yanırlar. İnanmırsan, gedək baxaq!
- Ehtiyac yoxdu, mən bu şortunun sifətini belə görmək istəmirəm. Evdə işıqlar xarab
olur, mən düzəldirəm, əlini vurmursan, burda isə dönüb mantyor olursan.
- Çünki sən məndən xahiş eləmirsən, - qızğınlıqla deyirdi, - deyirsən, əl vurma, məhv
elərsən. Burda isə xahiş elədilər, mən də kömək əlimi uzatdım.
Nə bilim, qadın evə keçib ayaqqabılarını çıxarandan sonra etinasız halda dedi, bəlkə
də haqlısan, hər halda gəlib burda, qonşuluğumuzda buna cürət eləyəcəyinə o
qədər də inanmıram. Amma vicdanım rahat olsun, hansısa bir cinayəti, özü də alçaq
bir cinayəti cəzasız qoymayım deyə işimi də görməliyəm. Gördü də, yəni alçaq
cinayəti cəzasız qomadı, amma bu dəfə qulplucanın zərbəsi elə də güclü olmadı, hər
halda huşunu itirmədi. Sevinirdi, işə bax ha, heç bir günahı olmaya-olmaya arvadı
vayını verirdi, bu dəfə isə canını belə asanlıqla qurtardı.
Cavid gəlib onu çağırdı, istidir, gedək həyətdə oturaq, deyirdi. Razılaşsa da, ürəyi
əsirdi. Doğrudur, arada Cavid gəlib onu çağırır, həyətdə, ağacların arasındakı
oturacaqda oturub pivə içir, söhbət eləyirdilər. Amma bu gün təşvişə düşmüşdü,
bəlkə nəsə öyrənmişdi, ona görə çağırırdı. Qapıdan çıxanda arxadan arvadının acıqlı
səsini eşitdi, daş kişi başınıza, bir şortunu dədə malı kimi bölüşürlər. Cavidin
eşidəcəyindən ehtiyatlanıb tez qapını çəkdi. Cavid pivə almışdı, bir banka da ona
verdi, təşəkkür eləyirdi. Sağ ol, Nazlı deyirdi işıqlarımız xarab olmuşdu, səni çağırıb,
düzəldibsən. Elədi, düzəltdim, dili topuq vurdu. Cavidsə yenidən lovğalanır, sütül qız
tapması ilə fəxr eləyirdi. Özünü saxlaya bilmədi: «Bir halda sutul qızların arxasınca
qaçacaqdınsa, niyə evlənirdin? Evlənməzdin, kimin arxasınca istərdin, qaçardın,
dərd-sərin də olmazdı». «Boş şeydi, - Cavid əlini yellədi, - nə dərd-sərim olacaq?
Danışıb-danışıb, qalacaq özüyçün. Sənsə yapışıbsan müstəntiqin ətəyindən. Qızın
kökü kəsilmişdi, gərək elə gedib müstəntiqlə evlənirdin?» «Heç nədən xəbərin yox,
bəy-bəy danışırsan! Onda biri mənə toyda ilişdi, məndə ilişdirdim. Bekara şeymiş,
çənəsi sındı. İşə bu baxırdı, gözəl də qızdı, köməyi dəysin deyə girişdim buna, sonra
da geri çəkilə bilmədim».
Bir qədər də söhbət eləyib ayağa qalxdılar.
Səhərisi işdən qayıdanda yenidən pilləkəndə Nazlı ilə rastlaşdı. Keçib getmək
istəyirdi, amma qadın qolundan yapışıb saxladı. Deməyinə görə mətbəxdə
pəncərənin şüşəsi sınmışdı. Mənim əlimdən gəlməz, desə də, qadın qolundan yapışıb
zorla isəri apardı və içəri keçən kimi də heç nəyin sınmadığını başa duşdu.
Sən məni güdaza verəcəksən, geyinəndə deyirdi, keçən dəfə də dedin arvadın
hardan biləcək, amma mən qapıdan çıxanda arvadımla toqquşdum. Müstəntiqdir,
tam zamanında hadisə yerində olur.
