Ömrüm qocalır



Yüklə 450,38 Kb.
səhifə3/3
tarix15.03.2018
ölçüsü450,38 Kb.
#32504
1   2   3

DUR GEDƏK
Yenə Borçalımın toy büsatıdı,

Qurban olum, telli sazım, dur gedək.

Vətənimin xoş günü, xoş çağıdı.

Dur ayağa, xoş avazım, dur gedək.

Qurban olum, telli sazım, dur gedək.
Aləmə bax, gör nə günümdü mənim,

Çiçəklənib çölüm, düzüm, çəmənim.

Nazlanır, naz edir nazlı sənəmim,

Açılıbdı güllü yazım, dur gedək,

Qurban olum, telli sazım, dur gedək.
Bilməm Borçalının neçədi yaşı,

Canımdan əzizdi torpağı, daşı.

Aşıq Gülabının könül sirdaşı,

Şirin dilli, sərvinazım, dur gedək,

Qurban olum, telli sazım, dur gedək.
22.03.1997

USTADDI Kİ USTADDI
Mərddən mərd törəyər qəhrəman olar,

Mərdin oğlu comərddi ki, comərddi.

Bayquştək ulayar xarabalarda,

Namərd oğlu namərdir ki, namərddi.


Görməmiş pul görüb yaman tələsir,

Dövran bu dövrandı, əsr bu əsr.

Yoxsulun nəyi var – bir quru həsir,

Bərbad oğlu bərbaddı ki, bərbaddı.


Gülabı dərsini ustaddan aldı,

Ömründə nə qədər havalar çaldı!

Ustad görməyənin işi xam qaldı.

Ustad oğlu ustaddı ki, ustaddı.



15.01.1998


GEDƏKMİ
Yolçu müəllim, bir üz tutaq dağlara,

Buzlu bulaqlara qonaq gedəkmi?

Düz on ildi, gedəmmirəm həsrətəm,

Sinəm olub varaq-varaq gedəkmi?


Qayalarda xına qoyaq əllərə,

Dəstə tutub sirdaş olaq güllərə.

Yastı qardan haray salaq ellərə,

Həmdəm olsun bizə yaraq, gedəkmi?


Gedək görək, örüş yeri dururmu?

Boz canavar çobanları yorurmu?

Dərələri tütək səsi alırmı?

Gülabını yolda yoraq, gedəkmi?


20.07.2001


AYXAN BALAM
Sən mənim ömrümə bir dayaq oldun,

Balamın balası, ay Ayxan balam.

Günəştək saçıldın, gültək açıldın,

Balamın balası, ay Ayxan balam.


Yerimsən, göyümsən, dinim imanım,

Sazımsan, sözümsən, canımda canım.

O dünyam, bu dünyam, yeddi cahanım,

Balamın balası, ay Ayxan balam.


Əslisən, nəslisən Xındı Məmmədin,

Çalış baban kimi olsun hörmətin.

Böyü, ay ər balam, igid ol, mətin,

Balamın balası, ay Ayxan balam.


10.09.2001


NƏYDİ MƏNİM GÜNAHIM
Bu qərib dünyada bağrım qan olur,

Aman fələk, nəydi mənim günahım?

Əlim çatmır vətənimə, elimə,

Aman fələk, nəydi mənim günahım?


Bir çay idim, çalxalandım, bulandım,

Sevdalandım, bu dünyanı dolandım.

Eşqə düşdüm, eşqin oduna yandım,

Aman fələk, nəydi mənim günahım?


Bu qürbət diyarda yananım hanı?

Arxamca gözləri dolanım hanı?

Gülabıyam, dərdə qalanım hanı?

Aman fələk, nəydi mənim günahım?


15.12.2004


EHTİYACIM VAR
Eşqdən sədəqə olmaz, gözəlim,

Mənim məhəbbətə ehtiyacım var.

Şəhvətə qul olmaq nadan işidir,

Mənim məhəbbətə ehtiyacım var.


Məhəbbət uludu, uludu, gözəl,

Məhəbbət insanı duruldu, gözəl,

Məhəbbət öldürüb dirildir, gözəl,

Mənim məhəbbətə ehtiyacım var.


