726
Anna Andreyevna yenə də çəkinə-çəkinə soruşdu:
– Sənin anan xaricilərdəndi, nədi? İvan Petroviç, siz
deyəsən, belə demişdiniz?
Nelli qara gözlərilə mənə baxdı, sanki o məni köməyə
çağırırdı. O, həyəcanla və ağır-ağır nəfəs alırdı.
Mən dedim ki:
– Anna Andreyevna, onun nənəsi rus, babası ingilis
olmuşdur, anası isə ingilisdən artıq rus imiş; Nelli özü
xaricdə anadan olmuşdur.
– Yaxşı, necə olub ki, onun anası öz əri ilə xaricə
getmişdir?
Nelli birdən qızardı. Anna Andreyevna artıq söz
danışdığını dərhal hiss edərək Nikolay Sergeiçin hiddətli
baxışları altında diksindi. Nikolay Sergeiç sərt-sərt ona
baxaraq üzünü pəncərəyə tərəf döndərdi. Sonra birdən Anna
Andreyevnaya dedi:
– Onun anasını pis, əclaf bir adam aldatmışdır. O,
atasını atıb o adamla çıxıb getmişdir, atasının pulunu da o
adama vermişdir; o adam pulu ondan aldadıb almışdır,
özünü də xaricə aparmışdır, pulu ələ keçirdikdən sonra onu
downloaded from KitabYurdu.org
727
atmışdır. Bir yaxşı adam ona rast gəlmiş, o adam lap ölənə
kimi ona kömək etmişdir. O adam öləndən sonra, o da iki il
bundan əvvəl atasının yanına qayıtmışdır. Vanya, sən belə
danışmamışdınmı?
Nelli böyük bir həyəcan içində yerindən qalxıb qapıya
tərəf getmək istədi.
Nikolay Sergeiç yerindən qalxıb əlini ona uzatdı:
– Nelli, bura gəl! Otur burda, burda, mənim yanımda,
bax, burda, otur!
Əyilib qızın alnından öpdü, başını üsulluca sığallamağa
başladı. Nellinin bütün bədəni əsdi... Amma özünü ələ aldı.
Nikolay Sergeiçin nəhayət, bu yetim qızı oxşayıb
əzizləməsinə Anna Andreyevna riqqət və sevinclə, ümidlə
baxırdı.
Nikolay Sergeiç Nellinin başını sığallaya-sığallaya
sözünə davam etdi:
– Nelli, mən bilirəm ki, sənin ananı zalım bir adam,
zalım, əxlaqsız bir adam məhv etmişdir, lakin bunu da
bilirəm ki, o öz atasını istəyirmiş, onun hörmətini
saxlayırmış.
downloaded from KitabYurdu.org
728
Nikolay Sergeiç bu son sözləri həyəcanla dedi, bu
zaman bu meydanoxuyucu sözləri bizim üzümüzə çırpmaya
bilmədi. Buna səbri çatmadı. Onun solğun yanaqları azca
qızardı, o bizə baxmamağa çalışırdı.
Nelli də heç kəsə baxmamağa çalışaraq çəkinə-çəkinə,
lakin qəti bir ifadə ilə dedi:
– Anam babamı, babam onu istədiyindən çox istəyirdi.
Nikolay Sergeiç uşaq kimi özünü saxlaya bilməyərək
sərt halda dedi:
– Sən bunu hardan bilirsən? – o sanki bu cür səbirsizlik
göstərməsindən utandı.
Nelli həyəcanla cavab verdi:
– Bilirəm, o, anamı öz yanına buraxmadı... onu
qovdu...
Mən gördüm ki, Nikolay Sergeiç nəsə demək, etiraz
etmək istəyir, məsələn, demək istəyir ki, “qoca lap yerində
qızını öz yanına buraxmayıb”... Lakin bizə baxıb susdu.
Anna Andreyevna soruşdu:
– Baban sizi öz yanına qoymayanda, bəs siz harada
yaşadınız, necə yaşadınız?
downloaded from KitabYurdu.org
729
Bu söhbəti davam etdirmək üçün birdən onun qəlbində
inad və arzu oyanmışdı.
Nelli dedi:
– Biz gələndə babamı çox axtardıq. Tapa bilmədik.
Anam onda mənə dedi ki, baban əvvəllər çox dövlətli idi,
fabrik tikmək istəyirdi, amma indi çox kasıbdır, çünki o
adamla ki mən getmişdim, o məndən babanın bütün pullarını
aldı, sonra da qaytarmadı. Bunu mənə anam özü dedi.
Nikolay Sergeiç deyindi:
– Bəli...
Nelli get-gedə canlanırdı, sanki Nikolay Sergeiçə etiraz
etmək istəyirdi, lakin Anna Andreyevnaya müraciət edərək
sözünə davam etdi:
– Anam bunu da mənə dedi ki, “Babanın mənə çox
acığı tutmuşdur, mən özüm onun qarşısında günahkaram,
indi mənim bütün dünyada babandan başqa heç kəsim
yoxdur”. Bunu mənə deyəndə ağladı hətta... Hələ biz
xaricdən gələndə o mənə deyirdi: “O məni bağışlamayacaq,
ancaq bəlkə səni görüb sevdi, sənə görə də məni bağışladı”.
Anam məni çox istəyirdi, bu sözləri deyəndə o həmişə məni
downloaded from KitabYurdu.org
730
öpürdü, ancaq babamın yanına getməyə çox qorxurdu. Məni
öyrətmişdi ki, babam üçün dua eləyim, özü də dua eləyirdi.
Anam bundan başqa mənə çox şeylər danışmışdı: babamla
əvvəl necə yaşadıqlarını, babamın onu necə çox istədiyini,
hətta hamıdan çox istədiyini demişdi. Anam onun üçün
fortepiano çalarmış, axşamlar ona kitab oxuyarmış, babam
onu öpərmiş, ona çox şeylər bağışlayarmış... Hər şey
bağışlayarmış, belə ki, bir dəfə onlar bunun üstündə söz-
sözə də gəlmişlər, bu, anamın ad günündə olub: babam elə
bilirmiş ki, anam onun necə bir hədiyyə alacağını bilmir,
amma anam bunu çoxdan bilirmiş. Anam sırğa alınmasını
istəyirmiş, babam onu qəsdən aldadırmış, deyirmiş ki, sırğa
yox, saç sancağı alacağam. Babam sırğa alıb gətirir, anam
ona deyir ki, mən bilirdim sən sırğa alıb gətirəcəksən,
sancaq yox. Anamın bunu bilməsindən babamın acığı tutur,
günortaya kimi onunla danışmır, sonra özü gəlib onu öpür,
ondan üzr istəyir...
Nelli həvəslə danışırdı, hətta onun xəstəlikdən solmuş
yanaqları qızarmışdı.
downloaded from KitabYurdu.org
Dostları ilə paylaş: |