Nə qədər inanılmaz olsa da, bu dəfə də qapıdan çıxanda az qala arvadı ilə
toqquşacaqdı. Arvadı gözlərinə inanmır, başını silkələyirdi.
- Yəqin sən o deyilsən?
- Kim deyiləm?
- Ərim olacaq o şərəfsiz əbləh!
- Necə yəni deyiləm? Ərin olacaq o şərəfli insanam ki, varam. Nədi, məni tanımadın?
Qonşular eşidir, şəbədə bəzərlər. Bəs filankəsi doğmaca arvadı tanımadı.
- Demək, sənmişsən? – qadının heyrətinin sonu yox idi. – Heç cür inanmağım
gəlmir. İndi burda neyləyirsən? Yenədəmi şortunun nəyisə xarab olmuşdu.
- Hə, olmuşdu. Şüşəsi sınmışdı.
- Barı saldınmı?
- Nəyi? – gözlərini döyürdü.
- Sən burda nəyi salırdın?
- Mən salırdım?
- Yox, mən! Şüşəni!
- Şüşəni, mən? Mən niyə salıram? Şortunun şüşəsi sınıbsa, canı çıxsın, əri
salsın. Hə… Saldım! Neyneyim, sınmışdı. Çağırdı, kömək istədi…
- Sən də uzatdın?
- Nəyimi uzatdım?
- Kömək əlini, ay qoyun!
- Hə, uzatdım! Əlbəttə uzatdım!
Evdə arvadı hər sözü xüsusi tələffüz eləyərək onu divara dirəmişdi, adam, sən kim
olursan? Mənim ərimsən, ya şortunun təmirçisi? Şortunun gündə bir yeri xarab
olacaq, sən də gedib düzəldəcəksən? Bir halda xarab olursa, səni niyə çağırır, təmirçi
çağırsın! Təmirçi də gəlib baxar, harası xarab olar, orasını da düzəldər. Bu sənə son
xəbərdarlığım, səni bir daha qorxaq dovşan kimi şortunun evindən boylanan
görmürəm. Görsəm, işin bitdi! Oldumı? «Oldu!» – cani dildən söz verdi və hələ bir
sevindi də, canını belə asanlıqla qurtaracağını gözləmirdi. «Yox, belə olmayacaq,
arvadı dedi, özüm tədbir görməli olacağam. Yoxsa səni qorxu-hürkü ilə şortunun
həndəvərindən uzaqlaşdıra bilməyəcəyəm. Mən vuracağam, ağlını-huşunu itirəcək,
amma ayılıb özünə gələndən sonra yenə şortunun yanına cumacaqsan».
Səhər işə gedəndə Nazlıyla qarşılaşdı, boylanıb ətrafa baxırdı, görəsən onların
birlikdə avtobus dayanacağına getdiyini görən yox idi ki? Nə biləsən, bəlkə
uçaskovının arvadı yenə də hansısa tindən onları güdürdü.
- Şortu, bilirsən nə var...
- Nə?! – Nazlının səsi cingildədi.
- Nə oldu? – qorxmuş halda dilləndi.
- Sən mənə nə dedin?
- Mən dedim?
- Hə, sən, sən!
- Mən heç nə demədim.
- Dedin, dedin! – qadın əl çəkmirdi.
- Mən yox, arvadım dedi!
- Yo…ox! – Nazlı onun qolundan yapışdı. – Sən dedin. Arvadın burda yoxdu. Bir
ətrafa bax, gör arvadın burdadımı? Burda deyil. Demək, deyə bilməz. Sən dedin!
Cavab tapa bilmir, mızıldanıb bir təhər canını qurtarmaq istəyir, ancaq Nazlı əl
çəkmirdi. Yalnız avtobus gələndən sonra, qadın ondan əl çəkib avtobusa mindi və
hətta ona minməyi də təklif eləmədi.
Arvadının dediklərini unutmuşdu, əvvəllər Nazlıdan qaçmağa çalışsa da, son günlər
güclü bir istək onu qadına doğru çəkirdi, amma çox çalışsa da, qadını təklikdə görə
bilmirdi. Səhərlər ayaqlarını süründürür, Nazlını gözləyir, amma qadın gəlmirdi.
