çox böyük ziyan. Mən öz ailəmin şərəfi haqda da düşünməliyəm. Qızımın adı, mənim şəxsi adımdır və
sizə deməliyəm, mən əsl mömin
kimi nüfuz sahibiyəm, mən artıq bunu sizə demişəm. Bəzən sizi
inandırıram ki, özümü idarə eləyə bilmirəm və yalnız bu…. Siz… əgər söyləmək caizsə, yalnız siz
məni bu sərhəddə saxlayırsınız.
Onun qara əlcəklərdəki əlləri yumruq kimi düyümlənir, açılır, işıldayan nəhəng
yarımçəkmələrdəki ayaqlarının birini götürüb, o birisini qoyurdu.
– Mister Ueqq, xahiş edirəm, mənə icazə verəsiniz, sizə yazdıqlarıma əməl eləyim. Əgər nəyləsə
kömək
eləyə bilməsəm, mən özümü bədbəxt hiss elərəm.
Mister Ueqq burnunu çəkdi.
– Məsələ olduqca incədir, – o dedi, – hətta mən özüm də
bilmirəm, borcum neyləməkdir. Düzü,
bilmirəm…
– Ən başlıcası Deyzi iztirablardan azad eləməkdir. Elə deyilmi? – Cip ona baxaraq dedi.
Mister Ueqqin üzü elə ifadə aldı ki, sanki, o düşünürdü: «İztirablardan? Atasına əzab çəkməyə
icazə verin!» Ancaq o, tərəddüd edirdi, onun balaca gözlərində bir anlığa kişi heyranlığı yanıb söndü.
Baxışlarını gizlədi və öskürdü. Cip mehribancasına dedi:
– Mənə zövq almağa imkan verin!
Mister Ueqq özünü itirmiş halda, onun boy-buxununa baxırdı. O. səsinin tonunu mümkün qədər
yumşaltmağa çalışaraq dedi:
– Əgər siz sualı belə qoyursunuzsa, düzü mən, necə etiraz eləyəcəyimi bilmirəm, ancaq öz
aramızda bütün bunlar haqdakı fikirlərimi mən dəyişə bilmərəm.
– Başa düşürəm. Sizə çox minnətdaram, sonra siz mənə məlumat verərsiniz. İndisə mən sizin
vaxtınızı almayacağam, – belə deyib əlini ona uzatdı.
Mister Ueqq onun əlindən yapışıb bir qədər gec cavab verdi.
– Hə, hə, mən Kempden-Xildəki bir cənabla görüşməyi şərtləşmişəm. O, saat on ikidən işə
başlayır. Mən heç vaxt gecikmirəm. Xoş arzularla!
Onun kvadrat bədəninin qapıda necə yox olmasını və necə lovğalıqla öz işıldayan əlcəklərini
düymələdiyini görən Cip yuxarı qalxdı, sabunla üzünü və əllərini möhkəmcə yudu.
Bir neçə gün ərzində Forsen gah yaxşı, gah da pis oldu, ancaq görünür, böhran keçdi və indi hər
saat təhlükə azalırdı. İki həftə deyilənə uyğun yaşayandan sonra həkimin dediyi kimi onun «dəniz
havası ilə nəfəs almaqdan» və «hər cür həvəs oyandıran səbəblərdən qaçmaq»dan başqa yolu qalmadı.
Cip onun adi həyatından bütün bu səbəbləri çıxartmışdı,
özünü də, o cümlədən. Nə qədər ki, zəifdi, Cip
onu əlində saxlayacaqdı. Ancaq uşaq, Betti və itlərin gətirilməsi üçün adam göndərməmişdən və bir
dəfəlik öz evinə yığışmamışdan əvvəl bir neçə acı saat yaşadı. Forsenin borcları ödəndi, Rosekə olan
min funt borcu da, Dafna Uinqə dəyən zərər də, o cümlədən.
Qız Mildenxemin yanındakı kottecə yerləşdi, orada heç kim onun haqqında heç nə bilmirdi və
günlərini tək-tənha qorxu
içində keçirirdi, qara palto geyirdi, əlindəki orta barmağına da qızıl üzük
taxmışdı.
