NəSİb nəSİBLİ İslam cümhuriYYƏTİ DÖVLƏTİ VƏ azərbaycan türklüYÜ 1 Yenə inqilab, yenə pərişanlıq



Yüklə 326,36 Kb.
səhifə3/3
tarix26.01.2018
ölçüsü326,36 Kb.
#22608
1   2   3

Həxaməniş dövləti haqqında ən yayğın qaynaqlardan biri olan Herodotun “Tarix” kitabındakı məlumatların düzlüyünə da Nasir Purpirar skeptik yanaşır. Heç vaxt bu coğrafiyaya səyahət etməmiş, əsərində bölgənin coğrafiyası və hadisələrin xronologiyası barədə kobud yanlışlıqlara yol vermiş, əsərini ağılalmaz əfsanə və nağıllarla bəzəmiş Herodotun Həxaməniş şahlarını vəsf etməsi suallar doğurur. Nədən Yunan cəmiyyəti Parsları “barbar” adlandırdıqları bir zamanda “Tarixin atası” onları göylərə qaldırır? Ən önəmli sual – nədən Herodotun buradakı prosesləri izahı ilə Həxaməniş şahlarının baxışı tamamilə üst-üstə düşür? Purpirar bu sualların cavabını Herodotun özünün etirafında axtarmağı təklif edir. Herodot etiraf edir ki, Həxamənişlər haqqında bilgiləri Pars sarayının müşavirlərinin dilindən eşidib. Odur ki, Purpirara görə, “Herodotun yararlandığı qaynaq bir Həxaməniş sarayının mənsubudursa, Həxamənişləri araşdırmaq üçün onun tarixini mötəbər sənəd kimi qəbul etmək olmaz.”[53]

Nasir Purpirar Həxaməniş dövlətini özündən əvvəlki dövlətlərlə müqayisə edərək bildirir ki, Həxaməniş hakimiyyəti hərbi mərkəziyyət prinsipinə əsaslanırdı. Halbuki tarixən ondan əvvəlki hakimiyyətlər üçün bu prinsip keçərli deyildir. Onun Həxaməniş dövlətini tarixdə ilk despotik dövlət kimi xarakterizə etməsi də müəllifin ciddi elmi nəticələrindən biridir.

Purpirara görə, Həxamənişlər qurucu hakimiyyət olmadılar, əksinə, “Həxamənişlərin Orta Doğuda zühurundan sonra yerli qövmlərin, o cümlədən əski İran qövmlərinin mədəni həyatları sona çatmışdır.”[54] İstila etdiyi ölkələrin sərvətləri hesabına yeni Təxte-Cəmşid (Pasarqad) şəhərinin salınması kimi nadir nümunələr isə Həxaməniş hakimiyyəti üçün xarakterik xüsusiyyət deyildir.
Nasir Purpirar Həxaməniş hakimiyyətinin qurulmasında Yəhudilərin rolunu “öz qövmlərinin və məbədlərinin təhlükəsizlik və güvənliyini güvəncə altına almağa çalışmaları” kimi qiymətləndirib, onu “tənqid olunası” hadisə saymır. Ancaq o hesab edir ki, “son 200 ildə Yəhudilərin tarixə [tarixçiliyə] müdaxiləsi, hədəfli tarixyazma və arxeoloji “araşdırmalarla” çirkin siyasi hədəflərə xidmət edərək, mədəniyyətin başlanğıcını Həxamənişlər dövrünə intiqal etmələri qınanılasıdır. Yəhudilər Orta Şərq ilə bağlı qərəzli və saxta bir tarix zehniyyəti oluşduraraq, nəinki Orta Şərq və Beynəlnəhrin [İkiçayarasının] xalqlarının bir-birinə yaxınlaşmasını əngəlləmişlər, həm də İranda köksüz, soysuz və nağılvari bir millətçiliyi ortaya ataraq, məntiqsiz bir özünü böyükgörmə fikrini təlqin etməklə Ərəb və İslam düşmənçiliyini körükləmişlər.”[55]

İranın rəsmi və rəsmi olmayan ideoloji həyatında, bu sıradan tarixi baxışlardakı dəyişikliklərlə yanaşı, Türk fikir həyatında da inqilabdan sonrakı dövrdə mühüm dəyişiklik özünü göstərmişdir. Əslində milli ideologiyada yeni mərhələ İslam inqilabı və ondan sonra başladı. İnqilab gedişində bir-birinin ardınca işıq üzü görməyə başlayan anadilli mətbuatda və ayrı-ayrı kitablarda Azərbaycanla bağlı məsələlərin müzakirəsi genişləndi. İslam inqilabı ilə başlanan (indi də davam edən) mərhələnin əsas hərəkətverici qüvvəsi Varlıq dərgisi (1979-cu ilin apreli - ) və onun ətrafında toplanmış milli ziyalılar oldular. Varlıq İranda yox sayılan Türklüyün varlığını qorumağı hədəflədiyi üçün ən həssas məsələlərin üstünə getməyə borclu oldu. Varlıq dərgisinin üstündə durduğu əsas mövzuların - Türk millətçiliyinin birinci dərəcəli tələbləri olan tarixi keçmiş haqqında doğru-dürüst konseptin işlənməsi və gələcək haqqında əsaslandırılmış ideyaların qısa icmalını verməklə kifayətlənəcəyik.

Varlıq dərgisində tarix mövzusunda yazılmış məqalələr hakim pan-İranizm və Fars irqçiliyinin Azərbaycan və bura Türklüyünün tarixi ilə bağlı əsas müddəalarının birbaşa təkzibinə yönəlmişdir. Azərbaycan Türklüyünün etnogenezi məsələsindəki fikir ayrılıqları Varlıq dərgisinin tarixlə bağlı yazılarında da hiss edilir. Bu məsələdə bir-birindən fərqli iki yanaşma – populyar-təbliğati və obyektiv-elmi baxış öz əksini tapmışdır. Birincilər Azərbaycan Türklüyünün tarixini elmə məlum olan, ancaq etnik mənsubiyyəti hələ tam müəyyənləşdirilməmiş ən qədim tayfalar – Kutlar, Lulubeylər, Madlar (Madaylar) və başqaları ilə bağlayır, bu yolla pan-İranizm və Fars irqçiliyinin əsas tezislərindən birini çürütməyə çalışırlar.[56]

Türklərin etnogenezi və tarixi haqqında obyektiv-elmi yazılarda göstərilir ki, mütləq mənada avtoxton əhali/xalq yoxdur, çağdaş xalqların hamısı etnik tarixlərinin müəyyən mərhələsində bir yerdən başqa yerə köçmüş, həmin yerlərdə özlərinə vətən qurmuşlar. Bugünkü İran ərazisində yaşayan başqa xalqlar, bu sıradan elə Farsların özü də, Türklər kimi buraya başqa yerlərdən köçmüşlər. Bu da nəinki mütəxəssis tarixçilərə, hətta Türklərin “yad və gəlmə” olmalarını iddia edən şovinistlərə belə bəllidir. Bir sıra maraqlı məqalələr müəllifi mərhum Dr. Həmid Nitqi Türkiyə tarixçisi Doğan Avcıoğluya istinadən yazırdı: “Dünya millətlərinin çox cüzi hissəsi öz ilkin ərazilərində yaşamaqdadır və hazırda sakin olduqları ərazilərin etnos adlandırdığımız yerli əhalisinə nadir hallarda rast gəlmək olar. Etnosların çoxu miqrasiyalar, hazırkı ərazinin – bugünkü vətənlərinin əhalisi ilə qarışma nəticəsində formalaşmışdır.”[57]


Azərbaycanın qədim “Farsdilli” sakinləri ilə bugünkü Türkdilli əhalisi arasında iki min ildən çox keçməsinə baxmayaraq, onlar arasında bərabərlik işarəsi qoyan elmdən uzaq tezisə cavab olaraq Varlıq dərgisinin naşiri və baş redaktoru Dr. Cavad Heyət yazır ki, Əhməd Kəsrəvinin “Azəri dili” haqqında kəşfi doğru olsa belə, o bugünkü Azərbaycan əhalisinin varlığına kölgə sala bilməz. Çünki “İranın çağdaş Türkdilli əhalisi elm tərəfindən kimliyi (etnik mənsubiyyəti) dəqiq müəyyən edilməmiş tayfa və qəbilələrin tarixi deyil, Mərkəzi Asiya və qonşu regionlarda böyük dövlətlər qurmuş, mədəniyyətlər yaratmış qədim Türklərin (Hunlar, Savirlər, Xəzərlər, Göytürklər, Uyğurlar və b.) tarixini nəzərdə tutur.”[58] Başqa sözlə, Dr. Cavad Heyətə görə, ərazinin deyil, bu regionun çağdaş əhalisinin tarixinin araşdırılıb, izlənməsi gərəkli sayılır. Mərhum Əli Kamali yazırdı: “Türkün babaları və iyidləri keçən qərinələrdə Xanbalığından [Pekindən] girib, Dehlidən çıxıblar, Rusiyada vurub, Otrişdə [Avstriyada] tutublar, Hindistanda bütləri sındırıb, Bağdada göndəriblər, Macarıstana ayaq qoyub, Xarəzmdə qurultay qurub, Qəznədə, Dehlidə, Carcaniyədə, Pekində, Marağada, Sultaniyyədə, Bağdadda, Şirazda, Kirmanda, Təbrizdə, İstanbulda, Pənahabadda, İsfahanda, Ankarada, Qahirədə taxta oturublar.”[59]

Çağdaş Azərbaycan Türklüyünün etnogenezi məsələsinə toxunan yazıların əksəriyyətində doğru olaraq göstərilir ki, bu problemi ancaq ümum-Türk etnogenezi çərçivəsində həll etmək mümkündür. Problemin araşdırılması əsasən qədim Türklərin ilkin vətəninin (oykumeninin) lokalizasiyası məsələsi ilə başlanır və Türk oykumeninin Altay dağları, Altay-Ural hövzəsi olduğu təxmin edilir. Bu bölgədə Hun boylarının miladın ilk yüzillərində böyük imperatorluq qurması, İslamın zühuruna qədərki dövrdə onların Mərkəzi Asiyada hakim siyasi qüvvə olduqları, 552-ci ildə əsası qoyulmuş Göytürklər dövləti, bu dövlət birləşməsində başqa Türk boyları – Uyğurların (744-cü ildə) və Qırğızların (840-cı ildə) hakimiyyəti ələ keçirməsi, 925-ci ildə Moğolların hücumları, yerli Türklərlə onların etnik yaxınlığı və Türk boy bəylərinin yeni dövlətin ali hakimiyyətində iştirakından bəhs edilir.

“Azərbaycanın Türkləşməsi” deyilən məsələdə dünya Türkologiyasındakı fikir ayrılığı və mübahisələr Varlıq üçün də səciyyəvidir. Xüsusən bu, Azərbaycanda Türklüyün aparıcı elementə çevrilməsi dövrünə aiddir. Məsələn, Dr. Həmid Nitqi “Qafqaza və İrana Oğuz, Qıpçaq tayfalarının kütləvi surətdə gəlmələri və bu ərazidə əsrlər boyu yaşayan Türkdilli tayfalarla qaynayıb-qarışmaları” nəticəsində miladın VII-X yüzillərində Azərbaycanda Türklərin əsas elementə çevrildiyini və Azərbaycanda Türk dilinin formalaşdığını göstərir.[60] Mərhum Dr. Məhəmməd Tağı Zehtabi yazır ki, “miladdan əvvəl Xəzərin şimalından Qafqazın cənubuna axıb yerləşmiş Qıpçaq Türkləri ilə təzə Azərbaycana gəlmiş Oğuz Türkləri qarışır və Azərbaycanda tədriclə əksəriyyət təşkil edib, hökumətlər qurmağa başlamışlar”, ancaq “X əsrə qədər Türklər Azərbaycan torpaqlarında əksəriyyət təşkil etməmişlər.” Dr. Cavad Heyət isə hesab edir ki, “Azərbaycan çox qədimdən Türk el-tayfalarının yurdu olmuş, şimal hissəsi miladın yeddinci əsrində və cənub hissəsi də 11-13 miladi əsrlərdə, yeni gələn Türk ellərinin bu ölkədə yerləşmələrilə bütövlüklə Türkləşmiş və Türk dili ümumxalq dili halına gəlmişdir.”[61]
Türklərin kütləvi axınının İrana “bədbəxtliklər gətirdiyini” iddia edən irqçi müəlliflərə cavab olaraq Dr. Cavad Heyət, Dr. Həmid Nitqi və b. IX yüzilin sonlarından etibarən 900 il hakimiyyət başında olan Türk hökmdarlarının 270 il hakim olan Fars hökmdarları müqabilində İran tarixində böyük yeri olduğunu qeyd edirlər. Cavad Heyət göstərir ki, Oğuz Türklərinin İrana gəlişi “İslam aləmini Bizanslıların hücumlarından qurtardı, üstəlik, onlar Kiçik Asiyanı Bizanslılardan aldılar və özləri üçün İslam vətənini yaratdılar.”[62] Başqa bir məqaləsində isə Cavad Heyət Səfəvilərin İran tarixində oynadığı roldan bəhs edərək yazır ki, “Şah İsmayıl Türk olmasına və Türkcə şeir yazmasına baxmayaraq, İranın istiqlaliyyəti uğrunda Osmanlı Türkləri ilə vuruşurdu, özü də ətrafdakılar ona mane olmasaydılar canını belə bu yolda qurban verəcəkdi.”[63]

İrqçı müəlliflərə cavab olaraq tarixi mövzulara həsr olunmuş yazılarda göstərilir ki, Türklərin, eləcə də Moğolların İrana kütləvi köçündən sonra siyasi hakimiyyəti ələ almış Türk hökmdarları nəinki Fars dilini sıxışdırmamış, əksinə, bu dilin dövlət idarələrində işlənməsinə, ədəbi əsərlərin Ərəbcə deyil, məhz bu dildə yazılmasına şərait yaratmış, hətta onlardan bəziləri (Məlikşah, Sultan Səncər və b.) Farsca şeir yazmışlar. Dr. Cavad Heyət yazır: “Heç kəs Fars dilinin İrana xaricdən, yəni Ceyhunun o tərəfindən Qəznəvi və Səlçuq Türkləri vasitəsilə gəldiyini, Türk sultanlarının qüdrəti ilə İranın, Kiçik Asiyanın və Hindistanın rəsmi və ədəbi dilinə çevrildiyini və sonralar Türkdilli klassik şairlərin həmkarlığı ilə ədəbi dil səviyyəsinə yüksəldiyi faktını inkar edə bilməz.”[64]

Bir sözlə, İslam inqilabından sonra Varlıq dərgisi milli ziyalıların tribunası olmuş, milli fikirdə tarixi keçmiş konseptinin formalaşmasında mühüm rol oynamışdır. Bu konseptin əsas müddəaları bunlardır: Qədim Türklər kimi Farslar və b. da tarixin bəlli dövrlərində İran coğrafiyasına köçmüşlər; Türklərin etnogenezinin hələ yaxşı öyrənilməməsi onların Azərbaycanda ilk dəfə nə vaxt məskunlaşması haqda tutarlı fikir söyləməyə imkan vermir, ancaq rahatlıqla iddia etmək olar ki, Türklər miladın başlarından çağdaş Azərbaycan ərazisində yerləşməyə başlamışlar; Türklərin Mərkəzi Asiyada başlanan qüdrətli və köləlik tanımayan tarixi ilə bu tarixi yaradanların varisləri fəxr etməlidirlər; Ərəb hakimiyyətindən sonra İranın ali hakimləri olan Türk hökmdarları Fars dilinin dövlət idarələri və mədəni həyatda işlədilməsini təmin etmişlər.

