Gözüm yolda, könlüm səsdə,
Başım üstə duman dünya.
İnsaf gördünmü bir kəsdə?
Sinəmə ox, kaman dünya.
Can ağrısı qəlbi didər,
Bəxtsiz bəxti kədər güdər,
Bir gün gələn, bir gün gedər,
Yaman dünya, yaman dünya.
Acıların balta çalar,
Dərdsizi də dərdə salar,
Düz axtaran düzdə qalar,
Aman dünya, aman dünya.
Qolun, imzan, fərmanın çox,
Çarəsizə dərmanın yox,
Biz tək çıxan bir canın yox,
Yaş ötürən zaman dünya.
Ətəyində öldü anlar,
Nahaq yerə çox divanlar,
Bir-birinə yad insanlar,
Ümman dünya, ümman dünya.
Şadimanın bağrı qandır,
Ölən ürək, çıxan candır,
Bacardıqca məni yandır…
İstəmirəm, aman dünya.
4.11.1991
BU QƏRBƏ BƏRƏKƏLLAH
Kömpüterin əsiri,
Robotların qəsiri,
Sanki yoxdu kəsiri,
Röyadı, Allah, Allah,
Bu Qərbə bərəkallah.
Ürəyi qışın buzu,
Ölkələr əldə quzu.
Nə parlaqdı ulduzu?
Qan tökür saymır günah,
Bu Qərbə bərəkallah.
Yalnız dildə birləşir,
Getdikcə sehirləşir,
Be-em-te-si sirləşir,
ATƏT-lə mehirləşir,
Savaş doğur hər sabah,
Bu Qərbə bərəkallah.
Ürəyi robot olub,
Min bir yerdən çat olub,
Hiyləsi min qat olub,
Dünya batabat olub,
Nə vecinə nalə, ah,
Bu Qərbə bərəkallah.
Cahan qeylüqallaşır,
Ağalar cığallaşır,
Bəzi xalqlar ballaşır,
Yardımları yallaşır...
Ətəklərdən sallaşır,
Aclar sanır qibləgah,
Bu Qərbə bərəkallah.
Şeri də robotlaşır,
Seyri də robotlaşır,
Xeyri də robotlaşır,
Dünya necə qatlaşır?
Öz-özünə yadlaşır
Sözləri çalır gah-gah,
Bu Qərbə bərəkallah.
Fırladır Yer kürrəsin,
Göstərir fil nərəsin,
Təyyarəsin, bərəsin
Robot edib maşallah,
Bu Qərbə bərəkallah.
Ağa olub hamına,
Çəkir haqqı kamına,
Çıxır göyün damına,
Daş atır adamına,
Salır mərəkə, vallah,
Bu Qərbə bərəkallah.
Aləmi qarışdırır,
Hamının vuruşdurur,
Dinləri yarışdırır,
Dolları sırışdırır,
Olub dünyada Allah,
Bu Qərbə bərəkallah.
Svilizasiya deyərək,
Özünü hey öyərək,
Tərəzini əyərək,
Başımıza döyərək,
Əzir hamın inşallah,
Bu Qərbə bərəkallah.
Yad səyyarədən gəlib,
Ayrı heyətdən gəlib,
Hansı qüdrətdən gəlib?
Baş açmaq olmur billah,
Bu Qərbə bərəkallah.
Bu Qərbə bərəkallah.
31.X.2001.
SİYASƏTDİ, SİYASƏT
Cahanda hey mərəkə,
Ev-ev gəzir səksəkə,
Qeyzlənir hər ölkə,
Qırğınlar alır vüsət,
Siyasətdi, siyasət.
Nə qədər ölüm qada,
Sakitlik yox dünyada,
Gedir vicdanlar bada,
İndi ən yaxşı sənət,
Siyasətdi, siyasət.
Dinlər əldə oyuncaq
Söndürülür çox ocaq,
Qan içində hər bucaq,
Artır ilbəil zillət,
Siyasətdi, siyasət.
Hökümdarlar dilləşir,
İmanla kin əlləşir,
Axan qanlar selləşir,
Düşür araya həşir,
Yalançı hörmət, izzət,
Siyasətdi, siyasət.
Ölkələr ağlaşırlar,
Ələmə bağlaşırlar,
Dərd olub dağlaşırlar,
Əzir milləti millət,
Siyasətdi, siyasət.
Böyük xalqlar ağadır,
Kiçik xalqlar çağadır,
Qartala şah qarğadır,
Yaxşılıqda hər niyyət,
Siyasətdi, siyasət.
