2.2. Şairin poeziyasında Dünya obrazı
Məmməd Araz yaradıcılığı boyunca onu düşündürən, səsi çox uzaqlardan, qədimdən gələn Dünya fəlsəfi kateqoriyasının görünən və görünməyən tərəflərini özü görə bildiyi qədərində aşkarlamaq, oxuculara çatdırmaq istəyirdi. Dünya haqqında yazılan və deyilən yüzlərlə əsərlərə, deyimlərə yaxından bələdliyi şairi daim düşündürürdü. Görkəmli sənətkarın belə bir ehtiyacdan qələmə aldığı şeirləri yazıldığı tarixlərə görə sıralayaq: “Dünya sənin, dünya mənim...” (1976), “Dünya gözəl dünyadı” (1978), “Qoruyun dünyanı” (1980), “Mənim də yaşım az deyil” (1980), “Belə dünyanın” (1989), “Dünya düzəlmir” (1990), “Ya Rəbbim, bu dünya sən quran deyil” (1991). Məqsədimiz bu şeirlər arasında olan münasibətləri aydınlaşdırmaq, şairin taleyində baş verən hər hansı bir dəyişikliklər ilə mövzuda uyarlıqların vəhdətini incələmək, dünya ilə bağlı xalq təfəkküründə formalaşmış duyğuların şair qələmi ilə inikasını səciyyələndirməkdir. 40-45 yaşlarında güclü, qüvvətli, sağlam, hündür boylu, hamı tərəfindən sevilən, əzizlənən şair dünyanın gözəlliyinə hey-ran qalırdı. Yerin nəfəsinin istiliyindən dağ qarının əridiyi, durna qatarlarının uçduğu, dərələrin, düzənlərin gülə-çiçəyə büründüyü, dağların vüqarla dayanıb bir boy da ucaldığı zamandı, belə bir vaxtda Dünya gözəldi. Yaz çiçəkləri gündüzlər insanın dəruni, iç duyğularını selləndirdiyi kimi, gecələr də yuxularına gülab qatıb şirinləşdirirdi. Belə gözəl bir gün insanın ömründən ötüb keçsə də, Dünya gözəlliyində qalırdı. Şair lirik qəhrəmanını belə gözəlliklər içərisində özünü dumana, tufana düşməkdən qorumağa çağırır, yoxuşunda nəfəs dərib, dincəlib sonra davam etməyi məsləhət görürdü. Başlanğıcda “Yenə gördüm gördüyümüz dağları” deyən şair hava, su, od, torpaq - dörd ünsürü xatırladaraq şeiri belə bir sonluq ilə bitirirdi:
Baxışında üfüqlərin baxarı,
Gülüşündə qayaların axarı.
Əllərində işığının açarı,
Kimə gülzar, kimə gözəl dünyadı,
Dünya gözəl, dünya gözəl dünyadı (18, 303).
Dünya haqqında bu qədər gözəl duyğular ilə yaşayan, onu çox həvəslə poeziyasında tərənnüm edən şair iki ildən sonra qəribə nigarançılıq ilə “qoruyun dünyanı” deyərək haray çəkirdi. Ağıllı adamlar artdıqca “ağılların bəlasından” dünyanın sığortalanmadığı aşkar olurdu. Şair başa düşürdü ki, əgər ağıllı baş qəzəblənərsə, o bir kibrit kimi qurumuş küləş tayasına oxşayan dünyamızı bir an içində yandırıb yaxa bilər. Şair ağıllının qəzəblənməsini, dəvənin hikkələnməsi ilə müqayisə edirək yazırdı:
Ağıl qızıxanda – dəvə hikkəli,
Köpəndə demirəm o nəyə bənzər,
Yerin kürəyinə çiyin söykəyib,
Dünyanı tərsinə fırlatmaq istər (19, 12).
Eldə məsəl var - hirsli adama “dəvə hikkəlidir” deyərlər. Dəvə qızıxanda hikkəsi başına vurar, qarşısına çıxanı dişləyər, əzər, öldürər. “Ağıllı” adamların “ağıllı qəzəbi” də böyük olur, dəhşətli olur, dəvə hikkəsindən də böyük olur, çünki dəvə bir və ya bir neçə adama, yığcam bir ətrafa ziyan verə bilirsə, “ağıllı” adamların “ağıllı qəzəbi” bəşəriyyətin məhvinə gətirib çıxara bilər:
Ağıllı azdıqca ağılsız artır,
Qoruyun dünyanı “ağıllılardan!” (19, 12)
Şairin “Qoruyun dünyanı” şeirindəki nigarançılığı, elə həmin ildə yazdığı “Mənim də yaşım az deyil” şeirində bir qədər başqa formada davam etsə də, düşüncələrində yaranan duyum fərqi, yanaşma müxtəlifliyi özünü biruzə verir. “Gözəl dünya” “əyri dünyaya” çevrilmiş, “çiçəyindən alağı, kişisindən papağı, köpəyindən yalağı çox” olan dünya olmuşdur:
Dolu gödən kürkə sığmaz,
Boş balqabaq börkə sığmaz.
Yəhər qanmaz, tərkə sığmaz...
Bu dünyada nə görmədim! (19, 13)
“Döş kimi dolu raketlər” görən şair qorxur ki, gələcək nəsillərə, körpə uşaqlara əmzik yerinə bu raketləri yedizdirərlər, qorxur ki, insanlıq tamamilə sıradan çıxa bilər. Şair az müddət ərzində, cəmi iki il içərisində bu qənaətə gəlir ki, dünya çox dəyişilibdi, əvvəlki gözəl dünyadan əsər-əlamət qalmayıbdı. Ona görə də ilk vaxtlar “Dünya sənin, dünya mənim” deyən şair, sonradan “dünya heç kimin...” demək məcburiyyətində qalır.
