İxtisas: 5301. 01 Daxili fiskal siyasət və dövlət maliyyəsi İqtisad elmləri üzrə fəlsəfə doktoru elmi dərəcəsi almaq üçün təqdim edilmiş dissertasiya



Yüklə 1,05 Mb.
səhifə5/13
tarix26.09.2017
ölçüsü1,05 Mb.
#1695
1   2   3   4   5   6   7   8   9   ...   13

Yeddinci prinsip. Monetar orqanın cəmiyyətlə kommunikasiyalarının xarakteri, forma və tezliyi: milli maliyyə bazarında maliyyə stabilliyinin vəziyyətinin cari qiymətləndirilməsinə uyğun gəlməli; tətbiq olunan pul siyasəti tədbirlərini izah etməli; cəmiyyətin gözləmələrini idarə etmək imkanını verməlidir.

Biz hesab ediri ki, yuxarıda göstərilən prinsiplərə əməl edilməsi Mərkəzi Banka pul siyasətini işləyib həyata keçirməyə, milli iqtisadiyyatda maliyyə təhlükəzliyini dəstəkləməyə qadir olan idarəetmə strukturunu formalaşdırmaq imkanı verəcəkdir.

Bununla əlaqədar AMB Bankı pul siyasətinin əsas istiqamətlərinin hazırladığı prosesində aşağıdakiları həyata keçirməlidir:


  • Maliyyə sektorunun qısa intervallarla (hər ay və ya hətta hər həftə) əldə olunan məlumatlardan istifadə etməklə müxtəlif indikatorlar dairəsinə əsaslanan monitorinq sistemininn yaradılması istiqamətində işləri davam etdirməli;

  • Mümkün qədər analizlərə risklərə, zəif yerlərə və bankların iqtisadiyyatının digər seqmentləri ilə, xüsusən də dövlət sektoru, sığorta sektoru, aktivlərin idarə edilməsi üzrə şirkətlərlə, səhmlər bazarı, istiqrazlar bazarı, banklararası pul bazarları və valyuta bazarları ilə əlaqələrinə toxunan əlavə indikatorları daxil etməli;

  • Bank tipli müxtəlif müəssisələrin (dövlət bankları, xüsusi kommerisya bankları, kredit kooperativləri və digər maliyyə idarələri) davranışına xüsusi diqqət yetirməli;

Iqtisadiyyatın daha aktual seqmentləri üçün maliyyə stabilliyi indikatorları dəstinini işlənməsi istiqamətində işləri davam etdirməli. Bununla əlaqədar iqtisadiyyatın müxtəlif sektorları arasında bütün maliyyə əlaqələrini əhatə edən sektorlar balansı sistemini işləyib hazırlamaq tövsiyə olunur. Bu, xüsusən də maliyyə sektorunda mövcud olan gizli risklərin və zəif yerlərin aşkar edilməsi və aradan qaldırılması üçün faydalı ola bilir.


FƏSİL II. MALIYYƏ TƏHLÜKƏZLIYININ TƏMINATINDA PUL SIYASƏTIN ROLU: TƏHLIL VƏ QIYMƏTLƏNDIRMƏ
2.1.Pul siyasəti dizaynında yeni dəyişikliklər və meyllər
Pul siyasəti dövlətin milli valyutaların sabitliyinin möhkəmləndirilməsinə, inflyasiya ilə mübarizəyə, həmçinin iqtisadi artımın tənzimlənməsi, xalq təsərrüfatı proporsiyalarının yaxşılaşdırılması, istehsalın effektivliyinin artırılması, məşğulluğun təmin olunması və hər bir ölkənin iqtisadiyyatı qarşısında duran digər strateji məsələlərin həll edilməsi məqsədilə pul dövriyyəsi vasitəsilə təkrar istehsal prosesinə təsir göstərilməsinə yönəldilən, mərkəzləşdirilmiş şəkildə işlənib hazırlanmış tədbirlər toplusudur.

Qeyd etmək lazımdır ki, qlobal maliyyə böhranı (2007-2008) Mərkəzi Banklar üçün maliyyə stabilliyi üzrə lazımı tədbirlərin həyata keçirməsi üçün münbit şərait yaratmışdır. Birinci ona görə ki, böhranlar zamanı bütün ölkələrdə demək olar ki, Mərkəzi Banklar ilk tədbir görən orqan olmuşdur.

İkincisi, Mərkəzi Bankların maliyyə sabitliyi ilə əlaqədar real məqsədləri olmasıdır. Pul siyasətinin əsas məqsədi maliyyə sabitliyinin qorunması olduğuna görə monetar və maliyyə stabilliyi siyasətləri uzlaşdırılmalıdır.

Üçüncüsü isə Mərkəzi Bankın bu məqsədləri həyata keçirməsi üçün kifayət qədər səlahiyyəti və iqtisadi alətləri olmalıdır.

Yuxarıda qeyd edilən prinsiplər əsasında Mərkəzi Banklar və eyni zamanda hakimiyyət orqanlarının fəaliyyətləri əlaqələndirilməlidir.

Cədvəl 7

Həyata keçirilən siyasətlər və maliyyə sabitliyi


Siyasətin əhatə dairəsi

Əsas məqsədlər



Maliyyə sabitliyi çərçivəsində məqsədi

Prudensial tənzimləmə

Fərdi maliyyə institutlarının fəaliyyətinə limitlər

Sistem risklərinin müəyyənləşdirilməsi.



Monetar

Qiymət stabilliyi



Kredit və aktiv qiymətlərində bum dönəmlərində aşırı dəyişikləri cilovlamaq.


Valyuta kursunun tənzimlənməsi

Valyuta kursunun stabilliyi



Kapital axınındakı dəyişkənliyi(volatility) azaltmaq.



Fiskal siyasət

Tələbin tsikliliyinin idarə edilməsi



Maliyyə sistemindəki stresslərə cavab verə bilən fiskal qoruyucu rolu oynamaq.


