1
AZƏRBAYCAN RESPUBLİKASI MƏDƏNİYYƏT VƏ
TURİZM NAZİRLİYİ
F.KÖÇƏRLİ ADINA RESPUBLİKA UŞAQ KİTABXANASI
ELMİ-METODİKA ŞÖBƏSİ.
Görkəmli yazıçı, publisist, nasir
Əli Vəliyevin anadan olmasının
110 illiyi münasibətilə
UZUN OMRÜN AKKORDLARI.
(metodiki vəsait)
BAKI-2011
2
Tərtibçidən
Əli Vəliyev yazıçıların o nəslinə mənsubdur ki, onlar inqilabdan əvvəl
zəhmətkeş xalqın ağır həyatını öz gözləri ilə görmüş, inqilabdan sonra isə
zəhmətkeşlərlə birlikdə böyük quruculuq işlərində yaxından iştirak etmişlər. Məhz
buna görə də o ilk hekayəsini çap etdirəndən sonra yazdığı əsərlərinin çoxunda
bilavasitə şahidi olduğu hadisələri, yaxından tanıdığı insanların taleyini qələmə
almışdır. Son iyirmi ildə çap etdirdiyi əsərlərdə isə tarixiliyinə, real şəxslərin
fəaliyyətinə marağı daha da güclü olmuşdur. Şahidi olduğu ictimai-siyasi hadisələri,
tərcümeyi-halı ilə bağlı olan tipik epizodları yaradıcılıq süzgəcindən keçirmək
nəticəsində ”Budağın xatirələri”(1963-64), “Bir cüt tərlan”, ”Turaclıya gedən
yol”(1962), “İşığa doğru” (1975),“Zəngəzur qartalları”(1970) və s. bu kimi əsərlər
yaratmışdır. Bu roman, povest, hekayə və oçerklərin meydana çıxmasında
müəllifin tərcümeyi-hal faktları mühüm rol oynamışdır. Bu il mədəni-maarif
müəssisələrində, məktəb və kitabxanalarda görkəmli yazıçımız Əli Vəliyevin
anadan olmasının 110 illiyi qeyd olunur. Bu münasibətlə bir neçə yubiley tədbirləri
nəzərdə tutulmuşdur və kitabxanamız da öz növbəsində kitabxanaçılara kömək
məqsədi ilə Əli Vəliyevə həsr olunmuş metodiki vəsaiti sizə təqdim edir.
Vəsait iki hissədən ibarətdir. Girişdə Əli Vəliyevin həyat və yaradıcılıq yolu
işıqlandırılmışdır. İkinci hissədə isə kitabxanalarda keçiriləcək tədbirlər haqqında
məlumat verilir.
3
I. Həyat və yaradıcılığı
Həyatda elə adamlar var ki, onların əsil müəllimi həyat özü olur. İctimai varlıq
onları bərkə-boşa salır, çətinliklərdən keçirir, sınaqlardan çıxarır. Belələri həyatı,
insanların arzu və dərdlərini dərindən bilir, xalq ruhunu incəliklərinə qədər duyub
dərk etmək iqtidarına malik olurlar. Belə adamlardan biri də Əli Vəliyevdir. O,
köhnə dünyanın əzablarını çəkmiş, gözü ilə odlar götürmüş, minlərin, milyonların
taleyinin canlı şahidi olmuş müdrik bir el ağsaqqalıdır. Onun keçdiyi həyat yolunu
hər cür tufana, çovğuna sinə gərən möhkəm, dəyanətli bir palıd ağacının ömrünə
bənzətmək olar. Bu ağacın kökləri torpağın çox-çox dərin qatlarına qədər gedib
çıxır. Zamanın heç bir qasırğası onu kökündən, xalq həyatından, torpaqdan qoparıb
sarsıda bilməmişdir.
Gözəl oçerklər, onlarca romanlar və povestlər, yüzlərlə hekayə müəllifi kimi
tanıdığımız Azərbaycan xalq yazıçısı, nasir və publisist Əli Qara oğlu Vəliyev 24
fevral 1901-ci ildə dünyaya göz açdı. Onun doğulub boy atdığı və indi hal-hazırda
Erməni tapdağı altında olan Ermənistanın Sisyan rayonunun Ağdu kəndi özünün
səfalı ab havası, diş göynədən soyuq suları, sərt sıldırım qayaları, bərəkətli taxıl
zəmiləri, biçənəkləri, şaqqaşuqla qaynayan bulaqları ilə insana cox şey aşılayır. Bu
mühit Əlı Vəliyevin uşaq təbiətinə çox böyük təsir etmiş, uşaq təbiətinə dəyanət,
sədaqət, mərdlik, düzlük, vüqar, məğlubedilməzlik kimi keyfiyyətlər aşılamışdır.
