40
5.7 Detrwa ka konsonantik partikilie: let
“C”
, groupman konsonn dan
koumansman ek lafin sertin mo
5.7.1 Let
“C”
Kouma nou finn dir pli lao (get seksion 4.2.2), mem si let
“C” an limem pena okenn
fonksion spesifik dan Kreol Morisien, ena detrwa ka, ki fer parti nou liniver vizio-
sinbolik, kot li neseser servi li
kouma enn sign distinktif an limem. Par exanp, kan
nou pou ekrir CD (ki fode pa konfonn ek verb sede, depi Franse « céder »), VCD,
CV (ki fode pa konfonn ek seve, depi Franse « cheveux »).
5.7.2 Groupman konsonn dan koumansman sertin mo
Ena sertin mo an Kreol ki prezant dan zot koumansman, posibilite ki permet ekrir
zot swa avek enn konsonn sinp ( sikolozi ek sikiat, par exanp), swa avek enn
groupman konsonn (psikolozi ek psikiat, par exanp). Dan zot ka, nou rekomande
ki mintenir toule de e konsider enn kouma enn varyant pou lot-la. Etan done ki sa
bann mo-la servi dan bann kontext sosial bien presi e dan bann rezis plito elve,
nou propoze ki kan ekrir, konsider form long kouma referans ek form kourt kouma
varyant. Sa vedir, par exanp, ki psikolozi ek psikiat pou konsidere kouma referans,
alor ki sikolozi ek sikiat pou konsidere kouma varyant.
5.7.3 Groupman konsonn dan lafin sertin mo
Ena ousi bann mo ki prezant mem karakteristik, me dan zot lafin. Par exanp
artis(t), ki kapav ekrir avek ouswa san so
“t”
final: artist ouswa artis. Nou kapav
sit ousi bann lezot lexanp: res ouswa rest, exak ouswa exakt, tex ouswa text, etc.
Nou rekomandasion pou sa bann ka-la: dan ka kot efasman dernie son finn etabli
dan enn fason sistematik ek definitif, nou pa pou azout li, me kan so efasman pa
zeneralize dan enn fason sistematik, li preferab azout li, sirtou si zot debous lor
bann derivasion. Par exanp text donn textiel par derivasion (alor ki sex donn
sexiel), artist donn artistik, exakt donn exakteman, etc.
41
6
em
PARTI
REGLEMAN LOR LEZOT KONVANSION ORTOGRAFIK
KONSERNAN KREOL MORISIEN
(Ponktiasion, zour lasemenn, mwa dan lane, langaz, nom prop ek toponim,
itlilizasion tredinion ek apostrof, indikasion ler ek kantite, sinbol pou bann
size teknik, siantifik, etc).
Andeor bann let, ena ousi bann lezot konvansion ki konsern lekritir an Kreol e ki
merit latansion. Zot konsern: ponktiasion, lortograf pou bann zour lasemenn ek
bann mwa dan lane, lortograf pou dezign langaz, nom prop ek toponim, itlilizasion
tredinion ek apostrof, indikasion ler ek kantite, sinbol pou bann size teknik,
siantifik, etc. Nou pou prezant enn-par-enn sa bann diferan ka-la e regleman ki
akonpagn zot.
6.1 Sistem ponktiasion.
Sistem ponktiasion ki ena dan Angle ek dan Franse ena boukou pwin an komin,
me ena ousi detrwa ti diferans. Etan done pli gran difizion Angle lor plan
administratif ek ofisiel, me ousi dan sistem edikatif Moris, Grafi-larmoni ti
propoze ki Kreol Morisien align li lor sistem ponktiasion Angle. Sa prinsip-la finn
aprouve par bann manb AKM dan renion ki finn ena Mardi 21 Desam 2010.
Si nou aplik regleman-la lor diferan laspe ki konsern Lortograf Kreol Morisien, so
konsekans se ki nou bizin servi let kapital pou ekrir bann zour lasemenn, bann
mwa dan lane, nom bann langaz ek nom bann pep/kominote:
6.1.1 Zour lasemenn, mwa dan lane ek nom bann langaz
•
Zour lasemenn: Lindi, Mardi, Merkredi, Zedi, Vandredi, Samdi ek
Dimans.