Mənbə: Towards a Global Financial Stability framework. By Hervé Hannoun Deputy General Manager, Bank for International Settlements. February 2010, http://www.bis.org/speeches/sp100303.pdf; Əzizov Y.S. Monetar tənzimləmə. Monoqrafiya. Bakı, 2014, 375s
Cədvəldən də aydın şəkildə göründüyü kimi hər bir siyasətin (prudensial, monetar və ya fiskal siyasətin) əsas məqsədi vardır. Bu siyasətlər çərçivəsində istifadə edilən alətlər əsas məqsədin həyata keçirilməsi üçün nəzərdə tutulmuşdur. Bir çox iqtisadçılar da qeyd edirlər ki, bir alətlə iki məqsədə nail olmaq qeyri mümkündür. Lakin bu o demək deyildir ki, hər bir alət ekskluziv olaraq bir məqsəd üçün müəyyənləşdirilməlidir. Bu prespektivdən çıxış edərək qeyd edə bilərik ki, monetar və fiskal siyasəti ikinci dərəcəli məqsədlər üçün birləşdirmək mümkündür. Ayrı ayrılıqda götürdükdə yuxarıda qeyd etdiyimiz siyasətlər maliyyə stabilliyini təmin etmək imkanında deyillər. Bunun üçün məslən prudensial və monetar siyasətin fəaliyyət istiqamətlərini uzlaşdırmaq əsas məqsədlərdən olmalıdır.

«Azərbaycanda Mərkəzi Bankı haqqında» Qanuna uyğun olaraq (maddə 28) Mərkəzi Bank qarşıdakı il üçün dövlətin pul siyasətinin əsas istiqamətlərini oktyabr ayının 1-dən gec olmayaraq Azərbaycan Respublikası Prezidentinə təqdim edir və dekabr ayının 31-dək kütləvi informasiya vasitələrində ictimaiyyətə açıqlayır. Pul siyasətinin əsas istiqamətlərini açıqlayarkən Mərkəzi Bank cari ildə həyata keçirilən pul siyasətinin yekunlarını, habelə qarşıdakı il üçün müəyyən etdiyi pul siyasətinin məqsəd və vəzifələrini, Mərkəzi Bankdan asılı olan və asılı olmayan amilləri də əks etdirməklə onların həyata keçirilməsi yollarını göstərir.

Azərbaycan Mərkəzi Bankının Pul siyasətinin əsas istiqamətlərində - “səlahiyyətləri çərçivəsində qiymət sabitliyinin təmin edilməsi Mərkəzi Bankın pul siyasətinin əsas məqsədini təşkil edir” ifadələri yer alır.

Lakin, son vaxtlar dünyada pul siyasəti dizaynında yeni dəyişikliklər qeydə alınır. Son qlobal böhran göstərdi ki, Mərkəzi Banklar dayanıqlı iqtisadi inkişafı yalnız qiymət sabitliyi ilə dəstəkləməklə kifayətlənməməlidirlər. Hazırda dünyada Mərkəzi Bankların hədəf parametrinin (qiymət sabitliyi ilə yanaşı, iqtisadi artım və maliyyə sabitliyi) və alət arsenalının genişləndirilməsi məsələsi aktuallaşmışdır.

Böhran zamanı Mərkəzi Bankların qeyri-ənənəvi siyasət tədbirləri (maliyyə sektoruna və real iqtisadiyyata geniş miqyaslı likvidlik dəstəyi, dövlət qiymətli kağızların alınması və s.) ABŞ və digər ölkələrdə iqtisadi aktivliyin artmasını dəstəkləməklə yanaşı bir sıra gözlənilməz fəsadlarla da nəticələnmişdir. Belə ki, qeyd olunan tədbirlər bəzi inkişaf etməkdə olan ölkələrə arzuolunmaz kapital axınına və əmtəə bazarlarında qiymətlərin artmasına təkan vermişdir. Aktivlərin qiymətində hərarətlənmə yaratmaqla yanaşı Mərkəzi Bankların bu siyasəti maliyyə bazarları və Mərkəzi Bankların özləri üçün təhlükələr yaradır. Dəstək məqsədilə iqtisadiyyata iri həcmli likvidliyin verilməsi kredit risklərinin artması ilə bağlıdır ki, bu da Mərkəzi Bankların zərərlərinin artmasına səbəb ola bilər. Mərkəzi Bankın dəstəyinə əminlik bazar iştirakçılarını (maliyyə təsisatlarını) daha riskli qərarları qəbul etməyə sövq edə, əməliyyatların riskliliyini artıra bilər. Digər tərəfdən, Mərkəzi Bankın pul bazarına iri həcmdə likvidlik təklif etməsi böhran zamanı etimadın aşağı olması şəraitində bazar iştirakçılarının bir-biri ilə əqdlərin bağlanması meylini azalda bilər. Bu da banklararası pul bazarlarının daralmasına, bazar infrastrukturunun zəifləməsinə səbəb ola bilər[141,11/145].

Azərbaycan şəraitində iqtisadiyyatın plan-bölgü modelindən bazar modelinə keçid dövründə düzgün konsepsiyanın seçilməsi olduqca çətin idi. Bir tərəfdən, pul kütləsinin azaldılmasını tələb edən inflyasiya amilləri mövcud idi, bu da, öz növbəsində kredit restriksiyasının istifadəsini nəzərdə tuturdu, lakin, digər tərəfdən, ölkədə iqtisadi tənəzzül müşahidə olunur və onun aradan qaldırılması üçün sərmayə lazım idi, bunun üçün isə kredit ekspansiyası siyasəti aparılmalı idi.

Bütün bunlar dövlət pul və maliyyə sabitliyi siyasətinin həyata keçirilməsi zamanı müəyyən ziddiyyətlərdə əks olunurdu, yəni, eyni zamanda həm kredit ekspansiyası alətləri, həm də kredit restriksiyası alətləri istifadə olunur və çox vaxt sıfır nəticəyə gətirib çıxarırdı.

1992-1993-ci illər ərzində ölkə, büdcə problemlərini, investisiyaların fəallaşdırılması, kənd təsərrüfatında irəliləyiş problemlərini məhdudiyyətsiz pul təklifi hesabına həll etməyə çalışır və hiperinflyasiya həddində idi. 1992-ci ildə inflyasiya səviyyəsi 1012,3 faizə çatmışdı. Yəni, ölkədə qiymət indeksinə və bazara nəzarət tamamilə itmişdi və maliyyə sistemi demək olar ki, sıradan çıxmışdı. Azərbaycan 1993-cü ildə hiperinflyasiya mərhələsinə qədəm qoymuş və bu dövrdə inflyasiya ən yüksək həddə, 1763,5 faizə çatmışdı. Büdcə kəsirinin ümumi daxili məhsula nisbəti 1991-ci ildəki 0,2 faizdən 1993-cü ildə 15 faizə qədər artmışdı.

