BAKI UNİVERSİTETİNİN XƏBƏRLƏRİ
№3
Humanitar elmlər seriyası
2015
UOT 94 “04/15”
XVI ƏSRİN II YARISINDA SƏFƏVİ–AVROPA SİYASİ
MÜNASİBƏTLƏRİNDƏ İQTİSADİ AMİLİN ROLU PROBLEMİ
MÜASİR TÜRK TARİXŞÜNASLIĞINDA
A.S.CAVADOVA
Bakı Dövlət Universiteti
almas.cavadova66@mail.ru
Məqalədə müasir türk tarixşünaslığı əsasında Səfəvi dövlətinin Osmanlı imperi-
yası və Avropa dövlətləri ilə tranzit ipək yoluna sahib olmaq uğrunda apardığı müba-
rizə əksini tapmışdır. Səfəvi dövlətinin Qərbi Avropa ilə qarşılıqlı əlaqələrində iqtisadi
faktorun rolu göstərilmişdir.
Açar sözlər: Səfəvi, türk, Avropa, Asiya, ipək
Uzun müddət davam edən Səfəvi-Osmanlı müharibələri nəticəsində
zəifləmiş olan Səfəvi-Avropa əlaqələri XVI əsrin ortalarından başlayaraq
yenidən canlandı (5, 182). XVI əsrdə Səfəvi dövlətinin bəzi Qərbi Avropa
ölkələri ilə qarşılıqlı əlaqələrinin səbəbləri araşdırılarkən Osmanlı imperiya-
sının törətdiyi ümumi təhlükə ilə yanaşı, bəzi amillər də nəzərə alınmalıdır.
Çünki Səfəvi dövləti özünün xarici iqtisadi və siyasi mənafeyini tənzim etmək
niyyəti ilə Qərb dövlətlərinə müraciət edərkən, bəzi Avropa dövlətləri bundan
istifadə edib özlərinin Şərqlə əlaqədar müstəmləkəçilik planlarını həyata
keçirməyə çalışırdılar. XVI əsrin 60-70-ci illərində Səfəvi-İngiltərə əlaqələri də
məhz bu məqsədlərin həyata keçirilməsinə yönəldilmişdir. Amerikaya və
Hindistana gedən dəniz yollarında ağalıq edən İspaniya və Portuqaliya ilə
Aralıq dənizi hövzəsini öz nəzarəti altında saxlayan Osmanlı imperiyasına
qarşı hərbi-siyasi rəqabətə girməyə qadir olmayan gənc ingilis burjuaziyası
Amerika və Asiya qitələrinin şimalından Hindistana yeni dəniz yolları Şimal-
Qərb və Şimal-Şərq yolu açmağa cəhd göstərdi. Kraliça I Yelizaveta Tüdorun
(1558-
1603) zamanında qəti şəkildə müstəmləkə hökmranlığı yoluna qədəm
qoymuş İngiltərə Hindistanla birbaşa əlaqələrini Volqa-Xəzər yolu, yəni
Rusiya ərazisi vasitəsilə qurmağa qərar verir (9, 9). İngilis burjuaziyası Rusiya
ərazisindən keçib Volqa-Xəzər yolu, Azərbaycan və İran vasitəsilə Hindistanla
115
birbaşa əlaqə yaratmaq qərarına gəldilər. Bu məqsədlə onlar 1553-1554-cü
illərdə İngiltərənin Rusiya ilə və Rusiya ərazisi vasitəsilə Şərq dövlətləri ilə
ticarət əlaqələrini inhisara alan «Moskva kompaniyası»nı yaratdılar. Bu
kompaniyanın kapitalı 6000 funt sterlinq, 1 aksiyanın qiyməti isə 25 funta
bərabər idi (13, 93). XVI əsrin 60-70-ci illərində (1561-1581) Səfəvi dövlətinə
altı ekspedisiya göndərildi. Birinci ekspedisiya -1561-1564-cü illərdə; ikinci
ekspedisiya 1563-1565-ci
illərdə; üçüncü ekspedisiya-1565-1567-ci illərdə;
dördüncü ekspedisiya-1568-1569-cu
illərdə; beşinci ekspedisiya - 1568-1574-
cü; altıncı ekspedisiya isə 1579-1581-ci illərdə göndərilmişdir. Bununla da orta
əsrlərdə ilk dəfə olaraq, Azərbaycan Səfəvi dövləti ilə İngiltərə arasında əlaqə
yarandı (5, 183).