Varlıqın özünü “kültür dərgisi” elan etməsinə baxmayaraq, milli orqan olması üzündən siyasi məsələlərə də fikir bildirmək məcburiyyətindədir. Dərginin davamlılığını təmin etmək üçün (o, Güneydə ən davamlı mətbu orqandır) bu münasibət bir qayda olaraq dolaylı yollarla bildirilmişdir.

Mövcud şərtlərdə pan-İranizm və Fars irqçiliyi ilə mübarizənin ən səmərəli yollarından biri Pəhləvi rejiminin milli siyasətinin tənqidi və ifşasıdır. Odur ki, yaxın keçmişə həsr edilmiş məqalələrin ana xəttini bu rejimin Türklüyün varlığına vurduğu zərbələrin izahı təşkil edir. Saysız yazılarda şah rejiminin Azərbaycanda yeritdiyi Farslaşdırma siyasəti qəzəb və nifrətlə yad edilir; milli zülm siyasətinin forma və yolları açıqlanır. Varlıq dərgisinə görə, Pəhləvi rejiminin Azərbaycan Türklərinin varlığını danıb, onu zorla Farslaşdırmaq siyasəti mürtəce siyasət olmuş və çoxmillətli ölkənin normal inkişafına qarşı yönəlmişdi; indiki İslam rejimi Pəhləvi irsindən imtina etməli, Fars olmayan xalqların hüquqlarını təmin etməlidir.

Varlıq dərgisinin (bu fikir başqa Türk mətbu orqanlar üçün də keçəklidir) belə bir cəhəti təəssüf doğurur: Dil və mədəniyyət sahəsində irqçi siyasətin ifşasına xüsusi diqqət yetirilməsi ilə müqayisədə bu siyasətin ictimai həyatın başqa sahələrindəki (məs., inzibati həyatda) nəticələri az izlənilir, sosial-iqtisadi sahə isə tamamilə diqqətdən kənarda qalır. Həssas siyasi mövzu sayıldığından bilərəkdən 21 Azər hərəkatı mövzusuna da birbaşa girməmək xətti tutulub.

“İran hamımızın ümumi vətənidir” düsturunu tez-tez təkrarlamaqla yanaşı, Varlıq dərgisi Bütöv Azərbaycan ideyasına da yad deyil. Tarix və dil haqqındakı məqalələrdə Quzey Azərbaycanın əski İranın bir parçası olması fikri də, bizcə, dərginin davamlılığını təmin etmək istəyindən başqa, həm də Bütöv Azərbaycan idealını gündəmdə saxlamaq arzusundan doğur. Quzey Azərbaycanın “Azərbaycan” adlandırılmasının “bir səhv” olması, onun “Aran olması” haqqında əsassız yazılar da Varlıq yazarlarının, xüsusilə Dr. Cavad Heyətin sərt elmi məqalələrinin mövzusu olmuşdur. Quzey Azərbaycanı Güneydə tanıtmaq baxımından Əli Bəy Hüseynzadə, Məmməd Əmin Rəsulzadə kimi böyüklərimiz, eləcə də Quzeyli yazıçılar və onların yaradıcılığı haqqında xeyli məqalə yayınlanmışdır.

Beləliklə, Varlıq dərgisi Türk varlığını Fars irqçiliyinin hücumlarından qorumaq üçün yarandı. Bununla işi bitmədi. O, milli ideologiyanın biçimlənməsində mühüm rol oynadı və bu missiya davam etməkdədir.

Varlıq məktəbinin ən görkəmli nümayəndələrindən biri Dr. Məhəmməd Tağı Zehtabi-Kirişçinin (1302/1923-1377/1998) ikicildlik “İran Türklərinin əski tarixi” adlı əsəri Azərbaycan/Türk fikir həyatında mühüm hadisə oldu. Bu əsərin İranda rəsmi tarixçiliyin təkzibi (yalanlanması) sahəsində önəmli rolu vardır. Əsərin birinci cildi əski Azərbaycan əhalisinin etnik tərkibi, buradakı dövlətlər və mədəniyyətlər, İskəndərə qədərki dövrün siyasi və kültür hadisələri haqqındadır.[65] İkinci cild isə İskəndər dövründən İslamaqədərki siyasi, etnik-kültürəl proseslərə həsr edilmişdir.[66] Güney Azərbaycan gəncləri arasında bu kitabın inanılmaz yayğın və məşhur olması çoxdan insanları bezdirmiş rəsmi tarixçiliyə alternativ istəyindən doğmuşdur. Yazarın ilkin məqsədi də məhz elmi məsələlərə aydınlıq gətirməkdən daha çox, rəsmi tarixçiliyin yalanlarını çürütmək olmuşdur. Diqqəti çəkən əsas mövzular - Əhəmənilərdən (Həxamənişlərdən) öncə indiki İran coğrafiyasında diqqətədəyər dövlətlər və mədəniyyətlər yoxdumu, Həxaməniş dövləti həqiqətən rəsmi tarixçiliyin iddia etdiyi kimi möhtəşəm dövlət qurumu idimı, Partların (Əşkanilərin) etnik mənsubiyyəti nə idi, Sasani dövləti deyildiyi kimi model dövlətmi idi - kimi suallara aydınlıq gətirməkdir.

Rəsmi İran tarixşünaslığı, özəlliklə məktəblərdə öyrədilən tarix dərslikləri, bilindiyi kimi, indiki İran coğrafiyasında tarixin Həxamənişlərlə başlandığını iddia edir, onun dışında burada diqqətçəkən dövlətlərin və mədəniyyətlərin olmadığını bildirir. İranın ilk, avtaxton əhalisinin Farsların babaları olduğu, Fars olmayan xalqların buralarda “gəlmə element” olduğu bildirilir. Dr. Zehtabinin əsərinin birinci məqsədi bu yalanı isbatlamaqdır. Yazar bugünkü tarix elminin tapıntılarına dayanaraq Pars tayfalarının gəlişinədək bu bölgədə 3500 illik möhtəşəm mədəniyyətlərin və dövlətlərin olduğunu incələyir. O yazır ki, “bu mədəniyyəti yaradanlar [indiki] İraqda Sumerlər, [indiki] İranın qərbi, mərkəzi, bütün [indiki] Azərbaycan və Xəzərin cənubunda Arattalar, İlamlar, Kassilər, Hurrilər, Quttilər, Lullubilər, Gilzanlar, Amerdlər, Kaspilər, Mannalar, Urartular olmuşlar.”[67] Əski tarix üzrə uzmanların böyük bir qrupu bu boyların (tayfaların) iltisaqi dillərdə danışdığını, onların Orta Asiyadan gəldiklərini təsbit etmişdir. Onların qonşuluğunda Sami xalqlar yaşamış, amma “Samilər tarix boyu İraq ərazilərindən şərq tərəflərinə irəliləyə bilməmişlər.”[68] Yazar iltisaqı dilləri “bugünkü Türk dilinin babası” adlandırır. Bu coğrafiyadakı əski tayfaların hamısının ilqisaqi dillərdə danışmağı, iltisaqi dillərin mütləq Türk dili olması haqqında dünya elmində bir-birindən fərqli fikirlər var. Amma Pars tayfalarının gəlişinədək burada Hind-Avropa dillər qrupuna aid olan xalqların yaşaması dünya elminə məlum deyil. Dr. Zehtabi burada mövcud olmuş Sumer, Akkad, İlam, Hit, Kassi, Hurri, Urartu, Assur mədəniyyətləri haqqında geniş elmi bilgi vermiş, əski dövr Azərbaycan ərazisində yaranmış mədəniyyət və dövlətləri, bu dövlətlərin qonşularla münasibətlərini incələmişdir.

Parsların miladdan təxminən 900 il qabaq indiki İran coğrafiyasına yerləşmələri, yəni buranın “avtaxton əhalisi” olmaması tarix elmi üçün bəlli bir hadisədir. Dr. Zehtabi yazır ki, Pasarqad qəbiləsinin başçılığı altında on Pars qəbiləsi şərqdən İran platosuna gəlmiş, onlardan oturaq həyat keçirən üçü indiki Fars əyalətində, qalan yeddisi Kirmanda yerləşmişdir. “Bu on Hind-Avropa dilli el, Firdovsinin “Şahnamə”də göstərdiyi kimi, İran filatına [platosuna] gəldikdə, tam ibtidai həyat keçirmiş və sakin olduqları İran yerlərində yüksək mədəniyyətə malik olmuş yerli iltisaği dilli xalqların: İlamlar, Kassilər, Ellipilərin neçə əsr rəhbərliyi altında yaşayaraq, onlardan mədəniyyət, qabaqcıl həyat və yaşayış, əlifba, yazı və sairə öyrənmişlər.”[69]

Rəsmi İran tarixçiliyi, ələcə də Avrosentrizm mövqeyində duran Avropa yazarları Həxaməniş dövlətinin yaranması, onun başında duran şahənşahlar haqqında həqiqətə uyğun olmayan əfsanələr uydurmuş, onu ilk dünya imperatorluğu kimi təqdim etmiş, Kuruş, Daryuş və başqa şahənşahları gücün, ədalətin simvolu kimi vəsf etmişlər. Dr. Zehtabi tarixi qaynaqlara dayanaraq Həxaməniş hakimiyyətinin yaranması hadisəsini, bu dövlətin qurucusu Kuruşun hakimiyyəti ələ almasını ayrıntıları ilə təsvir edir. Kuruşun sonuncu Mad (Midiya) imperatoru olmuş babası Astiyaqa xəyanəti və qiyamı, eləcə də özünün sonu - Massagetlərin qadın böyüyü Tomrisin qılıcının qurbanına çevrilməsi haqqında bölüm özəlliklə çağdaş oxucunun diqqətini çəkir. Zehtabinin kitabı Həxamənişlər haqqında yazılmış nağılların tarixi həqiqətlərdən uzaq olduğunu göstərir və İran rəsmi tarixçiliyinin bu yalançı tezisini alt-üst edir.

“İran Türklərinin Əski Tarixi”nin ikinci cildinin əsas mövzularından biri Partların etnik kimliyi məsələsidir. Yeni İran tarixçiliyinin banisi Həsən Pirniyanın Partları Arya irqindən sayması və onların Pəhləvi dilində danışdıqları tezisi ilə razılaşmayan Dr. Zehtabi, Yunan tarixçilərinin fikirlərini misal gətirir. Firdovsinin “Şahnamə”sində Əşkanilərə gərəkən diqqətin verilməməsi də sual doğuran məsələlərdən biridir. Yazar fikirlərinin sübutu üçün XIX yüzil tarixçisi Məhəmməd Həsən Xan Etimadüssəltənənin kitabındakı tezislərdən istifadə edir.

Dr. Zehtabi yazır ki, Əşkani hakimiyyətinin özəyini təşkil edən Dahi boyu Sakaların bir qolu idi və onların Türklüyü şübhə doğurmur. Dr. Zehtabinin İranda 477 il hakim olmuş Əşkanilərin etnik kimliyi barədə gətirdiyi dəlillər məntiqə dayanır. Onun Əşkani imperatorluğu (Parfiya) haqqında konsepti rəsmi tarixçiliyin baxışlarını ən azından şübhə altına alır və bu konseptə ciddi yanaşma tələb edir.

Dr. Zehtabiyə görə, Sasanilər imperatorluğu (220-622) Əşkani dövlətindən fərqli olaraq zora dayanan hakimiyyət idi. Pars olmayan xalqların və tayfaların hüquqlarına hörmət edilmirdi. Yazar Ərdəşirdən başlayaraq Sasanilərin Əşkani irsini məhv etmələri haqqında cürətli tezis irəli sürür. Bu faktı bəzi İran tarixçiləri də qeyd edirlər. Amma nə Dr. Zehtabi, nə də başqa tarixçilər, təəssüf ki, bu tezisin isbatı üçün dəlillər gətirmirlər.

Əsərdə Sasani dövründə bu coğrafiyaya yeni köçən Türk boyları haqqında qiymətli bilgilər var. Kitabda Sasani hökmdarlarının Azərbaycana köçürdükləri Farsdillilər haqqında da geniş məlumat verilmişdir.

Dr. Zehtabi Həxamənişlər kimi Sasanilər dövlətinin də ləyaqətsizliklə sonuclandığını bildirir. O yazır: “Eyş-işrət, fitnə, əxlaqsızlıq, xəyanət, özündən başqa heç kimi görməmək, məqampərəstlik, millətləri hər cür milli hüquqdan məhrum etməkdən başqa bir şey bilməyən və düşünməyən hakimə heyətinin sonu bundan başqa cür ola bilməzdi. Əski İran tarixində bu ikinci dəfədir ki, daxili qüvvələrin əlindən, millətlərin əlindən hakimiyyəti alan Parslar, xarici düşmənlərin müqabilində müqavimət göstərmədən, müftəzehanə [biyabırçılıqla] və bi-abrucasına [abırsızcasına] özləri və məşuqələrini götürüb qaçmış və vətəni, xalqı və hakimiyyəti düşmənlərə təslim etmişlər.”[70]

Varlıq məktəbinin başqa bir görkəmli nümayəndəsi – Həsən Raşidi şəxsiyyətinin və onun “Türklər və İranda onların tarix, dil və kimlikləri haqqında araşdırma”[71] adlı kitabının İranda Türk millətçiliyinin biçimlənməsində mühüm rolu var. Yazar təmkinlə, mühəndis dəqiqliyi ilə, bir-bir pan-İranist tezislərin üstünə gedir, onların ədalətsiz, insanlığa, çağa zidd, irqçi mahiyyətini ortaya qoyur. Həsən Raşidi kitabın ərsəyə gəlməsi nədənləri haqqında yazır: “... çiynimizdə olan vəzifənin ağırlığını hiss edərək 85 il öncədən indiyə qədər, yəni Rza Xan hakimiyyətə gələn gündən, tarixi təhrif olan, şəxsiyyəti tapdalanan, dili və varlığı danılan, gəncləri hüviyyət [kimlik] böhranına düçar olan və İran adlı ölkədə cəmiyyət baxımından nisbi əksəriyyətə malik olaraq hətta ibtidai qədəri öz dilində məktəbi olmayan Türklərin keçmiş tarixi və hüviyyəti haqda tədqiqat aparmağı və bu sahədə kitab hazırlamağı özümə borc sandım.”[72] Bu kitab pan-İranizmin əsas tezislərini və Fars irqçiliyini soruşdurmaya (istintaqa) çəkir, sonda onun üzünə ittihamnamə oxuyur. Bu soruşdurmanın əsas maddələrini qısaca ələ alaq.