Bir axşam işdən qayıdanda nəhayət Nazlının qapısı açıldı, sevincdən gözləri dörd
oldu, amma ondan fərqli olaraq qadın elə də sevinmirdi, əksinə, sanki bu görüş
ürəyincə olmamışdı, qaşqabaqlıydı.
- Salam, - ümidlə dilləndi.
- Salam…
- Dedim bəlkə….
- Nə bəlkə? – qadın ona sözünü deməyə imkan vermirdi.
- Bəlkə su krantınız xarab olub?
- Xarab olar, düzəldərik, - qadının arxasından əri boylandı, - sən bizim krantı niyə
düzəltməlisən? Özümə nə gəlib!
- Sən evdə tapılırsan! – hirslə dilləndi. – Sən evdə olandan sonra mənim nəyimə
lazım, canın çıxsın, özün düzəlt!
Hər şey ona aydın olmağa başlayırdı, əri evdə olurdusa, qadın daha onu evə dəvət
eləyə bilməzdi ki. Bəs bu əbləh evdə tapılmırdı, buna nə olmuşdu, belə tezdən evdə
nə ölümü vardı? Bir azdan yenə də qonşu gəlib onu pivə içməyə çağırdı, amma pivə
almamışdı, bu dəfə də sən al, dedi, mən hər halda səni pivə ilə təmin eləməyə
boyun olmamışam. Əbləh adam, bir dəfə pivə alıb, dərhal da başına qaxır.
Yaxınlıqdakı köşkdən altı banka pivə və quru balıq aldı. İç, nə qədər içə bilirsən,
dedi, bir də mənim üçün pivə alma, zəhmət çəkərəm, öz pivəmi özüm alaram.
Qonşu hirsli və qanı qaraydı, sənə nə olub, soruşdu, axı sən bu vaxtlar evdə
tapılmırdın. Tapılmayım, neyləyim, qardaş, polis gözümü açmağa imkan vermir. Qızı
götürüb aparıram restorana, sifariş verirəm, amma dərhal da polis kəsdirir başımın
üstünü. Vətəndaş, pasportunu göstər, bu qız kimdir, arvadının, ya da bu xanımın
ərinin xəbəri varmı burda restoranda birlikdə yeyib içməyinizdən. Nə deyim,
deyəcəyəim xəbərim var, arvadıma, ya da qadının ərinə zəng eləyəcək. Bir aya
qızlara çəkdiyim xərci bunlara verib bir təhər yaxamı qurtarıram. Bunun dərdindən
də işdən çıxan kimi evə qayıdası oluram. Day restorana, gəzməyə arvadı aparıram.
Demək, arvadının tədbiri buymuş. İki banka pivə içib ayağa qalxdı, qonşu arxadan
onu səsləyirdi, hələ pivəmiz qalır, hara gedirsən. O isə qulaq asmayıb bir başa evə
gəldi. Arvadı şam yeməyi üçün hazırlıq görürdü.
- Geyin, - dedi, - restorana gedirik.
- Restorana? - arvadı inamsızlıqla səsləndi.
- Hə.
- Birdən-ikiyə…
- Getməmişik, amma bundan sonra gedəcəyik.
Qadının sevinci sonsuz idi, geyinməyi elə də çox çəkmədi və mavi yaxalıqlı donunu
geymiş arvadına baxanda gözlərinə inanmadı, qadın bu donda necə də gözəl
görünürdü. Pilləkəndən düşəndə; bundan sonra restorana da, kinoya, konsertə də
gedəcəyik, deyirdi, amma bir şərtlə, qapıdan girən kimi məni sorğu-suala
tutmyasan. Sən ilk öncə mənim arvadımsan, sonra müstəntiqsən. Narahat
olma, məni məcbur eləməsən, yanımda belə gözəl arvadım olduğu halda kimsəyə
gözümün ucu ilə də baxmaram. Yoxsa belə getsə sən məni şortulara qapdıracaq,
dizllərinə döyə-döyə qalacaqsan. Başa düşdünmü?
- Düşdüm, - qadın dedi.
Dostları ilə paylaş: |