13
sevinc içində əl çalıb onu təbrik edirdi. Natəvansa gülə-gülə rəfiqəsinin boynuna
sarılıb, ərkyana:
- Gördün, bilirdim axı, növbə sənindir! – söyləyirdi.
Ürəyinin döyüntüsünə Fidan diksinib xəyaldan ayrıldı. Rəfiqəsinin toyuna
gedib-getməyəcəyinə hələ də qəti qərar verməkdə çətinlik çəkirdi.
- Ah, Natəvan, Natəvan, - deyə pıçıldadı, - bir-birimizin toyunda iştirak etməyi o
qədər arzu eləmişdik ki, indi nə qərar qəbul edəcəyimi özüm də bilmirdim. Dörd
yol ayrıcındayam, çaşıb qalmışam. Deyəsən, anam haqlıdır, sən ailənin xatirinə bu
seçimi etdin. Xoşbəxt ol bacım, toyun mübarək olsun!..
Güzgünün qarşısına keçib heyranlıqla boy-buxununa baxırdı – onun boyasız
dodaqları, alışıb-yanan ənlik-kirşansız yanaqları çiyələk kimi qızarmışdı.
Köynəyinin düz yaxası dik döşlərinin giləsinəcən açılmışdı. Əllərini həsrətlə
sinəsində, belində, yupyumşaq saçlarında gəzdirdi. Öz gözəlliyinə tamaşa edən
növrəstə qız elə bil ağappaq, yarıqlı gəlinlik paltarında xoşbəxtliyinin astanasında
dayanmışdı. Xəyalında canlandırdığı ağ bənizli, çinar qamətli oğlana bəylik
kostyumu bərk yaraşırdı. “Vağzalı” oyun havası altında onlar qol-qola girib böyük
toy zalına daxil olurdular. Natəvan da ingilis əri ilə birlikdə onları təbrikə gəlmişdi.
Şorgöz ingilissayağı Cek heyrətlə: “İlahi, mən kor olmuşam, qonşuluqda belə
mələksimanı görməmişəm” – deyirdi. Natəvan qısqanclıqla, naz-qəmzəylə ərini
süzürdü: “Əzizim, gəlinlik paltarında bütün qızlar mələyə bənzəyirlər...”. Cek
nəzakətlə razılaşmır, etiraz edirdi: “Sən bir ətrafa bax, bu zalda gəlinlik paltarı
geyməyən gör nə qədər mələk var!”. Çinar boylu, qədd-qamətli Əsmər bəy də
nədənsə əsəbiləşirdi. Elə bil toyda iştirak edən bütün gözəl-göyçək xanımları
ingilisə qısqanırdı. “Axı, mən onları toya dəvət eləməmişəm” – deyə Fidan özünə
haqq qazandırdı, gileylənmək istəyəndə xəyalında canlandırdığı toy səhnəsi
büsbütün dağıldı, güzgüdə yazıq görkəminə baxıb başını buladı. “Yəni
doğrudanmı, belə bir oğlan hardasa var? Əlbəttə, var, ay yazıq, di gəl ki, onun
sənin qismətinə yazılıb-yazılmadığını Tanrıdan başqa kimsə bilmir”.
Günlər su kimi axıb keçdi. Fidan anasının ciddi təkidinə baxmadı, min cür səbəb
gətirdi, Natəvanın toyuna getməyə razı olmadı. Amma Natəvan alicənablıq
14
göstərdi, rəfiqəsindən buna görə incimədi. Xoşbəxtlik göyünün yeddinci qatında,
qanad açıb süzən bəxtəvər gəlinin inciklik barədə düşünməyə nə vaxtı vardı, nə də
həvəsi. Cekin aldığı təzə mənzilə köçüb, Antaliyada keçirdikləri bal ayından
dönəndən sonra bir müddət kollecə ayaq basmasa da, Fidanla barışmağa can atırdı.
Gözlə qaş arasında vaxt tapıb rəfiqəsinə səmimi bir məktub da göndərmişdi: “Biz
ağır günlərin dostu-rəfiqəsi olmuşuq, toyuma gəlmədiyinə görə incimirəm, indi
mənim üçün həmin gün geridə qalıb, zirzəmidə kirayədə yaşadığım illər kimi... Öz
ailə biznesimi qurmaq niyyətim var, tanınmış bir iş adamı olacağıma zərrəcə
şübhən olmasın. İstəyirəm sən də mənə qoşulasan, kolleci qurtarmaq, hələ
qayğılardan azad olmaq demək deyil, bacım, bir də istəyirəm səni yaxşı bir adamla
tanış edəm, bəlkə elə o sənin axtardığın, arzuladığın insan olacaq!.. Evimin də,
ofisimin də, qəlbimin də qapıları üzünə daim açıqdır. Səmimiyyətimə inan. Yolunu
həmişə gözləyən, Nata”.