Kitaba başlarkən yazar məktəblərdə oxudulan tarix kitablarındakı bir sıra saxtakarlığa diqqəti çəkir. Bu da təbiidir. Çünki tarix kitabları, ümumiyyətlə tarix şüuru milli kimliyin biçimlənməsində mühüm rol oynayır. Müəllif yazır ki, bu tarix kitablarında İran tarixi Həxaməniş dövründən başlanır, sankı ondan əvvəl burada heç bir xalq, heç bir mədəniyyət olmamışdır. Halbuki Həxamənişlərdən 4000-4500 il öncə indiki İran coğrafiyasında qüdrətli mədəniyyətlər olmuşdur. Burada yaranmış Şumer (Sumer) mədəniyyətinin varlığı dünya elmində mübahisəsiz tarixi həqiqət hesab edilir. Şumerlərin dünya mədəniyyətinə töhfələri, bu sıradan ilk dəfə ili 12 aya, ayı 30 günə, günü 24 saata, saatı 60 dəqiqəyə bölmələri, ‘ilk romanın’ (“Qılqamış”) məhz burada ortaya çıxması bəllidir.[73] Bu coğrafiyada Şumerlərdən başqa Elamlıların, Lulubeylərin, Kutilərin, Urartuların, Mannalıların dövlət həyatı yaşamaları da dünyanın tarix kitablarında yazılıb. Həxamənişlərin miladdan 550 il öncə burada dövlət qurduqları vaxt rəsmi dil olaraq Elam dilindən istifadə etdikləri də məlum məsələdir. Həsən Raşidinin üstündə durduğu əsas məsələlərdən birisi də adı çəkilən qədim tayfaların dillərinin qədim Farscadan kökündən fərqli, iltisaqi (aqqlünativ) dillər qrupuna aid olmasıdır.[74] Yazar bu fikrini əsaslandırmaq üçün bir sıra mütəxəssis tarixçinin əsərlərinə istinad edir. İranda yeni, irqçı tarixçiliyin banilərindən olan Həsən Pirniyanın belə Şumer dilinin Ural-Altay dil qrupuna məxsus olması fikrini də əlavə edir. Yazar bu məlum həqiqətləri oxucunun ixtiyarına qoyduqdan sonra adi məntiqin tələb etdiyi sorğunu irəli sürür: Bir halda ki, indiki İran coğrafiyasında dövlət və mədəniyyətlər tarixinin ən azı 7000 il yaşı var, niyə Həxamənişlərdən əvvəlki tarix öyrədilmir?

Çünki bu tarix irqçilərin işinə yaramır. Əks təqdirdə Türkləri “gəlmə” deyə aşağılayan rəsmi İran tarixçiliyi, Farsların da bu coğrafiyaya başqa yerlərdən (Güney Sibir steplərindən) gəldiklərini etiraf etmək məcburiyyətində qalacaq. Sonra Həsən Raşidi soruşdurmanın ikinci sualına keçir.

Fars irqçiliyi Həxaməniş və Sasani dövrləri, eləcə də dövrün Parsları ilə fəxr edir. Ancaq tarixi qaynaqlar Parsların bu coğrafiyaya yerləşdikləri vaxt ( miladdan 900 il əvvəl) onların yüksək mədəniyyətə sahib olduqları fikrini rədd edir. Həsən Raşidi haqlı olaraq yazır ki, onlar buraları işğal edərkən qarşılarına çıxan mədəniyyətləri yıxdılar. Həxaməniş şahlarının qəddarlığı da tarixi qaynaqlarda əksini tapıb. Həxamənişlər Elam imperatorluğunu işğal edərkən yazıları (əlifbaları) belə yox idi, dövlət işlərində Elam dilindən və yazısından istifadə edirdilər. Həxamənişlərin yazını Elamlılardan öyrənmələrini Firdovsi belə “Şahnamə”sində göstərib.[75]

Tarixi qaynaqlar Parsların dini görüşlərinin və əxlaqlarının da bərbad olmasını bildirirlər. Yunanlar Parslara barbar deyib, onları vəhşi tayfalar saymışlar. Yunan tarixçiləri Parsların adətləri haqqında yazıb, onları ələ salmışlar. İzdivac məsələlərində Parsların əxlaqı xüsusilə bərbad olub.[76]

Parslardan fərqli olaraq, məsələn, Elamlılar arasında qadının yüksək sosial statusa malik olması tarixi qaynaqlarda əksini tapıb. Yazar tarixi araşdırmalara dayanaraq, Türklər və Moğollar arasında qadının yüksək rolunu müqayisəli şəkildə ortaya qoyur. Eləcə də Parslardan fərqli olaraq Türklərin həm orta yüzillərdə, eləcə də yeni dövrdə musiqiyə verdikləri önəm kitabda təsvir edilmişdir.[77]

Həsən Raşidinin bu kitabında diqqət çəkdiyi əsas məsələlərdən biri də Türklərin bu coğrafiyada yerləşmələri probleminə aydınlıq gətirməkdir.

Rəsmi İran tarixçiliyinə görə, XI yüzildə Azərbaycanı işğal edən Oğuz-Səlçuqlular 70 il ərzində yerli “Azərilərin” dillərini zorla dəyişdirmişlər. Müxtəlif tarixçilər Kəsrəvinin bu tezisini[78] müxtəlif formalarda təkrar etmiş, dövlətin Farslaşdırmaq siyasətinə haqq qazandırmaq üçün əsas tutarqa kimi istifadə etmişlər. Halbuki bu tezisin hüquqi və siyasi baxımdan heç bir əsası yoxdur. Həsən Raşidi yazır ki, “hər bir bölgənin əhalisi gəldikləri yerdən asılı olmayaraq, sakin olduqları ölkədə bir-iki nəsildən sonra həmin ölkəyə və bölgəyə, dilləri və kültürləri də həmin ölkə və bölgəyə aid hesab edilir.”[79] Yazar pan-İranizmin saçma-sapan tezisinin adi məntiqlə də uyuşmadığını bildirərək Amerikanı örnək göstərir. Deyir ki, Avropalı mühacirlərin Amerika qitəsinə köçündən 400 il belə keçmir, Qırmızıdərilər isə yerli xalqdır və güman ki, bir neçə min ildir burada yaşayırlar. Məsələyə İran irqçilərinin məntiqi ilə yanaşmış olsaq, “indi deyə bilərikmi ki, bu qitənin yerli dili Qırmızıdərilərin dili olduğu və Avropadan bu qitəyə köçmüş və burada yerləşmiş Amerikalılar indi İngiliscəni, Fransızcanı və İspan dillərini buraxıb, Amerikanın əsil və yerli sakinləri olan Qırmızıdərilərin dillərində danışmalı və Qırmızıdərilərin nəslindən gəldiklərini iddia etməlidirlər!?”[80]

Pan-İranizmin Türkləri “gəlmə” elan etmələrinin tarixi gerçəkliyə də uyğun olmadığını bildirən Həsən Raşidi fikrini buranı işğal etmiş Parslardan 4500-4000 il əvvəl sakin olmuş iltisaqi dilli xalqların varlığı ilə əsaslandırır. Zamanla Sakalar, İşğuzlar, Eşkanilər, Xəzərlər, Hunlar, Peçeneqlər, Qıpçaqlar və başqaları da bu coğrafiyada yerləşmiş, sonra gələn Oğuzlarla qaynayıb-qarışmışlar. Raşidi kitabının xeyli hissəsini məhz bu məsələyə həsr etmiş, müxtəlif qaynaqlardan, özəlliklə Ərəb tarixçiləri və səyyahlarının əsərlərindən gətirdiyi misallarla pan-İranizmin bu əsassız tezisini çürütməyə nail olmuşdur.[81] Bəzi tarixçilərin “Moğollar Azərilərin dilini zorla dəyişdirdilər” tezisi də Həsən Raşidinin məntiqə dayalı tənqidinə tuş gəlmişdir.[82] Yazar “ağdərili indiki Azərbaycan əhalisi ilə Şərqdəki Türklərin üzləri fərqlidir, deməli, Azərbaycan əhalisinin yalnız dili dəyişmişdir” tezisini də məntiqlə yalanlayır.[83]

Həsən Raşidi kitabında Türklərin indiki İran coğrafiyasında yad element olmadığı bir yana, onların Farslara və Fars kültürünə önəmli xidmətləri keçdiyini tarixə və məntiqə dayanaraq sübut edir.

Hakim Türk sülalələrinin Farscanı dövlət dili səviyyəsinə qaldırmaları və Fars ədəbiyyatına xüsusi qayğı göstərmələri tarixi faktı Əhməd Ağaoğlu, Məmməd Əmin Rəsulzadə, Təbrizli Əli, Cavad Heyət kimi görkəmli fikir adamları tərəfindən Türk tarixinin dramatik yanlışlığı kimi qiymətləndirilmiş,[84] bunun Azərbaycan Türklərinin tarixində sonralar faciələrə nədən olması göstərilmişdir. Həsən Raşidi də özündən əvvəlki ustadların yana-yana təsvir etdikləri bu hadisənin üstündə geniş durur. İran coğrafiyasında aşağı-yuxarı 1000 il hakim olmuş Türk sülalələrini qarətçi, mədəniyyət düşməni kimi aşağılayan Fars irqçisi, ya Türk manqurdu deyil, əslində bu sülalələrdən özünü dərk etmiş Türklük narazı olmalıdır. Həsən Raşidi bu sülalələri qınamaqdan özünü saxlaya bilmir və haqlıdır: ”Keçən min il ərzində Türk sülalələrinin yanlışlarından birisi də şayəd odur ki, onlar öz dillərinə xüsusilə də rəsmi və dövlət məktublaşmalarında az önəm verdilər.”[85]

Pan-İranizmin ideoloji əsaslarının çürüklüyünə misal olaraq Həsən Raşidi kitabında Fars-Dəri dili məsələsinə aydınlıq gətirir. İranın dilçi alimləri bu dilin Sasanilərdən qalma Pəhləvi (Fəhləvi) dilindən əsaslı şəkildə fərqləndiyini, Fars şeirinin Sədi kimi görkəmli nümayəndələrinin bu dili mədrəsələrdə öyrəndiklərini etiraf etmişlər. Raşidi yazır ki, Səlçuqlu sarayına yol axtaran hər bir kəs əvvəlcə Əfqanıstan və Tacikistandan buralara gətirilmiş Dəri dilini öyrənmiş, sarayın şeir dilində (Dəri) Türk hökmdarların şan-şövkətini tərifləməyə, onların fəthlərini vəsf etməyə, əvəzində ənam almağa çalışmışlar.Bu tarixi gerçəklik də göstərir ki, Türklər öz dillərini yerlilərə təhmil etmədilər, əksinə yerli Parslar Türk hökmdarlarının Əfqanıstan və Tacikistandan gətirdikləri Fars-Dəri dilini qəbul etdilər. Bu dil də ucsuz-bucaqsız Türk imperatorluğunda elm və din dili olan Ərəbcənin yanında kargüzarlıq və şeir dili oldu. Türk dili isə sarayın və ordunun danışıq dili funksiyasını yerinə yetirdi. Bir sözlə, pan-İranistlərin iddialarının əksinə, özünün yerli dilini dəyişənlər Azərbaycanın “Azəricə” danışan əhalisi deyil, indiki İranın mərkəzi əyalətinin (Farsistanın) Pəhləvi dilində danışan Pars əhalisi idi. Onlara da bu “gəlmə dili” (“zəbane mohacer”) - Farscanı Türk hökmdarları gətirmişdilər.

Həsən Raşidi əsərinin son bölümlərində irqçilərin daha bir məntiqə zidd yanaşmasını sorğuya çəkir. O yazır ki, nədən Əfqanıstan və Tacikistanı qardaş ölkələr və əhalisini qardaş millətlər bildikləri halda, Arazın şimalındakı Azərbaycan Respublikasını İrana yad ölkə sayırlar; halbuki Arazın hər iki tərəfi eyni millətdən ibarətdir və eyni coğrafi ad daşıyır. Bu sorğunun cavabı yazara görə odur ki, irqçilər “İranlılığı Farslığa bərabər tuturlar, Fars olmayanı İranlı saymırlar.”[86]

Arazın quzeyində “Azərbaycan” adlı dövlətin olmasını İrandakı irqçilər təhlükə qaynağı hesab edirlər. Halbuki, Raşidiyə görə, İran əhalisinin (70 milyon) nisbi çoxluğuna (30 milyondan artıq) bərabər olan, Şərqi Azərbaycan, Qərbi Azərbaycan, Ərdəbil, Zəncan, Həmədan, Qəzvin, qismən Gilan və İranın başqa ostanlarında sakin olan Türklüyün milli-mədəni problemləri həll edilsə, Quzey Azərbaycanın varlığı nəinki İran üçün problem yaradar, əksinə, Azərbaycan Türklərinin əksəriyyətinin yaşadığı Güney Azərbaycan cazibə mərkəzinə çevrilər.[87] Çoxmillətli İranda Fars olmayanların milli haqlarını təmin etmək əvəzində irqçilər ağılalmaz yollarla Quzey Azərbaycanın Güneyə təsirini aradan qaldırmağa, ya azaltmağa çalışırlar. Kəsrəvinin tezisini daha da bayağılaşdıraraq Enayətulla Reza kimi şovinistlər Arazın şimalındakı dövlətin “Azərbaycan” adlanmasının tarixə “uyğun olmadığını” ictimai şüura yeritməyə çalışırlar. Onların iddialarına görə, Arazın quzeyi guya həmişə “Aran” adlanmışdır.[88] Həsən Raşidi bu yanaşmanın tarix elmi baxımından tamamilə əsassız olduğunu geniş araşdırması ilə sübut etməklə yanaşı, onun siyasi məqsədlərlə irəli sürüldüyünü qətiyyətlə ifşa edir.[89]

İran daxilindəTürklərin fikir həyatında baş verən bu dəyişikliklərlə yanaşı, ondan xaricdə Güney Azərbaycan əsilli yeni milli aydın kəsimin və onların əsərlərinin ortaya çıxması mühüm gəlişmə sayılmalıdır. Mehran Baharlı, Güntay Gəncalp, Arif Kəskin, Dr. Əlirza Əsgərzadə, Əlirza Ərdəbili, Seyid Ziyaəddin Sədrələşrəfi kimi aydınlar milli məsələnin çeşidli yönlərini araşdırmış, milli idelogiyanın yaranmasına qiymətli qatqılarda bulunmuşlar.[90]

İslam inqilabından sonrakı dövrdə tarixi – ideoloji fikirdə durum mövzusunu özətlərkən bu sahədə həssas gəlişmənin olduğunu qeyd etməliyik. Varlıq məktəbinin görkəmli nümayəndələrinin, bu sıradan Dr. Həmid Nitqi, Dr. Cavad Heyət, Dr. Məhəmməd Tağı Zehtabi, Həsən Raşidi kimi fikir adamlarının fəaliyyəti nəticəsində rəsmi İran tarixi-ideoloji fikrinin Azərbaycan və Türklük haqqından obyektivlikdən uzaq, ittiham xarakterli, aşağılayıcı tezisləri yalanlanmış, millət quruculuğu sürəcinin mühüm tələblərindən biri - tarixi keçmiş haqqında inandırıcı, obyektiv milli konseptin əsasları yaradılmışdır. Məhz milli fikir həyatındakı bu yeni hadisə yeni nəslin bir hissəsinin rəsmi pan-İranist və irqçi ideologiyanın təsirindən çıxmasına, milli hərəkatın yeni mərhələsinin başlanmasına təkan vermişdir.

Siyasi gəlişmə

Yuxarıda da deyildiyi kimi, inqilab dövründə ölkədəki milli azlıqlar (siyasi statusuna görə) məsələsində yenilik olacağı gözləntisi hakim idi. Ümumi dəyişiklik ab-havası içində nəhayət Fars olmayanların da problemlərinin çözüləcəyi ümidləri vardı. Ölkənin gələcəyinə həsr olunmuş toplantıların hamısında siyasi partiya və təşkilatların sayının çoxluğu və onların milli məsələ ilə bağlı bəyanatları diqqəti çəkirdi. Ən azı ritorika səviyyəsində siyasi partiyalar Fars olmayanların problemlərini dilə gətirərək onların səsini almağa çalışdılar.