Əli Vəliyev sərtlik və möhkəmliyi dağlardan və qayalardan, zəriflik və kövrəkliyi
güllərdən, çiçəklərdən, səxavət və mehribanlığı isə buz bulaqlardan, dağların,
düzlərin təmiz havasından, çayların şırıltısından, bulaqların zümzüməsindən
almışdır.
Əli Vəliyev yaradıcılığa şeirlə başlamışdır. Güclü həyat müşahidəsini şeirə
çevirməkdə çətinlik çəkən müəllif çox çəkmədən özünün bütün fəaliyyətini nəsr və
mətbuatla bağlayır. Bu sahədə yazıçı qeydindən, oçerk və publisistikadan məktub
formasından tutmuş, nəsrin roman və povest kimi iri janrlarına qədər elə bir
sahəsini tapmaq olmaz ki, Əli Vəliyev orada öz qələmini sınamamış olsun.
Əli Vəliyevin ilk ədəbi yazısı 1924-cü ildə, “Nənəmin cəhrəsi” adlı ilk
hekayələr kitabı 1930-cu ildə çap edilmişdir. “Qəhrəman” (1941) romanında
insanların yeni həyat uğrunda mübarizəsindən bəhs olunmuş, “Cəbhə hekayələri”
(1942), “Sovqat” (1944) kitabları Böyük Vətən müharibəsi döyüşçülərinin
qəhrəmanlığına, zəhmətkeşlərin fədakar əməyinə həsr edilmişdir. Müharibədən
sonrakı yaradıcılığında kənd mövzusu əsas yer tutmuşdur. “Gülşən” (1948),
“Çiçəkli” (1950), “Ürək dostları” (1956), “Jurnalist kəndə gəlir” (1963),
“Təzəgülün mərifəti” (1965), “Narahat adam” (1966), “Sənət eşqi” (1973), “İşığa
doğru” (1975) kimi povest və romanlarında kolxoz kəndinin həyatı, onun yüksəlişi,
yeni ictimai-əxlaqi münasibətlərin formalaşması əks etdirilmiş, köhnəliyə qarşı
barışmaz mübarizə aparan, yüksək mənəvi keyfiyyətlərə malik müasirlərimizin
dolğun bədii surətləri yaradılmışdır. “Turaclıya gedən yol”(1962) və qismən
avtobioqrafik yazı olan “Budağın xatirələri” (1963-64), “Qarabağda qalan izlər”
(1976) romanlarında bəy və mülkədarların özbaşınalığı, zəhmətkeşlərin hakimiyyət
4
uğrunda mübarizəsi, yeni həyat quruculuğu təsvir olunmuşdur. Əli Vəliyev həm də
görkəmli jurnalist və publisistdir. “Zəngəzur qartalları” (1970), Əmək Qəhrəmanı
adına layiq görülmüş azərbaycanlı qadınlara həsr olunmuş “Durna qatarı” (1972)
oçerki çap edilmişdir. Əli Vəliyev uşaqları da unutmamış, onlar üçün
də ”Ərköyün”, (1944) “Madarın dastanı”, (1955) “Uşaqlara sovqat”, (1962), “Əziz
nəvələrimə” (1964) adlı əsərlər yazmışdır. Sadəlik, təbiilik Əli Vəliyevin bədii
üslubunun əsas xüsusiyyətlərindən biri kimi özünü göstərmişdir. Onun əsərləri
başqa xalqların dillərinə də tərcümə edilmişdir.
Əli Vəliyevin uşaqlığı və gəncliyi çox faciəli olmuşdur. O, doğma adamlarının
hamısını faciəli surətdə itirmiş, atası, anası, üç bacısı və bacısı uşaqları öz gözləri
qarşısında xəstəlikdən, ya da acından ölmüşlər. Ac-susuz, evsiz-eşiksiz və paltarsız
özgə qapılarında qalan 18 yaşlı gənc tamamilə ümidsiz qalır. Yazıçı sənədli
əsərlərinin hamısında bu illəri xatırladır. Onun “Budağın xatirələri” romanının
birinci kitabında, “Turaclıya gedən yol”, “Qarabağda qalan izlər” romanlarında,
“Sənət eşqi”, “Qohumlar” povestlərində, “Durna qatarı”ndakı bir sıra oçerklərində
qaçqınlıq illərinin acınacaqlı real səhnələrlə təsvir edilmişdir.