Ağır mahalına,elinə qurban,

Mənim şirin dillim, dilinə qurban.

Gülabıyam, gülüm, gülünə qurban,

Mənim məhəbbətə ehtiyacım var.



İNDİ
Sankt-Peterburqda yaşayan əziz qardaşım Əşrəfə
Məndən uzaqdasan, əziz qardaşım,

Heç bilmirəm, necə dözürəm indi?

Həsrətdən qovrulub yanıram yaman,

Dəli divanətək gəzirəm indi.


Baxginən başıma gör nələr gəlir,

Bağçamda sünbülüm, bir gülüm solur.

Yata bilməyirəm, gözlərim dolur,

Dərdli günlərimi çözürəm indi.


Gülabıyam, göz yaşımı silirəm,

Ömrüm başa çatır, yəqin bilirəm.

Gecə səhərədək yuxu görürəm,

Səhərlər yuxumu yozuram indi.




VALLAH!
Elin köməyini, elin gücünü,

Öz arxa dayağım bilmişəm, vallah!

Hər dəfə bir fəqir sevindirəndə

Doyunca sevinib gülmüşəm, vallah!


Çiçəyin rəngini, gülün rəngini,

Həyatın rəngini, ömrün rəngini,

Kədərin rəngini, qəmin rəngini,

Anamın gözündə görmüşəm, vallah!


Yaşamışam bu şöhrətdə, bu şanda,

Gülabıyam, dolanmışam cahanda.

Hər dəfə atamı xatırlayanda,

Töküb göz yaşımı silmişəm, vallah!



QARDAŞ ÖLÜMÜ
Yaman kövrəlmişəm yaman, ay ellər.

Nə yaman olurmuş qardaş ölümü.

Dərd aldı sinəmi, yandırdı yaman,

Nə yaman olurmuş qardaş ölümü.


Sazımı əlimə ala bilmirəm,

Doyunca danışıb gülə bilmirəm.

Bu necə zillətdi, bilə bilmirəm,

Nə yaman olurmuş qardaş ölümü.


Dünya yalan dünya, yalan oldu vay!

Ömrümün bağçası viran oldu vay!

Gülabının könlü talan oldu vay!

Nə yaman olurmuş qardaş ölümü.



AY BUTA
Fələk xatirimə yaman dəyibdi,

Gəl mənim qəlbimə dəymə, ay Buta.

Allah da bilir ki, mən günahsızam,

Günahkar yerinə qoyma, ay Buta.


Zəmanə bəd gəlib neynim güldürmür,

Ürəyimə kədər çöküb sildirmir.

Ölüm istəyirəm, Allah öldürmür,

Yadların sözünə uyma, ay Buta.


Öldü Xındı Məmməd, öldü Saraşdı,

Xan Əmrah, Kamandar dünyadan köşdü.

Qoy ölsün Gülabı, qal gözüyaşdı,

Amandı sazıma qıyma, ay But.



SƏRASƏR EYLƏR
Qohumun namərdi, dostun nadanı,

İnsanı yandırar, tez əsər eylər.

Vətəni,torpağı satıb gedəni,

Qürbət el çürüdər, sərbəsər eylər.


Nə gözəl görünür aynadan dünya,

Gözəllər gözəli, ay nadan dünya.

İnsanı yerindən oynadan dünya,

Nə anlayar sözü, nə əsər eylər.


Nəzər eylə Gülabını tanı, yar,

Aşiq-məşuq bir-birini tanıyar.

Darda qoymaz sevənləri tanrı, yar,

Rəhm edib köməyin sərasər eylər.


15.06.1994


SAZIM
(müxəmməs)
Mən səninlə həmdəm oldum,

Yetmiş beş havalı sazım.

On bir simin avazından

Dərdimə dəvalı sazım.

Neçə xalında, gülündə

Aşiqtək nəvalı sazım.

Həm bəmində, həm zilində

Aranlı-yaylalı sazım.

Bəzən bir ustad əlində

Koroğlu nərəli sazım.