XVI əsrdə ingilis səyyah və tacirlərinin Şimal yolu ilə Azərbaycan
ərazisinə səyahətləri təkcə ticarət deyil, həmçinin iki dövlət arasında siyasi
münasibətlərin nizamlanması məqsədini daşıyırdı (1, 63-64). 1562-ci ildə
Azərbaycana gəlmiş ingilis səyyahı A.Cenkinson iqtisadi-coğrafi məlumatlarla
yanaşı, Azərbaycanın ticarətlə bağlı problemlərindən də bəhs edir. Onun
səyahətinin başlıca məqsədi Şah I Təhmasib tərəfindən iki dövlət arasında
Volqa-
Xəzər su yolu ilə ticarət əlaqələrinin gerçəkləşdirilməsi haqda razılıq
əldə edilməsindən ibarət idi. Lakin A.Cenkinsonun bu səfəri uğursuzluqla
nəticələndi. Bunun əsas səbəbi Səfəvi dövləti ilə Osmanlı imperiyası arasında
bağlanmış sülh müqaviləsinin qüvvədə olması ilə birbaşa bağlı idi və Azər-
baycanın Avropa ilə ticarət əlaqələrinin Kiçik Asiya ərazisi vasitəsilə həyata
keçirilməsi mümkün idi (11, 99).
B. Əhmədov qeyd edir ki, XVI əsrin ortalarında ingilislərin Rusiya,
sonradan Səfəvi dövləti ilə ticarət əlaqələrinin yaradılması gənc ingilis
burjuaziyasının ticarət və müstəmləkə siyasəti sahəsində atdığı ilk addım idi.
İspaniya və Portuqaliyanın cənub-qərb və cənub-şərq istiqamətindəki ticarət
yollarına sahib olması nəticəsində yeni xammal mənbəyi və ticarət bazarlarına
sahib olmaq uğrunda mübarizəyə qalxmasına səbəb oldu (2, 86).
XVI əsrin 60-cı illərində İngiltərənin Səfəvi dövləti ilə əlaqələr
yaratmaq üçün cəhd göstərməsinin əsas səbəbi R.Haklyut külliyatına daxil olan
sənədlərdə açıqlamasını tapmışdır. İngiltərə kraliçası Yelizaveta Tyüdorun Şah
I Təhmasibə göndərdiyi 25 aprel 1561-ci il tarixli məktubu bu problemlə bağlı
qiymətli mənbədir. Bu məktub A.Cenkinsonun Səfəvi dövlətinə gəlməsi,
dövlətin sərhədləri daxilində sərbəst dolaşması üçün Səfəvi şahına edilən
müraciət idi. İngilis kraliçası Səfəvi hökmdarına yazırdı: «Əgər bizim
aramızda, dövlətlərimiz və xalqlarımız arasında xoşməramlı belə müqəddəs
qonaqpərvərlik hüquqları və ümumi xeyirxah insani xidmətlər müəyyən
edilərsə, ürəkdən müdafiə olunarsa və bunlara möhkəm riayət edilərsə, biz
ümid edirik ki, bu kiçik başlanğıcdan bizim şərəf və şöhrətimiz naminə və
xalqlarımızın böyük faydası naminə böyük nəticələr əldə olunmasına hər şeyə
qadir olan Allahın özü kömək edər» (3, 194).
A.Cenkinsonun səyahəti dövlətlərarası ticarət əlaqələrinin canlanmasında
116
müəyyən nəticələrin əldə edilməsinə səbəb oldu. İngilis taciri Şirvan canişini
Abdulla xan Ustaclı tərəfindən aldığı ticarət imtiyazlarının şərtlərinə əsasən
Səfəvi dövləti ərazisində gömrük rüsumu ödəmədən və heç bir maneə olmadan
ticarət etmək hüququna malik olurdu. O.Əfəndiyev qeyd edir ki, Abdulla xan
Ustaclı ipəyin Rusiya və İngiltərəyə ixrac edilməsini Şirvanın, həmçinin bütün
dövlətin iqtisadiyyatı üçün gəlirli iş hesab edirdi (17, 246). İngilis tacirlərinə
aşağıdakı imtiyazlar verilmişdir:
1)
Ölkə daxilində sərbəst ticarət etmək və istənilən müddətə qalmaq;
2)
İngilis mallarının gömrüksüz idxalı və daxili bazarlarda sərbəst
satılması hüququ (17, 247).
