232
Bar orqanlarının əmələ gəlməsində çoxillik qolların rolu böyükdür. Bu
məsələdə çoxillik qolların təkcə miqdarı yox, onların diametrinin də böyük
olmasının əhəmiyyəti vardır. Çoxillik qolun yoğunluğu ilə zoğların miqdarı
arasında birbaşa əlaqə vardır.
N.Nedelçev və M.Kondarevin yazdığına görə məhsulun çoxluğundan şəkərin
aşağı olması o qədər də əsaslı məsələ deyildir, keyfiyyət və kəmiyyət bir-birini
inkar etmir. O da düzgün deyildir ki, yüksək məhsul kolun gücünün tükənməsi ilə
nəticələnir. Təcrübədə həqiqətən məhsulun normadan çoxluğu ilə onun
keyfiyyətinin azalması hallarına rast gəlinir. Onlar bunu tənəyin düzgün kəsilməsi
və yaxud qulluq işlərinin düzgün aparılmaması ilə izah edirlər. Ancaq bu
müəlliflərin fikrindən belə qənaətə gəlinməsin ki, kolda məhsulun həddindən
çoxluğunun keyfiyyətə mənfi təsiri yoxdur.
Keyfiyyətlə kəmiyyət arasındakı asılılığı kolun gücündən kənarda axtarmaq
lazım deyil. Ancaq güclü kollarda yüksək keyfiyyətli məhsul əldə etmək olar.
Kolun güc anlayışını dəqiqləşdirmək lazımdır. Zoğun güclü böyüməsi hələ kolun
güclü olması demək deyildir. Zoğun boyu onun uzunluğu və yoğunluğu ilə ifadə
olunmur. Kolun gücü kök sisteminin, yerüstü hissənin həcmi və ondakı ehtiyat
qida maddələrinin birgə əlaqəsi (fəaliyyəti) ilə ifadə olunur. Eyni zamanda kolun
gücü onun çoxlu miqdarda salxım əmələ gətirməsi və onu tam yetişdirmək
potensialı ilə ölçülür.
Uzun və az miqdarda zoğu olması hələ tənəyin güclü olması demək deyildir.
əksinə, orta uzunluqda və çoxsaylı zoğları olan tənəklər güclü tənəklər hesab
edilir. Kolun gücü başqa mənada onun yetişmiş birillik zoğlarının çəkisi ilə də
ifadə olunur.
Üzüm bitkisində vegetativ və generativ orqanlar arasındakı asılılıq iki yolla
nizamlanır:
1.
kolda çoxillik hissənin çox və az saxlanması;
2.
kolda bir ilik hissənin çox və az saxlanması.
Kolda çoxillik hissə yuxarıda qeyd edildiyi kimi qida anbarı rolunu
oynayır. O, nə qədər yoğun və uzun olsa bir o qədər də çox qida ehtiyatına
malik olur. Çoxillik hissənin çox və az olması torpaq-iqlim şəraitindən, sortun
bioloi xüsusiyyətindən, tənəyin böyümə gücündən, kola verilən formadan və s.-
dən asılıdır.
Bu məsələ üzrə aparılan tədqiqatlarda məlum olmuşdur ki, güclü böyümə
qabiliyyətinə malik üzüm sortlarında çoxillik hissəni çox saxlamaq mümkündür.
Üzüm bitkisinin ümumi gücü ayrı-ayrı zoğların böyümə gücü ilə deyil,
zoğların hamısının birlikdə boy artımı və məhsulun miqdarı ilə müəyyən edilir.
Kolun ümumi gücü nə qədər çox olsa bir o qədər onda oduncaq kütləsi və məhsul
çox olar.
233
Üzüm bitkisinin vegetasiya gücü dedikdə kolun ayrı-ayrı zoğlarının inkişaf
xarakteri nəzərdə tutulmalıdır. Tənəyin ümumi gücünün müəyyən həddə qədər
zəiflədilməsi yolu ilə tənəyin vegetasiya gücünü artırmaq mümkündür. əksinə
onun vegetasiya gücünün zəiflədilməsi yolu ilə sonrakı dövrlər üçün tənəyin
ümumi gücünü zəiflətmək mümkündür. Bundan başqa qeyd etmək lazımdır ki, bu
iki anlayış məhdudlaşdırıldıqda heç də onları bir-birindən ayrı təsəvvür etmək
düzgün olmazdı.
Üzüm bitkisinin inkişafına aşağıdakı iki münasibəti unutmaq olmaz:
1.
üzüm bitkisinin ümumi gücü çox olan vaxtı ayrı-ayrı zoğların inkişafı zəif
olur, onlarda çiçək qrupları az miqdarda və zəif inkişaflı olur. Nəticə etibarilə
onlarda məhsul da az olur. Beləliklə, kolun enerjisi çoxsaylı boy maddələrinə sərf
olunduğundan əsası qoyulmuş generativ orqanlar müəyyən miqdar azalmağa
başlayır;
2.
ikinci halda kolun ümumi gücü azdır, ancaq ayrı-ayrı orqanların inkişafı
zəifdir, yəni kolun vegetasiya gücü çoxdur (belə zoğlar sulu zoğlar adlandırılır),
kolun bütün enerjisi boy nöqtələrinə axdığından gələcək qışlayan gözcüklərdə
əsası qoyulan çiçək qruplarının miqdarı azalır.
Səyyari becərmə sistemində kolun ümumi gücünün az olduğu vaxtı
tumurcuqlarda çiçək qrupunun azalması birinci münasibətə sübutdur. Belə
kollarda kəsmə hər il aparılmaya bilər və kəsildikdən sonra bol məhsul verir.
Sonralar vegetativ orqanların sayı tədricən çoxalır, nəticədə isə ayrı-ayrı zoğların
böyümə gücü azaldığından məhsuldarlıq minimuma düşür. Bu halda təkrar kəsmə
aparılaraq ayrı-ayrı kolların vegetasiya gücünün artırılması lazımdır. Kolda
yükün optimaldan çoxluğu həmin ildə məhsulu artırır, ancaq zoğlar zəif böyüyür
və tumurcuqlarda çiçək başlanğıcları azalır.
Quru kəsmə zamanı orqanların kəskin azaldılması, xüsusilə gözcüklərin
kəskin surətdə azaldılması yeraltı hissə ilə yerüstü hissə arasındakı asılılığı pozur
və bununla da qida maddələrinin ötürülməsi və paylanmasında qeyri-bərabərlik
yaranır. Bunun nəticəsində itirilmiş yaşıl kütlənin bərpa edilməsi ehtiyacı yaranır.
Məhsul vermə ilə əlaqədar olaraq zoğun fizioloji funksiyası embrional zoğun
inkişafını və diferensasiya etməsini, çiçək qrupu kimi əsası qoyulmuş orqanın
bığcığa çevrilməsinin qarşısının alınmasını təmin etməkdir.
Kolun vegetasiya gücü ayrı-ayrı zoğlarda təzahür etdikdə, yəni zoğların bir
qismi sulu zoğlara çevrildikdə onların fizioloji funksiyası çətinləşdiyindən çiçək
qrupunun yarısı və yaxud bir hissəsi bığcığa çevrilir.
Kəsmənin mənfi təsiri üzüm bitkisinə yara vurulmasıdır. Elə bu baxımdan da
mədəni üzümün ömrü yabanı üzümdən az olur. Birillik hissədəki yara tez yaxşı
olur, həm də dərinə getmir. Ancaq çoxillik hissələrdəki iri yaralar qarşı-qarşıya
olduqda bitkinin normal həyat tərzini pozur. Yaraya düşən zərərli