1980-ci ildən sonra, Kürdlər, Ərəblər, Türkmənlər və Türklərlə yeni hakimiyyət arasında çeşidli çarpışmalar əsasən bitəndən sonra bu məsələyə ümumölkə siyasi partiyalarının münasibəti dəyişdi. Ümum-İran partiyalarının demək olar hamısı ölkənin bütövlüyü məsələsində hakimiyyətdə möhkəmlənməkdə olan qüvvələrin siyasətini dəsdəklədilər. Hətta zamanla İrandakı xalqların haqlarını müdafiə etməyi öhdəsinə götürmüş Tudə (İran Xalq Partiyası) belə hakim rejimdən fərqli mövqe ortaya qoymadı. Bu partiyaya görə, İran xalqları məsələsi İranın “böyük milli vəhdəti çərçivəsində” həll edilə bilərdi.[91] Sol partiyalar yalnız Kürd məsələsində hakimiyyətə nisbətən fərqli münasibət sərgilədilər. Məsələn, İran Xalqının Mücahidləri Təşkilatı ölkədə milli məsələyə, özəlliklə Kürd məsələsinə həsr edilmiş sənədində Kürdlərin muxtariyyət istəklərini qətiyyətlə dəsdəklədiyini bəyan etdi.[92]


İraqla müharibə (1980-88) milli azlıqlar məsələsini, demək olar ki, dondurdu. Bu məsələdən bəhs edənlər “vətən xaini” elan edildilər, onlarla savaş dövrünün qaydaları ilə qəddarcasına rəftar edildi. Ümum-İran partiyaları bundan rahatlandılar.

İrandakı Türklər üçün aşağı-yuxarı on il sürən sükut buzunun əriməsi Sovet İttifaqının dağılması ərəfəsində Quzey Azərbaycandakı milli-demokratik hərəkatın başlanması ilə bağlıdır. 1989-cu ilin sonunda Sovet İttifaqı ilə İran arasında sərhəd qurğularının sökülməsi, az sonra qanlı 20 Yanvar (1990) hadisəsi, daha sonra isə Quzey Azərbaycanda müstəqil dövlətin bərpası (1991-ci ilin oktyabrı) Güney Azərbaycanda milli hərəkatın yeni mərhələsinin başlanmasına təkan verdi. 1992-ci ilin sonlarına doğru Tehranda Azərbaycan Respublikasının səfirliyi quruldu. Bu hadisələr İrandakı Türklər, özəlliklə Güney Azərbaycan əhalisi üzərinə böyük etki qoydu.

Araz sərhəd çayının quzeyində “Azərbaycan” adlı dövlətin yaranmasına İran hakimiyyəti də biganə qalmadı.[93] Müstəqil Azərbaycan Respublikasının varlığını ölkənin kütləvi informasiya vasitələrində gizlətmək, bu mümkün olmadıqda oradakı durumu təhrif etmək, təcavüzkar Ermənistanla əlaqələri heç olmadığı qədər genişləndirmək kimi işlərə əl atan rəsmi Tehran, Güney Azərbaycanda təhlükəsizlik sistemini möhkəmləndirmək üçün əlavə tədbirlər həyata keçirdi. Bu məqsədlə Doğu Azərbaycan ostanı ərazisinin Quzey Azərbaycanla sərhədyanı bölgəsini ayırıb, birbaşa Tehrana bağlı, ayrıca ostana çevirmək qərarı verildi. Ərdəbil və ətrafının dövlətə loyal nümayəndələri buranın Təbrizin tabeliyindən çıxmasını müsbət iş hesab edirdilər. Hökumətin rəsmi nümayəndələri kimi onlar da bu bölgənin ayrıca ostan statusu almasını mərkəzi büdcədən buraya əlavə resursların cəlb edilməsinə nədən olacağını bildirirdilər. Bununla belə yeni ostana ad qoyulması məsələsi kəskin etirazlara səbəb oldu. Hakimiyyət yeni ostana Savalan, Səhənd, ya da Ərdəbil adlarının qoyulması təklifini verdi. İran İslam Məclisinin Azərbaycandan olan, bu vaxta qədər radikallığı və müxalifliyi ilə seçilməyən üzvləri belə Azərbaycan adının bu bölgənin üstündən qaldırılmasına etiraz etdilər. Bu məsələ Məclis xaricində də geniş müzakirə edildi. Çoxları yeni ostan yaradılacaqsa, onun adının “Şərqi Azərbaycan” qoyulmasını, Təbriz mərkəzli ostanın isə “Mərkəzi Azərbaycan” adlandırılmasını təklif etdilər.

Yeni yaranan ostanın “Azərbaycan” deyil, başqa adla adlanmasına etirazları nəzərə alaraq İran İslam Məclisi 1993-cü ilin yanvarında bu ostanın “Şərqi Azərbaycan” adlandırıldığını bildirdi. Buna baxmayaraq prezident Rəfsancani hökuməti bu məsələdə mövqeyinin dəyişməz olduğunu nümayiş etdirib, yeni ostanın “Ərdəbil ostanı” adlanması haqqında Məclisin öz qərarını dəyişdirməsinə nail oldu. Məclisdəki Ərdəbil nümayəndələrindən biri bu adın (“Ərdəbil ostanı”nın) üstündə israr etməyin zəruriliyini “pan-Türkistlərin cinayətkar arzularına” qarşı mübarizə məqsədi və “sərhədin o tayında iyrənc hadisələrin baş verməsi” (Azərbaycan Respublikasının yaranması?) ilə əsaslandırırdı.[94] Şərqi Azərbaycan ostanının bölünməsi və yenisinin “Azərbaycan” adlandırılmaması sonrakı illərdə də ölkənin Türk əhalisinin, eləcə də tələbələrin narazılığına səbəb oldu. Ölkə universitetlərində oxuyan Meşkinşəhr tələbələri İran dövlətinin başçılarına ünvanladıqları 1995-ci ilin mart (1373-ün fərvərdin ayı) tarixli açıq məktubda 27 milyonluq İranlı Türkdillilər adından “Azərbaycanın bir bölümünü bir şəhərin adı ilə adlandırılmasını tarixi bir səhv sayır, bunu qəbul etməyəcəklərini” bildirirdilər.[95]


1994-cü ildə Qəzvin və ətrafının Zəncan ostanından qopardılıb, ayrıca ostan elan edilməsi də ölkənin Türk əhalisinin etirazı ilə qarşılanmış, Qəzvində polis qüvvələri ilə yerli əhali arasında toqquşmalar olmuşdu.

1994-cü ildə Urmu Universitetinin tələbələri İran mediasında Türkləri aşağılayan verilişlərə etiraz olaraq nümayiş keçirdilər. Onlar eyni zamanda yerli televiziyada Türk dilində verilişlərin vaxtının artırılmasını, ana dilinin orta məktəblərdə və universitetlərdə tədris edilməsini tələb etdilər.

Mediada Türklərin aşağılanması məsələsi sonrakı illərdə də gündəmdə olmuşdur. Tələbələrin və əhalinin başqa təbəqələrinin dövlət başçılarına ünvanlanan məktublarında bu məsələ vurğulanmış, Pəhləvi dövrünün bu eybəcər praktikasına nəhayət son verilməsi tələb edilmişdir. 1995-ci ilin mayında İran Radio-Televiziya Şirkətinin keçirdiyi rəy sorğusuna təpki bu anlamda diqqəti çəkir. Şirkətin 11 suallıq sorğu vərəqində “Siz bir Türklə evlənməyə hazırsınızmı?”, “Qızınızı bir Türkə ərə verərsinizmi?”, “Türklərin dini məclislərində iştirak edərsinizmi? “,”Bir Türklə divar-divara qonşu olmağa hazırsınızmı?”, “Bir Türklə bir otaqda işləyə bilərsinizmi?”, “Türklərin çoxluqda olduğu məhlədə ev alarsınızmı?”, “Azəridilli şəhərdə yaşamağa hazırsınızmı?”, ”Bir Türklə get-gəl olmasına hazırsınızmı, bir Türkü evinizə qonaq çağırarsınızmı?” kimi suallar yer almışdır. Təbriz Universitetinin tələbələri mayın 9-da universitetin ərazisində bu sorğuya qarşı etiraz nümayişi keçirdilər. Güney Azərbaycan Milli İstiqlal Cəbhəsinin bu hadisə ilə bağlı 1995-ci ilin 10 may tarixli bəyanatında deyilir ki, ostandar Əbdüləlizadə universitetə gəlib, tələbələri “Vəhdət salonu”na toplayaraq, “min bir fırıldaqla bu nümayişi pozdu.”[96] Daha sonra sənəddə deyilir: “Fars şovinistləri cəhd edirlər Azərbaycan xalqının milli qurtuluş mübarizəsini Türk-Fars davasına çevirələr və beləliklə bu milli –mütərəqqi mübarizəni ləkələyələr. Biz bu zaman daha artıq ayıq olmalıyıq və bunu sübuta yetirməliyik: Biz heç [bir] xalqın düşməni deyilik. Biz ancaq xalqları əsarətə çəkən müstəmləkəçi mərkəzi dövlətə qarşı mübarizə aparmalıyıq... Azərbaycan torpaqları mərkəzi irtica tərəfindən işğal olunub və Azərbaycan xalqı bu torpaqlarda yabançılar, əsirlər kimi ömür sürürlər... Əsir olmuş millətin iki yoldan başqa seçməli bir yolu ola bilməz. Ya əsarət altında, həqarətlər, işgəncələrlə, murdar bir yaşayış, ya da ki, bütün var gücüylə işğalçı düşmanlarla kəskin bir mübarizə aparmaq. Başqa bir yolumuz yoxdur.”[97] Etiraz nümayişində iştirak edən tələbələrin yaydığı və rəhbərin, prezidentin ofisinə, İslam Şura Məclisinə, Şərqi və Qərbi Azərbaycan, Ərdəbil, Zəncan və Həmədan ostandarlıqlarına, bu ostanların imam-cümələrinə, eləcə də mətbuata göndərdikləri bəyanatın da dili çox sərt idi.[98] Burada tələbələr “hələ İranlının mövcud olmadığı, miladdan bir neçə min il əvvəl Azərbaycan torpaqlarında yerləşmiş Türk millətinin” şərəf və ləyaqətini təhqir edən bu rəy sorğusunu lənətləyir, Azərbaycanın İran tarixindəki fədakar rolunu xatırladır, “30 milyonluq Türkün beytül-malı hesabına” işləyən dövlət radio-tv şirkətinin (“Səda və Sima”nın) bu əməlini ölkədəki irqçi və aparteid qaydalarının bir nümayişi kimi dəyərləndirirdilər.

Tehran universitetlərində oxuyan Azərbaycandan olan tələbələr də öz növbəsində İslam Şura Məclisinin Azərbaycandan seçilmiş nümayəndələrinə müraciət qəbul etdilər.[99] Bu sənədin üzü rəhbərin Təbriz, Urmu, Zəncan, Həmədan və Ərdəbil şəhərlərindəki nümayəndələrinə, eləcə də ölkə mətbuatına göndərildi. Burada tələbələr beş bənddən ibarət tələblərini dilə gətirdilər. Birinci tələb dövlət radio-televiziya şirkətinin Türklərə münasibətdə təhqirli və aşağılayıcı verilişlərinə Azərbaycandan olan məclis nümayəndələrinin cavab verməsi gərəkliyi haqqında idi: “Bizim məclisdəki nümayəndələrimizə sualımız budur: Bu cür təhqir və aşağılamalara nə vaxt cavab verəcəksiniz? ” İkinci tələb mövcud anayasanın 15-ci maddəsinə uyğun olaraq “27 milyonluq İranlının dili olan Türkcənin” məktəblərdə tədrisi və ikidilli təhsilə keçid məsələsi haqqında idi. Məclis nümayəndələrindən istənilən üçüncü məsələ yeni yaranmış ostanın adında “Azərbaycan” sözünün olmaması və “Ərdəbil ostanı” adının dəyişdirilməsi gərəkliyi idi. Dördüncü məsələ Azərbaycanın iqtisadi və başqa sahələrdə getdikcə geriləməsi, Azərbaycandakı iki modern müəssisədən birinin başqa ostana köçürülməsi və burada durumun düzəldilməsi üçün “nümayəndələrdən ciddi diqqətin tələb olunması” haqqında idi. Sonuncu tələb dövlət radio-televiziyasının Təbriz, Urmu, Zəncan, Ərdəbil və Həmədan mərkəzlərində Türk dilində verilişlərin təşkili gərəkliyi haqqında idi. Açıq məktubun sonunda bu məsələlərin başqa tələbələr və əhali qrupları tərəfindən dəfələrlə qaldırıldığına baxmayaraq, onların hələ də həll edilmədiyi vurğulanırdı.[100]

Maraqlıdır ki, etirazlara baxmayaraq, dövlət radio-televiziya şirkətinin keçirdiyi rəy sorğusunun nəticələri mətbuatda çap edildi. Məlum oldu ki, rəyi soruşulan Farsların əksəriyyəti göstərilən suallara mənfi cavab vermişdir. Yəni onlar göstərilən məsələlərdə Türklərlə bir yerdə olmağa, onlarla qohum olmağa, onlarla əməkdaşlıq etməyə razı olmadıqlarını bildirmişlər. Özü-özlüyündə rəy sorğusunun nəticələri ölkədə millətlərarası münasibətlər sahəsində gərginliyin olduğunun göstəricisi kimi qiymətləndirilməlidir. Bu, eyni zamanda Türklərin durumunda yeni hadisə - ənənə halını almış etnik təhqirlərə Pəhləvi dövründən fərqli olaraq Türklərin artıq toplu olaraq dözmək istəməməsinin, ondan qəzəbləndiklərinin nümayişi kimi qiymətləndirilməlidir. Bu meyl özünü sonralar da göstərdi. Özəlliklə, 2006-cı ilin mayın 12-də dövlət xəbər agentliyi İRNA-nın rəsmi orqanı olan İran qəzetində çap olunmuş karikaturaya Türklərin fəal etirazı ölkə miqyasında ciddi gərginliyin yaranmasına səbəb oldu. Onminlərlə insanın spontan şəkildə, Azərbaycanın demək olar bütün şəhərlərində, eləcə də Tehranda küçələrə tökülüb, polislə toqquşması məsələnin bəsit bir karikatur məsələsi olmamasını göstərdi.

İran qəzetindəki karikatura Türkləri böcəyə (susək) bənzətmiş, “nə edək ki, bu böcəklər bizi də böcəkləşdirməsin?” başlıqlı məqalədə Türklərə və Türk dilinə açıq-açığına həqarət etmişdir. Həmin məqalədə “öldürməklə tükənməyəcək bu böcəklərin kökünü kəsmək üçün insanların ifrazatını tualetə boşaltmamaları, bununla bu böcəkləri ac saxlayaraq məhv edilmələri” kimi irqçi fikirlər yer almaqda idi. Etnik təhqirə ilk etiraz edən ölkənin müxtəlif universitetlərində oxuyan Türk tələbələri oldu. Təbriz və Tehran tələbələrinin etiraz çıxışları domino təsirilə yayıldı. İran qəzeti, bu karikatur müəllifinin işdən çıxarıldığını bildirib, “Azəridillilərdən” üzr dilədi, dil məsələsinə aşırı həssaslığın olmaması, hadisənin şişirdilməməsi gərəkliyinə çağırdı. Bu, milli hərəkat fəallarını daha da qəzəbləndirmiş oldu. İslam Şura Məclisində Azərbaycandan seçilmiş nümayəndələr də hakimiyyətin ayrı-seçkilik siyasətinə və Türklərə münasibətdə uyğulanan həqarətlərə kəskin etirazlarını bildirdilər. Əkbər Ələmi Məhəmməd Hüseyn Şəhriyarın İranda qadağan olunmuş məşhur “Tehranlı, eşşək sənsən, yoxsa mən?” şeirini sonacan oxudu. Yalnız bundan sonra Fars deputatlarla Türk deputatlar arasında qarşıdurma oldu. Qarşıdurma polis müdaxiləsindən sonra aradan qaldırdı.