Yenə yaman xəyallısan,

De yadına, kimlər düşür?

Neçə-neçə köç eyləyən,

Həyatdan nakamlar düşür.

Sənətkarlara, sənətə

Zalımlar, yamanlar düşür.

Bəlkə də cövlan etdiyin

Dövranlar, zamanlar düşür.

Bilirəm cəng meydanında

Tufansan, davalı sazım.


Gülabıyam, ömrüm boyu,

Çəkərəm sənin nazını.

Sənə müxənnət olanın,

Qışa döndərrəm yazını.

Həyatdan artıq sevirəm,

Səsini, xoş avazını,

Aşıqlar səndə tapıb

Baharını, Gülyazını,

Xındı Məmməddən yadigar

Qüdrətdən qalalı sazım.


21.12.1995



AŞIQ GÜLABIYA HƏSR EDİLMİŞ

ŞEİRLƏR




ƏŞRƏF XINDI

MƏMMƏD OĞLU
XANDI GÜLABI
Əziz Yaradana min şükür olsun,

Könüllər pirinə döndü Gülabı!

Deməsinlər yer üzündə yurd salıb,

Sənətə göylərdən endi Gülabı!


Çalğıda mahirdi,sazda yenilməz,

Sirdi, möcüzədi çəkiyə gəlməz.

Od olub yanmasa, o çala bilməz,

Babamız Əmrahla təndi Gülabı.


Özü mehribandı,üzü gülərdi,

Sənət dünyasında ər oğlu ərdi.

Əşrəfin gözündə ocaxdı, pirdi,

Paşadı, sultandı, xandı Gülabı!


13.08.2011

AY QAĞA!

Qardaşım Gülabıya
Ustad bir ozanın ustad oğlusan,

Telli sazın allahısan, ay qağa!

Haxdan gələn bir sənətin Hüseyni,

Kamandarı, Əmrahısan, ay qağa!


Ürəyində dağlar qədər sirr yatır,

Tellər ilə qovuşmağa can atır.

O sirləri o barmaqlar oyadır,

Havaların fəryadısan, ay qağa!


Bu dağların zirvəsisən, başısan,

Sənə həsrət gözlərimin yaşısan.

Sən, Əşrəfin müqəddəs qardaşısan,

Xındı Məmməd övladısan, ay qağa!


07.02.2006

Sankt-Peterburq

GÜLABI

Sənət aləmində, saz dünyasında,

Sirri açılmayan sirdi Gülabı.

Sazıyla dünyaya meydan oxuyan,

Ozandı, ocaqdı, pirdi Gülabı.
Şəlalədi, dağ selidi, tufandı,

Bir dəryadı təlatümdü, ümmandı.

Sızıldayan teldi, bir yana şamdı,

Atəşdi, alovdu, oddu Gülabı.


Bir xalqa bağlıdı el sənətkarı,

Bir xalqın incisi, dövləti varı,

Bir ustad aşığın yurd yadigarı,

Ünvanı Borçalı, adı Gülabı.


Düzlüyü tərsinə yozub yazanlar,

Bilmirmi müqəddəs haqdı ozanlar.

Olsa da elindən, yurdundan kənar,

Sinələr altında yurddu Gülabı.


Türkün əyilməyən şah vüqarıdı,

Bir sənət mülkünün şirin barıdı,

Könlümün istəyi, arzularıdı,

Sənətimin ilk ustadı Gülabı.


Ay Əşrəf fəxr eylə, öyün hər zaman,

Gərək ki naşükür olmasın insan.

Kainat durduqca yaddaşda qalan,

Tarixdi, varlıqdı addı Gülabı.



QASIM ABBASƏLİYEV

ELƏ ÇALMA
Elə çalma o telləri, Gülabı,

Ürəyimin lap ürəyi alışar.

Bir dəli həsrətə əsir olmuşam,

Dünya yenə gözlərimdə qarışar.


Bu dünyanın yox sirrini qananı,

Hicran saldı gözlərimdən zamanı.

Eşq oduna alışanın, yananın,

Qübar yenər bədəninə sarışar.


