Lecture 9
A.
Aristotelin əxlaq fəlsəfəsi (Etika)
Aristotelin əxlaq fəlsəfəsinin baş əsəri “Nikomaxos əxlaqı”dır. Doğru iş
görmək, doğruya can atmaq...Doğru nədir? Elmdə bu elmi həqiqətdir,
sənətdə gözəllikdir, əməldə isə yaxşılıq və ya fəzilətdir. “İnsan siyasi
heyvandır” ifadəsi ilə Aristotel cəmiyyətin insan həyatında mühüm rolunu,
onun insanın xoşbəxt və ya xoş həyat sürməsini təmin etmək vəzifəsini
vurğulayır.Yəni Aristotel cəmiyyətin, siyasətin, dövlətin yaxşılığı ilə fərdin
xoşbəxt olması arasında sıx əlaqə olduğunu deyir.
Aristotel əxlaqda məqsəd və vasitə arasında fərqi mühüm sayır, özü məqsəd,
amac olan şeyə əxlaqı baxımdan üstünlük verir. Ən son məqsəd adətən
xoşbəxt olmaq üçün qarşıya qoyulan məqsəddir.. Xoşbəxt olmaq insanın
son məqsədidir (Epikurosda bu mötədil həzzdir), insan ondan o tərəfə bir
şey istəmir. Aristotel insan qarşısında heç bir xüsusi bir vəzifə və ya borc
qoymur, ancaq son məqsədi vurğulayır ( bu “son məqsəd” onun metafizikası
ilə səsləşir). Kant`ın əxlaq fəlsəfəsində son məqsəd deyil, gedilən yoldakı
yaxşı niyyət mühüm sayılır.
Aristotel hər insanın öz məsləyinə, sənətinə, bacarığına uyğun işləri bir
kənara qoyanda onun bir insan kimi işinin nə olduğu sualını qoyur. Sadəcə
yaşamaq bütün canlılara xasdır, insan isə ağıllı, düşünən heyvan olduğu
üçün, onun işi “ruhun ağla uyğun fəaliyyətidir” və bunu ömrü boyu
etməlidir. Bəs pislik necə izah oluna bilər? Əməlin qaynağı ağıl və arzudur,
daha doğrusu bir məqsədə can atan arzu və ağıldır (təkcə, ayrıca ağıl və
təkcə, ayrıca arzu gücsüzdür). Ağıllı arzu fəzilətə, ağılsız arzu isə pisliyə
aparır.
Aristotel iki cür fəziləti fərqləndirir: düşüncə (zəka) fəzilətləri və əxlaqi
fəzilətlər. Birinciyə ağıllı ruhdan (elm, sənət, praktik müdriklik/hikmət,
fəlsəfə, ...) , ikinciyə arzu və ya iştahdan qaynaqlanan fəzilətlər (comərtlik,
qürur, cəsarət, ədalət, mötədillik, dostluq, sevgi,...) daxildir. Düşüncə
fəzilətləri öyrənmə yolu ilə qazanılır, əxlaqi fəzilətlər isə adət və
alışqanlığın, onları həyatda tətbiq etmənin nəticəsində əldə edilir, yəni
xarakteri, xasiyyəti əməl və fəaliyyət formalaşdırır. Əxlaq nəzəri bilik deyil,
praktika mühümdür; fəzilətin nə olduğunu bilmək azdır, əsas fəzilətli
olmaqdır. Əxlaqlı əməlin məcburi deyil, şüurlu olaraq baş verməsi
mühümdür. İnsan seçir, tərcih edir; bu, məqsəd deyil, vasitədir. İnsan
mümkün olanlardan seçir.
Sokrates: heç kim bilərək pislik etməz. Pisliyin səbəbi bilgisizlikdir.