Bəli, bəşər övladı yaranandan bəri qarşısında aciz qaldığı dilemmaların, həllini tapa bilmədiyi müxtəlif hadisələrin, ətrafında cərayan edən qeyri-müəyyənliklərin səbəbini yaşadığı mühitdə, həyatda, son nəticədə Dünyada axtarmağa çalışmışdır. Azərbaycan xalqının da dünyagörüşündə bu cəhət mühüm yer tutmuş və xalqın təfəkküründə Dünya ilə bağlı çoxlu miflər, əfsanə və rəvayətlər, atalar sözləri, deyimlər, bayatılar və s. yaranmışdır (76; 81; 106; 143; 144). “Dünya beş gündür, beşi də qara”, “Süleymandan, Nuhdan qalan dünyadır”, “Verdiyini alan dünyadır” və sairə kimi deyimlərlə yanaşı, mükəmməl folklor nümunələri olan miflər, bayatılar, atalar sözləri, nağıllar və əfsanələrin yaranması Dünya haqqında hələ fikirləri tam formalaşmamış insanın bu anlamda apardığı axtarışlarla bağlı olmuşdur (167; 168; 173; 177). Bu nümunələr müxtəlif zamanlarda müxtəlif adamlar tərəfindən deyilmiş, sonra isə ağızdan-ağıza keçərək cilala-nıb bugünkü məzmunda bizə belə gəlib çatmışdır:
Dünya yalan dünyadır,
Nuhdan qalan dünyadır.
Göz verər, işıq verməz,
Dərdə salan dünyadır (131).
Və ya:
Bahasız daşdı dünya,
Çürük ağacdı dünya.
Kimə deyim dərdimi.
Tamam qan-yaşdı dünya (42, 592).
Bu nümunələri gətirməkdə məqsədimiz Məmməd Araz poeziyasına qədərki dövrdə Dünya haqqında formalaşmış müxtəlif fikirlərə, yaranan folklor nümunələrinə diqqəti çəkməkdir. Məmməd Araz poeziyasının zirvə şeirlərindən biri olan “Dünya sənin, dünya mənim...” şeiri də xalq yaradıcılığı ənənələrindən süzülüb gələn və qaynaqlanan, Məmməd Araz ürəyinin qanı ilə yoğrulub-yaxılan, yeni məzmun və məna çalarları ilə oxucuya təqdim edilən, onu düşündürən, həyat və dünya haqqında bir qədər fəlsəfi, bir qədər mücərrəd, həm də dərin mənalı fikirlər formalaşdıran bir düşüncənin inikasıdır:
Bir taleyin oyununda cütlənmiş zərik,
Yüz il qoşa atılsaq da, qoşa düşmərik.
Bir zərrənin işığına milyonlar şərik,
Dünya sənin,
Dünya mənim,
Dünya heç kimin... (19, 103)
Nə üçün biz taleyin oyununda cütlənmişik? Bu hansı oyundur, bu oyunu kim oynayır və kim ilə oynayır? Suallar çoxdur və onların cavabları da çox ola bilər. Ancaq ən düzgün, məna kəsb edəni hansıdır? Bunu tapmağa çalışaq.
Həyata diqqətlə nəzər salsaq, gördüyümüz bütün canlı aləmin, cəmiyyətin və təbiətin predmetlərinin hamısının cütlük təşkil etdiyinin şahidi olarıq. Dünyanın ən ali varlığı olan insanın özünün və ətrafındakı hər şeyin cütlüyü inkaredilməzdir. İnsan qadın və kişidən ibarətdir, o cütdür. İstər heyvanat aləmi olsun, istərsə də bitki aləmi cütlükdən təşkil edilmişdir. Hətta insan hüceyrələrindən tutmuş ən kiçik zərrəciklər olan atom və neytrona qədər cütlükdən ibarətdir. Bir ağac yarpağını qarşınıza qoyub müşahidə aparın. Bir ana zoğdan ayrılan şaxələrin hamısı cütdür, tək ola bilməz. Çünki təklik Allaha xas olan cəhətdir. Bəlkə elə, Allahın yüz adından biri, birincisi Tək deməkdir. Tək olan Allah bu taleyin oyununda hər şeyi cütləşdirib, qoşalaşdırıb sonra da Yer üzərinə - həyata atıbdır. Daha bir kimsə onu qoşalaşdırıb ata bilməz, atsa da qoşa düşməz, bu, qeyri-mümkündür. Bəs bu hansı oyundur? Bu o oyundur ki, biz onun içərisindəyik. Hardan gəlib, hara getdiyimizi bilmədən, qiyamət günündə öz qismətimizi gözləyirik. Qiyamət günü də Tək Allahın iradəsindən asılıdır, kimsə onun qarşısını ala bilməz. Bu qarışıqlıq içərisində, bu anlaşılmaz oyundan baş çıxarmağa can atan milyonlarla insanların cərgəsində şair Məmməd Araz da bir yol axtarır və ona görə də işıq gələn tərəfə getməyi məqbul hesab edirdi. Məmməd Araz dühasının böyüklüyü də elə ondadır ki, xalq nağıllarından (58; 59; 60; 61; 62) və xalq dastanlarından (29; 30; 31; 32; 33) gələn “it hürən tərəf” ilə “işıq gələn tərəfin” fərqini tam