Qanaxmanı dayandırmaq üçün turna (burmac) qoymaq və əlaltı
vasitələrdən istifadə qaydaları.
Turna (burmac) qoymaq ətrafların iri arteriya
damarlaın zədələnərkən qanaxmanı müvəqqəti dayandırmağın əsas üsuludur.
Turna uclarında zəncir (halqa) və qarmaq olan 1, 5 m uzunluqda rezin
borucuqdan, yaxud elastik enli rezin lentdən ibarətdir. Rezin turnalarla yanaşı,
toqqalı parça turnalar da işlədilir. Burmac isə bu məqsədlə əlaltı vasitələrdən
hazırlanır. Turnanı (burmacı) yalnız bədənin ətraflarına (əl-ayağa) salmaq olar.
Turna buda, baldıra, bazuya, bazuönünə – qanaxma yerindən yuxarıda,
yaranın yaxınlığında, paltarın üstündən və ya dəri sıxılıb əzilməsin deyə,
yumşaq bint sarğının üstündən qoyulur. Turnanı o dərəcədə sıxmaq lazımdır
ki, qanaxma dayansın. Turna həddən artıq sıxılarkən kənarların sinirləri xeyli
dərəcədə zədələnir. Turna kifayət dərəcədə tarım olmadıqda isə arterial
qanaxma daha da güclənir, çünki bu zaman yalnız vena damarları sıxılır və
nəticədə ətraflardan qan aparılmır.
Turnanın nə vaxt qoyulduğunu (tarix, saat və dəqiqə göstərilməklə) bir
parça kağızda qeyd edib, kağızı nəzərə çarpan yerdə turnanın qatı altına
qoyurlar. Turna qoyulmuş ətrafı isti şeylə örtürlər (xüsusən qışda), lakin
buraya qrelka qoymaq olmaz. Turna qoyulmuş yaraya şpris-tunik vasitəsilə
ağrıkəsən dərman vururlar.
Dostları ilə paylaş: |