96
Qarabağ xalçalarına "Malıbəyli", "Ləmpə", "Bağçadagüllər", "Bulud", "Saxsıdagüllər", "Nəlbəkigül",
"Çiçəkli Muğan", "Bəhmənli", "Xanlıq", "Kürd", "Qaraqoyunlu", "Qarmaqlı", "Qasımuşağı", "Qubadlı",
"Muğan", "Talış", "Naxçıvan", "Əjdahalı", "Zəngəzur" və s. kimi
kompozisiyalı xalçalar aiddir.
Qarabağda medalyonlu, süjetli və ornamental xalçalar
toxuyurdular. "Buynuz", "Balıq", "Dəryanur", "Xanlıq", "Xantirmə",
"Qasımuşağı", "Minaxanı" kompozisiyaları daha geniş yayılmışdı.
Qarabağ həm də kilim, palaz, şəddə, vərni kimi xovsuz xalçaları və xalça
məmulatları ilə məşhur olmuşdur.
XVII-XVIII əsrlərdə Qarabağda toxunmuş məşhur əjdahalı
xalçası - "Xətai" ABŞ-ın Tekstil-Muzeyinin qiymətli eksponatı
sayılır.
Təbriz xalça məktəbinə Təbrizdə və s. yerlədə toxunan,
Təbriz xalçaları kimi tanınan xalçalar aiddir. Bu xalçalar 1dm
2
-də
120x120 ilmə sıxlığı, zəngin koloriti, medalyonlu kompozisiyaları,
ornamentlərini nəbati elementlərin təşkil etməsi ilə səciyyələnir.
XV-XVI əsrlərdə məhz Təbrizdə bir çox elə xalça
kompozisiyaları yaradılmışdır ki, onlar həmin regiona dünya şöhrəti
gətirmişdir. Təbriz xalça məktəbinin bütün Şərq xalçaçılığına çox
böyük təsiri olmuşdur. Orta əsrlər dövründə məhz burada xalçaçılıq
yüksək sənət səviyyəsinə qalxmışdır. "Ləçəktürünc", "Əfşan" və başqa
Təbriz xalçalarının gözəl, mürəkkəb ornamentli kompozisiyaları
incəsənətdə və dünya bazarında böyük şöhrət qazanmışdır. Təbriz
xalçaları arasında "Ağaclı", "Dörd fəsil", "Leyli və Məcnun", "Təbriz",
"Heyvanat", "Sütunlu", "Ovçuluq", "Dörd fəsil" və s. kimi xalçalarla
yanaşı, palaz, kilim, vərni, zili kimi xovsuz xalçalar da qeyd
edilməlidir. Bu xalçaları xarakterizə edən əsas bədii-texniki cəhət ornamentlərinin stilizə edilmiş əyrixətli
nəbati elementlərdən təşkil olunması və s.-dən ibarətdir.
Səlcuqlar dövründə (1038-1157) Təbrizdə toxunmuş bir
çox xalçalar hal-hazırda Türkiyədə Konya və İstanbul
muzeylərində saxlanılır. Orta əsrlərdə (XV-XVIII əsrlər) Təbriz
xalçaları yun, ipək, pambıq və hətta əlvan metallardan - qızıl və
gümüş saplardan toxunmuşdur.
Təbriz xalçaları dünyanın bir çox məşhur muzeylərinin ən
qiymətli eksponatlarındandır. Onlardan XVI əsrdə toxunmuş
"Şeyx Səfi" xalçası Londonun Viktoriya və Albert Muzeyində,
"Heyvanat" xalçası Paris Tətbiqi Sənət Muzeyində, "Ovçuluq"
xalçası Milanda Poldi-Petsolli Muzeyində, süjetli xalça Budapeşt
Tətbiqi Sənət Muzeyində və s. saxlanılır. Məşhur "Şeyx Səfı"
xalçasının adı Səfəvilər sülaləsinin banisi Şeyx Səfiəddin əbu
İshaq Ərdəbili ilə bağlıdır. Xalça "Ləçəktürünc" kompozisiyasına
əsaslanır. Orijinal variantı 1539-cu ildə toxunmuş və 350 ildən
artıq Ərdəbil məscidində saxlanılmışdır.