Büdcə kəsiri bütövlükdə Milli Bank (indiki Mərkəzi Bank) tərəfindən maliyyələşdirilirdi. 1992-1994-cü illərdə xarici ticarət dövriyyəsinin həcmi 42 faiz azalmış, 1994-cü ilədək ölkə iqtisadiyyatına bir manat da olsun belə xarici sərmayə qoyulmamışdı. Həmin dövrdə Milli Bankın təyin etdiyi uçot dərəcəsi 250 faiz təşkil edirdi. Qeyd etdiyimiz kimi, sosial böhrana yol açan situasiya əhalinin ağır maddi vəziyyətinin yaranmasına səbəb olmuşdu və sosial güzəran daha da ağırlaşırdı. 1991-1994-cü illərdə əhalinin pul gəlirləri real ifadə ilə 3,5 dəfə, adambaşına düşən pul gəlirləri orta hesabla 3,7 dəfə aşağı düşmüşdü. 1991-ci ildən başlayaraq 4 il ərzində əhalinin əmək haqqı isə 5,7 dəfə azalmışdı. Bütün bunlar həmin dövrdəki Azərbaycan iqtisadiyyatının mənzərəsini əks etdirən makroiqtisadi göstəricilər idi. Yəni, ölkə iqtisadiyyatı idarəolunmaz vəziyyətə düşmüşdü.

İnflyasiyanın dağıdıcılığını, investisiya qoyuluşunun və istehsalı inkişafının mümkünsüzlüyünü anladıqdan sonra, Azərbaycan Mərkəzi Bankı pul kütləsinə ciddi nəzarəti nəzərdə tutan sərt monetarist siyasətə keçdi.

İqtisadi siyasətdə əsas prioritet milli valyutanın stabilliyinin təmin edilməsi olmuşdur ki, bu da istehsal potensialı ilə uyğunlaşmır, pul təklifinin ixtisar edilməsi, əmək haqqı, təqaüdlər və digər sosial ödənişlər üzrə gecikmələr, habelə dövlət borcunun hədsiz artması hesabına əldə olunurdu.

Yetkin bazar iqtisadiyyatında, həmçinin güclü istehsala malik olmayan ölkələrdə müsbət nəticələr verən liberal-monetarist modeli Azərbaycan üçün (1992-1995) məhsuldar olmamışdır. Bütün qeyd edilən tədbirlər milli iqtisadiyyatın resesiyasına, istehsal artmasına gətirib çıxarmamış və son nəticədə iqtisadi resesiya yol açmışdır.

Pul və maliyyə sabitliyi siyasətinin tətbiqi sisteminin prinsiplərinin əksəriyyəti iqtisadiyyatın bazar modelinə malik istənilən ölkəyə xasdır, lakin bəziləri fərdi ola və hər bir ölkənin milli xüsusiyyətlərini əks edə bilər.

Bu prinsipləri Azərbaycanda pul və maliyyə sabitliyi siyasətinin tətbiqi sisteminin timsalında nəzərdən keçirək.



  1. Pul-kredit tənzimləməsi sisteminin mərkəzləşdirilmiş şəkildə idarə edilməsi prinsipi o deməkdir ki, bütün pul-kredit tənzimləməsi sisteminin fəaliyyəti (belə ki, o, vahid məqsədə – dövlətin pul və maliyyə sabitliyi siyasətinin reallaşdırılması məqsədinə tabedir) vahid mərkəzdən – Azərbaycanın Mərkəzi Bankından idarə olunur.

  2. Pul və maliyyə sabitliyi siyasətinin vahidliyi prinsipi ondan ibarətdir ki, pul-kredit tənzimləməsi sisteminin bütün subyektləri, mərkəzdən və ya yerlərdə yerləşməsindən asılı olmayaraq, vahid pul və maliyyə sabitliyi siyasətini rəhbər tutur. Onların fəaliyyəti ölkə ərazisində icrası məcburi olan vahid normativ sənədlərlə tənzimlənir.

  3. Mərkəzi icra hakimiyyəti orqanlarına bankın tabe olmaması və onun qanunverici hakimiyyət orqanlarına – parlamentə hesabatlılığı prinsipi. Bu prinsipin tətbiqi onunla bağlıdır ki, hakimiyyət orqanları, Mərkəzi Bank kimi dövlət aparatının bir hissəsi olsa da, Mərkəzi Bankın başlıca prioritet məqsədi – milli valyutanın sabitliyinin saxlanılması – hakimiyyətin və onun orqanlarının cari siyasi məqsədləri ilə üst-üstə düşməyə bilər. Buradan Mərkəzi Bankın hakimiyyət orqanlarına tabe olarsa, özünün başlıca strateji məqsədinin zərər vuraraq, ani, konyunktur məqsədlərin həllinə cəlb edilə bilər.

Bununla yanaşı, cəmiyyət pul və maliyyə sabitliyi siyasətinin nə dərəcədə effektiv təsir göstərməsi barədə məlumatlandırılmalıdır. Demokratik ölkələrdə pul və maliyyə sabitliyi siyasətinin tətbiqi sisteminin qiymətləndirilməsi üçün Mərkəzi Bankların parlamentlərə hesabatlılığı istifadə olunur.

Mərkəzi Bankın İdarə Heyətinin sədri tərəfindən ildə iki dəfə Mərkəzi Bankın əsas məqsəd və funksiyalarının həyata keçirilməsi barədə hesabatın, habelə audit rəyi ilə təsdiq edilmiş ilin yekunları üzrə maliyyə hesabatının və hesabat əməliyyat büdcəsi barədə hesabatın Azərbaycan Respublikası Prezidentinə təqdim edir. Büdcə layihəsinin müzakirəsi zamanı Mərkəzi Bankın İdarə Heyətinin sədri qarşıdakı il üçün pul siyasətinin əsas istiqamətləri barədə Azərbaycan Respublikası Milli Məclisinə məlumat verir.

Azərbaycan Mərkəzi Bank qarşıdakı il üçün dövlətin pul si­ya­sə­tinin əsas istiqamətlərini oktyabr ayının 1-dən gec olmayaraq, Azərbaycan Respublikası Prezidentinə təqdim edir və dekabr ayı­nın 31-dək kütləvi informasiya vasitələrində ictimaiyyətə açıq­la­yır. Pul si­yasətinin əsas istiqamətlərini açıqlayarkən, Mərkəzi Bank cari ildə hə­yata keçirilən pul siyasətinin yekunlarını, ha­be­lə qarşıdakı il üçün müəy­yən etdiyi pul siyasətinin məqsəd və və­zifələrini, Mərkəzi Bank­dan asılı olan və asılı olmayan amil­lə­ri də əks etdirməklə on­la­rın həyata keçirilməsi yollarını gös­tə­rir.