Qanunların hər üzü,
Yatmayır gecə gözü,
Çalxalanır Yer üzü...
Sabahımız, ya qismət,
Siyasətdi, siyasət.
Savaş bəşərin dəbi,
Artdıqca artır təbi,
Kimdə qırğının həbi?!
Yəhudiylə ərəbi
Yağı edən qiyamət,
Siyasətdi, siyasət.
Fələstində qan axır,
Hökmdarlar yan baxır,
Əfqanıstanı yıxır,
Ölüm, zülüm və illət
Siyasətdi, siyasət.
Çeçenlər qara bağlar,
Ürəyi yara bağlar,
Bu dünya qalıb ağlar!
Hər şahda şaha hörmət
Siyasətdi, siyasət.
Balkanlar həzar edər,
Sinəsi ah-zar edər,
Evini məzar edər...
Orda qanlı müsibət
Siyasətdi, siyasət.
Qarabağ qara bağrı,
Kəsir bizi bu ağrı,
İblisin sözü doğru,
Haqqı ediblər oğru!
Allaha da itaət,
Siyasətdi, siyasət.
Var İsada bir dua
Qılmırsan cana rəva,
Etmə özgəyə dəva!
Kökümüz Adəm, Həvva,
Əlinizdə ibadət-
Siyasətdi, siyasət.
Milli qırğınlar daşır,
İblis, şeytan ulaşır,
Zülümlər başdan aşır,
Bütün dünya savaşır...!
Edilib qana adət,
Siyasətdi, siyasət.
Dolubdu səbrin qabı,
Göyün, Yerin yox tabı,
Allahın hər kitabı
Bəşərin haqq-hesabı!...
Tanrıya da xəyanət
Siyasətdi, siyasət.
Fitnə-feildən həzar,
Rəbbim bir ömür yazar,
Bizdən sonra dar məzar,
O da dünyaya azar,
Bunu duymaq da, əlbət
Siyasətdi, siyasət.
Ağalar dingildəyir,
Qədəhlər cingildəyir,
Tulalar zingildəyir,
Şər yolu edilib qət,
Siyasətdi, siyasət.
Ey Şadiman, etmə qəm,
Ömür bəxtə düşən dəm,
Eyləmə nəşəni kəm,
Dünya gözündəki, nəm
Şah qədəhində şərbət...
Siyasətdi, siyasət!
Siyasətdi, siyasət!
31.X.2001.
DÜNYA SUSDU
Qətrə-qətrə qan töküldü, çox talandı məkanımız,
İnsanlığa yaxşı bələd ali ədəb, ərkanımız,
Haqqımızı anlatmağa az tapıldı imkanımız,
Heç olmadı özümüzə, içimizə təkanımız,
Hər zülümə, müsibətə, həqarətə dünya susdu,
Ağzımıza daş basıldı, ədalətə dünya susdu.
Hey çəkildi gözümüzə zaman-zaman yağı mili,
Hey kəsildi cəlladların əllərində haqqın dili,
Nə bir qansız, nə qovğasız olmadı ki, vətən ili,
Ocaqları kor qoydular, quru yurdda qaldı külü,
Fitvalarda biz əzildik, biz üzüldük, dünya susdu,
Kətan təki hey nazildik, hey süzüldük, dünya susdu.
Şəhidimiz məzar-məzar çoxaldıqca, adiləşdik,
Torpağımız hissə-hissə alındıqca, vadiləşdik,
Beynəlmiləl deyildikcə üzümüzə, sadələşdik,
Yurdumuzdan pay verməkçin xainlərlə, vədələşdik...
Qan töküldü, bel büküldü, yurd söküldü, dünya susdu.
Atamızın qəbirinə xaç çəkildi, dünya susdu.
Bizdən əvvəl gələnlər də birləşməyi ar bildikcə,
O tayfanın böyüklüyün bu tayfaya xar bildikcə,
Yadellinin xatunların özlərinə yar bildikcə,
Öz yurdunu, öz elini bir-birinə dar bildikcə,
Xərabəyə döndü ocaq, söndü ocaq, dünya susdu.
Aşıb-daşdı qanlı qucaq, dondu bucaq, dünya susdu.
Aman Allah, kim açacaq bizim bu kor gözümüzü?
Düşmən bildik, yağı bildik özümüzə özümüzü,
Oğurladı iblis, şeytan içimizdən közümüzü,
Yadelliyə, xainlərə öyrətdikcə üzümüzü,
Xırdalandıq, könlümüzə zəfər çaldıq dünya susdu.