Ərdəbil, Mir, Sərab və s. bölgələrdə toxunan "Açma-
yumma", "Ərdəbil", "Mir", "Sərab", "Şahabbasi", "Şeyx Səfi",
"Arç", "Danalı" və s. kimi Ərdəbil xalçaları aid edilən Ərdəbil
xalça məktəbi, Zəncanda toxunan "Zəncan" "Norşar", "Taruş",
"Sultani" və s. kimi Zəncan xalçaları aid edilən Zəncan xalça
məktəbi, Xalxal, Gerov, Miyanədə toxunan "Silsiləvi ləçək" və s.
kimi Xalxal xalçaları aid edilən Xalxal xalça məktəbi, Urmiyada
toxunan "Tərzi" və s. kimi Urmiya xalçaları aid edilən Urmiya
xalça məktəbi, Heris, Qaraca, Gərmə, Mehriban, Goravan,
Gülvanaq, Kivednə, Xocada toxunan "Açma-yumma", "Baxşayış",
"Goravan", "Heris", "Qaraca", "Göllü-guşəli" və s. kimi Qaradağ xalçaları aid edilən Qaradağ xalça məktəbi,
Marağa, Tilib, Sanqaçal, Binab, Xalasu, Xəştəruzçaroymaqda toxunan "Balıq", "Ləçəktürünc", "Qızılgül" və s.
kimi Marağa xalçaları aid
edilən Marağa xalça məktəbi, Mərənd, Səlmas, Xoyun "Ləçəktürünc", "Sütunlu" və s.
kimi Mərənd xalçaları aid edilən Mərənd xalça məktəbi də mövcuddur.
97
Bu məktəblərə aid edilən xalçalar 1
dm
2
-də 95x95-130x130 ilmə sıxlığı, zəngin koloriti,
kompozisiyalarının medalyonlu, ornamentlərini nəbati elementlərin təşkil etməsi ilə xarakterizə olunur.
Yüksək peşəkar istehsalın təmərküzləşmiş olduğu Təbrizdə və Ərdəbildə ipək xalçalar, orta əsrlərdə isə
həmçinin metal (gümüş və qızıl) saplardan toxunan xalçalar istehsal edilirdi.
XIX əsrin ortalarından etibarən Azərbaycan xalçaları müxtəlif beynəlxalq sərgilərdə nümayiş etdirilmiş,
azərbaycanlı sənətkarlar bu sərgilərdə dəfələrlə qızıl, gümüş, bürünc medallara layiq görülmüşlər. Xalçalar ilk dəfə
1852-ci ildə Moskvada Ümumrusiya kənd təsərrüfatı və kənd sənayesi sərgisində, sonra isə 1872-ci ildə Moskvada
politexnik sərgidə nümayiş etdirilmişdir. 1882-ci ildə Moskvada Ümumrusiya sənaye və incəsənət sərgisində, 1872-ci
və 1889-cu illərdə Moskvada və Tiflisdə Qafqaz kənd təsərrüfatı və sənaye məmulatları sərgisində Azərbaycan
xalçaları böyük müvəffəqiyyət qazanmışdır. Şuşalı Bayram Məşədi Qurban oğlu, Kərbəlayı Əhməd Dəmirçal
oğlu, Cabbar Hacı Əkbər oğlu, Fatma Şərif qızı, Əhməd Daşdəmir oğlu, Soltan Əli qızı, cəbrayıllı Mehdi Miriş
oğlu, Fərqanə İmanqulu qızı, bakılı Kərbəlayı Qurbanalı Soltan Əhməd oğlu, Məcid Zal oğlu, Kərbəlayı Talib
Molla Kirxar oğlu, şamaxılı Hacı Əhməd Şirin oğlu və b. dövrün tanınmış sənətkarları olmuşlar. Çar
Rusiyasında Azərbaycan xalçaları sonuncu dəfə 1912-13-cü illərdə S.-Peterburqda keçirilən ikinci Ümumrusiya
kustar sərgisində nümayiş etdirilmişdir.