Barmaqların alov vurur Kərəmə,

Asta-asta atəş düşür aləmə.

Dözəmməyib bu hicrana, bu qəmə,

Qasım durub Məcnun ilə yarışar.


İSA NƏSİBOV

TELLİ SAZ
Bu dünya əzəldən bir tamaşadır,

İnsanı xoş niyyət, ümid yaşadır.

Ürəyimdə arzularım qoşadır,

Biri Gülabıdı, biri telli saz.


Elimin, obamın dövləti varı,

Ozan dünyamızın həm tacidarı,

Ustad sənətkarın son yadigarı,

Biri Gülabıdı, biri telli saz.


Vurğundu sənətə könlüm əzəldən,

Ruhum qidalanır şeir, qəzəldən.

İki şeyi qoru, Tanrı, nəzərdən

Biri Gülabıdı, biri telli saz.


İsa xoş arzular, xoş günlər dilər,

Zərin də qədrini zərgərlər bilər.

Bilirəm xalqımın qəlbindəkilər,

Biri Gülabıdı, biri telli saz.


ŞAİR DƏRYEYNUR

GÜLABIYA
Quşlar da dayanır, məleykələr də,

Gülabı səsini qaldıran zaman.

Açır pəncərəni şux gözəllər də,

Barmaqlar Kərəmi yandıran zaman.


Başlıyanda köhnə Dilqəm havası,

Gəlir düşür yada gözəllər xası.

Qanan deyir sənətinin ustası,

Çalıb, qanmıyanı qandıran zaman.


Şair Dəryeynuram gül əvəzində,

Yar çəkərsə dara qul əvəzində,

Dastan bağışlaram pul əvəzində,

Bu şair könlümü dindirən zaman.



SƏDİ YARADANQULU

KÖNLÜMÜ
Oynatdın yerindən elə könlümü,

Döndərdin bir kövrək telə könlümü.

Gülabı, qardaşım, bir “Dilqəmi” çal,

Qoyma sızlar qalsın belə könlümü.


Gözləri oxşayan bizim dağlardan,

“Yastı qar”,”Əyri qar” gül oylaqlardan,

Sərin çeşmələrdən, buz bulaqlardan,

Söhbət sal bir gətir dilə könlümü.


Onun o yerlərdə hələ gözü var,

Alışıb yanmağa odu, közü var.

Dillərdə nəğməsi, neçə sözü var,

Çəkdikcə çəkiynən zilə könlümü.


Sədi toy-büsatdan doyası deyil,

Bir el şənliyindən qalası deyil.

Özgə havaları duyası deyil,

Köklə mənim “Sarıtel”ə könlümü.


11.02.2004

ELDAR TƏBİB
SƏNƏ
Can Gülabı, götür sazı bir də çal,

Sinən üstə çox yaraşır saz sənə.

Elə bilmə valeh olan tək mənəm,

“Əhsən”deyir fəsli bahar, yaz sənə.


Haqdan yanan atəşin var,odun var,

Öz məzən var, öz ləzzətin, dadın var.

Borçalıda sazın boyda adın var,

Harda olsaq güvənmişik biz sənə.


Haqdan paysan, göydən düşən qismətsən,

Ədəbinlə ərənlərə nisbətsən.

Təpə-dırnaq abır, həya, ismətsən,

Həsəd çəkir qadın, gəlin, qız sənə.


“Urfanı”nla çox xəyala dalmışam,

Sənətinə valeh-heyran qalmışam.

Vurğun olub meyli sənə salmışam,

Düz əlimi uzatmışam düz sənə.


Xalq içində çoxdu xətir-hörmətin,

Ucaldıqca el verəcək qiymətin.



Təbib dilər əyilməsin qamətin,

Yaşayasan qismət olsun yüz sənə.




GÜLABI GÖZƏL
(təcnis)
Barmaqlar pərdədə nəğmə toxuyur,

Çalır telli sazı Gülabı gözəl.

Bu nəğmədən yer-göy ətir qoxuyur,

Elə bil tökülür gül abı gözəl.