Son məqamda özümüzlə tənha qaldıq, dünya susdu.
Zülüm evi yıxılmazdır min il belə ötüb keçdi,
Zəlzələlər, fırtınalar insanları ot tək biçdi,
Cahillikdən çıxmıb bəşər bir-birinin qanın içdi...
Zaman-zaman ölüm, qırğın, müsibətlər yolun seçdi,
Haqqımızı içimizdə şəhid edən, dünya susdu,
Aman Allah, bu qanlara söylə nədən dünya susdu?
Xərabəyə döndü yurdlar, bilinmədi ölüb-itən,
Unutqanlıq, biganəlik qəlbimizdə ot tək bitən,
Əslimizə, kökümüzə ağız büzdü, əfsus yetən,
Kiçildikcə, söküldükcə, büküldükcə yazıq vətən!
İnsanları işğallarda üyüldükcə, dünya susdu,
Ədalətin baş-gözünə döyüldükcə, dünya susdu.
Ey Şadiman, yandı bağrın hər əzabın cəfasından,
Kimə qaldı bu cahanın əlçatmayan vəfasından?
Zaman qaçdı, Tanrı qıymıb insanlara şəfasından,
Ocağında kül olmusan ürəyinin səfasından,
Sən alışdın alovundan yandı Günəş, dünya susdu,
Vulkan oldu könlün içi, doğdu atəş, dünya susdu.
3.04.2001.
YALAN DÜNYA
Şəhriyarın «Yalan dünya»
şeirinə nəzirə
Nəşə yeyib kədər qusdun,
Hər addımda haqqı pusdun,
Şər önündə sən də susdun
Hər şeyə kor olan dünya,
«Yalan dünya, yalan dünya».
Ağlamayan bir göz hanı?
Hey yandırdın təndə canı,
Haçan olar haqq divanı?
Boş yerə saç yolan dünya.
«Yalan dünya, yalan dünya».
Al bəşərdən canı bir yol,
Səvabı az, günahı bol,
Hara gedir söylə bu yol?...
Savaşlarda solan dünya.
«Yalan dünya, yalan dünya».
Əllərini yuma qanla,
Bacarırsan haqqı anla,
Kədər illə, sevinc anla,
Hər addımı talan dünya.
«Yalan dünya, yalan dünya».
Əzabına tutuşan biz,
Qəmlərinə qatışan biz,
Səninlə hey atışan biz,
Zurnasın boş çalan dünya,
«Yalan dünya, yalan dünya».
Göylərini qəmin sağır,
Qəlb damına kədər yağır,
Yükün səndən min qat ağır,
Dalında çul, palan dünya.
«Yalan dünya, yalan dünya».
Saxlama heç o gödəni,
Doydurmadı tən mədəni,
Candan alıb hər bədəni...
Boş məzara salan dünya!
«Yalan dünya, yalan dünya».
Dilinin hər əmri belə...
Çıxmaz səsi-səmri belə,
Bu beşgünlük ömrü belə
Əlimizdən alan dünya.
«Yalan dünya, yalan dünya».
Soldu necə gül bədənlər,
Əzrayıl hər təni dənlər,
Doymadı ki, heç gedənlər?
Özü sona qalan dünya.
«Yalan dünya, yalan dünya».
Həyat gülün dərmədim ki,
Qəmin qolun gərmədim ki,
Mən ki, heç gün görmədim ki,
Əzabıyla kalan dünya,
«Yalan dünya, yalan dünya».
Anasından bala aldın,
Qəbirinə nə tez saldın?
Guya ki, sən zəfər çaldın,
Sənin ki, yox balan, dünya.
«Yalan dünya, yalan dünya».
Əzrayıldan nəyin əskik?
Çox dam, saray yıxıq, sökük,
Hünərin var bir yuva tik,
Varınmı heç dalan dünya?
«Yalan dünya, yalan dünya».
Çox zirvədə olan taxtı,
Təpəsindən yerə çaxdı,
Təbim kimi coşan vaxtı,
Xəyallara dalan dünya.
«Yalan dünya, yalan dünya».
Atını şər evinə çap,
Haqqı onun əlindən qap,
Ya bircə yol səadət tap,
Ya odlara qalan dünya!
«Yalan dünya, yalan dünya».
Şadimanın əsir özü,
Tutulanda qəmdən üzü,
Bulud təki ağlar gözü,
Könlüm kimi dolan dünya!...
«Yalan dünya, yalan dünya».
22-23/01.2000
Dostları ilə paylaş: |