aydınlığı ilə görə bilirdi. “İt hürən tərəfdə” yaşayış üçün bütün şərait var, insanlar burada işləyir, yazır-yaradır, fəaliyyət göstərirlər. Min illərdir sınaqdan çıxmış bu yol adi müsafirlər üçün məqbul sayıla bilər, lakin min illərin dərdini çiynində daşıyan, min illərin açılmayan sirlərini, cavabsız suallarını ürəyində gəzdirən, fikri, düşüncəsi bu məchulların təsdiq- edici cavabını arayan şair üçün işığın arxasınca getmək gərəkdir. Şair bilir ki, işığın divlərin, əjdahaların əlində olması həqiqətdən çox uzaq bir əfsanədir, işıq olan yerdə həyat var, həyat isə elə işıq ilə bağlı olub, işıqdan ayrı düşünülməsi mümkün olmayan bir əlamətdir. Hamının işığa ehtiyacı vardır. Bu işıq zərrəcikləri təbiətin canlanmasına, suların harmoniyasına, bütün gözəlliklərin estetikasına təsir göstərən mənbədir. Bu işıq Allahın – Tək varlığın yaratdığı, cəmi məxluqat üçün sirli qalan, eyni zamanda gördüklərimizin hamısının canlanmasında əsas enerji mənbəyidir. İnsan bu işığa çatmaq üçün atomu, neytronu kəşf etsə də, işıq sürətli təyyarələr, raketlər düzəltsə də, yenə də onun mənbəyinə gedib çata bilmədi. Hətta düzəltdikləri də həmişə insanın rifahı naminə işləməkdənsə, onun ziyanına işlədiyi zamanlar da oldu. Xirosima və Naqasakidə sınaqdan keçirilən atom bombalarının törətdiyi fəlakətlər hələ də davam edir. Çernobıl atom elektrik stansiyasında sızma hallarının baş verməsi nə qədər böyük dağıntılara səbəb oldu. Bəs nədəndir ki, milyon illərdir, Günəş işığı yanır, heç bir fəlakət törətmir, insanlara, təbiətə xoş əhvali-ruhiyyə, gözəllik, istilik bəxş edir, lakin tükənmir?! Bunun sirri Tək və Vahid olan Allaha məxsusdur. Allah bu sirli dünyanı yaradıb və insanları da bu dünyada məskunlaşdırıbdır. İnsan oğlu da doğulduğu gündən Dünya haqqında fikirləşir, hərdən Dünyanın ona məxsus olduğu qənaətinə gəlsə də, tez də fikrini dəyişib özünün də dünyanın bir parçası, bir hissəciyi olması haqqında qərar qəbul etmək məcburiyyətində qalır. Ümumiyyətlə, şairin qənaətində Dünya məchuldur. Başqa sözlə, Dünya nədir, Yerdirmi, Göydürmü, Aydırmı, Günəşdirmi, ulduzlardırmı, dənizdirmi, dağdırmı, nədir axı bu Dünya?!
Xalq yaradıcılığında - miflərdə, nağıllarda, əfsanələrdə, bayatılarda bu sualların cavabı, bəlkə, bir qədər sadə formada verilsə də, məhz o kökdən, o söz xəzinəsindən ruhu qidalanmış Məmməd Arazın düşüncəsində bu, sadəlikdən çox-çox uzaq, düşündürücü suallar ilə çuğlaşmışdır:
Çevrəsindən çıxsa əgər sevda fırfıran,
Bir ümidin ətəyindən tutub da fırlan.
Eşidirsən, pıçıldayır yıxılan, duran,
Dünya sənin,
Dünya mənim,
Dünya heç kimin... (19, 103)
Qəribədir ki, şair dünyaya bu qədər sevgisi ilə uğursuzluqlara düçar olanda da, axtardıqlarına cavab tapmayanda da, getdiyi mənzilin kənarında qalanda da ümidini itirmir, özündən əvvəl bu yolu keçmək istəyənləri xatırlayır, bu yolda dönməz əsgərə çevrilir. Məqsədə yetmək üçün məhrumiyyətlərə dözmək, yıxılanda qalxmaq ümidini itirməmək, bu sirli dünyanı özləşdirmək, daxili “mənə” çevirmək, mənləşdirmək, bu dünyanın bir parçası olduğunu xatırlamaqla şair öz “mən”ini də bu dünyanın içinə qataraq onun nüvəsinə can atır. Filologiya elmləri doktoru, professor Nizaməddin Şəmsizadə Məmməd Arazın “Dünya sənin, dünya mənim”... şeiri haqqında öz fikirlərini belə ifadə edir: “Az qala hamının əzbər bildiyi bu şeir Məmməd Arazın iç dünyasından qar altından çıxmış çiçək kimi poeziya gülüstanına daxil oldu. Həmin iç dünya isə aldanış və ümid, həyəcan və həsrət, gecikmiş təntənə və ədəbi narahatlıq muzeyinə bənzəyir. Bu adi və dərin şeirdə “Bu dünyanın qara daşı göyərməz” ümidsizliyindən “Dünya mənim!” hökmünə qədər keçilmiş bir ömür yolu, şair taleyi - İnsan inamı və poetik həqiqət var” (18, 8).