Eşqindən nur salıb bu göy, çəmənə,

O yanı Borçalı, bu Göyçə mənə.

Nə gözəl yaraşır bu göy çəmənə,

Yarpaqları yaşıl, gül abı gözəl.


Gül sevməyən bilməz gül tərəfi nə,

Təbibi göndərin Gül tərəfinə.

Öləndə döndərin gül tərəfinə,

Səpin məzarına gülabı gözəl.
2002

ARİF NÜVƏDİLİ
AŞIQ GÜLABI
Başımı başlara qoşub bu axşam,

Təbrikə gəlmişəm, Aşıq Gülabı.

Bir-iki kəlməynən tərif deməyə,

Ehtiyac bilmişəm, Aşıq Gülabı.


Sən bir uca dağsan, kölgəsi qalın,

Mən nabələd yolçu, ayağı yalın,

Önündə sənintək əhli-kamalın,

Heyran kəsilmişəm, Aşıq Gülabı.


İzn ver şəninə bir söz söyləyim,

Qarşında baş əyim, təzim eyləyim.

Qüdrətim çatmadı çoxa, neyləyim

Şair deyilmişəm, Aşıq Gülabı.


29.11.2001


GƏNCƏLİ NADİR BƏY MUSTAFA OĞLU


TELİNƏ QURBAN
Çal, ağrını alım, bir Kərəmi çal,

Barmağına qurban, əlinə qurban.

O yanan Kərəmi yenə yada sal,

Sazının titrəyən telinə qurban.


Min il bir-birinə həsrətli kimi

Görüşdür, qovuşdur mizrabla simi.

Çal, oxu, Gülabı, coşdur təbimi,

A şirin ləhcəli, dilinə qurban.


Dostun məclisində çal tufan eylə,

Saz səsi əlləşsin asiman ilə.

Bu yerdə Nadir bəy gəlibən dilə,

Desin sazlı sözlü elinə qurban.


19.11.1999
ZAKİR QURBANOV (ŞİNDİLƏR)

GÜLABI
Ad-san qoydun Borçalının elində,

Dil açırmış telli saz da əlində,

Əzbər oldun dost-tanışlar dilində,

Öz sazınla çala-çala, Gülabı.


Yada saldın telli sazın dadını,

Süburt etdin alovunu, odunu.

Yaşadırsan Xındı Məmməd adını,

Öz sazınla çala-çala, Gülabı.


Eşidənlər valeh olub sazına,

Heyran olub baharına, yazına.

Sənsən dözən el-obanın nazına,

Öz sazınla çala-çala, Gülabı.


Bir ümman var sənin geniş sinəndə,

Odlanırsan telli sazın dinəndə.

Ucalırsan ellər səndən deyəndə,

Öz sazınla çala-çala, Gülabı.


Yığılsa bir yerə aşıqlar piri

Sənə tay olanmaz yüzündən biri.

Bir yada sal “Ruhani”də Zakiri,

Öz sazınla çala-çala Gülabı.



20.03.2000
ZAKİR NADİROĞLU

YANDIR MƏNI, YANDIRIYNAN, GÜLABI
Yəhya bəyin havasıdır “Dilqəmi”,

Dağlar üstə soraqlaynan sən məni.

Gəl yandırma “Zarıncı”yla aləmi,

Saz ağlayır “Kərəmi”də Gülabı,

Yandır məni, yandırıynan, Gülabı.
Bu nə sirdir saz danışır əlində,

Ürək yanır, saz alışır əlində.

Səbr edirsən zikr dolaşır dilində,

Saz ağlayır “Kərəmi”də Gülabı,

Yandır məni, yandırıynan, Gülabı.
Qəm yerində şum eyləyən dərd əkər,

Ocaq alovlanar, kömür nə çəkər?

Fikirləşmə qərib-qərib bu qədər,

Saz ağlayır “Kərəmi”də Gülabı,

Yandır məni, yandırıynan, Gülabı.

“Ustadnamə” ustadların havası,

Əsli qızın Kərəm oldu butası.

Açılmadı, tilsim oldu yaxası,

Saz ağlayır “Kərəmi”də, Gülabı,

Yandır məni, yandırıynan, Gülabı.


Yandır məni, ağlat məni, a qardaş,

Dağlar üstə dağlat məni, a qardaş

Təbibim ol, sağalt məni, a qardaş,

Saz ağlayır “Kərəmi”də, Gülabı,

Yandır məni, yandırıynan, Gülabı.
Zakir yaman kövrək olub, nə dansın,

Qəflət yuxusundan durğuz, oyansın.

Sən özün ki dərdi bilib duyansan,

Saz ağlayır “Kərəmi”də, Gülabı,

Yandır məni, yandırıynan, Gülabı.
Bakı – 2005

ŞAHSOLTAN
Gülabının 50 illik yubileyinə
Nəğməsin dinləyib xəyala daldım,

Sazın laylasını çaldı Gülabı.

Adını biləndə lap heyran qaldım,

Cənnətdən dərilmiş güldü Gülabı.


Haqqın dərgahından nurlanıb gəlib,

Min bir xəzinədən varlanıb gəlib.

Nurlu bulaqlardan gurlanıb gəlib,

Kükrəyən çaylardı, seldi Gülabı.


İncə barmaqları dəydikcə simə,

Sehrli pərdələr edir zümzümə.

Sədası yetişsə xəstə qəlbinə,

Sağalar deyər ki, pirdi Gülabı.


Xındı Məmməd özü olmuş ustadı,

Odur ki, göylərə yüksəlir adı.

Sazınnan coşdurur yaxını-yadı,

Söhbətdə şəkərdi, baldı Gülabı.


Şahsoltanam, bu söz qalsın yadigar,

Sənətkara böyük məhəbbətim var.

Fəxr etsin Borçalı, o ulu diyar,

Dünyanı heyrətə saldı Gülabı.



29.11.2001

İSA NƏSİBOV
AŞIQ GÜLABIYA MƏKTUB
Saza-sözə tamarzıyıq nə vaxtdı,

Bəsdi daha dözəmmirik qayıt, gəl.

Yəqin bu da ya qismətdi, ya baxtdı,

Sənsiz söz də düzəmmirik qayıt, gəl.

Vallah, daha dözəmmirik qayıt, gəl.
Ata yurdun qübarlıdır hər daşı,

Ağlamaqdan quruyubdu göz yaşı.

Xramın qırağı, yarğanın qaşı,

Gül bitirmir, üzəmmirik, qayıt, gəl.

Vallah, daha dözəmmirik qayıt gəl
Yaş da ötüb, ömrü duman alıbdı,

Zalım dövran bizi ayrı salıbdı.

Sənsiz dostlar yaman yetim qalıbdı,

Bu əhvalı çözəmmirik, qayıt, gəl,

Vallah, daha dözəmmirik, qayıt, gəl
Bülbül də lal olub oxumur sənsiz,

İsa da ölübdü gorsuz, kəfənsiz.

Siz ki anlayırsız, siz ki bilirsiz,

Kişi kimi gəzəmmirik, qayıt, gəl,

Vallah, daha dözəmmirik, qayıt, gəl.