Avqust və sentyabrın birinci yarısını Cip və Forsen Bude ətrafında keçirdilər. Forsenin dənizə olan
həvəsi onu saxlayır və öz xasiyyətini büruzə verməyə qoymurdu. O, güclü qorxu keçirmişdi, belə qorxu
isə asanca unudulmur. Onlar fermada yaşayırdılar, sadə adamlarla münasibətdə olurdular, o, özünü
yaxşı cəhətdən göstərirdi, onun yaxşı cəhətləri ilə, hətta fəxr eləmək olardı. O, elə hey öz «su pərisi»ni
uşaqdan ayırmaq istəyirdi, təkcə özü üçün ayırmaq istəyirdi, ot basmış yamaclara aparsın, ya da
qayalıqlara, çimərliyə. Ona hər gün çimmək və özlərini günə vermək üçün hansısa bir yeni
körfəz
tapmaq böyük ləzzət verirdi. Cip yosun basmış dəniz daşlarının üstündə oturub, ayaqlarını suya
sallayaraq, yaş saçlarını darayanda, doğrudan da, su pərisinə oxşayırdı. Əgər Cip onu sevsəydi! Ancaq
təbiətin qucağında onunla olmaq Cipə daha asan idi, qızın qəlbi heç vaxt onun üçün açılmırdı, heç vaxt
səsindən həyəcanlanmır, öpüşündən ürəyi hiddətlə döyünmürdü. Cip tez-tez uşağa baxırdı və hətta
Forsen kimi özünəvurğun birisi də, uşağa baxan anlarda onun gözlərinin
tamam başqa cür oduğunu
sezirdi.
Ancaq havalar korlandı, o, daha tez-tez narahat olmağa və skripkasını tələb eləməyə başladı, onlar
sağlam və möhkəm halda Londona qayıtdılar. Cipi heç vaxt bütün bunların yalnız müvəqqəti sakitlk
olması hissi tərk eləmirdi, onların qayıdaşındın sonra bu hisslər, yaxşı havadan sonra göydə toplaşan
buludlar kimi daha da sıxlaşmağa başladı. O, tez-tez Dafna Uinq haqda fikirləşirdi, ona məktub yazdı
və cavab aldı:
«Əziz missis Forsen!
Ah, siz necə də şəfqətlisiniz ki, mənə məktub yazırsınız. Mən axı bilirəm, siz mənə necə
münasibət bəsləməliydiniz. Siz necə xeyirxahsınız ki, mənə bura gəlməyə şərait yaratdınız. Mən heç nə
haqda düşünməməyə çalışıram, ancaq bu çox çətindir. Anam sonra bura gələcək. Bəzən
mən gecələr
yuxusuz halda uzanır və küləyə qulaq asıram. Külək yer üzündə ən kədərli şeydir, elə deyilmi?
Maraqlıdır. Mən öləcəyəmmi? Öləcəyimə ümid edirəm. Ah, hə, doğrudur! Əlvida, əziz missis Forsen,
sizə bu qədər acı verdiyimi heç vaxt özümə bağışlamayacağam.
Sizə minnətdar olan
Dafna Uinq».
Nə o, nə də Forsen bircə dəfə olsun belə qızdan söz salmırdılar, Cip, hətta bilmirdi, o, nə vaxtsa
balaca rəqqasə haqda düşünürmü, ona nə baş verdiyini bilirmi? Ancaq indi doğum vaxtı yaxınlaşdıqca
Cip keçən hər gün daha güclü hiss edirdi ki, mütləq getməli və onunla görüşməlidir. Cip Rozamunda
bibisi ilə Xerroqeytdəki müalicədən sonra Mildenxemə qayıdan atasına məktub yazdı. Uinton cavab
yazdı ki, qızın yanında baxıcı, bir də ona elə gəlir hansısa bir qadın,
bəlkə də, anası var, ancaq bütün
bunları dəqiqliyinə qədər öyrənə bilməz. Cip gələ bilməzmi? O təkdir, həm də indi cavan tülkülərin ovu
başlayıb. Bu, necə də öz kədərini belə quru ifadələr altında gizlətməyə oxşayırdı! Ona sevinc bəxş
edəcəyini, həm də tazılarla ov eləyəcəyini fikirləşən Cip getməyini qəti qərarlaşdırdı. Uşaq sağlam idi,
Forsen içmirdi, o, bu balaca, sakit məzuniyyəti tamamilə özünə rəva görə və Dafna Uinqlə görüşüb öz
vicdanını da sakitləşdirə bilərdi. Dənizdən qayıdandan sonra o əvvəllər olduğu kimi yenə də studiyada
Forseni müşaiyyət edirdi. Bir dəfə səhər məşğələlərinin sonunda münasib məqam tapıb dedi: