Prezidentin İqlim Dəyişikliyinə dair Paris Sazişi barədə Bəyanatı
Yüklə 25,5 Kb. Pdf görüntüsü
|
| Prezidentin İqlim Dəyişikliyinə dair Paris Sazişi barədə Bəyanatı İqlim Dəyişikliyinə dair Paris Sazişi barədə Prezidentin Bəyanatı ABŞ Prezidentinin İclas otağı
PREZİDENT: Hələ inauqurasiya mərasimindəki ilk çıxışımda ölkəmizin iqlim dəyişikliyinə qarşı mübarizə aparacağını və planetimizin gələcək nəsillər üçün qorunması uğrunda yorulmadan çalışacağını qeyd etmişdim. İki həftə əvvəl Parisdəki çıxışımda dünya qarşısında bəyan etmişdim ki, bu məqsədə nail olmaq üçün qlobal karbon tullantılarını azaldacaq və dünyamızı gələcək nəsillər üçün daha təmiz tutacaq davamlı bir razılaşmaya, güclü bir qlobal sazişə ehtiyacımız var. Bir neçə saat əvvəl , biz buna nail olduq və dünyanın ehtiyac duyduğu güclü bir razılıq ətrafında birləşdik.
Belə bir uğurlu sammitə rəhbərlik və ev sahibliyi etdiyi üçün Prezident Olandın, Baş katib Ban Gi Munun, eləcə də səbr və qətiyyətlə sammitə sədrlik etdiyi üçün Fransanın Xarici İşlər Naziri Loran Fabiusun əməyini yüksək qiymətləndirirəm. Öz növbəsində Baş Katib Con Kerriyə, baş məsləhətçim Brayn Deeseyə, baş müzakirəçi Todd Stern və onların komandalarının hər bir üzvünə həyata keçirdikləri bu təkrarsız fəaliyyətlərinə və Amerikanın adını yüksək tutduqlarına görə xüsusi təşəkkürümü bildirmək istəyirəm. Mən həm də ərazisinin böyüklüyündən, inkişaf səviyyəsindən asılı olmayaraq dünyaya qarşı yönələn təhlükə ilə mübarizə istiqamətində göstərdiyi birgə fəaliyyətə görə xalqları təmsil edən 200-ə yaxın dövlətin nümayəndəsinə öz dərin təşəkkürümü ifadə edirəm. Biz, bir olduğumuz zaman, dünyanın nələrə qadir olmasını nümayiş etdirməyi bacardıq.
Bu gün Amerika xalqı fəxr edə bilər, çünki bu tarixi saziş Amerika rəhbərliyinə göstərilən etimaddır. Biz ötən yeddi il ərzində Amerika Birləşmiş Ştatlarını iqlim dəyişikliyi ilə mübarizədə qlobal liderə çevirmişik. 2009-cu ildə biz Kopenhagen sammitinin davamlılığının saxlanmasına kömək etdik və iqlim dəyişikliyi ilə mübarizədə bütün ölkələrin rolunun olmasını təmin etdik. Sonra biz, külək və günəş enerjisi sənaye sahələrinə qoyulan artan tarixi əhəmiyyətli sərmayələrimiz ilə orta sinif üçün yeni və davamlı iş yerlərinin yaradılması sahəsində nümunəvi bir dövlət olduq. Biz elektrik stansiyalarının uşaqlarımızın nəfəs aldığı havaya buraxdığı karbon tullantılarının həcmini məhdudlaşdırmaq sahəsində bir ilk olan ümummilli standartları müəyyən
etdik. Alyaskadan Böyük Düzənliklərə və Meksika Körfəzi Sahillərinə qədər olan ərazilərdə dəyişən iqlimin bir çox sürətli təsirlərindən özlərini qorumağa çalışan yerli liderlər ilə tərəfdaşlıq etdik.
İndi bəzi skeptiklər görülən bu tədbirlərin iş yerlərinə mənfi təsir edəcəyini bəyan edirlər. Əksinə, biz öz tariximizdə özəl sektor tərəfindən iş yerlərinin yaradılması istiqamətində ən davamlı bir dövrün şahidi olmuşuq. Təxminən 20 illik dövr ərzində karbon çirklənməsini ən aşağı səviyyəyə endirdiyimiz bir vaxtda, bütün zamanların ən yüksək məhsul istehsalına nail olduq. Bundan əlavə, keçən il Çin ilə birgə elan etdiyimiz tarixi bəyanatla göstərdik ki, inkişaf etmiş və inkişaf etməkdə olan xalqlar arasında mövcud olan, qlobal tərəqqiyə mənfi təsir edən və uzun illərdir mövcud olan maneələri aradan qaldırmaq mümkündür. Bu nailiyyət onlarla digər dövlətlərə özünün iddialı iqlim hədəflərini müəyyən etmək baxımından stimul vermiş oldu. Bu isə öz növbəsində Parisdə qazanılacaq uğur üçün zəmin yaratmış oldu. Ona görə ki, heç bir dövlət, hətta bizim kimi güclü bir ölkə də bu problemi tək həll etmək iqtidarında deyildir. Həmçinin, ərazisinin böyüklüyündən asılı olmayaraq, heç bir ölkə bu işdən kənarda qalmamalıdır. Bu problemi birlikdə həll etməliyik.