Aristotel buna qarşı çıxır, yaxşı iş də, pis iş də əlimizdədir. Pislik edənlər
ona görə qınanırlar ki, pislik etməyə bilərdilər. Sərxoş adam pis iş görərkən
ola bilər ki, bilmədən etsin, lakin sərxoş olmamaq onun əlində idi, sərxoş
olarkən pis iş görə biləcəyini bilirdi. Yəni pislik etmənin səbəbi bilgisizlik
deyil.
Aristotel`in əxlaq fəlsəfəsini səciyyələndirən cəhətlərdən biri “qızıl orta”dır.
Həzz almaq, pul xərcləmək (xəsis və pulu göyə sovuran), qorxmaq kimi
keyfiyyətlərin çox az olması da, həddindən çox olması da yaxşı deyil.
Əlbəttə ki, qızıl orta deyilən şey mütləq deyil, müxtəlif səbəblərə görə nisbi,
dəyişəndir (və bəzən çətin tapılandır-H.İ.). Qızıl orta həmçinin pis şeylər
üçün deyil (“orta oğru” kimi).
Aristotel ədalət anlayışına xüsusi önəm verir, onu hər şeydən üstün tutur,
hər şeyin onun içində olduğunu deyir. Ədalət anlayışı əxlaqla siyasət
arasında yaxın əlaqə olduğunu vurğulayır. Ədalət cəmiyyətə, siyasətə ən
çox bağlı olan xüsusiyyətdir. Adil insan qanuna və haqqa (doğruya) uyandır.
Aristotel ədaləti bölüşdürücü və düzəldici/mübadiləçi deyə iki sinfə ayırır.
Bölüşdürücü sərvətin və şərəfin düzgün bölüşdürülməsidir. Düzgün-
demokratik quruluşda, yəni insanların azad və bərabər sayıldığı yerdə
cəmiyyət üzvləri arasında bərabər bölüşdürmə deməkdir, oliqarx quruluşda
isə cəmiyyətdəki mövqeyə, “səviyyə”yə mütənasib bölgüdür. Bu ədaləti
dövlət təmin etməlidir. Düzəldici ədalət vətəndaşlar arasında zərər və
haqsızlıqların aradan qaldırılmasıdır, bu, bəzən orta yolu tapmaqla deyil,
bərabərsizliyin cəza tətbiq etməklə aradan qaldırılma cəhdidir (məsələn,
adam öldürənə cəza verilir). Bu ədaləti isə məhkəmə təmin edir.
Aristotel insanların öz aralarında iş bölümü (ixtisaslaşma) və mübadilədə
olduqlarını deyir (mübadilə ədaləti). Uyğun, yəni iki malın, iqtisadi dillə
desək, tələb və təklif əsasında bərabər dəyərinə görə mübadilə olunmasını
mübadilə (alış-veriş) ədaləti adlandırır. Burada tam ədaləti təmin etmək
olmur, ədaləti təmin edən şəxs və ya qurum yoxdur.
Övlad valideyni ilə, arvad əri ilə bərabər deyil, ikincilər birinciləri daha çox
sevməlidirlər. “Qul canlı alət” olduğuna görə ağa ilə qul dost ola bilməzlər,
ancaq insan kimi qulla dost olmaq olar (?). Aristotel məğrur, qürurlu,
əzəmətli insanın ləyaqətindən, mənəvi kamilliyindən söz açır; o, səsi və
nitqi ilə seçilir, demək olar ki, ehtiyac hiss etmir, amma başqalarına
xeyrxahlıq edir, xasiyyəti və davranışı açıqdır - dostluqda da, zəhləsi
getmək və nifrətdə də, lakin kütlə qarşısında sünilik və ya hiyləgərlik
istisnadır (burada siyasət mənəviyyatı üstələyir-H.İ.).
Həzz və xoşbəxtlik
üçün bir mühit olmalıdır, bədbəxtliyə düçar olan adamın həzz alması çətin
işdir. Ən böyük həzz zəka fəaliyyətinin verdiyi həzzdir, ən yüksək səadət
ağlın məhsuludur. Seyrçilik hər növ fəaliyyətdən, o cümlədən siyasət və
əməli işlərdən üstündür, o, xoşbəxtlik üçün zəruri olan asudə vaxt bəxş edir.