Xalq yazıçısı, tanınmış nasir, publisist Əli Vəliyev keşməkeşli əsrimizin ilk
burulğanlı ilində gözünü dünyaya açmış, həyatın hər üzünü görə-görə mənsub
olduğu xalqın səksən illik tarixinin fəal iştirakçısına, bu tarixin bədii salnaməçisinə
çevrilmişdir. Qələmi nəsrin bütün janrlarında sınaqdan çıxmış ədibin əsərlərindəki
xəlqi keyfiyyətlər onun təkrarsız şəxsiyyətilə bilavasitə bağlıdır. Əli Vəliyevin
yaradıcılığı üçün səciyyəvi cəhətlərdən birincisi həyatilik, xəlqilik, bütün kökləri
ilə, bütün varlığı ilə xalqa bağlılıqdır. Uydurma, quraşdırma hadisələr, qeyri-adi
əhvalatlar, kitablardan, filimlərdən obrazlar sənətkarın yaradıcılığına yaddır. O,
ancaq gördüklərini, duyduqlarını, şahidi olduqlarını yazırdı. Bu söhbətlər o qədər
şirin, o qədər inandırıcı, o qədər səmimidir ki, oxucunu qətiyyən yormur, onu real
hadisələrin, olmuş əhvalatların coşğun axarına alıb aparır... Ədəbi-bədii və ictimai
fəaliyyətində xalq həyatının problemlərinə həmişə vətəndaşlıq mövqeyindən cürətlə
müdaxilə edən sənətkarın yeri cəmiyyətin bugünkü yenidənqurma və aşkarlıq
mərhələsində daha çox görünür.
Əli Vəliyev haqqında indiyədək çox yazılsa da, onun həyatı və yaradıcılığı
barədə nisbətən tam təsəvvür oyadan bir əsər, vəsait əldə yoxdur. Halbuki yoxsullar,
savadsızlar mühitindən, muzdurluqdan xalq yazıçısı zirvəsinədək gəlib çıxan bir
şəxsin keçdiyi mərhələ ümumən cəmiyyətdə unikal hadisələr və yaxın tariximizin
canlı səhifələri qədər əhəmiyyətlidir. O, mənalı həyatının çoxunu ədəbi yaradıcılığa
həsr etmişdir.
Görkəmli nasir uşaq və gənclərin sevimli yazıçısı, publisist bir çox əsərlər
müəllifi Əli Qara oğlu Vəliyev
1983-cü ildə Bakı şəhərində yaxınlarının
əhatəsində həyatla vidalaşmışdır. Ondan bizə yadigar qalan onun ölməz əsərləri,
romanları, povestləri, oçerkləri və hekayələri olmuşdur.
5
II.
Keçiriləcək yubiley tədbirləri
Bu il respublikamızın ədəbi ictimaiyyəti xalq yazıçısı, ölməz sənətkarımız,
sevimli yazıçımız Əli Vəliyevin 110 illik yubileyini qeyd edir. Bu əlamətdar gün
münasibətilə kitabxanalarda çoxlu yaddaqalan tədbirlər keçiriləcəkdir.
Uşaq kitabxanalarında da Əli Vəliyevin roman və povestlərinin təbliği və
yazıçını oxuculara daha dərindən sevdirmək məqsədi ilə bir-birindən maraqlı
tədbirlər keçirmək olar. Kitab sərgiləri, kitab icmalları, kitab müzakirələri, ədəbi-
bədii gecələr təşkil etmək də məqsədəuyğun sayıla bilər.
Yubiley ilə bağlı kitabxanalarda ilk öncə sərgilər tərtib etmək lazımdır.
Sərgidə yazıçının foto şəkillərindən, əsərlərindən, şeirlərindən parçalar, yazıçı
haqqında deyilən sitatlar yerləşdirmək olar. Sərgi müxtəlif başlıqlar altında düzələ
bilər. Məsələn: “Əli Vəliyev-110”, “Uzun ömrün yolları”, “Oxucuların sevimli
yazıçısı”, “Sözü bir, üzü bir yazıçı”, “Unudulmayan insan”, “Etibarlı dost”, “El
ağsaqqalı”, “Sevimli ədibimiz”, “Sənətkar bütövlüyü”, “Yazıçı şəxsiyyəti ilə bədii
obrazların qovuşuğu”,”Silsilə romanlar müəllifi” və s. İndi isə sərginin nümunəsini
veririk:
1.Başlıq : Əli Vəliyev -110.
