9
başa çatdırması, ABŞ rəsmilərinin Sovet təhdidi ilə üzləşmiş ölkələrin
düşdüyü
vəziyyətdən yararlanaraq Yaxın Şərqdə və Aralıq dənizi rayonunda
möhkəmlənmək cəhdləri arxiv sənədlərindən hiss edilməkdədir.
Yeni açıqlanan arxiv materiallarının araşdırılması Ermənistan və Gürcüstan
Sovet respublikalarının Türkiyəyə qarşı ərazi tələblərinin irəli sürülməsində və
"əsaslandırılmasında" aktiv iştirakını təsdiq edir. Lakin bu iştirak həmin
respublikaların özlərinin təşəbbüsü ilə deyil, bilavasitə Moskvanın və bəzi hallarda
isə İ.Stalinin şəxsi göstərişlərinin nəticəsi kimi meydana çıxırdı. Bir qayda olaraq
belə göstərişlər həmin dövrdə tərtib olunmuş sənədlərdə öz əksini tapmışdır.
Türkiyə ilə eyni vaxtda Ermənistan və Gürcüstan Sovet respublikalarının
qonşu Azərbaycan SSR-ə qarşı ərazi iddiaları irəli sürməsi əsəb müharibəsinin
Güney Qafqaz regionuna yayılması ilə müşayiət olunan ağrılı bir səhifəsi idi.
Bilavasitə mərkəzdən qızışdırılan millətçilik, Stalin intriqalarının cazibə
mərkəzinə çevrilən Güney Qafqazda min illər boyu yaşamış türk əhalisinin öz
doğma yurdundan deportasiya edilməsi ilə nəticələndi. İkinci Dünya
müharibəsinin sonunda Sovet-Türkiyə münasibətlərində yaranmış gərginlik
Qafqazın və Krımın türk əhalisinin taleyində faciəli rol oynadı. 1944-cü ilin
mayında Krım türklərinin sürgün edilməsi, elə həmin ilin iyulunda Gürcüstanın
cənub rayonlarından türk əhalisinin deportasiyası haqqında Dövlət Müdafiə
Komitəsinin verdiyi qərar müharibə zərurəti və hərbi əməliyyatlarla bağlı
hadisələr deyildi. Bütün bunlar artıq əlamətləri hiss edilən Türkiyəyə qarşı təzyiq
siyasətinə hazırlıq tədbirləri idi. Az sonra bu tədbirlər 100 min azərbaycanlının
Ermənistandan deportasiya edilməsi, Qara dəniz sahillərinin, Güney Qafqazın
bütövlükdə türklərdən təmizlənməsi haqqında İ.Stalinin imzaladığı qərarlarla
tamamlandı. Türkiyəyə qarşı ərazi tələblərini "əsaslandırmaq" üçün İ.Stalin
tərəfindən 1945-ci ilin yayında ortaya atılan xarici ermənilərin Sovet
Ermənistanına repatriasiyası nəzərdə tutulan funksiyanı yerinə yetirə bilmədikdə,
ölkə daxilində Güney Qafqazda əsəb savaşının növbəti dalğasını doğurdu.
Ən nəhayət, soyuq müharibənin Türkiyə böhranının araşdırması belə bir
həqiqəti ortaya qoyur ki, hər hansı dövlətin ərazi bütövlüyünün, sərhədlərinin
toxunulmazlığının, suverenliyinin və müstəqilliyinin ən böyük təminatı xalqın
iradəsi, onun xarici təhlükəyə qarşı mübarizə əzmidir. Əgər ölkənin özünümüdafiə
ruhu yoxdursa, bu halda beynəlxalq strukturların və xarici dövlətlərin köməyi elə
bir ciddi effekt verə bilməz.
Bu monoqrafiyanın hazırlanmasında Rusiyada, Türkiyədə, ABŞ-da və digər
ölkələrdə çıxan elmi ədəbiyyatın geniş dairəsindən istifadə edilmişdir. Ayrı-ayrı
hadisələrin və proseslərin izahında bir sıra müəlliflərin əsərlərinə monoqrafiyanın
fəsillərində münasibət bildirildiyindən ayrıca tarixşünaslıq icmalının verilməsinə
ehtiyac duyulmur. Lakin qısaca
10
olaraq qeyd etmək olar ki, son illərdə soyuq müharibənin Yaxın Şərq epizodları və
Türkiyə böhranı ilə bağlı Rusiyada nəşr edilmiş elmi araşdırmalarda ciddi
yeniliklər müşahidə edilməkdədir.