İngiltərə burjuaziyasının nümayəndəsi olan lord Haverşemin fikrincə,
ticarəti siyasətdən və dövlət hakimiyyətindən ayırmaq olmaz və onlar bir-biri
ilə sıx bağlıdırlar. İngilislərin XVI əsrin II yarısında Səfəvi dövləti ilə olan
ticarəti də məhz dövlət siyasəti ilə bağlı olaraq müstəmləkə xarakteri daşıyırdı
(2, 87).
İngilis tarixçisi Sayksın fikrincə, «fars» məsələsi ingilislərin fikrincə elə
ipək məsələsi idi. Həqiqətən, Səfəvi dövləti ilə olan xam ipək ticarətindən
ingilis
tacirləri xeyli gəlir əldə edirdilər (2, 88).
İngilis burjuaziyasının Şərq siyasətinin işğalçılıq xarakteri bu dövlətin
Rus
dövlətinə qarşı yeritdiyi siyasətdə bir daha özünü göstərirdi. Bu,
müstəmləkəçilik siyasətinin həyata keçirilməsi üçün hazırlanmış layihələrin
məzmununda bir daha açıqlanır. Bütün layihələrdə Volqa-Xəzər yolunun işğalı
məsələsi dururdu, bu siyasətin əsasını məhz Səfəvi dövlətinə olan maraq təşkil
edirdi.
Azərbaycanı İngiltərə üçün daimi gəlir mənbəyinə çevirmək üçün ingilis
taciri Eduards
dövlətin əsas mərkəz şəhərlərində daimi ticarət faktoriyaları
yaratmaq fikrini
irəli sürmüşdür. Lakin Abdulla xan Ustaclının sonra isə şah
Təhmasibin ölümü bu siyasətin icrasına mane oldu. Volqa-Xəzər yolunda
möhkəmlənmək üçün Eduards kompaniyanın idarə heyətinə bu yolda gəmilərin
sayının çoxaldımasını təklif etmişdir (2, 88).
«Moskva
kompaniyası»nın nümayəndəsi olan L.Çepmen qeyd etmişdir
ki,
gətirdiyimiz malın müqabilində buradan alacağımız mal əsasən bütün
rənglərdə xam və emal edilmiş şəkildə ipək, ədviyyat, mirvari, qiymətli daşlar,
müxtəlif xalçalar və digər qiymətli mallardan ibarət olacaqdır. Hər hansı bir
Səfəvi şəhərində istehsal edilən ipəyin miqdarı Londonda istehsal edilən
mahudun
miqdarından çox idi (11, 147).
Əgər İngiltərə Səfəvi dövlətinə ucuz xammal mənbəyi və sərfəli bazar
kimi
yanaşırdısa, Səfəvi dövləti də İngiltərə ilə qarşılıqlı münasibətlər qur-
duqda bir
sıra siyasi problemlərin həll edilməsinə, xüsusən Qərbdə beynəlxalq
antiosman
münasibətlərinin yaradılması problemini həll etməyə çalışırdı.
Səfəvi dövlətinin əsas məqsədi antiosman hərbi siyasi ittifaqına qarşılıqlı siyasi
və iqtisadi münasibətlərə malik olduğu bütün Avropa dövlətlərinin daxil
olmasına çalışmaqdan ibarət idi. Bu fakt İngilis kompaniyasının nümayəndələri
117
ilə Səfəvi hökmdarı arasındakı danışıqların mətnində də əksini tapır. İngilis
diplomatı yazır ki, Səfəvi şahı məndən bizim ölkənin vəziyyəti, Alman impe-
ratoru, kral Filipp
və Böyük Sultanın əzəməti barəsində və onların hansının
güclü
olması haqda soruşurdu (3, 209). İngilis səfiri A.Eduardsla danışıqlar
za
manı Şah I Təhmasib ondan Avropadakı vəziyyət, ilk növbədə ispan-türk və
ingilis-
rus münasibətləri haqda soruşmuşdur (3, 227).