2.Əli Vəliyevin həyatı haqqında.
3.Sitatlar.
4.Dövrü mətbuatda çap olunan məqalələrin kartotekası.
5.Kitabların nümayişi.
6.Əsərlərindən parçalar.
Sərgidə istifadə etmək üçün aşağıda qeyd olunmuş sitatları veririk:
SİTATlAR:
“Əli Qara oğlu uzun illərdən bəri bir əlində qələm tutmuş, gözəl, səmimi,
dolğun mündəricəli əsərlər yaratmış, bir əli ilə də ədəbiyyata yeni gələn gənclərin
qolundan tutub qaldırmışdır”.
Qasım Qasımzadə
Şair, tənqidçi
“Əli haqqında danışmaq həyatın dibindən dırmana-dırmana qalxan bir
bahadır haqqında danışmaq deməkdir”.
Məmməd Rahim
Xalq şairi
6
“Əli Vəliyevi hamının dadına çatan “təcili yardım” adlandırmaq olar”.
Qulu Xəlilov
Professor
Kitabxanalarda Əli Vəliyev əsərlərinin təbliği münasibəti ilə I-IV sinif
şagirdləri ilə birlikdə müəllifin “Madarın dastanı” əsərini səhnələşdirilmiş
formasını vermək olar. “Madarın dastanı” hekayəsi nağıl əsasında işlənmış ən yaxşı
hekayələrdən biridir. Təsirli, inandırıcı bədii lövhələrin zəngin xalq dili ilə ifadəsi
ziddiyyətli, dramatik vəziyyətlər əsəri oxunaqlı etmişdir. Burada müəllif xalqın
istiqlaliyyət arzuları azad və qarşılıqlı məhəbbətini tərənnüm etmişdir. Hekayənin
qəhrəmanı ata-ananın yeganə övladı olan Madardır. Naxırçı Közərmişin “gözünün
ağı-qarası bircə evladı olan” Madar bir sıra gözəl müsbət xasiyyətləri ilə diqqəti
cəlb edir. İradə onu tay-tuşlarından, əsərin digər personajlarından fərqləndirən ən
böyük keyfiyyəti olmuşdur. Əsərin cox qısa və aydın sujetində qəhrəmanın qayə və
məqsədləri aydınlaşmışdır. Bunu nəzərə alaraq, kiçik yaşlı oxucular arasında bu
nağıl əsasında səhərcik hazırlamaq daha maraqlı olar. Səhərcikdən bir nümunəni
təqdim edirik.
(Səhnə qurulur. Səhnədə padşah və vəzir görünür. Səhərciyi aparıcı səsləndirir).
Aparıcı:
Madar ata-anasına padşahın qızına vurulduğunu söyləyir və
onlara padşahın qızına elçi getməklərini təkid edir. Ata-anası
əllərini qoyunlarına goyub ona yalvarırlar ki, bu sevdadan əl
çəksin. Ancaq onların yalvarışları heç bir nəticə vermir. Axırı
əlacsız qalıb padşahın qapısına elçi göndərməyi qərara alırlar.
Oymağın ağsaqqallarına yalvarıb-yaxardılar. Əvvəlcə rədd
etdilər, sonra “elçiyə zaval yoxdur” deyib, razılıq verdilər.
Adətə uyğun olaraq gedib “elçi daşının” üstündə oturdular.
Padşaha xəbər çatdı ki, naxırçı Közərmişin oğlu sənin qızın
Laləyə elçi düşüb. Padşah qəzəbindən bığlarını çeynədi. Nə ca-
vab verəcəyini bilməyib hökm etdi.
Padşah:
Közərmişi də, oğlu Madarı da dara çəkdirin.
Vəzir: Qibleyi – aləm , sizin qızınız Lalə xanım buyurmuşdur ki, atam
məni Madara verməsə özümü sağ qoymayacağam.
Aparıcı :
Padşahın sifəti ağappaq oldu. Yaşı altmışdan keçməsinə
baxmayaraq, axırıncı arvaddan bir qızı olmuşdu. O, qızının
xətrini dünyalar qədər istəyirdi. Dərhal bir az qabaq verdiyi
hökmü dəyişdirdi. Ancaq qızının naxırçı oğluna getməsinə əsla
razı ola bilməzdi. Elə bil bu xəbərdən sonra bütün dünya uçub
padşahın başına tökülmüşdü. O, dar düşüncələr, intəhasız
fikirlər içində qərq olduğu vaxt vəzir dedi.