Eyni zamanda monoqrafiya hazırlanarkən araşdırılan dövrdə Türkiyə
Respublikasına başçılıq etmiş Mustafa Kamal Atatürkün, İ.İnönünün, C.Bayarın,
müxtəlif vaxtlarda Baş nazir, Məclis başkanı və xarici işlər naziri vəzifələrində
işləmiş R.Saydamın, Ş.Saracoğlunun, A.Rendanın, K.Karabekirin, R.Pekerin,
H.Sakanın, Ş.Günaltayın, A.Menderesin, N.Sadakın, F.Köprülünün və digərlərinin
çıxışlarına, müraciətlərinə və yazışmalarına, Türkiyə Böyük Millət Məclisinin
tutanaklarına, tanınmış türk diplomatlarının xatirələrinə, Türkiyədə nəşr olunmuş
elmi araşdırmalara və türk mətbuatının materiallarına diqqət yetirilmişdir.
Monoqrafiyanın mənbəşünaslıq bazasını son illərdə açıqlanan yeni arxiv
sənədləri təşkil edir. Problemin ayrı-ayrı tərəflərini əhatə etmək üçün öyrənilən
xronoloji çərçivə daxilində dövlət başçılarının, diplomatik idarələrin, hərbi və
xüsusi xidmət orqanlarının yazışmalarından, çıxışlarından, məktublarından, arayış
və raportlarından geniş istifadə edilmişdir. Monoqrafiya hazırlanarkən Ankaradakı
Sovet səfirliyinin SSRİ Xarici İşlər Nazirliyinə göndərdiyi bir sıra mühüm gizli
məlumatlardan və xüsusilə müntəzəm şəkildə hazırlanan aylıq mətbuat
icmalından, SSRİ Xarici İşlər Nazirliyində Türkiyə ilə bağlı hazırlanan gizli
arayışlardan, Sovet səfirliyinə Moskvadan verilən tapşırıq və tövsiyələrin
mətnlərindən, ÜİK(b)P MK-nın Siyasi Bürosunda Türkiyə ilə bağlı müzakirə
edilən sənədlərdən istifadə edilməsi Sovet-Türkiyə münasibətlərinin bir sıra
məqamlarının, soyuq müharibənin ayrı-ayrı epizodlarının dəqiqləşdirilməsinə
imkan vermişdir.
Bununla yanaşı elmi araşdırmada ABŞ-ın Yaxın Şərq siyasətini əhatə edən
xarici siyasət sənədlərinə, diplomatik yazışmalara, Dövlət Departamentinin
materiallarına, prezident H.Trümenin, öyrənilən dövrdə Dövlət katibi vəzifəsində
çalışmış C.Birnsin, C.Marşallın və D.Açesonun məktub, məqalə, müsahibə və
çıxışlarına, Ankaradakı Amerika səfirliyinin raportlarına müraciət edilmişdir.
Monoqrafiyanın hazırlanmasında Rusiya Dövlət Sosial Siyasi Tarix Arxivinin,
Rusiya Federasiyası Xarici Siyasət Arxivinin, ABŞ Milli Təhlükəsizlik Arxivinin,
Gürcüstan Prezidentinin Arxivinin, Azərbaycan Respublikası Dövlət Arxivinin,
Azərbaycan Respublikası Siyasi Partiyalar və İctimai Hərəkatlar Mərkəzi Dövlət
Arxivinin, Azərbaycan Respublikası Milli Təhlükəsizlik Nazirliyinin Arxivinin və
Ermənistan Respublikası Mərkəzi Dövlət İctimai-Siyasi Təşkilatların Sənədləri
Arxivinin materiallarından istifadə edilmişdir. Mövzu ilə bağlı zəruri olan
Ermənistan Respublikasının arxiv sənədləri ilə tanış olmağa, Rusiya
Federasiyasının bir sıra arxivlərindən toplanmış materiallardan istifadə