Pul siyasəti mexanizmi sistemin elementi kimi pul və maliyyə sabitliyi siyasəti alətlərinin istifadəsi şərtləri və qaydası, Mərkəzi Bankların bu istifadə üzrə fəaliyyətinin təşkilidir. Bu mexanizm hər bir ölkə üçün fərdidir və Mərkəzi Bankların normativ sənədləri ilə nizamlanır, o cümlədən Azərbaycanda Mərkəzi Bankının qəbul etdiyi normativ xarakterli aktlardan istifadə olunur.

Pul siyasəti – Mərkəzi Bankın ölkədə pul kütləsinin miqdarının, kredit axınlarının və faiz dərəcələrinin ümumi səviyyəsinin tənzimlənməsinə yönələn hərəkətləridir.

Praktikada ölkələrin Mərkəzi Bankları pul və maliyyə sabitliyi siyasətinin aparılmasına müxtəlif yanaşmalardan istifadə edir, lakin onlardan çoxunun ümumi son məqsədi var – inflyasiyanı cilovlamaq. İqtisadi artım, işsizlik problemləri də Mərkəzi Banklar üçün maraqlıdır. Hansı məsələlər prioritetdir sualına cavab vaxt keçdikcə dəyişir, lakin uzunmüddətli planda mərkəzin bankların verə biləcəyi ən yaxşı töhfə qiymətlərin sabitliyinin təmin olunmasıdır.

Makroiqtisadiyyat baxımından qiymətlərin sabitliyi inflyasiya səviyyəsinin ildə 2-3 % artması deməkdir.

Pulun sabit dəyərinə və yüksək məşğulluq səviyyəsinə eyni anda nail olmaq üçün iqtisadi prosesin bütün iştirakçılarının razılaşdırılmış sabitləşmə və inkişaf mövqeyinə malik olmalı və öz tələblərini ictimai təsərrüfatın mövcud potensialına uyğunlaşdırmalıdırlar. Mərkəzi Bank hökumət və parlamentlə qarşılıqlı əlaqədə milli pul vahidinin sabitliyinin keşikçisi rolunu yerinə yetirir, lakin, buna baxmayaraq, onun məqsədləri bütövlükdə iqtisadi siyasətə zidd olmamalıdır.

Milli valyutanın sabitliyi yalnız iqtisadiyyatın pulla təmin olunması mümkün qədər məhdudlaşdırıldıqda əldə olunur, buna görə də Mərkəzi Banklar pul təklifinin idarə edilməsi üsullarını işləyib hazırlayır və bu üsulların köməyi ilə pul kütləsinin artımını düzgün dozalaşdırmaq və onu effektiv surətdə məhdudlaşdırmaq olar.

Pul kütləsinin həddindən artıq artması özü-özlüyündə mütləq inflyasiyanın səbəbi olmur. Əsas enerji daşıyıcılarının dünya qiymətlərinin dəyişməsi, dünya böhranları, əmələ gələn disproporsiyalar nəticəsində xarici iqtisadi münasibətlərdə milli valyutanın məzənnəsinin dəyişməsi– bütün bunlar daxili qiymətlərin dəyişməsinə təkan verə bilər. Lakin, buna baxmayaraq, pul və maliyyə sabitliyi siyasəti qiymətlərin artmasının həddini müəyyən edən pul kütləsinin artım parametrlərinin müəyyən edilməsi əsasında qurulur. Beləliklə, pul emissiyasını nəzarət altında saxlamaqla, Mərkəzi Bank inflyasiya sahəsində qarşıya qoyduğu məqsədə nail ola bilər.

Pul kütləsinin artımının orta tempinin və inflyasiyanın səviyyəsinin qarşılıqlı əlaqəsi Amerika iqtisadçıları tərəfindən 1974-1984-cü illərdə tədqiq olunub. Tədqiqatın nəticələri aşağıdakıları göstərib:


  • pul kütləsinin artım templəri nə qədər yüksəkdirsə, inflyasiyanın indeksi də o qədər yüksəkdir;

  • pul kütləsinin artım sürətləri çox yüksəkdirsə – təxminən 30% və daha yüksək səviyyədə – inflyasiyanın templəri, bir qayda olaraq, pul kütləsinin artım sürəti ilə eyni olur[124].

Ölkədə inflyasiya səviyyəsi aşağı olan zaman valyuta məzənnəsi sabitdir, faiz dərəcələri isə kreditorlar və borcalanlar üçün əlverişlidir, pul siyasətinin tətbiqi problemləri ictimai diqqəti cəlb etmir. Pul siyasətinin iqtisadi vahidlərin üçün əhəmiyyəti pul-kredit və valyuta sistemində baş verən dəyişikliklər olduqda ciddi müzakirə mövzusuna cevrilir6.

Pul-kredit və valyuta sistemində baş verən dəyişikliklərinə əsasən aiddir: inflasiyanın yüksək templəri, yüksək faiz dərəcələri, milli valyutanın kəskin devalvasiyası və revalvasiyası, bank sisteminin və fond bazarının iflasa uğraması kimi hadisələr və s.

Maliyyə-valyuta böhranları adətən siyasi sarsıntılara, hətta, əhalinin qiyamına səbəb olur (məsələn, 1988-ci ildə Argentinada maliyyə-valyuta böhranı).

Azərbaycanda pul kütləsi ilə qiymətlərin səviyyəsi arasında asılılıq artıq islahatların ilkin mərhələsində aşkar idi. Qiymətlərin dəyişməsi, inflyasiyanın öncədən görülə bilməməsi iqtisadi həyatın ən müxtəlif tərəflərinə mənfi təsir göstərməsi ilə təhlükəlidir.