Ümumiyyətlə, Aristotel`in etikası sanki nikbin və həyatın üst təbəqəsində
yerləşmiş insanlara ünvanlanıb.
Aristotel nəzəri biliyi, elmi praktik bilikdən (o cümlədən siyasətdən) üstün
sayır və xoşbəxtliyi nəzəri fəaliyyətlə bağlayır. Praktik fəzilətlərin faydası
onların nəzəri fəzilətlərə yardımçı olmasındadır. Nəzəri düşüncə sahibinin
öz düşüncə və seyretmə həyatında başqa insanlara və şeylərə ehtiyacı
yoxdur. Düşüncə həyatı ən mükəmməl və xoşbəxt həyat, filosof ən
mükəmməl və xoşbəxt insandır. Əxlaqi fəzilətlər də xoşbəxtliyi artırır
(ikinci dərəcədən olsa da). Maddi və fiziki şərtlər, dostların olması da
lazımdır. Ümumiyyətlə isə, “xoşbəxt insanın çox şeyə ehtiyacı yoxdur”.
B.
Aristotelin siyasət fəlsəfəsi
Aristotel öz dövlət və insan problemini “Politika” və həmçinin “Nikomax
etikası” əsərində şərh etmişdir (əslində “Nikomax etikası” və “Politika” bir
əsərin 1-ci və uyğun olaraq 2-ci hissəsi kimi düşünülmüşdü). Əxlaq fəlsəfəsi
və siyasət fəlsəfəsi qarşıya qoyduğu suallar baxımından doğrudan da bir-biri
ilə sıx bağlıdırlar. İnsan cəsur, ağıllı, ədalətli və fərasətli olmalıdır. Ədalət
ümumi xoşbəxtlik deməkdir, bunu əldə etmək üçün qanunlara əməl etmək
və hakimiyyətə tabe olmaq zəruridir. Ünsiyyət arzusu və ondan daha önəmli
olan ehtiyacların qarşılanması üçün qarşılıqlı köməyin zəruriliyi insanları
növbə ilə ailə, kənd və dövlət qurmağa gətirib çıxarır. İnsan təbiəti etibarilə
ictimai/ siyasi heyvandır. İctimai olmayan ya insanlıqdan aşağıdadır (yəni
heyvandır), ya da insanlıq üstündədir (yəni Tanrıdır). İnsanlar birlikdə
ancaq yaxşı dövlətdə xoşbəxt ola bilərlər. Bu səbəbdən dövlət ailə və
fərdlərdən üstündür, öndədir –tam hissədən üstündür. Qanunsuzluqda insan
heyvanlardan ən pisidir. Bununla yanaşı dövlət gəlirlərin ədalətli
paylanmasını təmin etməlidir. “Dövlətin əsası birlik deyil, çoxluqdur”.
Aristotel şəhər dövlətini dövlətin ən düzgün forması sayır
(mərkəzləşdirilmiş dövləti deyil).Yaxşı dövlət (dövlət başçısı) vətəndaşların
ortaq maraqlarına xidmət edən, yəni ədalətli dövlətdir (adil dövlət
başçısıdır). Dövlətin məqsədi vətəndaşlarına yaxşı həyat qurmaq, onların
xoşbəxt olmasına çalışmaqdır; məqsəd həlledicidir. Dövlətə ən yaxşı xidmət
edənlər dövlətdən ən çox pay almalıdırlar. Hakimiyyət məsələsində
Aristotel bərabərliyi deyil, ləyaqəti (layiq olmağı), azadlığı deyil, fəziləti
əsas sayır.
