23
Səfəvi dövlətinin idarəçilik forması haqqında Tavernye ilə yanaşı,
Adam Olearinin də səyahətnaməsində geniş məlumatlar vardır.
Həm də Adam Oleari Tavernyedən fərqli olaraq dövrün qərb və
şərq qaynaqlarına mükəmməl bələd olduğuna görə Səfəvi dövlət
idarəçiliyinin qərb dövlət sistemləri ilə müqayisəli şərhini verməyə
cəhd göstərmişdir. O, yazır ki, Səfəvi dövlətinin dünyəvi idarəçiliyi-
nə gəldikdə o, Rusiyanın idarə quruluşuna olduqca uyğundur. Çünki
hər iki dövlət bu haqda bütün tarixçilərin düzgün olaraq qeyd
etdikləri kimi, monarxiya üsul-idarəsinin mövcud olduğu imperiya-
dır. Bu ölkələrdə hökmdarlar hakimiyyəti tam mənimsəyərək öz
bildikləri kimi idarə edirlər. Heç kimdən məsləhət almadan və etiraz
olmadan qanun verir və istədikdə onu ləğv edə bilirlər. Bütün
təbəələrinin mülklərini, hətta canlarını da almağa qadirdirlər. Bun-
lara baxmayaraq təbəələri kölə kimi itaət edir və hətta onların qanı
günahsız axıdılanda, qurbanlıq qoyun kimi səbirli və itaətli olurlar
(139, 834; 36, 145-147). Ancaq bu dövrdə Rusiyada zemstvo məc-
lisi adlı silki - nümayəndəli orqan vardı ki, o dövlətdə qanun-
vericilik və maliyyə nəzarəti funksiyasına malik olub, monarxın
hakimiyyətini az da olsa məhdudlaşdırırdı. E.Kempferin də yaz-
dığına görə, Səfəvi dövlətindən fərqli olaraq Rusiyada əcdadlarının
qanun-qaydalarına bağlı olan boyarlar çarın özbaşınalığının qarşı-
sını alırdı (96, 14). Adam Oleari Səfəvi dövlət idarəçiliyində ali
hakimiyyətin irsiliyi məsələsini təhlil edərkən monarxiyanın başqa
əlamətlərinə də toxunmuşdur. O, yazır ki, Səfəvi ölkəsində haki-
miyyət irsi olub, atadan onun qanuni varisinə keçir. Qanuni varis
olmadıqda cariyədən olan övlada və o da olmadıqda Şeyxavənd adı
ilə tanınan Şeyx Səfi nəslinin nümayəndələrindən biri dünyasını
dəyişən Şahın qohumu kimi hakimiyyətə gətirilə bilərdi (139, 836).
Şah sağlığında özünə varis təyin etdikdə, bu barədə rəsmi
vəsiyyətnamə (məktub) tərtib olunurdu. Ancaq onun vəfatından
sonra belə bir məktub ortaya çıxarılmadıqda taxt-taca varis məsələ-
sini ali divan üzvləri və digər mötəbər Qızılbaş əmirlərindən ibarət
genişləndirilmiş şura həll edirdi. O.Əfəndiyev qaynaq materiallarına
istinad edərək yazır ki, 1577-ci il noyabr ayının 24-də II Şah
İsmayılın vəfatından sonra əmirlər taxt-taca varis məsələsini həll
24
edərkən bir çox namizədlər irəli sürülsə də, nəhayət I Şah
Təhmasibin böyük oğlu Məhəmməd Mirzənin namizədliyi üzərində
dayanmışdılar (20, 127). Şahların tacqoyması məmləkətin böyük
əmirlərinin iştirakı ilə təntənəli bir mərasimdə icra olunurdu. Şaha
qızılla işlənmiş taxt hədiyyə edilir, hakimiyyətin simvolları olan
qılınc və xəncər onun kəmərinə bağlanılıb, başına da şahlıq tacını
qoyurlar. Bu mərasimdən sonra bütün məclis iştirakçıları növbə ilə
onun qarşısında təzim edərək ayaqlarının önündə əyilib yeri öpürlər.
Tacqoyma mərasiminin növbəti günü Şah dövlət və saray qulluq-
çuları, əyanlar, qulamlar, qorçu alayının müşaiyəti ilə şəhərə
çıxaraq şahlığını xalqa təqdim edir. Yeni Şah hakimiyyətə keçdikdə,
heç kimin təsəvvür etmədiyi yeni dəyişikliklər gözlənilir. Elə buna
görə də bütün məmurlar öz vəziyyətlərinə şübhə ilə yanaşırlar.
Dövlət qulluğunda olan hər kəs çalışır ki, Şahın məhəbbətini
qazanıb vəzifələrini, mövqelərini qoruyub saxlaya bilsinlər (96, 30,
31). Engelbert Kempferin gündəliyində II Şah Səfinin (I Şah
Süleyman) tacqoyma mərasimi haqqında ətraflı məlumat vardır.
