İnstitusional pilot qiYMƏTLƏNDİRMƏ ÜZRƏ QİYMƏTLƏNDİRMƏ hesabati



Yüklə 259,73 Kb.
səhifə2/6
tarix07.04.2018
ölçüsü259,73 Kb.
#36416
1   2   3   4   5   6

Ekspert qrupunun qiymətləndirməsi universitetin özünütəhlil hesabatında təqdim olunan sübutlara, universitetdən alınan əlavə məlumatlara və UNEC-də 3 gün ərzində keçirilmiş müsahibələrə əsaslanır. Aşağıdakı qiymətləndirmə sahələri əsasən AzST-də əks olunan tələblərə cavab verir: İdarəetmə, İnsan resursları, Tələbələr və Tədris və təlim resursları və dəstək xidmətləri. Qrup bu qiymətləndirmə sahələri üzrə bir neçə güclü tərəf və öncül praktika, o cümlədən rəhbərliyin müəssisənin strateji hədəflərinin əldə edilməsi öhdəliyini, fəal beynəlxalq əməkdaşlıq, yüksək ixtisaslı işçi heyət, e-universitet kimi innovativ praktika müşahidə etdi. Qrup bu sahələr üzrə inkişaf etmək üzrə tövsiyələr də təqdim edib. Məsələn, tələbələrin və xarici maraqlı tərəflərin universitetin qərarvermə prosesinə və təhsilin inkişaf etdirilməsinə daha çox cəlb edilməsi.

Strateji planlaşdırma, Təhsil proqramları və onların hazırlanması və Tədqiqat fəaliyyəti sahələri AzST-də əks olunan meyarların tələblərinə qismən cavab verir. Bu sahələr üzrə güclü tərəflər və öncül praktikalar da var. Məsələn, həm rəhbərliyin, həm də işçi heyətin bu sahələrdə uğur qazanmaq öhdəliyi və iradəsi. Qrup əsas tələblər üzrə təkmilləşdirilməli sahələr də müəyyənləşdirdi. Məsələn, rəsmi inkişaf strategiyasının təsdiqlənməsi, tələbələrin və xarici maraqlı tərəflərin UNEC-də təhsilin inkişafına cəlb edilməsi, təhsil proqramlarının məzmunun müntəzəm olaraq qiymətləndirilməsi və işçi heyətin və tələbələrin tədqiqat potensialının gücləndirilməsi. Əlavə sübutlar və təhlil aşağıdakı fəsillərdə verilib.

Qiymətləndirmə qrupu sahə səfərini müvəffəqiyyətlə həyata keçirməyə imkan verən qonaqpərvərliyə və praktiki hazırlıqların təşkil olunmasına görə UNEC rəhbərliyinə təşəkkür edir. Eləcə də ekspert qrupu yekun hesabatı hazırlamaq üçün sübut və məlumat toplamaq imkanı verən açıq və səmimi müsahibələrə görə bütün müsahiblərə təşəkkürünü bildirir.



Ekspert qrupu əsas güclü tərəflərin və tövsiyələrin icmalını aşağıda təqdim edir. Hesabatın hər fəsli güclü tərəfləri, öncül praktikaları və tövsiyələri ətraflı təsvir edəcək.
Güclü tərəflər:


  • Universitet rəhbərliyi UNEC-in strateji seçimləri baxımından nəyə və nə üçün nail olmaq istədikləri barədə aydın hədəfə və realistik yanaşmaya malikdir. Universitetin rəhbərliyi arasında dərin strateji düşüncə mövcuddur.

  • Universitetin rəhbərliyi təhsil müəssisəsinin strateji hədəflərini dəstəkləməsi üçün təşkilati strukturda islahatlar aparmağa hazırdır.

  • UNEC-in bir neçə beynəlxalq və regional təşkilatlara və assosiasiyalara üzvlüyü təhsil sahəsində yeni tendensiyalar və siyasətlər barədə məlumatlı olmaq eləcə də digər universitetlərlə bilik mübadiləsi aparmaq və ikitərəfli əməkdaşlığın qurulmasına imkan verir. Universitet yeni beynəlxalq tərəfdaşlar tapmaq istiqamətində fəal çalışır və tələbələrə bir çox mübadilə imkanları verir və bu, milli kontekstdə UNEC-in güclü tərəfidir.