Aristotelin nəzərincə siyasi quruluş üç hissədən ibarət olmalıdır:
qanunverici, icraçı və məhkəmə sistemi. Hakimiyyətin kimin və ya kimlərin
- bir adamın, azlığın və çoxluğun əlində olmasından asılı olaraq üç
“düzgün”, ümumi maraqlara xidmət edən quruluş – monarxiya(şahlıq),
aristokratiya (nəcib insanların hakimiyyəti) və politiya/politeia (respublika)
əmələ gəlir. Bunlar hər biri məqbuldur, hərçənd ki, monarxiya
aristokratiyadan, aristokratiya politiyadan yaxşıdır. Aristokratiyada orta
təbəqə mühüm yer tutur. Dövlətin idarəedilməsində orta təbəqə
zənginlərdən və yoxsullardan yaxşıdır, çünki, lazım gəldikdə, zənginlərdən
fərqli olaraq itaət etməyi və eyni zamanda, yoxsullardan fərqli olaraq əmr
etməyi bacarır. Sərvətə əsaslanan hakimiyyət oliqarxiya, azadlığa əsaslanan
hakimiyyət isə demokratiyadır.
“Düzgün olmayan”, xüsusi maraqların əsas götürüldüyü halda isə uyğun
olaraq tiranlıq, oliqarxiya (kasıbları nəzərə almayan zəngin azlığın
hakimiyyəti) və demokratiya (zənginləri nəzərə almayan çoxluğun
hakimiyyəti) alınır. Tiraniya Oliqarxiyadan pisdir. Aristotelin tiraniyaya
münasibəti çox kəskindir - “oğrunu deyil, tiranı öldürənə eşq olsun”! Tiran
hakimiyyətdə qalmaq üçün xüsusi qabiliyyətə malik insanların
yüksəlməsinə hər cür (məhv etmək daxil olmaqla) mane olmalı (!?),
xəfiyyələr saxlamalı, insanların bir yerə toplaşmasına mane olmalı, insanlar
arasına nifaq salmalı, onların ictimai həyatını nəzarətdə saxlamalı, onların
öz gündəlik qayğılarına bağlanmaları üçün və başqa düşüncələrə (məsələn,
silahlanmaq fikrinə) qapılmamaları üçün yoxsul saxlamaqla və ya böyük
miqyaslı işlərlə başlarını qatmalı olur. Tiran fəxri adları, şərəfləri özü
paylayır, cəzaları isə başqalarının əli ilə edir.
“Düzgün olmayan” üçlüyün arasında demokratiyaya dözmək olar (yəni o,
oliqarxiyadan yaxşıdır), bir şərtlə ki, hakimiyyət kütlənin deyil, qanunun
əlində olsun (vətəndaşların toplusu qanundan üstündür; bu yaxşı deyil).
Qanunların işləmədiyi çoxluğun hakimiyyəti ilə tiranlığın fərqi yoxdur.
Oliqarxiyada hakimiyyətin atadan oğula keçməsi də mümkündür.
Oliqarxiyada sərvət, Aristokratiyada fəzilət önə keçir. Demokratiyaya
tənqidi münasibəti anlamaq üçün bir cəhəti nəzərdə tutmaq lazımdır: o
dövrün yunan demokratiyası əsil seçkiyə deyil, püşkatmaya əsaslanırdı. Bu
siyasi quruluş növlərinə bir qədər başqa deyilişdə Platonda da rast gəlinir. O
dövr Yunanlı şəhər-dövlətlərə xas olan dövlət növləri oliqarxiya və
demokratiya idi; ikinci daha geniş yayılmışdı.
