Menntamálaráðherra og samgönguráðherra annars vegar og sveitarfélögin á Norðurlandi vestra hins vegar fyrir hönd eftirtalinna sveitarfélaga á Norðurlandi vestra: Akrahrepps, Blönduósbæjar, Húnaþings vestra, Húnavatnshrepps, Höfðahrepps

Menntamálaráðherra og samgönguráðherra annars vegar og sveitarfélögin á Norðurlandi vestra hins vegar fyrir hönd eftirtalinna sveitarfélaga á Norðurlandi vestra: Akrahrepps, Blönduósbæjar, Húnaþings vestra, Húnavatnshrepps, Höfðahrepps, Skagabyggðar og Sveitarfélagsins Skagafjarðar, gera með sér svofelldan

S A M N I N G
um samstarf ríkis og sveitarfélaga á Norðurlandi vestra um menningarmál.

1. gr.

Markmið
Tilgangur samningsins er að efla menningarstarf á Norðurlandi vestra og beina stuðningi ríkis og sveitarfélaga á Norðurlandi vestra við slíkt starf í einn farveg. Jafnframt er með samningi þessum stefnt að því að tryggja sem best frumkvæði og áhrif sveitarfélaganna við forgangsröðun verkefna og auka samstarf þeirra við framkvæmd og stefnumótun menningarmála í landshlutanum.

2. gr.
Menningarráð Norðurlands vestra

Menningarráð Norðurlands vestra er samstarfsvettvangur sveitarfélaga á Norðurlandi vestra fyrir menningarmál og hefur meðal annars það hlutverk að samræma aðgerðir á sviði menningarmála á starfssvæði sínu, að standa fyrir öflugu þróunarstarfi í menningarmálum, úthluta fjármagni til menningarverkefna á Norðurlandi vestra samkvæmt ákvæðum samningsins og hafa eftirlit með framkvæmd hans.
Starfssvæði Menningarráðsins nær yfir öll sveitarfélög á Norðurlandi vestra. Í samtökum sveitarfélaga á Norðurlandi vestra (SSNV) eru eftirtalin sveitarfélög: Akrahreppur, Blönduósbær, Húnaþing vestra, Húnavatnshreppur, Höfðahreppur, Skagabyggð og Sveitarfélagið Skagafjörður.
Menningarráð Norðurlands vestra er skipað fimm fulltrúum og skulu fjórir þeirra kosnir á ársþingi SSNV samkvæmt samþykktum Menningarráðs Norðurlands vestra. Fimmti fulltrúinn í menningarráði skal skipaður af stjórn SSNV.
Kostnaður við starfsemi ráðsins, m.a. vegna aðstöðu og starfsmanns, skal greiddur af því fé sem veitt er til að efna samning þennan og með beinum framlögum sveitarfélaganna á svæðinu.

3. gr.

Ríkisframlag til menningarmála
Stuðningur ríkisins, f.h. ríkissjóðs við menningarstarf og samstarf sveitarfélaga á Norðurlandi vestra samkvæmt samningi þessum er tvíþættur:

a. Veitt er fé til einstakra verkefna.

b. Veitt er mótframlag til reksturs Menningarráðsins.

Menntamálaráðuneyti og samgönguráðuneyti beita sér fyrir því að framlög ríkisins verði að lágmarki sem hér segir:

a. Árið 2007 30 millj. kr.

b. Árið 2008 32 millj. kr.

c. Árið 2009 33 millj. kr.
Fjárveitingar eru með fyrirvara um samþykki Alþingis.
Greiðslur samkvæmt þessari grein taka hvorki til greiðslna til byggðasafna, náttúruminjasafna eða listasafna á grundvelli safnalaga nr. 106/2001 né til héraðsskjalasafna á grundvelli laga um Þjóðskjalasafn Íslands nr. 66/1985 með síðari breytingum. Samningur þessi nær ekki til annarra framlaga ríkisins á fjárlögum, en birta skal yfirlit yfir framlög til þeirrar starfsemi í fylgiskjali með samningnum. Framlög til stofnstyrkja eru ekki hluti af samningi þessum og skal um slíka styrki semja sérstaklega milli aðila.

4. gr.

Hlutverk sveitarfélaga
Sveitarfélögin á Norðurlandi vestra beita sér fyrir því að heildarframlög þeirra til menningarmála verði að lágmarki sem hér segir:

Árið 2007 90 millj. kr.

Árið 2008 90 millj. kr.

Árið 2009 90 millj. kr.