•
Mwa: Zanvie, Fevriye, Mars, Avril, Me, Zien (Zin), Zilie, Out, Septam,
Oktob, Novam ek Desam.
•
Langaz: Angle, Bhojpouri, Franse, Goujrati, Hakka, Hindi, Kantone,
Kreol, Kreol Morisien, Ourdou, Mandarin, Marathi, Tamil, Telegou, etc.
•
Nom bann pep/kominote: Angle, Franse, Goujrati, Kreol, Indien, Indou,
Marathi, Mizilman, Morisien, Sinwa, Tamoul, Telegou, etc.
Atansion: kan term ki dezign enn langaz (ouswa enn pep/kominote), li enn azektif e non pa
enn nom, reg kapital pa aplike. Dan sa ka-la, bizin servi enn ti-let kouma tou lezot azektif
an Kreol. Exanp: lang kreol, liv angle, text franse, prodwi morisien, etc.
42
6.1.2 Sign ponktiasion
Pou bann sign ponktiasion, kan servi: pwin, virgil, pwin-virgil ek de-pwin, zot tou
bizin kole ek dernie let ki vinn avan kouma an Angle (an konparezon ek Franse
kot de-pwin ek pwin-virgil detase ek dernie let ki presed zot).
6.2
Tredinion.
6.2.1 Nom + artik defini
Komite Teknik pou Lortograf Kreol Morisien finn align li lor propozision Grafi-
larmoni e rekomande ki mintenir prinsip gard enn tredinion ant enn nom ek so
lartik defini “-la”, kouma li ete dan lexanp tifi-la, garson-la, ouswa papa-la inn
koz ek madam-la. Me kan lartik defini “- la” separe ek so nom par enn (ouswa enn
bann lezot) mo, nou rekomande, parey kouma Grafi-larmoni, ki pa servi tredinion.
Exanp: sa garson intelizan la, sa tifi ki finn met rob rouz la.
6.2.2
Mo-konpoze
Tredinion servi ousi dan konstriksion sertin mo konpoze: akt-dese, aryer-granper,
bien-et, demi-er, demi-frer, fouter-dezord, gardien-kanpman, gard-malad, gro-
lebra, gro-palto, koson-maron, lake-lay, lake-zwanion, lamour-prop, madam-sere.
madam-zanlwi, meter-dife, non-rezidan, nwar-fam, o-fonksioner, oter-konpoziter,
pom-zako, san-lamourprop, Sid-Afrikin, taxi-maron, taxi-trin, zozo-maniok, etc.
.
6.2.3
Prefix “ti-”, “gro-” ek “gran-”
Nou rekomande ki servi tredinion ousi dan bann mo ki konstrir ek prefix “ti-”,
“gro-” ek “gran-”.
An zeneral, sa trwa mo-la se bann azektif ki fer referans ek tay ouswa dimansion
enn kiksoz: “enn ti loto”, “enn gro loto”, “enn gran lakaz”. Me ena ka kot servi zot
avek enn sinifikasion ki diferan ek sinifikasion ki zot azektif done. Par exanp, dan
fraz: “li tom enn ti-fami ar mwa”, “ti-” pa fer referans ek tay ou dimansion me ek
distans sosial. “Ti-fami” vedir enn fami “elwagne”. Parey pou “ti-pwa” ek “gro-
pwa” kot se plito enn varyete ki pe met an evidans plito ki groser enn pwa. Dayer
nou kapav gagn bann konstriksion avek enn “gro ti-pwa” ouswa enn “ti gro-
pwa”. Donk, dan sa bann ka-la, “ti-” ek “gro-” se bann prefix et non bann azektif.
Parey kouma dan “gran-fami” ouswa “gran-nasion”, kot gran fer referans stati
sosial enn kiksoz plito ki so grander. Apartir la, regleman ortografik li koumsa:
kan “ti-”, “gro-” ek “gran-” servi kouma azektif, pena tredinion. Kan zot servi
kouma prefix, ena tredinion, sof dan detrwa ka kot finn deza ena fizion, kouma
granper ek granmer.
Dostları ilə paylaş: |