İki həftə davam edən nümayişlər güc strukturları ilə toqquşmalar şəraitində keçdi. Təbriz və Tehran tələbələrindən sonra Əhər, Parsabad, Ərdəbil, Xoy, Mərənd, Zəncan, Soyuqbulaq (Mahabad), Sulduz, Urmu və başqa şəhərlərdəki qanlı toqquşmalarda 50-dən artıq nümayişçi öldürüldü,[101] yüzlərlə insan yaralandı, minlərlə nümayişçi həbsə atıldı. İranın alı dini rəhbəri Ayətüllah Xamnei bu olayların ortaya çıxmasını ənənəvi bəhanə - Qərbin təxribatları ilə izah etməyə çalışdı və “Azərbaycanın bu təxribatlara uymayacağı, düşmənə lazımi cavab verəcəyini” bildirdi. Bu hadisələr xarici ölkə mətbuatında da işıqlandırıldı.[102] İran səfirliyinin Bakıda və başqa ölkə paytaxtlarındakı səfirlikləri qarşısında etiraz piketləri oldu. Azərbaycan Respublikası Milli Məclisində İrandakı molla rejiminin anti-Türk, anti-Azərbaycan siyasəti şiddətlə qınandı. Türkiyədəki Milliyyətçi Hərəkat Partiyasının Gənəl Başqan Yardımçısı Atilla Kaya, partiyası adından 26 may 2006-cı il tarixli bəyanatla “Türklər üzərində oluşdurulan basqı ve yıldırma politikalarına itiraz edən İran Türklüyünün bu haqlı protestosunu qutlayıb, İran’dakı soydaşlarımıza həqarət içərən və onları aşağılayan bu cür yazı, rəsim, söz və uygulamaları da şiddətlə qınadıqlarını” bildirdi. Nümayişlərdə səsləndirilən şüarlar milli hərəkatın radikallaşdığının göstəricisi idi: “Türk dilini atmarıq, Fars dilinə satmarıq!”, “Türkün dili ölən deyil, Fars dilinə dönən deyil!”, “Türk dili İranda rəsmi dövlət dili olmalıdır!”, “Qarabağa uzanan yad əllər kəsilməlidir!”, “Qalx ayağa Azərbaycan!”, “Haray, haray, mən Türkəm!”, “Ölüm olsun faşizmə!”, “Ölüm olsun şovinizmə!”, “Qızıldan olsa qəfəsim, azadlığa var həvəsim!”, “Təbriz, Bakı, Ankara, Farslar hara, biz hara?! ,” Nə Şərqi, nə Qərbi, itin Farsdan nə fərqi!”,”Hər kəs ki bitərəfdi, Farsdan da bişərəfdi!”,”And olsun Səttar Xana, Tehran gərək odlana!”, ”Təəssübsüz millət gərək xar olsun!”, “Mən odam, odla oynama! Alışarsan, yanarsan!!”, “Azərbaycan var olsun, düşmənləri xar olsun!”

2006-cı il may ayının 28-də İslam Şura Məclisi binasının qarşısındakı nümayişdə oxunmuş qətnamə Azərbaycan/Türk milli hərəkatının mühüm tarixi sənədi sayılmalıdır. Bu sənədin qısa məzmunu aşağıdakılardan ibarət idi: Son 100 ildə İrandakı millətlər mədəni, ictimai, siyasi və iqtisadi şovinizmə və ayrı-seçkiliyə məruz qalmışlar. Fars şovinizmi yaxşı bilirdi ki, bir milləti yox etmək üçün ilk addım olaraq onu təhqir etmək və onun dilini aradan aparmaq lazımdır. 7000 illik keçmişi olan bu məmləkəti burada 2500 illik keçmişi olan Arya və Parslara məxsus məmləkətə çevirmək üçün onun tarixini təhrif etdilər. Qeyri-Farsların dillərinə Moğol və Ərəb vəhşilərinin sırıdığı dil (!!) adını qoydular və insan sayılmaları üçün onların öz kimliklərindən imtina etmələri və yalançı kimlik almaları üçün müxtəlif beyinyuma mexanizmlərindən istifadə edildi. Ana yasanın 15, 19 və 20-ci maddələrində əksini tapmış məhdud haqlar belə gerçəkləşmədi. Ölkə əhalisinin 70%-ə bərabər olan Fars olmayan millətlər və qövmlər 30 ildir ictimai, iqtisadi və mədəni ədalət gözləyir.

Məşrutə dövründə iqtisadi baxımdan birinci yerdə olmuş Azərbaycan geri getməkdədir. Azərbaycan ostanları ən çox mühacir verən ostanlar sırasındadır. Buranın təbii sərvətləri də mərkəzi ostanlara daşınır və orada emal olunur.
Mövcud siyasi idarəçilik bu ölkədəki millətlər və qövmlərin fəaliyyət sahəsini daraltmışdır. Təəssüf ki, mərkəzdəki [ümum-İran] siyasi partiyalar, siyasətçilər və bu ölkəni idarə edənlərin əksəriyyəti qövmi-milli maraqlara əsaslanan fəaliyyətləri ölkənin təhlükəsizliyinə təhdid sayır, ona separatizm, pan-Türkizm, pan-Ərəbizm kimi adlar qoyur.

Daxili siyasətdən əlavə, xarici siyasət sahəsində də sərhədin otayındakılarla ortaq mədəni və siyasi hissləri olanlara münasibətdə etinasızlıq var. Bu siyasətə bariz nümunə olaraq İran İslam Cümhuriyyəti dövlətinin qonşu Ermənistanla münasibətlərini göstərə bilərik. İslam məfkurəsinə görə, Müsəlmanların canına və malına təcavüz etmiş ölkələrlə əlaqə haram və batildir. Bəs necə olur ki, Müsəlman Azərbaycan Cümhuriyyətinin ərazisini işğal etmiş və beşdə bir milyon insanı yerindən-yurdundan didərgin salmış, on minlərlə qadın, uşaq və yaşlı Şiə Müsəlmanı qətl etmiş bu təcavüzkar ölkə ilə özəl münasibətlər qurulmuşdur?!

“Azərbaycan Milli Hərəkatı” adlı mədəni, kimlik və ədalət tələb edən xalq hərəkatı Azərbaycan millətinin bütün təbəqələrini öz sıralarında birləşdirir və uzun tarixi keçmişə malikdir. Şeyx Məhəmməd Xiyabaninin Azadistan hərəkatı, Milli hökumət (1945-46), inqilabın başlarında Müsəlman Xalq hərəkatı və hazırkı dövrdə Azərbaycan milli hərəkatı milli kimlik və milli maraqların təmin edilməsi uğrunda hərəkatdır. Belə bir zamanda İslam prinsiplərinə əməl etməyi özünün fəaliyyətinin əsası elan etmiş 9-cu hökumətdən bu cür qeyri-insani hərəkətlərin nəhayət dayandırılacağını gözləyirdik. Fəqət dövlətin icra etdiyi mədəniyyət proqramları göstərir ki, şovinist fikirlər hələ dövlət idarələrində dərin kök salıb. Rəsmi İran qəzetinin mətbuat əxlaqını ayaq altına alması və 35 milyon Müsəlman Türkə xəyanət etməsi bunun açıq göstəricisidir.[Daha sonra karikaturun mahiyyəti və bu hadisəyə etiraz hərəkatı təsvir edilir.] Amma demək lazımdır ki, bu etiraz yalnız bir karikaturaya etiraz deyil, bu, Türklərə münasibətdə uyğulanan 84 illik təhqir və ayrı-seçkiliyə etirazdır.

Keçmiş və indiki durumun müqayisəsi göstərir ki, mədəniyyət proqramları bir siyasi cərəyanın, bir siyasi qrupun siyasəti deyil, bu dövlətin yalnız bir dil, bir mədəniyyət, bir kimlik tanınmalıdır prinsipindən doğur. Büdcədən milyardlarla tümən ölkə əhalisinin 30%-nin mədəniyyətini, dilini, tarixini və kimliyini gücləndirmək üçün sərf edilir.

Deyilənləri göz önünə alaraq, biz, 28 may 2006-cı il (7 xordad 1385) tarixində İslam Şura Məclisinin qarşısında toplaşmış mitinq iştirakçıları, tələb edirik: Əsas tələblər:

Türk dilinin[103] rəsmən tanınması; qurama “Azəri dilinin” [anlayış olaraq] dövlət orqanlarında, ölkənin rəsmi yazışmalarında işlədilməsinin qarşısının alınması; uşaq baxçasından tutmuş universitetədək ölkənin Türklər yaşayan bölgələrində ana dilində təhsil;

Türkcə verilişlər verən ölkəmiqyaslı radio-televiziya mərkəzinin yaranması; Türk dil və ədəbiyyat qurumunun [“fərhəngistanın”], ölkə universitetlərində Türk dili kafedralarının yaradılması;

əlavə tələblər:

Ana yasanın 15, 19 və 20-ci maddələrinin icra edilməsi və bu qanunların Azərbaycan milləti və dilinin, İranın başqa millətlərinin tanınması yönündə dəyişdirilməsi;

Son hadisələrdə baş vermiş xəsarəti düzəltmək, Azərbaycan iqtisadiyyatının geriliyini aradan qaldırmaq, Tehran-Təbriz avtobanı, Urmu gölü körpüsü, Miyanə-Təbriz dəmiryol xətti, Quzey-Güney koridoru layihələrinin təkmilləşdirilməsi üçün 5 milyard tümənin (dolların) ayrılması;

Babək qalasına illik yürüşün rəsmən tanınması, ona olan məhdudiyyətin götürülməsi; Babəkin anadan olması gününün ölkənin rəsmi təqvimində “Azərbaycanın milli qəhrəmanı Babəkin təvəllüd günü” kimi rəsmiləşdirilməsi;

Son hadisələrdə qətl edilmiş insanların “şəhid” kimi rəsmiləşdirilməsi; onların ailələrinə maddi və mənəvi təzminatın verilməsi; bu qətllərin səbəbkarlarının cəzalandırılması; bütün Azərbaycan şəhərlərində Azərbaycan milli hərəkatının şəhidləri muzeyinin yaradılması; bu şəhidlərin adının küçələrə qoyulması; ölkənin rəsmi təqviminə bu günün “Azərbaycan şəhidləri günü” kimi daxil edilməsi;

Türkofobiyaya qarşı ciddi mübarizə; qövmi, irqi, dil sahəsində aparteyid əlamətlərinin ləğvi; mənhus Pəhləvi rejiminə aid irqçi fikirlərin işlədilməsinin qarşısının alınması; İran millətlərini təhqir edənlərin cəzalandırılması və bu sahədə qanunların qəbul edilməsi;

Azərbaycan coğrafiyasında bütün tarixi adların geri qaytarılması; özəlliklə son bölgüyə görə Azərbaycan tarixi adlarının Ərdəbil, Zəncan, Qəzvin, Həmədan, Ərak ostanlarında bərpa edilməsi; bu şəhər və ostanlardan ibarət olan Azərbaycan əyalətinin rəsmən tanınması; Sunqur, Qurvə, Bicar, Astara və başqalarının Azərbaycana qaytarılması; Türkcə adların qoyulmasına mane olmamaq;

İslam Şura Məclisinin nümayəndələrindən, hərəkat fəalları və uyğun orqanların nümayəndələrindən ibarət “Azərbaycan Millətinin Haqlarını Müdafiə Şurası” adlı komitənin təşkil edilməsi;

Son hadisələrdə həlak olmuş şəxslərin yas mərasimlərinin təşkilinə və burada insanların iştirakına icazənin verilməsi;

Azərbaycan siyasi məhbuslarının dərhal və qeyd-şərtsiz azad edilməsi; Azərbaycanda millətə atəş açanlar və nümayişçilərə qarşı zorakılıq etmiş şəxslərin tutulub cəzalandırılması;

Azərbaycandakı nəşriyyələrin çapının dayandırılması haqqında qərarın ləğv edilməsi;

İrşad və daxili işlər nazirlərinin son nümayişlərə münasibətinə görə sorğulanmaları; prezidentin [Mahmud Əhmədinejadın] İran mətbuat müəssisəsi müdirinin seçilməsinə birbaşa məsuliyyət daşıdığına, Novruz bayramı münasibətilə yalnız Farsdilliləri təbrik edib, İranın başqa millət və qövmlərini görməməzliyə vurduğuna görə Azərbaycan millətindən üzr istəməsi;

Azərbaycanın qərbində və Azərbaycanın başqa sərhəd şəhərlərində yerli əhalinin [milli] tərkibinin dəyişməsinə səbəb ola biləcək hər cür siyasətin ləğv edilməsi;

Fars şovinizmi ilə ciddi mübarizənin başlanması simvolu kimi İran qəzetinin çapının tamamilə dayandırılması; İranda milli və qövmi aparteyidin tamamilə dayandırılması;

Ermənistanla siyasi, ticari və mədəni əlaqələrin tamamilə kəsilməsi;

Pan-Farsizm siyasətinin (Əfqanıstan, Tacikistan və İranın birliyi) tamamilə dayandırılması; İranı Fars dövləti və “Persia” kimi təqdim etməkdən əl çəkilməsi; İranın çoxmillətli ölkə kimi təqdim edilməsi və ana yasada İran millətləri və qövmlərinin hamısının rəsmən tanınması;

Azərbaycanın iki tayı arasında mədəni sərhədlərin götürülməsi və Araz çayı üzərində dostluq və barış körpülərinin tikilməsi;

Xəzər dənizinə “Mazandaran” adının qoyulmasının qarşısının alınması;

Fars dilində əskinaslarla yanaşı ölkədə Azərbaycan Türkcəsində də əskinasların çap edilməsi;

Azərbaycanın əski və milli abidələrinin təmiri və onların dağıdılmasının önlənməsi; özəlliklə Təbriz Ərk qalası və ətrafında səliqə-sahmanın yaradılması; Təbriz Ərkinin yanında Azərbaycan Türk Dili və Ədəbiyyatı Qurumunun qurulması;

Azərbaycanda turistik imkanların yaradılması;

Təbrizdə Azərbaycan ilə dostluq evinin, Urmuda Türkiyə ilə dostluq evinin yaradılması;

Azərbaycanda, özəlliklə Muğan çölü və Qoşaçayda (Miyandabda) moderm əkinçilik imkanlarının yaradılması;

Azərbaycanın tarixi abidələrinin səd sularının altında qalmasının önlənməsi və bu iş üçün xüsusi büdcənin ayrılması;

Azərbaycanın tarixi abidələrinin Təbriz, Urmu, Ərdəbil, Qəzvin, Həmədan və Zəncan muzeylərinə geri qaytarılması;

Azərbaycan Türkcəsində kitabların çapına yardım etmək, Azərbaycan tarixi və ədəbi kitablarının araşdırılması və siyahıyaalınması məqsədilə Azərbaycan Nəşr Fondunun yaradılması;

Azərbaycanın bütün şəhərləri arasında sürətli qatar yollarının çəkilməsi və hava limanlarının tikilməsi, eləcə də Azərbaycan tranzit yollarının genişləndirilməsi; İpək Yoluna diqqətin yetirilməsi;

Türkmən, Qaşqay, Xorasan Türkləri, Xələc Türkləri adı ilə İrandakı Türk millətlərinin rəsmən tanınması;

Azərbaycanda sərmayə qoyuluşunun qarşısında duran hüquqi və başqa maneələrin ləğv edilməsi;

Azərbaycanın milli mütəfəkkirlərinin, böyüklərinin, qəhrəmanlarının və başqalarının Azərbaycanın və İranın bütün şəhərlərində heykəllərinin qoyulması;

Milli Sərdar Səttar Xanın və Milli Savunar Səfər Xanın şərəfli məzarlarının Təbrizə gətirilməsi;

Ölkənin rəsmi təqviminə Azərbaycanın milli böyüklərinin doğum və ölüm günlərinin, tarixi dövrlərinin daxil edilməsi.

