– Betti, mən sizin sahibənizin tapşırığı ilə gəlmişəm. Yalnız həyəcanlanmayın.
Kənara
boylanmayın və mənə diqqətlə qulaq asın. Cip Beri-stritdədir və orada qalmağı qərara alıb, sizi, uşağı
və itləri də onun yanına aparmağımı istəyir. – Kök qadın gözlərini bərəltdi, Uinton əlini arabanın
kənarına qoydu. – Sakit olun! Həmişə olduğu kimi uşaqla gəzməyə gedin. İndi əsl vaxtıdır. Məni
Ridkents-parkın tinində gözləyin. Mən maşınla gəlib sizi götürəcəyəm. Vurnuxmayın, özünüzlə heç nə
götürməyin, hər şeyi həmişə olduğu kimi eləyin. Aydındırmı?
Belə əmrlər almaq və onları sual vermədən yerinə yetirmək, himayələrində onlara etibar edilmiş
uşaq olan belə kök qadınların xarakterinə xas deyildi. Qadının
sifətinin necə dəyişdiyini, yumşaq
sinəsinin necə qalxdığını görən Uinton tez əlavə elədi:
– Hə, Betti, özünüzü ələ alın! Cip sizi gözləyir. Mən hər şeyi sizə maşında izah elərəm.
– Oldu, ser! Bədbəxt balam! Bəs onun gecə dəyişəcəkləri necə olsun? Bəs missis Cipin
yatacaqları?
Hələ də pəncərənin qabağında yırğalanan kölgəni xatırlayan Uinton özünü elə göstərdi ki, guya,
uşaqla oynayır.
– Onlardan ötrü narahat olmayın. Məni qonaq otağının pəncərəsinin qabağında görən kimi də
yığışın və gedin. Betti, düz baxın! Boylanmayın. Mən sizin getmənizi gizlədəyəcəyəm! Baxın, Cipi ələ
verməyin. Özünüzü ələ alın.
Betti dərindən ah çəkərək mızıldandı: «Yaxşı, ser! Aman Allah!» – və öz ləçəyinin uclarını
bağladı. Uinton başını tərpədib, evə doğru addımladı. Ətrafa baxaraq özünü elə aparırdı ki, guya,
çiçəklərlə maraqlanır, ancaq Forsenin pəncərədən çəkildiyini hiss elədi. Uinton qonaq otağının eyvan
qapısından keçərək cəld dəhlizə çıxdı. Yemək otağının qapısını açmamışdan əvvəl qulaq verdi. Forsen
otaqda gərdiş eləyirdi. O, Uintona çuxura düşmüş gözləriylə baxırdı.
– Necəsiz? Cip evdə deyilmi? – Uinton soruşdu.
– Yox.
Bu «yox» Uintonda nəsə bir canıyananlıq oyandırdı. Cipsiz həyat! Ancaq
onun ürəyi dərhal də
sərtləşdi. Bu adam tam əhəmiyyətsiz bir heçlikdi.
– Uşaq çox gözəldir, – o dedi.
Forsen yenidən gərdiş eləməyə başladı.
– Cip haradadır? O, mənə lazımdır.
– Gələr. Hələ gec deyil.
Birdən Uinton öz oynadığı rola qarşı özündə nifrət hiss elədi. Uşağı almaq, hər şeyi Cipin
rahatlığı üçün eləmək, hə beləydi! Amma özünü elə aparasan ki, guya, heç nədən xəbərin yoxdu.
Dabanları üstə dönərək otaqdan çıxdı. Daha o, yalan deməyəcəkdi. Bu qadın onu başa düşdümü?
Qonaq otağına getdi. Betti uşaqla birlikdə məhz indi evin küncünə dönürdü.
Beş dəqiqədən sonra onlar
parkda olmalıydılar. Dayanıb gözləyir, divardan Forsenin o biri otaqda necə gəzişdiyini eşidirdi.
Dəqiqələr necə də ağır keçirdi, cəmisi üç dəqiqə keçmişdi! Yemək otağının qapısının necə açıldığını
eşitdi və Forsen dəhlizə çıxaraq giriş qapısına döğru yönəldi. Ona nə lazımdı? O, nəyə qulaq asırdı? Və
birdən Uinton dərindən köks ötürüldüyünü eşitdi, nə vaxtsa uzaq keçmişdə eynən onun özü dəfələrlə bu
cür köks ötürmüşdü, o vaxt addımlara qulaq asaraq, onu boğan kədər və həyəcan içində gözləyirdi.
Doğrudanmı, bu alçaq adam Cipi sevirdi? Özünün, sanki, Forseni izlədiyini hiss edən Uinton dəhlizə
çıxdı və dedi:
– Neyləməli, mən daha gözləməyəcəyəm. Hələlik!
«Cipə salam deyərsən» sözləri onun dodaqlarındaca dondu.
– Hələlik, – Forsen səsləndi.
Uinton sıra ilə əkilmiş ağacların arası ilə gedərkən Forsenin tənha fiqurunu hələ də yarıaçıq
qapının ağzında dayanmış halda görürdü. Betti artıq görünmürdü, yəqin, döngəyə qədər getmişdi. Onun
missiyası alındı, ancaq ruh yüksəkliyi hiss eləmirdi. Parka qədər gedib bütün köçü maşına mindirdi və
banına uşaq arabası bağlanmış maşın bütün sürəti ilə irəli şütüdü. Bettiyə söz verdiyi aydınlaşdırmanın
əvəzində o, yalnız bir cümlə dedi:
– Sabah hamınız Mildenxemə gedirsiniz.
Uzun illər əvvəl Mildxenmdəki söhbətə qədər ondan qorxan Betti onun sifətinə baxdı
və sual
verməməyi qərara aldı. Uinton maşını poçt şöbəsinin qabağında saxlayıb Forsenə teleqramma
göndərdi: «Cip və uşaq mənimlədir. Məktub yazılacaq. Uinton».
Bu, onun qəlbini yüngülləşdirdi, bundan əlavə bu vacib idi, yoxsa Forsen polisə deyə bilərdi. İndi
isə Cip hər şeyi müfəssəl danışana kimi gözləmək lazım gəlirdi.
Onlar söhbət eləməyə başlayanda artıq gec idi. Onun lal – dinməz razılığına əsasən Markinin öz
şəxsi riski və qorxusu hesabına aldığı iki dibçək gülün qoyulduğu pəncərənin qabağında oturaraq, Cip
öz başına gələnləri danışmağa başladı. Heç nəyi gizlətmədən öz evliliyinin acı uğursuzluğundan
danışırdı. Dafna Uinqin və özünün studiyada gördüyünün üstünə gəlib çıxanda Cip atasının siqareti
necə əsəbi sümürdüyünü hiss elədi. Qızının evində, qızının şəxsi evində!
Bundan sonra da Cip onunla
yaşamağa davam eləyib! O, qızının sözünü kəsmirdi, ancaq onun sükütü az qala Cipi qorxudurdu.
Bu gün baş verənlərə keçərkən Cip tərəddüd elədi. Rosek haqda danışmalıydımı? Səmimiyyət
qalib gəldi və yenidən Uinton onun sözünü kəsmədi. Cip danışıb qurtarandan sonra o, ayağa qalxdı və
tələsmədən siqaretini pəncərə altlığında söndürdü, Cipin əldən düşmüş halda, necə oturacağın arxasına
söykəndiyini görüb: «Lənətə gəlmişlər!» dedi və pəncərəyə doğru döndü.
Bu saatda, teatrlarda tamaşanın sonu yaxınlaşanda, London küçələrinə qüssəli bir sükut hakim
olmuşdu, bu sükutu, yalnız evə qayıdarkən məşuqu ilə höcətləşən hansısa yarısərxoş qadının qışqırığı,
keçən vaxtın yerini doldurmağa çalışan küçə skripkaçısının musiqisi pozurdu. Bu səslər Ciplə belə
rəftara cürət eləyən iki lənətə gəlmiş əcnəbini xatırladaraq, nəyləsə Uintonu qıcıqlandırırdı. Onları
tapançanın nişangahına götürəsən, ya da qılıncın tiyəsinə və necə lazımdısa, başa salasan! O, Cipin
sözlərini eşitdi:
– Ata, mən onun borclarını ödəmək istəyərdim. Onda elə hesab olunar ki, sanki,
mən heç ona ərə
getməmişəm.