XVI əsrin 60-cı illərindən yaranmış olan Səfəvi-İngilis əlaqələri iki
dövlət arasında daimi iqtisadi və siyasi münasibətlərin qurulması ilə nəticə-
ləndi. Rus çarı IV İvanın Livoniya müharibəsi (1558-1583) zamanı İngiltərəni
bir müttəfiq kimi öz tərəfinə çəkə bilməməsi nəticəsində ingilis tacirlərinə ve-
rilən ticarət imtiyazları inkar edildi. Bununla da İngilis tacirlərinin Rus dövləti
ərazisindən keçməklə Volqa-Xəzər ticarət yolu ilə gerçəkləşdirilən Şərq tica-
rətinə qadağan qoyulmuş oldu. Rus çarı tərəfindən «Moskva kompaniya»sına
qarşı qəti tədbirlərin irəli sürülməsinin əsas səbəblərindən biri də ingilis ticarət
kapitalının rus bazarlarında möhkəmlənməsindən rus tacirlərinin narazı olması,
həmçinin İngiltərənin Volqa-Xəzər su yolu vasitəsilə Səfəvi dövləti ilə iqtisadi
və siyasi əlaqələr yaratması və bu bölgədə mövqeyinin getdikcə möhkəm-
lənməsi Rus çarının bu ərazilər üçün nəzərdə tutduğu gələcək planlara zidd idi.
XVI əsrin sonunda Azərbaycanın digər ərazilərinin osmanlı qoşunları tərə-
findən işğal olunması da «Moskva kompaniyası»nın fəaliyyətinin zəifləməsinə
və 1579-1581-ci illərdə kompaniyanın Səfəvi dövlətinə göndərdiyi sonuncu
ekspedisiyanın fəaliyyətinin uğursuzluğuna səbəb oldu. İngilis hökuməti Rus
dövləti tərəfindən kompaniyanın fəaliyyəti üçün yeni imtiyazlar almaq məqsədi
ilə 1600-cü ildə Riçard Li, 1602-ci ildə Con Merik, 1604-cü ildə Tomas Smiti
Rus dövlətinə göndərdi. Lakin Rusiya bu tələbləri rədd etdi (2, 89). Məhz Rus
dövlətinin siyasəti ingilis müstəmləkəçilərinin öz məqsədlərinə çatmasına
mane oldu (7, 74).
Kazan və Həştərxan xanlıqlarının 1552-1556-cı illərdə işğalı ilə Xəzər
dənizinə çıxış yoluna malik olan Rus dövləti Volqa-Xəzər ticarət yolu üzərində
İngiltərənin möhkəmlənməsinə razı ola bilməzdi. IV İvan Rus dövləti ərazi-
sindən keçməklə Volqa-Xəzər su yolu ilə Azərbaycanla ticarət etmək niyyə-
tində olan Venesiyanın da öz planlarını reallaşdırmasına razı olmadı (16, 25).
Rus dövlətinin yeritdiyi bu siyasət nəticəsində Osmanlı imperiyası və
Portuqaliya tərəfindən Aralıq dənizi və Hind okeanı yolu ilə ticarətdən məhrum
olmuş Səfəvi dövlətinin Rus dövləti ərazisindən keçməklə Volqa-Xəzər su yolu
ilə Avropa dövlətləri ilə birbaşa ticarət əlaqələri yaratmaq və bu yolla ölkənin
iqtisadi tənəzzülünü aradan qaldırmaq planı uğursuzluqla nəticələndi.
Azərbaycanın xarici ticarət əlaqələrində Rus bazarları üstün mövqeyə malik
oldular (6, 177).
XVI əsrin II yarısında Osmanlı imperiyasının yeritdiyi xarici siyasətin
əsasında əvvəlki dövrlərdə olduğu kimi ziddiyyətli problemlərin hərbi yolla
həll edilməsi planı dururdu. Bu məqsədlə Osmanlı imperiyası Avropa cəbhə-
sində hərbi əməliyyatlara başladı. 1570-1573-cü illər arasında davam edən
118
Osmanlı-Venesiya müharibəsində Venesiya ilə bir antiosman blokunda
İspaniya, Malta, Genuya, Savoyya və başqa İtaliya dövlətləri, həmçinin Roma
papası vuruşurdu. 1571-ci ildə Lepanto yaxınlığındakı dəniz savaşında koali-
siyanın qüvvələri türk donanmasını məğlub etdi. Bu döyüş Osmanlı qüvvə-
lərinin qələbəsi ilə nəticələnən Osmanlı-Venesiya müharibəsi zamanı Osmanlı
imperiyasının hərbi qüdrətinin zəiflədiyini göstərən ilk döyüş əməliyyatı idi
(17, 40).
XVI əsrin 80-90-cı illərində Hind okeanı və Fars körfəzi bölgəsində öz
mövqelərini möhkəmlətmək üçün İngiltərə ilə Portuqaliya arasında hərbi-siyasi
ziddiyyətlər başladı (13, 43).
İngiltərənin bu bölgədə yeritdiyi siyasət birbaşa Fars körfəzini ələ
keçirməklə Səfəvi dövləti ilə ticarət əlaqələrini yenidən canlandırmaqdan ibarət
idi. Fars körfəzi vasitəsilə Səfəvi dövləti ilə ticarət əlaqələri yaratmağa cəhd
edən dövlətlərdən biri də Hollandiya idi.
XVI əsrdə İspaniyanın siyasi cəhətdən güclənməsi Portuqaliya üçün
təhlükəli idi və nəticədə 1580-ci ildə Portuqaliya üçün məhvedici oldu. İspan
kralı II Filipp Portuqaliya sülaləsinin kəsilməsindən istifadə edərək özünü,
Portuqaliya taxt-
tacının qanuni varisi elan etdi və öz mövqeyini möhkəmlət-
mək üçün hersoq Albanun başçılığı ilə güclü ordunu oraya göndərdi. Bununla
da Portuqaliya İspaniyanın mülkiyyətinə çevrilmiş oldu. Lakin Avropada baş
verən müharibələrə başının qarışması nəticəsində İspaniya Portuqaliyanın
Şərqdəki müstəmləkələrinin müdafiəsi üçün heç bir tədbir görmədi. Nəticədə
bu bölgədəki ticarətdə Hollandiya getdikcə Portuqaliyanı sıxışdıraraq üstün-
lüyü ələ almağa nail oldu (12, 389).
Ümumiyyətlə, Portuqaliya Şərq ticarətindən xeyli gəlir əldə etmişdir.
1493-
cü ildən 1600-cü ilədək olan müddətdə təkcə Afrikadan 276.000 kq qızıl
ixrac edilmişdir (8, 384). Şərq mallarını ucuz qiymətə alan portuqallar
Avropada bu malları 7-8 dəfə baha qiymətə satırdılar. Onlar hər il Avropaya 5-
6 gəmi ədviyyat ixrac edirdilər, bu isə hələ Böyük coğrafi kəşflərdən öncə
venesiyalıların Avropaya ixrac etdikləri xammaldan 2-3 dəfə çox idi (12, 386).
Şərq malları, xüsusən xam ipək İspaniya iqtisadiyyatında ipək sənayesi üçün
mühüm xammal hesab edilirdi. Vaxtilə ərəblər tərəfindən yaradılmış bu sənaye
sahəsi üçün xammal daxildəki Andalusiya, Valensiya, Qranada, Mursiya
şəhərləri ilə yanaşı, Şərqdən, xüsusən Azərbaycandan daxil olurdu (12, 410).
XVI
əsr ticarətinin əsas xüsusiyyətlərindən biri də ticarət yollarının
Atlantik, Hind və sonralar Sakit okeana doğru istiqamətlənməsi idi. Bunun
nəticəsində çay və dəniz ticarəti okean ticarəti tərəfindən sıxışdırılmış oldu (12,
375). XVI əsrin II yarısında Osmanlı imperiyasının hakim dairələri genişmiq-
yaslı işğalçılıq siyasətini davam etdirirdilər. Lakin yeni müharibələr nəticə-
sində əvvəlki dövrlərdəki uğurlar əldə edilmirdi. Çünki əgər XV-XVI əsrlərdə
Osmanlı sultanlarının yeritdiyi xarici siyasətin əsasında Avropa, Asiya və Af-
rika istiqamətində işğalçılıq planlarını həyata keçirmək dururdusa, artıq I Sü-
leymanın dövründən etibarən əsas diqqət dünya dövləti statusunun qorun-
119
masına yönəldilmiş oldu (10, c.2, 215).
XVI əsrin sonlarında Osmanlı imperiyası Səfəvi dövləti ilə bağlı nə-
zərdə tutduğu planları həyata keçirməyə cəhd etdi. Osmanlı dövləti Azərbaycan
ipəyini inhisara almaq, Xəzərətrafı və Fars körfəzi bölgələrində möhkəm-
lənmək planlarını həyata keçirmək, Qərb cəbhəsində neytral vəziyyət yaratmaq
üçün 1575-
ci ilin avqust ayında Venesiya respublikası ilə 7 mart 1573-cü ildə
bağlanmış müqavilənin vaxtını uzatdı (4, c.3, 6).
1577-
ci il 30 iyul tarixində Polşa ilə sülh müqaviləsi imzalandı. 1577-ci
il 1 yanvar tarixində 1568-ci il fevralın 17-də Avstriya ilə bağlanmış mü-
qavilənin qüvvədə olma vaxtının daha səkkiz il müddətinə uzadılması ilə
Osmanlı imperiyası üçün bütün hərbi qüvvələrini Səfəvi dövlətinə qarşı
istiqamətləndirmək imkanı yaranmış oldu (4, c.3, 8). 1578-1590-cı illərdə baş
vermiş Osmanlı-Səfəvi müharibəsi zamanı Səfəvi dövləti Osmanlı impe-
riyasına qarşı bir sıra Avropa dövlətlərini, xüsusən İspaniya, Portuqaliya və
Papalığı müharibəyə qaldırmağa təşəbbüs etdi. Lakin Qərbi Avropada baş
verən siyasi hadisələr, xüsusən özünün irticaçı məqsədlərini, başlıcası Qərbi
Avropa dövlətləri üzərində siyasi üstünlüyünü həyata keçirməyə çalışan İspan
kralı II Filipp və Papalığın əsas məqsədi Səfəvi dövlətini Osmanlı imperiyasına
q
arşı müharibəyə cəlb etməklə İspaniya monarxiyasının vəziyyətini yüngülləş-
dirmək və beləliklə II Filippin və onun müttəfiqi XIII Qriqorinin feodal-katolik
irticasını gücləndirmək üçün əl-qolunu açmaq idi (15, 32).
Səfəvi dövləti ilə ittifaq II Filippə türk qüvvələrini iki cəbhədə mü-
barizəyə cəlb etməklə İspaniyanın Aralıq dənizi əyalətlərinin mühafizəsini
təmin etmək üçün lazım idi. Səfəvi dövləti ilə münasibətdə Portuqaliya hö-
kuməti İspaniya ilə eyni mövqedən çıxış edirdi və o, Səfəvi şahını inandırmağa
çalışırdı ki, məhz İspan kralı türklərə qarşı Misir və Suriyanın bütün müsəlman
və xristianlarını mübarizəyə qaldıra bilər. İspaniya kimi Portuqaliyanın da əsas
siyasəti Səfəvi dövlətini türklərə qarşı uzunmüddətli müharibəyə qaldırmaqdan
ibarət idi (14, 121). Fars körfəzində öz mövqeyini daha da möhkəmləndirmək
üçün Portuqaliya həm Səfəvi və həm də Osmanlı imperiyasının siyasi cəhətdən
zəifləməsini istəyirdi (6, 188). Lakin əsrin əvvəllərində olduğu kimi, bu dəfə də
Səfəvi-Osmanlı qarşıdurmasında Avropa dövlətləri siyasi müttəfiq kimi çıxış
etmədilər (14, 122).
ƏDƏBİYYAT
1.
Ашурбейли С.Б. Баку в XVI-XVIII вв. по описанию путешественников // Изв. АН
Азерб. ССР, 1947, №1, с. 63-73
2.
Ахмедов Б.А. Характер торговых отношений Англии с Азербайджаном во второй
половине XVI и начале XVII вв. // Ученые записки АГУ (серия история и
философия), 1971, №5, с. 86-90
3.