Platonun dövlət modelində Aristotel birinci növbədə xüsusi mülkiyyətə
qadağanı tənqid edir: “mülkiyyət haqqında adi fikir belə görünməmiş həzz
verir”. Mülkiyyətin xüsusi olması ilə yanaşı insanları xeyriyyəçilik etməyə
çağırmaq olar. İnsani sifət olan xeyriyyəçilik və comərdlik xüsusi
mülkiyyətsiz necə mümkün ola bilər?! Platonda ailənin ümumləşdirilməsi
də Aristoteli əsəbiləşdirir; hamıya məxsus olana (mülkiyyət olsun, ya qadın
və uşaqlar) kim qayğı göstərəcək?! Qohumluğun bilinmədiyi cəmiyyətdə
cinayətlər, o cümlədən adam öldürmə, oğurluq qat-qat çox olardı. Platonun
ortaqlıq cəmiyyətində güclü sevgi duyğuları ola bilməz, “ata”, “oğul” kimi
müraciətlər çox hərarətli ola bilməz. Aristotel “qadınlar ümumi olsa
təsərrüfatı kim idarə edər” kimi bir qədər qəribə əsaslandırmalara da baş
vurur. Mülkiyyət məsələsində bir şeydən istifadə olunma dəyəri əsasdır,
onun başqa şeyə dəyişdirilməsi isə (yəni ticarət) ehtiyacla bağlı və ikinci
dərəcəlidir.Lakin Aristotel qul məsələsində Platona nisbətən daha radikal
mövqe tutur: “aydındır ki, öz təbiətinə görə bəziləri qul, digərləri azaddır”,
“bəzilərinə qul, digərlərinə ağa olmaq faydalıdır”. Bəziləri anadan idarəetmə
üçün, digərləri tabe olmaq üçün doğulublar. Təbiətlərinə görə tabe olmaq
üçün yarananlar tabe olmayanda onlara qarşı savaş açmaq və onları məğlub
edib qula çevirmək ədalətli işdir. Qulları yunan olmayanlar arasından almaq
doğrudur (yunanlar təbiət etibarilə qul deyillər).
Varlanmaq üçün doğru yol torpaqları və ev təsərrüfatını idarə etməkdir.
Ticarət və sələmçilik zənginləşmək deyil, pul yığmaq üçündür, bu səbəbdən
də tacirləri haqlı olaraq sevmirlər.
Aristotel ideal dövlət (şəhər) üçün müəyyən kəmiyyət və keyfiyyətin
vacibliyini deyir; əhalisi (nə çox az, nə həddindən çox), coğrafi və təbii
şərtləri, xarakteri (yunanlar avropalı və asiyalılardan daha uyğun) barədə
fikir söyləyir. İdeal dövlətin vətəndaşları savaşçılar, din adamları və
idarəedənlərdir. Əkinçilər, sənətkarlar (işçilər) və tacirlər vətəndaş deyillər
(!?). Torpaq üzərində mülkiyyət hüququ hərbçilərə və idarəedənlərə verilir,
onları işçilər və qullar işlədəcək.
İnsanın təbiəti, alışqanlıqları və ağlı var. Doğuşdan yaxşı olma və ağıl
alışqanlıqlara məruz qalıb pozula bilərlər. Bu səbəbdən vətəndaşların təhsili
çox mühümdür. Bətəndaş tərbiyəsində həm qanunlara uymaq, həm də
qanunlar yaratmaq və idarəetmək vərdişləri nəzərdə tutulmalıdır. Əvvəl
bədən tərbiyəsi, sonra ruhun tərbiyəsi, daha sonra ağlın tərbiyəsinə fikir
vermək lazımdır. Təhsil vacib olduğu üçün ailənin deyil, dövlətin işidir.
Platon kimi Aristotel də təhsildə və dövlətdə nə zaman, harada və necə işlər
görəcəklərini təfsilatı ilə təsvir etməyə çalışmışdır (oxu materialları; rəsm və
musiqi növləri; kimin nə vaxt kiminlə evlənəcəyi-kişilər 37-də, qadınlar 18-
də; uşaqların nə vaxt doğulması və onların hansılarını öldürməyib sağ
saxlamaq, dövlətin ölçüləri-nə çox böyük, nə çox kiçik -əslində isə
Aristotelin dövlət ölçüləri kiçikdir: bir təpənin başından baxanda
görünsün...).