İnflyasiya şəraitində pul özünün adi funksiyalarını yerinə yetirmir. Pul, malın real dəyərinin ölçülməsinin pis alətidir, iqtisadi vəziyyətin obyektiv təhlilini aparmağa imkan vermir. İstehsal həcmlərinin, mənfəətin, xərclərin səviyyəsinin, rentabelliyin və digər göstəricilərin müqayisəsi istehsalın effektivliyinin dəyişməsinin tam mənzərəsini vermir, belə ki, dəyişikliklər qismən qiymət artımı ilə bağlıdır. Bazar siqnalları təhrif olunur, hansı məhsulların istehsalının daha effektiv olduğunu və hansı fəaliyyət sahəsinə kapital qoymaq lazım olduğunu qiymətləndirmək çətindir. Adi və xüsusilə də yeni fəaliyyətin məhdudlaşdırılmasına gətirib çıxaran qeyri-müəyyənlik yaranır. Yeni investisiyalardan mənfəətin və ya zərərin əldə ediləcəyini öncədən ehtimal etmək mümkün deyil.

Pul təhrif olunmuş şəkildə həm tədavül, həm də ödəniş vasitəsi funksiyasını yerinə yetirir. Sabit situasiyada alıcılar malları yalnız yüksək keyfiyyətli, yeni, qiymətlərinin münasib olması şərtilə əldə edir. İstehsalçı tələbatı diqqətlə öyrənməyə məcburdur və beləliklə də səmərəli istehsal strukturu formalaşır. Qiymətlər artdığı zaman istehlakçı, alış-verişini gecikdirmək qorxusu ilə istənilən malı əldə etməyə çalışır. İri alış-verişlərdə bahalı və münasib olmayan mübadiləyə qayıdır.

İnflyasiya dövrlərində pul yığım vəsaiti kimi də öz cəlbediciliyini itirir, belə ki, zaman keçdikcə, onunla daha az sayda mal almaq olur. Əhalinin əmanətləri kəskin surətdə azalır, yeni istehsalların inkişafına investisiya qoyuluşu imkanları məhdudlaşır. Gəlirin kreditordan borcalana ədalətsiz yenidən bölgüsü üçün şərait yaradılır. Dəyər qiyməti ilə ifadə olunmuş bütün müqavilələr vəsaiti alanı gələcəkdə itkilərə məruz qoyur. Kredit və maliyyə bazarlarının fəaliyyəti pozulur. Uzunmüddətli vəsait qoyuluşunu həyata keçirən maliyyə-kredit müəssisələri (investisiya fondları, sığorta şirkətləri, qeyri-dövlət pensiya fondları və s.) çox böyük itkilərə məruz qalır və bu, onların müflisləşməsinə gətirib çıxara bilər.

Əgər mal və xidmətlərə qiyməti əvvəlcədən müəyyən etmək mümkün deyilsə, iqtisadi agentlər müqavilə bağlanmasından yayınmağa çalışır, sahibkarlar istehsalın həcmini və fəaliyyətin nəticələrini planlaşdıra bilmir, buna görə də onlar öz aktivliyini minimuma qədər məhdudlaşdırır. Öncədən müəyyən edilməmə işgüzar münasibətlərdə nizamsızlığa və sosial gərginliyə səbəb olur.

Bu zaman qiymətlərin əvvəlcədən proqnozlaşdırılan və zəif artımı müqavilələrin bağlanması zamanı müqavilə məbləğlərinin inflyasiya səviyyəsinə indeksasiyası yolu ilə itkiləri bir qədər azaltmağa imkan verir, lakin hətta gözlənilən qiymət artımı iqtisadi fəaliyyətə mane olur. Buradan inflyasiyanın dağıdıcı nəticələrə gətirib çıxardığı məlum olur.

İnflyasiyanın ildə 40%-dən yuxarı qalxmasına yol vermək arzuedilməzdir. Bu həddən sonra:



  • iqtisadiyyata sərmayə qoyulmur;

  • pul axınlarının bölgüsünün bazar mexanizmlərinin mövcudluğu mümkünsüz olur;

  • yığımların təkrar bölgüsünü aparan strukturların müflisləşməsi baş verir.

Mərkəzi Bankın məqsədi– inflyasiyanın makroiqtisadi qeyri-stabilliyin əsas amilinə çevrilməsinə yol verməməkdir. İqtisadiyyatda qiymətlərin qeyri-sabitliyinə gətirib çıxaran, qarşısı çətin alınan disproporsiyalar artdıqda, bu məqsəd inflyasiya səviyyəsinin dəyişmələrinin qarşısının alınmasından və onun dinamikasının əvvəlcədən müəyyən edilməsinin təmin olunmasından ibarət olur. Belə məlumat iqtisadi agentlərə onların hərəkətlərinə müvafiq düzəliş edilməsi üçün lazımdır.

Pul və maliyyə sabitliyi siyasətinin əsas parametrlərinin ümumi iqtisadi şəraitlə sıx əlaqədə müəyyən edilməsi vacibdir. Müəyyən dövr üçün pul və maliyyə sabitliyi siyasətinin son məqsədi müəyyən edildikdən və hökumətlə razılaşdırıldıqdan sonra Mərkəzi Bank qarşısında qarşıda qoyulan məsələni inflyasiyanın səviyyəsinə görə necə reallaşdıracağı sualı durur. Buna Mərkəzi Bankın iqtisadiyyatda pulun miqdarına, faiz dərəcələrinin səviyyəsinə və xarici valyutaya nisbətdə milli valyutanın məzənnəsinin dinamikasına tənzimləyici təsiri ilə nail olunur. Lakin iqtisadi prosesləri monitorinqi aparılmadan son məqsədə nail olmaq mümkün deyil, buna görə də Mərkəzi Banka əsas iqtisadi göstəricilərin tendensiyalarının xarakteri haqqında siqnal verən etibarlı indikatorlar lazımdır.

Azərbaycan Mərkəzi Bankı belə indikator kimi aşağıdakılardan istifadə edə bilər:


  • ümumdaxili məhsulun (ÜDM) dinamikasının göstəriciləri;

  • ən vacib məhsul növlərinin istehsal həcmləri;

  • sahələr üzrə investisiyaların həcmləri;

  • ən vacib ehtiyatların qiymətlərinin səviyyəsi;

  • ödəniş balansının xarici iqtisadi fəaliyyəti xarakterizə edən əsas mövqeləri (ticarət balansının vəziyyəti, qızıl-valyuta ehtiyatlarının səviyyəsi və s.);

  • valyuta məzənnəsinin, faiz dərəcələrinin dinamikasının göstəriciləri;

  • pul aqreqatları, ÜDM-nin monetarlaşdırılması əmsalı, pulun tədavül sürətinin və pul multiplikatorunun dinamikası;

  • bank sisteminin vəziyyətinin göstəriciləri (xalis beynəlxalq ehtiyatların və xalis daxili aktivlərin həcmləri, kredit təşkilatlarının MB müxbir hesablarında vəsaitlərinin qalıqlarının dinamikası);

  • dövlət büdcəsinin vəziyyətinin göstəriciləri (gəlirlər, xərclər, kəsir, profisit, borclar, dövlət borcuna xidmət göstərilməsi xərcləri);

  • əmanətlərin dinamikasının göstəriciləri;

  • ailə təsərrüfatlarının malik olduğu gəlirlərin məbləği haqqında məlumatlar;

  • ailə təsərrüfatlarının xərclərinin planlaşdırılması üzrə onlar arasında sorğuların məlumatları;

  • ölkədə işsizlik səviyyəsi;

  • digər iqtisadi dəyişənlər.