Vəzir:
Qibleyi – aləm sağ olsun, məhəbbətə güc ola bilməz. Siz
insanların özünə hökm edə bilərsiniz. İstədiyiniz şəxsi
istədiyiniz kimi öldürə bilərsiniz. Siz yer üzünün allahısınız.
7
Lakin insanların ürəyinə hakim ola bilməzsiniz. Ələlxüsus
məhəbbət kimi müqəddəs bir hissə. Qibleyi-aləm! Könül sevən
göyçək olar. Məhəbbət üçün böyük-kiçik, var-dövlət sədd ola
bilməz. Məhəbbətin qarşısında şah da, rəiyyət də diz çökür.
Odur ki, məsləhət bilirəm elçilərə “hə” cavabı verəsiniz.
Padşah: Vəzir, sən nə cəsarətlə başından yekə qələt eləyirsən? Sən necə
cürət edib belə təklifi fikrinə gətirirsən? Sən necə rəva görürsən
ki, mənim qızım, padşah qızı, bir naxırçı oğluna ərə getsin?
Yox, vəzir, görünür sən mənə sədaqətlə xidmət eləmirsən.
Vəzir: Əlahəzrət! Mənim sözümə qulaq asın! Siz elçilərə “hə” cavabı
verib yola salın. Sonra xəbər göndərin ki, oğlan gərək elə bir
çiçək tapıb gətirə ki, ilin heç bir fəslində solmaya. Beləliklə,
naxırçı oğlu çiçək axtarmaq üçün bütün ömrü boyu gəzər, bu
cür çiçəyi tapa bilməz. Lalə xanım bir-iki il gözlər, oğlanın
gəlmədiyini görüncə ondan soyuyar. Sonra siz onu istədiyiniz
şəxsə ərə verə bilərsiniz...
Padşah: Bir az qabaq dediklərin yadından çıxdımı? Sözlərini nə tez
unutdun? Özün deyirsən ki, könül sevən göyçək olar, məhəbbət
üçün sədd ola bilməz. Mən sənə sual verirəm, məhəbbətə vaxt,
zaman mane ola bilərmi?
Vəzir: Qibleyi- aləm! Cavanların məhəbbəti çox qaynar olduğu kimi
çox tez də sönür. Gəlin siz mənimlə razılaşın.
Aparıcı: Vəzir padşahı inandırdı. Padşah razılaşdı. Madara xəbəri
çatdırdılar.
Əli Vəliyev yaradıcılığını kiçik yaşlı oxuculara sevdirmək üçün onun şeir,
nağıl, felyeton və hekayələrini geniş təbliğ etmək lazımdır. Əgər kiçik yaşlı
oxucuların da arasında öz uşaq təxəyyülü ilə hekayə, felyeton, şer, nağıl və bayatı
yazanlar varsa kitabxanaçı onları yaxşı, hərtərəfli məlumatlandırmalıdır. Onlara
dəyərli məsləhətlər verməlidir. Bu da balaca oxuculara Əli Vəliyevi daha dərindən
öyrənməyi, sevməyi, özlərini Əli Vəliyevin yaratdığı qəhrəmanlara oxşatmağa,
onlarda vətənə sevgi, torpağa məhəbbət hissi aşılamağa kömək etmiş olar.
Kitabxanada keçirilən maraqlı tədbirlərdən biri icmaldır. İcmalın keçirilməsi
üçün kitabxanaçının üzərinə çox böyük məsuliyyət düşür. Kitabxanaçı ən əvvəlcə
yazıçının həyat və yaradıcılığı, onun əsərləri ilə tam tanış olmalı, əsər haqqında
oxuculara necə məlumat verməli olduğunu tam dəqiqləşdirməlidir. Bu məqsədlə
biz sizə Əli Vəliyevin 1979-ci ildə “Gənclik” nəşriyyatı tərəfindən çap olunmuş
“Qənirsiz gözəl”, “Budağın xatirələri” (1963-64) əsərini təqdim edirik ki, bu
kitaba xalq yazıçısı Əli Vəliyevin üç povesti bir neçə hekayəsi daxil edilmişdir.
Əli Vəlivevin “Budağın xatirələri” (1963-64) romanı oxucular üçün daha da
maraqlıdır.
Bu romanın icmalını və yaxud da IX-X-cu sinif şagirdləri ilə birlikdə
müzakirəsini də keçirmək məqsədəuyğundur. Bunun üçün kitabxanaçı romanı
oxuculara tövsiyə etməli, əsəri oxumağa onlarda maraq yaratmalıdır. Əsərin ən çox
tərbiyəvi cəhətlərindən oxuculara bəhs etməlidir.
