Dəmir, nikel kimi maddələrlə maqnit arasında toxunma olmasa da, qarşılıqlı təsir
mövcuddur. Maqnitdən soyuducuların qapılarında, radio və televizorların
hazırlanmasında, ağır yüklərin qaldırılmasında geniş istifadə olunur. Lakin bankomat
və telefon kartları maqnitdən uzaq tutulmalıdır. Maqnit onların yararsız hala
düşməsinə səbəb ola bilər.
Futbol topunun istiqamətini dəyişmək, çantanı qaldırmaq, süngəri sıxmaq üçün qüvvə
sərf etmək lazımdır. Bu zaman qüvvənin təsirindən futbol
topu və çanta yerini dəyişəcək, süngər yığılacaq, sonra isə əvvəlki vəziyyətinə
qayıdacaq.
Yun köynəyi əyninizdən çıxaranda, saçınızı darayanda və s. hallarda kiçik
qığılcımların yaranmasını müşahidə edirsiniz. Bu halların başvermə səbəbini necə
izah edə bilərsiniz?
Qarşılıqlı təsir olmasa, insan Yer üzərində gəzə, nəqliyyat vasitələri isə hərəkət edə
bilməz. Yer səthində hərəkət etdiyimiz zaman Yeri özümüzdən geriyə itələdiyimiz kimi,
Yer də bizi həmin qüvvə ilə irəliyə doğru itələyir. Bu qüvvə nə qədər böyük olarsa,
hərəkətimiz də bir o qədər asan olar.
Təbiətdə baş verən hadisələrin səbəbini və nəticələrini bilmək olduqca vacibdir. Bunun
sayəsində insan faydalı hadisələrin mexanizmini öyrənmək və onların gedişini
sürətləndirməklə yanaşı, bu hadisələr haqqında qabaqcadan məlumat verə bilər.
Zərərli hadisələrin səbəbini bildikdən sonra isə onların qarşısını almağın yollarını
müəyyənləşdirmək olar.
1. Buludlu havada şimşək çaxmasının səbəbini araşdırıb dəftərinizə yazın.
2. Günəş öz ətrafındakı planetləri cəzb edir və onları uzaqlaşmağa qoymur.
Bir anlığa fikirləşsək ki, Günəşin cazibəsi yoxdur. Sizcə, onda nə baş verə bilər?
3. ENERJİ VƏ ENERJİ ÇEVRİLMƏLƏRİ
Cisimlər müəyyən qüvvənin təsiri altında hərəkət edərkən iş görülür. Cisimlərin
işgörmə qabiliyyəti isə enerji adlanır. Bu anlayış həm canlı, həm də cansız aləmə
aiddir.
Enerjinin növlərini və ən mühüm xassəsini yadınıza salın.
Verilmiş sxemi
yoldaşlarınızla
müzakirə edin.
Enerjinin müxtəlif növləri vardır: mexaniki enerji, daxili (istilik) enerji və s.
Səhər yuxudan durur, məktəbə getmək üçün hazırlaşırsınız. Əl-üzünüzü yuyur,
dişlərinizi fırçalayır, pilləkənləri düşür, yol gedirsiniz. Məktəbdə fiziki tərbiyə dərsində
müxtəlif hərəkətlər edir, dərsdən sonra asudə vaxtlarınızda futbol oynayırsınız. Bütün
bunlar üçün enerjinin sərf olunduğunu bilirsinizmi?
Yediyin qidalar səni böyüdür və enerji ilə təmin edir.
İnsan iş görmədikdə belə orqanizmdə üzvi maddələrin parçalanması nəticəsində daim
enerji ayrılır. Qida maddələri parçalananda onların tərkibində olan kimyəvi enerji
orqanizm tərəfindən istilik, mexaniki və elektrik enerjisi şəklində istifadə olunur. Bunun
nəticəsində orqanizm fəaliyyətdə olur, orqanlar işləyir, hərəkət edir, bədən qızır.