  • Çox sayda yüksək ixtisaslı və peşəkar işçi heyətin olması UNEC-in böyük üstünlüyüdür.

  • İşçi heyətin əksəriyyəti UNEC-də təhsilin keyfiyyətinin artırılmasını istəyir və bu, universitetə dünya səviyyəli universitet olmaq hədəfinə nail olmağa yardım edəcək əsas faktordur.

  • Diferensial Əmək haqqı Sistemi (DƏHS) akademik işçi heyətin mükafatlandırılması və dəyərləndirilməsi üçün sistematik yanaşma yaratmaq səylərini nümayiş etdirir və işçi heyətin əksəriyyəti tərəfindən müsbət qarşılanıb.

  • E-kitabxana və e-universitet vasitəsilə tədris materiallarına elektron çıxış ekspert qrupunun alqışladığı öncül praktikalardandır.

  • UNEC tədris və təlim prosesində maksimum şəffaflığı təmin etmək məqsədi ilə tədbirlər görür.

  • İşçi heyəti və tələbələr Karyera Mərkəzi barədə yaxşı məlumatlıdırlar və mərkəzin işəgötürənlərlə əlaqələr vasitəsilə tələbə məşğulluğunu dəstəkləmək kimi tədbirləri təqdirəlayiqdir.

  • UNEC tədris-köməkçi heyətin rolunu inzibati yardım təminatından tədrisin dəstəklənməsinə transformasiya edən ilk Azərbaycan universitetlərindəndir.


Tövsiyələr:


  • Bütn işçi heyətin tanıması və məlumatlı olması üçün rəsmi inkişaf strategiyası hazırlanmalı və yekunlaşdırılmalıdır.

  • Rəhbərlik və işçi heyət əmək bazarında olan dəyişiklikləri, cəmiyyətin ehtiyaclarını və maraqlı tərəflərin daha geniş şəkildə cəlb olunmasını izləmək lazım olduğunu bilsələr də, bu məsələlərin həll olunması əlavə tədbirlər tələb edir. Universitet hansı maraqlı tərəfləri cəlb etməli olduğu və hansı növ iştirakın UNEC üçün faydalı olacağını nəzərdən keçirməlidir.

  • UNEC təhsil proqramlarının və silabusların müntəzəm olaraq qiymətləndirilməsini nəzərdən keçirməlidir. Tələbələr və xarici maraqlı tərəflər bu qiymətləndirmələrə cəlb olunmalıdırlar.

  • Qiymətləndirmə qrupu universitetə tədris materiallarının aktuallığını önə çəkməyi və müasir texniki resursları və tədris və təlim prosesində texniki avadanlıqlardan səmərəli istifadəni təkmilləşdirməyi tövsiyə edir. UNEC tədris və təlim metodlarının istifadəsi üzrə vahid standartlar və ya təlimatlar işləyib hazırlamağı nəzərdən keçirməlidir.

  • Tədris heyəti universitetdə tədrisin keyfiyyətinin yüksəldilməsi üçün daha çox pedaqoji təlim keçməlidir. Heyətin kompetensiyalarının yaxşılaşdırılması daha sistematik olmalı və yaxşılaşmanı monitorinq etmək zəruridir.

  • Tələbələr UNEC-də təhsilin inkişaf etdirilməsinə cəlb olunmalıdırlar.

  • UNEC beynəlxalq cəhətdən rəqabətə davamlı elmi tədqiqata töhfə verən strategiya formalaşdırmalı və elmi tədqiqatın keyfiyyətini təmin edəcək prosedurlar tətbiq etməlidir. Tədqiqat yönümlü universitet olmaq hədəfinə nail olmaq üçün maliyyə resurslarını təmin etmək zəruridir.