Təsadüfi deyildir ki, müəllif,
avtobioqrafik romanı olan “Budağın xatirələri” romanını Vüqarlı kəndinin təsviri ilə
8
başlayır. Bu təsvirlərdə yazıçının doğma torpağa böyük məhəbbətlə döyünən
ürəyinin çırpıntıları eşidilməkdədir: “Kəndimiz Salvartı dağının ətəyindədir. Dağın
başından qoç daşın üstünə çıxıb kəndə baxanda iftixarımdan sinəm qabardı. Yaxşı
ki, buranın adını Vüqarlı qoyublar. Doğrudan da, adına layiq kənddir. Kənddə
cavanlar var ki, qaçarağına köhlən at çatmır. Qızlar var ki, tər qönçə misalındadır,
sifətinə baxmaq olmur, gəlinlər var ki, yenicə açılmış gülə oxşayır, deyirsən bəs
qüdrətın qələmi ilə çəkilib. Qadınlar var ki, elə bil həşəmlənmiş qızılgüldür,
yanağına baxdıqca baxmaq istəyirsən. Kişilər var ki, danışanda ağzından məna,
mərifət, qabiliyyət tökülür. Vüqarlının dünyagörmüş qocalarının sinəsi dastanla
doludur. Ağbirçək qarılar o qədər nağıl bilirlər ki, ilin üç yüz altmış beş günü
danışsalar yenə də qurtarmaz”.
Yazıçının yaradıcılığının təbliğində kitabxanalarda ədəbi-bədii gecələrin
keçirilməsi də münasib sayılır. Ədəbi-bədii gecənin ssenarisini sizə təqdim edirik:
I Aparıcı : Əziz balalar, Azərbaycanın xalq yazıçısı Əli Vəliyev
yaşasaydı, indi onun 110 yaşı tamam olacaqdı. Bu görkəmli
yazıçı çoxlu hekayələrin, oçerklərin, romanların, povestlərin
müəllifi kimi tanınıb, sevilib. Xalq ədəbiyyatını çox gözəl bilən
Əli müəllim uşaqlar üçün də gözəl hekayələr, nağıllar yazırdı.
II Aparıcı:
Əli Vəliyev Azərbaycan
ədəbiyyatnın görkəmli
nümayəndələrindən olmuşdur. Əli Vəliyevin poman və
povestləri, həmçinin maraqlı hekayələri oxucu kütləsinin
hörmətini qazanmışdır. Əli Vəliyev eyni zamanda zəngin
təcrübəyə malik mətbuat işçisi olmuşdur. Onun jurnalist
publisist irsi çoxillik fəaliyyətinin mühüm hissəsini təşkil edir
və bunları öyrənmədən yazıçının yaradıçılığı barədə tam
təsəvvür əldə etmək olmaz. Əli Vəliyev Azərbaycan fəhlə-
kəndli müxbirləri hərəkatının fəal nümayəndələrindən biri kimi
tanınmışdır.
I Aparıcı : Əli Vəliyev Azərbaycan təbiətinin, folklorunun çox gözəl
bilicisi idi. Onun bir çox əsərlərində, xüsusən uşaqlar üçün
yazılan hekayələrində bu gün bizim məktəblilərimiz, xalqımız
üçün hava və su kimi lazım olan Vətən sevgisi, yurda, ocağa
bağlılıq hissi var. Bu xüsusda onun Şuşaya həsr etdiyi “Qənirsiz
gözəl” hekayəsini xatırlatmaq istəyirəm. Olmazmı ki, Şuşanın
bu gün bizim üçün əlçatmaz olduğu bir vaxtda bu əvəzsiz
torpağın hər qarışı, hər daşı, hər çiçəyi, əvəzsiz insanları haqda
çox ətraflı məlumat verən bu vətənsevər, xalqsevər yazıçı hər
vaxt yad edilsin. Mən inanıram ki, Şüşanı bir dəfə də olsun
görməyən uşaqların heç olmasa, yarısının ürəyində bu gözəllik
yurdunu azad etmək hissi baş qaldıracaq.
II Aparıcı: Müasirlik
Əli Vəliyev yaradıcılığının ümdə xüsusiyyətidir.