Mərkəzi Bank tərəfindən pul təklifi üzrə qərarların qəbul edilməsinin düzgünlüyü iqtisadi məlumatın dolğunluğundan və dəqiqliyindən asılıdır, bu da, öz növbəsində, pul və maliyyə sabitliyi siyasətinin son məqsədinə nail olmaq üçün verilmiş inflyasiya səviyyəsini saxlamağa imkan verir.

Maliyyə bazarlarının inkişaf səviyyəsini nəzərə alaraq MB 2007-ci ildən etibarən pul siyasətinin beynəlxalq ətandartlara uy­ğun­laş­dı­rıl­ma­sı çərçivəsində «faiz dərəcələri dəhlizi» yanaşma­sının tətbiq edir.

Yeridilən pul si­ya­sə­tinin reallaşması me­xanizmlərinin mütərəqqi for­ma­larından olan faiz dəhlizinin tət­bi­qi yeni əməliyyat struk­tu­ru­nu nəzərdə tut­maqla MB iq­ti­sa­diy­yat­da pulun də­yə­rinə təsir etmək im­kan­la­rı­nın geniş­lən­di­rəcək­dir.

Bank sisteminin maliyyə sabitliyini qorumaq üçün hələ böhranın təsirləri hiss olunmamışdan öncə bir sıra qabaqlayıcı immunizasiya tədbirləri - xüsusən, iqtisadi və kredit bumu dövründə kontrtsiklik prudensial tənzimləmə tədbirləri görüldü. Belə ki, bank aktivlərinin yüksək templərlə artdığı bum illərində Mərkəzi Bank aktiv dialoq şəraitində bankları ehtiyatlı kredit siyasətinə dəvət etdi, kapitallaşma və ehtiyatlanma səviyyəsinin artırılmasını təmin etdi, prudensial tənzimləmə normativlərini sərtləşdirmiş, xarici borclar üzrə məcburi ehtiyatlar tətbiq etdi. Mərkəzi Bankın böhrandan əvvəl həyata keçirdiyi “maliyyə immunizasiyası” tədbirləri sayəsində bank sistemi qlobal böhranı hazırlıqlı qarşıladı, ölkədə maliyyə sabitliyi qorundu:



  • bank aktivlərinin yüksək və risqli artım templəri Mərkəzi Bank tərəfindən məhdudlaşdırıldı;

  • xarici borcların həcminin tənzimlənməsi sistemi tətbiq edildi, oxşar region ölkələrindən fərqli olaraq Azərbaycanda xarici borclar bankların öhdəliklərinin cəmi 20%-i səviyyəsində məhdudlaşdırıldı;

  • kapitallaşma və maliyyə ehtiyatlanması səviyyəsi əhəmiyyətli surətdə artırıldı;

  • prudensial tənzimləmə normativləri və çərçivəsi sərtləşdirildi;

  • Nəticədə, Azərbaycan bank sistemi qlobal böhranı adekvat kapitallaşma səviyyəsi, yüksək maliyyə ehtiyatlanması və likvidlik göstəriciləri ilə qarşıladı;

  • bankların likvidlik mövqeyi idarəetməyə alınmış, xarici borcların yenidən maliyyələşməsi həyata keçirildi, sistem əhəmiyyətli institutlara zəruri likvidlik dəstəyi verildi;

  • bankların korporativ idarəetmə, xüsusilə risqlərin idarə olunması sistemlərinə tələblər artırıldı;

  • qorunan əmanətlərin məbləği altı dəfə artırılaraq 30 min manata çatdırıldı;

  • stress-testlər vasitəsilə bankların risq zonalarının davamlı monitorinqi sistemi yaradıldı, adekvat korrektiv tənzimləmə rejimi müəyyən edildi;

  • Mərkəzi Bankın qarantiyası ilə banklararası pul bazarı fəaliyyətə başlamış və bu bazar banklar arasında izafi likvidliyin hərəkətinin yüksək mobilliyini təmin etdi;

  • həyata keçirilmiş antiböhran proqramı nəticəsində bank sektorunun maliyyə dözümlülüyü daha da gücləndi;

  • bank sistemi cari öhdəliklərinin təqribən 80%-i səviyyəsində likvid aktivlərə malik oldu ki, bu da minimal normadan çox (30%) idi;

  • sektorun kapital adekvatlıgı göstəricisi qəbul edilmiş normadan iki dəfə çox (19%) oldu;

  • kredit portfelinin keyfiyyəti məqbul səviyyədə qorunub saxlanıldı, vaxtı keçmiş kreditlərin ümumi portfeldə xüsusi çəkisi 3,3% təşkil etdi;

  • bankların maliyyə nəticələri müsbət oldu, aktivlər üzrə gəlirlik 2,6%, kapitalın gəlirliyi isə 17,8% təşkil etdi.

Böhran dövründə isə əlavə tədbirlər də həyata keçirildi:

  • banklara və sığorta təşkilatlarına kapitalizasiya məqsədilə vergi güzəştləri tətbiq olundu;

  • sığortalanan əmanətlərin məbləği 5 dəfə artırıldı (30 min manatadək), nəticədə banklara etibar gücləndi;

  • bankların xarici borcları Mərkəzi Bank tərəfindən idarəetməyə götürüldü və banklara zəruri likvidlik dəstəyi verildi;

  • mümkün itkilər üzrə bankların maliyyə ehtiyatlanması daha da artırıldı.