Heç bir saziş, o cümlədən bu saziş də ideal deyildir. 200-ə yaxın dövlətin cəlb olunduğu danışıqlar həmişə çətin olur. Hətta Parisdə müəyyən edilən bütün ilkin hədəflərə çatılsa belə, karbonun atmosferdən azaldılmasına gəldikdə, deyərdim ki, biz yolun yalnız yarısını qət etmişik. Belə ki, bugünkü saziş bizi arxayın salmamalıdır. Belə bir sazişin imzalanması hələ problemin həlli demək deyildir. Qeyd etmək lazımdır ki, Paris sazişi iqlim böhranının həll edilməsi üçün lazım olan davamlı əsasları müəyyən edir və bizim üçün problemi davamlı və səmərəli şəkildə həll etmək baxımından mexanizm və struktur formalaşdırır.
Hər bir xalq öz hədəflərini müəyyən edəcəyi və onları fərqli yanaşma ilə həyata keçirəcəyi üçün bu sazişi iddialı hesab etmək olar. Hər bir ölkəni gördüyü işlərə görə məsuliyyət daşınmağa sövq edəcək dövri mülahizələr və müstəqil qiymətləndirmələrin daxil olduğu güclü şəffaf sistemimiz olacaqdır. Texnologiya inkişaf etdikcə, bu saziş zamanla hətta daha iddialı hədəflər üçün zəmin formalaşdıracaq inkişafa şərait yaradacaqdır. Biz ekoloji cəhətdən daha təmiz iqtisadi inkişafı dəstəkləyən daha həssas ölkələrə dəstək vermək üçün daha geniş öhdəliklərə təminat vermişik. Bir sözlə, bu saziş planetimizi təhdid edən karbon tullantılarının azalması və daha az karbon tullantılarına yol açacaq sahələrə investisiya qoyuluşu ilə iş yerlərinin artması və iqtisadi inkişaf anlamını daşıyır. Bu sazişin tam həyata keçirilməsi iqlim dəyişikliyi ilə bağlı ən arzuolunmaz nəticələrin azaldılmasına və ya qarşısının alınmasına kömək edəcək, eləcə də qarşıdan gələn dövrlərdə daha böyük tərəqqiyə zəmin yaradacaqdır. Bu saziş həm də dünyanın gələcəkdə daha az karbon tullantılarının olmasına nə qədər ciddi yanaşdığının bariz nümunəsidir. Saziş əvvəllər heç zaman mövcud olmayan miqyasda təmiz enerjiyə investisiya qoyulması və innovasiyanın tətbiq edilməsi kimi bir potensiala malikdir. Bizim müəyyən etdiyimiz hədəflər çox iddialıdır. Bu saziş biznes sahələri, elm adamları, mühəndislər, fəhlələr və özəl sektorun nümayəndələrini - investorları birlikdə işləməyə həvəsləndirməklə planetimizi bugünkü vəziyyətindən çıxarmaq üçün əlimizə düşən ən yaxşı fürsətdir.
Mən inanıram ki, bu an bütün dünya üçün dönüş nöqtəsi ola bilər. Biz sübut etdik ki, bu problemi həll etmək üçün həm iradəmiz həm də bacarığımız var. Bu asan olmayacaq. Qazanılan uğur heç də həmişə asan olmur. Biz arxayınlaşmamalıyıq. Baxmayaraq ki, bizim nəsil ekoloji cəhətdən təmiz enerji sənayesinin qurulması ilə bağlı açılan iş yerləri, qənaət edilən pullar kimi bəzi nailiyyətlərə şahidlik edəcək, amma ola bilər ki, uğurlarımızın tam reallaşmasını görməyə ömrümüz yetməsin. Lakin heç bir problem yoxdur. Bu gün ən vacib olan məsələ bu planetin gələcək nəsillər üçün daha sağlam yaşanılacaq məkan olmasından əmin olmaqdır. Məni düşündürən məsələ elə budur. Mən nəvələrimin əlindən tutaraq, təbii ki, baba olmaq xoşbəxtliyi nəsib olandan sonra, bir gün onları parka aparan zaman onların sevinclərini və üzlərindəki təbəssümü görəndə, günəşin sakitcə qürub etdiyini müşahidə edəndə, bütün bunlara bu gün gördüyümüz işlər sayəsində nail olduğumuzu təsəvvürümdə canlandırıram: bizim indi burada gördüyümüz işlər gələcək nəsillərə daha təmiz hava, daha təmiz su və yaşamaq üçün daha yaxşı və davamlı planet miras qoymağımız deməkdir. Bundan vacib nə ola bilər ki? Bu gün, güclü, prinsipial Amerika rəhbərliyi sayəsində uşaqlarımıza daha təhlükəsiz, daha firavan və daha azad bir dünyanı miras qoyacağıq və bu, bizim yer üzərindəki qısa ömrümüzdə həyata keçirməli olduğumuz ən vacib missiyadır.
Yüklə 25,5 Kb. Dostları ilə paylaş:
|