Hərdən hissə qapılanda özü özünü anlamırdı. Elə bil rəfiqəsinin toyuna
getmədiyinə görə bir qədər peşman olmuşdu...
Anası Güləfşan xanım qonum-qonşudan eşitmişdi ki, Natəvanın əri ona toy
hədiyyəsi kimi qırmızı rəngdə “Mercedes” markalı maşın bağışlayıb. “Görürsən,
mən deyirdim axı, bu icdivacla o qız özünü də, ailəsini də kasıbçılığın pəncəsindən
qurtaracaq!”... Kollec yoldaşları başqa hadisə uydurmuşdular: Natəvan şəhərin
mərkəzində gözəllik salonu, yanında kiçik porfimeriya ətriyyat dükanı, aptek açıb.
İşləri başından aşdığına görə heç kollecə də ayaq basmır. Təki ortada pul olsun.
Bəziləri mənasız hərəkətlərin üstündə Natəvandan küsdüyünə görə qınayırdılar.
Bəlkə də kim bilir, əvvəlki münasibət qalsaydı, indi Fidan da ən yaxın rəfiqəsinin
hesabına yaxşı qazanclı işin qulpundan yapışıb imkan sahibi olmuşdu, özünü də,
ailəsini də maddi sıxıntının pəncəsindən qurtarmışdı...
O isə kitab oxuyanda, yatanda-duranda, qısası, tənash qaldığı anlarda xəyalında
aşiq olduğu çinarboylu, əsmərbənizli oğlan barədə düşünürdü: görəsən, həyatda
qarşısında belə bir oğlan çıxsaydı, ata-anası onu həmin oğlana ərə verməyə razı
olardılarmı? Bu cür fikirlər qızın yuxusunu ərşə çəkir, onu rahat buraxmırdı.
15
Bir gün evə gələndə isə çox qorxduğu əhvalat baş verdi. Qapının astanasında
ata-anasının üzündəki məsum ifadənin təsirindən heyrətləndi, bir azdan işin nə
yerdə olduğunu yaxşı anlasa da özünü o yerə qoymadı. Kirimişcə otağına keçdi,
paltarını dəyişmək istəyəndə anası içəri girən kimi üzündən öpüb bağrına basdı:
- Fidan, qızım, Allah səni xoşbəxt eləsin! İlahi, sənə min şükür, ölmədik, bu
günü də gördük.
Sevincdən, fərəhdən anasının gözlərinin içi də gülürdü, çölü də.
- Nə olub, ana, niyə belə pörtmüsən?
- Qızım, Allahdan gizlin deyil, daha səndən nə gizlin, onsuz açılmalıdı, atan səni
əslən içərişəhərli oğlana ərə verir. And-aman edir ki, yaxşı oğlandır. Valideynləri
xaricdə yaşayır, özünün ayrıca evi, maşını, işi...
Fidan bir az kənara çəkilib başını çiyninə əydi:
- Ana, ana, axı... – Fidan kövrəldiyindən nə deyəcəyini bilmirdi, dili topuq
vururdu, çünki qızın şirin xəyalları alt-üst olmuşdu. Kirpiklərin qaldırıb anasına
baxanda gözləri qeyri-ixtiyari yaşla dolur.
Yaşla dolu gözlərin qəm yükünə dözməyən ana qızına yaxınlaşdı, indi o da
kövrəlmişdi, bir az əvvəl üz-gözündən yağan təbəssüm çəkilmişdi, əllərini irəli
uzadıb Fidanın saçlarını sığalladı, acizanə yalvarışla:
- Qızım, qurban olum, biz sənin xoş gələcəyini düşünürük, sən də atanı, məni,
kiçik bacını düşün! – dedi.
Fidanın boğazı qəhərdən qurudu, udqundu, özünü ələ alıb:
- Ana, axı niyə belə düşünürsüz? – deyəndə səsi yenə titrədi, amma ağlamadı, -
indi iyirmi birinci əsrdi, Məşədi İbad zəmanəsi deyil, ata qızını tanımadığı,
görmədiyi, sevmədiyi, xasiyyətinə bələd olmadığı bir pullu yaşlı adama ərə versin?
- Məni də sənin bu pinəçi atana ərə verəndə, nə üzünü görmüşdüm, nə də adını
eşitmişdim, üstəlik, yaşı da qırxı çoxdan ötüb keçmişdi. Allaha gündə min kərə
şükür eləyirəm ki, nə yaxşı, mənim qismətimə onun kimisini çıxardıb, insafən bu
vaxtacan pis yaşamamışıq, heç nəyin xiffətini çəkməmişik, son günlər dəb
dəyişilib, zövqlər artıb, atanın müştəriləri azalıb, dolanışıq sarıdan bir az sıxıntımız
var, inşallah, yenə hər şey düzələr, pis günün ömrü az olar...
Dostları ilə paylaş: |