Onun yazdığı kimi, 26 oktyabr 1666-cı ildə II Şah Abbas vəfat
etdikdə mərkəzi idarə əmirləri Ali məclisin iclasını çağırıb Həmzə
Mirzənin namizədliyini irəli sürüb II Şah Abbasın onu sağlığında
vəliəhd seçdiyini elan edirlər. Ancaq saray xacələri Şahın digər oğlu
Səfi Mirzənin namizədliyini irəli sürdükdə baş vəzir sözsüz ki,
sarayda qarşıdurmanın qarşısını almaq üçün onların qərarı ilə
razılaşır. Nəticədə ali divan üzvləri ilə birlikdə 200 nəfər mötəbər
əmir və əyanın iştirak etdiyi məclisdə tacqoyma mərasimi keçirilir.
Münəccimlər tacqoyma üçün uğurlu saatı müəyyən etdikdən sonra
şeyx ül-islam İsfahandakı digər böyük vəzifəli əyanları da məclisə
dəvət edir. Tacqoyma mərasimi şeyx ül-islamın başçılığı altında
icra olundu (96, 43-48). Engelbert Kempfer yazır ki, tacqoyma üçün
lazım olan rəmzələr ayaqları qızılla işlənmiş söykənəcəksiz
dördayaqlı səndəl, ənənəvi tac, qiymətli daşlarla bəzədilmiş əyri
qılıncdan ibarət idi. Məclisdə II Şah Abbasın Səfi Mirzənin vəliəhd
təyin etməsi barədə sağlığında yazmış olduğu «məktub» ali divan
tərəfindən şeyx ül-islama təqdim edilir və bu məktub oxunaraq elan
edilir ki, guya yeni Şah atası tərəfindən canişin seçilmişdir. Məktub
25
oxunub qurtardıqdan sonra şeyx ül-islam öz vəzifəsinə başladı.
Şeyx ül-islam əvvəl məmləkətə Allahdan bərəkət dilədikdən sonra
ölkəni layiqli Şahdan məhrum etmədiyinə görə Allaha şükür söylədi
və tacqoyma başladı. Şahın taxt-tacının möhkəmliyi üçün Qurani
Kərimdən ayələr və dualar oxudu. Şahın qılıncını sağ tərəfə çəkib,
tacı mücrüdən çıxararaq Şahın başına qoydu. Şahı şeyx ül-islam
gözəl bəzədilmiş sarayın ortasındakı qızıl taxta dəvət edərək orada
əyləşdirdi. Şeyx ül-islam özü də onunla üzbəüz oturdu. Dizi üstə
oturub Qurani Kərimdən ayələr oxumağı davam edərək nəhayət
Şaha uca səslə belə bir dua elədi: «Səfi şahlığının qüdrət və nüfuzu
xudavəndin onlara xüsusi mərhəməti olub, göy qurşağına çatar». Bu
zaman mərasim iştirakçıları əl çalaraq «inşallah» dedilər və bu yolla
öz alqış və təriflərini bəyan etdilər. Şeyx ül-islamın işi bitdikdən
sonra o taxtın qarşısında yerə əyildi. Ona görə ki, bu, ölkədə şahın
ayağı qarşısında yerə əyilmək ona ehtiram əlaməti hesab edilir.
Buradakıların hamısı onun ardınca şahın qarşısında diz üstə çökərək
torpağı öpüb sevinclərini izhar edərək onu təbrik etdilər (96, 48).
Rəsmi məclis yekunlaşdıqdan dərhal sonra yeni şahın fərmanı əsa-
sında saraya içəridən və dişarıdan mühafizəçilərin təyin olunması,
çalğıçıların Şahın yaşı qədər, yəni iyirmi gün çalıb oxumaları,
köhnə möhürün ləğvi və yeni Şahın adına möhür hazırlanması, yeni
Şahın adına sikkə zərbi qərara alındı. Dərhal qızıl sikkələr zərb
edilib Şah adından əyanlara hədiyyə edildi (96, 49). Qızıl sikkə
zərbi ənənəvi olaraq tacqoyma mərasimi üçün səciyyəvi idi, çünki
ölkədə tədavüldə, alqı-satqıda gümüş və mis sikkələrdən istifadə
edilirdi. 1694-cü ildə Şah Sultan Hüseynin tacqoyma mərasimi
zamanı İsfahanda olan Cemelli Kareri də yazır ki, Səfəvi ölkəsində
sikkə qızıl və gümüşdəndir. Qızıl sikkə ancaq tacqoyma mərasim-
lərində saray əyanlarına hədiyyə edilmək üçün zərb edilir (89, 8).
Engelbert Kempfer Həmzə Mirzə ilə Səfi Mirzənin namizəd-
liyi məsələsində əmirlərlə xacələr arasındakı kiçik münaqişənin
təhlilindən aydın olur ki, mirzələrdən heç birinin vəliəhd olması
barədə ataları II Şah Abbas tərəfindən, yaxud onun vəsiyyəti
əsasında məktub tərtib olunmamış, hər iki Mirzə haqqında məktub
sonradan, yəni Şahın vəfatından sonra yazılmışdır.
Dostları ilə paylaş: |