  • Qiymətləndirmə qrupu elmi tədqiqatın aparılması sahəsində işçilərin kompetensiyaları və bacarıqlarını, eləcə də resursları dəstəkləyəcək sistematik mexanizmlərin yaradılmasını tövsiyə edir.

  • Beynəlxalq tədqiqat məlumat bazalarına çıxışın təminatı tədqiqat fəaliyyətinin yaxşılaşdırılmasının tərkib hissəsidir.

  • Tələbələrə tədqiqat metodologiyaları və bacarıqları üzrə kurslar və təlimlər keçirilməlidir.

  • Tələbələrin e-universitetə çıxışı internet və ortaq komputerlərin təmin edilməsi ilə bütün binalarda asanlaşdırılmalıdır.

  • Karyera Mərkəzində məzunların məşğulluğu və əmək bazarının ehtiyaclarına dair məlumat var və bu məlumat təhsil proqramlarının strukturunun planlaşdırılmasında istifadə edilməlidir.



Pilot qiymətləndirmənin tapıntılarına əsasən Azərbaycan Respublikasının Təhsil Nazirliyinə tövsiyələr:


  • Ali təhsil müəssisələrinə daha böyük azadlıq və muxtariyyət verilməlidir ki, təhsil proqramlarını ehtiyaclara uyğun müntəzəm şəkildə dəyişdirsinlər və yeniləsinlər.

  • Təşkilati strukturu və qərarverici orqanları barədə qərarlar qəbul etmək üçün ali təhsil müəssisələrinin daha geniş azadlıq və muxtariyyətə ehtiyacları vardır.

  • Təhsil prosesini və onun təşkilini yaxşılaşdırmaq universitetlər daxili müstəqil qərarvermə səlahiyyətini zəruri edir.

  • Azərbaycanın bütün ali təhsil müəssisələrində elektron məlumat bazaları vasitəsilə müasir akademik tədqiqatlara çıxış təmin olunmalıdır.

IV Qiymətləndirmə sahələri üzrə nəticələr


  1. STRATEJİ PLANLAŞDIRMA

Qiymətləndirmə



Tələblərə tam cavab verir




Tələblərə əsasən cavab verir




Tələblərə qismən cavab verir

X

Tələblərə cavab vermir




Tələblər:

  • Müəssisənin rolu (missiya və gələcəyə baxışı) milli təhsil kontekstində aydın şəkildə müəyyənləşdirilib və müvafiq (daxili və xarici) maraqlı tərəflər tərəfindən dəstəklənir.

  • Müəssisənin Elmi Şurası tərəfindən təsdiqlənən inkişaf strategiyası müəssisənin missiya bəyannaməsi və məqsədlərinə uyğundur. Onun həyata keçirilməsi üçün qısa və ortamüddətli planlar mövcuddur.

  • Müəssisənin inkişaf strategiyası onun resusrlarına (maliyyə, işçi heyət, infrastruktur), yeni resurslar cəlb etmə potensialına, əmək bazarında baş verən dəyişikliklərə və cəmiyyətin ehtiyaclarına uyğundur.

  • Müvafiq maraqlı tərəflər (professor-müəllim heyəti, tələbələr və işəgötürənlər) müəssisənin strateji inkişafı prosesinə cəlb olunurlar.

  • Strategiyada qoyulan məqsədlərin əldə olunmasını qiymətləndirmək üçün proseslər mövcuddur, qısa və ortamüddətli planlar tətbiq olunur və həyata keçirmə prosesi monitorinq edilir.

  • Ali təhsil müəssisənin missiyası, gələcəyə baxışı və məqsədləri barədə məlumat ictimaiyyətə açıqdır (veb səhifə, mətbuat və digər kanallar).