Nizaməddin Şəmsizadənin bu fikrinə hörmətlə yanaşıb, bəlkə də, zaman içində “Dünya mənim!” hökmü ilə razılaşmaq olardı, ancaq Məmməd Araz “Dünya heç kimin!” deyərək, həm də öz əvvəlki fikrinə qarşı çıxırdı. Deməli, heç kəs əbədi deyil, əbədi olan bu dünyadır! Əbədi deyə düşündüklərimizə əbədi olan Dünya qəhqəhə çəkib gülər. Şeirdən aşağıdakı parçaya nəzər salaq:
Bu get – gəllər bazarında dəvədi dünya,
Bu ömür – gün naxışına həvədi dünya.
Əbədiyə qəh-qəh çəkər əbədi dünya,
Dünya sənin,
Dünya mənim,
Dünya heç kimin... (19, 103)
İnsan gözünü dünyaya açanda özünü dünyanın qucağında görür, dünyanın isə ucu-bucağı yoxdur, gecə-gündüz yol getsən də, nə qədər oturub düşünsən də, dünyanın sirlərini, onun bulmacalarını tapa bilməyəcəksən.
Dünyanın ən dözümlü heyvanı dəvədir. Dəvə həm də var-dövlət rəmzidir. Qədim zamanlarda dəvəsi olanlar təmin olunmuş, varlı insanlar sayılırdı. Təsadüfi deyildir ki, folklor yaradıcılığında da “dövlətdə dəvə, övladda nəvə” deyilmişdir. Bu dəvə dünya da öz sakinlərini zaman-zaman yorub əldən salmış, hər kəsin bir fərd olaraq ömür-gününə bir naxış vurub, əbədilik axtaranlara - isgəndərlərə, şəddadlara, fironlara və başqalarına qəh-qəh çəkib gülmüşdür. Tufanı, seli, qasırğası, odu-alovu, vulkanı olan, dənizləri təlatümə gətirən, dağları yerindən oynadan bu dünyanın ancaq özü əbədidir, qalan hər şey fanidir, ötəri və keçəridir.
Məmməd Arazın seçilmiş əsərlərinin III cildinə ön söz yazmış, filologiya elmləri doktoru, professor, akademik İsa Həbibbəyliyə görə “ şairin sırf, xalis bəşəri – fəlsəfi səpkidə alıb, yüksək bədii səviyyədə təqdim etdiyi dünya mövzusu, ilk növbədə, Vətən övladlarını “gəlimli-gedimli” dünyanın bənzərsiz “ömür-gün naxışı”nın mahiyyəti ətrafında düşündürməyə yön alır” (19, 8).
Ayaq saxla, dövrənə bax, ötəri belə,
Min illərdir Araz belə, Həkəri belə.
Axşamların, səhərlərin təkəri belə.
Dünya sənin,
Dünya mənim,
Dünya heç kimin... (19, 103)
Min illərdir Araz axır, Həkəri axır, min illərdir axşamlar və səhərlər bir-birini əvəz edir. Bu hadisələr axarında durub ötəri baxmaq ilə, zaman üçün bir an qədərindən də az olan bir ömürdə dünya haqqında hansı hökmü vermək mümkündür? İnsan ağlı nə qədər sürətlə işləsə də, bu cür dərinliklərinə enməkdə acizdir, çünki qoca dünyanın bu oyununun nəinki oyunçusu olmaq, hətta seyrçisi olmaq belə çətindir. Bu baxımdan da şairin gəldiyi qənaətləri gülməlidir – O, özünə də gülür, minib zamanın fövqünə çatmağa çalışdığı ata da gülür, şahmat taxtasında şahı Yaradan tərəfindən vurulmuş matlara da gülür. Nə yaxşı ki, şair bu qədər qarışıq, dolaşıq aləmdə gülə bilirdi:
Gülünclərə gülünc gələn bu ada güldüm,
Yüyəninə hər əl yetən bu ata güldüm.
Mən özümlə oynadığım şahmata güldüm.
Dünya sənin,
Dünya mənim,
Dünya heç kimin... (19, 104)
Ancaq min illərdir ki, xalq yaradıcılığında – folklorumuzda konkret olaraq bayatılarımızda Məmməd Arazın cavabını tapmağa çalışdığı bu sualların cavabı belə formalaşmışdır:
Gün doğar batar gedər,
Su gələr, axar gedər.
Dünya bir pəncərədir,
Hər gələn baxar gedər (72, 155).
Məmməd Araz da həmin bu bayatıda olan fikirləri öz ağıl və hiss süzgəcindən keçirib oxucuları daha da dərindən düşündürməyə, onları haqqa, ədalətə, doğruluğa, aydınlığa, düzlüyə, yaxşılığa, mübarizliyə səsləyərək, bəşəriyyətə öz ağıl və düşüncə payını ərməğan etmişdir. Doğrudan da, gəlimli, gedimli, son ucu ölümlü dünyanın elə bir pəncərəsi var. Lakin nə yazıqlar ki, çoxları o pəncərənin önündən gözüyumulu keçib gedir. Ancaq Məmməd Araz bayatıda deyildiyi kimi, dayanıb bir anlıq o pəncərədən ötəri də olsa, baxmağı insanlara tövsiyə edirdi. Şairin özü də bu pəncərədən baxdı, düşündü, düşündürdü, güldü və bu dünyadan köçdü. Ondan qalan isə az qala atalar sözlərinə, aforizmə çevrilən deyimləri, heç zaman öz dəyərini itirməyəcək qiymətli şeirləri oldu...
