Cipin ürəyi düşdü. Müsyo Armo tərpənmədi, onun gözlərində qorxu ifadəsi vardı.
Forsen barmaqlarını baş-başa çatıb çırtma çaldı.
– Bu qoca Pantalon! Fu…Fu, məşuqa bir baxın!
Cip qocanın necə titrədiyini gördü, ayağa sıçradı və qışqırdı:
– Sən… sən əclafsan!
Cip müsyo Armonun səsini eşitdi:
– Siz buradan getməmişdən əvvəl mənə öz axmaq hərəkətinizi izah eləməlisiniz!
Forsen yumruğuyla hədələdi və nə isə mızıldanaraq çıxdı. Onlar çöl qapısının necə çırpıldığını
eşitdilər. Cip pəncərəyə doğru döndü və dayanıb həyətə baxmağa başladı. Hətta buraya da yay ayaq
açmışdı. Qurumuş ağacların yarpaqları işıldayırdı, günəşin istisində boynunda mavi bant olan qara
pişik qızınırdı. Yan küçədən çiyələksatanın səsi eşidilirdi. Cip müsyo Armonun hələ də dayanıb
ovcunu ağzına sıxdığını bildiyindən vicdan əzabı çəkirdi. Bu xeyirxah və fağır qocanı belə təhqir
eləyəsən! Əri hələ belə ələ salmağa qədər getməmişdi. Bunu heç vaxt ona bağışlamayacaqdı. Onu da
təhqir elədi, daha dözə bilməzdi! Cip döndü, hər iki əlini müsyo Armoya uzatdı:
– Son dərəcə təəssüfləndim! Əlvida əzizim, əziz müsyo Armo! Mən beşinci gün gələcəyəm. – Və
qoca Cipi saxlamağa macal tapmamış, o, küçəyə qaçdı.
Cip küçəni keçib səkiyə çıxan kimi, paltosundan kiminsə yapışdığını hiss elədi və Forseni gördü.
Cip ondan xilas olub, cəld irəli addımlamağa başladı. Doğrudanmı, o, küçədəcə tamaşa verməyə
hazırlaşırdı? O, yenidən Cipin əlindən yapışdı. Cip döndü və birbaşa onun sifətinə baxaraq, buz
soyuqluğu ilə dedi:
– Xahiş edirəm, küçədə tamaşa verməyəsən və məni təqib eləmə. Əgər mənimlə danışmaq
istəyirsənsə, bunu evdə də eləyə bilərsən.
Cip sakitcə irəli getdi, ancaq Forsen hələ də bir neçə addım arxada onu təqib edirdi. Cip ilk
yaxınlaşan taksiyə əl elədi və oturan kimi də:
– Beri-stritə, – dedi, – cəld olun! – Pəncərədən Forsenin onun arxasınca atıldığını, ancaq onu
saxlamaq üçün çata bilmədiyini gördü. O donub qalmışdı, hətta geniş ətəkli şlyapanın altından da onun
sifətinin ölümcül dərəcədə ağappaq olduğu görünürdü. Ancaq Cip elə hirslənmiş və əzilmişdi ki, belə
şeyləri düşünəsi halda deyildi.
Atasıgilə getməyi qərara aldı. Forsenin yanına bir daha qayıtmayacaqdı, bəs Bettiylə uşağı oradan
necə götürəcəkdi?
Uinton, yəqin, indi öz klubundaydı. Sürücüyə tərəf əyilib dedi:
– Yox. Xahiş edirəm, Xayd-lark-kornerə sürün.
Onu tanıyan şveysar yanındakı oğlana qışqırdı: «Mayor Uintonu çağır, cəld!». Sonra da öz
hücrəsindən çıxıb ona kətil və «Tayms» qəzetini verdi.
Cip dizləri üstə qəzet oturaraq, ətrafındakıları, küncdə iztirablı halda özünü çəkdirən gombul,
qoca centlmeni, sinidə çay yanından keçən, ağ şapkalı lakeyi, qarmaqlardan asılan şlyapaları, teleqraf
lentlərini xatırladan ağ kağız parçaları yapışdırılmış, yaşıl mahudla üzlənmiş taxtanı və taxtanın
qabağında dayanan klubun üç üzvünü dumanlı halda görürdü. Onlardan ucaboy, bədənli, xeyirxah, ağ
jiletində pensne olan birisi küləş rəngli şlyapasını çıxardı və elə dayandı ki, Cipə baxmaq rahat olsun və
hətta bu zaman təngə gətirən kimi görünməsin. Görünür, Cip onun xoşuna gəlmişdi. Sonra atası bu
adamların yanından keçib, tələsmədən gəldi, bu kişi məbədgahından bacardığı qədər tez uzaqlaşmaq
üçün ayağa qalxdı və atasını pilləkəndə qarşıladı.