Azərbaycan xalçaları 1862-ci və 1913-cü illərdə Londonda, 1872-ci ildə Vyanada, 1911-ci ildə Turində
keçirilmiş beynəlxalq sərgilərdə nümayiş etdirilmişdir.
Çar hökuməti ölkə iqtisadiyyatındakı mühüm
əhəmiyyətini nəzərə alaraq xalçaçılığın inkişafına xüsusi maraq
göstərmişdir. 1899-cu ildə təşkil olunan Qafqaz Kustar
Komitəsi xalça sənayesinə rəhbərlik edirdi. Qubada və
İmamqulukənddə xüsusi təcrübə - nümunəvi emalatxanalar
açılmışdı. 1924-cü ildə təşkil olunan Zaqafqaziya Dövlət Ticarət
Cəmiyyəti (Zaqdövticarət) isə xalçaçılıq sənayesini gücləndirmək,
yerlərdə toxunan xalça nümunələrini dünya bazarına çıxarmaqla
məşğul idi.
1927-ci ildə Azərbaycanda "Azərsənətbirliyi" mərkəzi
yaradıldı və "Azərxalça" Birliyi də oraya daxil edildi.
Zaqdövticarət cəmiyyətinin alış-satış məntəqələri,
əsasən, Gəncə, Quba, Qazax (1926), Kürdəmir, Şamaxı və
Salyanda (1928) təşkil olundu.
1931-32-ci illərdə Şuşada, Bakıda, Gəncədə iri
həcmdə, Ağdam, Cəbrayıl, Qazax və Laçında
isə nisbətən kiçik
emalatxanalar açıldı.
1933-cü ildə Azərbaycanın ən məhsuldar xalçaçılıq
mərkəzi sayılan Qubada "Azərsənətbirliyi"nin xalça tədris
kombinatı açıldı. Bu, Azərbaycanda xalça sənətinin tərəqqisi
üçün əhəmiyyətli hadisə idi.
1954-cü ildə xalça ustaları və təlimatçıları hazırlayan iki
məktəb açıldı.
Hazırda "Azərxalça" Birliyinin
emalatxanlarında qədim xalçalara və rəssamların eskizlərinə əsasən klassik nümunələri təkrarlayan nəfis naxışlı
xalçalar toxunur. "Azərxalça" Birliyində xalça istehsalı ilə məşğul olan fabrik və kombinatlarda minlərlə xalq
sənətkarı çalışır və əvəzsiz xalça nümunələri yaradır.
Müasir dövrdə xalçaçılıq sənəti ölkənin müxtəlif tədris müəssisələrində - Azərbaycan Dövlət
Mədəniyyət və İncəsənət Universitetində, Azərbaycan Dövlət Rəssamlıq Akademiyasında və Ə.Əzimzadə adına
Rəssamlıq Məktəbində öyrədilir. AMEA-nın Memarlıq və İncəsənət İnstitutunun müvafiq şöbələrində
unudulmuş klassik kompozisiyaları bərpa etmək, yeni naxışlı və süjetli xalçalar yaratmaq sahəsində əməli və
nəzəri iş aparılır.
L.Kərimov adına Azərbaycan Xalçası və Xalq Tətbiqi Sənəti Dövlət Muzeyi bir neçə min
xalça və xalça
məmulatından ibarət kolleksiyaya malik olan nadir xəzinədir.
Azərbaycanın xalq rəssamı Lətif Kərimov xalça mədəniyyətinin mahiyyətinə güclü təsir
göstərmişdir. O, ənənəvi motivlərin traktovkasında yeniliyi ilə səciyyələnən bir sıra ornament və portret - xalça
kompozisiyaları yaratmışdır. L.Kərimovun əsərləri - "İslimi", "Xətai", "Firdovsi", "Əcəmi", "Əsrlərin nəğməsi"
xalça sənətinin
böyük həyati qüvvəsinə, onun misilsiz bədii dəyərinə parlaq sübutdur.
Azərbaycanın xalq rəssamı Kamil Əliyevin "Füzuli", "Nəsimi", "Butalı", "Ləçəktürünc" əsərləri parlaq
dekorativliyi, ənənələrin və novatorluğun çulğaşması ilə fərqlənən ornamental kompozisiyalardan ibarətdir.