Dünya sənin, mənim, sonra da heç kimin - deyərək Məmməd Araz bu yanlışlıq içərisində daha bir müddət qaldı. Şeir nə qədər xoşa gəlsə də, dillər əzbərinə çevrilsə də, fikir tamamlanmadı, şair nəticəyə vara bilmədiyindən oxucular da gözləmək məcburiyyətində qaldılar. Məmməd Araz təqribən on il müddətində bu yanlışlıq içərisində daha iki şeir yazdı. Pırtlaşıq bir halda cərəyan edən ictimai hadisələr şairin zəifləmiş, qüvvədən düşmüş bədəninə təsir edir, onun mənəvi dünyasında bir təbəddülat yaradırdı. Ona görə də Günəşi, Ayı köməyə çağırır, “uman yerdən küsərlər” deyib, əslində Dünyadan küsürdü. Həm də Dünyadan ona görə küsürdü ki, Hüseyn Cavid, Mikayıl Müşfiq, Əhməd Cavad kimi söz ustalarının, könülləri fəht etmiş bu böyük sənətkarların zamanında qədr-qiymətləri bilinməmişdi. Öz taleyində də bu sənətkarların taleyinə oxşar cizgilər araşdıran şair məhz bu səbəbdən bədbinliyə qapılır, hansısa bir məmurun soyuq üzünü dünyanın gözəl üzü ilə dəyişik salırdı, yaxud da bir məmura, bir nazirə demək istədiyini Dünyaya ünvanlayırdı. Ənənəvi bir gediş olan bu gediş əslində çox uzaqlardan gəlirdi. Uzaqlardan gələn o səs şairin də, onu oxuyanların da qulaqlarında əks-səda verirdi:
Dünya qoca, dünya yalan dünyadı.
Oğul doğub dərdə salan dünyadı.
Hər nə verib sonra onu alıbdı,
Süleymandan bir quru ad qalıbdı (131).
Səməd Vurğun poeziyasının vurğunu olan, onu sevə-sevə oxuyan, özü ilə Səməd Vurğun mənliyində müəyyən oxşarlıq olduğunu görən Məmməd Araz Səməd Vurğunun “Dünya” şeirini əzbər söyləyirdi:
Əzəldən belədir çünki kainat,
Cahan əbədidir, ömür amanat.
Əldən ələ keçir vəfasız həyat,
Biz gəldi-gedərik sən yaşa, dünya! (153, 208)
Şeirin pessimist notlarını içindən keçirdərək Məmməd Araz dünyanın vəfasızlığı, etibarsızlığı haqqında hisslərini yaşayaraq həyatdan vaxtsız getmiş istedadlı şairimiz Mikayıl Müşfiqin xatirəsinə həsr etdiyi “Belə dünyanın” şeiri ilə bu küskün ruhlu misraları pıçıldayırdı:
Söz verdim, söz adlı dəfinə verə.
Tək bircə ölümsüz qərinə verə.
Umdum nə verdi ki, küsüm nə verə?
Mən belə dünyanın nəyindən küsüm? (19, 213)
“Uman yerdən küsərlər”(25,612) deyiminə bir qədər də geniş mənada baxmağa çalışaq. Ummaq insana məxsus keyfiyyətdir. Ummaq - yəni arzulamaq, istəmək, yaxın bildiyin insanlardan, ailədən, dostlardan, tanışlardan qayğı gözləmək, ümid etmək və s. anlamlarda başa düşülür. “Uman yerdən” ifadəsindəki yerdən sözü də məcazi mənada işlənmişdir. Hərfi anlamda yer - torpaq, yurd kimi mənalansa da, “uman yerdən” frazeoloji birləşməsi yaxın, qohum, dost, qardaş, doğma bildiyin adamlar kimi qavranılır. Bu baxımdan “sənə güvəndiyim dağlar, sənə də qar yağarmış” atalar sözü ilə “uman yerdən küsərlər” ifadəsi arasında qarşılıqlı oxşarlıq vardır. Belə ki, yaxın adamlarda etibarsızlıq, vəfasızlıq, soyuqluq, etinasızlıq görüləndə işlədilən “sənə güvəndiyim dağlar, sənə də qar yağarmış” (25, 571) deyimindəki məcazi məna çaları, eyni ilə “uman yerdən küsərlər” deyiminin də nüvəsini təşkil edir. Təbii ki, Məmməd Araz yaşadığı, işlədiyi, yazıb yaratdığı cəmiyyətin içərisində bir fərd olaraq etinasızlıq, qayğısızlıq, hətta bəzən xoş olmayan situasiyalarla qarşılaşanda, şairin mənəvi aləminin təlatümləri içərisində ümid işığının zəifləməsi nəticəsində konkret olaraq kimlərəsə deyilməli sözlər dağa, daşa, daha böyük təsəvvürdə dünyaya ünvanlanmışdı. Ona görə də dünyanın sifətinə deyilən sözləri ilə ürəyinin yanğısını bir qədər səngitməyə çalışan şairin mövqeyi bu şeirdə də tam qətiləş-məmişdir. Şairin mövqeyi lirik qəhrəmanın mövqeyi ilə oxşardır. Şeirin qəhrəmanı dünyadan küsüb-küsməməyi aydınlaşdıra bilmədiyi üçün Günəşə, Aya tapınmağı daha məqbul hesab edir. Qədim türk folklorunun astral motivləri Günəşin, Ayın şeirə gətirilməsi müəllifin çağdaşlarında türk mənliyini oyatmaq istəyindən irəli gəlirdi. Qədim türk mifologiyasında Günəş, Ay