Dövlət 29-30 may 2006-cı il tarixlərinə, yəni Azərbaycan Milli Qurultayına qədər gərək qərar versin. Əks təqdirdə Azərbaycanın milli tələblərinin qəbul olunmamasının məsuliyyəti dövlətin və İslam Cümhuriyyətinin boynunda qalır.[104]

İran dövləti, etiraz hərəkatının daha da radikallaşmasından qorxaraq mayın 28-dəki Tehran mitinqini dağıtmaq və başqa şəhərlərdə planlaşdırılan mitinqlərin qarşısını almaq üçün hərbi-polis gücünü toplayaraq hücuma keçdi. Hərəkat iştirakçıları kütləvi surətdə həbs edildilər. Nümayiş və mitinqlərin keçirilməsinin qarşısı alındı. Ümumilikdə iki həftə sürən etiraz hərəkatını 1979-cu ilin sonlarındakı Müsəlman Xalq hərəkatından sonra ən güclü dalğa kimi dəyərləndirmək lazımdır. 28 may tarixli Tehran mitinqinin bu qətnaməsini isə ölkə daxilində milli hərəkatın qarşısında duran vəzifələri özətləyən bir sənəd kimi qiymətləndirmək olar.

Bu sənədin 5-ci bəndi Bəzz qalasına (Kəleybər yaxınlığında) yürüşün iştirakçıları haqqında idi. 1992-1993-cü illərdən sürüb gələn bu milli yürüş artıq 2006-cı ildə İran hakimiyyətini ciddi şəkildə narahat etdiyindən, bu yürüşün qarşısını almaq üçün o, kütləvi həbslərin keçirilməsini zəruri hesab etmişdi. Bəzz qalası hərəkatının təşkilində günahlandırılan yüzlərlə fəal məhkəmə qarşısında durmuş, onlarla yürüş iştirakçısı uzunmüddətli həbs cəzası almışdı. 2000-ci illərin başlarından Bəzz qalası hərəkatı yüksələn xətlə genişlənir, müşahidəçilərin təxminlərinə görə bu yürüşə bəzi illərdə bir milyona yaxın insan qatılırdı. IX yüzildə Ərəb/İslam fütuhatına qarşı yönəlmiş Xürrəmilər hərəkatının lideri Babəkin (816-838) ad günü sayılan iyul ayının başlarında Bəzz qalasına insanların kütləvi yürüşü, qalanın ətəklərində iştirakçıların mədəni-siyasi tədbirləri ilə tamamlanırdı.[105] Bəzz qalası hərəkatı milli şüurun biçimlənməsinə, milli hərəkatın təşkilatlanmasına təkan verməkdə idi.

Bəzz qalasına yürüşün qarşısı faktik olaraq alındığından milli hərəkat fəalları fəaliyyət sahəsini dəyişdirib, onu futbol stadionlarına yönəltdi. Təbriz, Tehran, İsfahan və ölkənin başqa şəhərlərində futbol sahələrinə axışan milli hərəkat fəalları Təbrizin “Traxtor” futbol komandasını dəstəkləmiş, milli şüarlar səsləndirmişlər. Yuxarıda sıralanan şüarlara əlavə olaraq 2013-cü ildən başlayaraq “Azərbaycan İran deyil!” şüarı populyarlıq qazanmışdır.

Milli hərəkat 2011-ci ildə Urmu gölünün sürətlə quruması və hökumətin bu işə laqeyd qalmasına qarşı etiraz mitinqləri təşkil etməyə başladı. Urmuda, Təbrizdə, Zəncanda, başqa şəhərlərdə etiraz mitinq və yürüşlərinə qoşulanlar gölün qurumasına qarşı hakimiyyətdən təsirli tədbirlər görməyi tələb etmiş, tələblərini mitinq qətnamələri formasında hakimiyyətin başında duranlara göndərmişdilər. İslam Şura Məclisində Azərbaycandan olan nümayəndələr eyni tələblərlə hökumətə müraciət edərək, təcili tədbirlər görülməsini tələb etmişlər. Əhmədinejad hökuməti bu tələblərin qarşısında adətən susmuş, bu mümkün olmadıqda, bu problemi (Urmunun qurumasını) əngəlləmək üçün müxtəlif layihələr üzərində işlərin getdiyini, ya gölün qurumasının təbiət hadisəsi olduğunu iddia edərək, bu sahədə təsirli bir işin görülməsinin mümkün olmadığını bildirmiş, ya da Urmu gölündə suyun səviyyəsini olduğu kimi saxlamaq üçün küllü miqdarda vəsaitin lazım olduğunu, ancaq hökumətin bu vəsaiti tapa bilmədiyini iddia etmişdi. Birləşmiş Millətlər Təşkilatı Ətraf Mühit Proqramına (UNEP) görə, Urmu gölü 500 kilometr radiusda məskun olan 76 milyonluq əhali üçün, özəlliklə bu su hövzəsinin ətrafındakı əkinçilik bölgəsi (6,4 milyon sakin) üçün həyati vacib şərtlərdən birisidir. 1995-ci ildən sonra bu gölün sürətlə qurumasının bir neçə səbəbi vardır: iqlim dəyişmələri və yerüstü suların ifrat istifadəsi səbəbindən gölə daxil olan suyun azalması (65%), hövzənin çayları üzərində su sədlərinin tikilməsi (25%), gölün səthinə düşən yağıntının miqdarının azalması (10%).[106]

Yuxarıda da deyildiyi kimi, Quzey Azərbaycanda 80-ci illərin sonlarında milli-demokratik hərəkatın gedişi, Sovet-İran sərhədlərinin sökülməsi və Arazın şimalında “Azərbaycan Respublikası” adında dövlətin yaranması Güney Azərbaycanda milli hərəkatın yeni mərhələsinin başlanmasına təkan verdi. Quzeydəki nüfuzlu siyasi partiya və təşkilatların fəaliyyətləri Güneydə də izlənilir, onların məramnamələri (proqramları) ciddi müzakirə edilirdi. Məhz bu məramnamələri əsas alaraq Güney Azərbaycanda və Tehranda eyni Xalq Cəbhəsi, Müsavat və s. adlarda siyasi qruplar öz varlığını bildirdi. Ədəbi-siyasi dərnəklərin də sayında və fəaliyyətində dəyişiklik görünməkdə idi. Bu təşkilatlar üçün bal ayı 1993-cü ilin iyun ayına – Bakıda hakimiyyətin dəyişməsinədək davam etdi. Son hadisə milli fəallar üçün sarsıdıcı zərbə oldu. Buna baxmayaraq milli fəalların təşkilatlanması prosesi davam etdi.

Bu dövrdə yaranmış ilk siyasi təşkilatlardan biri Cənubi Azərbaycan Milli Azadlıq Hərəkatıdır (CAMAH). Təşkilatın nümayəndələrinin iddialarına görə, o, 1988-ci ildə qeyri-mütəşəkkil halda fəaliyyətə başlamış, 1991-ci ildən sonra gizli və qapalı fəaliyyətini davam etdirmişdir. Daha sonra “1994-cü ildə müəyyən məramnamə və nizamnamə çərçivəsində təyin etdiyi daxili təşkilatçılıq qayda-qanunlarına uyğun varlığını elan etmiş, öz milli-siyasi mübarizəsi və təbliğatına başlamışdır.”[107] Iddialara görə, həmin ildən sonra təşkilatın Güney Azərbaycanda, İranın daxilində, Quzey Azərbaycanda və bir sıra xarici ölkədə komitə və şöbələri fəaliyyətə başlamışdır.Təşkilatın məramnaməsində bildirildiyi kimi, “CAMAH beynəlxalq demokratik təşkilatlarla, fars şovinizminin əsarətində olan xalqların, o cümlədən şovinist siyasətin nəticəsində zərər çəkən farsların demokratik qüvvələri ilə, eləcə də Cənubi Azərbaycanda milli azadlıq və demokratiya uğrunda mübarizə aparan mövcud qüvvələrlə qarşılıqlı əlaqədə, lakin tam müstəqil məramnamə, nizamnamə və təşkilati quruluşla Azərbaycanda müstəqil və demokratik dövlətin bərqərar edilməsi uğrunda mübarizə aparır. CAMAH Cənubi Azəraycan türklərinin milli-siyasi istiqlaliyyətinə nail olmaqla yanaşı Cənubi Azərbaycan vətəndaşlarının şəxsi, iqtisadi, siyasi, söz, mətbuat, hərəkat, əqidə, məşğuliyyət, mədəniyyət və s. azadlığını təmin etməyə qadir olan iqtisadi-siyasi proqram irəli sürüb, bu proqramı gerçəkləşdirmək əzmindədir... CAMAH öz məramnaməsini gerçəkləşdirmək üçün dinc mübarizə formalarından, yəni öz məramının təbliği, baykot, piket, dinc nümayiş, tətil və parlament mübarizələri formalarından istifadə etməyə üstünlük verir. Lakin mövcud istibdad rejimi[ndə] bu demokratik mübarizə formalarına imkan verilmədiyi halda CAMAH milli azadlıq uğrunda mürtəce rejimlə silahlı mübarizə aparmaq hüququnu özündə saxlayır.”[108] İrandakı mövcud rejim dinc danışıqlar yolu ilə Cənubi Azərbaycan Türklərinin milli hüquqlarını tanıdığı halda

CAMAH, “Cənubi Azərbaycana İran dövləti çərçivəsində Cənubi Azərbaycanın bütün tarixi torpaqlarını əhatə edən məkanda Muxtar Respublika statusunun verilməsi;

Cənubi Azərbaycan Muxtar Respublikasının müstəqil anayasasının, himninin və bayrağının təsdiq edilməsi; Cənubi Azərbaycan Muxtar Respublikasının qanunverici, məhkəmə və icra orqanlarının müstəqilliyi; Cənubi Azərbaycan Muxtar Respublikasının müstəqil anayasa məhkəməsinin yaradılması; Cənubi Azərbaycan Muxtar Respublikasında Azərbaycan türkcəsinin dövlət dili elan edilməsi; Fars bölgələrində Azərbaycan türkcəsinin təbliğ və tədris edildiyi həcm və dərəcədə Cənubi Azərbaycan Muxtar Respublikasında fars dilinin təbliğ və tədris edilməsi;Cənubi Azərbaycan Muxtar Respublikasına bütün dünya dövlətləri ilə müstəqil mədəni, iqtisadi əlaqələr qurmaq hüququnun verilməsi” və s. şərtlərdə İran daxilində muxtar dövlət modeli təklif edir. Muxtar dövlətdə dinin dövlətdən ayrı olması, “Şimali Azərbaycan və Türkiyə Cümhuriyyəti ilə münasibətlər istisna edilməklə xarici siyasət məsələlərinin həll edilməsi səlahiyyətinin mərkəzi dövlətin ixtiyarına verilməsi; Şimali Azərbaycan və Türkiyə Cümhuriyyəti ilə olan sərhədlər istisna olmaqla Cənubi Azərbaycan Muxtar Respublikasının başqa dövlətlərlə olan sərhədlərinin müdafiəsi mərkəzi dövlətin ixtiyarında olan qoşun növlərinin öhdəsinə tapşırılması; pul kəsmək hüququnun mərkəzi dövlətdə olması” CAMAH-ın muxtariyyət modelinin önəmli müddəalarıdır.[109] Dinc mübarizə yolu ilə Güney Azərbaycana muxtariyyətin mümkün olmadığıı təqdirdə CAMAH-ın məramnaməsi, silahlı yolla onu (Cənubi Azərbaycanı) azad etmək haqqının olduğunu bildirir. Həmçinin məramnamədə bu təşkilatın “ali məqsədinin müstəqil, vahid və demokratik Azərbaycan dövlətinin yaradılması” olduğu bəyan edilir.

1996-cı ildə İran İslam Şura Məclisinə seçkilər zamanı milli hərəkatın təşkilatlanmasında mühüm yeniliklər ortaya çıxdı. Təbriz Universitetinin əməkdaşı Mahmud Əli Çöhrəqani (Çağrı Çöhrəqanlı) Təbrizdən Məclisə namizədliyini irəli sürərək, uğurlu seçki kampaniyası təşkil edə bildi. Onun kampaniya zamanı müdafiə etdiyi əsas müddəalar Azərbaycan Türkcəsinə rəsmi statusun verilməsi və Azərbaycan iqtisadiyyatının geriləməsinin qarşısının alınması gərəkliyi idi. Çöhrəqaninin bu tələbləri seçicilərin rəğbətini və səsini qazandı. Ancaq hadisələrin bu şəkildə inkişafı İran güc strukturlarını hərəkətə keçirdi. Məclis üzvlüyünə namizədlər arasında ən çox səs almış Çöhrəqani, iki həftəlik həbsə atıldı. İşgəncələr nəticəsində o, Məclisə namizədliyindən imtina etdi. Bu hadisə may ayının 12-də Təbrizdə çoxminli seçicilərin qəzəbli nümayişinə səbəb oldu. Polislə toqquşmada bir neçə nümayişçi həlak oldu. Növbəti 2000-ci il seçkilərində lap əvvəldən Çöhrəqaninin öz namizədliyini yenidən irəli sürməsi cəhdinin qarşısı alındı. Bu zaman artıq CAMAC yerli strukturlarını qura bilmiş, Çöhrəqanini lider seçmişdi. Sonuncunun xaricə mühacirətindən sonra o bu partiyadan ayrılmış, əsasən xaricdə fəaliyyət göstərən Güney Azərbaycan Milli Oyanış Hərəkatı (GAMOH)[110] adlı təşkilat qurmuşdur.

İslam iqilabından sonra İrandan xarici ölkələrə köçmüş böyük miqdarda (4 milyon təxmin edilir) mühacirlər arasında Türklərin sayı güman ki, ölkə əhalisində Türklərin (40%) sayına uyğun idi. Bu mühacirlərin xeyli hissəsi sol siyasi partiya və təşkilatların (Mücahidlər, Fədailər, Tudə və b.) üzvü idi. Siyasiləşmiş mühacir kütləsi xaricdə sürətlə təşkilatlandı.