Ədibin kiçik hekayələrindən tutmuş iri romanlarına qədər
bütün əsərlərində bu keyfiyyəti görürük. Məsələn: ən kiçik
hekayələrindən olan “Atlı qadın” hekayəsində (1943) xalqın
9
igid qızı Həcərin bədii surəti kiçik bir təfərrüatın köməyi ilə
ustalıqla müəyyənləşdirilmişdir. Ədəbiyyatşünas Kamran
Məmmədov bu hekayəni “bədii təfəkkürün ən yaxşı
məhsullarından biri” adlandırmışdır. Böyük Vətən
müharibəsinin qızğın dövründə yazılmış bu əsərlə yazıçı öz
oxucularını mərdliyə və qəhrəmanlığa, Həcərin adı ilə bağlı
ənənələri davam etdirməyə çağırır, hünərvərliyin, ölməzliyin
ideyasını təsbit edirdi. Əli Vəliyevin oçerk, hekayə, povest və
romanları Azərbaycan nəsrində müasirlik ruhunun aparıcı
keyfiyyət olduğunu göstərmək üçün tutarlı material verir.
I Aparıcı:
Əli Vəliyevin ilk iri həcmli əsəri “Qəhrəman”(1937) təkamül
nəticəsində meydana gəlmişdir. Müasirlik ruhu güclü olan ilk
Azərbaycan romanlarındandır. ”Qəhrəman” romanında Əli
Vəliyev bu dövrə qədər yazdığı hekayələrdə təsvir etdiyi kəndin
ayrı-ayrı problemlərini ümumiləşdirir, vahid axara salır, epik
genişliyə çıxarır, dövrün, zamanın inqilabi ziddiyyətlərini,
vuruşlarını ön plana çəkir, kənddə üz-üzə gələn ölüm-dirim
meydanına çıxan qüvvələri təsvir edir. Romanda 1914-cü ildən
1928-ci illərə qədər bir dövrdə Azərbaycanda baş verən bir
sıra hadisələr təsvir olunur. Müəllif cəmiyyətin inkişafınin
müəyyən mərhələsində vacib və əhəmiyyətli hadisələri isti-isti
həqiqi sənətkar gözü ilə seçib ayırmış, sənətin gücü ilə öz
müasirlərinə həmin hadisələrin iştirakçılarına çatdırmış, onları
düşündürən suallara cavab vermişdir. Roman işıqlı gələcək
uğrunda, insanların səadəti naminə mübarizə aparan 30-cu illər
həyatını inandırıcı əks etdirmişdir.
II Aparıcı:
Əli Vəliyevin “Çiçəkli” (1952), “Gülşən” (1953), “Ürək
dostları” (1956), “Təzəgül” (1965), “Narahat adam” (1966),
“Zamanın ulduzları” (1954) kimi iri həcmli əsərləri kənddə
gedən quruculuq işlərinin, dinamik inkişafın bədii salnaməsidir.
Müasir Azərbaycan kəndinin həyatını və xalq dilinin koloritini
nəsrimizə gətirən Əli Vəliyev bu kimi romanlar yaradaraq
oxucuların rəğbətini qazanmışdır. Əli Vəliyevin vaxtında
qələmə alınmış “Zəngəzur qartalları” əsəri indi artıq itirilmiş
torpaqlarımız haqqında əlimizdə olan canlı tarixi sənədə
çevrilmişdir.
I Aparıcı:
Əli Vəliyev öz publisist yazılarında yeni cəmiyyətin
üstünlüklərini göstərmək və yeni həyatı tərənnüm etməklə
bərabər, köhnəliyi, onun mənfur qalıqlarını kəsərli qələmlə
tənqid edirdi. Ədib habelə o dövrdə “Gənc işçi” qəzetində
ictimai-siyasi həyatın müxtəlif sahələrinə aid bir sira məqaləlar
çap etdirmişdir.ƏliVəliyev 1924-cü ildə Qala-Maştağa
qəzasında mövhumat əleyhinə bir neçə məqalə yazmış, onun
qələmə aldığı “Allahın səyahəti” adlı felyeton dini fanatizm
10
qalıqları ilə kəskin mübarizəyə yönəldilib. O, Bakı kəndlərinin
bəzilərində kəmsavad mollaların, fırıldaqçıların camaatı aldadıb
soymaları barədə də məqalə ilə çıxış edir. Həmin məqalə böyük
səs-küyə, geniş müzakirə və mübahisələrə səbəb olmuşdur.