Английские путешественники в Московском государстве в XVI веке. Перевод с
англий. Ю.В.Готье, Л.: 1937, 306 с.
4.
Danişmend İ.H. İzahlı Osmanlı tarihi kronolojisi: 3 ciltde, 3 c., İstanbul: Türkiye Yayın-
evi, 1950, 805 s.
120
5.
Mahmudov Y.M. Öyrənilməmiş səhifələr. Bakı: Gənclik, 1972, 98 s.
6.
Махмудов Я.М. Взаимоотношения государств Аккоюнлу и Сефевидов с запад-
ноевропейскими странами. Баку: Бак. Унив., 1991, 241с.
7.
Накашидзе Н.Т. Русско-английские отношения во второй половине XVI в. Тбилиси:
Изд. Тбилис. Унив., 1955, 156 с.
8.
Османская империя и страны Центральной, Восточной и Юго-Восточной Европы в
XV-
XVI вв. М.: Наука, 1998, 301с.
9.
Cəfərli N. Səfəvilər dövləti: məhkəmə orqanları və hərbi təşkilatın quruluşu. Bakı: Hüquq
ədəbiyyatı, 2000, 159 s.
10.
Источниковедческие разыскания.1982.Тбилиси: Мецниереба, 1985, 266 с.
11.
Путешественники об Азербайджане. Баку: АН Аз. ССР, 1961, т.1, 297 с.
12.
Полянский Ф.Я. Экономическая история зарубежных стран (эпоха феодализма). М.:
МГУ, 1954, 506 с.
13.
Туманович Н.Н. Европейские державы в Персидском заливе в XVI-XIX вв. М.:
Наука, 1982, 188 с.
14.
Шахмалиев Э.М. Дипломатические отношения Испании с Сефевидским государ-
ством во второй половине XV века // Ученые записки АГУ им. С.М.Кирова, 1955,
с.117-127
15.
Шахмалиев Э.М. Донесение папского посла Векьетти о Сефевидском государстве //
Ученые записки Министерство высшего среднего специального образования Азерб.
ССР, Серия история и философия, 1977, №4, с. 32-37
16.
Шаркова И.С. Россия и Италия. Торговые отношения XV-первой четверти XVIII в.
Под ред. член корр. АН СССР, В.И.Рутенбурга. Л.: Наука, 1981, 207 с.
17.
Эфендиев О.А. Азербайджанское государство Сефевидов в XVI веке. Баку: Элм,
1981, 307
с.
РОЛЬ ЭКОНОМИЧЕСКОГО ФАКТОРА В СЕФЕВИДО-ЕВРОПЕЙСКИХ
ПОЛИТИЧЕСКИХ ОТНОШЕНИЯХ ВО ВТОРОЙ ПОЛОВИНЕ XVI ВЕКА
В СОВРЕМЕННОЙ ТУРЕЦКОЙ ИСТОРИОГРАФИИ
А.С.ДЖАВАДОВА
РЕЗЮМЕ
В статье на основе современной турецкой историографии рассмотрены вопросы,
связанные с борьбой между Сефевидским государством Османской империей и Евро-
пейскими странами за владение транзитным шелковым путем, за присоединение азер-
байджанских территорий, являющихся основным источником шелка-сырца. Показанo
роль экономического фактора во взаимоотношениях между Сефевидами и Западной Ев-
ропой.
Ключевые слова: Сефеви, тюркский, Европа, Азия, шелк
121
THE ROLE OF THE ECONOMIC FACTOR IN THE POLITICAL RELATIONSHIP
OF SAFAVID – EUROPEAN STATES IN THE SECOND HALF
OF THE XVI CENTURY IN THE MODERN TURKISH HISTORIOGRAPHY
A.S.JAVADOVA
SUMMARY
The article studies the questions of struggle between the Safavid state with the Otto-
man empire and Europian states for possession in the transit silk way, for joining Azerbaijan
territories that were the basic source of silk on the basis of a modern Turkish historiography.
The role of an economic force in mutual relations between Safavid state and the Western
Europe is shown.
Key words: Safavi, Turkish, Europe, Asia, Shilk
122
Dostları ilə paylaş: |