Antiböhran tədbirləri çərçivəsində Mərkəzi Bank tərəfindən qəbul edilmiş mühüm pul siyasəti və makro-prudensial idarəetmə qərarlarını xronoloji baxımdan aşağıdakı kimi sıralamaq olar:

  • Mərkəzi Bankın yenidənmaliyyələşdirmə əməliyyatları aktivləşdirildi və 2009-cu ildə AMB-nin kredit portfeli 3,5 dəfə artdı. Azərbaycan Respublikasının Prezidentinin 9 iyul 2009-cu il tarixli Fərmanı ilə Mərkəzi Bankın pul siyasəti və bank sisteminin tənzimlənməsi sahəsindəki siyasətinin çevikliyini artıran Azərbaycan Respublikasının Milli Bankı haqqında” Azərbaycan Respublikasının Qanununa dəyişikliklər və əlavələr qüvvəyə mindi;

  • yeni qanunverici bazanı əsas götürərək AMB-də 28 iyul 2009-cu il tarixində “Azərbaycan Respublikasının Mərkəzi Bankı tərəfindən banklara kreditlərin verilməsi qaydaları” təsdiq olundu. Daxili maliyyə bazarlarının inkişafının dəstəklənməsi istiqamətində Mərkəzi Bankın iştirakı ilə Mütəşəkkil Banklararası Kredit Bazarında təminat sistemi yaradıldı;

  • həm manat, həm də xarici valyutada məcburi ehtiyat normalarının ortalama müddəti 1 ayadək uzadıldı;

  • aşağı həddi isə 1% müəyyən edildi (14.10. 2008);

  • uçot dərəcəsi ardıcıl olaraq əvvəlcə 15%-dən 12%-ə, 10%-ə, 8%-ə, 5%-ə, 3%-ə, 2%-ə; % dəhlizinin yuxarı həddi 20%-dən 17%-ə, 15%-ə, 13%-ə, 10%-ə, 8%-ə, 7%-ə endirildi (01.12.2008-01.02.2009);

  • milli və xarici valyutada öhdəliklər üzrə məcburi ehtiyat normaları 12%-dən 9%-ə, 6%-ə, 3%- ə, 0, 5%-ə bankların xarici öhdəlikləri üzrə məcburi ehtiyat norması 5%-dən 0%-ə endirildi. Bununla bank sisteminə təkcə 2 ildə 580 mln. manat likvidlik dəstəyi verildi;

  • Mərkəzi Bank tərəfindən valyuta svopu əməliyyatlarının aparılmasına başlanıldı (02. 03. 2009).

Mərkəzi Bankın pul siyasəti ölkədə makroiqtisadi dayanıqlığın qorunmasında aktiv rol oynadı. Pul təklifinin strukturunda müsbət keyfiyyət dəyişikilikləri davam etdi, iqtisadiyyatda dollarlaşma səviyyəsi daha da azaldı.

Azərbaycanda maliyyə sabitliyinin əsas məqsədlərinə nail olmaqdan və Bazel III standartlarına tam uyğunlaşmaqdan ötrü prudensial nəzarətin təkmilləşdirilməsi tədbirləri davam edir.

Mərkəzi Bank uçot dərəcəsini müəy­yən­ləşdirərkən, ölkədəki mövcud makroiqtisadi durumu və ma­liy­yə bazarının vəziyyətini nəzərə alır. Mərkəzi Bank öz əmə­liy­yat­la­rı üzrə faiz dərəcələrini pul bazarının likvidlik vəziyyətini nəzərə ala­raq özünün açıq bazar, yenidənmaliyyələşdirilmə və depozit əmə­liyyatları üzrə faiz dərəcələrini təsbit etməklə və ya hərraclarda tə­ləb və təklif əsasında müəyyənləşdirir. Mərkəzi Bank müəyyən et­diyi uçot dərəcəsini və öz əməliyyatları üzrə faiz dərəcələrini dərc etdirir.

Azərbaycan Respublikası Mərkəzi Bankının 2016-ci il üçün pul və maliyyə sabitliyi siyasətinin əsas istiqamətləri barədə bəyanatında vahid dövlət pul- siyasətinin məqsədi birmənalı olaraq aşağıdakı kimi müəyən edilmişdir: «Ölkə iqtisadiyyatının şaxələndirilməsi siyasətinə uyğun olaraq Mərkəzi Bank 2016-ci ildə makroiqtisadi və maliyyə sabitliyinin qorunmasına, bank sektorunun maliyyə dərinliyinin artırılmasına, maliyyə-bank infrastrukturunun inkişafına yönəlmiş fəaliyyətini davam etdirəcəkdir. Mərkəzi Bank pul siyasəti vasitəsilə növbəti ildə də inflyasiyanın aşağı təkrəqəmli səviyyədə saxlanılmasını hədəfləyir. Bunun üçün ilk növbədə manatın məzənnəsinin sabitliyinin qorunması mühüm vəzifələrdən biridir. Həmçinin, yeni qlobal və makroiqtisadi çağırışlara uyğun olaraq pul siyasəti çərçivəsinin təkmilləşdirilməsi davam etdiriləcəkdir».

2016-ci ildə məzənnə siyasətini həyata keçirərkən Mərkəzi Bank makroiqtisadi sabitliyin təmin edilməsi, maliyyə sabitliyinin və qeyri-neft iqtisadiyyatının rəqabət qabiliyyətinin qorunması kimi hədəfləri əsas götürəcəkdir.

Manatın sabit məzənnəsi aşağı təkrəqəmli inflyasiya hədəfinə nail olunmasında, sosial rifahın və investisiya aktivliyinin qorunmasında mühüm rol oynayır. Bunu nəzərə alaraq 2016-ci ildə manatın məzənnəsinin sabitliyi mühüm prioritetdir.

Düşünürük ki, Azərbaycan iqtisadiyyatının müasir durumuna uyğun olaraq Mərkəzi Bank sosial rifahın və investisiya aktivliyinin qorunmasında təminatı olaraq manatın məzənnəsinin sabitliyi əsaslı oduğunu bilir və fəaliyyətində mühüm prioritet olaraq qalacaqdır.

Azərbaycan Mərkəzi Bankının fəaliyyətində ikinci məqsəd bank və ödəniş sistemlərinin sabitliyini və inkişafını tə­min etməkdir. Bu məqsədlə Azərbaycan Mərkəzi Bankı bank sektorunun potensial risklərə qarşı dayanıqlığının yüksəldilməsinə, risklərin preventiv rejimdə məhdulaşdırılmasına yönəldilmiş fəaliyyətini daimi gücləndirməkdə davam edəcəkdir.