İnqilabların qarşısını almaq üçün üç şeyə fikir vermək zəruridir: dövlət
təbliğatı, qanuna (xüsusilə konstitusiyaya) böyük hörmət və ədalət (“hər
kəsə ləyaqətinə görə”). İdarəedənlərin uzun zaman hakimiyyətdə olmaları
və hədsiz güc qazanmaları təhlükəlidir. Demokratik quruluş oliqarxiya ilə
müqayisədə inqilablara qarşı daha dayanıqlıdır (xalq deyilən çoxluq onun
tərəfindədir). İnqilabın səbəbi aşağıda olanların bərabərlik arzusu, bərabər
olanların isə üstün olmaq (bərabərsizlik) arzusudur. İnqilabın baş verməsi
müxtəlif hisslərlə bağlıdır: qazanc, qorxu (haqsızlıq ediləcəyi və ya
cəzalandırılmaq qorxusu), aşağılanmaya qarşı müqavimət, dövlətin
müəyyən təbəqəsinin ifrat dərəcədə böyüməsi. Bərabərsizlik duyğusu
insanları üsyana çağıran ən böyük qüvvədir. Ən böyük cinayətlər ehtiyacdan
deyil, artıqlıq/bolluq üzündən baş verir.
C.
Aristotelin sənət fəlsəfəsi
Əvvəlcə Platonun sənət haqqında fikirlərinə baxaq (əsasən “Dövlət”dən).
Platon sənəti (təsviri, ədəbi, digər...) təqlid və ya təmsil olaraq şərh edir.
Hisslər dünyasında var olan insan və ya əşyalar ideyaların surəti, təqlidi,
təmsili olduğu kimi, insanın yaratdığı əsər də hisslər dünyasında var
olanların surəti, təqlidi, təmsilidir. Beləliklə, sənət əsəri təqlidin təqlididir.
Sənətçi/sənətkar təqlidçidir, hətta bir hoqqabazdır, bir oyunçudur; o, gerçək
bir bənzər və ya saxta bir bənzər yarada bilir. Bu, Homeros da daxil olmaqla
şair və yazıçılara da aiddir. Sənətin faydası yoxdur, sənət insanları
həqiqətdən uzaqlaşdırır. Sevgi isə, Platona görə, sənətdən fərqlidir, sevginin
kökündə ölümsüzlük dayanır; Sevgi dünyaya yeni insan gətirməklə
ölümsüzlüyə (insan növünün davamlılığına) töhfə verir. Elm yaradıcı
fəaliyyətin, arzunun daha üstün növüdür. Amma sənət də maraq doğurur,
çünki ağlımıza deyil, duyğularımıza təsir göstərir, dəyişkən, coşub-daşan,
iradəsiz, qorxaq, gülünc, süst tərəfimizə təsir edir. Şair və yazıçıların təsvir
etdikləri əxlaqsız davranışlar, tanrılara və qəhrəmanlara qarşı
hörmətsizliklər xalqın tərbiyəsini pozur. Sənət əxlaqa xidmət etməlidir.
Aristotel sənəti, xüsusilə şeir, tragediya və komediyanı təhlil etdiyi
“Poetika” əsərində sənətin təqlid olduğunu deməklə Platonu izləsə də, o,
sənəti aşağılamır, onun gözəl və faydalı olduğunu irəli sürür. Aristotelə görə
sənət tək maddi həqiqətin deyil, bir çox hallarda insan duyğularının əksidir,
təqlididir, daha doğrusi təmsilidir. İnsan ilk bilikləri təqlid yoluyla alır,
təqlid sayəsində bilik qazanır. Tarixlə şeir arasındakı fərq birinin nəsrlə,
digərinin nəzmlə yazılması deyil, tarixin olmuş şeyi, şairin isə mümkün ola
biləcək şeyi təsvir etməsidir. Şeir daha fəlsəfi və daha faydalıdır; tarixçi
fərdi (ayrı-ayrı adamları və hadisələri), şair isə daha bütöv, daha ümumi
olanı təsvir edir. Bu səbəbdən şeir tarixlə müqayisədə daha bilik yönlüdür,
hərçənd ki, bu bilik fəlsəfə və ya elmi bilikdən daha aşağı səviyyədədir. Şair
tarixi hadisəni və ya şəxsi tarixdə olduğu kimi təsvir etməyə məcbur deyil,
o, tarixçi deyil, şairdir.