türklərin tanrıları idi. Qədim türklər inanırdılar ki, türk xaqanları Günəşin oğullarıdır. Şumerlər, Altaylar Günəşə Tanrı deyirdilər. Hunlar Günəşə, Aya inanırdılar (73; 76; 142; 157; 164; 169). Qədim türklərdə evlərin, çadırların qapıları Günəşə baxırdı. İndinin özündə də bu ənənə saxlanılır. Gecələr Aya salavat çevirirlər. Bütün bunları Məmməd Araz bilirdi, bildiyinə görə də, mifologiya ilə bu günün insanları arasında bir anlaşma düzəltmək, soy- kökümüzə qayıdış harayı salmaq, müasirlərimizi bir-birinə arxa durmağa, bir-birinə kömək əlini uzatmağa, ədalətli, insaflı olmağa çağırırdı:
Ömrünə vay salar, vaydan utanmaz,
Saç yolub – hay salar,
Haydan utanmaz,
Günəşdən utanmaz, Aydan utanmaz,
Mən belə dünyanın nəyindən küsüm? (19, 213)
Şair utanmaz rejimi xırsız əjdahaya bənzədirdi. Nağıllardan məlumdur ki, əjdahalar suyun qabağını kəsər, eli susuz qoyardılar. “Cəlayivətən” nağılında da biz belə bir epizoda rast gəlirik: Cəlayivətən gəzə-gəzə gəlib bir şəhərə çıxır, bir qarının qonağı olur. Qarı nənə Cəlayivətənə yemək hazırlayır. Cəlayivətən yeyib doyandan sonra qarı nənədən içməyə su istəyir. Qarı nənə ona şor su verir. Cəlayivətən qarıdan suyun niyə şor olduğunu soruşur. Qarı məlumat verir ki, şəhərdən keçən çayın qabağını bir əjdaha kəsib, şəhərə su buraxmır, hər ay bu əjdahaya bir qız qurban verirlər. Bu qızı udanda əjdaha başını qaldırır, o zaman şəhərə su gəlir. İndi neçə aydır ki, əjdaha şəhərə su buraxmır. Şəhərdə artıq qız qalmadığından bu gün padşahın qızı əjdahaya qurban veriləcəkdir. Qarıdan bu əhvalatı eşidən Cəlayivətən əjdahanı öldürüb həm padşahın qızını xilas etmək, həm də şəhər əhlinin susuzluqdan çəkdiyi əziyyətlərə son qoymaq qərarına gəlir. Bu məqsədlə Cəlayivətən bir qılınc alıb çayın kənarında gizlənir. Camaat padşahın qızını gətirib əjdahaya yaxın bir yerdə qoyub, kənara çəkilirlər. Əjdaha qızı udmaq istəyəndə Cəlayivətən gizləndiyi yerdən çıxıb əjdahanı öldürüb qızı xilas edir.
Çaydı dəhnəsində xırsız əjdaha,
Gecəsi salamat çıxmaz sabaha.
İti bazarında atından baha,
Mən belə dünyanın nəyindən küsüm? (19, 213)
Şair Sovet rejimini xırsız əjdahaya bənzədərək demək istəyirdi ki, əjdahalar xalqı susuzluq ilə imtahana çəkirdilərsə, bu rejim də ayrı-ayrı xalqları əsarət altına alaraq, azadlıqdan məhrum etmişdir. Bu çərçivədə meyarlar itirilmiş, yaxşı-pis bir-birinə qarışmışdır. Yağ ilə şorun fərqi bilinməyən bir bazarda itin qiyməti atdan baha olmuşdur.
Məmməd Araz mövzusunu folklordan götürülmüş motivlərlə zənginləşdirmiş, eyni zamanda “iti bazarında atından baha” kimi aforizm səviyyəsinə qalxmış bir deyim yaratmışdır. Hətta şair şeirin sonunda öz nifrətinin kulminasiya nöqtəsində xalq jarqonundan istifadə edərək “ondan inciyənin beləsi belə..” deyərək hirsini soyutmağa çalışırdı. Şair şeirində müxtəlif təzadlar, deyimləri yerli-yerində işlədərək insanın ətraf aləmlə təmasından ibrətamiz nəticələr çıxartmağa səsləyirdi. Ancaq hiss olunur ki, şeir bitsə də, müəllifin hələ yenə də, mövzu ilə bağlı demək istədikləri çoxdur. Eyni əhvali-ruhiyyə ilə təqribən bir ildən sonra şair Böyük Mirzə Cəlilə ithaf etdiyi “Dünya düzəlmir” şeirini yazdı. Şeirdə olan fikir oxşarlığı, folklordan faydalanma təzahürləri, şairin mənəvi aləminin nəzərə çarpan təbəddülatları imkan verir ki, “Dünya düzəlmir” şeirinin “Belə dünyanın” şeirinə bir əlavə kimi yazıldığı qənaətinə gələk:
Kimdənsə tez durub kimin uşağı,
İtinə daş atıb beş yüz il qabaq.
Kimin dəyirmanı, kimdən aşağı...
Bunları yerində kim oturdacaq?!
Dünya düzəlmir ki, düzəlmir, baba! (19, 220)
Şeirlə uzlaşan atalar sözləri var: “İtə atmağa daşı yoxdur” (25, 370), yaxud “Dəyirman bildiyin eylər, çaq-çaq baş ağrıdar” (25, 252).
Böyük rus şairi Krılovun “Qurd və quzu” təmsilində də buna oxşar epizodlar vardır. Quzunu yemək istəyən qurd ona deyir:
-Ay yasar,
Səndə var cürbəcür yaman hallar.