Türklərin xeyli hissəsi əvvəllər mövcud olmuş İran kültür dərnəklərinə qatılmadılar, əvvəlki nəsildən fərqli olaraq onlar özlərinin kültür dərnəklərini yaratdılar. Avropanın əsər ölkələrində - Birləşmiş Krallıq, İsveç, Norveç, Finlandiya, Danimarka, Almaniya, Fransa, Hollandiya və başqa ölkələrdə Azərbaycan kültür mərkəzləri yarandı, bəzilərində (İsveç, Almaniya və s.) isə onların federasiyaları işə başladı. ABŞ və Kanadadakı kültür dərnəkləri Avropadakılar qədər fəal olmasa da, yeni nəsil mühacirlərin təşkilatlanması işinə təkan verdi. Kültür dərnəkləri adlanmasına baxmayaraq, onlar fəal şəkildə siyasi işlərə də qarışdılar. Bu dərnəklərin bazasında əsasən xaricdə iş aparan siyasi təşkilatlar yarandı. Maraqlıdır ki, sol təşkilatların Türk fəallarının xeyli hissəsi əvvəl üzv olduqları partiyalarını tərk edib, milli əsasda partiya quruculuğu işinə girişdi.

Əsasən xarici ölkələrdə iş aparan siyasi təşkilatları nizamnamə məqsədlərinə görə bir neçə qrupa bölmək olar.

Nizamnaməsində Güney Azərbaycanın istiqlalı məqsədini qoymuş siyasi qurumlar arasında aktivliyinə görə Vahid Müstəqil Azərbaycan Cəbhəsi, Güney Azərbaycan Milli İstiqlal Cəbhəsi, Güney Azərbaycan Milli Dirçəliş Partiyası, Azərbaycan Qurtuluş Təşkilatı, Azərbaycan İstiqlal Şurası, Azərbaycan Milli Hərəkatı, Güney Azərbaycan İstiqlal Partiyası, Güney Azərbaycan Milli Azadlıq Cəbhəsi, Azərbaycan Demokratik Milli Birlik Şurası fərqlənmişdir. Bu təşkilatların önəmli hissəsi 2014-cü ilin martında Sürgündə Güney Azərbaycan parlamenti adlı qurumda birləşdiklərini bəyan etdilər. Siyasi təşkilatların məramnamələri bir qayda olaraq Azərbaycanın dramatik tarixinin, özəlliklə yaxın keçmişinin analizi ilə başlanır. Pəhləvilər və İslam Cümhuriyyəti dövründə Türklüyə qarşı zülm siyasətinin yeridildiyi bildirilir. Eyni zamanda Məşrutə hərəkatından başlayaraq yerli muxtar idarəçilk uğrunda mübarizə təcrübəsinin uğursuzluğu səbəbindən istiqlal məramının qoyulması zərurəti əsaslandırılır. Məsələn, Güney Azərbaycan İstiqlal Partiyasının (GAİP) məramnaməsində deyilir:” Əgər İran çərçivəsində hər hansı digər totalitar idarəetmə sistemi demokratiya və insan hüquq və azadlıqlarını konstitusiya və ya vədlərində qeyd etsə belə, o da İran İslam rejiminin Əsas qanununda olduğu kimi kağız üzərində qalacaq və heç zaman həyata keçməyəcək. Yuxarıda qeyd olunan səbəblərə əsasən, İran adlanan ölkədə millətlərin öz milli və insani haqlarını əldə etməyin tək yolu millətlərin istiqlalıdır. Biz, İran adı altında əsarətə məhkum olmuş millətlərin öz müqəddəratını təyin etməkləri üçün müstəqil dövlətlərinin yaranmasını yeganə yol bilirik və bu millətləri Fars şovinizminə qarşı vahid cəbhədə birliyə dəvət edirik və onlara birlikdə Fars şovinizmini yenildərək öz müstəqil dövlətlərimizi qurmağı təklif edirik.”[111]

Xarici ölkələrdə Azərbaycan adına fəaliyyət göstərən təşkilatların bəzisi muxtariyyət uğrunda mübarizənin perspektivsiz olmadığını bəyan edir, bunu “bir İran milləti, müxtəlif qövmlər” düsturu ilə nəzəri cəhətdən əsaslandırırlar.[112] Onların arasında nüfuzlu akademik kimliyi olan şəxslər də vardır. Əsasən Azərbaycan Demokratik Federalistlər Hərəkatı ilə təmsil olunmuş bu qrupun təklif etdiyi muxtariyyət modeli istiqlalçı kəsimin şiddətli tənqidlərinə məruz qalmaqdadır.

Bu arada onu da əlavə etmək gərəkdir ki, İranın özündə federalizm məsələsi Pəhləvi dövründən fərqli olaraq artıq müzakirə edilə bilir. Mediada bu mövzuda arada-bir məqalələrin çıxması İran tarixində yeni hadisədir. “İranda federalizm” başlıqlı məqalələr toplusunun[113] çıxması da qeyri-adi hadisə sayılmamalıdır. Bu kitabı Azərbaycanlı Biliyurdlular Toplumunun Araşdırma Mərkəzi – ABTAM çap etdirmişdir. Burada verilmiş elmi məqalələrdə federalizm anlayışı və parktikası haqqında geniş məlumat verilir, qədim dövr və orta çağlar İranın idarəçilik xüsusiyyətləri, özəlliklə yerli hakimlərin imperatorluğun mərkəzindən uzaq olduğu üçün nisbi müstəqilliyi, Pəhləvilər dövründəki ifrat mərkəziyyətçilik haqqında danışılır. Məsələlərə yanaşma “çoxmillətli İran” prinsipinə əsaslanır. Eyni zamanda İranın demokratikləşməsi üçün onun federallaşmasının zəruri olması elmi fikri bir neçə bölmədə vurğulanır.

Ölkə daxilində milli hərəkatı təmsil edən bəzi qruplar mədəni muxtariyyət şüarlarını irəli sürürlər. Bəzi qruplar milli dillərə rəsmi statusun verilməsini hərəkatın indiki mərhələsi üçün yetərli sayırlar. Bəziləri isə “İranı biz qurduq, niyə onu Farsların ixtiyarına buraxaq” kimi fikirlər irəli sürməkdə, başqa sözlə “bütöv İran” uğrunda mübarizəni gərəkli sayırlar.[114]

Beləliklə, İran İslam Respublikası və Türklük mövzusunu yekunlaşdırmış olsaq, İslam Respublikası dövlətinin ölkədəki Türklüyə münasibəti prinsip etibarı ilə əvvəlki Pəhləvi rejiminin siyasətinin davamı olduğunu göstərməliyik. Teokratik hakimiyyət də Türklərə adi haqlarını verməkdən imtina etdi. Yeni İran anayasasının ölkədəki “qövmlərin və tayfaların bərabərliyi” haqqında təntənəli vədinə baxmayaraq, İslam Cümhuriyyətinin mövcudluğu dövründə Pəhləvi dövrünün Türk düşmənliyi daim ayaqda olmuş, Türklüyün varlığı İranın bütövlüyü üçün təhlükə sayılmış, dövlət aparatı, ölkənin irqçi ziyalı kəsimi, eləcə də Türk dönükləri Türk əhalisi arasında doğru-düzgün milli kimliyin yaranmasına mane olmuş, Türk milli hərəkatını amansızcasına təqib etmişlər. Ana yasanın 15-ci maddəsində, eləcə də “Nahiyyə özünüidarəsinin [“xodgərdani”] hüquq və vəzifələri” adlı qanunda nəzərdə tutulmuş “yerli dillərin” istifadəsi, bu dillərdə yerli idarəçilik orqanlarında istifadə, yerli mədəniyyətlərin tədqiqi və təbliği sahəsində nəzərdə tutulmuş müddəalar yerinə yetirilməmiş qaldı. İran dövləti son onillərdə Türklüyün milli cəhətdən təmərküzləşməsi və təşkilatlanmasının qarşısını almağa çalışdı.

Bununla belə Pəhləvi dövründən fərqli olaraq Türklərin millətləşməsi sürəcində yeni meyllər özünü göstərdi. Bu sürəcə Araz çayının quzeyində eyniadlı, eynimillətli Azərbaycanın/Türklüyün müstəqilliyini bərpa etməsi həssas amil oldu. Son dövrün ən gözəçarpan yeniliklərindən biri milli ziyalıların Azərbaycan/Türk məsələsini ideoloji-tarixi baxımdan qətiyyətlə müdafiə etmələri oldu. Millətin tarixi haqqında İran rəsmi tarixçiliyindən fərqli milli (Türkçü) konsept biçimləndi və gənc nəslin rəğbətini qazandı. Milli hərəkat daxilində ideoloji-siyasi cərəyanların meydana çıxması da İranda Türklərin millətləşmə səviyyəsinin yüksəlməsinin göstəricisi kimi dəyərləndirilə bilər.

[1] Conrad Komorowski, Carter on the Shah, Daily World, January 12, 1980; С.Л.Агаев, Иран. Между прошлым и будущим. События. Люди. Идеи. Москва: Политиздат, 1987, с.17.

[2] The Middle East, July 1978, p. 14.

[3] Ervand Abrahamian, Iran Between Two Revolutions, Princeton: Princeton University Press, 1982, p.498.

[4] Dilip Hiro, İran Under the Ayatollahs, London and New York: Routledge and Kegan Paul, 1985, pp.66-68.

[5] Baxın: Eldar Babayev, Cənubi Azərbaycan 1978-1979-cu illər İran inqilabında, Şövkət Tağıyeva və Nəsib Nəsibzadə (red.), Cənubi Azərbaycan tarixi məsələləri, Bakı: Elm, 1989, s. 98-142; Şövkət Tağıyeva, 1978-1979-cu illər İran inqilabından sonra Cənubi Azərbaycanda milli hüquqlar uğrunda mübarizə, Şövkət Tağıyeva və Nəsib Nəsibzadə (red.), Cənubi Azərbaycan tarixi məsələləri, s.143-174; Şövkət Tağıyeva, Əkrəm Rəhimli (Bije), Səməd Bayramzadə, Güney Azərbaycan. Məlumat kitabı, s.296-303; Maşalla Rəzmi, Azərbaycan və combeşe tərəfdarane Şəriətmədari dər sale 1358, Stokholm: Tribun, 2000, s.1-200.

[6] Bu bilgi hadisələrin iştirakçıları ilə söhbətlərdən alınmışdır.

[7] Keyhan, 27.03.1979.

[8] Yenə orada, 29. 03. 1979.

[9] Ayəndeqan, 04. 04. 1979.

[10] Bəhram Əfrasiyabi, Səid Dehqan, Taleqani və tarix, Tehran: Nilufər, 1360, s.365-368.

[11] С.Л.Агаев, Иран: Рождение республики, Москва: Политиздат, 1984, с.274.

[12] Ayəndeqan, 09. 07. 1979.

[13] Yenə orada.

[14] Nəsib Nəsibzadə, Bölünmüş Azərbaycan, bütöv Azərbaycan, Bakı: Ay-Ulduz, 1997, s. 212.

[15] Ettelaat, 20. 12. 1979.

[16] Yenə orada.

[17] Keyhan, 29.12.1979.

[18] Yenə orada, 20.04.1980.

[19] Təbriz doğumlu Şəriətmədari, Qumda yaşamış, burada Şiə nəzəriyyəsi sahəsində görkəmli alim kimi yetişmişdir. Müəllimi Ayətüllah Borucerdinin ölümündən sonra böyük ayətülla (ayətüllahül-üzma) rütbəsi almışdır. Ağ inqilabın başlanmasından sonra anti-Şah hərəkatına qoşulmuş, 1963-cü ildə həbs edilmişdir. Ancaq bu, onun radikallaşmasına səbəb olmamış, dini-siyasi hərəkatın mötədil qanadını təmsil etmişdir. Həmin il Ayətüllah Xomeyninin böyük ayətüllah ünvanı alması və Şahın represiyyasından canını qurtarmasında mühüm rolu olmuşdur. 1978-ci ilin yanvarında Şah polisinin dini məktəbin iki tələbəsini öldürməsindən sonra açıq anti-Şah mövqeyi tutmuşdur. İnqilab zamanı onun yumşaq liberal mövqeyi ilə Xomeyninin radikal mövqeyi toqquşmuş, İranda teokratik rejimin yaranmasına mane olmağa çalışmışdır. Ayrıntılı bilgi üçün, məsələn, baxın: Dilip Hiro, İran Under the Ayatollahs, p. 117-119; İmpact İnternational, 25 April-8 May 1986, London, vol 16:8, p. 15; Brenda Shaffer, Borders and Brethren. İran and the Challenge of Azerbaijani İdentity, Cambridge and London: MİT Press, 2002, p. 101-103; Şəriətmədarinin 21 Azər hərəkatına və Milli hökumətin fəaliyyətinə münasibəti birmənalı olmamış, 1946-cı ilin sonunda Şah qoşunlarının Azərbaycanı yenidən işğalını alqışlamış, Şahı Təbrizdə qarşılayanlar arasında yeganə yüksək rütbəli din xadimi olmuşdur. Baxın:. Maşalla Rəzmi, Azərbaycan və combeşe tərəfdarane Şəriətmədari dər sale 1358, s.24.

[20] Dilip Hiro, İran Under the Ayatollahs, p. 139.

[21] İran Times, 9 February 1979. Alıntı: Dilip Hiro, İran Under the Ayatollahs,s. 118.

[22] Ettelaat, 2 ordibeheşt 1358 (22 aprel 1979?)

[23]Yetmiş neçə nəfərlik bu məclisdə hakim İslam Cümhuriyyəti Partiyasının üzvü olmayan bir neçə nümayəndədən biri olan Müqəddəm-Mərağeyi İranın gələcək parlamentinin faktik olaraq iki qatdan ibarət olması təklifini irəli sürdü. Onun fikrincə, üst qatın – Məclise-Əyalatın (Əyalətlər Məclisi) varlığı hakimiyyətin mərkəzi hökumətin əlində cəmləşməsinə mane ola bilərdi. Brenda Shaffer, Borders and Brethren. İran and the Challenge of Azerbaijani İdentity, p.91.

[24] Ayrıntılı bilgi üçün baxın: Şövkət Tağıyeva, Əkrəm Rəhimli (Bije), Səməd Bayramzadə, Güney Azərbaycan. Məlumat kitabı, s.310-311; Maşalla Rəzmi, Azərbaycan və combeşe tərəfdarane Şəriətmədari dər sale 1358, s. 16-195; Dilip Hiro, İran Under the Ayatollahs, p.139-143; Brenda Shaffer, Borders and Brethren. İran and the Challenge of Azerbaijani İdentity, p.95-101; Middle East Economic Digest, vol.23, no-s 49, 50, 51/52, vol. 24, no 2.

[25] Dilip Hiro, İran Under the Ayatollahs, p.141.

[26]Fransız qəzetçiləri ilə söhbətində Ayətüllah Şəriətmədari onların muxtariyyət haqqında sualına cavab olaraq demişdir: “Bizin əqidəmizə görə, indiki vaxtda İran və onun ərazi bütövlüyü məsələsi muxtariyyət məsələsindən daha mühümdür... İranlı olmaq icab edir ki, bu mətləblər indi qaldırılmasın. Qoyun məmləkətdə sakitlik və dinclik yaransın.” (Ayəndeqan, 31 may 1979). Güntay Gəncalpın “Yolatayın xatirələri” adlı romanında Ayətüllah Şərətmədarinin İran/Fars dəyərlərinə ifrat bağlılığı haqqında çox maraqlı və həqiqətə uyğun fikirlər vardır. Baxın: Güntay Gəncalp, Yolatayın xatirələri, Bakı: Qanun, 2013, s. 236-243.

[27] Amerikalı araşdırmaçı S. Enders Wimbush Təbrizdəki üsyanı xaricilərin təhrik etməsi fikrini tənqid edərək, məsələn, göstərirdi ki, Sovetlərin Güney Azərbaycandakı milli hərəkatdan uzaq durmasının birinci səbəbi bu hərəkatın Sovet Azərbaycanına keçə bilməsi təhlükəsi idi. S. Enders Wimbush, Iran’s Ethnic Factions Threaten to Split the State, California, Santa Monica: The Rand Corporation, 1980, s.4.