Ən sonda enerjinin bütün növləri istilik enerjisinə çevrilir. Onun bir qismi bədən
temperaturunu sabit saxlayır, artıq qalanı isə xarici mühitə verilir. Deməli, bizim
bədənimizdə də enerji öz-özünə yaranmır. O, bir şəkildən digər şəklə düşür.
Enerjinin bir-birinə çevrilməsi hallarına gündəlik həyatınızda da rast gəlirsiniz. Elektrik
mühərriklərində elektrik enerjisi mexaniki enerjiyə, digər məişət avadanlıqlarında isə
elektrik enerjisi mexaniki, istilik, işıq, səs enerjisinə çevrilir.
Dəmir parçasına çəkiclə zərbə vursanız, onun qızdığını müşahidə edəcəksiniz. Bu
zaman mexaniki enerji istilik enerjisinə çevrilir. Şüalanma nəticəsində işıq enerjisi
istilik enerjisinə çevrilir.
Deməli, təbiətdə baş verən hadisələr qarşılıqlı təsir, hərəkət və enerji çevrilmələri ilə
əlaqədardır. Bütün enerji çevrilmələri üçün bir qayda həmişə düzgün hesab olunur:
enerji itmir və heçdən yaranmır. O, bir şəkildən digər şəklə çevrilir.
Qida rasionunda yağlardan da istifadə olunur. İnsan ac qaldıqda bədəndəki yağlar
enerji mənbəyi olur. Ancaq normadan çox yağ yemək artıq çəki yaradır və
piylənməyə səbəb olur
1. Məişətdə enerjinin bir-birinə çevrilməsinə dair misallar göstərin.
2. Aşağıdakılara əsasən enerji çevrilmələrini müəyyənləşdirin:
Yuxudan durub yatağını yığdın
_______________________________________
Vedrədəki su günəş şüaları altında qızdı _____________________________
Otağını təmizlədin _______________________________________
Məktəbə piyada getdin _______________________________________
Dərsdən sonra hər hansı bir idman növü ilə məşğul oldun
_____________________
Dişlərini fırçalayıb yuyundun _______________________________________
Elektrik lampasını yandırdın _______________________________________
Ütünü qızdırdın _______________________________________
Orqanizm qidalandıqda:
enerji itkisi bərpa
olunur.
orqanizmin hüceyrə və
toxumalarının
qurulması, yeniləşməsi
üçün xammal yaranır.
orqanizmin mühafizəsi,
orqanların işini tənzim
etmək üçün enerji və
maddələrlə təmin
olunur.
4. İNSAN VƏ ƏTRAF MÜHIT
Təbiətdə baş verən antropogen dəyişikliklər əksər hallarda müsbət xarakter
daşıyır. Lakin təbii proseslərə müdaxilə edən insan bir sıra hallarda təbiət
qanunauyğunluqlarını pozur. Bu onun özü üçün arzuolunmaz fəsadlara səbəb olur.
Müasir dövrdə insanın ətraf mühitə mənfi və müsbət təsiri nədən
ibarətdir?
Təbiətə düzgün yanaşmadıqda, təbii sərvətlərdən məqsədyönlü istifadə etmədikdə
təbiətə böyük ziyan vurulur. Təbiətə vurulan ziyan insanın özü üçün bəlaya çevrilir,
onun sağlamlığı üçün təhlükə yaradır, mühitin dəyişməsinə güclü təsir edir.
Atmosferin çirklənməsinin sərhədi yoxdur. Nüvə silahının hər hansı bir ərazidə
sınaqdan keçirilməsi ətraf ərazilərdə də radiasiyanın artmasına səbəb olur. Çünki
radiasiyaya məruz qalmış toz hissəciklərini güclü küləklər uzaq məsafələrə yaya bilir.
Zəhərli maddələrin atmosferdə yayılmasında pestisidlərin* səpildiyi əkin sahələrinin
də rolu az deyil. Belə halda zərərli maddələr küləklə uzaq məsafələrə yayılır və
müxtəlif fəsadlar törədir.
*Pestisid – ziyanvericilərə, xəstəliklərə və alaq otlarına qarşı istifadə edilən
kimyəvi və bioloji aktiv maddələrdir.
Dostları ilə paylaş: |