De görüm, niyə suya girdin,
Niyə sərçeşməni bulandırdın? (112, 67)
Quzu and içir, aman eləyir ki, bəs mən səndən aşağıda dayanmışam, suyu bulandıra bilmərəm, mən sənin burda olduğunu bilsəydim, heç bura gəlməzdim. Qurd da öz növbəsində bəhanə gətirir ki, bəs sənin atan-anan səndən əvvəl də vardı, onlar suyu bulandırmışdı.
Göründüyü kimi, qurd məqsədinə çatmaq üçün dürlü bəhanələr uydurur. Şair fikirləşirdi ki, cəmiyyətdə də buna bənzər əhvalatlar baş verir, qanunlar yerini tapmır, qanunlarda olan boşluqlar qanunsuzluqlar yaradır. Artıq çoxdandır ki, kotançı dəmir, körükçü kömür, çörəkçi xəmir üzünə həsrət qalıbdır. Bu insanların “səbir kasaları dolubdur”. “Baxsam “döz” deyənə, “döz” deyilənə, ağzımdan qapılar öz halal tikəm” (19, 221) – deyə şair səbr etməyə son qoymaq haqqında fikirləşirdi.
Sadaladıqlarımıza aydınlıq gətirmək məqsədi ilə bir sıra “Molla Nəsrəddin lətifələri” kitablarına (123; 158; 160; 161) daxil edilən “Dava yorğan üstədir” nümunəsinə diqqət yetirək: Molla axşam çağı yorğana uzanıb yatmışdı. Birdən eşikdən səs-küy eşidilir. Mollanın arvadı deyir ki, ay kişi, bir eşiyə çıx, gör nə səs-küydü. Molla da yorğanı çiyninə salıb eşiyə çıxır, görsün nə olub. Lotular yorğanı mollanın çiynindən qapıb qaçırlar. Molla kor-peşman evə qayıdır. Arvad soruşur ki, molla bu nə davadı? Molla cavab verir: “Dava yorğan üstədir.” Bu nümunəyə bənzər belə atalar sözləri də var: “Dava dağarcıq üstədir” (26, 119) və ya “Davakarın şah olsa, ərizəni Allaha yaz” (25, 231). Bütün bu fikirləri ümumiləşdirərək deyə bilərik ki, Məmməd Araz çox orijinal bir deyim tərzi ilə həyatın iç üzünü göstərən, onu şəkilləndirən ədəbiyyatımıza yeni səs, yeni nəfəs gətiribdi. Şairin şeirlərində fəlsəfi məzmun kəsb edən, mənəvi dünyamızın zənginləşməsinə yardımçı olan ayrı-ayrı beytlər, hətta, bəzən bütöv bəndlər oxucuların yaddaşında özünə yer eləyib folklorlaşıbdı. “Dünya düzəlmir” şeiri bu aspektdən araşdırıldıqda şairin poetik dünyasında Dünya obrazının yeri və əhəmiyyəti aydınlaşmış olur:
Gedir yal davası, sümük davası,
Gedir vurhavurla çəpik davası.
Gedir milyonçunun qəpik davası,
Çürük fikirlərin çürük davası...
Dünya düzəlmir ki, düzəlmir, baba! (19, 221)
Şeirin sonluğunda şair özünə xitabən verdiyi suala cavab tapa bilmədiyi üçün həmin sorğunu böyük mütəfəkkir Cəlil Məmmədquluzadəyə ünvanlayırdı:
Hələ bu dünyanın qeylü-qalı çox,
Bilməm zəhəri çox, yoxsa balı çox.
Çox verdim özümə bu sualı çox.
Ərzin nadanından ağsaqqalı çox!
Bəs niyə bu dünya düzəlmir, baba? (19, 221)
Təbii ki, Cəlil Məmmədquluzadə sağ olsaydı, bu suala cavab verərdi. Ancaq ondan qabaq müdrik babalarımızın bizlərə əmanət qoyduqları sözlərdə bu sualın cavabı aşkardır: “Dünyada iki şəxs heç vaxt dost olmaz, biri-qanan, biri-qanmaz” (25, 231). Qanan ilə qanmazın yaşadığı bir mühitdə, dünyanın düzəlməyi də müşkül görünür.
Məmməd Araz daha bir il fikirləşərək dünyanın dolaşıq düşmüş müşküllərini çözməyin yollarını arayıb tapa bilmədiyini görüb tamam fərqli bir qərar qəbul etdi. “Dünya sənin, dünya mənim, dünya heç kimin”…bədbinliyindən dünyanın düzəlməsinə ümidini itirmiş şair son nəticədə dünyanın yaradıcısına müraciət etmək qərarına gəldi. “Ya Rəbbim, bu dünya sən quran deyil” (1991) başlıqlı minacatla ardıcıl olaraq poeziyasında yaratdığı Dünya obrazı haqqında Məmməd Araz son sözünü deməyə cəhd göstərdi. İlk baxışda bu minacatda bir üsyan, bir narazılıq notları hiss edilsə də, şairin içindən gələn Allah sevgisi onu asi olmaqdan uzaqlaşdırır, “Ya rəbbim, adilsən, hifz elə bizi, Halal ocaqlara üzv elə bizi” (19, 252) deyərək, Allahın vahidliyi və adilliyi, rəhmdilliyini qəbul etdiyini Allahın hüzurunda bəyanlayırdı. Şairin Allaha olan məhəbbəti təkrarsız, əvəzedilməzdir. Şair özünə, xalqına Allahdan rəhm, kömək, imdad diləyib yalvarırdı:
Ya rəbbim, əl açdıq, tut əlimizdən,
Çıxmasın bu doğma yurd əlimizdən (19, 252).