KİTABIN İÇİNDƏKİLƏR
Sazın Gülabısı, sözün sərrafı..........................3

DİVANİLƏR

Lailahə illəllah.................................................14

Danış...............................................................15

GƏRAYLILAR

Aşıq İbrahimə..................................................17

Torpağıma dəymə! Dəymə!............................18

Könlüm............................................................19

Cəlilim, Cəlilim...............................................20

Dünya..............................................................21

Dözmürəm.......................................................22

Yaralandım, yaralandım..................................23

Sazım, Allahım................................................24

Ayrılmaram.....................................................25

Sənin acığına...................................................26

Qurban olum...................................................27

Sus bülbülüm...................................................28

Qardaş.............................................................29



QOŞMALAR

Ömrüm qocalır................................................31

Gəl...................................................................32

Telli sazım.......................................................33

Gecələr............................................................34

Belə dost da var...............................................35

Mübarək olsun.................................................36

Neyləyim.........................................................37

Arzu ilə İmkanın mübahisəsi..........................38

Səməd bəyim...................................................39

Gəlmədin.........................................................40

Allah................................................................41

Məhəbbət-Nifrət..............................................42

Axşam oldu.....................................................43

İlahi səslər.......................................................44

Pir idim axı......................................................45

Başına döndüyüm............................................46

Sazımdan soruş...............................................47

Saxla sən məni................................................48

İşıq ver mənə...................................................49

Ağlaram...........................................................50

Amanat............................................................51

Əhməd Sadaxlının 60 illik yubileyinə............52

Aşıq Arif Başkeçidliyə....................................53

Oğul gərək.......................................................54

Vallah..............................................................55

Dəhşət..............................................................56

Ölümdən qorxmuram......................................57

Yahu dərvişəm................................................58

Yazığım gəlir...................................................59

Ana..................................................................60

Yaş o yaş deyil................................................61

Günahkar.........................................................62

Mən olmayanda...............................................63

Şair Osmana....................................................64

Nədəndi...........................................................65

Mən.................................................................66

Qısqanıram mən..............................................67

Gəl...................................................................68

Düşərsən..........................................................69

Xoşbəxt günlərim............................................70

İncidim............................................................71

Məni................................................................72

Təhləli qardaşım İsmayıla...............................73

Dur gedək........................................................74

Ustaddı ki ustaddı............................................75

Gedəkmi..........................................................76

Ayxan balam...................................................77

Nəydi mənim günahım...................................78

Ehtiyacım var..................................................79

İndi..................................................................80

Vallah..............................................................81

Qardaş ölümü..................................................82

Ay Buta...........................................................83

Sərasər eylər (təcnis).......................................84

Sazım (müxəmməs).........................................85


AŞIQ GÜLABIYA

HƏSR EDİLMİŞ ŞEİRLƏR
Əşrəf Xındı Məmməd oğlu

Xandı Gülabı...................................................88

Ay qağa...........................................................89

Gülabı..............................................................90



Qasım Abbasəliyev

Elə çalma.........................................................92



İsa Nəsibov

Telli saz...........................................................93



Şair Dəryeynur

Gülabıya..........................................................94



Sədi Yaradanqulu

Könlümü..........................................................95



Eldar Təbib

Sənə.................................................................96

Gülabı gözəl (təcnis).......................................97

Arif Nüvədili

Aşıq Gülabı.....................................................98



Gəncəli Nadir bəy Mustafa oğlu

Telinə qurban..................................................99



Zakir Qurbanov (Şindilər)

Gülabı..............................................................100



Zakir Nadiroğlu

Yandır məni, yandırıynan, Gülabı...................101



Şahsoltan

Gülabının 50 illik yubileyinə...........................103



İsa Nəsibov

Aşıq Gülabıya məktub.....................................104



AŞIQ GÜLABI



MЯN OLMAYANDA

«Елм вя Тящсил» няшриййатынын директору:

профессор Надир МЯММЯДЛИ
Kompüterdə yığanlar: Vüsal Abiyev

Validə Bədəlova



Korrektor: Vüsal Abiyev

Йыьылмаьа верилмиш 14.04.2013

Чапа имзаланмыш 22.05.2013

Шярти чап вяряги 7. Сифариш № 82

Каьыз форматы 60х84 1/16. Тираж 500

Китаб «Елм вя Тящсил» няшриййат-полиграфийа

мцяссисясиндя щазыр диапозитивлярдян чап олунмушдур.

E-mail: elm_ve_tehsil@box.az

Тел: 497-16-32; 050-311-41-89



Цнван: Бакы, Ичяришящяр, 3-ъц Магомайев дюнэяси 8/4.


1 Lətif, Hüseyn – Gülabının özündən böyük qardaşlarıdır.

1 Əhrimən – şər allahı

2 Hürmüz – xeyir allahı

1 Kəlbi – itt


Yüklə 450,38 Kb.

Dostları ilə paylaş:
1   2   3




Verilənlər bazası müəlliflik hüququ ilə müdafiə olunur ©genderi.org 2024
rəhbərliyinə müraciət

    Ana səhifə