Sənətin məzmun qədər forma gözəlliyi də vacibdir və onun cəlbediciliyi bu
gözəlliyə də borcludur. Sənətin əxlaqi tərəfi, ruhlandıran, zövqü oxşayan
həyəcanlı tərəfi də var. Aristotel musiqini digər sənət növlərindən ayırır
(həqiqətən, var olanların təqlidi`ndən), onu duyğuların, ruh hallarının təqlidi
sayır. Nəzəriyyənin məqsədi elm, praktik (praksis; əxlaq və siyasət)
fəaliyyətin məqsədi yaxşı həyat sürmək, sənət əsərini meydana çıxaran
poeisis`in (və ya texne`nin) məqsədi isə gözəl və faydalı şeylər yaratmaqdır.
Uşaqlara keçilən dərslər dörd növdür: oxuma-yazma, bədən tərbiyəsi, rəsm
və musiqi. Oxuma-yazma və hesab kimi şeylər faydalı, oyun və əyləncələr
həzzvericidir. Musiqi isə həzz versə də, əsas xüsusiyyəti xarakter və zehnə
güclü təsir etmə qabiliyyətidir. Musiqi həm də ehtiraslardan təmizləmə
(katarsis) işi görür, könül xoşluğu və rahatlıq duyğusu, estetik həzz verir
(musiqinin bu saflaşdırma xüsusiyyətini “Politika”da göstərib). Musiqi və
digər sənətlər insana insani hissləri yaşamaq imkanı verir, bu mənada onu
təmizləyir, insaniləşdirir. Platon tragediyanın insanı duyğulu edib
zəiflətdiyini deyirdi, göründüyü kimi Aristotel bunu tərsini irəli sürmüşdür.
“Poetika” əsərində Aristotel tragediyanın təhlil üzərində xüsusi
dayanmışdır.
Aristotel Platon Akademiyasında ritorika/xitabət (gözəl və təsirli danışma
sənəti) dərsləri verirdi. “Ritorika” kitabını da, yəqin ki, bu dərslərin təsirilə
yazmışdı. Demokratik Afinanın həyatında ritorika (inandırma vasitələrindən
istifadə, danışıq, xitabət sənəti, məharət - Aristotel) önəmli yer tuturdu.
İsokrates`in ritorika məktəbi ilə Akademiya arasında bir rəqabət də vardı.
Ritorikada induktiv və deduktiv yanaşma, misallara, örnəklərə dayanan və
müqayisələrə əsaslanan üsullar tətbiq olunur. Ritorikanın bir önəmi də
xüsusi təhsili olmayan insanları da məlum anlayışlardan istifadə etməklə
inandırmaq, həmçinin ağıl vasitəsilə müdafiə olunmaqdır. Natiq inandırmaq
üçün məntiq və etika üzrə biliklərə sahib olmalıdır. Aristotel üç növ xitabət
var deyir: siyasi, hüquqi, mərasimlə bağlı nitqlər. O, həmçinin natiqin
xarakteri, dinləyicilərin ruhi vəziyyəti və xitabət mövzusunun
xüsusiyyətlərini araşdırmışdır. Həm də psixoloji bir əsər olan “Ritorika”da
Aristotel yaş psixologiyasına baş vurur, gənc, orta yaşlı və yaşlıların
xarakteristik cizgilərini verir. O, kübarlar (soylu doğum; məğrur), zənginlər
(saymazyana, özünügöstərmə, başqalarına qarşı həssas olmayan,...) və
güclülərin də surətlərini cızır. Nitq inandırıcı olmaq üçün ölçülü və təbii
olmalıdır.