Yaxud:
Ya rəbbim, sən qaytar bizi bizlərə,
Cala boz günləri ağ gündüzlərə (19, 253).
Məmməd Araz Nizami Gəncəvinin, Məhəmməd Füzulinin yaradıcılığına dərindən bələd idi. Şairin bu şeirlərində folklor qaynaqları ilə birgə Nizami Gəncəvi və Məhəmməd Füzuli yaradıcılığından təsirlənmə də açıq-aşkar hiss edilir.
Nizami Gəncəvi “Sirlər xəzinəsi” poemasında Allaha müraciətlə deyirdi:
Köməksiz biçarəyik, əlindədir çarəmiz,
Sən də çarə qılmasan, kimdən umaq çarə biz? (93, 20)
Yaxud Məhəmməd Füzulinin “Leyli və Məcnun” əsərində Allaha belə xitab olunur:
Yarəb, kərəm et ki, xarü-zarəm,
Dərgaha dəxi ümidvaram (92, 19).
Klassik ədəbiyyatdan gələn bu forma Məmməd Araz poeziyasında ictimailəşmiş, yeni məna və məzmun qazanmışdır. Şeirdə foklordan, xüsusən atalar sözlərindən əxz edilmiş fikirlər müəllifin orijinal medodları ilə yeni məzmunda təqdim edilmişdir. Məsələn, belə bir qarşılaşdırma aparaq:
Atalar sözü:
Qarışqa şıllaq atdı,
Dəvənin böyrü batdı (25, 186).
Şeirdə:
Sən bizi kiçiklər kinindən qoru,
Fil tutar, şir tutar hörümçək toru (19, 252).
Atalar sözü:
Dovşana deyir, qaç,
Tazıya deyir, tut (25, 273).
Şeirdə:
Ona “qaç” deyiblər – qaçır beləcə,
Buna “tut” deyiblər – qovur beləcə (19, 254).
Atalar sözü:
Qudurmuş köpəyin ömrü qırx gün olar (25, 221).
Şeirdə:
İndi qudurğanlar uzun ömürlü (19, 255).
Bayatıda:
Yetimin yekə dərdi,
Yüklənib yükə dərdi.
At çəkməz, dəvə çəkməz,
Fil gələ çəkə dərdi (71, 241).
Şeirdə:
Qalan dərdimizi yükləsək əgər,
Kəl olsa, nər olsa – qəddi əyilər (19, 254).
Nağılda və qaravəllidə:
“Hamamçının tası yox, baltaçının baltası, burdan bir tazı keçdi, onun da xaltası yox” və ya “Yüklədim ətini doxsan dəvəyə, Xotkar üçün göndərdim mən leşini” (86; 132).
Şeirdə:
Nə qədər itik var - min artıq tapan,
Naxırsız naxırçı, sürüsüz çoban!
Qarışıb: xalq kimdi, xalqı çapan kim!
İşıq paylayan kim, işıq qapan kim... (19, 254)
Vaqif Yusiflinin “Məmməd Araz dünyası” kitabına Yaşar Qarayevin yazdığı “Yaddaş poeziyası” ön sözündə belə bir abzas işlədilmişdir: “Torpağımızın beşdə biri əsirə, didərginə, millətimizin yeddidə biri qaçqına çevrilib. Mədəniyyətimizin “itmiş ərazisini” hesablamağa isə təxəyyülümüzün gücü çatmır. Məhz bu itkilərimizin ən dəhşətlisidir! Çünki millət – mədəniyyətlə başlayır və mədəniyyətlə də qurtarır. Yaxşı ki, bu həqiqəti başa düşən və itən mənəvi sərvətlər üçün haray səsini qaldıranlar da var: Onlardan biri Məmməd Arazdır” (156, 6).
Məmməd Araz harayı “Ya Rəbbim, bu dünya sən quran deyil” şeirində daha ötkəm bir şəkildə, daha cingiltili bir səslə eşidilməyə başlandı:
Külüng də bizimdi, torpaq da bizim.
Batmış da, yatmış da, oyaq da bizim.
Yalanı tuş eylə öz ünvanına,
Özün çək nahaqqı haqq divanına.
Hələ mürgülüyük, xeyli mürgülü,
Zurnalı, qavallı, neyli – mürgülü.
Hələ öz içində batanımız çox,
Düşmən laylasına yatanımız çox.
Hələ qoltuqlara sığan nə qədər,
Hələ töküləni yığan nə qədər... (19, 253)
Beləliklə, Məmməd Araz yaradıcılığında mücərrəd Dünya obrazı cilalana-cilalana “Ya Rəbbim, bu dünya sən quran deyil” şeirində dolğunlaşdı və tamamlandı. Klassik ədəbi irsimizdən gələn, ənənəvi düşüncəmizdə olan imana çağırış əsərin mərkəzindən qırmızı xətt kimi keçdi. Şair Böyük Yaradana müraciət edərək Dünyanın pərgarının pozulduğundan, haqsızlığın baş alıb getməsindən şikayətləndi, insanları vicdanlı, ədalətli və imanlı olmağa səslədi. Şeir 1991-ci ildə Məhəmməd peyğəmbərin mövludu ilə bağlı Türkiyədə keçirilən beynəlxalq şeir müsabiqəsində uğur qazandı, birinci dərəcəli mükafata layiq görüldü.
Dostları ilə paylaş: |