Qeydlər, müşahidələr, sübutlar
Universitetin ÖH-nə əsasən milli təhsil kontekstində UNEC-in missiyası və gələcəyə baxışı Prezident İlham Əliyevin bəyanatı “…UNEC-in missiyası ölkənin iqtisadiyyatının inkişafına töhfə vermək və iqtisadçıların hazırlanması sahəsində “dünya səviyyəli universitet” olmaqdır.” Bəyanata əsaslanaraq demək olar ki, ölkə rəhbərliyində güclü dəstək var, lakin eyni zamanda UNEC-in rolu kifayət qədər aydın müəyyənləşdirilməyib. Belə ki, missiya və gələcəyə baxış bəyanatları yoxdur. Akademik müəssisə kimi missiya və gələcəyə baxış bəyannamələri üzərində işləməyi tövsiyə edirik. Bəyannamələrin məzmunu akademik olmalı və müəssisənin irəlilədiyi istiqamətləri və strateji seçimləri əks etdirməlidir.

UNEC-də strateji planlaşdırmanın hazırki statusu ilə bağlı rektor strateji planlaşdırma üzrə komissiyanın yaradılması üçün əmr verib, lakin təsdiqlənmiş strategiya hələ ki, yoxdur. Qiymətləndirmə zamanı, komissiya strateji inkişaf planının layihəsini hazırlayıb UNEC-in Elmi Şurasına göndərib, lakin qısa və orta müddətli planlar daxil olmadığından Elmi Şura planı təsdiqləməyib. Bu səbəbdən, UNEC-də hələ ki, təsdiqlənmiş inkişaf strategiyası yoxdur və hazırlanma prosesi yalnız indi başlayıb.

Eyni zamanda, UNEC-in rəsmi olaraq təsdiqlənmiş inkişaf strategiyası olmasa da, qiymətləndirmə komandası universitetin ali rəhbərliyində strateji düşünmə və planlaşdırmanın mövcud olduğunu müşahidə etdi. Bir çox rəhbər şəxslər, yüksək və orta səviyyəli menecerlər strateji düşünmə üzrə vahid baxışa və yanaşmaya malikdir. Vəziyyəti belə təsvir etmək mümkündür: yazılı inkişaf strategiyası olmasa da, UNEC mütərəqqi ali rəhbərliyin zehnində olan yazılmamış və qeyri-rəsmi strateji plana uyğun olaraq idarə olunur. Bu müsbət əlamət olsa da, rəsmi inkişaf strategiyası mütləq təsdiqlənməlidir, belə ki, yalnız müəyyən qrup deyil, bütün heyət sənədlə tanış olmalı və onun barəsində məlumatlı olmalıdır. Hal-hazırda, əksər strateji seçimlər rektor və ya praktikada universitetin idarəedici və ya idarəetmə qurumu olan Elmi Şura tərəfindən edilir. UNEC-in missiyası, gələcəyə baxışı və məqsədləri ictimaiyyətə açıq olsa da, (məsələn, universitetin veb səhifəsi, dövlət sənədləri və məlumat materialları) universitet bu materialların keyfiyyəti, məzmunu və məlumatlandırma aspektləri üzərində iş aparmalıdır.

Ali rəhbərliklə müsahibələr zamanı rəsmi inkişaf strategiyasının hazırlanmasına tələsməmək lazım olduğuna dair tutarlı arqumentlər səsləndirildi. Hazırki vəziyyəti belə izah etmək olar ki, universitetin ali rəhbərliyi akademik heyət arasında əsaslı islahatların aparılması üçün geniş dəstək bazasının formalaşdırılmasını, ən yaxşı qərb universitetlərində təhsil almış idarəetmə heyəti cəlb etməyi və mümkün strateji seçimləri maraqlı tərəflər arasında müzakirə etməyi gözləyə bilər. Yüksək səviyyələi menecerlərdən bir çoxu UNEC-in strateji planlaşdırmaya və qərarverməyə realistik yanaşma tətbiq etdiyi fikrindədir. Bundan əlavə, strateji seçimlərin müzakirəsindən və qərarlaşdırılmasından öncə universitet üçün əsaslı missiya və ya gələcəyə baxış bəyannaməsinin olması faydalıdır. Beləliklə, qiymətləndirmə qrupu müəssisənin missiya bəyannaməsi və məqsədlərinə uyğun olan inkişaf strategiyası olmadığını, eləcə də qısa və orta müddətli planların tətbiq edilmədiyini qeyd etsə də, kontekstin və təməlin yaradılmasına vaxtın ayrılması faydalı olar. Təməlin yaradılması real missiyanın, gələcəyə baxışın və inkişaf strategiyasının yaranması üçün münbit şərait yarada bilər. Müəssisənin strategiyasının hazırlanması üçün kifayət qədər resurs olmasa da, rəhbərliyin strateji düşünmə səviyyəsini dəstəkləyə bilən insanlar baxımından prosesə davam etmək üçün iradə vardır və universitet bu mərhələdə prosesi dəstəkləmək üçün kifayət qədər maliyyəyə və infrastruktura malikdir.