D.
Makedoniyalı Aleksandr. Hellenizm
Makedoniyalı Aleksandr (-356, -323) və ya Böyük Aleksandr güclənməkdə
olan Makedoniya hökmdarı II Filip`in oğludur. 3 il Aristotel ona (və onun
yaxın ətrafında olanlara) dərs vermiş, Aleksandr 16 yaşa çatanda dərs
dayandırılmışdı.
Aleksandr 20 yaşa çatanda atası öldürüldü və o, hakimimiyyətə gəldi (“-
334”). Təqribən iki il sonra dünyanın, daha doğrusu Şərqin və qismən
Cənubun fəthinə girişdi. Kiçik Asiya və Persiya yürüşü, Orta Asiya və
Hindistan hərbi səfərləri 10 il sürdü. Bu müddətdə təqribən 20 şəhər təsis
etdi, o cümlədən (və ən mühüm olan) Aleksandriya şəhərinin, həmçinin
indiki Qəndəhar`ın əsasını qoydu” bu şşəhərlərin hamısını Aleksandriya
adlandırmışdı... Baktriyalı bir kübarın qızı Roksana ilə, həmçinin
öldürülmüş Persiya şahı Darius`un qızı ilə evləndi. Get-gedə Persiya
monarxlarının həyatına bənzər yaşamağa başladı, özünü Şahənşah
adlandırdı, əl öpmək adətini tətbiq etdi. Bu yunan-makedoniya
aristokratlarının etirazına səbəb oldu, xüsusilə tarixçi Kallisfen (onu
Aleksandra Aristotel təqdim etmişdi) açıq etiraz etdi. Həbsxanaya düşən
Kallisfen orada öldü, mümkündür ki, Aleksandr`ın əli olmadan. Aleksandr
pers qızları ilə evlənin siyasətini həyata keçirməyə çalışırdı; bir dəfəyə
sərkərdə və əyanlardan təqribən 80 nəfərini bu qayda ilə evləndirdi. Orduda
da bu meyl vüsət aldı (kişilərdən ibarət ordu yerli qadınlarla evlənməkdən
qaçmaq istəmirdi...). Babildə Aliksandr 33 yaşında ikən öldü. Ölümü
haqqında çox rəvayətlər danışıldı, bəlkə ona zəhər verilmişdi (?!). Bu gün
də bu məsələ tədqiqat mövzusu kimi ortadan qalxmayıb. Aleksandrın
sevimli sərkərdələrindən Ptolomey (Soter) tabutu oğurlatdı, Memfisə,
sonunda Aleksandriyaya aparıb orada dəfn etdirdi. Bir sıra Romalı
məşhurlar Aleksandrın qəbrini ziyarət etdikləri barədə yazmışlar. Sonra
Aleksandrın qəbrinin harada olduğu haqqında məlumat yox oldu...
Aleksandr Qərbi və Şərqi birləşdirdi, Hellenistik dövr başlandı.
Aleksandrdan sonra onun sərkərdələri imperiyanı idarə etmək uğrunda
savaşa qalxdılar. Diodoxların-bu sərkərdələrin səyi nəticəsində İmperiya
dörd hissəyə parçalandı: Selevklər, Ptolomeylər, Perqamum və Yunanıstanı
içinə alan Makedoniya. Hellenizm/Helenistik dövr-təqribən 3 əsr davam etdi
”-330”-dan Romanın bu əraziləri fəth etdiyi ”-30”-a qədər.
Hellenizm dövrü elmin çiçəklənməsi dövrü kimi səciyyələndirilə bilər.
Dostları ilə paylaş: |