II Aparıcı:
Əziz uşaqlar, ümid edirəm ki, bu gündən etibarən hamınız
bütün yazıçıların əsərlərini,həmçinin çap edilən qəzet və
jurnalları müntəzəm oxuyacaqsınız. İnsanın insan kimi
yetişməsində, onun ağıllı, savadlı olmasında, dünyagörüşünün
genişlənməsində, kamilləşməsində bədii sözün qüdrəti
böyükdür. Sizə söylədiyim bu tövsiyələrdən sonra əminəm ki,
hər biriniz Əli Vəliyev haqqında məlumatınızı artırmağa səy
göstərəcəksiniz.
S O N
11
ƏDƏBİYYAT SİYAHISI
Əsərləri :
1.Vəliyev Ə. Seçilmiş əsərləri. 2 cilddə. C II.- B.: Azərnəşr, 1960.- 563s.
2.Vəliyev Ə. Əsərləri. 6 cildə. C I.- B.: Azərnəşr, 1968.- 475s.
3.Vəliyev Ə. Əsərləri. 6 cildə. C IV.- B.: Azərnəşr, 1970.- 478s.
4.Vəliyev Ə. Əsərləri. 6 cildə. C V.- B.: Azərnəşr, 1970.- 538s.
5.Vəliyev Ə. Əsərləri. 6 cildə. C VI.- B.: Azərnəşr, 1971.- 471s.
6.Vəliyev Ə.Anaqız.- B.: Azərnəşr, 1965.- 335s.
7. Vəliyev Ə. Bir cüt ulduz : Eyvazın yazısı: Hekayələr//Azərbaycan uşaq
ədəbiyyatı antologiyası. 3 cilddə. C III.- B.: Öndər, 2005.- s.182.-190.
8.Vəliyev Ə. Budağın xatirələri. Birinci kitab.- B.:Azərnəşr, 1974.- 646s.
9.Vəliyev Ə. Budağın xatirələri. İkinci kitab.- B.: Azərnəşr, 1964.- 510s.
10.Vəliyev Ə. Durna qatarı.- B.: Gənclik, 1972.- 541s.
11.Vəliyev Ə. Qarabağda qalan izlər.- B.: Gənclik, 1977.- 532 s.
12.Vəliyev Ə. Qəhrəman.- B.: Gənclik, 1983.- 320s.
13.Vəliyev Ə. Qənirsiz gözəl.- B.: Gənclik, 1979.- 326s.
14.Vəliyev Ə. Madarın dastanı.- B.: Gənclik, 1988.- 40s.
15.Vəliyev Ə. Nənəmin cəhrəsi : Atlı qadın : Hekayələr // Azərbaycan nəşri
antologiyası. 5 cilddə.C.III.- B.: Şərq- Qərb, 2006.- s.168.-179.
16.Vəliyev Ə. Samovar tüstülənir.- B.: Gənclik, 1971.- 269s.
17.Vəliyev Ə. Yadda qalan xatirələr.- B.: Azərbaycan tərcümə mərkəzi, 1996.-
240s.
18.Vəliyev Ə. Yeni həyat.- B.: Gənclik, 1975.- 208s.
19.Vəliyev Ə. Zamanın ulduzları: Povestlər və hekayələr.- B.: Azərnəşr, 1976.-
455s.
Haqqında:
1.Əlioğlu M. Nəsrimizdə qadın azadlığı problemi : 30-cu illər // Darıxan
adamlar. 2 ciliddə. I c.- B.: Təhsil, 2009.- s.367-380.
2.Əlioğlu M. Atalar və oğullar : klassik dramaturgiyaya baxış // Darıxan
adamlar. 2 cilddə. I c.- B.: Təhsil, 2009.- s.535-772.
3.Xəlilzadə F. Silsilə romanlar müəllifi : Əli Vəliyev haqqında // Mədəniyyət .-
2010.- 15 dekabr.- № 88.- S.13.
4.Qasımov İ. Əli Vəliyev.- B.: Yazıçı.- 1987.- 130s.
5.Rəhimov S.Qırılmayan tellərr.- “Azərbaycan” jurnalı, 1971.- № 2.- s.134
7.Rəhimov S.Qırılmayan tellər. “Azərbaycan” jurnalı, 1971.- № 5.s.117.
8.Vəliyev Ə.Yadda qalan xatirələr. Əli Vəliyev haqqında xatirələr.- B.:Azərbaycan
Tərcümə Mərkəzi, 1996.- 240s.
12
Tərtib edən:Yasəmən İsmayılova- F.Köçərli adına Respublika Uşaq
Kitabxanasının elmi katibi.
Redaktor: Fizurə Quliyeva-F.Köçərli adına Respublika Uşaq
Kitabxanasının direktoru
Dostları ilə paylaş: |