Sveitarfélögin skulu vinna að því að auka ráðstöfunarfé Menningarráðs Norðurlands vestra hvort heldur er með framlögum frá einkaaðilum eða með eigin framlögum. Skal við það miðað að árið 2008 nemi framlag sveitarfélaganna a.m.k. 17,5 hundraðshlutum af þeirri heildarfjárhæð sem veitt er til verkefnastyrkja og 25 hundraðshlutum árið 2009.
Sveitarfélögin skulu greiða að lágmarki þriðjung kostnaðar vegna starfsemi Menningarráðs Norðurlands vestra, þ.m.t. skrifstofuhald og laun, árið 2008 og helming kostnaðar árið 2009.

5. gr.

Meðferð styrkumsókna
Menningarráðið úthlutar fjármagni til menningarverkefna á Norðurlandi vestra á grundvelli umsókna og gerir skriflega samninga um skyldur styrkhafa vegna þeirra verkefna sem hljóta styrk. Í samningum skulu koma fram markmið verkefna og hvaða mælikvarðar verða lagðir til grundvallar þegar árangur er metinn. Auglýst skal opinberlega eftir umsóknum um styrki.

Taka skal m.a. mið af eftirfarandi við afgreiðslu umsókna að:

- efla samstarf

- efla menningartengda ferðaþjónustu og styðja sérstaklega við verkefni sem laðað geta að ferðamenn

- efla starfsemi á sviði sagnahefðar

- styðja við menningarhátíðir og viðburði í því skyni að auka menningarlega fjölbreytni

- auka stuðning við menningarstarf ungs og aldraðs fólks

- stofna til samstarfs við þjóðmenningarstofnanir

- efla nýsköpun í menningartengdum verkefnum, svo og menningartengdri ferðaþjónustu

- styðja við metnaðarfulla menningarstarfsemi sem er landsvæðinu til farsældar.

6. gr.

Aðrir styrkir
Samningur þessi kemur ekki í veg fyrir að menningarstofnanir, félög og einstaklingar sem njóta styrkja á grundvelli þessa samnings sæki um styrki til opinberra sjóða á menningarsviðinu.

7. gr.

Skýrslur um ráðstöfun styrkja
Menningarráð Norðurlands vestra skal í febrúarmánuði ár hvert senda menntamálaráðuneyti skýrslu um framkvæmd samningsins þar sem m.a. er gerð grein fyrir skiptingu framlaga samkvæmt samningi þessum, hvernig sveitarfélögin hafi staðið við skuldbindingar sínar gagnvart samningnum, ásamt því sem árangur verkefna sem hlutu styrk er metinn.

8. gr.

Uppsögn og endurskoðun
Telji annar samningsaðili að hinn uppfylli ekki samningsbundnar skyldur sínar getur hann gert skriflega kröfu um að úr því verði bætt innan hóflegs frests. Sé ekki bætt úr annmörkum á framkvæmd samningsins getur samningsaðili sagt samningnum upp með 6 mánaða fyrirvara.

Samningsaðilar geta óskað eftir endurskoðun á einstökum ákvæðum samnings þessa á samningstímabilinu, ef sérstakt tilefni gefst.

9. gr.

Gildistími

Samningur þessi tekur gildi við undirritun og gildir til ársloka 2009. Heimilt er samningsaðilum að framlengja samninginn um tvö ár að loknu árangursmati sem fram skal fara vorið 2009. Matið skal framkvæmt af aðila sem samningsaðilar koma sér sameiginlega um.

10. gr.

Lögsaga
Leysi samningsaðilar ekki ágreiningsmál sem rísa kann vegna samnings þessa skal það rekið fyrir Héraðsdómi Norðurlands vestra.

Samningur þessi er gerður í fjórum samhljóða eintökum og heldur hver aðili sínu eintaki.

Framangreindu til staðfestu eru undirskriftir aðila.

Staðarflöt í Hrútafirði, 1. maí 2007

F.h. menntamálaráðuneytis F.h. samgönguráðuneytis

_________________________ ____________________________

Þorgerður Katrín Gunnarsdóttir Sturla Böðvarsson

menntamálaráðherra samgönguráðherra
F.h. sveitarfélaganna á Norðurlandi vestra Staðfest af hálfu fjármálaráðuneytis

__________________________ ______________________________

Adolf H. Berndsen Árni M. Mathiesen

formaður fjármálaráðherra

Fylgiskjal með samningi þessum er:

- Stefnumótun í menningarmálum á Norðurlandi vestra.

- Drög að samstarfssamningi sveitarfélaga á Norðurlandi vestra um menningarmál.

- Framlög á fjárlögum 2007 til menningarmála á Norðurlandi vestra á liðum menntamálaráðuneytis.