– Ata, mən səninlə danışmalıyam.
O, qızına ani nəzər saldı, şlyapasını götürdü və onun arxasınca çıxışa doğru getdi. Maşında qızının
əlindən yapışıb soruşdu:
– Əzizim, nə baş verib?
– Sənin yanına qayıtmaq istəyirəm. Mən daha orada qala bilmərəm. Bu… ümumiyyətlə, hər şey
qurtardı.
O, qızının əlini möhkəmcə sıxdı, sanki, gerisini danışmaq əzabından onu xilas eləmək istəyirdi.
Cip davam elədi:
– Amma mən uşağı götürməliyəm, qorxuram, məni geri qayıtmağa məcbur eləmək üçün o,
qızcığazı saxlamaq istəyə.
– O indi evdədir?
– Bilmirəm. Mən ona getdiyimi demədim.
Uinton saatına baxdı.
– Uşaq bu vaxtı oyaq olur?
– Hə, çaydan sonra. Sərin düşəndə.
– Onda mən bu maşını götürürəm. Sən mənim evimdə qal, uşaq üçün otaq hazırla. Mən qayıdana
kimi həyəcanlanma və otaqdan çıxma.
O, necə də misilsiz idi, hətta bircə sual belə vermədi!
Maşın Betti-stritdəki evin yanında dayandı. O sakitcə soruşdu:
– İtləri də götürüm?
– Hə. Oy, hə! O, itləri sevmir!
– Yaxşı. Gecə üçün sizə bir qədər sonra hazırlıq görərik, mən qayıdandan sonra. Ancaq bu dəfə
mən risq eləməyəcəyəm. Missis Markiyə denən, qoy sənə çay versin.
Cip maşının necə getdiyini və atasının ona necə əl elədiyini gördü, həyəcanlı və yüngülləşmiş
halda zəngin düyməsini basdı.
XVII FƏSİL
Maşın Sent-Ceyms-stritə yola düşəndə Uinton sürücüyə əmr elədi:
– Nə qədər mümkünsə, sürətli!
Onun günəşdə yanmış boynu yüngülcə qızarırdı, aşağı enmiş kipriklərinin altından gözləri ayıq-
sayıq halda baxırdı, dodaqları möhkəmcə sıxılmışdı. Onun sifətində tülkü meşədən qaçarkən ovçunun
sifətində olan ifadə var idi. Hə, o, risq eləmək istmirdi, birbaşa hücum eləməyəcəkdi. Əgər lazım
gələrdisə, bunu həmişə eləyə bilərdi. Onun başqa kişilərə nisbətən daha möhkəm əsəbləri, çox çətin və
ya kiçik işlərdə ətrafındakı ingilislərə xas olan dəmir iradəsi, fərasəti var idi. Forsenin evinin yanında
maşını saxladı, düşüb qapının düyməsini basdı və ağlına belə fikir gəldiyindən, hətta məmnunluq
duyaraq, xidmətçidən Cipin evdə olub olmadığını soruşdu.
– O yoxdu, ser. Mister Forsen evdədir.
– Hə! Bəs uşaq?
– Evdədir, ser.
– Mən uşağı görmək istəyirəm. O, bağdadırmı?
– Hə, ser.
– İtlər də oradadır?
– Hə, ser. Ser, sizə çay verimmi?
– Yox, sağ olun. – Söz – söhbət olmadan və Ciplə onun razılığına şübhə salmadan bunları necə
eləmək olardı? Düşünüb, əlavə elədi. – Mən missis Forsen qayıdandan sonra çay içəcəyəm.
Bağı keçən kimi də başa düşdü ki, Forsen yemək otağının pəncərəsinin qabağında dayanıb onu
izləyir. Uşaq bağın o biri başında ağacların kölgəsində idi, küçüklər qızğınlıqla Uintonun üstünə
atıldılar, ancaq onu qoxulayan kimi də dərhal sakitləşdilər. O, uşağın arabasına yaxınlaşıb, nəvəsinin
üzərinə əyilərək Bettiyə işarə elədi. Uşaq ağcaqanadlardan qorunmaq üçün cunadan tiklmiş miçətkəndə
uzanmış, amma yatmamışdı. Cipin gözlərinə oxşayan böyük qonur gözləri ona təmkinli bir ciddiliklə
baxırdı. Dilini bir neçə dəfə şaqqıldadaraq, elə dayandı ki, pəncərəni görə bilsin, Betti isə arxası evə
doğruydu.
Dostları ilə paylaş: |