Müsahibələr aşkarladı ki, qərarvermə üçün strateji çərçivəni formalaşdıran və inkişaf strategiyası əvəzi kimi istifadə oluna biləcək iki strateji sənədə malikdir: 1) UNEC-də tədris və təlimin keyfiyyətinin yüksəldilməsi planı və 2) UNEC-in beynəlmiləlləşdirilməsi planı. Bundan əlavə, müxtəlif müzakirələrdə və qərarvermə proseslərində tez-tez istinad edilən ölkə prezidenti tərəfindən hazırlanan Azərbaycanda ali təhsilin inkişafı üzrə milli strategiya və yol xəritəsi çox vurğulanır. Eləcə də dekanlarla və direktorlarla aparılan müsahibələrdə qrup əksər fakultələrin öz strateji planlarının olmasını aşkarladı. UNEC-də də alt-yanaşmalar və alt-hədəflər var və bunlara səfər müddətində tez-tez toxunuldu: daha səmərəli Məktəb-Kollec-Universitet modelinin yaradılması, „e-universitetin“ yaradılması və London İqtisad və İctimai Siyasət Məktəbi kimi mühüm beynəlxalq oyunçularla tərəfdaşlıq etmək. Bundan əlavə, universitetin strateji baxış və iddiasını ÖH-də açıq-aydın görmək mümkündür. İlk növbədə, UNEC ISO 9001:2008 “Keyfiyyəti İdarəetmə Sistemi” üzrə beynəlxalq sertifikat əldə etmiş ilk dövlət universitetidir. İkincisi, bisnes məktəblərinin akkreditasiyasını aparan Menecmentin İnkişafı üzrə Avropa Fondunun tamhüquqlu üzvü olan ilk Azərbaycan universitetidir. Üçüncüsü, “The Ranking Web” və “Webometrics” kimi reytinqlərdə tanınır. Bundan başqa, UNEC 6 beynəlxalq və regional universitet assosiasiyasının üzvüdür.

Müsahibələr zamanı UNEC-in rektoru ortamüddətli gündəliyinin əsasını təşkil edən 3 konkret məqsədi qeyd etdi: regionda dünyanın ən yaxşı universiteti olmaq, məzunların 80%-nin məzun olduqdan üç ay müddətində məşğulluq tapması və 70% məzunların ingilis dilində danışa bilməsi. Rektor eləcə də təkmilləşdirilməli olan 3 sahəni qeyd etdi: müəllimlərin keyfiyyəti, Azərbaycanın ən yaxşı şagirdlərini cəlb etmək və təhsil müəssisəsindən tədqiqat yönümlü müəssisəyə çevrilmək.

Qərb standartlarına əsasən UNEC-in hələ də xarici maliyyə resursları cəlb etmək potensialının çatışmamasına baxmayaraq, qiymətləndirmə qrupu yerli standartlar baxımından UNEC-in fəaliyyətinin yaxşı olduğu xülasəsinə gəldi. UNEC tərəfindən əldə olunan bəzi maliyyələşmə və xarici layihələrdən əlavə, rəhbərlik və işçi heyətin tədqiqata əsaslanan yanaşma və düşüncə tərzinə malikdir və onun vacibliyini anlayır. İşçi heyəti müəssisəyə maliyyələşdirilən tədqiqatın gətirilməsinin dəyərini anlayır. Bu praktika hal-hazırda geridə qalır. Əmək bazarında və cəmiyyətin ehtiyaclarında olan dəyişikliklərin monitorinq edilməsinin lazım olduğunu anlayırlar. UNEC bu ehtiyacların monitorinq edilməsi üçün konkret sistemə malik olmamasın və məlumatın əsasən xüsusi tədbilərdən (karyera yarmarkalarından və praktikalardan rəy, işçi heyət və iş həyatının nümayəndələri arasında söhbətlər, ictimaiyyətə açıq olan statistika) toplanmasına baxmayaraq, rəhbərlik və işçi heyət bu dəyəri anlayır.