[28] Keyhan, 21 aprel 1979; Ayəndeqan, 8 iyul 1979.

[29]Yoldaş, 1979, № 8, s. 30; Azərbaycan (Bakı), 1980, № 1, s. 61. Təsis yığıncağı haqqında geniş məlumatın tam mətni burada verilmişdir.

[30] Yoldaş, 1979, № 8, s. 30.

[31] Ayəndeqan, 10 may 1979.

[32] İnqilab yolunda, № 9-10, 20 mart 1981, s. 40.

[33] Baxın: İbrahim Rəfrəf, Ortoqrafi çalışmalarımız və bugünkü tələblər və təkliflər, Varlıq, yaz 1383, sayı 132-1, s. 86-91; Əlirza Sərrafi, Ortoqrafi seminarının qərarları beş illik sınaqdan sonra, Varlıq, qış 1385, sayı 143, s. 53-55.

[34] Javad Heyat, Regression of Azeri Language and Literature under the Oppressive Period of Pahlavi and Renaissance after the Islamic Revolution, First International Conference of Turkic Studies, Bloomington, Indiana, May 19-22, 1983, p. 17.

[35] Şərqi Azərbaycan Səda və Simasının baş müdiri Qulaməli Fəthabadinin 27. 11. 1372 tarixli imzalı təlimat məktubunun surəti.

[36] Varlıq, sayı 9 (32), azər 1360, s.10.

[37] Məktub-müraciətin mətni üçün baxın: Şövkət Tağıyeva, Əkrəm Rəhimli (Bije), Səməd Bayramzadə, Güney Azərbaycan. Məlumat kitabı, s. 315.

[38] Məsələn, baxın: William Beeman, Images of the Great Satan: Representations of the United States in the Iranian Revolution, in Nikki Keddie (ed.), Religion and Politics in Iran: Shi’ism from Quietism to Revolution, New Haven, CT and London: Yale University Press, 1983, p. 211; Shireen Hunter, Iran after Khomeini, New York: Praeger, 1992, p. 94.

[39] Haggay Ram, The Immemorial Iranian Nation? School Textbooks and Historical memory in Post-Revolutionary Iran, Nations and Nationalism, vol 6, part 1, January 2000, pp.68, 82.

[40] Muslim Politics Report, November-December 1995, p.... Hooshang Amirahmadi, İran’da Siyasal İslam’dan Laik Milliyetçiliğe, Avrasya Etüdleri, cilt 2, sayı 4, Kış 1995/96, s. 28.

[41] Yenə orada.

[42] Hooshang Amirahmadi, İran’da Siyasal İslam’dan Laik Milliyetçiliğe, s. 29.

[43] Biz bu yazıda müəllifin ancaq birinci kitabı – “On iki yüzil sükut. Həxamənişlərin zühuru” (Naser Purpirar, Dəvazdəh Ğərne Sokut. Ketabe əvvəl: Bəraməde Həxamenişyan, Tehran: Karəng, 1379, 294 s.) – haqqında danışacağıq. Bu kitabı Güntay Cavanşir (Gəncalp) öztürkcəmizə çevirib, Bakıda çap etdirmişdir (Nasir Purpirar, On iki əsr sükut. Çevirən Güntay Cavanşir, Bakı: Azərbaycan Milli Ensiklopediyası Nəşriyyatı, 2002, 280s.) Bizim alıntılar Bakı nəşrindəndir.

[44] Nasir Purpirar, On iki əsr sükut. Çevirən Güntay Cavanşir, s. 49.

[45] Yenə orada, s. 68.

[46] Yenə orada, s. 60.

[47] Yenə orada, s. 49.

[48] Müəllif Həxamənişlərin mənşəyi barədə kitabın başqa bir yerində daha konkret versiya irəli sürür: “Həxaməniş sülalələri üzərinə yapılan antropoloji incələmələr onları Orta Doğu insanları olaraq tanımır. Onların burunları, alınları, qafa və saçları üzərinə yapılan araşdırmalar Slavyan irqindən olmalarına dəlalət edir.” Yenə orada, s. 225.

[49] Yenə orada, s. 92.

[50] Çağdaş Farscada bu ləqəbdən “pərse zədən” (veyllənmək, avaralanmaq) feli düzəldilmişdir. Hətta bəzi İran xalqları ləhcələrində itin hürməsini “pars” adlandırmışlar. Yenə orada,s. 229.

[51] Yenə orada, s. 91-92.

[52] Yenə orada, s. 256-257. “Həxaməniş” sözü iki hissədən ibarətdir: Həxa – dost və məniş – fitrət, xasiyyət. s. 166.

[53] Yenə orada, s. 147.

[54] Yenə orada, s. 46.

[55] Yenə orada, s. 267.

[56]Məsələn, baxın: Yaşar Urumçi, Qovmiyyəte mərdome Azərbaycan və təşkile zəbane Torkiye Azərbaycani, Varlıq, 1372, sayı 89, s. 72-79; Qolamreza Qolami Quşçi, Zəbane Torki və Tork-zəbanane İrani, Varlıq, 1373, sayı 94, s. 69-71; Mir Hidayət Hisari, Madaylar (Madlar), Varlıq, 1379, sayı 116-117, s. 16-25; Mir Hidayət Hisari, Mannalar, Varlıq, 1380, sayı 122-123, s. 9-19; Mir Hidayət Hisari, İlam ölkəsi və mədəniyyəti haqqında (2), Varlıq, 1382, sayı 128, s. 43-53.

[57] Dr. Həmid Nitqi, Misaği yəzdani, Varlıq, iyun-iyul 1985, sayı 73-74, s.4.

[58] Dr. Cəvad heyət, Dər bareye nam və mouğiyyəte zəbane Torkiye Azərbaycani, Varlıq, iyun-iyul 1982, sayı 3-4 (37-38), s. 15.

[59] Əli Kamali, Qüdsi, Varlıq, azər 1360, sayı 9 (32), s.63.

[60] Dr. Həmid Nitqi, Biz və dilimiz, Varlıq, V il, sayı 11 və 12 (57 və 58), yanvar-fevral 1984, s.4.

[61] Dr. Cavad Heyət, Azərbaycanın Türkləşməsi və Azəri Türkcəsinin təşəkkülü, Varlıq, 1993, sayı 87-4, s. 20.

[62] Dr. Cəvad Heyət, Oğuzha,Varlıq, dekabr 1983/yanvar 1984, sayı 9-10 (55-56), s.3.

[63] Dr. Cəvad Heyət, Dər bareye nam və mouğiyyəte zəbane Torkiye Azərbaycani, Varlıq, İyun-iyul 1982, sayı 3-4 (37-38), s. 12.

[64] Yenə orada, s.15.

[65] Məhəmməd Tağı Zehtabi (Kirişçi), İran Türklərinin Əski Tarixi, Birinci cild, Təbriz: Nəşre Əxtər, 1377, 880 s.

[66] Məhəmməd Tağı Zehtabi (Kirişçi), İran Türklərinin Əski Tarixi, İkinci cild, Təbriz: Nəşre Əxtər, 1379, 696 s.

[67] Məhəmməd Tağı Zehtabi (Kirişçi), İran Türklərinin Əski Tarixi, Birinci cild, s. 2.

[68] Yenə orada.

[69] Yenə orada, s.3.

[70] Məhəmməd Tağı Zehtabi (Kirişçi), İran Türklərinin Əski Tarixi, İkinci cild, s. 569.

[71] Həsən Raşedi, Torkan və bərrəsiye tarix, zəban və hoviyyəte anha dər İran, Çape dovvom, Tehran: Əndişeyi nou, 1387, 315 s. Bu kitab yazarın 1383-cü (2004) ildə çıxmış nisbətən kiçik həcmli, 36 səhifəlik “Türk dili, İranda onun keçmişdəki və indiki durumu (Kimlik böhranı)” (“Zəbane Torki və mouqiyyəte qozəşte və konuniye an dər İran (Bohrane hoviyyət)” əsərinin geniş variantıdır.

[72] Həsən Raşedi, Torkan və bərrəsiye tarix, zəban və hoviyyəte anha dər İran, s. 11-12. Bu alıntı (iqtibas) Türkcədir. Yazar kitabına Türkcə “Başlanış” adlı kiçik bölüm və xeyli alıntı artırmışdır.

[73] Yenə orada, s. 71.

[74] Yenə orada, s. 70. Adı çəkilən tayfaların hamısının dillərinin iltisaqi dillər olması hələ də mübahisə mövzusudur. Amma onların qədim Farscanın da daxil olduğu təhlili (analitik) dillər qrupuna aid olmaması oturuşmuş fikirdir.


[75] Yenə orada, s. 100-101.

[76] Yenə orada, s. 19-23.

[77] Yenə orada, s. 236-240.

[78] Kəsrəvinin “Azəri dili” nəzəriyyəsi və başqa təhrifləri üçün baxın: Həsən Raşedi, Zəbane Azəri və təhrifate tarixiye Kəsrəvi, Varlıq, yaz 1353, sayı 132-1, s. 60-71.

[79] Həsən Raşedi, Torkan və bərrəsiye tarix, zəban və hoviyyəte anha dər İran, s. 115.

[80] Yenə orada, s. 96.

[81] Yenə orada, s. 75-117.

[82]Yenə orada, s. 98.

[83] Yenə orada, s. 241.

[84]Ayrıntılı bilgi üçün GünAzTv-nin İnternet səhifəsindəki “Məqalələr” bölümündə bu qeydlərin müəllifinin “Əhməd Ağaoğlu İran haqqında”, “Rəsulzadənin çağdaş “İran Türkləri”, “Rəsulzadənin çağdaş “Nizami”si”, “Təbrizli Əlinin harayı”, “Varlıq məktəbi” adlı məqalələrinə baxmaq olar.

[85] Həsən Raşedi, Torkan və bərrəsiye tarix, zəban və hoviyyəte anha dər İran, s. 36-37.

[86] Yenə orada, s. 271.

[87] Yenə orada, s. 274.

[88] Məsələn, baxın:Enayətulla Reza, Azərbaycan və Ərran (Albaniyaye Ğəfğaz), Tehran: İranzəmin, 1360; yenə onun, İran və Torkan dər ruzqare Sasaniyan, Tehran: Enteşarate elmi və fərhəngi, 1365.

[89] Həsən Raşedi, Torkan və bərrəsiye tarix, zəban və hoviyyəte anha dər İran, s. 275-306.

[90] Onların əsərləri haqqında, məsələn, baxın: Alireza Asgharzadeh, İran and the Challenge of Diversity. İslamic Fundamentalism, Aryanist Racism, and Democratic Struggles, New York: Palgrave Macmillan, 2007; Güntay Gəncalp, Səfəvilər, Bakı: Qanun, 2012; yenə onun, Tarixin pərdə arxası, Bakı: Alatoran yayınları, 2014.

[91] Hezbe Tudeye İranın məramnamə layihəsi,[yersiz], 1360 (1981), s. 13.

[92] Melliyətha və məsəleyi xəlqe kord dər İran, Tehran: Əncoməne Daneşcuyane Mosəlmane Daneşqahe Sənətiye Şərif, 1981.

[93] Baxın: Nasib Nassibli, Azerbaijan-İranian Relations: Past and Present, Journal of Azerbaijani Studies, vol. 2, no 1, 1999, pp. 12-21.

[94] Baxın: Brenda Shaffer, Borders and Brethren. İran and the Challenge of Azerbaijani İdentity, p. 177.

[95] Nameye sərqoşadeye daneşcuyane Meşkinşəhriye daneşqahhaye keşvər be heyəte mohtərəme douləte Comhuriye Eslamiye İran, Varlıq, bahar 1373,sayı 1-92, s. 94.

[96] Azərbaycan Tələbələr Hərəkatı Haqda Azərbaycan Milli İstiqlal Cəbhəsinin bəyanatı. 20 ordibeheşt 1374 (çap olunmamış sənəd).

[97] Yenə orada.

[98] Eteraziyyeye daneşcuyane Torke Daneşqahe Təbriz və olume pezeşki nesbət be porseşnameye əhanete mərkəze təhqiqat və sənceşe əfkare omumiye səda və sima (çap olunmamış sənəd).

[99] Nameye sərqoşadeye daneşcuyane Azerbaycaniye daneşqahhaye Tehran be məcmee nımayəndeqane Azərbaycan dər Məclise Şuraye Eslami. Xordadmahe 1373 (çap olunmamış sənəd).

[100] Yenə orada.

[101] Amnesty İnternational’a görə (29 iyun 2006-cı il tarixli MDE 13/074/2006 saylı ümumi bəyanat), etiraz aksiyalarında cəmi 27 nəfər, bu sıradan 7 nəfəri Təbrizdə, 14 nəfəri isə Sulduzda öldürülmüşdü.

[102]Məsələn, baxın: Ercan Demirci, İranlı Azeriler’in Karikatür Öfkesi, Sabah, 24.05.2006; Akşam, 24.05. 2006, Hurriyyet, 24.05. 2006; Fariz İsmailzade, Azerbaijani Public Outraged by Slaughter of Azeris in İran, Eurasia Daily Monitor, The Jamestown Foundation, May 26, 2006, vol. 3, issue 103; Brenda Shaffer, İran’s volatile ethnic mix, İnternational Herald Tribune, June 2, 2006; Nayereh Tohidi, Iran: regionalism, ethnicity and democracy, Open Democracy, 28 June 2006 ;

[103] Burada “Türk” sözü ənənəvi Farscalaşmış “Tork” formasından fərqli “vav” hərfi ilə yazılmışdır.

[104] Qətnameye payaniye şerkətkonəndeqan dər mitinqe moğabele məclese şuraye eslami. 7 xordad 1385 (çap olumamış sənəd).

[105] Xürrəmilər hərəkatı haqqında kitabın ilk bölümlərində bilgi verilmişdir.

[106] The Drying of Iran's Lake Urmia and its Environmental Consequences, UNEP Global Environmental Alert Service, http://na.unep.net/geas/getUNEPPageWithArticleIDScript.php?article_id=79

[107] Cənubi Azərbaycan Milli Azadlıq Hərəkatı. Mərkəzi Komitənin bülleteni, №1, sentyabr1996, s.1.

[108] http://camah.net/meramname.php

[109] Yenə orada.

[110] www.gamoh.org

[111] http://az.wikipedia.org/wiki/G%C3%BCney_Az%C9%99rbaycan_%C4%B0stiqlal_Partiyas%C4%B1

[112] Məsələn, baxın: Seyid Ziyaəddin Sədrələşrəfi, Kesrəte qoumi və hoviyyəte melliye İran, Tehran: Əndişeye nou, 1386, 110 s.

[113] Federalism dər İran. Məcmueye məğalat, ABTAM, Tehran: Öyrənci baxışı, 1382, 184 s.

[114] Azərbaycan milli hərəkatı daxilindəki mövcud siyasi-ideoloji cərəyanlar haqqında baxın: Nəsib Nəsibli, Güneyli-Quzeyli məsələlərimiz, Bakı: Aypara, 2013, s. 258-260.


Prof. Nəsib Nəsibli

N.S

Cümə, 22.05.2014 23:27



Yüklə 326,36 Kb.

Dostları ilə paylaş:
1   2   3




Verilənlər bazası müəlliflik hüququ ilə müdafiə olunur ©genderi.org 2024
rəhbərliyinə müraciət

    Ana səhifə