Banklarda “məsuliyyətli kreditləşmə” fəlsəfəsinin tətbiqi inkişaf etdiriləcək, girovların realizasiyası mexanizminin təkmilləşdirilməsinə dair yeni təşəbbüslər göstəriləcəkdir. Bank sektorunda riskli artımın qarşısını almaq üçün növbəti ildə də yeni prudensial nəzarət alətlərinin tətbiqi imkanları araşdırılacaqdır.

Pul siyasətinə dair gündəlik qərarlar pul bazasının və ABŞ dollarının mə­zənnəsinin dəyişimində dərhal öz əksini tapır. Pul bazasının və manatın ABŞ dol­la­rına nəzərən məzənnəsinin dəyişimi isə pul kütləsinə və NEM-ə tə­sir göstərir. Bu da müəyyən vaxt ərzində inflyasiya üzrə hədəfə nail ol­ma­ğa imkan verir. Ope­rativ hədəflərdən asılı olaraq pul siyasəti alətlərinin k­ə­miy­yət parametrləri, o cüm­lə­dən açıq bazar əməliyyatlarının həcmi, valyuta mü­badiləsinin məbləği və s. müəy­yənləşdirilir.

Mərkəzi Bankın fəaliyyətini makroiqtisadi sabitliyə təsir edən amilləri nəzarətdə saxlamaqla və inflyasiyanı təkrəqəmli səviyyədə tutmaq, manatın məzənnəsinin sabitliyi, maliyyə sabitliyinin möhkəmləndirilməsi kimi hədəflərin realizasiyasına yönəltməkdədir. Yeni makroiqtisadi vəziyyətdə bankların daha təmkinli və sağlam aktivliyinin təmin olunması üçün zəruri nəzarət rejimi və alətləri tətbiq edilmişdir.

Mərkəzi Bankda pul və maliyyə siyasəti çərçivəsinin postkrizis dövrünün çağırışlarına uyğunlaşdırılması və beynəlxalq standartizasiyası istiqamətində təkmillləşdirmə işlərini davam etdirir. Mərkəzi Bankda diaqnostika və tədqiqat potensialının artırılması işləri bir neçə istiqamətdə aparılmışdır: maliyyə sabitliyinin qiymətləndirilməsi potensialının artırılması məqsədilə risklərin identifikasiyası prioritet məsələlərdən biri olmuş və Stress-testlər və maliyyə sabitliyi indikatorları vasitəsilə bank sektorunun davamlığı və həssaslığı mütəmadi qiymətləndirilmişdir.

Beləliklə, AMB pul siyasətinin əsas istiqamətləri iqtisadi artımın və inkişafın başlıca şərti olan makroiqtisadi sabitliyin qorunmasına, bank sektorunda maliyyə sabitliyinin təmin olunmasına və maliyyə vasitəçiliyinin dərinləşməsinə yönəldilib. Bu hədəflərə nail olmaq üçün Mərkəzi Bank pul siyasətinin və bank nəzarətinin strateji çərçivəsinin davamlı təkmilləşdirilməsini həyata keçirəcək, habelə makroiqtisadi siyasətin koordinasiyasının daha da təkmilləşməsinə zəruri dəstək verməkdədir.

Manatın məzənnəsi makroiqtisadi sabitliyin saxlanmasında, maliyyə sabitliyinin idarə olunmasında, habelə qeyri-neft sektorunun beynəlxalq rəqabət qabiliyyətinin qorunmasında əhəmiyyətli amil olaraq qalır. Pul təklifinin artım templərinə mümkün təsiri təmin etmək üçün Mərkəzi Bank pul siyasəti alətlərindən adekvat istifadə etməkdədir. Faiz dəhlizinin parametrləri, o cümlədən uçot dərəcəsi iqtisadi tsikldəki və maliyyə bazarlarındakı vəziyyətdən asılı olaraq adekvat tənzimlənəcəkdir. Bu məqsədlərin əldə edilməsində MB pul kütləsinin tənzimlənməsindən geniş istifadə edir. Çünki, pul kütləsi qiymətlərin sabilliyində, ümumi tələb və təklifin balanslaşdırılmasında mühüm amil hesab edilir. Başqa sözlə dövriyyədə arxasında real əmtəə dayanmayan pul kütləsininin artması inflyasiyanın başlıca səbəblərindəndir. Ümumiyyətlə, Mərkəzi Bank elə bir optimal qiymət hədləri formalaşdırmağa çalışır ki, həm istehsalçının və istehlakçının maraqları uzlaşsın, həm də iqtisadi artım baş versin. Bunun üçün Mərkəzi Bank bir rəqəmli inflyasiya səviyyəsinin formalaşdırılmasını hədəfləyir. Müasir iqtisadi sistemlərdə sıfır inflyasiyalı iqtisadiyyat yoxdur. Çünki qiymətlər həddən aşağı düşəndə istehsalçı kifayət qədər mənfəət əldə edə bilmir və istehsala marağı azalır. İnkişaf etmiş ölkələrdə illik 3-4 faizlik inflyasiyadan iqtisadi artımı stimullaşdırmaq üçün istifadə edilir.

Biz hesab edirik ki, Mərkəzi Bank makroiqtisadi və maliyyə sabitliyinin idarə olunmasını, habelə qanunvericiliklə təsbit olunmuş mühüm funksiyaların realizasiyasını təmin edən fəaliyyət çərçivələrini əsaslı müasirləşdimək və standartlaşdırmaq əzmindədir.

Manatın sabit məzənnəsi aşağı təkrəqəmli inflyasiya hədəfinə nail olunmasında, sosial rifahın və investisiya aktivliyinin qorunmasında mühüm rol oynayır. Bunu nəzərə alaraq 2016-ci ildə manatın məzənnəsinin sabitliyi mühüm prioritetdir.

Pul siyasəti dizaynında yeni dəyişikliklər milli pul vahidinin sabitliyinə, inflyasiyanın aşağı səviyyədə saxlanılması və bununla da, iqtisadi yüksəlişin təmin edilməsi yoluna xidmət etməlidir.


Yüklə 1,05 Mb.

Dostları ilə paylaş:
1   2   3   4   5   6   7   8   9   ...   13




Verilənlər bazası müəlliflik hüququ ilə müdafiə olunur ©genderi.org 2024
rəhbərliyinə müraciət

    Ana səhifə