Qiymətləndirmə qrupu müvafiq maraqlı tərəflərin prosesə cəlb edilməsi ilə bağlı UNEC-in göstərdiyi səyləri müşahidə etdi, lakin bununla belə universitet sistemin rəsmiləşdirilməsinə daha çox diqqət göstərə bilər. Maraqlı tərəflər vaxtaşırı və müəyyən tədbirlərə cəlb olunur, lakin bütün universitetdə tətbiq olunan ortaq sistem yoxdur. Bundan əlavə, universitetin müvafiq işçi heyəti xarici maraqlı tərəflərin cəlb olunması ehtiyacı üzərində işləməlidir: maraqlı tərəflərin harada, nə zaman və hansı qisimdə cəlb olunması UNEC-ə daha faydalı olar. Universitetin müxtəlif səpkili bir çox tərəfdaşı var (məsələn, tələbələrin praktikaya yerləşdirilməsi, layihə və assosiasiyalarda tərəfdaş ölkələr, tətbiqi təhsil sifarişçiləri və akademik heyətin şəxsi əlaqələri), lakin universitet onların strateji inkişaf proseslərinə eləcə də UNEC-in gündəlik fəaliyyətinə cəlb etmək üçün formalaşmış və daha asan platform təmin etməlidir.


Güclü tərəflər, öncül praktikalar


  • Universitet rəhbərliyi UNEC-in strateji seçimləri baxımından nəyə və nə üçün nail olmaq istədikləri barədə aydın hədəfə və realistik yanaşmaya malikdir. Universitetin rəhbərliyi arasında dərin strateji düşüncə mövcuddur.

  • Universitet inkişaf strategiyasının hazırlanmasını dəstəkləmək üçün kifayət qədər maliyyəyə və infrastruktura malikdir.

  • İnkişaf strategiyasının yoxluğunda əvəz kimi istifadə oluna biləcək iki strateji sənədə mövcuddur: 1) UNEC-də tədris və təlimin keyfiyyətinin yüksəldilməsi planı və 2) UNEC-in beynəlmiləlləşdirilməsi planı.

  • Tədqiqat yanaşmasının və düşüncə tərzinin önəmini bir çox rəhbərlər yaxşı anlayır.


Tövsiyələr


  • Universitet məzmunda akademik olan və strateji seçimlər üçün ümumi çərçivəni müəyyənləşdirən missiya və gələcəyə baxış bəyannamələri və ümumi məqsədləri üzərində iş aparmalıdır.

  • Bütün işçi heyətin tanış və məlumatlı olması üçün rəsmi inkişaf strategiyası hazırlanmalı və yekunlaşdırılmalıdır.

  • Rəhbərlik və işçi heyət əmək bazarında olan dəyişiklikləri, cəmiyyətin ehtiyaclarını və maraqlı tərəflərin daha geniş şəkildə cəlb olunmasını izləmək lazım olduğunu bilsələr də, bu məsələlərin həll olunması əlavə tədbirlər tələb edir. Bundan əlavə, Universitet hansı maraqlı tərəfləri cəlb etməli olduğu və hansı növ iştirakın UNEC üçün faydalı olacağını nəzərdən keçirməlidir.




Yüklə 259,73 Kb.

Dostları ilə paylaş:
1   2   3   4   5   6




Verilənlər bazası müəlliflik hüququ ilə müdafiə olunur ©genderi.org 2024
rəhbərliyinə müraciət

    Ana səhifə